প্রধানমন্ত্রীগী লোইশঙ
প্রধান মন্ত্রীনা ছত্তিসগরগী নবা রাইপুরদা শান্তি শিখর – মেদিতেসন সেন্তর শঙ্গাবদা ব্রহ্ম কুমারীশিংদা ৱা ঙাংখ্রে
রাজ্যশিং চাউখৎপনা লৈবাক্না খুমাং চাউশিনবদা শাহৌ পী হায়বা ৱাখল্লোন্না লমজিংদুনা ঐখোয়না চাউখৎপা ভারত অমা শেমগৎনবা মিসনদা কন্না থবক তৌরি: পি.এম.
মালেমগী শান্তি হায়বা ৱাখল্লোন অসি ভারতকী মরু ওইবা ৱাখল্লোনগী মরু ওইবা মচাক অমনি: পি.এম.
থৱায় পানবা খুদিংমক্তা ঈশ্বরবু উবা ঙম্বা ঐখোয়নি, ইশাদা য়াওবা মপাল নাইদবা অদুবু খঙবা ঙম্বা ঐখোয়নি; মফম অসিদা ধর্মগী ওইবা থৌরম খুদিংমক্তা শেংলবা লাইরোন অমনা লোইশিল্লি – মালেমগীদমক য়াইফনবা লাইরোন, থৱায় পানবা পুম্নমক্কী মরক্তা অফবা পুরক্নবা লাইরোন: পি.এম.
মালেমগী মফম অমা হেক্তদা অৱাবা নত্ত্রগা খুদোংথিবা নংবা মতমদা ভারতনা মতেং পাংনবা থাজবা য়াবা মপাং অমা ওইদুনা ফার্স্ত রেস্পোন্দর ওইনা মথৌ তৌদুনা মাং থাখি: পি.এম.
Posted On:
01 NOV 2025 12:40PM by PIB Imphal
প্রধান মন্ত্রী শ্রী নরেন্দ্র মোদীনা ঙসি ছত্তিসগরগী নবা রাইপুরদা স্পেরিচুএল লর্নিং, পিস অমসুং মেদিতেসনগী অনৌবা সেন্তর অমা ওইরিবা 'শান্তি শিখর' শঙ্গাবগী থৌরমদা ব্রহ্মকুমারীশিংদা ৱা ঙাংখ্রে। থৌরম অদুদা ৱা ঙাংলদুনা প্রধান মন্ত্রীনা হায়খি মদুদি ঙসি অসি য়াম্না অখন্নবা নুমিৎ অমনি, মরমদি ছত্তিসগর শেমখিবা চহি 25 মপুং ফারক্লি। মহাক্না হায়খি মদুদি ছত্তিসগরগা লোয়ননা ঝারখন্দ অমসুং উত্তরাখন্দসু শেমখিবগী চহি 25 মপুং ফারে। মহাক্না হায়খি মদুদি লৈবাক অসিগী অতোপ্পা রাজ্য কয়ানা ঙসি মখোয়গী স্তেতহুদ দে পাংথোক্লি। শ্রী মোদীনা “রাজ্য খুদিংমক্কী মীয়ামদা মখোয়গী স্তেতহুদ দেগী য়াইফ-পাউজেল পীখি। রাজ্যশিংগী চাউখৎপা অসিনা লৈবাক্না খুমাং চাউশিনবদা শাহৌ পী হায়বা ৱাখল্লোন্না লমজিংদুনা, ঐখোয়না চাউখৎলবা ভারত অমা শেমগৎনবা মিসন অসিদা এক্তিব ওইনা শরুক য়ারি।"
ভারতনা চাউখৎলবা লৈবাক অমা ওইরক্নবা হোৎনবদা ব্রহ্মকুমারীগুম্বা ইন্সতিত্যুসনশিংনা লৌরিবা মরুওইবা থৌদাং অদু পল্লদুনা প্রধান মন্ত্রীনা হায়খি মদুদি দিকেদ কয়াগী মমাংদগী ব্রহ্মকুমারীগী ইমুং-মনুং অসিগা মরী লৈনদুনা লাকপা অসি মহাক্কী খুদোংচাবা অমনি। মহাক্না হায়খি মদুদি মহাক্না মসিগী স্পিরিচুএল মুভমেন্ত অসি খোঙনাং পাম্বী অমগুম্না চাউখৎলক্লিবা উখি। শ্রী মোদীনা 2011দা অহমেদাবাদতা পাংথোকখিবা 'ফ্যুচর ওফ পাৱর' প্রোগ্রাম, 2012দা ইন্সতিত্যুসন অসিগী 75শুবা মপোক কুমওন অমসুং 2013দা প্রয়াগরাজ প্রোগ্রামগী থৌরমশিং নীংশিংখি। মহাক্না মখা তাখি মদুদি দিল্লীদা লাক্লবা মতুংদসু, অজাদি কা অমৃত মহোৎসব, স্বচ্ছ ভারত অভিয়ানগা মরী লৈনবা কেম্পেন ওইগেরা নত্ত্রগা জল জন অভিয়ানগা মরী লৈনবগী খুদোংচাবা ওইগেরা, মহাক্না মখোয়গা ৱারী শানরকপা খুদিংদা মখোয়গী হোৎনরিবশিং অদুগী মরুওইবা অমসুং কৎথোকপা অদু লেপ্পা লৈতনা উখি।
প্রধান মন্ত্রীনা দাদী জানকীগী মীনুংশি অমসুং রাজয়োগীনি দাদী হ্রীদয় মোহিনীগী লমজিং-লমতাকপী অসি মহাক্কী পুন্সিগী কাউররোইদবা মীকুপশিংনি হায়না পল্লদুনা ব্রহ্মা কুমারীস ইন্সতিত্যুসনগা পর্নেল ওইনা মরী লৈনরকপগী মতাংদা পনখি। মহাক্না হায়খি মদুদি মহাক্না মখোয়গী ৱাখল্লোনশিং অসি ‘শান্তি শিখর – শান্তি লৈয়া মালেমগী একাদেমী’গী মওংদা মঙফাওনবা উবা ফংলি। লাক্কদৌরিবা মতমশিংদা, ইন্সতিত্যুসন অসিনা মালেমগী শান্তিগী মায়কৈদা মরুওইবা থবকশিং পায়খৎনবা মরুওইবা সেন্তর অমা ওইনা থোরক্কনি হায়না শ্রী মোদীনা ফোংদোকখি। মহাক্না থৌরম অসিদা শরুক য়াখিবা পুম্নমক অমসুং ভারত শিনবা থুংনা অমসুং মপান লৈবাক্তা লৈরিবা ব্রহ্মা কুমারীগী ইমুং মনুংগী মীহুৎশিংবু থাগৎনিংঙাই ওইবা থৌরাং অসিগীদমক্তা য়াইফ-পাউজেল পীখি।
চৎনবীগী ওইবা হায়না ৱারোল অমা পল্লদুনা শ্রী মোদীনা হায়খি মদুদি লমচৎ শাজৎ অসি ধর্ম, তপস্যা অমসুং লৌশিংগী খ্বাইদগী ৱাংবা মওংনি অমসুং অচুম্বা লমচৎ শাজৎনা করিগুম্বা অমত্তা ফংবা ঙমদবা লৈতে। মহাক্না অকনবা ৱাফম থমখি মদুদি অশেংবা অহোংবা অসি ৱাহৈশিংবু থবক ওইনা ওন্থোকপা মতমদা লাকই, অমসুং মসি ব্রহ্মা কুমারীস ইন্সতিত্যুসনগী স্পিরিচুএল শক্তিগী হৌরকফম্নি। মহাক্না হায়খি মদুদি মফমসিদা লৈরিবা ইচে-ইচল খুদিংমক্না কন্না তপস্যা তৌখি অমসুং স্পিরিচুএল দিসিপ্লিনগী মখাদা চৎলি। প্রধান মন্ত্রীনা হায়খি মদুদি ইন্সতিত্যুসন অসিগী মশক অসি মালেম অমসুং কোস্মোসতা শান্তি লৈহন্নবগীদমক লাই খুরুমজবা অসিগা মরী লৈনৈ। মহাক্না হায়খি মদুদি ব্রহ্মকুমারীগী অহানবা লাইরোন অসি “ওম শান্তি”নি – “ওম” অসিনা ব্রাহ্মন অমসুং তাইবংপালবু তাকই, অমসুং শান্তিনা শান্তিগী অপাম্বা অদু তাকই। মহাক্না মখা তাখি মদুদি মসিনা মরম ওইদুনা ব্রহ্মকুমারীশিংগী ৱাখল্লোনশিংনা মীওই খুদিংগী মনুংগী ৱাখলদা অচেৎপা ইথিল পীরি।
প্রধান মন্ত্রীনা হায়খি মদুদি মালেমগী শান্তিগী ৱাখল্লোন অসি ভারতকী তঙাই ফদবা ৱাখল্লোন অমসুং স্পিরিচুএল কনসিয়সনেসকী মরু ওইবা শরুক অমনি। মহাক্না হায়খি মদুদি ভারত অসি থৱায় পানবা জিবা খুদিংমক্তা ঈশ্বরবু উবা অমসুং মশাদা য়াওরিবা লোইনাইদ্রবা অদু উবা লৈবাক অমনি। মহাক্না হায়খি মদুদি ভারতকী ধর্ম্মগী থৌরম খুদিংমক মালেমগী য়াইফনবা অমসুং থৱায় পানবা জিবা পুম্নমক্কী য়াইফনবগী হায়দুনা থৌনি। শ্রী মোদীনা মখা তানা হায়খি মদুদি অসিগুম্বা অফবা ৱাখল্লোন অমসুং থাজবা অমসুং মালেমগী য়াইফ-থৌরাংগী ৱাখল্লোন অসি অমত্তা ওইনা পুনশিনবা অসি ভারতকী সিভিলাইজেস্নেল কেরেক্তরগী মগুননি। মহাক্না হায়খি মদুদি ভারতকী স্পিরিচুএলিতীনা শান্তিগী পাউতাক পীবতা নত্তনা খোঙথাং খুদিংদা শান্তিগী লম্বীসু তাকই। মহাক্না ইশাদা অথিংবা থমজবনা ইশাগী লৌশিং পুথোকই, ইশাগী লৌশিং পুথোকপনা ইশাবু মশক খঙজবা ঙমহল্লি অমসুং ইশাবু মশক খঙজবনা নুংগী শান্তি ফংহল্লি হায়না শন্দোক্না তাকখি। মহাক্না থাজবা থমখি মদুদি শান্তি শিখর একাদেমীদা লৈরিবা সীকরশিংনা মসিগী লম্বী অসিদা চৎতুনা মালেমগী শান্তিগী খুৎলাইশিং ওইগনি।
মালেমগী শান্তিগী মিসন অসিদা, ৱাখল্লোনশিং অসি চৎনবা য়াবা পোলিসীশিং অমসুং খোঙথাংশিং অদুগুম্না মরু ওই হায়না পল্লদুনা শ্রী মোদীনা হায়খি মদুদি ভারতনা মসিগী মাইকৈ অসিদা মসিগী থৌদাং অসি মপুং ফাহন্নবা থম্মোয় শেংনা হোৎনরি। প্রধান মন্ত্রীনা হায়খি মদুদি “মালেমগী মফম অমা হেক্তদা অৱাবা নত্ত্রগা খুদোংথিবা অমা থোকপা মতমদা, ভারতনা থাজবা য়াবা মপাং অমা ওইনা মতেং পীনবা, অহানবা রেস্পোন্দর অমা ওইনা থবক পাংথোক্নবা মাংজিল থানা চংশিল্লি।”
প্রধান মন্ত্রীনা মখা তারদুনা হায়খি মদুদি ঙসিগী অকোয়বগী ফিভমগী শিংনবশিংগী মরক্তা, ভারতনা মালেম শীনবা থুংনা মহৌশাগী ঙাকশেলগী লমদা মকোক থোংবা ভোইস অমা ওইনা থোরক্লি। মহৌশানা ঐখোয়দা পীরিবা অসি ঙাক-শেন্দুনা থম্বা অমসুং মপাঙ্গল কনখৎহনবগী মরুওইবা অদু পল্লদুনা শ্রী মোদীনা হায়খি মদুদি মসি ঐখোয়না মহৌশানা পীরক্লিবা অসিগা লোয়ননা পুন্না হিংমিন্ননবা হোৎনবা মতমদা খক্তনা ওইথোকপা ঙমগনি, মহাক্না হায় মসি ঐখোয়গী সাস্ত্রাশিং অমসুং শেম্বীবা মপুনা ঐখোয়দা তম্বীবা কাংলোনশিংনি। ঐখোয়না তুরেলশিংবু ইমা ওইনা লৌই, ঈশিংবু লাইনি হায়না লৌই, অমসুং ঈশ্বরবু উশিংদা উবা ফংই হায়না মহাক্না ফোংদোকখি। মহাক্না হায়খি মদুদি ৱাখল্লোন অসিনা মহৌশা অমসুং মসিগী রিসোর্সশিং অসি শীজিন্নবগী ৱাখল্লোন- মসিবু মাংহনবগী ৱাখল্লোন য়াওদনা, অদুবু মসিগা লোয়ননা অমুক হন্দোকপগী ৱাখল্লোন্না লমজিংখি, মহাক্না হায়খি মদুদি মসিগী পুন্সি মহিং অসিনা মালেম অসিদা থাজবা য়াবা তুংলমচৎ অমগী লম্বী অমা পীবা ঙমগনি।
ভারতনা তুংলমচৎকী মায়কৈদা লৌরিবা থৌদাংশিং অদু হান্ননা খঙলে অমসুং মপুং ফাহল্লিবনি হায়না পল্লদুনা, প্রধান মন্ত্রীনা "ৱান সন, ৱান ৱার্ল্দ, ৱান গ্রিদ"গুম্বা ইনিসিএতিবশিং অমসুং "ৱান আর্থ, ৱান ফেমিলী, ৱান ফ্যুচর"গুম্বা ভিজন অসিনচিংবা খোংথাংশিং অদু পনখি, মালেমনা ৱাখল্লোনশিং অসিগী পরিং মখাদা থবক তৌবা হেনগৎলক্লি হায়না ফোংদোকখি। প্রধান মন্ত্রীনা হায়খি মদুদি ভারতনা জিওপোলিতিকেলগী ঙমখৈ লান্থোক্তুনা মীওইবা খুদিংমক্কীদমক মিসন লাইফ হৌদোক্লে।
খুন্নাই অসিবু মপাঙ্গল কনখৎহনবদা ব্রহ্মকুমারীগুম্বা ইন্সতিত্যুসনশিংনা লৌরিবা মরুওইবা থৌদাং অদু পল্লদুনা প্রধান মন্ত্রীনা থাজবা ফোংদোকখি অমসুং মহাক্না হায়খি মদুদি শান্তি শিখরগুম্বা ইন্সতিত্যুসনশিংনা ভারতকী হোৎনরিবশিংদা অনৌবা ইনর্জী পীগনি অমসুং ইন্সতিত্যুসন অসিদগী থোরকপা ইনর্জী অসিনা লৈবাক অসিদা অমসুং মালেম পুম্বদা মীওই লাখ কয়া অমা মালেমগী শান্তিগী ৱাখল্লোনগা শম্নহল্লগনি। মহাক্কী ৱারোল লোইশিল্লদুনা, প্রধান মন্ত্রীনা শান্তি লৈবা মালেম অমগীদমক শান্তি শিখর একাদেমী লিংখৎলকপদা ময়াম পুম্নমকপু হন্না-হন্না নুংঙাইবা ফোংদোকখি।
থৌরম অদুদা ছত্তিসগরগী রাজ্যপাল, শ্রী রামেন দেকা, ছত্তিসগরগী মুখ্য মন্ত্রী, শ্রী বিষ্ণু দেও সাই অমসুং অতোপ্পা মশক নাইবা মীওইশিংনা শরুক য়াখি।
***
(Release ID: 2185328)
Visitor Counter : 8
Read this release in:
Assamese
,
English
,
Urdu
,
Marathi
,
हिन्दी
,
Bengali
,
Gujarati
,
Odia
,
Tamil
,
Telugu
,
Kannada
,
Malayalam