U Myntri Rangbahduh ka ri, u Narendra Modi, u la ai jingkren ha ka dorbar ba kyrpang jong ka Parliament jong ka Ghana, mynta ka sngi, ha kaba u la long u Myntri Rangbahduh ba nyngkong jong ka India, ban leh ia katei ka kam. Ha kane ka dorbar ba la khot da u Lamphang ka Ïingdorbar Parliament, u Alban Kingsford Sumana Bagbin, la wan ïashim bynta da ki dkhot ka Ïingdorbar Parliament, ki ophisar sorkar bad ki nongshah sngewbha ba pawkhmat na baroh ar tylli ki ri. Ka jingkren ka la long ka por kaba kongsan ha ka jingiadei hapdeng ka India bad ka Ghana, kaba pyni ia ka jingburom markylliang bad ki jingngeit ba ngi don lang ha ka synshar paidbah kiba pyniatylli ia ki artylli ki ri.

Ha ka jingkren jong u, u Myntri Rangbahduh u la pynpaw ïa ki jingïadei ba la don lypa hapdeng ka India bad ka Ghana, ba la thaw lyngba ki jingïakhun ban ïoh ïa ka jinglaitluid bad ka jingkut jingmut lang ïa ka synshar paidbah bad ka roi ka par kaba kynthup lang. U la pynpaw ka jingsngewnguh ia u President jong ka Ghana, H.E. John Dramani Mahama bad ki briew jong ka Ghana na ka bynta ka burom jong ka Ri ba la ai ha u, ki khot ia ka kum ka dak jong ka jingiadei paralok kaba neh. Da kaba shim na ki jingnoh synniang jong u nongialam ba khraw jong ka Ghana - Dr. Kwame Nkrumah, u la ban jur ba ki jingmut jong ka jingiatylli, ka jingsuk, bad ka hok ki long ka nongrim jong ki jingiatreilang kaba khlain bad kaba neh.

Da kaba shim ïa ka jingong jong u Dr. Nkrumah, uba la ong shisien – "Ki bor kiba pynïatylli ïa ngi ki long kiba kongsan bad kiba kham khraw ban ïa ki jingktah kiba la pynïapher ïa ngi” bad uba la buh jingmut shibun halor ka jingktah ba jrong samoi jong ka jingtei ïa ki tnad synshar paidbah, u Myntri Rangbahduh u la pynpaw ïa ka jingdonkam ban kyntiew ïa ki jinglong synshar paidbah. Haba kdew ba ka India kum ka Kmie jong ka Synshar Paidbah ka la pdiang ia ka rukom synshar paidbah kum shi bynta ka kolshor jong ka, u Myntri Rangbahduh u la pynpaw ia ki tynrai kiba jylliew jong ka synshar paidbah ha India. U la kdew ïa ka jingiapher jong ka India bad ka jingkhlain jong ka synshar paidbah kum ka jingpynshisha ïa ka bor jong ka jingïatylli ha ka jingiapher, ka jingngeit kaba la pynpaw ha ka jingïaid lynti jong ka synshar paidbah jong ka Ghana hi. U la pynpaw ruh ïa ki jingeh kiba jur ha ka pyrthei kum ka jingkylla ka suiñbneng, ki kam lehnoh, ki jingpang khlam, bad ki jingma kiba lah ban mih na ka cyber bad u la khot ïa ka sur ba ïatylli jong ka Global South ha ka jingsynshar pyrthei. Ha kaba iadei bad kane, u la pynpaw ïa ka jingpynrung ïa ka Africa Union kum ka dkhot ba pura jong ka G20 ha ka presidency jong ka India.

U Myntri Rangbah duh u la ïaroh ïa ka rukom treikam jong ka ïing dorbar thaw aiñ jong ka Ghana bad pynpaw ka jingsngewhun halor ki jingïakren kiba nang kiew hapdeng ki ïingdorbar thaw aiñ jong baroh ar tylli ki ri. Ha kane ka kynti, u la pdiang sngewbha ia ka jingsdang ia ka Ghana-India Parliamentary Friendship Society. Haba pynpaw ïa ka jingkut jingmut jong ki paidbah ka ri India ban pynlong ïa ka ri kum ka ri kaba la kiew shuwa u snem 2047, u Myntri Rangbah duh u la ong ba ka India kan don ryngkat bad ka Ghana ha ka jingiaid jong ka sha ka jingkiew shaphrang bad ka jingseisoh.

****