Ka sorkar ka la rai ban pynthymmai ia ki dor jong ki jingpynbna da 26%. Ia ki dor na ka bynta ki jingpynbna khlem rong ha ki kot khubor ha ka shi sq.cm. na ka bynta shi lak tylli ki kot khubor la pynkiew na ka T.47.40 sha ka T. 58.68, ka jingkiew kaba 26%. Ka sorkar ka la mynjur ruh ia ki jingai jingmut jong ka Committee kiba iadei bad yn tyrwa ia ki jingsiew ba kham bha na ka bynta ki jingpynbna ba don rong, ka jingbuh kyrdan ba kyrpang.

Ka Central Bureau of Communication (CBC) ka dei ka nodal Media Unit hapoh ka Tnad Information and Broadcasting ban shim ia ka jingkitkhlieh ha kaba iadei bad ki jingpynbna paidbah na ka bynta ki Tnad/ ki Tnad bapher bapher jong ka Sorkar India ha ki lad pathai khubor bapher bapher, kynthup ia ki kot khubor, kiba la pyniasoh bad ka CBC na ka bynta kane ka jingthmu. Ia ki dor ban pynmih ia ki jingpynbna ha ki kot khubor da ka CBC la pynthymmai khatduh da ka Tnad halor ki jingai jingmut jong ka 8th Rate Structure Committee (RSC) ha ka 09.01.2019, kiba treikam na ka bynta ka samoi kaba lai snem.

Ka Komiti ka bishar bniah ia ka jinglut jong ki kot khubor

Ia ka 9th Rate Structure Committee hapoh ka jingpyniaid jong ka AS&FA (I&B) la thaw ha ka 11 tarik Naiwieng, 2021 na ka bynta ban ai jingmut ha kaba iadei bad ka jingpynkylla ia ki dor na ka bynta ki jingpynbna jong ka Sorkar ha ki kot khubor.

Ka Komiti ha ka jingïalang jong ka hapdeng u bnai Naiwieng, 2021 bad u Nailar, 2023 ka la bishar bniah ïa ki jingai jingmut na ki seng kot khubor bapher bapher jong ki kot khubor kiba rit, kiba pdeng bad kiba heh kata, ka Indian Newspaper Society (INS), All India Small Newspapers Association (AISNA), ka Small-Medium-Big Newspapers Society (SMBNS) bad kiwei kiwei kiba don bynta ha kane ka kam. Ka Komiti ka la ïakren ruh halor ki kyndon bapher bapher kiba don ka jingktah ïa ki dor jong ki jingpynbna ha ki kot khubor, kum ka jingkiew dor jong ka WPI ha kaba ïadei bad ki kot khubor, ka jingsiew, ka jingkiew dor, ka jinglong jong ka dor jong ki kot khubor ba la wanrah nabar ri, ka jinglut jingsep ha ka jingpynkhreh, bad kiwei kiwei. Ka Komiti ka la aiti ia ki jingai jingmut jong ka ha ka 23 tarik Nailur, 2023.

Ka jingkyntiew ia ka jingkamai bad pynkhlain ia ki kot khubor

Ka jingpynkiew dor ia ki jingpynbna jong ka Sorkar ha ki kot khubor kan wanrah katto katne ki jingmyntoi kiba kongsan, na ka bynta ka sorkar bad ka lad pathai khubor. Ki dor kiba kham heh na ka bynta ki jingpynbna jong ka sorkar kin ai ka jingkyrshan khajna kaba donkam bha sha ki kot khubor, khamtam ha ka juk jong ka jingïakhun na kiwei pat ki rynsan pathai khubor bapher bapher bad ha kaba ïadei bad ka jingkiew dor ha kine ki khyndiat snem ba la dep. Kane ka lah ban iarap ban pynneh ia ki jingtreikam, ban pynneh ia ka jingthoh khubor kaba bha, bad ban kyrshan ia ki sienjam thoh khubor ha ka thain. Da kaba kyntiew ia ka jingshngain ha ka jingkamai, ki kot khubor ki lah ban bei tyngka ha ki kam kiba kham bha, da kaba shakri kham bha ia ka jingmyntoi jong ki paidbah.

Ka jingpynkylla ha ki dor jingpynbna ka lah ban pyniadei bad ki jinglong kiba kham iar ha ka jingpyndonkam ia ki lad pathai khubor. Da kaba ithuh ia ka jingkongsan jong ki kot khubor ha ka rukom ai khubor bapher bapher, ka Sorkar ka lah ban buh thong kham bha ia ki rukom ai jingpyntip jong ka, da kaba pynthikna ba kin poi sha ki nongshong shnong ha kylleng ki rynsan bapher bapher.

******