#IFFIWood, 21 नोव्‍हेंबर 2025

भारतीय आंतरराष्ट्रीय चित्रपट महोत्सवांत आयज दोना पावला  ताज सीदा दी गोवा हेरिटेज हॉटेलांत राजदूत गोलमेज परिशदे खातीर राजदूतांक एकठांय हाडले. ह्या सत्रांत सह-निर्मितीच्यो संदी, सृजनशील-अर्थवेवस्था उदरगत आनी खोलायेन सांस्कृतीक दिवप-घेवप हांचेर भर दित द्विपक्षीय दृकश्राव्य सहकार्याक चालना दिवपा खातीर नव्या मार्गांचो सोद घेतलो.

भारत आनी भागीदार राश्ट्रां मदीं संवादाखातीर सुवात म्हणून परिकल्पित ही गोलमेज बसका चित्रपट निर्मिती, तंत्रज्ञान भागीदारी आनी नियामक सामंजस्य ह्या मधल्या उदयोन्मुख  शक्यतांचेर केंद्रित आशिल्ली ज्या वरवीं जागतिक सर्जनशील परिसंस्था घटमूट करपाक जातली.  सह-निर्मिती करारा वरवीं आर्थिक मोल निर्धारण , सांस्कृतिक आनी तंत्रज्ञान दिवप घेवपात वाढ, परदेशातल्या चित्रपट निर्मात्यांखातीर नियामक आव्हानां उणी करप आनी चडांत चड परस्पर संबंदीत   सर्जनशील परिदृश्य निर्माण  करप  हाचेर चर्चा केंद्रित आशिल्ली.

गोलमेज परिशदेत येवकाराचे उलोवप करतना म्हायती आनी प्रसारण मंत्रालयाचे सचीव संजय जाजू हांणी भारताच्या नेटान विस्तारपी माध्यम वातावरणा विशीं आनी निर्मिती केंद्र म्हणून ताच्या  वाढत्या आकर्षणाचो उल्लेख केलो.

देशाची बहुभाशीक प्रतिभा आनी जंय जागतिक कथांची कल्पना, निर्मिती आनी सामायिकरण करपाक जातले, असो जगाचो स्टुडिओ म्हणून भारताचो उदय हाजेर भर दित तांणी नमूद केले की, ही गोलमेज परिशद, "सांस्कृतीक बंध घटमूट करपाक आनी भागीदारी वाडोवपाक मदत करतली".

जाजू हाणी वेग वेगळ्या चित्रीकरण सुवातीं सावन प्रगत एनिमेशन आनी व्हीएफएक्स स्टुडिओ मेरेन भारताची तांक अधोरेखित केली आनी  इफ्फी चे प्रमुख व्यासपीठ आशिल्ल्या वेव्ह्ज  फिल्म बाजारांत  उपलब्ध  संदी सोदपाक प्रतिनिधींक आमंत्रित केले. भारता वांगडा भागीदारी केल्यार व्हड प्रमाणांत संवसारीक समुदायामेरेन पावपाक मेळटा, जाका लागून कथा संस्कृताय आनी बाजारपेठेंत विनाशिलतायेन पावपाक  शकतात हाजेर तांणी भर दिलो.

म्हायती आनी प्रसारण राज्यमंत्री डॉ.एल.मुरुगन हांणी गोलमेज परिशदेची येजमानकी चलयली. ह्या वेळार तांणी उपस्थितांक उद्देशून उलोवप केले. दृकश्राव्य मळार  परस्पर सहकार्याक  बळकटी दिवपाच्या दृष्टीन सहनिर्मिती हो सगळ्यांत शक्तिशाली मार्ग अशें तांणी सांगलें.  व्हिएफएक्स, अ‍ॅनिमेशन आनी फुडारातल्या निर्मितीविशीच्या तंत्रज्ञानाच्या बाबतीत भारतात गुणाकारीय पद्धतीन वाढ जावपाक लागल्या, जाका लागून 2025 मेरेन भारताचे माध्यम आनी मनरिजवण क्षेत्र 31.6 अब्ज अमेरिकी डॉलर मेरेन पावतलो असो अदमास तांणी उक्तायलो.

विकास आनी निर्मितीचे संयुक्त उपक्रम, सोपी परवानो पद्धती, प्रतिभेची आनी संसाधनाची सुलभ देवाणघेवाण सुरळीतरित्या जावची ह्या खातीर, तशेच चित्रपटकारांखातीर विस्तारीत सृजनशील स्वातंत्र्य उपलब्ध जावचे म्हूण द्विपक्षीय करारांची म्हत्वाची भुमिका आसता ही बाब तांणी अधोरेखीत केली. संवसारीक निर्मितीखातीर सुरक्षित परिसंस्था सुनिश्चित करपा खातीर केंद्र सरकारान इलॅक्ट्रॉनिक्स आनी म्हायती तंत्रज्ञान मंत्रालय, गृह मंत्रालय अशा वेगवेगळ्या  मंत्रालयां मदि आंतरमत्रालयीन परस्पर भागिदारी घडोवन हाडल्या, आनी अशा भागिदारीच्या माध्यमातल्यान पायरसी आडच्या उपाययोजनांक बळकटी दिल्या अशे तांणी सांगले.

मंत्र्यांच्या उलोवपा उपरांत, राष्ट्रीय चित्रपट विकास महामंडळाच्यो सल्लागार श्रुती राजकुमार हाणी, पायरसी विरोधात भारताच्या विकसीत जावपी धोरणाचो आराखडो ह्या गोलमेज परिशदेत मांडलो. डिजिटल गळती आडावपा खातीर आनी आशय सामग्रीची मालकी आशिल्ल्यांचे संरक्षण करपा खातीर आखिल्ल्या तंत्रज्ञानाचेर आदारीत उपाय आनी धोरणात्मक पातळेचेर उबारिल्ल्या व्यवस्थेचे तपशील तांणी आपल्या सादरीकरणातल्यान मांडले.

क्यूबा आनी नेपाळचे राजदूत तशेंच इस्रायल, गयाना, ऑस्ट्रेलिया, आयर्लंड, मोरोक्को, टोगो आनी कोट डी’आयव्हरचे प्रतिनिधित्व करपी वरिश्ठ राजनैतिक दूतानीय गोलमेज परिशदेंत वांटो घेतलो. ह्या विशयाच्या संदर्भांत तांणी आपल्या-आपल्या देशांतल्या चित्रपट उद्देग क्षेत्राविशी म्हायती दिली.

परराश्ट्र मंत्रालयाचे संचालक (बाह्य प्रतिसाद विभाग) राजेश परिहार हांणी गोलमेज परिशदेचे उपकार मानले. परिशदेंत वांटो घेतिल्ल्या राजकी दूतांनी दिल्ल्या योगदानाची तांणी  दखलपूर्ण उल्लेख केलो, आनी परस्पर सहकार्याच्या तत्वा खाला जागतीक दृकश्राव्य वातावरण सांबाळपाची भारताची वचनबद्धताय परत एकदा अधोरेखित केली.

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/मोनाली प्रभू/दर्शना राणे | IFFI 56