ইকাই খুম্নরবা স্পীকর সর,

মসিগী মরুওইবা থৌরম অসিদা অপুনবা খন্ন-নৈনবগী লম্বী অসি খল্লকপগীদমক্তা ঐহাক্না হাউস অসিগী ইকাই খুম্নরবা মেম্বর পুম্নমক্তা থাগৎপা ফোংদোকচরি। লৈবাক অসিগী নীংতম ইহৌদা ইনর্জী, ইথিল, অমসুং থৱায় কৎপগী থৌনা অমসুং অওনবা পুরকপগী ৱাখল্লোন পীরম্বা মন্ত্র, খোল্লাউ অসিবু ইকায় খুম্নবা উৎতুনা নিংশিংনবা - হাউস অসিগী মনুংদা ভন্দে মাতরমগী থৌরম পাংথোকপা অসি ঐখোয় পুম্নমক্কী ওইনা চাউথোকচনীংঙাই ওই। ভন্দে মাতরামগী চহি 150 মপুং ফারকপগী পুৱারী ওইরবা থৌরম অসিদা ঐখোয়না থেংনরিবা অসি চাউথোকচনিংঙাইনি। হায়রিবা মতম অসি পুৱারীগী অৱাংবা থাত্তা থোকখিবা থৌদোক কয়া অমা ঐখোয়গী মাংদা পুখৎলি। খন্ন-নৈনবগী থৌওং অসিনা পৱার হাউস অসিগী থৌদাং অদু ময়েক শেংনা উৎলগনি, অদুবু ঐখোয়না অপুনবা ওইনা মসিগী তাঙ্কক অসিবু ফজনা শীজিন্নরবদি, মসিনা লাক্কদৌরিবা চারোন-শুরোনগীদমক্তা, মতুং তারকপা মীরোল খুদিংমক্কীদমক্তা তমনবগী হৌরকফম অমা ওইবসু য়াই।

ইকাই খুম্নরবা স্পীকর সর,

মসি পুৱারীগী পুক্নিং থৌগৎনিংঙাই ওইরবা চেপ্তর কয়ানা ঐখোয়গী মাংদা অমুক হন্না হিংগৎলকখিবা মতম অমনি। হৌখিবা মতমদা ঐখোয়না চাউথোকচনীংঙাই ওইবা মওংদা ঐখোয়গী সম্বিধানগী চহি 75শুবা মপোক কুমওন পাংথোকখি। ঙসি লৈবাক অসিনা সরদার বল্লভভাই পতেল অমসুং ভগৱান বীরসা মুন্দাগী 150শুবা মপোক কুমওনসু পাংথোক্লি, অমসুং ঐখোয়না গুরু তেগ বহাদুরজীগী 350শুবা শহিদ মপোক কুমওনসু নিংশিংলি। ঙসি, ঐখোয়না মফম অসিদা ভন্দে মাতরমগী চহি 150 মপুং ফারকপগী থৌরম অসিদা হাউস অসিগী অপুনবা ইনর্জী অসি থেংননবা হোৎনরি। চহি 150গী খোঙচৎ অসি তোঙান তোঙানবা তাঙ্কক কয়াদগী লাক্লি।

অদুবু ইকাই খুম্নরবা স্পীকর সর,

ভন্দে মাতরমনা চহি 50 মপুং ফারকপা মতমদা লৈবাক অসি মীখা পোনবগী য়োৎলিং মখাদা হিংবা মথৌ তাখি। চহি 100 মপুং ফারকপদা, লৈবাক অসি ইমর্জেন্সীগী য়োৎলিংনা পুন্দুনা লৈখি। ভন্দে মাতরমগী চহি 100শুবা মপোক কুমওন অসি য়াম্না চাউনা পাংথোক্কদৌরিবা মতম অসিদা, ভারতকী সম্বিধানগী মকোক অদু কুপশিল্লি। ভন্দে মাতরামনা চহি 100 শুরকপা মতমদা, লৈবাকপোকপীগীদমক হিংখিবা অমসুং শিখিবা মীওইশিং অদু জেলদা থাদোরকখি। লৈবাক অসিনা নীংতম্বা ফংনবগীদমক লান্থেংনবগী থৌনা অদু ঈশৈ অসিনা পীরম্মি। লৈবাক অসিনা চহি 100 মপুং ফারকপদা, ঐখোয়গী পুৱারীদা অঙকপা তাঙ্কক অমা লাকখি। ঐখোয়না (ময়েক শেংদবা) অসিদা ফাদুনা লৈখি।

ইকাই খুম্নরবা স্পীকর সর,

150শুবা চহি অসিনা ঐখোয়দা অহানবা ওইনা চাউথোকচনীংঙাই ওইরবা চেপ্তর অদু অমুক হন্না শেমগৎনবা খুদোংচাবা পীরি, অমসুং ঐহাক্না থাজৈ মদুদি হাউস অসিনা নত্ত্রগা লৈবাক অসিনা অসিগুম্বা খুদোংচাবা অসি মাংহল্লোইদবনি। ভন্দে মাতরমনা লৈবাক অসিবু 1947তা নীংতম্বা ফংহনখি। নীংতম্বগী লানগী ইথিলগী লমজিংবা অসি 'ভন্দে মাতরম'গী মায় পাকপা ঈশৈদা য়াওখি।

ইকাই খুম্নরবা স্পীকর সর,

ঙসি ঐহাক্না ভন্দে মাতরম 150গী থৌরম অসিদা খন্ন-নৈনবগীদমক অদোমগী মমাংদা লেপ্লিবা অসিদা, মফম অসিদা লৈঙাকপা নৎত্রগা বিরোধি অমত্তা লৈতে, মরমদি মফম অসিদা লৈরিবা ঐখোয় পুম্নমক্কী মফমদা, মসি তশেংনা অচৌবা লমন অমা খঙমিন্নবগী তাঞ্জা অমনি। ভন্দে মাতরমনা মরম ওইদুনা ফিরেপ চেৎপা মীশিংনা নীংতম ইহৌ অসি লান্থেংনখি, অমসুং মসিগী মহৈদি ঙসি ঐখোয় পুম্নমক মফম অসিদা লৈরি। মরম অদুনা, পার্লিয়ামেন্তকী মীহুৎ পুম্নমক্কী অমসুং মীয়ামগী মীহুৎ পুম্নমক্কী ওইনা, ঙসি অসি ঐখোয়না ভন্দে মাতরমদা তোল্লিবা লমন অদু খঙমিন্নবগী থৌরম অমনি। অমসুং মদুদগী ইথিল লৌদুনা, ঐখোয়না অমুক হন্না ভন্দে মাতরমনা লৈবাক অসিগী নীংতম লানগী থৌওং অমত্তা ওইনা পুনশিনখিবা- অৱাং, খা, নোংপোক অমসুং নোংচুপ- লৈবাক পুম্বনা অমত্তা ওইনা খোঙজং চংশিনখিবা ৱাখল্লোন অদু অমুক হন্না হিংগৎহনগদবনি। অমুক্কা হন্না, মতম অসিনা ঐখোয়বু অমত্তা ওইনা চৎমিন্নবা, লৈবাক অসিবু ঐখোয়গা লোয়ননা পুরক্নবা হায়জরি। নিংতম লান্মীশিংগী মঙলানশিং - ভন্দে মাতরম 150 অসি ঐখোয়গী ইথিল, ঐখোয়গী ইনর্জী ওইগদবনি। ভারতপু মশা-মরোমদোম লেপচবা ওইহন্নবা অমসুং 2047 ফাওবদা ভারতপু চাউখৎলবা লৈবাক অমা ওইহন্নবা ঐখোয়না হোৎনগদবনি। ভন্দে মাতরমগী থৌরম অসিনা ঐখোয়দা অচেৎপা ফিরেপ অদু অমুক হন্না পীনবা অচৌবা খুদোংচাবা অমা পীরি।

ইকাই খুম্নরবা স্পীকর সর,

দাদা অদোম কৈশু তৌদব্রা? নত্তে চহি অসিদা মসি অদুম থোকপনি।

ইকাই খুম্নরবা স্পীকর সর,

বঙ্কিম চন্দ্র জীনা 1857তা ভন্দে মাতরমগী খোঙচৎ হৌরকখি। 1857গী ইহৌ অদুগী মতুংদা বৃতিশ এম্পায়রনা অৱাবা কয়া মায়োক্নখি। মখোয়না ভারত্তা মখল কয়াগী প্রেসর পীখি, মশীং থীঙমদ্রবা থৌওং কয়া পাংথোকখি, অমসুং লমদম অসিগী মীয়াম্বু অকিবা পোকহনখি। মতম অদুদা, ভারতকী য়ুমথোং খুদিংমক্তা মখোয়গী জাতিগী ঈশৈ, গোদ সেভ দি ক্বিন অসি শন্দোক্নবা ৱাখল্লোন অমা লৈরম্মি। অসিগুম্বা মতম অমদা বঙ্কিম দানা শিংনবদু থেংনখি, মহাক্না থেংনখিবা অদুদগী হেন্না মপাঙ্গল লৈনা পাউখুম পীখি, অমসুং ভন্দে মাতরাম পোকখি। চহি খরগী মতুংদা, 1882দা মহাক্না অনন্দমথ ইবদা, মহাক্না ঈশৈ অসি য়াওখি।

ইকাই খুম্নরবা স্পীকর সর,

চহি লিশিং কয়াগী মমাংদগী ভারতকী শক্তমদা য়াওদুনা লাক্লবা ৱাখল্লোন অদু ভন্দে মাতারমনা অমুক হন্না পুখৎলকখি। মহাক্না ঐখোয়দা চপ মান্নবা ৱাখল্লোন, চপ মান্নবা মগুন, চপ মান্নবা চৎনবী অমসুং নাৎ অসি ফজবা অমসুং অৱাংবা থাক্কী ৱাহৈশিংগী খুত্থাংদা পীখি। ভন্দে মাতরম অসি পোলিতিকেল ফ্রীদমগী মন্ত্র খক্তমক নত্তে, ঐখোয়না ঐখোয়গী লম্বীদা নীংতম্না লেপচবা ঙম্নবগীদমক্তা বৃতিশকী মফম অসিদগী চৎখিনবা হায়বা খক্তমক নত্তে। মসিনা মদুদগী হেন্না ইথিল পীখি। নীংতম লানফম অসি মশামক্না মমা লৈবাক্কী নীংতম্বা ফংনবগী শেংলবা মিসন অমনি। ভারতী ইমাবু মহাক্কী য়োৎলিং থাদৎনবগীদমক্তা মসি অশেংবা লান অমনি। অমসুং ঐখোয়না ভন্দে মাতরমগী কলচরেল ফাউন্দেসন নৈনবদা, মসিগী ভেল্যুশিংগী লাইনীং অসি বেদিক এজ ফাওবা চৎলি। ঐখোয়না ভন্দে মাতরম হায়রকপা মতমদা, থোরক্লিবা ৱাখল্লোন অসি বেদিক মতমগী অদুগা মান্নৈ: “মাতা ভুমিঃ পুত্তোহ পৃথিব্য” –“মালেম অসি ঐহাক্কী ইমানি অমসুং ঐহাক মহাক্কী মচানি”।

ইকাই খুম্নরবা স্পীকর সর,

লঙ্কাগী মতিক ময়াই য়াদবদগী ভগবান শ্রী রামনা অসুম্না হায়রম্মি, "জননী জন্মভূমিস্চ স্বগার্দপি গরীয়সী" - "মমা অমসুং মমা লৈবাক অসি স্বর্গদগীসু হেন্না চাউই।" ভন্দে মাতরম অসি অসিগুম্বা অৱাংবা থাক্কী চৎনবী অসিগী মোদর্ন ইমবোদিমেন্তনি।

ইকাই খুম্নরবা স্পীকর সর,

বঙ্কিম দানা ভন্দে মাতরম ইখিবা মতমদা, মসি মহৌশানা নীংতম লান্মীগী খোঙজং ওইখি। নোংপোক থংবা অমসুং নোংচুপ থংবা, অৱাং থংবা অমসুং খা থংবা, ভারত মচা খুদিংগী ৱারেপ ওইরক্লি ভন্দে মাতরম। ভন্দে মাতরমবু থাগৎচদুনা, ৱাহৈ পরেংশিং অসি ইখি:

“ইমা লৈবাক্কী নীংতম্বগী ফম্পাক্তা সেল্ফ-ইন্তরেস্তকী অচৌবা কত্থোকপা য়াওই – মসি ভন্দে মাতরমগী ৱাহৈশিংনি। মসি পুন্সি পীরিবা মন্ত্রনি, মালেম খুদুম চন্নবা মন্ত্রনি; মসি থৌনা পোকহনবনি – মসি ভন্দে মাতরমগী ৱাহৈশিংনি। অশাবা ঈনা ইবা, পীরাংনা থমোয় শেগাইবা – মসি অথৌবশিংগী চাউথোকচবনি – মসি ভন্দে মাতরমগী ৱাহৈশিংনি।”

ইকাই খুম্নরবা স্পীকর সর,

নুমিৎ খরনিগী মমাংদা, ভন্দে মাতরম 150গী থৌরম হৌরকপা মতমদা ঐহাক্না থৌরম অদুদা হায়খি মদুদি ভন্দে মাতরমনা চহি লিশিং কয়াগী কলচরেল ইনর্জীগী খুদম্নি। মসিনা নীংতম্বা অমসুং নীংতম্লবা ভারতকী মঙলানবু মঙফাওনহনখি। বৃতিশকী মতমদা, ভারতপু মপাঙ্গল লৈতবা, কান্নদবা, অতনবা ওইনা উৎপীবা - ভারতপু ওইথোকপা য়াবা মওং পুম্নমক্তা হন্থহন্নবা ফেশন ওইরকখি। বৃতিশ ইথিলগী মখাদা শেমগৎলকখিবা মীওইশিংনসু হায়রিবা লোল অসিবু শিজিন্নখি। লৈবাক অসিবু অপীকপা মগুন লৈতবগী ৱাখল্লোন অসিদগী লান্থোক্নবা অমসুং ভারতকী শক্তি অদু উৎনবা, বঙ্কিম দা, মহাক্কী মপাঙ্গল কনবা ঈশৈগী থম্মোয়দা, অসুম্না ইখি:

“মা ভারতী অসি লৌশিং অমসুং চাউখৎপগী লাইরেম্বীনি অমসুং দুর্গগী থৌনা ফবা লান্মীনি, মহাক্না মহাক্কী য়েক্নবশিংগী মায়োক্তা মহাক্কী খুৎলাইশিংগা লোয়ননা লেপ্পী।”

ইকাই খুম্নরবা স্পীকর সর,

হায়রিবা ৱাহৈশিং অসি, মসিগী ইথিল অসি, মসিগী ইথিল অসিনা কোলোনিএল রুলগী মখাদা অৱাবদা চঙশিল্লক্লিবা ভারত মচাশিংবু থৌগৎখি। হায়রিবা লাইনশিং অসিনা লৈবাক অসিগী মীওই কোতি কয়াবু খঙহনখি মদুদি লান অসি লম খরা ফংনবগীদমক্তা নত্তে, শক্তিগী সীত অমগীদমক্তা নত্তে, অদুবু জাতি অসিবু মীখা পোনবগী য়োৎলিংদগী নীংতম্নবগীদমক্তা অমসুং মসিগী অরিবা চৎনবীশিং, মসিগী অচৌবা কলচর অমসুং মসিগী শিংথানীংঙাই ওইরবা পুৱারীবু অমুক হন্না হিংগৎহন্নবগীদমক্তনি।

ইকাই খুম্নরবা স্পীকর সর,

ভন্দে মাতরামগী মীয়ামগা লৈনরিবা অচেৎপা মরী অসি ঐখোয়গী নীংতম লানগী মতম শাংনা চৎথরক্লবা ৱারীগী খুত্থাংদা ফোংদোক্লি।

ইকাই খুম্নরবা স্পীকর সর,

করিগুম্বা সিন্ধু, সরস্বতী, কবেরী, গোদাবরী, গঙ্গা নৎত্রগা যমুনা হায়না নৈনরকপা মতমদা, মদুগা লোয়ননা কলচরগী ঈচেল, চাউখৎপগী খোঙচৎ, মীওইবগী পুন্সিগী ৱারীসু চেল্লি। অদুবু ভারতকী নীংতম লানগী তাঙ্কক খুদিংমক ভন্দে মাতরমগী ইথিলগী খুত্থাংদা লাকখি হায়না কনাগুম্বা অমনা খল্লমগদ্রা? মসিগী তুরেলগী মনাক্তা লৈশিং মরাং কাইনা লৈ। অসিগুম্বা শৈরেংগী মওং অসি মালেমদা কনাগুম্বা অমত্তদা ফংদে।

ইকাই খুম্নরবা স্পীকর সর,

1857গী মতুংদা মখোয়না ভারত্তা মতম শাংনা লৈমিন্নবদা অৱাবা ওইগনি হায়বসি বৃতিশশিংনা খঙখি। মখোয়না ভারতপু খায়দোক্ত্রবদি, মাগী মীয়ামবু খায়দোক্ত্রবদি অমসুং মখোয় মশেল মরক্তা খৎনহন্দ্রবদি, মখোয়গী লৈঙাক অসি হিংবা ঙম্লোই হায়বা মখোয়না খঙলম্মি। মখোয়না বেঙ্গলবু মখোয়গী লেবোরেতরী অমা ওইহন্দুনা ‘দিভাইদ এন রুল' হায়বা পোলিসী অসি লৌখৎখি, মরমদি বেঙ্গলগী ইন্তেলেকচুএল পাঙ্গলনা মতম অমদা লৈবাক পুম্বদা লমজিং-লমতাক, শক্তি অমসুং ইথিল পীখি হায়বা মখোয়নসু খঙখি। মরম অদুনা বৃতিশশিংনা শক্তি অসিবু হন্থহনবা পামখি, করিগুম্বা বঙ্গাল শরুক অনি থোক্লবদি লৈবাক পুম্বনা খায়দোক্লগনি, অমসুং মখোয়না পাম্লিবমখৈ মখোয়না লৈঙাক্লগনি হায়না থাজখি। 1905দা মখোয়না বেঙ্গল খায়দোকখি। অদুবু মখোয়না 1905দা পাপ অসি তৌরকপা মতমদা, ভন্দে মাতরাম অসি শিংগুম্না লেপখি। মসি বেঙ্গলগী অপুনবগীদমক লম্বী খুদিংমক্তা, কোয়ায় খুদিংমক্তা শন্দোক্না তাক্লিবা খোঞ্জেল ওইরকখি। স্লোগান অসিনা মীয়ামদা ইথিল পীবা অমা ওইখি। বঙ্গালগী শরুক খায়দোকপগা লোয়ননা, বৃতিশশিংনা ভারতপু হেন্না শোৎথহন্নবা মখোয়গী হোৎনবা হেনগৎহনখি, অদুবু ভন্দে মাতরম অসি অমত্তা ওইবা ৱাঙাং অমসুং থ্রেদ অমা ওইনা, মখোয়গীদমক্তা নোংম-নোংমগী চাউখৎলক্লিবা চেলেঞ্জ অমা অমসুং লৈবাক অসিগীদমক্তা পাঙ্গল হাপ্পগী শক্তম অমা ওইরকখি।

ইকাই খুম্নরবা স্পীকর সর,

বেঙ্গলগী শরুক খায়দোকপা অসি তশেংনা থোকখি, অদুম ওইনমক মদুগী মতুং ইন্না অচৌবা স্বদেশী মুভমেন্ত অমা থোকখি, অমসুং মতম অদুদা ভন্দে মাতরম মফম পুম্নমক্তা শন্দোরকখি। বঙ্কিম দাগী ইমোসনেল মন্ত্র অসি বেঙ্গলগী লৈহাওদগী অখন্নবা করিগুম্বা অমা থোক্লক্লে হায়বা বৃতিশশিংনা খঙলে... ... ফরে, থাগৎচরি, থাগৎচরি, থাগৎচরি, ঐহাক্না অদোমগী ৱাখল্লোনশিংবু ইকাই খুম্নবা উৎচরি। বঙ্কিম বাবু... বঙ্কিম বাবু- থাগৎচরি, দাদা, থাগৎচরি। ঐনা অদোমবু দাদা হায়না কৌবা য়াগদ্রা? মদু নৎক্রবদি অদোম্না মদুসু য়ানীংদবা ফোঙদোকপা য়াই। বঙ্কিম বাবুনা পুক্নিং থৌগৎনিংঙাই ওইবা ঈশৈ অসিগা লোয়ননা শেমখিবা ইথিলগী য়ুনিভর্স অসিনা বৃতিশশিংবু মখোয়গী মপুং ওইবা মফম ফাওবা থিংজিনখি। অমসুং মখোয়গী অশোনবা অমসুং ঈশৈ অসিগী পাঙ্গল অদু য়েংবীয়ু - বৃতিশশিংনা মসিদা আইনগী ওইবা অথিংবা অমা থমহনবগী ইথিল পীরম্মি। মীওই অমনা ঈশৈ শকপদা, ফোঙবদা, অমসুং মদু খক্তদা নত্তনা, ভন্দে মাতরম হায়বা ৱাহৈ অসি শকপদা চৈরাক পীবা য়াই। অসিগুম্বা অকনবা আইনশিং অসি চৎনহনখি। নুপী চাম্মরোম্না ঐখোয়গী লৈবাক্কী নীংতম লানফম অদু লুচিংখি, অমসুং মশীং থীঙমদ্রবা নুপীশিংনা য়াম্না কন্না হোৎনদুনা থৌদাং লৌখি। ঐহাক্না থৌদোক অমা নীংশিংবা পাম্মি। বরিসালদা, ভন্দে মাতরমগী ঈশৈ শকপদা খ্বাইদগী শাথীবা থৌদোক থোকখি। ঙসিদি বরিসাল অসি ভারতকী শরুক অমা ওইদ্রে। মতম অদুদা, বরিসালগী ঐখোয়গী ইমাশিং, ইচিল-ইনাওশিং অমসুং অঙাংশিংনা লম্বীদা চংশিনখি। মখোয়না বন্দে মাতরামগী ইকায় খুম্নবগীদমক্তা, অথিংবা অসি ঙাক্না চৎনদনা লানফমদা চংশিনখি। অদুগা মতুংদা বরিশালগী থৌনা ফরবা নুপী শ্রীমতি সরোজিনী ঘোষ থোরকখি। মতম অদুগী ৱাখল্লোন অদু য়েংবিয়ু- মহাক্না ভন্দে মাতরমগী অথিংবা অসি লৌথোক্ত্রি ফাওবা মহাক্না শীরিবা খুজিশিং অদু লৌথোক্কনি হায়না ফোঙদোকখি। মতম অদুদা ভারতকী নুপীশিংগী পুন্সিদা খুজি লৌথোকপা অসি য়াম্না মরুওইবা থৌওং অমনি হায়না লৌনরম্মি। অদুম ওইনমক, মহাক্কীদমক্তদি, ভন্দে মাতরম অসি অতৈ পুম্নমক্তগী মথক্তা লৈবা ইথিল অমনি। মহাক্না মহাক্কী সনাগী খুজিশিং লৌথোকখি অমসুং ভন্দে মাতরমগী অথিংবা অসি লৌথোক্ত্রি ফাওবা, মহাক্না অমুক হন্না ব্রেসলেৎশিং অসি লৈতে হায়না অচেৎপা ৱাফম থমখি। মসি মহাক্না লৌখিবা অচৌবা ৱাশক অদুনি। ঐখোয়গী লৈবাক্কী অঙাংশিংসু চীথখিদে মখোয়বু চৈরাক পীখি; মখোয় অসি য়াম্না নহা ওইরিঙৈদা জেলদা থমখি। অদুগা মতম অদুদা, মরু ওইনা বেঙ্গলগী লম্বীশিংদা, অয়ুক্কী খোঙচৎতা ভন্দে মাতরম কৌবা খোঙচৎ অসি লেপ্পা লৈতনা পাঙথোক্লম্মি। মখোয় অসি বৃতিশকী নাকলদা লেপ্পা লৈতনা চৈথেং পীবা অমা ওইরকখি। মতম অদুদা বেঙ্গলদা ঈশৈ অমা শকখঙখি:

“জাধে জাবে জীবোনো চোলে, জাধে জাবে জীবোনো চোলে, জোগোতো মাঝে তোমর কান্ধে ভন্দে মাতরম বোলে” (বেঙ্গোলিদি)

ৱাহন্থোক: ও, ইমা, করিগুম্বা পুন্সি অসি নহাক্কী সেবা তৌদুনা অমসুং ভন্দে মাতরম থীদুনা লৈরবদি, অসিগুম্বা পুন্সি অসিমকসু লাইবক ফবনি। মসি বেঙ্গলগী লৈরক খুলক্তা অঙাংশিংনা হায়নরম্মি। ঈশৈ অসি অঙাংশিং অদুগী থৌনা অদুগী শক্তম্নি, অমসুং মখোয়গী থৌনা অদুনা লৈবাক অসিবু মপাঙ্গল কনখৎহল্লি। বঙ্গালগী লৈরকশিংদগী থোরকপা খোঞ্জেল অসি লৈবাক পুম্বগী খোঞ্জেল ওইখি। 1905দা, হরিতপুরগী খুঙ্গং অমদা, য়াম্না পীক্লিবা অঙাংশিংনা ভন্দে মাতরম হায়বা স্লোগান অদু লাউরম্মি, অদুগা বৃতিশশিংনা মখোয়বু নুংশিদবা উৎলম্মি। মখোয়না পুন্সি অমসুং শিবগী মরক্তা লান্থেংনবা হোৎনখি। অসিগুম্বা থৌওং অসিদি মখোয়দা পীখিবা অৱাবা অদুনি। 1906দা, নাগপুরগী নীল সিতী হায় স্কুলগী অঙাংশিংদা বৃতিশশিংনা চপ মান্নবা থৌদোকশিং পাংথোকখি। মখোয়গী অমত্তা ঙাইরবা "ক্রাইম" অসি অমত্তা ওইনা লেপতুনা অমসুং অমত্তা ওইনা ৱা ঙাংবনা ওইরম্মি: ভন্দে মাতরম। মখোয়গী শক্তিগী খুত্থাংদা, মখোয়না মন্ত্র অসিগী অশেংবা শক্তি অদু উৎনবা হোৎনখি। ঐখোয়গী থৌনা ফরবা রিভোলুস্নরশিংনা অকিবা লৈতনা ফাসি তৌফমদা চংশিনখি, অমসুং মখোয়গী অরোইবা শ্বর ফাওবা, মসি শোনখি: ভন্দে মাতরম, ভন্দে মাতরম, ভন্দে মাতরম। খুদিরাম বোস, মদন লাল ধিংরা, রাম প্রসাদ বিসমিল, অশফাকুল্লা খান, রোশন সিংহ, রাজেন্দ্রনাথ লাহিরি, রামকৃষ্ণ বিশ্বাস-অতোপ্পা কয়াসু ভন্দে মাতরম হায়না শোন্দুনা ফাসি তৌখি। মসি তোঙান তোঙানবা জেলশিংদা, তোঙান তোঙানবা মফমশিংদা থোকখি। অদুবু 'এক ভারত শ্রেষ্ঠ ভারত'কী মন্ত্র অসি পুম্নমক্কী ওইনা মান্নরম্মি: ভন্দে মাতরাম। স্বদেশী রিভোলুসনদা বৃতিশপু চেলেঞ্জ তৌখিবা চিতাগোংগী নহারোলশিং অসিসু ঐখোয়গী পুৱারীদা মমিং লৈরবা মীওইশিংনি। হার্গোপাল কৌল, পুলিন বিকাস ঘোষ, অমসুং ত্রিপুরা সেননা লৈবাক অসিগীদমক্তা মখোয়গী পুন্সি কৎথোকখি। মাস্তর সুর্য় সেনবু 1934দা ফাবা মতমদা মহাক্না মহাক্কী মরুপশিংদা ইখিবা চিথী অমদা ৱাহৈ অমখক্তমক য়াওখি- ভন্দে মাতরম।

ইকাই খুম্নরবা স্পীকর সর,

ঐখোয় ভারত মচাশিংনা চাউথোকচবা ফংগদবনি। মালেমগী পুৱারীদা, চহি চা কয়া মীওই মিলিয়ন কয়াবু পান্দম অমখক্তদা, মখোয়গী পুন্সি কৎথোক্নবা পুক্নিং থৌগৎপা ঙম্বা শৈরেং, ইথিল পীবা ঈশৈ অমত্তা লৈরম্লোই। ভন্দে মাতরম নত্তনা মালেমগী মফম অমত্তদা অসিগুম্বা ইথিল পীবা ঈশৈ অমত্তা লৈতে। মালেম পুম্নমক্না খঙগদবনি মদুদি মীখা পোল্লিঙৈ মতমদসু, অসিগুম্বা ঈশৈ অমা পুথোকপা ঙম্বা অসিগুম্লবা অখন্নবা মীওইশিং ঐখোয়গী লৈবাক অসিদা পোকখি। মসি মালেমগী ওইনা লাইবক থিবনি। ঐখোয়না মসিবু চাউথোকচবা ফাওবা হায়গদবনি, অদুগা মালেমসু মসিবু ইকাই খুম্নবা উৎকনি। মসি ঐখোয়গী নীংতম্বাগী মন্ত্রনি, কত্থোকপগী মন্ত্রনি, ইনর্জীগী মন্ত্রনি, অশেংবা মন্ত্রনি, থৌনাগী মন্ত্রনি, তপস্যাগী মন্ত্রনি, অৱাবা কয়া মায়োক্ননবা শক্তি পীরিবা মন্ত্রনি অমসুং মন্ত্র অসি ভন্দে মাতরমনি। মরম অসিনা গুরুদেব রবীন্দ্রনাথ তেগোরনা ইরম্মি: "এক কার্য় সোপিয়াছি সহশ্র জিবন – ভন্দে মাতরম" (বেঙ্গালিদা), হায়বদি "মীওই লিশিং কয়াগী পুক্নিংবু লংলা অমখক্তদা শম্নবা, পুন্সি লিশিং কয়াবু মিসন অমদা কত্থোকপা: ভন্দে মাতরম" মসি রবীন্দ্রনাথ তেগোরনা ইরম্মি।

ইকাই খুম্নরবা স্পীকর সর,

মতম অসিমক্তদা, ভন্দে মাতারমগী রেকোর্দিংশিং মালেমগী তোঙান-তোঙানবা মফমশিংদা য়ৌখি। লন্দন অসি রিভোলুস্নরশিংগীদমক্তা অশেংবা লমদম অমা ওইরকখি, অমসুং লন্দন ইন্দিয়া হাউস অদুদা, বীর সাভারকরনা ভন্দে মাতরাম হায়রম্মি, অমসুং ঈশৈ অসি মফম অদুদা হন্না হন্না শকখঙখি। লৈবাক অসিগীদমক্তা হিংনবা অমসুং শিনবা শেম-শারিবা মীওইশিংগীদমক্তা মসি পুক্নিং থৌগৎপগী অচৌবা হৌরকফম অমা ওইখি। মতম অদুদা, বিপিন চন্দ্র পাল অমসুং মহার্সি অওরোবিন্দো ঘোষনা নুমিৎ খুদিংগী চেফোং অমা ফোংখি মদুগী মমিং ভন্দে মাতরম কৌখি। তশেংনমক, ভন্দে মাতরাম অসি বৃতিশকী অয়ুক্কী নুমিৎ খুদিংদা অৱাবা পীনবা মতিক চানা ওইখি, অমসুং মসিনা মরম ওইদুনা মখোয়না মসিগী মমিং অসি খনখি। বৃতিশনা পাউচেশিং থিংজিনখিবা মতমদা, মেদাম ভিকাজী কামানা পেরিসতা পাউচে অমা হৌদোকখি অমসুং মদুগী মমিং ভন্দে মাতরম কৌখি।

ইকাই খুম্নরবা স্পীকর সর,

ভন্দে মাতরমনা ভারতপু মশা-মরোমদোম লেপচবগী লম্বীসু তাকখি। মতম অদুদা, মৈখেৎ উপুদগী হৌরগা অচৌবা জহাজ ফাওবদা, মখোয়দা ভন্দে মাতরম ইবগী চৎনবী অমা হৌরকখি। মসিনা স্বদেশীগী মন্ত্র ওইরিবা, মপানগী কম্পনীশিংদা শিংনবগী পাম্বৈ অমা ওইরকখি। স্বদেশীগী মন্ত্রগুম্না নীংতম্বগী মন্ত্র অসি পাকথোক চাউথোকপা হৌরকখি।

ইকাই খুম্নরবা স্পীকর সর,

ঐহাক্না অতোপ্পা থৌদোক অমসু থমজগে। 1907দা, ভি. ও. চিদাম্বরম পিল্লাইনা স্বদেশী কম্পনীগী জহাজ অমা শাখি, মদুদা ভন্দে মাতরম হায়না ইরম্মি। লৈবাক্কী কবি সুব্রামনিয় ভারতিনা ভন্দে মাতরমবু তামিলদা হন্দোকখি অমসুং থাগৎপগী ঈশৈশিং ইখি। মহাক্কী তামিলগী লৈবাকনীংবা ঈশৈ কয়াদা, ভন্দে মাতরমগীদমক থাজবা অদু ময়েক শেংনা উবা ফংই। তামিল নাদুগী মীওইশিংনা মসি খঙবা য়াই, অদুবু অতোপ্পশিংনা খঙদবা য়াই। ভারতকী ফিরালগী ঈশৈ অসি ভি. সুব্রামনিয়া ভারতী মশামক্না। ফিরালগী ঈশৈ অদুগী শন্দোক ৱারোল অদু ভন্দে মাতরম ইখিবা ফিরাল অদুদা য়ুম্ফম ওইখি। ঈশৈ অসিগী তামিলগী মিংদি: থায়িন মনিকোদি পেরের, থাজন্দু পানিনথু পুকাঝন্ঠিদা ভেরের! (তামিলদা) ৱাহন্থোক্তি, "ইমা লৈবাক্কী নুংশিজবশিং, লাক্লো, উহৌরো, ইকায় খুম্নবা উৎচরি, অমসুং ঐগী ইমাগী শেংলবা ফিরালবু থাগৎচরি।"

ইকাই খুম্নরবা স্পীকর সর,

ঙসি, ঐহাক্না মহাত্মা গান্ধীগী ভন্দে মাতরমগী মতাংদা মহাক্কী ৱাখল্লোনশিংসু হাউস অসিদা ফোংদোকচরি। সাউথ আফ্রিকাদগী ফোংবা ইন্দিয়ন ওপিনিয়ন কৌবা চয়োলগী ওইনা ফোঙবা পাউচে অমদা মহাত্মা গান্ধীনা 1905গী দিসেম্বর 2দা ইরম্বা ৱারোল অমা য়াওখি। ঐহাক্না মসি পল্লি। গান্ধীনা অসুম্না ইরম্মি: “বেঙ্কিম চন্দ্রনা ইবা ভন্দে মাতরমগী ঈশৈ অসি বেঙ্গল পুম্বদা য়াম্না মমিং চৎখ্রে। স্বদেশী মুভমেন্তকী মতমদা, বেঙ্গলদা মীওই লিশিং কয়া পুন্দুনা বেঙ্কিমগী ঈশৈ অসি শকখি। গান্ধীজীনা মখা তানা ইরি অমসুং মসি য়াম্না মরু ওই অমসুং মহাক্না মসি 1905দা ইখি: "মসিগী ঈশৈ অসি ঐখোয়গী জাতিগী ঈশৈগুম্না মীয়াম্না পাম্নরক্লি। মসিগী ইথিল অসি অফবা অমসুং অতোপ্পা লৈবাকশিংগী ঈশৈশিংদগী হেন্না নুংশিজৈ। মসিগী পান্দমদি ঐখোয়দা লৈবাক্কী নুংশিবা পোকহন্নবনি। মসিনা ভারতপু মমা অমা ওইনা লৌই অমসুং মহাকপু থাগৎলি”।

স্পীকর সর,

মহাত্মা গান্ধীনা 1905দা লৈবাক্কী ঈশৈ ওইনা লৌখিবা ভন্দে মাতরম অমসুং লৈবাক অসিগী মফম খুদিংমক্তা লৈবা ঈশৈ অসিনা, লৈবাক অসিগীদমক হিংখিবা মীওই খুদিংমক্কী পুন্সিদা ভারতকীদমক চংশিল্লিবা মীওই খুদিংমক্তা অচৌবা শক্তি অমা পীখি। ভন্দে মাতরম অসি য়াম্না চাউই, মসিগী ৱাখল্লোন অসি য়াম্না অফবনি, অদুগা করিগীদমক মমাং চহিচাদা মসিদা অসিগুম্বা অচৌবা ইনজস্তিস অসি তৌখিবনো? ভন্দে মাতরমগী মায়োক্তা করিগীদমক নমথাক তৌবনো? করিগীদমক অসিগুম্বা ইনজস্তিস অসি থোক্লিবনো? ইকাই খুম্নরবা বাপুগী মশাগী ৱাখল্লোনদগী হেন্না শক্তি লৈরকখিবা শক্তি অদু করি ওইরমগনি? ভন্দে মাতরামগুম্বা অশেংবা ইথিল অসি কনানা চয়েৎনবা থোকহনবগে? ঙসি ঐখোয়না ভন্দে মাতরমগী চহি 150 মপুং ফারকপদা, ঐহাক্না থাজৈ মদুদি ঐখোয়গী অনৌবা মীরোনশিংবু মসিগী অয়েৎপা পীনবগী মরমদা তাকপসি ঐখোয়গী থৌদাংনি। মুসলিম লীগনা ভন্দে মাতরমবু য়ানীংদবা পীনবগী পোলিসী অসি হেনগৎলকখি। ওক্তোবর 15, 1937দা মোহমদ অলী জিন্না লখনৌদগী ভন্দে মাতরমগী মায়োক্তা অকনবা স্লোগান অমা লাউখি। মতমদুগী কংগ্রেসকী প্রসিদেন্ত জৱাহরলাল নেহরুনা মহাক্কী পোলিতিকেল গ্রাউন্দ অসি কায়থরকপা উখি। মুস্লিম লীগকী য়ুম্ফম লৈতবা ৱারোলশিং অদু কন্না য়ানীংদবা ফোংদোক্নবগী মহুত্তা, অমসুং মহাক্কী অমসুং কংগ্রেস পার্তীগী ফিরেপ অদু ফোংদোকপগী মহুৎ, মদুগী ওন্ন-তৈনবা থোকখি। মহাক্না করিগীদমক অসিগুম্বা থবক অসি তৌখিবনো হায়বদু হংখিদে অমসুং খঙখিদে, অদুবু মহাক্না ভন্দে মাতরম মশামকপু য়েংশিনবা হৌখি। জিনাগী য়েৎলকপগী নুমিৎ মঙাগী মতুংদা, নেহরুনা ওক্তোবর 20দা নেতাজী সুভাস বোসতা চিথী অমা ইখি। জিনাগী ৱাখল্লোন অদুগা মান্নবা মওংদা মহাক্না চিথী অদুদা য়ানখি মদুদি ভন্দে মাতরামগী অনন্দমথকী বেকগ্রাউন্দনা মুস্লিমশিংবু নুংঙাইহল্লোই। ঐহাক্না নেহরু জীগী ৱাহৈশিং অসি ইবা পাম্মি। নেহরুজীনা হায়খি: ঐহাক্না ভন্দে মাতরমগী ঈশৈগী বেকগ্রাউন্দ নৈনখি। নেহরুজীনা মখা তারদুনা ইখি: "ঐহাক্না খল্লি মদুদি মুস্লিমশিং অসি মসিগী বেকগ্রাউন্দ অসিনা মরম ওইদুনা শাওহল্লি।"

মরুপশিং,

মসিগী মতুংদা, কংগ্রেসকী ৱার্কিং কম্মিতীনা ওক্তোবর 26তগী কলকতাদা ৱন্দে মাতরমগী শীজিন্নবা য়েংশিন্নবা মীফম পাংথোক্কনি হায়না কংগ্রেসকী মায়কৈদগী ৱারোল অমা লাকখি। বেঙ্কিম বাবুগী বেঙ্গল, বেঙ্কিম বাবুগী কলকাতা অসি রিভিয়ু অসিগীদমক্তা খনখি। লৈবাক শীনবা থুংনা খোইশাওনখি, লৈবাক শীনবা থুংনা অঙকপা ফাওখি। লৈবাক শীনবা থুংনা, পেত্রিওতশিংনা অয়ুক্কী খোঙচৎশিং পাঙথোকখি, মদুগী মায়োক্তা ভন্দে মাতরমগী ঈশৈশিং শকখি। অদুবু নুংঙাইতবা ওইনা, ওক্তোবর 26দা, কংগ্রেসনা ভন্দে মাতরমদা য়ানিংদবা ফোঙদোকখি। মখোয়না ভন্দে মাতরমবু শরুক অনি থোক্না খায়দোক্নবা ৱারেপ লৌখি। মসিগী ৱারেপ অসিগী মখাদা মখোয়না "সোসিএল হারমোনি"গী কোব, মাস্ক উপখি, অদুবু কংগ্রেসনা মুস্লিম লীগকী মমাংদা নোঞ্জখি হায়বা পুৱারীনা শাক্ষী ওইরি। কংগ্রেসনা মসিবু মুস্লিম লীগকী প্রেসর মখাদা য়াখি। মসি মখোয়গী এপিজমেন্ত পোলিসী চৎনহন্নবা পাম্বৈ অমনি।

ইকাই খুম্নরবা স্পীকর সর,

কংগ্রেসনা ভন্দে মাতরমবু য়েন্নবগীদমক পুক্নিং চিংশিনবগী রাজনিতীগী মখাদা খল্লম্মি। মরম অসিনা ভারত খায়দোকপগীদমক কংগ্রেসনা খুরুমখি। কংগ্রেসনা মসিগী ৱারেপ লৌবগী থৌওং অসি আউতসোর্স তৌখিবগুম তৌরি। লাইবক থিবদি, কংগ্রেসকী পোলিসীশিংদি চপ মান্নরি। অমসুং মসি খক্তমক নত্তনা আই.এন.সি.না তপ্না তপ্না এম.এম.সি.দা ওন্থোকখ্রে। ঙসিসু, কংগ্রেস অমসুং মসিগী মরী লৈনবশিংনা, কংগ্রেসকা মরী লৈনবশিংনা, ভন্দে মাতরমগী মতাংদা য়েৎনবা অমা থোকহন্নবা হোৎনরি।

ইকাই খুম্নরবা স্পীকর সর,

লৈবাক অমগী মগুন অসি খ্বাইদগী ফবা মতমদা নত্তনা শিংনরকপা অমসুং অৱাবা তারকপা মতমদা খঙবা ঙম্মী। তশেংবা মপাঙ্গল অসি ঐখোয়না মতৌ করম্না মপাঙ্গল কনবা, খোঙফম চেৎপা অমসুং তৌবা ঙম্বগে হায়বদু চাংয়েং তৌবদা খংলে। 1947তা নীংতম্লবা মতুংদা, লৈবাক অসিগী শিংনবশিং হোংখি, মরুওইবশিং হোংখি, অদুবু লৈবাক অসিগী মওং-মতৌ অমসুং রেসিলিয়েন্স অসি চপ মান্নখি, চপ মান্নবা ৱাখল্লোনদগী ইথিল লৌখি। ভারতনা খুদোংচাদবা কয়া থেংনরকপা মতমদা, লৈবাক অসিনা মতম পুম্নমক্তা ভন্দে মাতারমগী ৱাখল্লোনগা লোয়ননা মাংলোমদা চংশিল্লি। ময়াই থংবা চহিশিংদা থোকখিবা অমা হেক্তা ওইরসনু। অদুবু ঙসিসু, ওগস্ত 15 অমসুং জানুৱারী 26দা, নৎত্রগা হরঘর তিরঙ্গাগী মতমদা, মফম পুম্নমক্তা মান্নবা ৱাখল্লোন অসি উবা ফংই। তিরঙ্গাশিং অসি চাউথোকচনীংঙাইগী মওংদা চীংখৎলি। লৈবাক অসিনা চিঞ্জাক্কী অৱাবা মায়োক্নরিবা মতম অমা লৈরম্মি অমসুং ঐখোয়গী লৌমীশিংনা হোৎনদুনা ঐখোয়গী কৈশিং অসি ভন্দে মাতরমগী স্পিরিৎনা মপুং ফাহনখি। ভারতকী নীংতম্বা কোকহন্নবা হোৎনবা মতমদা, সম্বিধান মশামক লান্দারকপা মতমদা, ইমর্জেন্সী চৎনহনখিবা মতমদা, লৈবাক অসিবু লান্দারকপা ঙমহনখিবা অদু 'ভন্দে মাতরম'গী শক্তিনা ওইখি। লৈবাক অসিদা লানগী খুদোংচাদবা কয়া থেংনরকপা মতমদা, ঐখোয়দা অয়েৎপা পীনবা হোৎনরকপা মতমদা, ভন্দে মাতারমগী ৱাখল্লোন অসিনা ঐখোয়গী লান্মীশিংবু ঙমখৈশিংদা মায় পাক্না মায়থীবা পীরদুনা মমা ভারতীগী ফিরাল লান্থোক্নবা হোৎনখি। কোরোনাগুম্বা মালেমগী ওইবা অৱাবা অমা লাকপা মতমদা, লৈবাক অসিনা অমত্তা ওইনা লেপখি, মায়োক্নখি অমসুং মাংলোমদা চংশিনখি।

ইকাই খুম্নরবা স্পীকর সর,

মসি লৈবাক অসিগী মপাঙ্গলনি, লৈবাক অসিবু অচেৎপা ইমোসনগা শম্নহল্লিবা ইনর্জীগী মপাঙ্গল কনবা সোর্স অমনি। মসি ৱাখলগী ঈচেল অমনি, ঐখোয়গী লেপ্তনা চত্থরকপা নাৎকী ঈচেলগী মমি অমা, মদুগী ফোঙদোকফম অমনি। বন্দে মাতরাম অসি ঐখোয়না নিংশিংগদবা খক্তমক নত্তে, মসি অনৌবা ইনর্জী, অনৌবা ইথিল লৌনবা অমসুং ঐখোয় মশামকপু কৎথোক্নবা মতম অমা ওইগদবনি। ঐহাক্না মমাংদা হায়খিবা অদুগুম্না, ঐখোয়না ভন্দে মাতরমগী মফমদা থাগৎপা ফোংদোকচরি। ঙসি ঐখোয়না লৈরিবা মফম অসি য়ৌরকপা ঙম্বগী লম্বী অসি 'ভন্দে মাতরম'না শেমখি অমসুং মরম অদুনা, ঐখোয়না মসিগীদমক থাগৎপা ফোংদোকচরি। ভারতনা খুদোংচাদবা খুদিংমক মায়োক্নবগী শক্তি লৈ অমসুং মসিগী শক্তি অসি ভন্দে মাতরামগী স্পিরিত অসিদগী লাকপনি। ভন্দে মাতরম অসি ঈশৈ অমা নৎত্রগা ইথিল পীবা ঈশৈ অমা খক্তমক নত্তে। মসি লৈবাক অসিগীদমক ঐখোয়গী থৌদাংশিং অদু খঙহন্নবগী থৌনা অমনি। মরম অসিননি ঐখোয়না মসিবু মখা তানা য়ানীংদবা ফোঙদোক্কদবনি। ঐখোয়না 'আত্মনির্ভর ভারত' (আত্মনির্ভর ভারত) গী মঙলানগা লোয়ননা মাংলোমদা চংশিল্লি অমসুং ঐখোয়না মসিবু মপুং ফাহনগদবনি। ভন্দে মাতরম অসি ঐখোয়গী ইথিলনি। ঐখোয়না স্বদেশী খোংজং অসি মপাঙ্গল কনখৎহনবা পাম্মি। মতম হোংলবসু য়াই, মওং হোংলবসু য়াই, অদুবু ইকাই খুম্নরবা গান্ধীনা ফোঙদোকখিবা ৱাখল্লোন অসি ঙসিসু অদুমক লৈরি, অমসুং ভন্দে মাতরমনা ঐখোয়বু অমত্তা ওইনা পুনশিনবা লেপ্লি। ঐখোয়গী অচৌবা লুচিংবশিংগী মঙলান অসি নিংতম্বা ভারত অমনি। ঙসিগী মীরোলগী মঙলানদি চাউখৎপা ভারত অমনি। ভন্দে ভারতকী ৱাখল্লোন অসিনা নীংতম্লবা ভারত অমগী মঙলানবু মপাঙ্গল কনখৎহনখি। ভন্দে মাতরমগী ৱাখল্লোন অসিনা চাউখৎপা ভারত অমগী মঙলানবু মপাঙ্গল কনখৎহনগনি। অসিগুম্বা ইথিলশিং অসিগা লোয়ননা ঐখোয়না মাংলোমদা চংশিনবা তাই। ঐখোয়না 'আত্মনির্ভর ভারত' শেমগদবনি। 2047 ফাওবদা লৈবাক অসি 'ভিক্সিত ভারত' (চাউখৎলবা ভারত) ওইগদবনি। করিগুম্বা নীংতম্বা ফংদ্রিঙৈগী চহি 50গী মমাংদা কনাগুম্বা অমনা নীংতম ভারত অমগী মঙলান উবা ঙম্লবদি, 2047গী মমাংদা চহি 25গী মমাংদা, ঐখোয়সু চাউখৎপা ভারত অমগী মঙলান উবা ঙমগনি অমসুং ঐখোয়না মসিগী মঙলান অসি মঙফাওনহন্নবগীদমক ঐখোয় মশামকপু কত্থোকপা ঙমগনি। মসিগী মন্ত্র অমসুং ৱারেপ অসিগা লোয়ননা, ভন্দে মাতরামনা ঐখোয়দা ইথিল পীদুনা লৈহৌরকপা ওইরসনু। ঐখোয়না ভন্দে মাতরমগী মফমদা ঐখোয়গী ইকাই খুম্নবা উৎচরি। ঐখোয়না মসিগী স্পিরিৎ অসি মাংলোমদা পুখৎলকপা ওইরসনু, লৈবাক অসিগী মীয়ামগা লোয়ননা চৎমিন্নসি, অমত্তা ওইনা চৎমিন্নসি, অমসুং মসিগী মঙলান অসি মপুং ফাহনসি। ৱাখল্লোন অসিগা লোয়ননা, খন্ন-নৈনবা অসি ঙসিদগী হৌরে। ঐহাক্না থাজবা থম্লি মদুদি মসিনা লৈবাক অসিগী মনুংদা ৱাখল্লোন অসিবু পুক্নিং থৌগৎকনি, লৈবাক অসিবু পুক্নিং থৌগৎকনি, পার্লিয়ামেন্তকী হাউস অনিমক্তা ঐখোয়গী অনৌবা মীরোনবু পুক্নিং থৌগৎকনি। হায়রিবা ৱাহৈশিং অসিগা লোয়ননা, ঐঙোন্দা মসিগী খুদোংচাবা অসি পীরকপগীদমক্তা ঐহাক্না ময়ামগী মফমদা থাগৎপা ফোংদোকচরি। হন্না-হন্না থাগৎচরি!

ভন্দে মাতরম!

ভন্দে মাতরম!

ভন্দে মাতরম!

***