U Myntri Sorkar Pdeng ba dei khmih ia ki tnad kam pohiing bad kam iatreilang Amit Shah u la wan ban ïashimbynta kum u kongsan ha ka jingïalang kaba 5 jong ka Akhil Bhartiya Rajbhasha Sammelan ha Gandhinagar, ka nongbah jong ka Gujarat, ha ka sngi rakhe ïa ka Hindi Diwas 2025. Ha kane ka sngi la donlang ruh u myntri rangbah ka jylla Gujarat u Bhupendra Patel, u myntri ka sorkar pdeng u Arjun Ram Meghwal, u myntri khynnah ka tnad kam pohiing jong ka sorkar pdeng u Bandi Sanjay Kumar bad katto katne ngut kiwei pat ki kynrem ki lyndan. U myntri kam poh iing jong ka sorkar pdeng bad u myntri ka tnad treilang u la pyllait paidbah ruh ia katto katne ki kot.

Haba ai jingkren ha kane ka jingialang, u Myntri kam pohiing jong ka sorkar pdeng uba dei ruh u Myntri ka tnad iatreilang u la ong ba ka ktien Hindi ka dei ka paralok jong ki ktien ka India bad ba kam don kano kano ka jingiatyngkhuh hapdeng ka ktien Hindi bad kiwei pat ki ktien India. U Shah u la ong ba ka nuksa kaba khraw tam ia kane ka dei ka jylla Gujarat. Ha Gujarat, ki riewstad kum u Swami Dayanand Saraswati, u Mahatma Gandhi, u Sardar Vallabhbhai Patel, bad u K.M. U Munshi ki la pdiang ia ka ktien Hindi bad ki la kyntiew ruh ia ka. U la ong ba ka jingiadon lang jong ka ktien Gujarati bad ka Hindi ka la pynlong ia ka Gujarat kum ka nuksa kaba bha tam ha ka jingroi jong baroh ar tylli ki ktien. U Shah u la ong ba ka ktien Hindi ka dei ka bynta jong ka rukom hikai jong ka Gujarat, bad namar kane, ka jingpoi jong ki khynnah jong ka Gujarat ka la nang kiew bha ha kylleng ka ri. U la bynrap ruh ba bun ki nongïalam kiba don ka jingïohi jngai ki la hikai ïa ki ktien India ban ïakren iwei ïa iwei pat bad u la kyntu ban kyntiew ïa ka ktien Hindi ha man la ki jylla, kum ka jingmih na kane u briew na Gujarat u lah ban leit shano shano ha ka ri bad ban pynïaid ïa ki kam khaii da kaba suk bad kumjuh ruh ban ïoh ïa ka jingpdiang ha kano kano ka jaka ba u don.

U Amit Shah u la ong ba ha kine ki san snem ba la dep, la pynlong ia ka Akhil Bhartiya Rajbhasha Sammelan shabar jong ka nongbah Delhi ha ki jaka bapher bapher jong ka ri, kaba la ai ka lad kaba biang bha ban pynkhlain ia ka jingiakren hapdeng ka ktien Hindi bad kiwei pat ki ktien jong ka India. U la ong ba ka jingshem jong ki saw tylli ki jingialang ba la dep ka long ba kum kine ki jingialang ki ai ia ki jingmut kiba thymmai, ka bor, bad ka jingai mynsiem. U Shah u la bynrap ruh ba ka ktien Hindi kam dei ban sah tang kum ka ktien iakren bad synshar, hynrei ka dei ruh ban long ka ktien jong ka science, ka teknoloji, ka kam ain, bad ka kam pulit. U la bynrap ba haba baroh ki kam ki long ha ki ktien jong ka India, ka jingïadei bad ki paidbah ka nang kham jylliew.

U Myntri kam pohiing ka sorkar pdeng u la ong ba ka rukom pynkylla ktien Sarathi ka pynsuk ia ka jingpynkylla ktien na ka ktien Hindi sha baroh ki ktien India ba la ithuh. U  Shah u la kyntu ia baroh ki Myntri Rangbah jong ki jylla ban phah shithi sha u ha la ki jong ki jong ki ktien, da kaba pynthikna ba ia ki jubab yn phah ha kajuh ka ktien. U la ban jur ba ka rukom pynkylla ktien Sarathi ka long kaba la pynkhreh ban pynkylla ktien ha kano kano ka ktien bad ruh ban pynkylla ia ki jubab na ka ktien Hindi sha ka ktien jong u nongpdiang. U la bynrap ruh ba, ha ki sngi ban wan, ka jingiakren lyngba ka Sarathi kan long ha ka ktien tynrai lajong.

U Amit Shah u la ong ba u Chhatrapati Shivaji Maharaj u la pynksan ïa ki lai tylli ki nongrim ba kongsan ha ka jingïakhun na ka bynta ka Swaraj: Ka Swaraj, Swadharma bad Swabhasha, kine baroh ki ïasnoh lang bad ka jingsarong na ka bynta ka ri. U la ong ba ka ri kaba ka ktien kren kam dei la ka jong kam lah ban mad shisha ia ka jinglaitluid ne ka jingsarong. Ban kyntiew ia ka jingsngew sarong ha ki ktien jong ngi, la thaw ia ka Shabd Sindhu dictionary, kaba la sdang da ki 51,000 kyntien bad mynta ka la palat ia ka 7 lak kyntien. U Shah u la ong ba ha u snem 2029, kan long ka dictionary kaba heh tam ha ka pyrthei. U la ong ba kane ka dictionary ka pynlong ia ka ktien Hindi kaba kham jem, kaba long kaba donkam ban long ka ktien kren kaba la pyndonkam bha. Ka jingpyndonkam ia ka Shabd Sindhu dictionary kan plie ia ka ktien Hindi kaba bun rukom, kaba lah ban pyniadei, bad kaba lah ban pdiang da baroh.

U Myntri kam pohiing jong ka sorkar pdeng u la ong ruh ba u Mahatma Gandhi u la nohsynniang shibun ha ka jingpynwandur ia ka Gujarati dictionary, da kaba ithuh ba ka imlang sahlang kam lah ban ieng ha ka pyrthei khlem ka ktien tynrai kaba khlain. U la bynrap ruh ba u Myntri Rangbahduh ka ri u Narendra Modi u la leh ïa ki kam kiba bun na ka bynta ka bha ka miat jong ki riew shimet kiba don jingduna ha ki dkhot met. U Shah u la ban jur ia ka jingdonkam ban pyndonkam ia ka saian bad ka teknoloji ban plié lad pura ia ka sap jong ki. U la kren shaphang ki iitkhmat ba pyndonkam da ka AI ba la pyni ha katei ka jingialang, ka ban iarap shibun ia ki briew kiba duna ka bor iohi. Da kine ki iitkhmat, wat kito kiba duna bha ka bor iohi ki lah ban pule kot, bad ki lah ban iohsngew ia kano kano kaba ki pule ha ka ktien tynrai jong ki lyngba ka jingpyndonkam da ka AI.

U Myntri kam pohiing jong ka sorkar pdeng uba dei ruh u Myntri ka tnad iatreilang u la ong ba u Mahatma Gandhi u ju ong ba ka ktien Hindi ka dei ka ktien kaba pynlong ia ka ri kaba iatylli. U la ong ba ka Sanskrit ka la ai ha ngi ia ka jingstad, ka Hindi ka la rah ia kata ka jingstad sha man la ka iing, bad ki ktien tynrai ki la pynphriang ia ka sha man la u briew.

U Amit Shah u la ong ba u Myntri Rangbahduh ka ri u Modi u la leh shibun lyngba ka teknoloji ban pynkhlain ia ki ktien trai ri jong ngi. U la ong ba da ka jingpynshlur jong u Myntri Rangbahduh ka ri u Modi, ka tnad kam pohiing ka la thaw ia ka Bhartiya Bhasha Anubhag hapoh ka tnad Official Language. Kane kan pynkhlain ia ka Hindi bad kan kyrshan bad kyntiew ruh ia baroh ki ktien jong ka India. U Shah u la ong ruh ba hapoh ka jingïalam jong u Myntri Rangbahduh ka ri u Modi, ka tnad Official Language ka la pynïaid shakhmat ïa kiba bun ki sienjam. Ha kine ki saw snem ba la dep, ka Official Language Komiti ka la pynmih lai tylli ki kot, bad la pynkhreh ruh ia ka kot kaba saw. U la ong ba la thaw ia ki Komiti ha jan 539 tylli ki nongbah ha kylleng ka ri.

Kumba 3 lak 28 hajar ngut ki nongtrei sorkar kiba kren ia ki jait ktien bapher bapher ki la shah hikai ha ka ktien Hindi. Nalor kata, 40,000 ngut ki nongtrei ki la shah hikai ha ka rukom type, 1,918 ha ka shorthand, bad 13,000 ha ka jingpynkylla ktien. U la ong ba u Myntri Rangbah Duh u la wanrah ia ka eksamin JEE, NEET, bad UGC ha ki 12 tylli ki ktien, kaba la kyntiew ia ka lad ia ki samla pule kiba pule ha ka ktien tynrai ba kin ioh ia ka jingjop. U Shah u la ong ba ki eksamin na ka bynta ka Central Armed Police Forces (CAPFs) mynta la pynlong ruh ha ki 12 tylli ki jait ktien. U la pynkynmaw ba ha ki snem 1970, ki briew ki ju ong ba ka Hindi ka iadei bad ki por ba la leit, hynrei mynta ngi lah ban ong da ka jingsngew sarong ba ka ktien sorkar bad ki ktien jong ka India jong ngi ki dei ki ktien jong ka lawei, bad kin sa long ruh ki ktien jong ka teknoloji, ka science, bad ka kam ain.

****