યુનિક આઈડેન્ટિફિકેશન ઓથોરિટી ઓફ ઈન્ડિયા (UIDAI)એ આજે આધાર મેસ્કોટ લોન્ચ કર્યો છે, જે આધાર સેવાઓની જાહેર સમજને સરળ બનાવવા માટે એક નવો નિવાસી-લક્ષી સંદેશાવ્યવહાર સાથી છે. ઉદય નામનો આ આધાર મેસ્કોટ આધાર સંબંધિત માહિતીને વધુ સુસંગત અને લોકો માટે અનુકૂળ બનાવવામાં મદદરૂપ થશે. તે આધાર સેવાઓના સંવાદને સરળ બનાવશે – પછી તે અપડેટ્સ, ઓથેન્ટિકેશન, ઓફલાઇન વેરિફિકેશન, માહિતીની પસંદગીયુક્ત વહેંચણી, નવી ટેકનોલોજીનો સ્વીકાર, જવાબદાર ઉપયોગ અને અન્ય ઘણી બાબતો વિશે હોય.

આ વિઝનને સાકાર કરવા માટે, UIDAIએ MyGov પ્લેટફોર્મ પર રાષ્ટ્રીય ડિઝાઇન અને નામકરણ સ્પર્ધાઓ શરૂ કરીને એક ખુલ્લો અને સર્વસમાવેશક માર્ગ પસંદ કર્યો હતો. આ માટે પ્રતિસાદ જબરદસ્ત રહ્યો હતો. UIDAIને દેશભરમાંથી 875 એન્ટ્રીઓ મળી હતી – જેમાં વિદ્યાર્થીઓ, વ્યાવસાયિકો, ડિઝાઇનર્સ વગેરેનો સમાવેશ થાય છે – દરેકે આધાર તેમના માટે શું રજૂ કરે છે તેનું અનોખું અર્થઘટન આપ્યું હતું. પસંદગી પ્રક્રિયામાં નિષ્પક્ષતા અને કઠોરતા સુનિશ્ચિત કરવા માટે બહુ-સ્તરીય મૂલ્યાંકન પ્રક્રિયા અપનાવવામાં આવી હતી. આ પ્રક્રિયામાંથી જે બહાર આવ્યું છે તે એક સુંદર રચના છે – જે જનતાની કલ્પના દ્વારા આકાર પામી છે અને સંસ્થાકીય ખંત દ્વારા શુદ્ધ કરવામાં આવી છે.

કેરળના ત્રિશૂરના અરુણ ગોકુલે મેસ્કોટ ડિઝાઇન સ્પર્ધામાં પ્રથમ ઇનામ મેળવ્યું હતું, જ્યારે મહારાષ્ટ્રના પુણેના ઇદ્રિસ દવાઈવાલા અને ઉત્તર પ્રદેશના ગાઝીપુરના કૃષ્ણા શર્મા અનુક્રમે બીજા અને ત્રીજા ઇનામના વિજેતા બન્યા હતા. ભોપાલની રિયા જૈને મેસ્કોટ નામકરણ સ્પર્ધામાં પ્રથમ ઇનામ જીત્યું હતું, ત્યારબાદ પુણેના ઇદ્રિસ દવાઈવાલા અને હૈદરાબાદના મહારાજ શરણ ચેલાપિલા અનુક્રમે બીજા અને ત્રીજા ક્રમે રહ્યા હતા.

UIDAIના અધ્યક્ષ નીલકંઠ મિશ્રાએ તિરુવનંતપુરમમાં એક UIDAI કાર્યક્રમમાં મેસ્કોટનું અનાવરણ કર્યું હતું અને વિજેતાઓનું સન્માન કર્યું હતું. UIDAIના અધ્યક્ષ મિશ્રાએ જણાવ્યું હતું કે, મેસ્કોટનું લોન્ચિંગ એ ભારતના એક અબજથી વધુ નિવાસીઓ માટે આધાર સંવાદને સરળ, વધુ સર્વસમાવેશક અને વધુ સુસંગત બનાવવાના UIDAIના સતત પ્રયાસોમાંનું વધુ એક પગલું છે.

UIDAIના CEO ભુવનેશ કુમારે જણાવ્યું હતું કે, ખુલ્લી રાષ્ટ્રીય સ્પર્ધા દ્વારા આ મેસ્કોટની ડિઝાઇન અને નામકરણ માટે લોકોને આમંત્રિત કરીને, UIDAIએ આધારના મુખ્ય સિદ્ધાંતને પુનઃપુષ્ટ કર્યો છે: સહભાગિતા વિશ્વાસ અને સ્વીકૃતિ બનાવે છે. જબરદસ્ત પ્રતિસાદે દર્શાવ્યું કે લોકો આધાર સાથે જાહેર હિત તરીકે કેટલી ઊંડી રીતે જોડાયેલા છે.

UIDAIના ડેપ્યુટી ડાયરેક્ટર જનરલ વિવેક સી. વર્માએ જણાવ્યું હતું કે, જેમ જેમ મેસ્કોટ એક સાથી અને વાર્તાકાર તરીકે તેની સફર શરૂ કરશે, તે નિવાસીઓને આધાર સંબંધિત માહિતી સાથે સરળતાથી જોડાવામાં મદદ કરશે.

SM/BS/GP/JD