U Myntri Sorkar Pdeng ba dei khmih ia ka Tnad ka rep ka riang, ka bha ka miat jong ki nongrep, bad ka roi ka par ki jaka nongkyndong, u Shivraj Singh Chouhan, mynta ka sngi sa shisien u la pynpaw biang ïa ka jingkyrpad jong u Myntri Rangbahduh ka ri da kaba kyntu ïa ki nongshong shnong ban thied ïa ki mar ba la shna hapoh ka ri. U Myntri Rangbahduh ka ri, u Narendra Modi, ha ka 2 tarik Nailar, 2025 ha ka por ba la ai ia ka bhah kaba 20 jong ka PM-Kisan Samman Nidhi ha Varanasi, u la kyntu ia ki briew ka ri ba kin thied ia ki mar ba shna hi hapoh ri. Haba pynskhem biang ïa ka jingkut jingmut jong ka sorkar ban pynkhlain ïa ka ïoh ka kot, u Myntri Sorkar pdeng ba dei khmih ia ka Tnad ka rep ka riang u la pynkynmaw biang ïa ka jingkyrpad jong u Myntri Rangbahduh mynta ka sngi bad lyngba ka jingpynbna, u la ong:

“Ko para kynthei bad shynrang baieit—ki khun pyrsa kynthei bad shynrang, baroh ki im na ka bynta lade—ki khniang, ki sim, bad ki mrad. Hynrei kaei ka jingmyntoi ban im tang na ka bynta lade? Ngi dei ban im na ka bynta ka ri ka jong ngi. Ka jingim na ka bynta ka ri kadei kaei kaba u Myntri Rangbahduh ba donburom u la hikai ia ngi hynnin ka sngi. U la kyrpad ia ngi ban thied tang ia kito ki mar na ka bynta ki iing jong ngi kiba la shna ha la ka jong ka ri jong ngi.

Para kynthei bad shynrang baieit, la kaei kaei kaba la shna ha shnong jong phi, ha nongbah ba marjan, ha distrik jong phi, ha ka jylla jong phi, lane ha kano kano ka jaka ha ka ri jong ngi— thied tang ia kita ki tiar. Ka ioh ka kot jong ka ri ka kiew stet bha. Mynta, ngi don ha ka kyrdan kaba saw ha ka pyrthei, bad shen, ngin sa poi sha ka kyrdan kaba lai. Bad kane ka ri kaba don 1.44 billion ngut ki briew ka dei ka iew kaba heh bha. Lada ngi kut jingmut ban thied bad pyndonkam tang ia kiei kiei kiba la shna ha ka ri jong ngi, te ki nongrep jong ngi, ki nongpynmih mar barit baria jong ngi, ki self help group, bad ki nongtrei kti ha ka ri - baroh kin sakhi ba ka ioh ka kot jong ki kan kiew. Bad ynda ka jingkamai jong ki ka la kiew, ka ioh ka kot jong ngi kan nang khlain.

Balei ka pisa jong ngi kan leit shabar ri? Ai ba kan pynbiang ka kamai kajih ia ki khun ki kti jong ngi hi. Ngan im na ka bynta ka ri jong nga, bad phi ruh phi dei ban im na ka bynta ka ri...kaba mut, thied tang ia ki mar kiba la shna ha India. Khublei!"

**