Ka Kynhun Myntri jong ka sorkar pdeng, kaba la khlieh da u Myntri Rangbahduh ka ri u Narendra Modi, ka la pynpaw ïa ka jingsngewsih kaba khraw halor ka jingduh noh ïa ki mynsiem briew ha ka jingjia pyntriem ki lehnoh kaba ïadei bad ka jingbthei ka kali hajan ka Red Fort ha Delhi ha ka janmiet jong ka 10 tarik u Naiwieng 2025. Ka Kynhun Myntri ka la pynlong ka jingsngap jar kaba ar minit kum ka jingburom ia kiba la khlad noh ha kane ka jingjia

Ka Kynhun Myntri ka la pdiang ruh ia kane ka Rai harum:

Ka ri ka la sakhi ïa ka jingjia ba shyrkhei, kaba la leh da ki bor ba pyrshah ia ka ri, lyngba ka jingbthei ka kali hajan ka Red Fort ha ka janmiet jong ka 10 tarik u Naiwieng 2025. Kane ka jingbthei ka la pynlong ia ka jingkhlad jong bun ngut ki briew, bad ka la pynmynsaw ïa ki katto katne ngut kiwei pat.

Ka Kynhun Myntri ka la ai burom ia ki lanot kiba la ngat ha kane ka kam thombor kaba khlem nongrim bad ka la pynpaw ia ka jingsngewlem sha ki longiing kiba la mad ia kane ka jingjia ba sngewsih.

Ka Kynhun Myntri ka kitbok kitrwiang ia baroh kiba la mynsaw ba kin ioh kloi ia ka jingkoit jingkhiah, bad ka ai jingiaroh ia ka jingtrei shitom jong ki nongsumar bad ki nongai jingiarap kyrkieh, kiba la ai ka jingsumar bad jingkyrshan ia ki lanot

Ka Kynhun Myntri ka pynrem jur ia kane ka kam kaba shyrkhei bad kaba tiengpyut kaba la ialam sha ka jingduhnoh ia ki mynsiem ba lui lui.

Ka Kynhun Myntri ka la pynskhem biang ia ka jingkut jingmut ba skhem jong ka India na ka bynta ka polisi ka bym ailad satia ia ki kam lehnoh kiba ha kano kano ka rukom.

Ka Kynhun Myntri ka la ai jingiaroh ia ki jingkren jingsngewlem bad jingkyrshan na kiba bun ki Sorkar ha kylleng ka pyrthei.

Ka Kynhun Myntri ka kynmaw da ka jingsngewnguh ia ka jubab kaba ha ka por bad ka jingiatreilang jong ki bor synshar, ki kynhun pahara, bad ki nongshong shnong kiba la shim ia ki sienjam da ka jingshlur bad jingsngewlem hapdeng ki jingeh. Ka jingaiti bad jingsngew jong ki ia ka kamram ka long kaba dei ban iaroh shibun.

Ka Kynhun Myntri ka la bthah ba dei ban pynlong ia ka jingtohkit ba kyrkieh halor kane ka jingjia bad da ka jingtbit khnang ba yn lap ia ki nongleh kam sniew, ki nongiatreilang bad ki, bad ki nongkyrshan jong ki bad ban pynngat ia ki ha ka ain khlem da pynslem. Ia ka jinglong jingman la dang iai peitngor ha ki kyrdan ba ha khlieh duh jong ka sorkar.

Ka Kynhun Myntri ka la pynskhem biang ia ka jingkut jingmut ba skhem jong ka Sorkar ban iada ia ka jingim bad ka bha ka miat jong baroh ki briew jong ka ri, kaba iadei bad ka jingkular ba neh jong ka na ka bynta ka jingshngain jong ka ri bad ka jingshngain jong uwei pa uwei u nongshong shnong.

****