ঙসি প্রধান মন্ত্রী শ্রী নরেন্দ্র মোদী জোহানেসবার্গতা খা অফ্রিকাগী রাষ্ট্রপতি সাইরিল রামাফোসানা য়ুম্বু ওইবা জি-২০ লুচিংবশিংগী মীফম শরুক য়াখ্রে। হন্দক্কী অসিনা প্রধান মন্ত্রীনা জি-২০ মীফমশিং শরুক য়াবা ১২শুবনি। মীফম হৌদোকপা নুমিৎকী সেসন অনিমক্ত প্রধান মন্ত্রীনা ৱা ঙাংখি। মহাক্না তরাম্না ওকখিবা অমসুং মাইপাক্না মীফম য়ুম্বু ওইবগীদমক প্রধান মন্ত্রীনা রাষ্ট্রপতি রামাফোসা থাগৎপা ফোঙদোকখি।

“কনাগুম্বা অমতা চিৎথহৌদবা অপুনবা অমসুং তুংকোইনা চৎনবা য়াবা শেন-থুম চাউখৎপা” হায়রিবা হিরমদা পাংথোকখিবা হৌদোকপগী সেসন্দা ৱা ঙাংলদুনা, খা অফ্রিকানা চিয়ার্মেন ওইবগী মখাদা, স্কিল মাইগ্রেসন, তুরিজম, ফুদ সেকুরিতি, এ.আই, দিজিতেল ইকোনোমি, ইন্নোবেসন অমসুং নুপীশিংদা শক্তি পীবগুম্বা ৱাফমশিংদা শিংথানিঙাই ওইবা থবকশিং পায়খৎপদা প্রধান মন্ত্রীনা থাগৎপা ফোঙদোকখি। প্রধান মন্ত্রীনা হায়খি ন্যু দিল্লি জি-২০ মীফমদা পায়খৎখিবা পুৱারি ওইরবা থবকশিং মফম অসিদা মখা তানা ফগৎহল্লে। অফ্রিকাদা অহানবা ওইনা জি-২০ মীফম পাংথোকপা মতমদা, চাউখৎপগী থোং মান্নদবা অমসুং মহৌশাগী অকোয়বা কা হেন্না মাঙহন-তাকহনবগী খুদোংচাদবশিং কোকহল্লিবা, চাউখৎপগী অনৌবা পেরামিতরশিং য়েংশিনবা মতম ওইরে। লম্বী অদুদি মীওইবগী থবকশিং অমতা ওইনা পুনশিনবনি। মসিনা হায়রিবদি ঐখোয়না মীওইবশিং, খুন্নাই অমসুং মহৌশাগী অকোয়বগী শক্তম অপুনবা অমা ওইনা উগদবনি। মতম অদু খক্তদা চাউখৎপা অমসুং মহৌশাগী অকোয়বগী ফিবমগী মরক্ত পুন্না লৈমিন্নবা ঙমগনি।

মীওই খুদিংমক নুংঙাইনবা অমসুং চাউখৎনবা ভারতকী থবকশিং শন্দোক্না তাক্লদুনা, জি-২০ গী মখাদা খন্ননবা অনৌবা ৱাখল্লোন তরুক প্রধান মন্ত্রীনা পুখৎখি। মখোয় অদুদি:

* জি-২০ গী মখাদা গ্লোবেল ত্রেদিসনেল নোলেজ রিপোসিতোরি অমা লিংখৎপা। মসিনা তুংগী মীরোলশিংগী কান্ননবা মীওইবা খুন্নাইগী অপুনবা লৌশিং শীজিন্নবা ঙমগনি।

* জি-২০ অফ্রিকা স্কিলস মল্তিপ্লাইয়র অমা শেম্বা: থৌরম অসিনা অফ্রিকাদা নহারোলশিং স্কিল লৈহন্নবা সর্তিফাইদ ত্রেন্নর মিল্লিয়ন অমগী পুল অমা শেম্নবা পান্দম থমগনি। মসিনা মফম অসিগী থবক শুবা ঙম্বা হেনগৎহনগনি অমসুং মহাদেস অসি মতম শাংনা চাউখৎহনগনি।

* জি-২০ গ্লোবেল হেল্থকিয়ার রেসপোন্স তিম অমা শেম্ব: মসিদা জি-২০ লৈবাক খুদিংমক্তগী অনা-লায়েংগী অখঙ-অহৈশিং য়াওগনি অমসুং মালেমগী মফম অমদা হেক্ত হকশেলগী অৱাবা তারকপদা থেংন্নবদা শীজিন্নগনি।

* জি-২০ সেতেল্লাইত দেতা পার্তনরশিপ অমা লিংখৎপা: থৌরম অসিগী মখাদা চাউখৎলক্লিবা লৈবাকশিংদা লৌউ-শিংউ, ঙা য়োকপা, দিজাষ্টর মেনেজমেন্ত অমসুং অতোপ্পা থবকশিংগী জি-২০ স্পেস এজেন্সিশিংগী সেতেল্লাইত দেতা ফংহনগনি।

* জি-২০ ক্রিতিকেল মিনরেলস সর্কুলেরিতিগী থবক অমা পায়খৎপা: থবক অসিনা রিসাইক্লিং, অর্বান মাইনিং, সেকেন্দ-লাইফ বেত্তরি প্রোজেকশিং অমসুং তোঙান তোঙানবা মখলগী ইন্নোবেসন ফগৎহনগনি অমসুং সপ্লাই চেন সেকুরিতি মপাঙ্গল কনখৎহনবদা মতেং পাংগনি অমসুং চাউখৎনবগী মশা নান্নবা লম্বীশিং শেমগৎকনি।

* দ্রগ তেরর নেক্সস থিংনবা জি-২০ গী থবক অমা পায়খৎপা: মসিনা দ্রগ ললোনবা অমসুং দ্রগ-তেরর ইকোনোমি থুগায়বদা মতেং পাংগনি।

প্রধান মন্ত্রীনা “অৱাবা মায়োক্নবা ঙম্বা মালেম অমা-জি-২০ না দিজাষ্টর রিক্স রিদক্সন; ক্লাইমেত চেঞ্জ; জষ্ট ইনর্জি ত্রান্সিসন; ফুদ সিষ্টেমসদা মতেং পাংবা” হায়বা সেসন অমদা প্রধান মন্ত্রী ৱা ঙাংখ্রে। ভারতনা হৌদোকখিবা দিজাষ্টর রিক্স রিদক্সন ৱার্কিং গ্রুপ মাঙলোমদা চঙশিনবদা প্রধান মন্ত্রীনা থাগৎপা ফোঙদোকখি। মহাক্না হায়খি দিজাষ্টর মায়োক্নবা ঙম্নবা থবকশিং অসি মতেং পাংনবা ওইবগী মহুত্ত “চাউখৎ-থৌরাংগী ওইগদবনি” অমসুং মসিগী খুদম ভারতনা লিংখৎপা কোলিএসন ফোর দিজাষ্টর রিসিলিয়েন্ত ইনফ্রাষ্ট্রকচরশিংনা ওইরে। চীঞ্জাক ফংহনবা হেনগৎহন্নবা ক্লাইমেত এজেন্দাদা অপুনবগী থবক পায়খৎনবা প্রধান মন্ত্রীনা তকশিনখি। হিরম অসিদা মহাক্না হায়খি মচি ওইবা চীঞ্জাক ফংহনবা অমসুং মহৌশাগী অকোয়বগী ফিবম কায়হন্দবদা মিল্লেতশিংনা মরুওইবা থৌদাং অমা লৌরি। ভারত য়ুম্বু ওইখিবা মতমদা ফুদ সেকুরিতিগী দেক্কান প্রিন্সিপালশিং চৎনখ্রে। অসিগুম্বা থবক অমনা ফুদ সেকুরিতিগী জি-২০ গী লম্বী অমা শেম্নবা য়ুম্ফম ওইগনি। অকক্নবা মতমগী মনুংদা চাউখৎলক্লিবা লৈবাকশিংদা মমল হোংবা শেন্থং অমসুং তেক্নোলোজি ফংহন্নবা চাউখৎলবা লৈবাকশিংনা মখোয়গী ক্লাইমেত এক্সনগী পীখিবা থাজবশিং থবক ওইনা পাংথোক্কদবনি।

মালেমগী লৈঙাক্কী থবকশিংদা গ্লোবেল সাউথকী অকনবা খোঞ্জেল অমা প্রধান মন্ত্রীনা ফোঙদোকখি। হিরম অসিদা মহাক্না হায়খি ন্যু দিল্লি মীফম মনুংদা অফ্রিকান য়ুনিন জি-২০গী লেংদবা মেম্বর অমা ওইখিবা অসি মাইকৈ অসিদা থাংজিনবা মরুওইবা খোঙথাং অমনি অমসুং মসিগী অপুনবগী ৱাখল্লোন অসি জি-২০ গী ৱাংমদসু লৈহনগদবনি। সেসন অনিদা প্রধান মন্ত্রীনা ফোঙদোকখিবা মপুংফাবা ৱারোলশিং মফম অসিদা উবা ফংগনি [Session 1; Session 2]।

***