য়োর এক্সেলেন্সী প্রাইম মিনিস্তর প্রবিন্দ জুগনোথ জী,

মোরিসিয়স কেবিনেতকী লেঙশিনবিরিবা মেম্বরশিং,

ভারতকী এক্সতর্নেল এফ্যার্স মন্ত্রী দোক্তর জয়শঙ্কর,

ঙসিগী থৌরমসিদা শরুক য়াবিরিবা অগালেগাগী মীওইশিং,

অমদি ঐগী মরূপ পুম্নমক,

খুরুমজরি !

হন্দক্কী অসিগী হৌখিবা থা ৬ অসিদা প্রাইম মিনিস্তর জুগনোথকা ঐগা উনবা মঙাশুবনি। মসি ভারত অমসুং মোরিসিয়সকী মরক্তা লৈনরিবা মশক মচু নাইরবা, অকনবা অমদি তোপ তোপ্পা মরীগী খুদম অমনি। মোরিসিয়স ঐখোয়গী নৈবরহুদ ফর্স্ত পোলিসীগী মরুওইবা খোঙবু অমনি। মোরিসিয়স “সাগর” ভিজনগী মখাদা ঐখোয়গী অখন্নবা খোঙবুনি। গ্লোবেল সাউথকী মেম্বর অমা ওইনা, ঐখোয়গী মরক্তা মান্নবা প্রাইওরিতীশিং লৈ। হৌখিবা চহি ১০ সিদা ঐখোয়গী মরীদা হান্না খন্নরুদবা মওংদা খোঙজেল য়াংখৎলক্লি। ঐখোয়না অমগা অমগা তেংবাংনবগী লমদা অনৌবা পন্দোল লোম্লি। নাৎ অমদি পুৱারীগী মরীদা অনৌবা মশক অমা উবা ফংলি। ঐখোয়গী মীয়াম লোল অমদি নাৎকী সনা মচুগী লংলানা হান্নদগী পুন্দুনা লাক্লি। নুমিৎ খরনিগী মমাঙদা, ঐখোয়না UPI অমদি রুপে কার্দনচিংবা থৌরাংশিংগী খুত্থাঙদা মোদর্ন দিজিতেল কন্নেক্তিবিতী ফংহনখি।

মরূপশিং,

দিভেলপমেন্ত পার্ত্নরসিপ্না ঐখোয়গী স্ত্রেতেজিক ওইবা মরীগী মরুওইবা য়ুম্বী অমা ওইদুনা লাক্লি। ঐখোয়গী দিভেলপমেন্ত পার্ত্নরসিপ অসি মোরিসিয়সকী প্রাইওরিতীশিংদা য়ুম্ফম ওইদুনা শেমগৎপনি। মোরিসিয়সকী EEZ সিক্যুরিতীগী মথৌ তাববু ওইরবসু, নৎত্রগা হকশেলগী সিক্যুরিতীগী ওইরবসু, ভারতনা মতম পুম্বদা মোরিসিয়সকী মথৌ তাবশিং ইকায়খুম্নদুনা লাক্লি। কোবিদ লাইচৎ নৎত্রগা থাউ হৈদোকপগী লাংফম ওইরবসু, ভারতনা মতম পুম্বদা মাগী মরূপ মোরিসিয়সকীদমক হান্না চোংথোক্তুনা লাক্লি। ঐখোয়না হোৎনরিবা অসিগী মচং ওইবা পান্দমদি মোরিসিয়সকী মীচম মীয়ামগী পুন্সিদা ৱাহন্থোক লৈবা অহোংবা পুরকপনি। হৌখিবা চহি ১০ সিদা, চাউরাক্না দোলার মিলিয়ন লিশিং অমগী ক্রেদিত লাইন অমদি দোলার ৪০০ গী তেংবাং মোরিসিয়সকী মীয়ামদা ফংহনখ্রে। ঐহাক্না মোরিসিয়স্তা মেত্রো লাইন শেমগৎপা, কম্ম্যুনিতী দিভেলপমেন্ত প্রোজেক্ত, সোসিএল হাউজিং, ENT হোস্পিতাল্স, সিভিল সর্ভিস কলেজ অমদি স্পোর্তস কমপ্লেক্স শেমগৎপা য়াওনা ইনফ্রাস্ত্রকচর প্রোজেক্ত কয়াদা শরুক য়ানবা খুদোংচাবা ফংখি।

মরূপশিং,

ঙসি অসি ঐখোয়গী দিভেলপমেন্ত পার্ত্নরসিপকী অখন্নবা পুংফম অমনি। ঙসি ঐহাক্না অগালেগাগী মীয়ামগীদমক শেমগৎ শাগৎনবা ২০১৫ দা থমখিবা ৱাফম অদু মপুং ফারকপা ঐখোয়না উবা ফংবসিদা ঐ তশেংনা নুংঙাই। হৌজিক্তি ভারত্তা মসি “মোদীগী ৱাশক” হায়না খঙনরে। ঙসি ঐখোয় পুন্না শঙ্গামিন্নরিবা ফেসিলিতীশিং অসিনা ইজ ওফ লিভিং হেনগৎহল্লগনি হায়না ঐহাক্না থাজৈ। মোরিসিয়সকী অৱাং অমদি খা থংবা শরুক্তা কন্নেক্তিবিতী ফগৎলগনি। মেনলেন্দদগী এদমিনিস্ত্রেতিব কোওপরেসন লাকপা লায়হল্লগনি। সোসিএল অমদি ইকনমিক দিভেলপমেন্ততা ইনোৎ অমা হাপ্লগনি। অনা লায়েংগী ইমর্জেন্সী ইভাকুএসন, অমদি স্কুল অঙাংশিংগী চত্থোক চৎশিনগী খুদোংচাবা হেনগৎলগনি।

মরূপশিং,

ইন্দিয়ন ওসীন রিজন্দা ত্রেদিস্নেল অমদি নন-ত্রেদিস্নেল ওইবা শিংনবা কয়া থোরক্লি। শিংনবা পুম্নমক অসিনা ঐখোয়গী শেন্মিৎলোন্দা শোকহল্লি। মসি লাকশিন্নবা, ভারত অমসুং মোরিসিয়স মেরিতাইম সিক্যুরিতীগী লমদা মহৌশানা খোঙবু ওইদুনা লাক্লি। ঐখোয়না ইন্দিয়ন ওসীন রিজন্দা ঙাকশেল, নুংঙাই য়াইফবা অমদি মরা চেৎপা পুরক্নবা থবক পায়খৎলি।ঐখোয়না এক্সক্লুজিব ইকনমিক জোন য়েংশিনবা, পুন্না পেত্রোল্লিং চৎমিন্নবা, হায়দ্রোগ্রাফী, অমদি হ্যুমেনিতরিয়ন তেংবাং অমসুং দিজাস্তর রিলীফনচিংবা লম পুম্নমক্তা অমগা অমগা তেংবাংনরি। ঙসি অগালেগাদা এয়রস্ত্রিপ অমদি জেত্তী শঙ্গারিবা অসিনা ঐখোয়গী তেংবাংনবগী মরী হেন্না খুমাঙ চাওশিনহল্লগনি। মসিনা মোরিসিয়সকী ব্লু ইকনমীসু মপাঙ্গল কনখৎহল্লগনি।

মরূপশিং,

ঐহাক্না প্রাইম মিনিস্তর জুগনোথ জীগী মফমদা মোরিসিয়সতা জন ঔসধী সেন্তর হাংদোক্নবা ফিরেপ অসিগীদমক তৌবিমল খঙবা উৎচরি। মোরিসিয়সনা ঐখোয়গী জন ঔসধী থৌশিলদা শরুক য়াবা অহানবা লৈবাক ওইরগনি। মসিগা লোয়ননা, মোরিসিয়সকী মীয়াম্না ভারত্তা পুথোকপা হেন্না ফবা জেনেরিক হিদাক লাংথকশিংগী কান্নবা ফংলগনি।

এক্সেলেন্সী,

প্রাইম মিনিস্তর প্রবিন্দ জুগনোথ জী, ঐহাক্না অদোমগী মীৎয়েঙ শানবা অমদি ইচঙ থৌবা লুচিংগীদমক নুংঙাইবা ফোঙদোকচরি। তুংদসু ঐখোয় পুন্না ভারত অমদি মোরিসিয়সকী মরী হেন্না ফগৎহন্নবা হোৎনমিন্নগনি হায়না থাজবা থমজরি।

অমুক্কা হন্না ঐনা ময়াম পুম্নমকপু থাগৎচরি!

দিসক্লেমর – মসি প্রধান মন্ত্রীগী ৱারোলগী চাউরাকপা ৱাহন্থোক্নি। অশেঙবা ৱারোলদি হিন্দীদা ফোঙদোকখিবনি।

***