প্রধান মন্ত্রীগী প্রিন্সিপল সেক্রেতরী, দা. পি.কে. শ্রী মিশ্রানা ঙসি গুজরাতকী ধোলেরা অমসুং লোথালদা মরুওইবা ইনফ্রাস্ত্রকচর প্রোজেক্তশিং য়েংশিন্নবা সাইত ইন্সপেক্সন অমসুং অৱাংবা থাক্কী রিভিয়ু মীফমশিং পাংথোকখ্রে। প্রোজেক্তশিং অসি প্রধান মন্ত্রী শ্রী নরেন্দ্র মোদীগী ইন্দস্ত্রীএল অমসুং ইকোনোমিক গ্রোথকী ভিজনগী পরিং মখাদা পাইখৎপনি।

দা. মিশ্রানা নেস্নেল হায়ৱেজ ওথোরিতী ওফ ইন্দিয়া (এন.ঐচ.এ.আই.) না ইমপ্লিমেন্ত তৌরিবা অহমদাবাদ অমসুং ধোলেরা গ্রীনফিল্দ এক্সপ্রেসৱেসু য়েংশিনখি। মহাক্না এক্সপ্রেসৱে অসিনা অহমদাবাদ অমসুং ধোলেরাগী মরক্তা চৎথোক-চৎশিন তৌবগী মতম অদু মিনিৎ ৪৫দা হন্থহনবগী ওইথোকপা লৈ হায়না ফোংদোকখি অমসুং মালেমগী থাক্কী লম্বীগী থাক্তা মতম চানা থবক পাংথোক্নবা মহাক্না অকনবা ৱাফম থমখি।

ধোলেরা স্পেসিএল ইনভেস্তমেন্ত রিজন (দি.এস.আই.আর.)দা দা. মিশ্রানা ধোলেরা ইন্তরনেস্নেল এয়রপোর্তকী প্রোগ্রেসকী মতাংদা খন্নখি। ওফিসিএলশিংনা মঙোন্দা কার্গো ওপরেসনশিং ওক্তোবর ২০২৫ ফাওবদা হৌরগনি হায়না পাউদমখি। মহাক্না ওথোরিতীশিংবু মতমগী মতুং ইন্না চৎনবা অমসুং এক্সপ্রেসৱেগা লোয়ননা অপনবা লৈতনা কন্নেক্তিবিতী লৈহন্নবা খঙহনখি।

দা. মিশ্রানা দোমেস্তিক চিপ মেন্যুফেকচরিংগী মরুওইবা খোংথাং অমা ওইরিবা টাটা ইলেক্ত্রোনিক্স সেমিকন্দক্তর ফেব্রিকেশন (এফ.এ.বি.) প্রোজেক্তসু য়েংশিনখি। মহাক্না মোবাইল দিভাইসশিং, কঞ্জ্যুমর ইলেক্ত্রোনিক্স অমসুং ওতোমোতিব এপ্লিকেসনশিংগীদমক চিপশিং য়াওনা মাগী প্রদক্সন স্কোপ অদু য়েংশিনখি। মহাক্না ধোলেরা ইন্দস্ত্রীএল সিতী দিবেলপমেন্ত লিমিতেদ (দি.আই.সি.দি.এল.) না শেমগৎপা সোসিএল ইনফ্রাস্ত্রকচর প্রোজেক্তশিং - স্কুলশিং, হোস্পিতালশিং অমসুং রেসিদেন্সিএল কমপ্লেক্সশিংদসু চৎখি। মহাক্না স্তেকহোল্দরশিংদগী ফীদবেক পুনশিন্ননবা হায়রদুনা য়ুজর এক্সপরিয়েন্সতা মীৎয়েং থমখি।

দা. মিশ্রানা দি.আই.সি.দি.এল., দি.আই.এ.সি.এল., এন.ঐচ.এ.আই., এয়রপোর্ত ওথোরিতী ওফ ইন্দিয়া অমসুং ইন্দিয়ন রেলৱেজকী মকোক থোংবা ওফিসিএলশিংগা লোয়ননা মপুং ফাবা রিভিয়ু মীফম অমা পাংথোকখি। মহাক্না অহমদাবাদ অমসুং ধোলেরা এক্সপ্রেসৱে, ভীমনাথ অমসুং ধোলেরা ফ্রেইত রেল লিঙ্ক, অহমদাবাদ অমসুং ধোলেরা সেমি-হাই-স্পিদ রেল লাইন, ধোলেরা ইন্তরনেস্নেল এয়রপোর্ত য়াওনা মরুওইবা প্রোজেক্তশিং য়েংশিনখি। শ্রী মিশ্রানা গুজরাত সরকারনা ধোলেরাবু মালেমগী থাক্কী স্মার্ত ইন্দস্ত্রিএল সিতী অমা ওইনা চাউখৎহন্নবা হোৎনবদা অচেৎপা ৱাফম থমখি। প্রোজেক্তশিং মতম চানা লোইশিনবা, হৈ-শিংলবা শিন্মী মশিং লৈহন্নবা অমসুং মপাঙ্গল কনবা থৌরাংগী মরুওইবা অদু মহাক্না ফোংদোকখি।

দা. মিশ্রানা পোর্তস, শিপ্পিং অমসুং ৱাতরৱেজ মন্ত্রালয়গী মখাদা ফ্লেগশিপ ইনিসিয়েতিব অমা ওইরিবা নেস্নেল মেরিতাইম হেরিতেজ কমপ্লেক্স (এন.এম.ঐচ.সি.) য়েংশিনখি। মহাক্না শ্রী তি. রামচন্দ্রন, সেক্রেতরী, এম.ও.পি.এস.দবল্যু. অমসুং মন্ত্রালয়, গুজরাত মেরিতাইম বোর্দ, আর্কিয়োলোজিকেল সর্ভে ওফ ইন্দিয়া, এন.ঐচ.এ.আই. অমসুং ইন্দিয়ন রেলৱেজকী অতোপ্পা ওফিসিএলশিং য়াওদুনা য়েংশিন মীফম অমদা ময়াই তাংবল লৌখি। শ্রী মিশ্রানা হায়খি মদুদি এন.এম.ঐচ.সি.না ভারতকী মেরিতাইমগী হৌখ্রবা মতম অদুদা স্কোলরলী ত্রিব্যুত অমা ওইনা মথৌ তৌগদবনি। মহাক্না কুথনা রিসর্চ তৌবা, একাদমিক কোলাবোরেসন অমসুং নীংথিনা থৌরাং তৌরবা ভিজিস্তর এক্সপরিয়েন্সকী মরুওইবা অদু পনখি।

শ্রী মিশ্রানা লোকেল স্পেসিস প্লান্তেসন অমসুং ৱাতর মেনেজমেন্ত সিস্তেম য়াওনা এনভাইরনমেন্ত সস্তেনেবিলিতীগী খোঙথাংশিংসু য়েংশিনখি। মহাক্না এন.এম.ঐচ.সি.গী অচৌবা স্কেল অমসুং মরুওইবা অদু পনখি। মহাক্না হরাপ্পা সিভিলাইজেসনদগী হৌদুনা ভারতকী মেরিতাইম লেগেসী তাক্লিবা আর্তিফেক্তশিং অদু ক্যুরেৎ তৌবগী তঙাই ফদবা অদু পনখি। দা. মিশ্রানা গেলরী তরুক য়াওনা ফেজ I-Aগী শেমগৎ-শাগৎপগী থবকসু য়েংশিনখি অমসুং ওগস্ত ২০২৫ ফাওবদা লোইশিন্নবা খঙহনখি।

দা. মিশ্রগা লোয়ননা পি.এম.ও.গী ওফিসিএলশিং, পি.এম.গী এদভাইজর শ্রী তরুন কাপুর অমসুং পি.এম.ও.গী দিপুতি সেক্রেতরী শ্রী মঙ্গেশ গিলদিয়ালসু য়াওখি।

****