প্রধান মন্ত্রী শ্রী নরেন্দ্র মোদীনা ঙসি ঘনাগী পার্লিয়ামেন্তকী অখন্নবা মীফমদা ৱা ঙাংদুনা মফমদুদা ৱা ঙাংবা ভারতকী অহানবা ভারতকী প্রধান মন্ত্রী ওইরে। পার্লিয়ামেন্তকী স্পীকর ইকায়খুম্নরবা অল্বেন কিংসফোর্দ সুমানা বাগবিন্না কৌখিবা মীফম অদুদা পার্লিয়ামেন্তকী মেম্বরশিং, লৈঙাক্কী ওফিসিএলশিং অমদি লৈবাক অনিমক্তগী মশক নাইরবা মীথুংশিংনা শরুক য়াখি। প্রধান মন্ত্রীগী ৱারোল অদুনা ভারত অমদি ঘনাগী মরীগী শিংথানিংঙাই ওইরবা মীৎকুপ অমা ওইদুনা লৈবাক অনিবু পুনশিন্নরিবা অমনা অমবু ইকায়খুম্নবা অমদি মান্নবা দিমোক্রেসীগী ভেল্যুগী মমি তাখি।

মহাক্কী ৱারোলদা, প্রধান মন্ত্রীনা মান্নবা নীংতম্বগী লান্থেং অমদি মীয়ামগী লৈঙাক অমদি ইনক্লুজিব দিভেলপমেন্তকী মান্নবা খোঙফম্না শেম্লিবা ভারত অমদি ঘনাগী মরক্তা লৈনরিবা পুৱারীগী মরীগী মতাঙদা ফোঙদোকখি। মহাক্কী মফমদা লৈবাক্কী থাক্কী ইকায়খুম্নবা উৎপিবগীদমক মহাক্না ঘনাগী প্রেসিদেন্ত ঐচ.ই. জোন দ্রমানি মহামা অমদি ঘনাগী মীয়ামগী মফমদা তৌবিমল খঙবা ফোঙদোক্লদুনা মদুবু তুং কোইবা মরুপ মপাং ওইবগী মরীগী খুদম অমনি হায়খি। অথোইবা ঘনাগী লুচিংবা দোক্তর ক্বামে ক্রুমাহগী থৌদাংশিং পল্লদুনা, মহাক্না অমত্তা ওইবা, ইং তপ্পা, অমদি অচুম্বা ৱায়েলগী ফীদমশিংনা অকনবা অমদি তুং কোইগদবা খোঙবু ওইবগী মরীগী য়ুম্ফম ওইরি হায়না ফোঙদোকখি।

 “ঐখোয়বু পুনশিন্নহল্লিবা শাফু অসি নুংগী ওইবা অমদি ঐখোয়বু খাইদোক্নরিবা ইথিলশিংদগী হেন্না চাউই” হায়না ফোঙদোক্লম্বা অমদি দিমোক্রেতিক ইন্সতিত্যুসন শেমগৎপগী মতম শাংবা ইথিলদা অকনবা ৱাফম ফোঙদোক্লম্বা দোক্তর ক্রুমাহগী ৱাফমশিং পল্লদুনা, প্রধান মন্ত্রীনা দিমোক্রেতিক ভেল্যুশিং মখোঙ শোম্বিবগী মরুওইবা ৱাফমশিং ফোঙদোকখি। ভারতনা দিমোক্রেসীগী মমা অমা ওইনা মাগী কলচরগী দিমোক্রেতিক ইথোসপু কোনশিল্লি হায়রদুনা, প্রধান মন্ত্রীনা ভারতকী দিমোক্রেসীগী অচেৎপা অমদি মশক মচু নাইবা মরু মরাগী মরমদা ফোঙদোকখি। মহাক্না ভারতকী খেন্নবা শক্তম অমদি মীয়ামগী লৈঙাক্কী মপাঙ্গলবু ঘনা মশাগী দিমোক্রেসীগী খোঙচত্তা মমল লৈনা লৌনরিবা খেন্নবশিংগী মরক্তা অমত্তা ওইবগী মপাঙ্গলগী খুদম অমনি হায়খি। মহাক্না অইং অশাগী খল হোংলকপা, তেরোরিজম, লাইচৎ, অমদি সাইবর থ্রেৎনচিংবা মালেমগী অরুবা শিংনবশিংগী মরমদা ৱাফম কয়া ফোঙদোকখি অমদি মালেমগী লৈঙাক্লোন্দা অপুনবা গ্লোবেল সাউথকী খোঞ্জেল অমা লৈহন্নবা ৱাফম থমখি। হীরম অসিগী মতাঙদা মহাক্না অফ্রিকান য়ুনিয়নবু G20 গী লেঙদ্রবা মেম্বর অমা ওইনা ভারতকী প্রেসিদেন্সী মনুংদা লৌশিনখিববু পুথোকখি।

প্রধান মন্ত্রীনা ঘনাগী মশক মচু নাইরবা পার্লিয়ামেন্তরী সিস্তেমবু থাগৎখি অমদি লৈবাক অনিগী লেজেসলেচরশিংগী মরক্তা তাথোক তাশিন তৌনবা হেনগৎলকপদা অপেনবা ফোঙদোকখি। হীরম অসিগী মতাঙদা, মহাক্না ঘনা-ইন্দিয়া পার্লিয়ামেন্তরী ফ্রেন্দসিপ সোসাইতী লিংখৎখিববু তরাম্না ওকখি। ভারতপু ২০৪৭ ফাওবদা চাওখৎপা লৈবা অমা ওইহন্নবা ভারত মচাশিংগী খোঙফম থম্লদুনা, প্রধান মন্ত্রীনা ভারতনা ঘনাগী চাওখৎপা অমদি নুংঙাই য়াইফবা তান্নবগী খোঙচত্তা পাম্বোম তিংদুনা লেপকনি হায়না ৱাফম থমখি।

****