প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভিডিঅ’ কনফাৰেন্সিংযোগে ভাৰতৰ নাগাপট্টিনাম আৰু শ্ৰীলংকাৰ কংকেসন্থুৰাইৰ মাজত ফেৰী সেৱাৰ শুভাৰম্ভ ককৰে। এই উপলক্ষে আগবঢ়োৱা ভাষণৰ সময়ত প্ৰধানমন্ত্ৰী শ্ৰী নৰেন্দ্ৰ মোদীয়ে কয় যে ভাৰত আৰু শ্ৰীলংকা বৰ্তমান কূটনৈতিক আৰু অৰ্থনৈতিক সম্পৰ্কৰ এক বিশেষ সন্ধিক্ষণত আছে। তেওঁৰ মতে দুয়োখন দেশৰ মাজত এই ফেৰী সেৱা আৰম্ভ হ’লে পাৰস্পৰিক সম্পৰ্ক আৰু অধিক শক্তিশালী হ’ব।

প্ৰধানমন্ত্ৰীয়ে কয় ভাৰত আৰু শ্ৰীলংকাৰ প্ৰাচীন বাণিজ্য, সভ্যতা আৰু সাংস্কৃতিক সম্পৰ্কৰ ইতিহাস ৰচনা কৰিলে। তেওঁ কয় যে শ্ৰীলংকাকে ধৰি বিভিন্ন দেশৰ সৈতে সামুদ্ৰিক বাণিজ্যৰ বাবে নাগাপট্টিনাম আৰু ইয়াৰ কাষৰীয়া চহৰসমূহ সুপৰিচিত। আনকি ঐতিহাসিক পুম্পুহাৰ বন্দৰৰ কথাও প্ৰাচীন তামিল সাহিত্যত উল্লেখ আছে। এই প্ৰেক্ষাপটত প্ৰধানমন্ত্ৰীয়ে পতীনাপলাই, মণিমেকলাই আদি প্ৰাচীন সাহিত্যকো আলোকপাত কৰে। তেওঁ কয় যে এই সাহিত্যত ভাৰত আৰু শ্ৰীলংকাৰ মাজত সামুদ্ৰিক যাতায়তৰ বিশদ বিৱৰণো সন্নিবিষ্ট কৰা হৈছে। এই প্ৰসংগত বিশিষ্ট কবি সুব্ৰহ্মণ্য ভাৰতীৰ ‘সিন্ধু নাধীন মিছাই’ গীতৰ কথাও তেওঁ উল্লেখ কৰে। তেওঁ কয় যে গীতটোত ভাৰত আৰু শ্ৰীলংকাৰ মাজত দলং নিৰ্মাণৰ বৰ্ণনা কৰা হৈছে। সেই অৰ্থত ভাৰত আৰু শ্ৰীলংকাৰ মাজত ফেৰী সেৱাৰ প্ৰৱৰ্তনে সেই ঐতিহাসিক আৰু সাংস্কৃতিক সম্পৰ্কক পুনৰবাৰ আমাৰ সন্মুখত সজীৱ কৰি তুলিছে।

শেহতীয়াকৈ শ্ৰীলংকাৰ ৰাষ্ট্ৰপতি ৱিক্ৰেমসিংহৰ ভাৰত ভ্ৰমণৰ কথা উল্লেখ কৰি প্ৰধানমন্ত্ৰীয়ে কয় যে ঘনিষ্ঠ সম্পৰ্কৰ পৰিৱেশ গঢ়ি তোলাৰ লক্ষ্যৰে সেই সময়ত দুয়োখন দেশৰ যৌথ অংশীদাৰিত্বৰ খচৰাও প্ৰস্তুত কৰা হৈছিল। দুয়োখন দেশৰ মাজত সংযোগৰ অৰ্থ কেৱল দুখন চহৰক ইজনে সিজনৰ ওচৰলৈ অনাই নহয়, বৰঞ্চ দুয়োখন দেশৰ হৃদয় আৰু দুয়োখন দেশৰ জনসাধাৰণক ইজনে সিজনৰ ওচৰলৈ আনিবলৈ সক্ষম হৈছে। প্ৰধানমন্ত্ৰীয়ে অনুভৱ কৰিছিল যে এই সংযোগ সম্প্ৰসাৰণৰ জৰিয়তে দুয়োখন দেশৰ মাজত বাণিজ্য, পৰ্যটন আৰু সুনাগৰিক সম্পৰ্ক গঢ়ি উঠিবলৈ গৈ আছে। দুয়োখন দেশৰ যুৱক-যুৱতীসকলৰ বাবে নতুন সুযোগ সৃষ্টি হোৱাৰ বাবে বিশেষভাৱে উপকৃত হ’ব বুলিও তেওঁ কয়।

২০১৫ চনত শ্ৰীলংকা ভ্ৰমণৰ কথা উল্লেখ কৰি শ্ৰী মোদীয়ে কয় যে সেই সময়ছোৱাত দিল্লী আৰু কলম্বোৰ মাজত প্ৰত্যক্ষ বিমান সেৱা আৰম্ভ হৈছিল। কেৱল ইমানেই নহয়, শ্ৰীলংকাৰ পৰা প্ৰথমখন আন্তঃৰাষ্ট্ৰীয় বিমানেও কুশনগৰৰ দৰে তীৰ্থস্থান স্পৰ্শ কৰিছিল। এই উপলক্ষে দুয়োখন দেশৰ মাজত উদযাপনৰ এক বিশেষ মুহূৰ্ত আছিল। প্ৰধানমন্ত্ৰীয়ে কয় যে চেন্নাই আৰু জাফনাৰ মাজত পোনপটীয়া বিমান সেৱা ২০১৯ চনৰ পৰা আৰম্ভ হৈছিল।সেয়েহে নগাপট্টিনাম আৰু কংকেসন্থুৰাইৰ মাজত ফেৰী সেৱা আৰম্ভ হোৱাৰ লগে লগে দুয়োখন দেশৰ সুসম্পৰ্কৰ নতুন পৰ্যায়ত প্ৰৱেশ কৰিবলৈ ওলাইছে।

প্ৰধানমন্ত্ৰীয়ে ভাষণত দৃঢ়তাৰে কয় যে আমাৰ সংযোগ আৰু যোগাযোগৰ সম্প্ৰসাৰণ কেৱল পৰিবহণতে সীমাবদ্ধ নহয়। ফিনটেক আৰু শক্তিৰ ক্ষেত্ৰতো ভাৰত আৰু শ্ৰীলংকাৰ সম্পৰ্ক সম্প্ৰসাৰিত হৈছে। ইউ পি আই ব্যৱস্থাৰ সুবিধাৰ বাবে ভাৰতত এতিয়া ডিজিটেল লেনদেন এক গণ আন্দোলনত পৰিণত হৈছে। সেয়েহে দুয়োখন দেশৰ চৰকাৰে ইউ পি আই আৰু লংকা পে’ৰ সংযোগ স্থাপনৰ বাবে কঠোৰ পৰিশ্ৰম কৰি আছে। প্ৰধানমন্ত্ৰীয়ে লগতে উল্লেখ কৰে যে শক্তি খণ্ডত নিৰাপত্তা বৃদ্ধিৰ বাবে দুয়োখন দেশে বিশেষ প্ৰচেষ্টা হাতত লৈছে। তেওঁ কয় যে ভাৰত আৰু শ্ৰীলংকা উভয়ৰে উন্নয়ন যাত্ৰাত শক্তি খণ্ডৰ নিৰাপত্তা বিশেষভাৱে গুৰুত্বপূৰ্ণ।

প্ৰধানমন্ত্ৰীয়ে বিশ্বাস কৰে যে ভাৰত আৰু শ্ৰীলংকাৰ দ্বিপাক্ষিক সম্পৰ্কক আগুৱাই নিয়াত প্ৰগতি আৰু উন্নয়নেও বিশেষ ভূমিকা পালন কৰি আছে। তেওঁৰ মতে, উন্নয়নৰ সুফল সকলোৰে মাজলৈ লৈ যোৱাটোৱেই দুয়োখন দেশৰ লক্ষ্য আৰু দৃষ্টিভংগী।

শ্ৰী মোদীয়ে কয় যে ভাৰতৰ সহায়ত শ্ৰীলংকাত ৰূপায়ণ আৰু সম্পূৰ্ণ হৈ থকা প্ৰকল্পসমূহে দুয়োখন দেশৰ জনসাধাৰণৰ হৃদয় স্পৰ্শ কৰিছে। ইতিমধ্যে শ্ৰীলংকাৰ উত্তৰ প্ৰদেশত গৃহ নিৰ্মাণ, পানী যোগান, স্বাস্থ্য সেৱা আৰু জীৱিকাৰ ক্ষেত্ৰত গ্ৰহণ কৰা প্ৰকল্পসমূহ সম্পূৰ্ণ হৈছে। প্ৰধানমন্ত্ৰীয়ে কয় যে ভাৰতে বিশেষভাৱে সুখী যে কাংকেসন্থুৰাই বন্দৰৰ উন্নয়নত সহায় আৰু সহায় কৰাৰ সুযোগ পাইছো। তেওঁ কয় যে শ্ৰীলংকাত উত্তৰৰ পৰা দক্ষিণলৈ ৰেলপথৰ সংস্কাৰ আৰু পুনৰুদ্ধাৰৰ পৰা আৰম্ভ কৰি জাফনা সাংস্কৃতিক কেন্দ্ৰ নিৰ্মাণলৈকে সকলো ক্ষেত্ৰতে ভাৰতে হাত আগবঢ়াইছে। কেৱল এয়াই নহয়, সমগ্ৰ শ্ৰীলংকাত জৰুৰীকালীন অৱস্থাৰ বাবেও ভাৰতে এম্বুলেন্স সেৱা আগবঢ়াবলৈ সক্ষম হৈছে। ডিক ৱাত বহু বিশেষজ্ঞ চিকিৎসালয়ও স্থাপন কৰা হৈছে। এইদৰে প্ৰধানমন্ত্ৰীয়ে কয় যে ভাৰতে সকলোকে লগত লৈ আৰু সকলোৰে বিশ্বাস আৰু প্ৰচেষ্টাক সন্নিৱিষ্ট কৰি সামগ্ৰিক কল্যাণৰ পথত আগবাঢ়িছে।

ভাৰতত সদ্য সমাপ্ত জি-২০ সন্মিলনৰ প্ৰসংগও ভাষণত উনুকিয়ায় প্ৰধানমন্ত্ৰীৰ। তেওঁ কয় যে ভাৰতৰ আদৰ্শ হৈছে ‘বসুধৈৱ কুটুম্বকম’ যিটো আজি সমগ্ৰ বিশ্বতে প্ৰশংসা কৰা হৈছে। প্ৰধানমন্ত্ৰীয়ে বিশ্বাস কৰে যে এই আদৰ্শই আমাক চুবুৰীয়া দেশৰ সৈতে প্ৰগতি আৰু সমৃদ্ধিৰ সম্পৰ্ক গঢ়ি তোলাৰ পথ দেখুৱাইছে। জি-২০ সন্মিলনৰ সময়ত ভাৰত-মধ্যপ্ৰাচ্য-ইউৰোপ অৰ্থনৈতিক কৰিডৰ মুকলিৰ কথা উল্লেখ কৰি প্ৰধানমন্ত্ৰীয়ে কয় যে ই এক গুৰুত্বপূৰ্ণ সংযোগ আৰু যোগাযোগ কৰিডৰ যিয়ে সমগ্ৰ অঞ্চলটোৰ অৰ্থনৈতিক প্ৰগতিৰ বাবে এক বৃহৎ উত্থান আনিব পাৰে। শ্ৰীলংকাৰ জনসাধাৰণো ইয়াৰ সুবিধাৰ পৰা বঞ্চিত নহ’ব। কাৰণ, আমি দুয়োখন দেশৰ মাজত সংযোগ আৰু যোগাযোগ বিভিন্ন ধৰণে সম্প্ৰসাৰণৰ চেষ্টা কৰিছো।

আজি এই সফল ফেৰী সেৱা আৰম্ভ কৰাৰ বাবে প্ৰধানমন্ত্ৰীয়ে শ্ৰীলংকাৰ ৰাষ্ট্ৰপতি, চৰকাৰ আৰু জনসাধাৰণৰ প্ৰতি আন্তৰিক ধন্যবাদ জ্ঞাপন কৰে। এই পৰিপ্ৰেক্ষিতত প্ৰধানমন্ত্ৰীয়ে উল্লেখ কৰে যে দুয়োখন দেশে ৰামেশ্বৰম আৰু তালাইমন্নাৰৰ মাজত ফেৰী সেৱা পুনৰুদ্ধাৰৰ বাবে ঘনিষ্ঠভাৱে কাম কৰি আছে। তেওঁ কয় যে ভাৰতে শ্ৰীলংকাৰ সৈতে ঘনিষ্ঠ সম্পৰ্ক বজাই ৰাখিবলৈ প্ৰতিশ্ৰুতিবদ্ধ, কিয়নো আমাৰ লক্ষ্য দুয়োখন দেশৰ জনসাধাৰণৰ পাৰস্পৰিক লাভৰ বাবে দ্বিপাক্ষিক সম্পৰ্ক আৰু অধিক শক্তিশালী কৰা।

Ferry services between India and Sri Lanka will enhance connectivity, promote trade and reinforce the longstanding bonds between our nations. https://t.co/VH6O0Bc4sa

— Narendra Modi (@narendramodi) October 14, 2023

***

DS/TS