বিবেক গোয়েনকা জি, ভাই অনন্ত, জর্জ ভারগেস জি রাজ কমাল ঝা, ইন্দিয়ান এক্সপ্রেস গ্রুপকী অতোপ্পা মরুপশিং, শক্নাইরবশিং, মফম অসিদা তিল্লিবা অতোপ্পা শক্নাইরবশিং, ইবেম্মাশিং অমসুং ইবুংঙোশিং!

ঙসি, ভারতকী গনতন্ত্রদা জর্নেলিজফম অমসুং মীয়ামগী ইহৌশিং অৱাংবা থাক্ত পুখৎলম্বা মীওই অমা ইকায়খুম্নবা উৎনবা মফম অসিদা পুল্লে। মীৎয়েং শানবা অমা ওইনা, লৈবাক নিংবা অমা ওইনা অমসুং মেদিয়াগী লুচিংবা অমা ওইনা, ভারতকী মীয়াম মরক্ত মিসন অমা ওইনা, পাউ-চে অমা খক নত্তনা, রামনাথজিনা ইন্দিয়ান এক্সপ্রেস গ্রুপ লিংখৎখি। মহাক্কী লমজিং মখাদা, গ্রুপ অসি ভারতকী গনতন্ত্রগী গুনশিং অমসুং লৈবাক্কী য়াইফনবা খোঞ্জেল ওইখি। মরম অদুনা ২১ শুবা চহিচা অসিদা ভারত চাউখৎনবা থবকশিংদা রামনাথজিগী থবকশিংনা ঐখোয়দা ইথিল পীরি। লেকচর অসিদা শরুক য়ানবা চেপাউ পীরকপগীদমক ঐনা ইন্দিয়ান এক্সপ্রেস গ্রুপ থাগৎপা ফোঙদোকচরি।

মরুপশিং,

রামনাথ জিনা গীতাগী শ্লোক অমা, सुख दुःखे समे कृत्वा, लाभा-लाभौ जया-जयौ। ततो युद्धाय युज्यस्व, नैवं पापं अवाप्स्यसि।। গী ইথিল ফংখি। মসিনা হায়রি মদুদি হরাওবা-অৱাবা, মাঙবা-তোংবা অমসুং মাইপাকপা-মাইথিবগী চপ মান্নবা ৱাখল্লোনশিংদা য়েংদুনা অদোমগী থৌদাং পাংথোক্নবা লান্থেংনরি, মসি পাংথোকপদা অদোম পাপকী শরুক অমা ওইরোই। নিংতম ইহৌ মনুংদা রামনাথ জিনা কংগ্রেস শৌগৎখি, তুংদা মহাক্না জনতা দল শৌগৎখী, মদুদগী মহাক্না জন সঙ্গগী তিকেত্ত মীখল থেংনখি। নিংতম্বা ফংলবা মতুংদা হায়দ্রবাদকী থৌদোকশিং অমসুং রাজাকারশিংগী মীওৎ-মীনৈগী ৱাফমশিং লাকপদা রামনাথ জিনা সরদার পতেলগী মতেং পাংখি। ১৯৭০ গী মতমদা, বিহারদা মহৈরোয়শিংগী ইহৌগী লুচিংবা দরকার ওইরকপা মতমদা, ইহৌ অদু লুচিংবনা নানাজি দেসমুখগা লোয়ননা রামনাথ জিনা জে.পি ৱাখল তাহনখি। ইমর্জেন্সি মনুংদা ইন্দিরা গান্ধীগা নক্নবা মিনিষ্টরনা রামনাথ জি কৌখি অমসুং মহাক জেলদা থমগনি হায়না কিহনখি। খরনা মীয়ামদা খঙহনখি, খরনা লোৎশিনখি, অদুবু মীয়ামদা ফোঙদোকখিবা ৱাফমশিং অদু মতম পুম্নমক্ত অচুম্বগী লেপখি।

মরুপশিং,

রামনাথ জি খাংবা য়াম্না কনদে হায়নখি। খাংবা কন্দবা হায়বসি ফত্তবা হিরমদা নত্তে, মসি অফবা হিরমদনি। খাংবা কন্দবা অশিনা অহোংবা পুরক্নবা থবক কন্না শুখি। মসিগা চপ মান্ননা, ঙসিগী ভারত খাংবা কন্দে। চাউখৎনবগীদমক ভারত ঙাইঙমদ্রে, অত্মনির্ভর ওইনবা ভারত ঙাইঙমদ্রে। ২১শুবা চহিচাগী চহি ২৫ কয়া য়াম্না য়াংনা হৌখিবগে হায়বা ঐখোয়না উরে। খুদোংচাদবা কয়া মরাংকাইনা লৈরি, অদুবু মখোয়না ভারতকী খোঙজেল লেপহনবা ঙমদে।

মরুপশিং,

হৌখিবা চহি ৪-৫ দা মালেম শীনবা থুংনা খুদোংচাদবা কয়া মায়োক্নবা অদোম উরে। ২০২০ দা কোরোনাভাইরস লাইচৎ লাকপদগী মালেম শীনবা থুংনা শেন-থুমগী তম্বা ঙমদবা ফিবম অমা মায়োক্নখি। মালেমগী সপ্লাই চেন শাথিনা অকায়বা পীখি অমসুং মালেম শীনবা থুংনা নিংবা কাইবা হৌখি। ফিবম তপ্না তপ্না ফগৎলকপা হৌখি, ঐখোয়গী য়ুম্লোন্নরিবা লৈবাকশিং খুদোংচাদবা মায়োক্নরবা হৌরকখি। খুদোংচাদবা কয়া অসিগী মরক্ত, ঐখোয়গী ইকোনোমি ফিবম ফগৎলকখি। ২০২২ দা, য়ুরোপকী খুদোংচাদবশিংনা মালেমগী সপ্লাই চেনশিং অমসুং ইনর্জিগী কৈথেলশিংদা অকায়বা পীখি। মসি ওইজরবসু, ২০২২-২৩ দা ঐখোয়গী ইকোনোমি মখা তানা চাউখৎলকখি। ২০২৩ দা নোংচুপ এসিয়াদা ফিবমশিং হেন্না ফৎচিল্লক্ত্রবসু, ঐখোয়গী গ্রোথ রেত ফিবম ফনা লৈখি। চহি অসিদা ফাওবা, মালেমগী লৈতাদবা কয়া লৈরবসু, ঐখোয়গী গ্রোথ রেত হৌজিক ফাওবা চাদা ৭ ওইরি।

মরুপশিং,

ঙসিদি, মালেম্না খুদোংথিবশিং কিনরিবা মতম অসিদা, অফবা তুংলমচৎ অমগী মাইকৈদা ভারত য়াংনা চঙশিল্লি। ইন্দিয়ান এক্সপ্রেসকী মফম অসিদগী, ভারত ইনখৎলক্লিবা কৈথেল অমা খক ওইবতা নত্তনা, ইনখৎলক্লিবা নমুনা অমসু ওইরে। ঙসিদি, মালেম্না ভারতকী চাউখৎপগী নমুনা অসি থাজবগী নমুনা ওইনা শকখঙলে।

মরুপশিং,

মপাঙ্গল কনবা গনতন্ত্র অমদা দরকার ওইবা কয়া লৈরি অমসুং অসিগুম্বা মরুওইবা দরকার ওইবা অমদি গনতন্ত্রদা মীয়াম শরুক য়াবা অসিনি। গনতন্ত্রদা মীয়াম থাজবা থম্বা অসি মীখলশিংগী মতমদা উবা ফংই। নবেম্বর ১৪ গী ফলশিং অদোম নিংশিংলমগনি অমসুং রামনাথজিসু বিহারগা মরী লৈনৈ, মখোয় পনবা অসি মহৌশানি। পুৱারি ওইরবা ফলশিংগা লোয়ননা, অতোপ্পা মরুওইবা ৱাফম অমনা, মীয়াম্না গনতন্ত্রদা শরুক য়াবা হেনগৎলকপা অসিনি। হন্দক বিহারদা পুৱারি ওইনা ভোত্তর মশিং খ্বাইদগী য়াম্না থোক্লকপা উরে। নুপীশিংনা মশিং য়াম্না থোক্লকপা অসি নুপাশিংদগী চাদা ৯ হেল্লে। মসিসু গনতন্ত্রগী মাইপাকপা অমনি।

মরুপশিং,

ভারতকী মীয়ামগী অনিংবশিং অমুক হন্না বিহারগী ফলনা উৎলে। ঙসি, পুকচেল শেংবা, মীয়ামগী অনিংবশিং থুংহনবা অমসুং চাউখৎপা মরুওইনা লৌবা রাজনিতি দলশিংদা ভারতকী মীয়াম্না থাজবা থম্লে। ঙসি ইন্দিয়ান এক্সপ্রেসকী প্লেতফোর্ম অসিদগী, লৈবাক অসিগী রাজ্য সরকার খুদিংমক্ত, দল খুদিংমক্ত, আইদিওলোজি খুদিংমক্কী সরকারশিং, লেপ, রাইত অমসুং সেন্তরদগী, ঙসি অদোম্না করম্বা সরকার চলাইরিবগে হায়বা বিহারগী ফলশিংনা ঐখোয়দা তাক্লে। থবকশিংনা অসিনা তুংগী চহিশিংদা অদোমগী রাজনিতি দলশিংগী তুংগী মরাইবক লেপকনি। বিহারগী মীয়াম্না আর.কে.দি সরকারদা চহি ১৫ গী খুদোংচাবা অমা পীরে। লালু যাদবনা বিহারগী চাউখৎ-থৌরাংগী থবক কয়া পাংথোকখি, অদুবু মহাক্না জঙ্গল রাজগী লম্বী খনখি। মসিগী মীরাইবা অসি বিহারগী মীয়াম্না কৈদৌঙৈদা কাউবা ঙম্লোই। মরম অদুনা, ঙসি লৈবা অসিদা লৈনিংবা সরকার লৈবা মতমদা, ঐখোয়গী সরকার কেন্দ্র নত্ত্রগা রাজ্যশিংদা তোঙান তোঙানবা দলশিংগী সরকারশিং লৈবা ওইবা য়াই, ঐখোয়গী মরুওইবদি চাউখৎ-থৌরাংনি, চাউখৎপা খক্তনি। মরম অদুনা, ঐনা রাজ্য সরকার খুদিংমক্ত হায়রি মদুদি, অদোমগী রাজ্যদা শেন থাদরক্নবা অফবা ফিবম অমা শেমগৎনবা অদোম চাংদম্নগদবনি, ললোন-ইতিক লাইহন্নবা অদোম চাংদম্নগদবনি, চাউখৎপগী হিরম খুদিংমক্ত মাঙলোমদা চঙশিন্নবা অদোম চাংদম্নগদবনি, মতম অদুদা অদোমদা মীয়াম্না থাজবা অদোম উবা ফংগনি।

মরুপশিং,

বিহারগী মীখল মাইপাক্লবা মতুংদা, মীওই খর, মেদিয়াদা মোদী নুংশিজবা খর য়াওনা, বি.জে.পী অমসুং মোদী মতম পুম্নমক্ত ২৭×৭ মীখলগী মওংদা লৈরি হায়না অমুক হন্না হায়বা হৌরকখি। মীখলশিং মাইপাক্নবা মীখলগী শেম-শাদুনা লৈবা দরকার ওইদে হায়না ঐনা থাজৈ। থম্মোয় মনুংদা লৈতাদবা মতম অমা লাকপদা মিনিত অমা ফাওবা মাঙহল্লোইদবনি অমসুং লায়রবশিং অৱাবা হন্থহন্নবা, লায়রবশিংদা থবক পীনবা, লায়রবশিংদা অনা-লায়য়েংগী খুদোংচাবা পীনবা, মিদল ক্লাসকী অনিংবশিং থুংহন্নবা কনাগুম্ব অমনা থবক তৌগদবনি। কনাগুম্বা অমনা চোকথবা লৈতনা থবক তৌগদবনি। মসিগী ৱাখল্লোন অসিনা সরকার মখা তানা লমজিংবা মতমদা, মীখলশিংগী নুমিত্ত মতম অদুদা ফলশিং উবা ফংগনি। মসি ঐখোয়না বিহারদা থেংনরে।

মরুপশিং,

নোংমা কনাগুম্ব অমনা রামনাথ জিগা মরী লৈনবা অতোপ্পা ৱারি অমা লিখ্রে। ৱারি অদু বিদিসাদগী রামনাথ জিনা জনা সঙ্গগী তিক্কেত ফংখিবগী মতমনি। মতম অদুদা, লুপ অসিনা হেন্না মরুওইবরা নত্ত্রগা লনাই মীওই অমগী শক্তমনা হেন্না মরুওইবরা হায়না মহাক অমসুং ননাজি দেসমুখনা খন্নখি। ননাজি দেসমুখনা রামনাথ জিদা হায়খি  মদুদি মহাক মীরেপচে পীশিনবা খক লাকপা মথৌ তাই অমসুং মতম অদুদা মহাক মাইপাকপগী সর্তিফিকেত লৌবা অমুক লাকখি। দলগী থৌমীশিংগী মপাঙ্গলগা লোয়ননা মহাক মাইপাক্নবা রামনাথ জিগী মহুত্ত ননাজিনা মতম অদুদা মীখল থেংনখি। ৱারি অসি লীরদুনা, ঐনা ফোঙদোক্নিংবদি মীরেপশিং মীরেপচে পীশিনবা খক্তদা মশক উৎকদবনি হায়বা নত্তে। ঐগী পান্দমদি বি.জে.পীগী মশিং থিঙমদ্রবা থৌমীশিংগী কৎথোকপা অদোম্না পুক্নিং চংশিনগদবনি ।

মরুপশিং,

বি.জে.পীগী থৌমী লাখ কয়ানা মখোয়গী হুমাংনা দলগী মরাশিং শেমগৎলকপনি অমসুং মখোয়না ঙসি ফাওবা থবক অসি পাংথোক্লি। মদু খক নত্তনা, কেরলা, নোংচুপ বেঙ্গল অমসুং জম্মু অমসুং কাস্মিরগুম্বা রাজ্যশিংদা ঐখোয়গী থৌমী চা কয়ানা মখোয়গী ঈনা বি.জে.পীগী মরাশিং ঈশিং চাইরি। অসিগুম্বা কৎথোক্লবা থৌমীশিং লৈবা দল অমদা, মীখলশিং মাইপাকপা খক্তনা পান্দম নত্তে। মীয়ামগী থম্মোয় জয় তৌনবা থবক তৌনবগী থৌনাগা লোয়নান মখোয়না মখা তানা থবক তৌরি।

মরুপশিং,

লৈবাক অসি চাউখৎনবগীদমক, চাউখৎপগী কান্নবশিং মীওই খুদিংমক্ত য়ৌহনবা হায়বসি য়াম্না মরুওই। সরকারগী স্কিমশিং দলিতশিং, তোল্লবশিং অমসুং নৈহৎপীরবশিংদা য়ৌহনবা মতমদা, খুন্নাইগী অচুম্বা পুরকই। হৌখিবা চহিশিংদা মখোয় মশাগী য়াইফনবা অমসুং খুন্নাইগী অচুম্বগী মিংদা ইমুং খরনা অমসুং দল খরনা সরকারগী স্কিমশিং শীজিন্নবা ঐখোয়না উখ্রে।

মরুপশিং,

খুন্নাইগী অচুম্বা থবক ওইনা পাংথোকপা ঙসি লৈবাক অসিনা উবদা ঐ অপেনবা ফাওই। অশেংবা খুন্নাইগী অচুম্বা করিনো হায়বা ঐনা অদোমদা হায়নিংই। তোইলেত করোর ১২ শানবা খোঙজং অসিনা তঙাইফদবগী লমহাংদা খোঙহাম্বা লায়রবা মীওই কয়াগী পুন্সিদা ইকায়খুম্নবা পুরক্লে। জন ধন বেঙ্ক একাউন্ত করোর ৫৭ না মমাংগী সরকারশিংগী মতমদা কৈদৌঙৈদা বেঙ্ক একাউন্ত অমা ফাওবা হাংগনি হায়বগী থাজবা লৈরুদ্রবা মীওইশিং শেন-থুমগী থবকশিংনা কোনশিল্লে। লায়রবা মীওইশিংগী পাক্কাগী য়ুম করোর ৪ শাদুনা মখোয়নগী অনৌবা মঙলানশিংগী মখোয়দা থৌনা হাপ্লে অমসুং মখোয়না খুদোংথিবা মায়োক্নবা ঙম্বগী থৌনা হেনগৎহল্লে।

মরুপশিং,

হৌখিবা চহি ১১ দা সোসিএল সেকুরিগীদমক পাংথোকখিবা থবক তোপ-তোপ্পনি। ঙসিদি, বিহারদা মীওই করোর ৯৪ রোম সোসিএল সেকুরিতি নেত মখাদা লৈরে। চহি ১০ গী মমাঙদা করি ফিবমদা লৈরম্বগে হায়বা অদোম খঙলমগনি? মীওই করোর ২৫ খক সোসিএল সেকুরিতিগী মখাদা লৈদুনা সরকারগী স্কিমশিংগী কান্নবশিং ফংখি অমসুং হৌজিক মশিং অদু করোর ৯৪ য়ৌরে অমসুং মসি অশেংবা খুন্নাইগী অচুম্বনি। ঐখোয়না সোসিএল সেকুরিতিগী নেত পাকথোকহনবা খক নত্তনা, চাদা ১০০ খুদোংচাবা ফংহন্নবা মিসন অমদা ঐখোয় মখা তানা থবক তৌরি, মসিনা তাক্লিবদি, খুদোংচাবা ফংবা য়ারবা মীওই অমতা চিৎথহৌদবনি। মসিগী পান্দম অসিগা লোয়ননা সরকার অমনা থবক তৌবা মতমদা, সরকার অদুনা বেনিফিসরি খুদিংমক য়ৌহনবা পাম্বা মতমদা, মখল খুদিংমক্কী মীচং-মীখায় নাইবা লৈরোই। হায়রিবা থবকশিং অসিনা মরম ওইদুনা, হৌখিবা চহি ১১ দা মীওই করোর ২৫ লায়রবা কোকখ্রে। মরম অদুনা গনতন্ত্রগী কান্নবা ফংলে হায়বদা ঙসি মালেম্না য়ারিবনি।

মরুপশিং,

অদোমগী মফমদা ঐনা অতোপ্পা খুদম অমা পীগনি। ঐখোয়গী এস্পিরেসনেল দিষ্ট্রিক প্রোগ্রাম নৈনসি। হৌখিবা সরকারশিংগী মতমদা চাউখৎতবা হায়না মমিং থোনবা অমসুং কাউথোকপা জিলা ১০০ হেন্না লৈখি। হায়রিবা লমদমশিং অদুদা চাউখৎ-থৌরাংগী থবকশিং পায়খৎপা য়াম্না খুদোংচাদে হায়না অমসুং অসিগুম্বা জিলাশিংদা কনানা থবক কন্না শুগনি হায়বগী থাজবা লৈখি। ওফিসার অমা দন্দি পীবা ওইনা পোষ্টিং পীবা মতমদা, হায়রিবা চাউখৎত্রিবা জিলাশিং অদুদা মখোয় থাগনি অমসুং মফম অদুদা লৈনবা হায়গনি। হায়রিবা চাউখৎত্রিবা জিলাশিং অদুদা মীওই কয়া য়াম্না লৈবগে হায়বা অদোম খঙবরা? হায়রিবা জিলাশিং অদুদা লৈবাক অসিগী মীওই করোর ২৫ হেন্না লৈরি।

মরুপশিং,

করিগুম্বা হায়রিবা জিলাশিং অদু চাউখৎতনা লৈরবদি, মথং চহি ১০০ ফাওবদা ভারত চাউখৎপা ঙম্লোই। মরম অদুনা, অনৌবা লাল্লোং অমগা লোয়ননা ঐখোয়গী সরকারনা থবক পায়খৎপা হৌরে। ঐখোয়না রাজ্য সরকারশিং শরুক য়াহল্লে, চাউখৎপগী পেরামিতরদা মনিংদা লৈহৌরবা জিলাশিং থিজিল্লে অমসুং জিলা অমমমগী তোখায়বা লাল্লোং অমা শেম্লে। লৈবাক অসিগী খ্বাইদগী ফবা ওফিসারশিং ঐখোয়না মফম অদুদা থম্লে অমসুং হায়রিবা জিলাশিং অদু চাউখৎত্রিবা জিলাশিং হায়না খন্দ্রে, এস্পিরেসনেল ওইনা খল্লে। ঙসিদি, চাউখৎপগী পেরামিতরশিংদা মখোয়গী রাজ্যশিংগী অতোপ্পা জিলাশিংদগী হায়রিবা এস্পিরেসনেল জিলাশিং অসিনা হেন্না ফগৎলকপা অদোম উবা ফংলগনি। ছতিসগরগী বাস্তার খুদম অমা ওইনা লৌরসি। জিলা অসি অদোম পাউমী কয়াগী পামজরবা হিরম অমা ওইখি। মতম অমদা, মফম অদুদা পাউমীশিং চৎলুবদা, মখোয় লৈঙাক্কী অয়াবা লৌবা দরকার ওইখিদে, অদুবু অতোপ্প লুপশিংদগী অয়াবা লৌবা দরকার ওইখি। অদুবু ঙসিদি, হায়রিবা বাস্তার অদু চাউখৎপগী লম্বীদা চৎলে। বাস্তার ওলেম্পিক্সতা ইন্দিয়ান এক্সপ্রেসনা কয়া য়াম্না পাউ ফোঙখিবগে হায়বা ঐ খঙদে, অদুবু বাস্তার ওলেম্পিক্সগুম্বা থৌরমশিং বাস্তারগী নহারোলশিংনা পাংথোকপা উবদা রামনাথ জি য়াম্না হরাওগনি।

মরুপশিং,

বাস্তার হেক পল্লকপদা, ঐনা মফম অসিদা নেক্সালিজম হায়বদি মাওইষ্ট তেরোরিজমসু খন্নগনি। লৈবাক শীনবা থুংনা নেক্সালিজম অমসুং মাওইষ্টগী হিংশা হন্থরক্লে, অদুবু মসি কংগ্রেস মনুংআদ থবক য়াওবা হেনগৎলক্লি। অদোম খঙলে মদুদি হৌখিবা চহি ৫০ দা, লৈবাক অসিগী অচৌবা রাজ্য খুদিংমক মাওইষ্টকী হিংশানা শোকহল্লে। অদুবু লৈবাক অসিগী লাইবক থিবদি ভারতকী সংবিধান্না য়াদ্রবা   মাওইষ্ট তেরোরিজম কংগ্রেসনা য়োকখৎলে অমসুং শৌগৎলে। মনুং হুঞ্জিনবা উমংগী মফমশিং খক নত্তনা, কংগ্রেসনা সহরশিংদা নেক্সালিজম য়োকখৎলে। অচৌবা ইন্সতিতুসনশিংদা কংগ্রেসনা অর্বান নেক্সালিজম শৌগৎপশিং শেমগৎলে।

মরুপশিং,

চহি ১০-১৫ গী মমাঙদা কংগ্রেসতা অর্বান নেক্সালিজম অমসুং মাওইষ্ট ফোর্সশিং চঙশিনখিবদগী হৌজিক কংগ্রেস অসি মুস্লিম লিগ-মাওইষ্ট কংগ্রেস (এম এম সি) ওইখ্রে। ঙসি, ঐনা মপুংফাবা দাইত্বগা লোয়ননা হায়রি মদুদি মশাগী য়াইফনবা খক খনবদগী মুস্লিম লিগ-মাওইষ্ট কংগ্রেসনা লৈবাক্কী য়াইফনবা থবক তৌদ্রে। ঙসিদি মুস্লিম লিগ-মাওইষ্ট কংগ্রেস অসি লৈবাক্কী অপুনবদা অচৌবা শিংনবা অমা ওইরে।

মরুপশিং,

ঙসি, ভারত চাউখৎলবা লৈবাক অমা ওইরক্নবা অনৌবা খোঙচৎ অমদা চঙশিনবা হৌরে, রামনাথ গোয়েনকা জিনা পাংথোক্লম্বা থবকশিং অমুক্ক হেন্না চুনরে। রামনাথ জিনা বৃতিসকী মীওৎ-মীনৈগী মায়োক্ত য়াম্না কন্না লেপখি। মহাক্কী ইদিতোরিয়েল অমদা, বৃতিসকী য়াথংশিং ইনবগী মহুত্ত মহাক্কী পাউ-চে ফোঙবা লেপ্পনা মহাক্না হেন্না পাম্মী হায়না মহাক্না ইখি। মসিগা চপ মান্ননা, ইমর্জেন্সিগী মওংদা লৈবাক অসি অমুক হন্না মীনাই ওইহন্নবা হোৎনরকপা মতমদা, রামনাথ জিনা য়াম্না কন্না লেপখি। চহি অসিদা ইমর্জেন্সি থমখিবা চহি ৫০ মপুংফারে। চহি ৫০ গী মমাঙদা, মীয়াম নমথনবা হোৎনরিবশিংগী ৱাখল্লোন শিংনদুনা ইন্দিয়ান এক্সপ্রেসনা ইদিতোরিয়েলশিং ফাওবা হাংহনখি।

মরুপশিং,

ঙসি, ঐনা মফম অসিদগী মীনাই ওইবগী ৱাখল্লোন্দগী ঐখোয় ইশা নিংতম্বগী মতাংদা য়াম্না কুপ্না ঙাংগনি। মদুগীদমক, ঐখোয় চহি ১৯০ মনিং হন্দুনা চৎকনি। ১৮৫৭ গী নিংতম্বগী অহানবা লাল মমাঙ ফাওবদা, ১৮৩৫ দা, ভারত মসিগী য়ুম্ফমদগী মরু ফংনা মুৎথৎনবা বৃতিস পর্লিয়ামেন্তরিয়ান থোমাস বেবিংতন মেকাউলিনা অচৌবা খোঙজং অমা হৌদোকখি। মপান্দা ভারতমচাশিং মানবা অদুগা মখোয়গী ৱাখল্লোন্দা ইংলিস ওইবা অসিগুম্বা ভারতমচাশিং মহাক্না শেমগনি হায়না মহাক্না লাউথোকখি। পান্দম অসি ফংনবা, মেকাউলিনা ভারতকী লাইরিক-লাইশু তম্বগী থবকশিং হোংদোকপা খক নত্তনা, মসিগী মরাশিং মহাক্না মাঙহনখি। মহাত্মা গান্ধী মশামক্না হায়খি মদুদি ভারতকী অরিবা লাইরিক-লাইশুগী থবক অসি মরা ফুদোক্লবা অমসুং মাঙহল্লবা ফজরবা উ পাম্বী অমগুম্বনি।

মরুপশিং,

ঐখোয়গী নাৎকী চাউথোকচবা পোক্নবা ঐখোয়গী লাইরিক-লাইশুগী থবকশিংনা ঐখোয়দা তম্বীরি। ভারতকী লাইরিক-লাইশুগী থবকশিংনা, মহৈরোয়শিংগা লোয়ননা, স্কিলদা চপ মান্নবা অকনবা মীৎয়েং থম্লি। মরম অদুনা ভারতকী লাইরিক-লাইশুগী থবকশিংগী য়াংলেন শরুক থুদেক্নবা মেকাউলিনা ৱারেপ লৌখিবনি অমসুং মহাক্কী পান্দম অদু মহাক ফংবা ঙমখি। মতম অদুদা বৃতিসকী লোল অমসুং বৃতিসকী ৱাখল্লোন হেন্না ইকায়খুম্নবা ফংই হায়বা মেকাউলিনা খঙখি অমসুং তুংগী চহি চা কয়াদা মসিগী মাঙজবা ভারতনা ফংখি।

মরুপশিং,

ঐখোয়গী ইশানা ইশাবু থাজবা মেকাউলিনা মাঙহনখি। ঐখোয়গী মনুংদা ঐখোয় মতি চাদে হায়বগী ৱাখল্লোন অমা ঐখোয়দা পোকহনখি। অমুক্কী খুৎথাদা, চহি লিশিং কয়াগী ঐখোয়গী লৌশিং অমসুং সাইন্স, ঐখোয়গী নাৎ অমসুং কলা অমসুং অপুনবা ঐখোয়গী পুন্সিগী লম্বী লুখাক খোমদা থাদখি। করিগুম্বা ভারতনা চাউখৎপা পাম্লবদি, করিগুম্বা মখোয়না অচৌবা থবক অমা পাংথোকপা পাম্লবদি, মপান লৈবাকশিংগী থবকশিংগী খুৎথাংদা মখোয় থবক তৌগদবনি হায়বগী মরু মতম অদুদা হুনখি। নিংতম্বা ফংলবা মতুংদা ফাওবা মসিগী ৱাখল্লোন অসি হেন্না মপাঙ্গল কনখৎলকখি। ঐখোয়গী লাইরিক-লাইশুগী থবকশিং, ঐখোয়গী শেন্মিৎলোন, ঐখোয়গী খুন্নাইগী অনিংবশিং, খুদিংমক মপান লৈবাকশিংগী থবকশিংনা পুনশিনখি। ঐখোয়গী ওইজবগী চাউথোকচবা অদু অসুম অসুম মাঙশিল্লকখি। মশা মরোমদোম লেপচবা ঙম্বা অসিনা ঐখোয়গী নিংতম্বগী য়ুম্ফমনি হায়না গান্ধীজিনা খনবা অদু মখা তানা কান্নখিদে। ঐখোয়না লৈবাক ঙাকপগী নমুনাশিং মপান লৈবাকশিংদা থিবা হৌখি। অনৌবা থবকশিং পাংথোক্নবা ঐখোয়না মপান লৈবাকশিংদা য়েংবা হৌখি। মসিগী ৱাখল্লোন অসিনা, মপান্দগী পুশিল্লকপা অনৌবা ৱাখলশিং, মপান্দগী পুশিল্লকপা পোৎ-চৈশিং অমসুং থবকশিংনা হেন্না ফৈ হায়বগী খুন্নাইগী চৎনবী অমা লৈহনখি।

মরুপশিং,

অদোম্না অদোমগী লৈবাক ইকায়খুম্নদবা মতমদা, অদোম্না লৈবাক অসিগী থবকশিং য়াদ্রবনি। অদোম্না মেদ ইন ইন্দিয়া মেনুফেকচরিংগী থবকশিং পামদ্রে। ঐ অদোমগী মফমদা তুরিজমগী অতোপ্পা খুদম অমা পীগে। লৈবাক খুদিংমক্ত তুরিজম চাউখৎপা অদোম উরমগনি, লৈবাক অদুগী মীয়াম্না মখোয়গী নাৎ অমসুং চৎনবীগী চাউথোকচবা ফাওরি। ঐখোয়গী ওইনা, মসিগী ওন্ন-তৈনবা থোকখি। নিংতম্বা ফংলবা মতুংদা, ঐখোয়গী চৎনবী অমসুং নাৎ মীরাইনবা থবকশিং পায়খৎখি। কনাগুম্ব অমগী নাৎকী চাউথোকচবা লৈত্রবা মতমদা, মদু ঙাক-শেন্নবগী থবক অমতা পায়খৎলোই। ঙাক-শেনবগী থবক অমতা পায়খৎত্রবা মতমদা, মসি ঐখোয়না ইচম চম্বা চেক অমসুং নুঙগুম্না মাঙহনগনি অমসুং মসিমক থোকখি। তুরিজম চাউখৎনবগীদমক কনাগুম্বা অমগী হেরিতেচগী চাউথোকচবা অসি তঙাইফদবনি।

মরুপশিং,

মসি লমদম অসিগী লোলশিংগীদমক অচুম্বনি। করম্বা লৈবাক্ত লমদম অমগী লোল হন্থনা য়েংবগে? জপান, চাইনা অমসুং কোরিয়াগুম্বা লৈবাকশিং নোংচুপলোমগী থবকশিং পাংথোকই, অদুবু মখোয়না মখোয়গী লোলশিং মাঙহন্দনা থম্মী, মখোয়না কৈদৌঙৈদা মখোয়গী লোল মীরাইদে। মরম অদুনা, অনৌবা নেসনেল ইজুকেসন পোলিসিদা লমদম অমগী লোলশিংদা লাইরিক তম্নবা ঐখোয়না অকনবা মীৎয়েং থম্লে। মসি ঐনা নাখৈ শেংনা হায়গে: ঐখোয় ইংলিস লোলগী মায়োক্ত লৈবা নত্তে। ঐখোয়না ভারতকী লোলশিং শৌগৎলি।

মরুপশিং,

মেকাউলিনা ১৯৩৫ দা ফত্তবা থবক পাংথোকখি। ২০৩৫ দা, চহি ১০ গী মতুংদা, ফত্তবা থবক অদু পাংথোকখিবা চহি ২০০ মপুংফারগনি। মরম অদুনা, ঙসি ঐনা লৈবাক অসিগী মীয়ামদা হায়জরি মদুদি মথং চহি ১০ দা মেকাউলিগী মীনাই ওইবগী ৱাখল্লোন্দগী ঐখোয় মনিংতম্নবা ঐখোয়না ৱাশক অমা লৌগদবনি। হায়রিবা লাক্কদৌরিবা চহি ১০ অসি ঐখোয়দা য়াম্না মরুওই। ঐনা অপীকপা থৌদোক অমা নিংশিংলি। গুজরাত্ত লেপ্রোসিগী হোস্পিতাল অমা শাখি। শঙ্গানবগী চেপাউ পীনবা হোস্পিতাল শাবা শরুক য়াখিবা মীওইশিং মহাত্মা গান্ধী উনবা চৎখি। গান্ধীজিনা হায়খি মদুদি মহাক্না লেপ্রোসিগী হোস্পিতাল অমা শঙ্গাবা পামদে; মহাক্না হায়খি মদুদি ঐ শঙ্গাবগী লাকপা ঙম্লোই। অদুবু হোস্পিতাল অদু মতম চুপ্পগী থোঙ লোনগদবনি, মতম অদুদা ঐ কৌরকউ, হোস্পিতাল অদু শো লোন্নবা ঐ লাক্কনি। হায়রিবা হোস্পিতাল অদু গান্ধীজিগী পুন্সিদা শো লোনখিদে। অদুবু গুজরাত্ত লেপ্রোসি লৈত্রবা মতমদা, ঐনা চীফ মিনিষ্টর ওইরকপা মতমদা হায়রিবা হোস্পিতাল অদু শো লোনবগী খুদোংচাবা ঐনা ফংখি। ১৯৩৫ দগী হৌখিবা খোঙচৎ অদু ২০৩৫ দা লোইশিনগদবনি, গান্ধীজিনা হোস্পিতাল শো লোনবা পামখিবা মওং অদুদা,  মসিগী ৱাখল্লোন অসি মতম চুপ্পগী ওইনা তান্থোকখিবা অসিসু ঐগী অনিংবনি।

মরুপশিং,

ঙসি ঐখোয়না হিরম কয়া খন্নরে। ঐনা অদোমগী মতম য়াম্না লৌনিংদে। ইন্দিয়না এক্সপ্রেস গ্রুপনা ঐখোয়গী লৈবাককঈ অচৌবা অওনবা খুদিংমক অমসুং চাউখৎপগী ৱারি খুদিংমক উরে। ঙসিদি, বিকসিত ভারত অমা ওইনবা পান্দমগা লোয়ননা ভারত মাঙলোমদা চঙশিল্লি, মসি অমুক হন্না খোঙচৎ অসিগী শরুক অমনি। মপুংফানা কৎথোকপগা লোয়ননা রামনাথ জিগী ফিদমশিং অমসুং ৱাখল্লোনশিং ঙাক-শেন্নবা অদোম্না পুকচেল শেংনা হোৎনরিবশিং অসিগীদমক ঐনা অদোম থাগৎপা ফোঙদোকচরি। অমুক হন্না, অদোমগী অঙকপা থৌরম অসিগীদমক ঐনা থম্মোয় শেংনা য়াইফ পাউজেল পীজরি। রামনাথ গোয়েনকা জিদা ইকায়খুম্নবা উৎপগা লোয়ননা, ঐগী ৱারোল লোইশিঞ্জরে।

অদোম ঙমখৈ লৈতনা থাগৎচরি!

***