ইকায়খুম্নবরশিং,

মহৌশানা থোকহনবা অমাং-অতাশিং অসি মীওইবগী অচৌবা শিংনবা অমা ওইরি। চহি অসিদসু, মহৌশানা থোকহনবা অমাং-অতাশিংনা মালেমগী অপুনবা মীশিংগী মশিং য়াম্লবা শরুক অমা শোকহনখ্রে। মহৌশানা থোকহনবা অমাং-অতাশিং থেংননবা মালেমগী ওইনা মতেং পাংনবা হেনগৎহনবগী তঙাইফদবা লৈরে হায়বা মসিনা নাখৈ শেংনা তাক্লে।

পান্দম অসিগা লোয়ননা, লৈবাক অসিনা জি-২০ য়ুম্বু ওইরিঙৈ মনুংদা ভারতনা দিজাষ্টর রিক্স রিদক্সন ৱার্কিং গ্রুপ লিংখৎখ্রে। মসিগী মরুওইবা এজেন্দা অসি লুম্না লৌবগীদমক ঐনা খা অফ্রিকা থাগৎপা ফোঙদোকচরি।

মরুপশিং,

দিজাষ্টর মায়োক্নবা ঙম্নবা থবকশিং অসি মতেং পাংনবা ওইবগী মহুত্ত “চাউখৎ-থৌরাংগী ওইগদবনি” অমসুং মসিগী খুদম ভারতনা লিংখৎপা কোলিএসন ফোর দিজাষ্টর রিসিলিয়েন্ত ইনফ্রাষ্ট্রকচরশিংনা ওইরে। কোলিএসন ফোর দিজাষ্টর রিসিলিয়েন্ত ইনফ্রাষ্ট্রকচরনা জি-২০ লৈবাকশিংগা লোয়ননা, শেন-থুম, তেক্নোলোজি অমসুং স্কিল দিবলপমেন্ত ফংহনবা ঙমগনি। মসিনা অৱা-অনা মায়োক্নবা ঙম্বা তুংলমচৎ অমা ফংহনগনি।

মরুপশিং,

মীওইবা খুন্নাইদা স্পেস তেক্নোলোজি ফংহনগদবনি হায়বদা ভারতনা থাজবা থম্লি। মরম অদুনা, জি-২০ ওপন সেতেল্লাইত দেতা পার্তনরশিপ লিংখৎনবা ৱাফম ভারতনা হৌদোক্লে। মসিনা জি-২০ স্পেস এজেন্সশিংদগী সেতেল্লাইত দেতা অমসুং নৈনবা য়াহনগনি, থবক তৌমিন্নবা য়াগনি অমসুং গ্লোবেল সাউথকী লৈবাকশিংগী কান্নবা ওইগনি।

মরুপশিং,

তুংকোইনা চৎনবা য়াবা থবকশিং অমসুং মৈখু থাংদবা ইনর্জি অসি মালেমগী চাউখৎনবা তঙাইফদে। মসি ফংনবা, ক্রিতিকেল মিনরেলশিংনা মরুওইবা থৌদাং অমা লৌরি। মখোয় মীওইবা খুন্নাইগী অপুনবা লন্নি। মরম অদুনা, জি-২০ ক্রিতিকেল মিনরেলস সর্কুলেরিতিগী থবক অমা পায়খৎনবা ভারতনা হৌদোক্লে। থবক অসিগী মখাদা, থবক অসিনা রিসাইক্লিং, অর্বান মাইনিং, সেকেন্দ-লাইফ বেত্তরি প্রোজেকশিং অমসুং তোঙান তোঙানবা মখলগী ইন্নোবেসন ফগৎহনগনি।  সর্কুলেরিতিদা শেন থাদবনা প্রাইমারি মাইনিংগী মখা পোনবা হন্থহনগনি। মসিনা সপ্লাই চেনশিংদা ইথিল পীবা হন্থহনগনি অমসুং মহৌশাগী অকোয়দা কান্নবা পীগনি। মসিগী থবক অসিনা সপ্লাই চেন সেকুরিতি মপাঙ্গল কনখৎহনবদা মতেং পাংগনি অমসুং চাউখৎনবগী মশা নান্নবা লম্বীশিং শেমগৎকনি।।

মরুপশিং,

ন্যু দিল্লি জি-২০ মীফম মনুংদা, ২০৩০ ফাওবদা রিন্যুএবল ইনর্জি পুথোকপা শরুক অহুম অমসুং ইনর্জি ইফিসিয়েন্সি শরুক অনিদা হেনগৎনবা ঐখোয়না ৱাশক লৌরে। পান্দম অসি ফংনবা, অকক্নবা মতমগী মনুংদা চাউখৎলক্লিবা লৈবাকশিংদা মমল হোংবা শেন্থং অমসুং তেক্নোলোজি ফংহন্নবা চাউখৎলবা লৈবাকশিংনা মখোয়গী ক্লাইমেত এক্সনগী পীখিবা থাজবশিং থবক ওইনা পাংথোক্কদবনি।

মরুপশিং,

ক্লাইমেত চেঞ্জ অমসুং অতোপ্পা শিংনবশিংনা মরম ওইদুনা, ঐখোয়গী লৌউ-শিংউ অমসুং ফুদ সেকুরিতিদা শিংনবা অসি হেন্না শাথিরক্লে। লৈবাক কয়াদা, হারশিং, তেক্নোলোজি, ক্রেদিৎ, ইন্সুরেন্স অমসুং য়োনফম ফংনবা লৌমীশিং খুদোংচাদবা হেনগৎলক্লি। হায়রিবা খুদোংচাদবশিং অসি থেংননবা মশাগী থাক্ত ভারতনা হোৎনরি।

ভারত্ত, মালেমদা খ্বাইদগী চাউবা ফুদ সেকুরিতি অমসুং মচি ওইবা চীঞ্জাক ফংহনবগী থবক ঐখোয়না পায়খৎলি। ভারতনা মালেমদা খ্বাইদগী চাউবা হেল্থ ইন্সুরেন্স স্কিম অমসুং খ্বাইদগী চাউবা ক্রোপ ইন্সুরেন্স স্কিম পায়খৎলি। মচি ওইবা চীঞ্জাক অমসুং মহৌশাগী অকোয়বা ফিবম অনিমক্কী সুপরফুদশিং ওইরিবা শ্রী অন্ন নত্ত্রগা মিল্লেতশিংগীদমক ঐখোয়না থবক পায়খৎলি।

ন্যু দিল্লি মীফম মনুংদা অফ্রিকান য়ুনিন জি-২০গী লেংদবা মেম্বর অমা ওইখিবা অসি মাইকৈ অসিদা থাংজিনবা মরুওইবা খোঙথাং অমনি অমসুং মসিগী অপুনবগী ৱাখল্লোন অসি জি-২০ গী ৱাংমদসু লৈহনগদবনি। হৌজিক ঐখোয়না হায়রিবা ফিদমশিং অসিদা জি-২০ রোদমেপ অমা শেমগৎকদবনি।

মরুপশিং,

পাউ ফাউনদবনা খুদোংথিবশিং মায়োক্নবা ঙম্লোই।

মচি ওইবা চীঞ্জাক, মীয়ামগী হকশেল, তুংকোইনা চৎনবা য়াবা লৌউ-শিংউ অমসুং দিজাষ্টরগী শেম-শানবা মপাঙ্গল কনবা মালেমগী সেকুরিতি সিষ্টেম অমা শেমগৎনবা জি-২০ না অপুনবা লাল্লোং অমা পুক্নিং থৌগৎকদবনি।

অদোম থাগৎচরি।

***