প্রধান মন্ত্রী শ্রী নরেন্দ্র মোদীনা ঙসি ন্যু দিল্লীগী ভারত মন্দাপমদা ত্রেদিস্নেল মেদিসিনগী মতাংদা অনিশুবা WHO গ্লোবেল সম্মিৎকী লোইশিনবগী থৌরমদা ৱা ঙাংখ্রে। থৌরম অদুদা ৱা ঙাংলদুনা প্রধান মন্ত্রীনা হায়খি মদুদি হৌখিবা নুমিৎ অহুম অসিদা মালেমগী মফম কয়াদগী লাকপা ত্রেদিস্নেল মেদিসিনগী লমদা লৈরিবা অখঙ-অহৈশিংনা মরুওইবা অমসুং কান্নরবা খন্ন-নৈনবগী থৌরম অমদা শরুক য়াখ্রে। মহাক্না নুংঙাইবা ফোংদোকখি মদুদি ভারতনা মসিগীদমক্তা মপাঙ্গল কনবা প্লেৎফোর্ম অমা ওইনা থবক তৌরি অমসুং থৌওং অসিদা WHOগী এক্তিব ওইবা থৌদাং অদু পনখি। মীফম অসি মায় পাক্না পাংথোকপগীদমক মহাক্না WHO দা, ভারত সরকারগী আয়ুশ মন্ত্রালয়দা অমসুং শরুক য়ারিবা পুম্নমক্তা থাগৎপা ফোংদোকখি।

প্রধান মন্ত্রীনা হায়খি মদুদি “জামনগরদা WHO গ্লোবেল সেন্তর ফোর ত্রেদিস্নেল মেদিসিন লিংখৎপা অসি ভারতকী খুদোংচাবা অমসুং চাউথোকচনীংঙাই অমনি”। মহাক্না নিংশিংখি মদুদি 2022দা অহানবা ত্রেদিস্নেল মেদিসিন সম্মিৎকী মতমদা, মালেমনা চাউনা থাজবা থমদুনা ভারতপু মসিগী থৌদাং অসি পীখি। সেন্তরগী মমিং অমসুং ইথিল মালেমগী থাক্তা হেনগৎলক্লিবা অসি মীপুম খুদিংমক্কী নুংঙাইবা অমনি হায়না শ্রী মোদীনা ফোংদোকখি। মীফম অসিগী মায়পাকপা অসিনা খ্বাইদগী চাউবা খুদম অমা ওইরি। মীফম অসিদা ত্রেদিস্নেল নোলেজ অমসুং মোদর্ন প্রেক্তিসশিং পুনশিন্নবা উবা ফংলি হায়না মহাক্না ফোংদোকখি। মসিদা মেদিকেল সাইন্স অমসুং হোলিস্তিক হেল্থকী তুংলমচৎকী অহোংবা পুরকপা ঙম্বা অনৌবা খোঙথাং কয়া অমা হৌদোকখ্রে। মীফম অসিনা তোঙান তোঙানবা লৈবাকশিংগী হকশেল মন্ত্রীশিং অমসুং মীহুৎশিংগী মরক্তা ৱারী শানবদা মতেং পাংলি হায়না মহাক্না অকনবা ৱাফম থমখি। মসিনা জোইন্ত রিসর্চ প্রমোৎ তৌবা, রিগুলেসনশিং লাইথোকহনবা অমসুং ত্রেনিং অমসুং নোলেজ শেয়রিংদা খুমাং চাউশিলহন্নবা অনৌবা লম্বীশিং হাংদোক্লে। প্রধান মন্ত্রীনা হায়খি মদুদি অসিগুম্বা তেংবাং পীনবা অসিনা তুংলমচৎতা ত্রেদিস্নেল মেদিসিনবু হেন্না শাফবা অমসুং থাজবা য়াবা ওইহনবদা মরুওইবা থৌদাং অমা লৌগনি।

সম্মিৎ অসিগী মনুংদা মরুওইবা হিরম কয়াদা য়ানবা পুরকপা অসিনা মালেমগী ওইবা পার্তনরশিপকী মপাঙ্গল অদু উৎলি হায়না পল্লদুনা শ্রী মোদীনা হায়খি মদুদি রিসর্চ মপাঙ্গল কনখৎহনবা, ত্রেদিস্নেল মেদিসিনগী লমদা দিজিতেল তেক্নোলোজী শিজিন্নবা হেনগৎহনবা অমসুং মালেম পুম্বদা থাজবা য়াবা রেগুলেতরী ফ্রেমৱার্ক শেম্বা অসিনা ত্রেদিস্নেল মেদিসিনবু চাউনা শক্তি পীরগনি। এক্সপো অসিদা দিজিতেল হেল্থ তেক্নোলোজী, এ.আই.দা য়ুম্ফম ওইবা খুৎলাইশিং, রিসর্চ ইন্নোবেসনশিং অমসুং মোদর্ন ৱেলনেস ইনফ্রাস্ত্রকচর উৎখি। মসিনা চৎনবী অমসুং তেক্নোলোজীগী মরক্তা অনৌবা মতেং পীনবা উৎখি। ত্রেদিসন অমসুং তেক্নোলোজী পুন্না চৎমিন্নরকপা মতমদা, মালেমগী হকশেলবু হেন্না ইফেক্তিব ওইহন্নবগী কেপাসিতি অসি য়াম্না হেনগৎলি হায়না প্রধান মন্ত্রীনা অকনবা ৱাফম থমখি। মরম অদুনা মালেমগী মীৎয়েংদগী মীফম অসিগী মায়পাকপা অসি য়াম্না মরু ওই।

প্রধান মন্ত্রীনা হায়খি, "য়োগ অসি ত্রেদিস্নেল মেদিসিন সিস্তেমগী মপুং ওইবা শরুক অমনি অমসুং মসিনা হকশেল, তংদু লৈতাবা অমসুং অমত্তা ওইবগী লম্বী অসি মালেম পুম্বদা তাক্লি।" ভারতনা হোৎনরিবশিং অমসুং লৈবাক 175 হেনবনা মতেং পাংবদগী য়ুনাইতেদ নেসন্সনা জুন 21বু ইন্তর্নেস্নেল য়োগ দে ওইনা লাউথোকখি হায়না মহাক্না নিংশিংখি। শ্রী মোদীনা হায়খি মদুদি হৌখিবা চহিশিংদা য়োগ অসি মালেমগী মফম খুদিংমক্তা য়ৌরে। মহাক্না য়োগকী প্রমোসন অমসুং দিবেলপমেন্তদা শিংথানীংঙাই ওইবা থৌদাং লৌরিবা মীওই খুদিংমকপু থাগৎপা ফোংদোকখি। ঙসি শক্নাইরবা জুরি অমনা অকনবা প্রোসেস অমগী খুত্থাংদা খনগৎলবা শক্নাইরবা মীওই খরদা প্রধান মন্ত্রীগী মনাশিং পীখ্রে হায়না মহাক্না পনখি। প্রধান মন্ত্রীনা হায়খি মদুদি এৱার্দ ফংলবশিং অসিনা ইকাই খুম্নবা, দিসিপ্লিন অমসুং য়োগগীদমক পুন্সি চুপ্পগী ওইবা থৌনাগী খুদম ওইরি। মখোয়গী পুন্সি অসি ঐখোয় পুম্নমক্কী ইথিলনি। মহাক্কী থম্মোয়দগী থাগৎপা ফোংদোক্লদুনা অমসুং য়াইফ পাউজেল পীদুনা প্রধান মন্ত্রীনা মনা ফংলবশিংদা থাগৎপা ফোংদোকখি।

প্রধান মন্ত্রীনা হায়খি মদুদি মীফম অসিগী মহৈ-মশিং অসি মতম চুপ্পগী ওইনা লৈহন্নবা মরু ওইবা খোQথাং কয়া অমা লৌখৎপদা মহাক্না নুংঙাইবা ফোংদোকখি। ত্রেদিস্নেল মেদিসিনগা মরী লৈনবা সাইন্তিফিক দেতা অমসুং পোলিসী দোক্যুমেন্তশিং মফম অমখক্তদা ঙাক-শেন্দুনা থম্নবা গ্লোবেল প্লেৎফোর্ম অমা ওইনা ত্রেদিস্নেল মেদিসিন গ্লোবেল লাইব্রেরী হৌদোকখিবা অদু মহাক্না ফোংদোকখি। শ্রী মোদীনা হায়খি মদুদি খোঙথাং অসিনা লৈবাক খুদিংমক্তা কান্নবা পাউশিং চপ মান্ননা য়ৌহনবদা মতেং পাংগনি। মহাক্না নিংশিংখি মদুদি লাইব্রেরী অসি ভারতনা G20 প্রসিদেন্সীগী মতমদা অহানবা WHO গ্লোবেল সম্মিৎতা লাউথোকখিবনি অমসুং ঙসিদি মসিগী ৱাশক অদু মপুং ফাহনখ্রে।

তোঙান-তোঙানবা লৈবাকশিংগী হকশেল মন্ত্রীশিংনা মালেমগী ওইবা পার্তনরশিপকী অফবা খুদম অমা উৎলি হায়না পল্লদুনা প্রধান মন্ত্রীনা হায়খি মদুদি পার্তনরশিং ওইনা স্তেন্দর্দশিং, সেফতী অমসুং ইনবেস্তমেন্তকুম্বা হিরমশিংদা খন্ন-নৈনখি। মহাক্না হায়খি মদুদি হায়রিবা দাইলোগ অসিনা দিল্লী দিক্লারেসনগী লম্বী য়াৎলে। মসিনা লাক্কদৌরিবা চহিশিংদা অপুনবা রোদমেপ অমা ওইনা মথৌ তৌগনি। শ্রী মোদীনা তোঙান তোঙানবা লৈবাকশিংগী শক্নাইরবা মন্ত্রীশিনা পুন্না হোৎনখিবা অদু থাগৎপা ফোংদোকখি অমসুং তেংবাং পীনবগীদমক থাগৎপা ফোংদোকখি।

শ্রী মোদীনা মখা তারদুনা হায়খি মদুদি ঙসি দিল্লীদা, WHO সাউথ-ইস্ত এসিয়া রিজনেল ওফিসসু শঙ্গাখ্রে, মসি ভারতকী অচম্বা খুদোল অমনি হায়না মহাক্না ফোঙদোকখি। ওফিস অসিনা রিসর্চ, রেগুলেসন অমসুং কেপাসিতী বিল্দিংগীদমক গ্লোবেল হব অমা ওইনা থবক তৌগনি হায়না মহাক্না অকনবা ৱাফম থমখি।

ভারতনা মালেম শীনবা থুংনা হকচাং ফনা লৈনবা পার্তনরশিপশিংদা মীৎয়েং চংলি হায়না পল্লদুনা প্রধান মন্ত্রী মোদীনা মরুওইবা কোলাবোরেসন অনিগী মতাংদা পনখি। অহানবদা BIMSTEC লৈবাকশিংগীদমক সেন্তর ওফ এক্সিলেন্স অমা লিংখৎপা, মসিনা খা অমসুং খা-নোংপোক এসিয়াগী লমশিং কোনশিল্লগনি। অনিশুবদা সাইন্স, ত্রেদিস্নেল প্রেক্তিস অমসুং হকশেল পুনশিন্নবা পান্দমদা জপানগা লোয়ননা কোলাবোরেসন অমা লৈরি।

প্রধান মন্ত্রীনা হায়খি মদুদি মীফম অসিগী থিম, "রিস্তোরিং বেলেন্স: সাইন্স এন্দ প্রেক্তিস ওফ হেল্থ এন্দ ৱেল-বিং" অসি হোলিস্তিক হেল্থকী ফাউন্দেস্নেল ৱাখল্লোন অদু উৎলি। আয়ুর্বেদনা হকশেলগা খল কাইদনা থম্বগা মান্নৈ অমসুং মসিগী খল অসি ঙাক্তুনা থম্বা মীওইশিং খক্তনা তশেংনা হকচাং ফনা লৈ হায়না মহাক্না ফোংদোকখি। ঙসিদি, দাইবেতিস, হার্ত এতেক, দিপ্রেসন অমসুং কেন্সরদগী হৌরগা লাইনাশিং অসিদা থবক-পুন্সিগী খল কাইবা, দাইৎকী খল কাইবা, তুম্বা কাইবা, গত মাইক্রোবিওমগী খল কাইবা, কেলোরীগী কাইবা অমসুং ইমোসনেলগী খল কাইবা য়াওনা পুন্সি মহিং অমসুং খল কাইবা অসিনা নুংগী ওইবা মরমশিং ওইরি হায়না মহাক্না পনখি। মহাক্না অকনবা ৱাফম থমখি মদুদি মালেমগী ওইবা হকশেলগী শিংনবশিং অসি অসিগুম্বা খল কাইবা অসিদগী লাকপনি। স্তদী অমসুং দেতানা মসি ময়েক শেংলে। অমসুং হকশেলগী অখঙ-অহৈশিংনা মসি হেন্না ফজনা খঙই হায়না মহাক্না ফোংদোকখি। প্রধান মন্ত্রীনা হায়খি মদুদি "রিস্তোরিং বেলেন্স" অসি মালেমগী ওইবা ৱাফম অমা খক্তা নত্তে, মালেমগী ওইবা তঙাই ফদবা অমনি, অমসুং মসিগীদমক্তা অথুবা খোঙথাংশিং লৌখৎনবা মহাক্না হায়খি।

21শুবা চহীচাদা পুন্সিদা খল কাইদনা থম্বা ঙম্নবগী শিংনবসি হেন্না হেন্না চাউখৎলগনি হায়না পল্লদুনা শ্রী মোদীনা হায়খি মদুদি অনৌবা তেক্নোলোজিকেল ইরা, এ.আই. অমসুং রোবোতিক্সনা মীওইবগী পুৱারীদা খ্বাইদগী চাউবা অহোংবা পুরক্লগনি অমসুং লাক্কদৌরিবা চহিশিংদা পুন্সি মহিং অসি মমাংদা অমুক্তা ওইখিদ্রিবা মওংদা হোংলগনি। হকচাংগী থবক য়াওদনা রিসোর্স অমসুং ফেসিলিতীগী খুদোংচাবগা লোয়ননা অহোংবা পুন্সি মহিং অসি মীওইবগী হকচাংদা থাজরুদবা শিংনবশিং থোকহল্লগনি হায়বসি খঙমিন্নবা মথৌ তাই হায়না মহাক্না অকনবা ৱাফম থমখি। ত্রেদিস্নেল হেল্থকেয়রনা হৌজিক্কী মথৌ তাবশিংদা মীৎয়েং চংবা খক্তা নত্তনা তুংগী থৌদাংশিংদসু মীৎয়েং চংবা মথৌ তাই হায়না প্রধান মন্ত্রীনা ফোংদোকখি, মসি মীপুম খুদিংমক্কী অপাম্বা অমনি।

প্রধান মন্ত্রীনা হায়খি মদুদি ত্রেদিস্নেল মেদিসিনগী মতাংদা খন্ন-নৈনরকপা মতমদা, সেফতী অমসুং এভিদেন্সকী মতাংদা মহৌশানা ৱাহং অমা থোরকই। মহাক্না হায়খি মদুদি ভারতনা মসিগী মাইকৈ অসিদা লেপ্পা লৈতনা থবক তৌরি। মহাক্না হায়খি মদুদি সম্মিৎ অসিগী মনুংদা, অশ্বগন্ধাগী খুদম পুথোকখি। মহাক্না অকনবা ৱাফম থমখি মদুদি অশ্বগন্ধা অসি চহি চা কয়াদগী ভারতকী ত্রেদিস্নেল মেদিকেল সিস্তেমশিংদা শিজিন্নদুনা লাক্লি। শ্রী মোদীনা হায়খি মদুদি কোবিদ-19গী মতমদা মালেমগী ওইনা মসিগী দিমান্দ অসি য়াম্না হেনগৎখি অমসুং লৈবাক কয়াদা মসি শিজিন্নবা হৌখি। মহাক্না হায়খি মদুদি ভারতনা রিসর্চ অমসুং এভিদেন্স-বেজ ভেলিদেসনগী খুত্থাংদা অশ্বগন্ধাবু থাজবা য়াবা মওংদা মাংলোমদা চংশিল্লি। মহাক্না হায়খি মদুদি সম্মিৎ অসিগী মনুংদা অশ্বগন্ধাগী মতাংদা অখন্নবা মালেমগী খন্ন-নৈনবগী থৌরম অমা পাংথোকখি। মহাক্না হায়খি মদুদি ইন্তর্নেস্নেল এক্সপর্তশিংনা মসিগী সেক্যুরিতী, ক্বালিতী, অমসুং শিজিন্নবগী মতাংদা কুপ্না খন্নখি। প্রধান মন্ত্রীনা হায়খি মদুদি ভারতনা অসিগুম্বা মতমগী চাংয়েং তৌরবা পাম্বীশিং অসি মালেমগী মীয়ামগী হকশেলগী শরুক অমা ওইহন্নবা মপুং ফানা থৌরাং তৌরি।

মতম অমদা ত্রেদিস্নেল মেদিসিন অসি হকচাং ফনা লৈনবা নৎত্রগা পুন্সি মহিংগীদমক খক্তমক শীজিন্নৈ হায়না লৌনরম্মি, অদুবু ঙসিদি মসিগী ৱাখল্লোন অসি য়াম্না থুনা হোংলক্লি হায়না পল্লদুনা শ্রী মোদীনা হায়খি মদুদি ত্রেদিস্নেল মেদিসিন্না অরুবা ফিভমদা ফাওবা ইফেক্তিব ওইবা থৌদাং অমা লৌবা ঙম্মি অমসুং ভারতনা মসিগী ৱাখল্লোন অসিগা লোয়ননা মাংলোমদা চংশিল্লি। আয়ুশ মন্ত্রালয় অমসুং WHO-ত্রেদিস্নেল মেদিসিন সেন্তরনা অনৌবা খোঙথাং অমা হৌদোকপদা মহাক্না নুংঙাইবা ফোংদোকখি। মহাক্না হায়খি মদুদি মখোয় অনিমক্না ভারত্তা ইন্তিগ্রেতিব কেন্সর কেয়র মপাঙ্গল কনখৎহন্নবা পুন্না হোৎনরি। মসিগী মখাদা, ত্রেদিস্নেল মেদিকেল সিস্তেমশিং অসি মোদর্ন কেন্সর ত্রিৎমেন্তকা পুনশিন্নগনি। মহাক্না অকনবা ৱাফম থমখি মদুদি খোঙথাং অসিনা ইভিদেন্সতা য়ুম্ফম ওইবা গাইদলাইনশিং শেমগৎপদসু মতেং পাংগনি। ভারতকী মরুওইবা ইন্সতিত্যুসন কয়ানা এনিমিয়া, অরথ্রাইতিস অমসুং দাইবেতিসকুম্বা হকশেলগী মরুওইবা ইসুশিংদা ক্লিনিকেল স্তদীশিং পাংথোক্লি হায়না প্রধান মন্ত্রীনা ফোংদোকখি। মহাক্না হায়খি মদুদি অরিবা মতমগী চৎনবীগা লোয়ননা নহা ওইবগী ইনর্জীগা লোয়ননা ভারত্তা স্তার্ত-অপ কয়া অমসু হীরম অসিদা চঙশিল্লক্লি। মহাক্না হায়খি মদুদি হায়রিবা হোৎনরিবশিং অসিগী খুত্থাংদা ত্রেদিস্নেল মেদিসিন অসি অনৌবা থাক্তা য়ৌরক্লি।

প্রধান মন্ত্রীনা হায়খি মদুদি ঙসিদি ত্রেদিস্নেল মেদিসিন অসি ৱারেপ লৌবা য়াবা তাঙ্কক অমদা লাক্লে। মহাক্না হায়খি মদুদি মালেমগী মীশিংগী অয়াম্বা শরুক্না মতম কয়াগী মমাংদগী হিদাক-লাংথকশিং অসিদা থাজবা থম্লি, অদুম ওইনমক ত্রেদিস্নেল মেদিসিনগী অচৌবা পোতেন্সিএল লৈজরবসু মদুগী তঙাই ফদবা মফম অদু ফংদ্রি। সাইন্সকী থাজবা অসি সাইন্সকী খুত্থাংদা ফংহনগদবনি অমসুং মসিগী পাকথোক চাউথোকপা অসি মখা তানা পাকথোক চাউথোকহনগদবনি হায়না মহাক্না অকনবা ৱাফম থমখি। মহাক্না হায়খি মদুদি মসিগী থৌদাং অসি লৈবাক অমখক্তদা লৈতে অদুবু মসি ঐখোয় পুম্নমক্কী থৌদাংনি। প্রধান মন্ত্রীনা হায়খি মদুদি মীফম অসিগী হৌখিবা নুমিৎ অহুম অসিদা শরুক য়াখিবা, ৱারী শানখিবা অমসুং থৌদাং লৌখিবা অসিনা মালেম অসিনা মসিগী মাইকৈ অসিদা পুন্না মাংলোমদা চংশিন্নবা শেম-শারি হায়বা থাজবা অসি হেন্না চেৎশিলহল্লে। মহাক্না মীপুম খুদিংমক্তা থাজবা, ইকাই খুম্নবা অমসুং থৌদাং লৌদুনা ত্রেদিস্নেল মেদিসিনবু খুমাং চাউশিলহন্নবা ৱারেপ লৌনবা হায়খি। মীফম অসি মায়পাক্না পাংথোকখিবগীদমক মহাক্না অমুক্কা হন্না মীপুম খুদিংমক্তা নুংঙাইবা ফোংদোকখি।

থৌরম অদুদা WHOগী দাইরেক্তর জেনরেল, দোক্তর তেদ্রোস অধানোম গিব্রিয়েসস, কেন্দ্রগী মন্ত্রীশিং, শ্রী জে.পি. নদ্দা, শ্রী প্রতাপরাও জাধব অমদি অতৈ মশক নাইবা মীওইশিংনা শরুক য়াখি।

বেকগ্রাউন্দ

ত্রেদিস্নেল মেদিসিনগী মতাংদা অনিশুবা WHO গ্লোবেল সমিৎ প্রোগ্রাম অসিনা মালেমগী, সাইন্সতা য়ুম্ফম ওইবা অমসুং মীয়ামদা মীৎয়েং থম্লিবা ত্রেদিস্নেল মেদিসিনগী এজেন্দা অমা শেমগৎপদা ভারতকী চাউখৎলক্লিবা লুচিংবা অমসুং পাইওনিয়রিং ইনিসিয়েতিবশিংবু ময়েক শেংহল্লি।

প্রধান মন্ত্রীনা রিসর্চ, স্তেন্দার্দাইজেসন, অমসুং মালেমগী ওইবা কোলাবোরেসনগী থোংদা ত্রেদিস্নেল মেদিসিন অমসুং ইন্দিয়ন নোলেজ সিস্তেমবু মরুওইনা লৌনবা মতম পুম্নমক্তা অকনবা ৱাফম থম্লি। ভিজন অসিগী মতুং ইন্না, প্রোগ্রাম অসিগী মনুংদা, প্রধান মন্ত্রীনা আয়ুশ সেক্তরগী মাস্তর দিজিতেল পোর্তেল অমা ওইরিবা মাই আয়ুশ ইন্তিগ্রেতেদ সর্বিসেস পোর্তেল (MAISP) য়াওনা আয়ুশকী লমদা মরুওইবা খোঙথাং কয়া অমা হৌদোকখি। মহাক্না আয়ুশ প্রদক্তশিং অমসুং সর্বিসশিংগী ক্বালিতীগী মালেমগী বেঞ্চমার্ক অমা ওইনবা পান্দম থম্লিবা আয়ুশ মার্কসু উরেপ উয়ুং তমখি।

থৌরম অদুদা, প্রধান মন্ত্রীনা য়োগগী ত্রেনিংগী মতাংদা WHOগী তেক্নিকেল রিপোর্ত অমসুং লাইরিক "ফ্রোম রুত তু গ্লোবেল রিচ: 11 ইয়র্স ওফ ত্রান্সফোর্মেসন ইন আয়ুশ" ফোংখি। ভারতকী ত্রেদিস্নেল মেদিসিনেল হেরিতেজকী মালেমগী ওইবা রেজোনেন্সকী খুদম অমা ওইরিবা অশ্বগন্ধাগী কোম্মেমোরেতিব পোস্তেল স্তাম্প অমসু মহাক্না ফোংখি।

প্রধান মন্ত্রীনা দিল্লীদা অনৌবা WHO-সাউথ ইস্ত এসিয়া রিজনেল ওফিস কমপ্লেক্সসু শঙ্গাখি। মসিদা WHO ইন্দিয়া কন্ত্রী ওফিসসু লৈগনি। মসি মালেমগী হকশেলগী ওর্গানাইজেসনগা লোয়ননা ভারতকী পার্তনরশিপকী মরুওইবা মাইলস্তোন অমনি।

প্রধান মন্ত্রীনা চহি 2021–2025ফাওবগী মনুংদা য়োগকী প্রমোসন অমসুং দিবেলপমেন্তদা শিংথানিংঙাই ওইবা থৌদাং লৌবগীদমক পীবা প্রধান মন্ত্রীগী এৱার্দ ফংলবশিংবু থাগৎপা ফোংদোকখি। এৱার্দশিং অসিনা য়োগবু খল কাইদনা থম্বা, নুংঙাই-য়াইফবা অমসুং শান্তিগী মতম চুপ্পগী ওইনা চত্থবা থৌওং অমনি হায়না অমুক হন্না ফোংদোক্লি। মসিনা হেন্না হকচাং ফনা অমসুং হেন্না মপাঙ্গল কনখৎপা অনৌবা ভারত অমা শেমগৎপদা মতেং পাংলি।

প্রধান মন্ত্রীনা ত্রেদিস্নেল মেদিসিন দিস্কভরী স্পেস, ভারত অমসুং মালেম শিনবা থুংনা লৈরিবা ত্রেদিস্নেল মেদিসিনগী লৌশিং-জ্ঞানগী সিস্তেমশিংগী মখল-মখা কয়া, মনুং হুৎপা অমসুং হৌজিক মতমগা মরী লৈনবশিং অদু উৎলিবা একজিবিসন অদুদসু চৎখি।

ৱার্ল্দ হেল্থ ওর্গনাইজেসন (WHO) অমসুং ভারত সরকারগী আয়ুশ মন্ত্রালয়না পুন্না শীন-লাঙদুনা শীনবা অসি 2025গী দিসেম্বর 17দগী 19 ফাওবা 'রিস্তোরিং বেলেন্স: সাইন্স এন্দ প্রাক্টিস ওফ হেল্থ এন্দ ৱেল-বিংস' হায়বা থিমগী মখাদা ন্যু দিল্লীগী ভারত মান্দাপমদা পাংথোক্লি। সম্মিৎ অসিদা মালেমগী লুচিংবশিং, পোলিসী মেকরশিং, সাইন্তিস্তশিং, প্রেক্তিস্নেলশিং, ইন্দিজিনস নোলেজ হোল্দরশিং অমসুং সিভিল সোসাইতীগী মীহুৎশিংনা ইক্বিতেবল, সস্তেনেবল অমসুং ইভিদেন্স-দ্রিভেন হেল্থ সিস্তেমশিং চাউখৎহন্নবগী মতাংদা কুপ্না খন্ন-নৈনখি।

Speaking during the closing ceremony of Second WHO Global Summit on Traditional Medicine.@WHO https://t.co/ysO8TKiWJ8

— Narendra Modi (@narendramodi) December 19, 2025

ये हमारा सौभाग्य है और भारत के लिए गौरव की बात है कि WHO Global Centre for Traditional Medicine भारत के जामनगर में स्थापित हुआ है: PM @narendramodi

— PMO India (@PMOIndia) December 19, 2025

योग ने पूरी दुनिया को स्वास्थ्य, संतुलन और सामंजस्य का रास्ता दिखाया है: PM @narendramodi

— PMO India (@PMOIndia) December 19, 2025

भारत के प्रयासों और 175 से ज्यादा देशों के सहयोग से संयुक्त राष्ट्र द्वारा 21 जून को योग दिवस घोषित किया गया था।

बीते वर्षों में हमने योग को दुनिया के कोने-कोने तक पहुंचते देखा है: PM @narendramodi

— PMO India (@PMOIndia) December 19, 2025

***