Ka Rashtriya Ekta Diwas ban kynmaw burom ïa ka lyngkhuh sngikha jong u Iron Man jong ka India, u Sardar Vallabhbhai Patel, la ju rakhe man la u snem ha ka 31 tarik Risaw. Ka Rashtriya Ekta Diwas ka pyni ïa ka jingïatylli, ka burom bad ka jingïatylli jong ka ri India. Ka jingrakhe ïa ka Rashtriya Ekta Diwas mynta u snem ka long kaba kham kyrpang ban rakhe ïa ka lyngkhuh sngikha kaba 150 snem jong u Sardar Patel. Ki jingrakhe mynta u snem ki long kiba kyrpang ha kiba bun ki liang ki ban pynlong ïa kane ka jingrakhe kaba sah jingkynmaw.

Ka jingrakhe man la u snem ia ka Rashtriya Ekta Diwas ka pynkynmaw ia ki para ri ia ka bynta ba kongsan ba u Sardar Patel u la leh ha kaba thaw ia ka ri India kaba laitluid bad pyniatylli ia 562 tylli ki hima, kaba buh ia ka nongrim jong ka ri India kaba mynta. Namar ka jinglong nongialam bad ka jingaiti kaba skhem jong u na ka bynta ka jingiatylli ka ri, la burom ia u Sardar Patel kum u “Nongtei jong ka jingiatylli ka ri bad u Iron Man jong ka India.”

Ka Ekta Nagar kaba don hapdeng ki lum Satpura bad Vindhyachal, ka pyni ia ka jingmut jong ka “Ka jingiatylli ha ka jingiar”, kaba pyniasnoh lang ia ka jingitynnad jong ka mariang bad ka jingriewspah jong ka kolshor.

Ki jingrakhe ba kyrpang mynta u snem jong ka Rashtriya Ekta Diwas kin kynthup, ïa ka jingïaid parade bad ka tamasa kolshor ha Ekta Nagar, Narmada distrik, Gujarat. Ha kane ka Parade, ki Central Armed Police Force (CAPF) bad ki pulit jong ka jylla kin pyni ia ki jingtbit, ka jinglong ryntih, bad ka jinglong shlur jong ki. Ha kane ka National Unity Day parade mynta u snem yn kynthup ïa ki kynhun shipai na ka Border Security Force (BSF), Central Reserve Police Force (CRPF), Central Industrial Security Force (CISF), Indo-Tibetan Border Police (ITBP) bad Sashstra Seema Bal (SSB) lem bad ki kynhun pulit na ki jylla jong ka Assam, Tripura, Odisha, Chhattisgarh, Madhya Pradesh, Maharashtra, Punjab, Jammu & Kashmir, Kerala, Andhra Pradesh bad ka NCC. Ha kane ka parade yn don ruh ki shipai ba shong kulai bad ki shipai shong ut, ki jingpyni da ki jait ksew jong ka ri bad ki rukom iakhun bapher bapher.

Ha kane ka parade yn pyni ruh ia ka jingiashim bynta jong ki heh pulit kynthei bad ki dkhot. Ia ka jingpdiang burom ia u Myntri Rangbah yn ialam da kawei ka ophisar kynthei. Ki pulit kynthei jong ka CISF bad CRPF kin pyni ïa ka Martial Arts bad ki Unarmed Combat drill, ban pyni ïa ka bor bad ka jingshlur jong ki khun kynthei jong ka India.

Ha kane ka parade mynta u snem yn don ruh ïa ka kynhun ïaid march past kaba kynthup ïa ki jait ksew bapher bapher na India jong ki BSF, ka kynhun shong kulai jong ki pulit Gujarat, ka Motorcycle Daredevil Show jong ki pulit Assam bad ka kynhun shipai ba shong da ki ut bad ka kynhun ki nongtem ba shong da ki ut jong ki shipai BSF, ki ban long ki jingpynbyrngia ba kongsan. Nalor kata, ki jait ksew jong ka ri — ki ksew Rampur bad ki ksew Mudhol — kin pyni ia ka jingtbit jong ki. Kine ki jait ksew ki la noh synniang shibun kum ki nongkyntiew ia ka bor ha ka por ki jingkhynra jong ki, da kaba pynpaw pyrthei ïa ka jingngeit jong ka Aatmanirbhar Bharat. Dang shen, ha ka jingïakob All India Police Dog, ka ksew Mudhol “Riya” ka la ïoh ïa ka kyrdan ba nyngkong bad kan mihkhmat ïa ka kynhun ba pyndonkam ia ki ksew ha kane ka parade mynta u snem.

Ki dkhot jong ka National Cadet Corps (NCC) bad ki kynhun tem jong ki skul kin pyniphuh iphieng shuh shuh ia kane ka jingrakhe da ki jingrwai. Ki samla NCC kin pynsngew ia ka khubor “Ka jingiatylli ka dei ka Bor” lyngba ka jinglong ryntih bad jingshitrhem jong ki. Ka air show jong ka kynhun Surya Kiran jong ka Indian Air Force kan pynphuh pynphieng shuh shuh ia ka parade.

Ban pynksan ia ka khubor jong ka jingiatylli ha ka jingiar, ki tableaux na ki jylla bad ki union territory bapher bapher ruh kin long shi bynta jong ka parade. Ha ka National Unity Day parade mynta u snem yn don 10 tylli ki tableaux na ka National Security Guard (NSG), NDRF, Gujarat, Jammu & Kashmir, Andaman & Nicobar Islands, Manipur, Maharashtra, Chhattisgarh, Uttarakhand bad Puducherry, kaba pyni ia ka phang pdeng “Ka Jingiatyli ha ka Jingiar.”

Ban pynlong ïa kane ka parade mynta u snem kaba kham itynnad, ki brass band na ka BSF, CRPF, CISF, SSB, Delhi Police, Maharashtra, Madhya Pradesh, Gujarat, bad Jammu & Kashmir kin iashim bynta. Mynta u snem, ha kane ka parade yn don san ngut ki nongjop khusnam Shaurya Chakra na ka CRPF bad 16 ngut ki nongjop takma jingshlur na ka BSF. Kine ki riewshlur ki la pyni ia ka jingshlur ha ki kam ialeh pyrshah ia ki Naxal ha Jharkhand bad ha ki kam ialeh pyrshah ia ki lehnoh ha Jammu & Kashmir. Ki shipai BSF ki la pyni ia ka jingshlur jong ki ha ka Operation Sindoor ha khappud sepngi.

Ha ryngkat bad ka parade, ka prokram kolshor ba la pynlong da ka Tnad Deiriti, Sorkar India, kan pyni ïa 900 ngut ki nongshad kiba pyni ïa ki jingshad classical jong ka India, kaba pynpaw ïa ka jingriewspah ka kolshor jong ngi bad ka jingïatylli jong ka ri.

Ki jingrakhe Rashtriya Ekta Diwas ki thmu ban pynpaw pyrthei ïa ka jingngeit jong ka jingïatylli ka ri, ka jingshongsuk shongsain bad ka jingieid ri, ban pynshlur ïa ki nongshong shnong ban pdiang ïa kine ki jinglong ba kordor. La kyntu ia baroh ki nongshong shnong ban iashim bynta shitrhem bad ban long shi bynta jong kane ka jingrakhe kaba khraw.

Naduh ka 1 tarik haduh ka 15 tarik u Naiwieng, 2025, ka Ekta Nagar kan pynlong ia ka Bharat Parv, ha kaba yn don ki prokram ba iadei bad ka kolshor bad ka food festival na ki jylla bapher bapher. Ka tamasa kan kut ha ka 15 tarik u Naiwieng da ki prokram ba kyrpang ban rakhe ia ka lyngkhuh sngi kha u Blei Birsa Munda, ban pynpaw ia ka kolshor ba itynnad bad ka jingngeit kaba khlain jong ki jaitbynriew riewlum jong ngi.

*****