ॐ माता वैष्णो देवी दे चरने च मत्था टेकना जय माता दी,

জম্মু অমসুং কাস্মিরগী লেপ্তনেন্ত গভর্নর মনোজ সিনহা জি, চীফ মিনিষ্টর ওমর অব্দুল্লাহ জি, কেন্দ্রগী মন্ত্রীমন্দলগী ঐগী মরুপশিং অশ্বিনি বৈষ্ণব জি, জিতেন্দ্র সিংহ জি, ভি সোমান্না জি, দিপুতি চীফ মিনিষ্টর সুরেন্দ্র কুমার জি, জম্মু অমসুং কাস্মির এশেমব্লিগী ওপোজিসনগী লুচিংবা সুনিল জি, সংসদকী ঐগী মরুপশিং জুগল কিশোর জি, অতোপ্পা মীয়ামগী মীহুৎসিং অমসুং ঐগী নুংশিরবা ইনাওশিং অমসুং ইচলশিং। বীর জোরাৱার সিংহ জিগী লমদম অসি ঐনা কোক নোঞ্জরি।

মরুপশিং,

ঙসিগী থৌরম অসি ভারতকী অপুনবা অমসুং ভারতকী খাংবা কনবগী অচৌবা হরাওবা অমনি। মাতা বৈষ্ণো দেবীগী থৌজালদগী ঙসি কাস্মির তম্পাক ভারতকী রেল নেতৱার্ককা শম্নরে। ইমা ভারত মশক তাকপা মতমদা ঐখোয়না হায়নরি- কাস্মিরদগী কৈন্যাকুমারি ফাওবা। হৌজিক রেলৱে নেতৱার্ক থবক ওইনা পাংথোক্লে। উধাম্পুর, শ্রীনগর, বারামুল্লা, মখোয় রেল লাইন প্রোজেকশিংনি, মখোয় শুপ্নগী মমিং খক্ত নত্তে। মখোয় জম্মু অমসুং কাস্মিরগী অনৌবা মপাঙ্গলগী শক্তমনি। ঙাইহাক্কী মমাঙদা ঐনা চেনাবা থোঙ অমসুং অঞ্জি থোঙ শঙ্গাখ্রে। ঙসিমক জম্মু অমসুং কাস্মিরগী অনৌবা বন্দে ভারত ত্রেন অনি ফংলে। জম্মুদা অনৌবা মেদিকেল কোলেজগী উরেপ-উয়ুং তম্লে। লুপা করোর লিশিং ৪৬ গী প্রোজেকশিং অসিনা জম্মু অমসুং কাস্মিরগী চাউখৎপদা অনৌবা ইনোৎ অমা পীরগনি। চাউখৎপগী অনৌবা যুগ অসিগীদমক ঐনা মীয়াম হরাওবা ফোঙদোকচরি। মসি হাজিগী লমদম অমনি। লমদম অসি ঐনা কোক নোঞ্জরি।

মরুপশিং,

রেল য়ৌরকপগী মঙলান্দা জম্মু অমসুং কাস্মিরগী মীরোল কয়া হৌখ্রে। ঙরাং ঐনা চীফ মিনিষ্টর ওমর অব্দুল্লাহগী ৱারোল অমা য়েংখ্রে অমসুং ৱারোল অদুনা মহাক্না হায়খি মদুদি মহাক্না ক্লাস ৭-৮ তম্লিঙৈদগী প্রোজেক অসি লোইশিনবা ঙাইরকপনি। ঙসিদি জম্মু অমসুং কাস্মিরগী মীওই মিল্লিয়ন কয়াগী মঙলানা মঙফাওনরে। মসি অফবা থবকশিং ঐগীদমক খাক্তুনা থম্লম্বা অসি অশেংবনি।

মরুপশিং,

ঐখোয়গী সরকারনা প্রোজেক অসি লোইশিনবা অসি ঐখোয়গী লাইবক ফবনি। কোবিদ লাইচৎনবা মরম ওইদুনা খুদোংথিবা মতম কয়াগী মরক্ত, ঐখোয় লেংদনা লেপখি।

মরুপশিং,

চৎথোক-চৎশিন্দা খুদোংচাদবশিং লৈখি, নোং-চিংগী ফিবম ফত্তে, চীঙজাওশিংদগী নুঙশিং ওন্থরকখি, প্রোজেক অসি লোইশিন্নবা হোৎনবদা খুদোংচাদবা কয়া মায়োক্নখি। অদুবু ঐখোয়গী সরকারনা খুদোংচাদবা লম্বী অসি খনখি। ঙসিদি, জম্মু অমসুং কাস্মিরদা কুম্বী-কালেন নাইদনা শীজিন্নবা য়াবা ইনফ্রাষ্ট্রকচর প্রোজেকশিং শেমগৎলিবা অসি খুদম অমনি। থা খরগী মমাঙদা সোনমার্গ তন্নেল থবক হৌখ্রে। ঙাইহাক্কী মমাঙদা ঐ চেনাব অমসুং অঞ্জি থোঙ ফাওরগা অদোমগী মরক্ত লাকপনি। থোঙশিং অসি লাল্লিঙৈদা, ভারতকী অচেৎপা ৱাশক অমা ঐনা ফাওখি, ঐখোয়গী ইঞ্জিনিয়ারশিং অমসুং শিন্মীশিংগী হৈশিংবা অমসুং থৌনা। চেনাবা থোঙ অসি মালেমদা খ্বাইদগী ৱাংবা রেলৱে আর্ক ব্রিজনি। মীয়াম্না আইফিল তৱার য়েংনবা পেরিস, ফ্রান্সতা চৎলি। থোঙ অসিনা আইফিল তৱারদগী হেন্না ৱাংলে। হৌজিক মীয়াম্না চেনাব থোঙ ফাওরগা কাস্মিরদা চৎপা খক নত্তনা, থোঙ অসিমক ফজরবা লমকোয়ফম অমা ওইরগনি। মীওই খুদিংমক সেলফি নম্ফমদা চৎকনি অমসুং সেলফি নমগনি। ঐখোয়গী অঞ্জি থোঙ অসিসু ইঞ্জিনিয়ারশিংগী অচৌবা খুদম অমনি। মসি ভারতকী অহানবা কেবল রেলৱে থোঙনি। থোঙ অনিমক চেক, বিলামাতি, য়োৎ অমসুং ষ্টিলনা শাবা খক নত্তে, মখোয় ভারতকী থৌনাগী অহিংবা খুদম অমনি, পীর পঞ্জালগী য়ৌবা ঙমদ্রবা চীঙশিংদা লেপ্লি। মসি ভারতকী অফবা তুংলমচৎকী অহৌবা খোঞ্জেলনি। বিকসিত ভারত অমগী মঙলান কয়া য়াম্না চাউবগে হায়বা, ঐখোয়গী থৌনা কয়া য়াম্না কনবগে হায়বা অমসুং ঐখোয়গী তৌবা ঙম্বা মসিনা উৎলে। খ্বাইদগী মরুওইবদি অচুম্বা ৱাখল্লোন অমসুং অকনবা থবক্নি।

মরুপশিং,

চেনাব থোঙ নত্ত্রগা অঞ্জি থোঙ ওইবা য়াই, মখোয় জম্মু অমসুং কাস্মির লমদম নুংঙাই য়াইফনবা পাম্বৈশিং ওইগনি। মসিনা তুরিজম হেনগৎহনবতা নত্তনা শেন্মিৎলোনগী অতোপ্পা হিরমশিংসু কান্নবা পীগনি। জম্মু অমসুং কাস্মিরগী মরক্ত রেল চেনবগী লমদম অনিমক্ত ললোন-ইতিক্কী অনৌবা খুদোংচাবশিং পীরগনি। মসিনা লমদম অসিগী উদ্যোগ চাউখৎহনগনি, হৌজিক কাস্মিরগী এপ্পলশিং ভারা য়াম্না চঙদনা লৈবাক অসিগী অচৌবা কৈথেলশিংদা য়ৌবা ঙম্লগনি অমসুং মতম চানা য়ৌবা ঙম্লগনি। উহৈ-ৱাহৈ অকংবশিং, পাসমিনা সালশিং, হেন্দিক্রাফশিং লৈবাক্কী মফম খুদিংমক্ত য়ৌবা ঙম্লগনি। জম্মু অমসুং কাস্মিরগী মীওইশিং লৈবাক অসিগী অতোপ্পা মফমশিংদা চৎপসু য়াম্না লাইরগনি।

মরুপশিং,

শঙ্গালদানগী মহৈরোয় অমনা পাউ-চে অমদা ইবা ৱারোল অমা ঐ পারে। মহৈরোয় অদুনা হায়খি মদুদি মহাক্কী খুঙ্গংদগী মপান থোকখিবা মহাক্কী খুঙ্গংগী মীওইশিং খক্তনা হৌজিক ফাওবা ত্রেন উরে। খুঙ্গং অসিগী মীওই অয়াম্বা ভিদিও খক্তদা ত্রেন উরি। মখোয়গী মীৎমাঙদা অশেংবা ত্রেন অমা ফাওদুনা চৎকনি হায়বা মখোয় হৌজিক ফাওবা থাজবা ঙমদ্রি। অতোপ্পা নুপীমচা অমনা হায়খি, লম্বীশিং চৎপা য়াগদরা নত্ত্রগা য়ারোইদরা হায়বা হৌজিক নোং-চিংগী ফিবমনা লেপ্লরোই। হৌজিক অনৌবা ত্রেন অসিনা কুম্বী-কালেন নাইদনা মীয়ামগী মতেং পাংলগনি।

মরুপশিং,

জম্মু অমসুং কাস্মির ভারত ইমাগী লুহুপনি। লুহুপ অসিদা ফজরবা মুক্ত কয়া য়াওরি। হায়রিবা তোঙান তোঙানবা মমল য়াম্লবা নুঙশিং অসি জম্মু অমসুং কাস্মিরগী মপাঙ্গলনি। মফম অসিদা অরিবা চৎনবীশিং লৈরি, অরিবা নাৎ লৈরি, অধ্যতিক্কী ৱাখল্লোন লৈরি, মহৌশাগী ফজবা, হিদাক কান্নবা পাম্বীশিং, উহৈশিং অমসুং লৈশিং লৈরি, নহারোলশিংগী হৈথোই-শিংথোইবা লৈরি, মীয়াম লৈরি, মসিনা লুহুপতা মনি অমগুম্না ঙাল্লি।

মরুপশিং,

চহি কয়া ঐ জম্মু অমসুং কাস্মিরদা লাক্লি হায়বা অদোম ফজনা খঙলে। মনুং হুঞ্জিনবা মফমশিংদা চৎপা অমসুং লৈবগী খুদোংচাবশিং ঐ ফংখ্রে। ঐনা লমদম অসি উখ্রে অমসুং তৌবা ঙম্বশিং খঙলে অমসুং মরম অদুনা জম্মু অমসুং কাস্মির চাউখৎনবগীদমক ঐনা কৎথোকপগা লোয়ননা থবক তৌরিবনি।

মরুপশিং,

জম্মু অমসুং কাস্মির ভারতকী লাইরিক-লাইশু অমসুং নাৎকী চাউথোকচরি। ঙসিদি, ঐখোয়গী জম্মু অমসুং কাস্মির মালেমদা খ্বাইদগী চাউবা লৌশিংগী মফমশিংগী মনুংদা অমা ওইরে, মরম অদুনা হিরম অসিদা জম্মু অমসুং কাস্মিরনা শরুক য়াবা তুংদা হেনগৎলক্কনি। রাজ্য অসিদা আই.আই.তি, আই.আই.এম, এ.আই.আই.এম.এস অমসুং এন.আই.তিগুম্বা ইন্সতিতুৎশিং লৈরে। জম্মু অমসুং শ্রীনগরদা সেন্ত্রেল য়ুনিভর্সিতিশিং লৈরে। জম্মু অমসুং কাস্মিরদা থিজিনবগী থবকশিংসু ফগৎলক্লি।

মরুপশিং,

লাইরিক-লাইশুগী থবকশিংগা লোয়ননা, মফম অসিদা মেদিসিনগীদমক থবক কয়াসু পায়খৎলে। হৌখিবা চহিশিংদা, রাজ্য থাক্কী কেন্সর ইন্সতিতুৎশিং লিংখৎখ্রে। হৌখিবা চহি ৫ দা অনৌবা মেদিকেল কোলেজ ৭ লিংখৎখ্রে। অনৌবা মেদিকেল কোলেজ অমা লিংখৎপদা, অনাবশিং খক নত্তনা লমদম অসিগী নহারোলশিংনা কান্নবশিং খ্বাইদগী য়াম্না ফংই হায়বা অদোম খঙলে। হৌজিক জম্মু অমসুং কাস্মিরদা এম.বি.বি.এস সিত মশিং ৫০০ দগী ১৩০০ দা হেনগৎলে। রিয়াসি জিলাদা অনৌবা মেদিকেল কোলেজ অমা হাংদোক্কদৌরিবা অসিদা ঐ হরাওই। শ্রী মাতা বৈষ্ণো দেবী ইন্সতিতুৎ ওফ মেদিকেল এক্সলেন্স অসি অনৌবা হোস্পিতাল অমা ওইবতা নত্তনা, মসি ঐখোয়গী কৎথোকপগী চৎনবীগী খুদম অমসুনি। ভারতকী মফম খুদিংমক্তগী মাতা বৈষ্ণো দেবীগী খুয়াদা খুরুম্বা লাকপা মীওশিংনা কৎলকপা শেনফমনা মেদিকেল কোলেজ অসি শাবনি। শেংলবা থবক অসিগীদমক ঐনা শ্রী মাতা বৈষ্ণো দেবী শ্রাইন বোর্দ অমসুং মসিগী চিয়ার্মেন মনোজ জি ঐনা য়াইফ পাউজেল পীজরি। হোস্পিতাল অসি ফমুং ৩০০ দগী ফমুং ৫০০ দা হেনগৎলে। মসিনা কাত্রাদা লৈবা শ্রী মাতা বৈষ্ণো দেবী খুরুম্বা লাকপা মীওইশিং খুদোংচাহল্লগনি।

মরুপশিং,

কেন্দ্রদা বি.জে.পি-এন.দি.এ সরকারনা শক্তি পায়রকপা চহি ১১ মপুংফারে। হৌখিবা চহি ১১ অসি লায়রবগী য়াইফনবা কৎথোকখ্রে। প্রধান মন্ত্রী অৱাস য়োজনাগী মখাদা লায়রবা মীওইগী পাক্কাগী য়ুম করোর ৪ শাখ্রে। উজৱালা য়োজননা চাকখুম করোর ১০ মৈখু থাংহনদ্রে, ঐখোয়গী ইচলশিং অমসুং ইচানুপীশিং মৈখুদগী ঙাকথোক্লে। অয়ুস্মান ভারত য়োজননা লায়রবা মীওই করোর ৫০ দা লুপা লাখ ৫ ফাওবগী লেম্না লায়য়েংবা ফংহল্লে। প্রধান মন্ত্রী গরিব কলয়ান অন্না য়োজননা পুখম খুদিংমক্ত চাক মরাংকাইনা ফংহল্লে। অহানবা ওইনা, জন ধন য়োজননা লায়রবা মীওই করোর ৫০ হেনবগী বেঙ্কশিংগী থোঙশিং হাংদোক্লে। অমম্বদা লৈরকপা ইমুং করোর ২.৫ দা সৌভাগ্যা য়োজননা মৈ ফংহল্লে। শ্বাচ্ছ ভারত অভিয়ানগী মখাদা তোইলেত করোর ১২ শাদুনা মীওই কয়া তঙাইফদনা লমহাংদা খোঙহাম্বা লেপহল্লে। জল জিবন মিসন্না ইমুং করোর ১২ দা তোতি ঈশিং ফংহন্দুনা নুপীশিং হিংবদা লাইহল্লে। লায়রবা লৌমী করোর ১০ দা পি.এম কিষান সম্মান নিধিনা হকথেংননা শেন্থং পীরে।

মরুপশিং,

সরকারগী অসিগুম্বা থবকশিংনা মরম ওইদুনা, হৌখিবা চহি ১১ দা, মীওই করোর ২৫ হেন্না লায়রবা কোক্লে। হৌজিক মখোয় অনৌবা মিদল ক্লাসকী শরুক অমা ওইরে। মশানা মশাবু খুন্নাইগী থবকশিংগী অখঙ-অহৈনি হায়না খঞ্জবশিং, শক্নাইরবা অখঙ-অহৈশিং, হৌখিবা মতমদা অমসুং তুংদা রাজনিতিদা লুপ্লিবশিং, দলিতশিংগী মিংদা রাজনিতিগী খুদোংচাবা ফংলিবশিং, ঐনা পল্লিবা স্কিমশিং অসি অমুক্ত য়েংবীয়ু। কনানা খুদোংচাবশিং অসি ফংবগে, কনানা হায়রিবা খুদোংচাবশিং অসি নিংতম্বা ফংলবা চহি ৭০ ফাওবা ফংদবগে। মখোয় ঐগী দলিত ইনাওশিং অমসুং ইচলশিংনি, মখোয়গী ঐগী শোৎথরবা ইনাওশিং অমসুং ইচলশিংনি, মখোয় চীঙ লৈবা মীওইশিংনি, মখোয় উমংশিংদা লৈবা মীওইশিংনি, মখোয় পুন্সি চুপ্পা শ্লমশিংদা লৈবা মীওইশিংনি, ইমুংশিং অসিগীদমক মোদীনা মহাক্কী চহি ১১ কৎথোক্তুনা লাক্লি। লায়রবা অমসুং অনৌবা মিদল ক্লাসকী মপাঙ্গল হেনগৎহন্নবা কেন্দ্র সরকারনা হোৎনরি। মসি ৱান রেঙ্ক ৱান পেন্সন ওইবা য়াই, লুপা লাখ ১২ গী তোলোব তেক্স লৌদবা, য়ুম অমা লৈনবা শেন্থং পীবা, মথক্ত মমল হোংনা চৎনবা মতেং পাংবা ওইবা য়াই, লায়রবা অমসুং মিদল ক্লাসগা সরকারগা য়াম্না নকশিন্ননা থবক তৌমিন্নরি।

মরুপশিং,

লায়রবা কোক্নবা লায়রবা মীওইশিংগী মতেং পাংলি, মতম মতমগী মতুংইন্না পুকচেল শেংনা তেক্স থিরিবা মিদল ক্লাসকী তৌবা ঙম্বসু হেনগৎহল্লে, নিংতম্বা ফংলবা মতুংদা অহানবা ওইনা, ঐখোয়না অসুক য়াম্লবা থবকশিং পাংথোক্লে।

মরুপশিং,

ঐখোয়না নহারোলশিং অনৌবা থবক ফংনবা খুদোংচাবশিং হেনগৎহল্লে। মসিগী মরুওইবা পাম্বৈ অমদি তুরিজমনি। তুরিজমনা থবক ফংহল্লি, তুরিজমনা মীয়াম শম্নহল্লি। লাইবক থিবদি, ঐখোয়গী য়ুম্লোন্নবনা মীওইবা খুন্নাইগী মায়োক্ত লৈরি, নুংশিনবগী মায়োক্ত লৈরি, তুরিজমগী মায়োক্ত লৈরি, মসি খক নত্তনা, লৈবাক অসিনা লায়রবগী হিংনবগী লম্বীগী মায়োক্ত লৈরি। এপ্রিল ২২ দা পাহালগামদা থোকখিবা অদু মসিগী খুদম অমনি। পাকিস্তান্না পাহালগামদা মীওইবগী লিচৎ অমসুং কাস্মিরিয়াত অনিমক্ত খুৎ থাখ্রে। মহাক্কী পান্দমদি ভারত্ত কাংলুপকী ইরাং থোকহনবনি। মহাক্কী পান্দমদি থবক শুবা কনবা কাস্মিরগী মীয়ামগী শেন্দাল লম্বী ককথৎপনি। মরম অদুনা পাকিস্তান্না লমকোয়বা লাকপা মীওইশিং হাৎলিবনি। হৌখিবা চহি ৪-৫ লেপ্তনা তুরিজম চাউখৎলকপদগী মফম অসিদা লমকোয়বা মীওইশিং লাকপা মশিং হেনগৎলক্লি। জম্মু অমসুং কাস্মিরগী লায়রবা ইমুং কয়া হিংহল্লিবা তুরিজমদা পাকিস্তান্না লান্দারে। খরনা শগোল  থৌবশিং, খরনা পোৎ-চৈ থাংবশিংনি, খরনা লমতাকপশিংনি, খরনা গেষ্ট হাওস মপুশিংনি, খরনা দুকান-ধাবা মপুশিংনি, পাকিস্তানগী লৌতুনবনা মখোয় লোইনা মাঙহল্লে। মহাক্কী ইমুং পুনবা মফম অদুদা থবক শুবা লাকখিবা অদিল তেরোরিষ্টশিংনা হাৎখি।

মরুপশিং,

পাকিস্তানগী লৌতুনবগী মায়োক্ত জম্মু অমসুং কাস্মিরগী মীয়াম্না লেপ্লিবা মওং অসিনা, জম্মু অমসুং কাস্মিরগী মীয়াম্না পাকিস্তান খক নত্তনা মালেম শীনবা থুংবগী তেরোরিষ্টকী ৱাখল্লোন্দা অকনবা পাউজেল অমা পীরে। হৌজিক জম্মু অমসুং কাস্মিরগী নহারোলশিংনা তেরোরিজমগী মথক্ত অকনবা পাউখুম অমা পীনবা মখোয়গী ৱাখল শেম-শারে। তেরোরিজম্না তম্পাক অসিগী স্কুলশিং নত্ত্রগা বিল্দিংশিং মৈ থাদোকপা খক নত্তনা, মসিনা মীরোল অনি মৈ থাদোকপনি। হোস্পিতালশিং মাঙহল্লে। মসিনা মীরোল কয়া মাঙহল্লে। মীয়াম্না মখোয়গী অপাম্বা মীহুৎ খনগদবনি, মফম অসিদা মীখলশিং পাংথোক্কদবনি, অদুবু তেরোরিজমনা মরম অদুনা মসি অচৌবা খুদোংচাদবা অমা ওইরে।

মরুপশিং,

জম্মু অমসুং কাস্মিরদা মতম শাংনা তেরোরিজম চৎথরকপদগী জম্মু অমসুং কাস্মিরগী মীয়াম মঙ মঙবা লেপখ্রে অমসুং তেরোরিজম অসি মখোয়গী মরাইবক্নি হায়বা য়াজখি। ফিবম অসিদগী জম্মু অমসুং কাস্মির ফগৎনবা ঐখোয়না থবক পায়খৎলে। ঙসিদি জম্মু অমসুং কাস্মিরগী নহারোলশিং অনৌবা মঙশিং মঙলে অমসুং মখোয় মঙফাওনরে। হৌজিক জম্মু অমসুং কাস্মিরগী নহারোলশিং কৈথেলশিং, সোপ্পিং মোলশিং, সেনিমা হোলশিং উবদা হরাওরে। জম্মু অমসুং কাস্মির মরুওইবা ফিল্ম নম্ফম অমুক হন্না ওইরকপা রাজ্য অসিগী মীয়াম্না পাম্লি, লমদম অসি শান্নবগী মফম অমা ওইরকপা উনিংলি। মাতা খির ভাবানিগী মেলাদা মসিগা চপ মান্নবা ৱাখল্লোন ঐখোয়না উবা ফংখ্রে। মীওই লিশিং কয়ানা মাতাগী লাইশঙ য়ৌরকপগী মওং অদুদা অনৌবা জম্মু অমসুং কাস্মিরগী শক্তম অমা উৎলে। হৌজিক লাক্লিবা তাং ৩ দগী অমরনাথ যাত্রাসু হৌরগনি। ঐখোয়না মফম খুদিংমক্ত ইদগী হরাওবসু উরে। ওইরক্লিবা ফিবম অসিনা পাহালগামগী থৌদোক্না জম্মু অমসুং কাস্মির নিকহনবা ঙম্লোই। জম্মু অমসুং কাস্মিরগী মীয়ামদা নরেন্দ্র মোদীনা ৱাশক্লি মদুদি ঐনা মফম অসিগী চাউখৎ-থৌরাংগী থবক লেপ্লোই। রাজ্য অসিগী নহারোলশিংগী মঙলানশিং মঙফাওনবগী লম্বীদা করিগুম্বা অপনবশিং লাক্লবদি, অপনবা অসি মায়োক্নবা অহানবা মীওই মোদীনা ওইগনি।

মরুপশিং,

ঙসি জুন ৬ নি, থা অমগী মমাং, মে ৬ গী নুমিদাংদা পাকিস্তানগী তেরোরিষ্টশিং লোইশিনখি। পাকিস্তান্না ওপরেসন সিন্দুরগী মমিং তাবা মতমদা লৈবাক অসিনা মাইথিখিবা অদু পাকিস্তান্না নিংশিংগনি। পাকিস্তান মনুংদা কিলোমিতর চা কয়া চঙলক্তুনা ভারতনা তেরোরিষ্টশিংদা খুৎ থারক্কনি হায়বা পাকিস্তান লান্মী অমসুং তেরোরিষ্টশিংনা কৈদৌঙৈদা খনখিদে। মখোয়না চহি কয়া চঙনা শেমগৎলকখিবা তেররগী বিল্দিংশিং মিনিত খরগী মনুংদা মাঙহনখ্রে। মসি উবদা, পাকিস্তান য়াম্না শাওখি অমসুং মসিগী অশাওবা অদু জম্মু অমসুং পুঞ্চগী মীয়ামদা তাইনখি। মফমশিং অসিগী অঙাংশিংদা সেলশিং কাপশিল্লকপা, স্কুলশিং অমসুং হোস্পিতালশিং থুগায়বা, লাইশঙশিং, মোস্কশিং অমসুং গুরুদ্বরাশিং সেল কাপশিল্লকখিবা অদু মালেম শীনবা থুংবনা উখ্রে। অদোম্না পাকিস্তানগী এত্তেকশিং কমদৌনা থেংনখিবগে হায়বা লৈবাক অসিগী মীওই খুদিংমক্না উখ্রে। মতৌ অসুম্না লৈবাক অসিগী মীওই খুদিংমক্না মখোয়গী ইমুংশিংগা লোয়ননা মপুংফাবা পাঙ্গলগা লোয়ননা লেপখিবনি।

মরুপশিং,

নুমিৎ খরনিগী মমাংদা, ঙমখৈ ৱাংমদগী নোংমৈ কাপ্লকপদা লৈখিদ্রবা মীওইশিংগী ইমুংগী মীওইশিংদা এপোইন্তমেন্ত লেত্তরশিং য়েন্থোকখ্রে। সেল কাপশিল্লকপদগী ইমুং লিশিং ২ হেন্না অৱাবা থেংনখি। সেলনা থুগায়খ্রবা মখোয়গী য়ুমশিং শেমজিন্নবা হায়রিবা ইমুংশিং অদুদা শেনগী মতেং পাংলে। হৌজিক কেন্দ্র সরকারনা মখা তানা মতেং পাংনবা ৱারেপ লৌরে।

মরুপশিং,

অহেনবা মতেং ওইনা মপুংফানা শোক্লবা য়ুমশিংদা লুপা লাখ ২ পীরগনি অমসুং মচেৎ খর শোকপা য়ুমশিংদা লুপা লাখ ১ পীরগনি। মসিনা তাকপদি হৌজিক মখোয় অহানবগী মতেং ফংখ্রবা মতুংদা মসিগী অহেনবা শেনফম অসি ফংলগনি।

মরুপশিং,

ঙমখৈদা লৈরিবা মীওইশিং লৈবাক অসিগী অহানবা পনঙাকপশিংনি হায়না ঐখোয়গী সরকারনা খল্লি। হৌখিবা চহি ১০ দা, ঙমখৈগী জিলাশিং চাউখৎনবা অমসুং সেকুরিতিগী থবক কয়া সরকারনা পায়খৎলে, মতম অসিগী মনুংদা অনৌবা বঙ্কর লিশিং ১০ শাখ্রে। হায়রিবা বঙ্করশিং অসিনা ওপরেসন সিন্দুর মতুংদা মীওই কয়াগী থৱায় কনবদা মতেং পাংখি। জম্মু অমসুং কাস্মির দিবিজনগীদমক বোর্দর বত্তলিয়ন অনি লিংখৎপদা ঐ হরাওই। নুপীশিংগী বত্তলিয়ন অনি লিংখৎনবা থবকসু লোইশিল্লে।

মরুপশিং,

ঐখোয়গী মালেমগী ঙমখৈগী মনুং-হুঞ্জিনবা মফমশিংদা লুপা করোর লিশিং কয়াগী অনৌবা ইনফ্রাষ্ট্রকচরশিং শেমগৎলে। কথুৱাদগী জম্মু ফাওবগী হায়ৱে লেন তরুক ওইহল্লে, অখনুরদগী পুঞ্চ ফাওবগী হায়ৱেসু পাকথোক্লে। ভাইব্রেন্ত ভিলেজ গ্রোগ্রামগী মখাদা কিমি ১৮০০ গী অনৌবা লম্বীশিং শেমগৎতুনা জম্মু অমসুং কাস্মিরগী খুঙ্গং ৪০০ কুম্বী-কালেন নাইদনা চৎপা লম্বী-থোঙনা শম্নহল্লগনি। মসিগীদমক সরকারনা লুপা করোর ৪২০০ হেন্না চাদিং তৌরগনি।

মরুপশিং,

কমদৌনা ওপরেসন সিন্দুরনা অত্মনির্ভরতা ভারতকী মপাঙ্গল উৎখিবগা হায়বা অদোম উখ্রে। ঙসিদি মালেম্না ভারতকী ঙাক-শেনগী থবকশিংগী মরমদা ঙাংনরে। মসিগী মরুওইবা মরম অমদি, ঐখোয়গী লান্মীশিংনা মেক ইন ইন্দিয়াদা থাজবা থম্বা অসিনি। ঙসি ভারতমচা খুদিংমক্না ফোর্সশিংনা থম্লিবা থাজবা অসিগুম্না থমগদবনি। চহি অসিগী বজত্তে মিসন মেনুফেকচরিং হৌদোক্লে অমসুং মিসন অসিগী মখাদা সরকারনা মেনুফেকচরিংদা অনৌবা ইনোৎ হাপ্লগনি। মিসন অসিগী শরুক অমা ওইনবা ঐনা জম্মু অমসুং কাস্মিরগী নহারোলশিংদা হায়নিংই। লৈবাক অসিনা অদোমগী অনৌবা থবকশিং, অদোমগী অনৌবা ৱাখল্লোন দরকার ওইরি। অদোমগী অনৌবা ৱাখলশিং, অদোমগী হৈশিংবানা ভারতকী সেকুরিতি অমসুং ভারতকী ইকোনোমি অনৌবা থাকশিংদা পুখৎকনি। হৌখিবা চহি ১০ দা, ভারত মালেমদা মকোক থোংবা দিফেন্স এক্সপোর্তরশিংগী মনুং চল্লে। পান্দম অসি ফংনবা ঐখোয়না য়াংনা চঙশিনবনা ভারত্ত অনৌবা থবক মিল্লিয়ন কয়া ফংহনগনি।

মরুপশিং,

ঐখোয়না অহানবদা ভারত্ত শাবা পোৎথোকশিং খক্ত লৈনবা অদোম অতোপ্পা ৱাশক অমা লৌগদবনি। মসি লৈবাক্কী থবক তৌবনি। ঐখোয়না ঙমখৈদা থবক তৌরিবা ঐখোয়গী ফোর্সশিং ইকায়খুম্নবা হেনগৎহনগদবনি অমসুং কৈথেলদা মেদ ইন ইন্দিয়াগী চাউথোকচবা হেনগৎহনগদবনি।

মরুপশিং,

অফবা তুংলমচৎ অমনা জম্মু অমসুং কাস্মির ঙাইদুনা লৈরে। চাউখৎনবগীদমক কেন্দ্র অমসুং রাজ্য সরকার পুন্না থবক তৌমিন্নরি অমসুং অমনা অমগা শৌগৎনরি। ঐখোয়না মখা তানা শান্তি অমসুং নুংঙাইবগী লম্বী ফগৎহনগদবনি। ইমা বৈষ্ণো দেবীগী থৌজালগা লোয়ননা, বিকসিত ভারত অমসুং বিকসিত জম্মু অমসুং কাস্মিরগী মঙলান অসি মঙফাওনবা ওইরসনু। মসিগী পাউজেল অসিগা লোয়ননা, চাউখৎ-থৌরাংগী প্রোজেকশিং অমসুং অঙকপা প্রোজেক কয়া অসিগীদমক ঐনা অদোমগী মফমদা অমুক হন্না হরাওবা ফোঙদোকচরি। অদোমগী খুৎতুম তাশিনবীয়ু অমসুং ঐগা লোয়ননা কন্না লাউমিন্নসি-

ভারত মাতা কি জয়!  খোঞ্জেল অসি ভারতকী কাচিন-কোয়া খুদিংমক খোন্থাং য়ৈগদবনি।

ভারত মাতা কি জয়!

ভারত মাতা কি জয়!

ভারত মাতা কি জয়!

ভারত মাতা কি জয়!

অদোম থাগৎচরি।

***