ଓମ୍… ମାତା ବୈଷ୍ଣୋ ଦେବୀଙ୍କ ଚରଣରେ ପ୍ରଣାମ କରି, ଜୟ ମାତା ଦୀ !

ଜମ୍ମୁ ଏବଂ କଶ୍ମୀରର ଲେଫ୍ଟନାଣ୍ଟ ରାଜ୍ୟପାଳ ମନୋଜ ସିହ୍ନା, ମୁଖ୍ୟମନ୍ତ୍ରୀ ଓମର ଅବଦୁଲ୍ଲା, କେନ୍ଦ୍ର କ୍ୟାବିନେଟରେ ମୋର ସହଯୋଗୀ ଅଶ୍ୱିନୀ ବୈଷ୍ଣବ, ଜିତେନ୍ଦ୍ର ସିଂହ, ଭି ସୋମନ୍ନା, ଉପମୁଖ୍ୟମନ୍ତ୍ରୀ ସୁରେନ୍ଦ୍ର କୁମାର, ଜମ୍ମୁ ଏବଂ କଶ୍ମୀର ବିଧାନସଭା ବିରୋଧୀ ଦଳ ନେତା ସୁନୀଲ, ସଂସଦରେ ମୋର ସହଯୋଗୀ ଯୁଗଳ କିଶୋର, ଅନ୍ୟାନ୍ୟ ଜନପ୍ରତିନିଧି ଏବଂ ମୋର ପ୍ରିୟ ଭାଇ ଓ ଭଉଣୀମାନେ । ଏହା ବୀର ଜୋରାୱର ସିଂହଙ୍କ ଭୂମି, ମୁଁ ଏହି ଭୂମିକୁ ପ୍ରଣାମ ଜଣାଉଛି ।

ବନ୍ଧୁଗଣ,

ଆଜିର କାର୍ଯ୍ୟକ୍ରମ ଭାରତର ଏକତା ଏବଂ ଭାରତ ଇଚ୍ଛାଶକ୍ତିର ଏକ ବିରାଟ ସମାବେଶ । ମାତା ବୈଷ୍ଣୋ ଦେବୀଙ୍କ ଆଶୀର୍ବାଦରେ, ଆଜି କଶ୍ମୀର ଉପତ୍ୟକା ଭାରତର ରେଳ ନେଟୱାର୍କ ସହିତ ଯୋଡ଼ି ହୋଇଛି । ମା ଭାରତୀଙ୍କ ବର୍ଣ୍ଣନା କରିବା ସମୟରେ, ଆମେ ଶ୍ରଦ୍ଧାର ସହିତ କହି ଆସୁଛୁ - କଶ୍ମୀରରୁ କନ୍ୟାକୁମାରୀ । ଏହା ଏବେ ରେଳ ନେଟୱାର୍କ ପାଇଁ ଏକ ବାସ୍ତବତାରେ ପରିଣତ ହୋଇପାରିଛି । ଉଧମପୁର, ଶ୍ରୀନଗର, ବାରାମୁଲ୍ଲା, ଏହି ରେଳ ଲାଇନ ପ୍ରକଳ୍ପଗୁଡ଼ିକ କେବଳ ନାମକୁ ମାତ୍ର ନୁହେଁ । ଏଗୁଡ଼ିକ ଜମ୍ମୁ ଏବଂ କଶ୍ମୀରର ନୂତନ ଶକ୍ତିର ନିଦର୍ଶନ । ଏହା ଭାରତର ନୂତନ ଶକ୍ତିର ଜୟଯାତ୍ରା । କିଛି ସମୟ ପୂର୍ବରୁ, ମୋତେ ଚେନାବ ସେତୁ ଏବଂ ଅଞ୍ଜି ସେତୁ ଉଦଘାଟନ କରିବାର ସୁଯୋଗ ମିଳିଛି । ଆଜି ହିଁ ଜମ୍ମୁ ଏବଂ କଶ୍ମୀରକୁ ଦୁଇଟି ନୂତନ ବନ୍ଦେ ଭାରତ ଟ୍ରେନ ମିଳିଛି । ଏଠାରେ ଜମ୍ମୁରେ ଏକ ନୂତନ ମେଡିକାଲ କଲେଜର ଶିଳାନ୍ୟାସ କରାଯାଇଛି । ୪୬ ହଜାର କୋଟି ଟଙ୍କାର ପ୍ରକଳ୍ପ ଜମ୍ମୁ ଏବଂ କଶ୍ମୀରର ବିକାଶକୁ ନୂତନ ଦିଗ ଦେବ । ବିକାଶର ନୂତନ ପର୍ଯ୍ୟାୟ ପାଇଁ ମୁଁ ଆପଣମାନଙ୍କୁ ସମସ୍ତଙ୍କୁ ଅଭିନନ୍ଦନ ଜଣାଉଛି ।

ବନ୍ଧୁଗଣ,

ଜମ୍ମୁ-କଶ୍ମୀରର ଅନେକ ପିଢ଼ି ରେଳ ସଂଯୋଗୀକରଣର ସ୍ୱପ୍ନ ଦେଖି ଦେଖି ଚାଲି ଯାଇଛନ୍ତି । ଗତକାଲି ମୁଁ ମୁଖ୍ୟମନ୍ତ୍ରୀ ଓମର ଅବଦୁଲ୍ଲାଙ୍କ ଏକ ବକ୍ତବ୍ୟ ଦେଖୁଥିଲି ଏବଂ ମୁଁ ତାଙ୍କ ଭାଷଣରେ ଏହା ମଧ୍ୟ ଉଲ୍ଲେଖ ଥିବା ଅନୁଭବ କରିଥିଲି ଯେ, ସେ ଏହା ମଧ୍ୟ କହିଥିଲେ, ସେ ସପ୍ତମ-ଅଷ୍ଟମ ଶ୍ରେଣୀରେ ପାଠପଢ଼ୁଥିବା ସମୟରୁ ଏହି ପ୍ରକଳ୍ପ ଶେଷ ହେବାକୁ ଅପେକ୍ଷା କରିଥିଲେ । ଆଜି ଜମ୍ମୁ-କଶ୍ମୀରର ଲକ୍ଷ ଲକ୍ଷ ଲୋକଙ୍କ ସ୍ୱପ୍ନ ପୂରଣ ହୋଇଛି । ଏହା ମଧ୍ୟ ସତ୍ୟ ଯେ ସମସ୍ତ ହେବାକୁ ଥିବା ଭଲ କାମ ମୋ ପାଇଁ ବାକି ଅଛି ।

ବନ୍ଧୁଗଣ,

ଆମ ସରକାରଙ୍କ ସୌଭାଗ୍ୟ ଯେ ଆମ କାର୍ଯ୍ୟକାଳରେ ଏହି ପ୍ରକଳ୍ପ ତ୍ୱରାନ୍ୱିତ ହୋଇପାରିଲା ଏବଂ ଆମେ ଏହାକୁ ଶେଷ କରିବାର ସୌଭାଗ୍ୟ ଲାଭ କଲୁ । ଏହା ମଧ୍ୟରେ, କୋଭିଡ୍ ସମୟ ଯୋଗୁଁ ଅନେକ ଅସୁବିଧା ଉପୁଜିଥିଲା, କିନ୍ତୁ ଆମେ ଅବିଚଳିତ ରହିଲୁ ।

ବନ୍ଧୁଗଣ,

ଯାତାୟତରେ ଅସୁବିଧା, ପାଗ ସମସ୍ୟା, ପାହାଡ଼ରୁ ପଥର ନିରନ୍ତର ଖସିବା, ଆଦି ସମସ୍ୟା ଯୋଗୁଁ ଏହି ପ୍ରକଳ୍ପକୁ ସମାପ୍ତ କରିବା କଷ୍ଟକର ଥିଲା, ଏହା ଚ୍ୟାଲେଞ୍ଜିଂ ଥିଲା । କିନ୍ତୁ ଆମ ସରକାର ସବୁ ସମସ୍ୟାକୁ ସମାଧାନ କରିବାର ପଥ ବାଛିଛନ୍ତି । ଆଜି, ଜମ୍ମୁ ଏବଂ କଶ୍ମୀରରେ ନିର୍ମାଣ ହେଉଥିବା ଅନେକ ନିତିଦିନିଆ ଭିତ୍ତିଭୂମି ପ୍ରକଳ୍ପ ଏହାର ଉଦାହରଣ । ସୋନମାର୍ଗ ସୁଡ଼ଙ୍ଗ କିଛି ମାସ ପୂର୍ବରୁ ଆରମ୍ଭ ହୋଇଛି । କିଛି ସମୟ ପୂର୍ବରୁ, ମୁଁ ଚେନାବ ଏବଂ ଅଞ୍ଜି ସେତୁ ଦେଇ ଆପଣଙ୍କ ପାଖକୁ ଆସିଛି । ଏହି ସେତୁ ଉପରେ ଚାଲିବା ସମୟରେ, ମୁଁ ଭାରତର ଦୃଢ଼ ଉଦ୍ଦେଶ୍ୟ, ଆମର ଇଞ୍ଜିନିୟର, ଆମର ଶ୍ରମିକଙ୍କ ଦକ୍ଷତା ଏବଂ ସାହସ ଅନୁଭବ କରିଛି । ଚେନାବ ସେତୁ ହେଉଛି ବିଶ୍ୱର ସର୍ବୋଚ୍ଚ ରେଳ ଆର୍ଚ ବ୍ରିଜ୍ । ଲୋକମାନେ ଆଇଫେଲ୍ ଟାୱାର ଦେଖିବାକୁ ପ୍ୟାରିସ୍, ଫ୍ରାନ୍ସ ଯାଆନ୍ତି । ଏହି ସେତୁ ଆଇଫେଲ୍ ଟାୱାର ଅପେକ୍ଷା ବହୁତ ଉଚ୍ଚ । ଏବେ ଲୋକମାନେ ଚେନାବ ସେତୁ ଦେଇ କେବଳ କଶ୍ମୀର ଦେଖିବାକୁ ଯିବେ ନାହିଁ, ବରଂ ଏହି ସେତୁ ସ୍ୱୟଂ ଏକ ଆକର୍ଷଣୀୟ ପର୍ଯ୍ୟଟନସ୍ଥଳୀ ମଧ୍ୟ ପାଲଟିଯିବ । ସମସ୍ତେ ସେଲ୍ଫି ପଏଣ୍ଟକୁ ଯିବେ ଏବଂ ସେଲ୍ଫି ନେବେ। ଆମର ଅଞ୍ଜି ସେତୁ ମଧ୍ୟ ବୈଷୟିକ ଜ୍ଞାନ କୌଶଳର ଏକ ମହାନ ନିଦର୍ଶନ । ଏହା ଭାରତର ପ୍ରଥମ କେବୁଲ-ସମର୍ଥିତ ରେଳ ସେତୁ । ଏହି ଦୁଇଟି ସେତୁ କେବଳ ଇଟା, ସିମେଣ୍ଟ, ଇସ୍ପାତ ଏବଂ ଲୁହାର ଗଠନ ନୁହେଁ, ଏଗୁଡ଼ିକ ପୀର ପଞ୍ଜାର ଦୁର୍ଗମ ପାହାଡ଼ ଉପରେ ଠିଆ ହୋଇଥିବା ଭାରତର ଶକ୍ତିର ଏକ ଜୀବନ୍ତ ପ୍ରତୀକ । ଏହା ଭାରତର ଉଜ୍ଜ୍ୱଳ ଭବିଷ୍ୟତର ନିଦର୍ଶନ । ଏହା ଦର୍ଶାଉଛି ଯେ ଏକ ବିକଶିତ ଭାରତର ସ୍ୱପ୍ନ ଯେତେ ବଡ଼, ଆମର ସାହସ ଏବଂ ଆମର କ୍ଷମତା ସେତିକି ଦୃଢ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଭଲ ଉଦ୍ଦେଶ୍ୟ ଏବଂ ବ୍ୟାପକ ପ୍ରୟାସ ।

ବନ୍ଧୁଗଣ,

ଚେନାବ ସେତୁ ହେଉ କିମ୍ବା ଅଞ୍ଜି ସେତୁ, ଏଗୁଡ଼ିକ ଜମ୍ମୁ ଏବଂ କାଶ୍ମୀର ଉଭୟଙ୍କ ପାଇଁ ସମୃଦ୍ଧିର ଏକ ମାଧ୍ୟମ ହେବ । ଏହା କେବଳ ପର୍ଯ୍ୟଟନ ବୃଦ୍ଧି କରିବ ନାହିଁ, ବରଂ ଅର୍ଥନୀତିର ଅନ୍ୟାନ୍ୟ କ୍ଷେତ୍ରକୁ ମଧ୍ୟ ସୁଯୋଗ ପ୍ରଦାନ କରିବ । ଜମ୍ମୁ ଏବଂ କଶ୍ମୀର ମଧ୍ୟରେ ରେଳ ସଂଯୋଗ ଉଭୟ ଅଞ୍ଚଳର ବ୍ୟବସାୟୀଙ୍କ ପାଇଁ ନୂତନ ସୁଯୋଗ ସୃଷ୍ଟି କରିବ । ଏହା ଏଠାକାର ଶିଳ୍ପକୁ ପ୍ରୋତ୍ସାହନ ଦେବ, ଏବେ କାଶ୍ମୀରରୁ ଆପଲ୍ କମ୍ ମୂଲ୍ୟରେ ଦେଶର ବଡ଼ ବଜାରରେ ପହଞ୍ଚିପାରିବ ଏବଂ ନିର୍ଦ୍ଧାରିତ ସମୟ ମଧ୍ୟରେ ପହଞ୍ଚିପାରିବ । ଶୁଖିଲା ଫଳ ହେଉ କିମ୍ବା ପଶ୍ମିନା ଶାଲ୍, ଏଠାକାର ହସ୍ତଶିଳ୍ପ ଏବେ ଦେଶର ଯେକୌଣସି ଭାଗରେ ସହଜରେ ପହଞ୍ଚିପାରିବ । ଏହା ଜମ୍ମୁ ଏବଂ କଶ୍ମୀରର ଲୋକଙ୍କ ପାଇଁ ଦେଶର ଅନ୍ୟ ଭାଗକୁ ଯାତ୍ରା କରିବା ମଧ୍ୟ ବହୁତ ସହଜ କରିବ ।

ବନ୍ଧୁଗଣ,

ମୁଁ ସଂଗଲଦାନର ଜଣେ ଛାତ୍ରଙ୍କ ଦ୍ୱାରା ଖବରକାଗଜରେ ଦିଆଯାଇଥିବା ଏକ ମନ୍ତବ୍ୟ ପଢ଼ୁଥିଲି । ସେହି ଛାତ୍ର ଜଣକ କହିଥିଲେ ଯେ ତାଙ୍କ ଗାଁର ଯେଉଁମାନେ ଗାଁ ବାହାରକୁ ଯାଇଥିଲେ ସେମାନେ କେବଳ ଏପର୍ଯ୍ୟନ୍ତ ଟ୍ରେନ୍ ଦେଖିଛନ୍ତି । ଗାଁର ଅଧିକାଂଶ ଲୋକ କେବଳ ଟ୍ରେନ୍‌ର ଭିଡିଓ ଦେଖିଥିଲେ । ସେମାନେ ଏପର୍ଯ୍ୟନ୍ତ ବିଶ୍ୱାସ କରିପାରୁ ନାହାଁନ୍ତି ଯେ ପ୍ରକୃତ ଟ୍ରେନ୍‌ ସେମାନଙ୍କ ଆଖି ସାମ୍ନାରେ ଚାଲିବ । ମୁଁ ଏହା ମଧ୍ୟ ପଢ଼ିଛି ଯେ ଅନେକ ଲୋକ ଟ୍ରେନ୍‌ର ଆଗମନ ଏବଂ ପ୍ରସ୍ଥାନ ସମୟ ମନେ ରଖିଛନ୍ତି । ଆଉ ଜଣେ ଝିଅ ବହୁତ ଭଲ କଥା କହିଥିଲା, ସେ କହିଥିଲା - ଏବେ ପାଗ ନିଷ୍ପତ୍ତି ନେବ ନାହିଁ ଯେ ରାସ୍ତା ଖୋଲିବ କି ବନ୍ଦ ରହିବ, ଏବେ ଏହି ନୂତନ ଟ୍ରେନ୍‌ ସେବା ପ୍ରତ୍ୟେକ ଋତୁରେ ଲୋକଙ୍କୁ ସାହାଯ୍ୟ କରିବ।

ବନ୍ଧୁଗଣ,

ଜମ୍ମୁ କଶ୍ମୀର ହେଉଛି ଭାରତ ମାତାର ମୁକୁଟ । ଏହି ମୁକୁଟ ସୁନ୍ଦର ମଣିରେ ଖଚିତ । ଏହି ବିବିଧ ରତ୍ନ ହେଉଛି ଜମ୍ମୁ କଶ୍ମୀରର ଶକ୍ତି । ଏଠାକାର ପ୍ରାଚୀନ ସଂସ୍କୃତି, ଏଠାକାର ପରମ୍ପରା, ଏଠାକାର ଆଧ୍ୟାତ୍ମିକ ଚେତନା, ପ୍ରକୃତିର ସୌନ୍ଦର୍ଯ୍ୟ, ଏଠାକାର ଔଷଧି ଜଗତ, ଫଳ ଏବଂ ଫୁଲର ସମ୍ଭାର, ଏଠାକାର ଯୁବପିଢ଼ି, ଆପଣମାନଙ୍କ ମଧ୍ୟରେ ଥିବା ପ୍ରତିଭା, ଏ ସବୁ ମୁକୁଟରେ ମଣି ପରି ଝଲସୁଛି ।

ବନ୍ଧୁଗଣ,

ଆପଣମାନେ ଭଲ ଭାବରେ ଜାଣନ୍ତି, ମୁଁ ଦଶନ୍ଧି ଧରି ଜମ୍ମୁ ଏବଂ କଶ୍ମୀର ଗସ୍ତ କରିଆସୁଛି, ମୋତେ ଆଭ୍ୟନ୍ତରୀଣ ଅଞ୍ଚଳ ପରିଦର୍ଶନ କରିବା ଏବଂ ରହିବାର ସୁଯୋଗ ମିଳିଛି । ମୁଁ ଏହି ସମ୍ଭାବନାକୁ ନିରନ୍ତର ଦେଖିଛି ଓ ଅନୁଭବ କରିଛି ଏବଂ ସେଥିପାଇଁ ମୁଁ ପୂର୍ଣ୍ଣ ସମର୍ପଣ ସହିତ ଜମ୍ମୁ ଏବଂ କଶ୍ମୀରର ବିକାଶରେ ନିୟୋଜିତ ଅଛି ।

ବନ୍ଧୁଗଣ,

ଜମ୍ମୁ ଏବଂ କଶ୍ମୀର ଭାରତର ଶିକ୍ଷା ଏବଂ ସଂସ୍କୃତିର ଗର୍ବ ପାଲଟିଛି । ଆଜି, ଆମର ଜମ୍ମୁ ଏବଂ କଶ୍ମୀର ବିଶ୍ୱର ସବୁଠାରୁ ବଡ଼ ଜ୍ଞାନ କେନ୍ଦ୍ର ମଧ୍ୟରୁ ଗୋଟିଏ ହେବାକୁ ଯାଉଛି, ତେଣୁ ଭବିଷ୍ୟତରେ ଏଥିରେ ଜମ୍ମୁ ଏବଂ କଶ୍ମୀରର ଭାଗିଦାରୀତା ମଧ୍ୟ ବୃଦ୍ଧି ପାଇବାକୁ ଯାଉଛି । ଏଠାରେ IIT, IIM, AIIMS ଏବଂ NIT ଭଳି ପ୍ରତିଷ୍ଠାନ ରହିଛି । ଜମ୍ମୁ ଏବଂ ଶ୍ରୀନଗରରେ କେନ୍ଦ୍ରୀୟ ବିଶ୍ୱବିଦ୍ୟାଳୟ ଅଛି । ଜମ୍ମୁ ଏବଂ କଶ୍ମୀରରେ ଗବେଷଣା ଇକୋସିଷ୍ଟମ ମଧ୍ୟ ବିସ୍ତାର ହେଉଛି ।

ବନ୍ଧୁଗଣ,

ଶିକ୍ଷା ସହିତ, ଏଠାରେ ଚିକିତ୍ସା ପାଇଁ ମଧ୍ୟ ଅଭୂତପୂର୍ବ କାର୍ଯ୍ୟ କରାଯାଉଛି । ଗତ କିଛି ବର୍ଷ ମଧ୍ୟରେ ଦୁଇଟି ରାଜ୍ୟସ୍ତରୀୟ କର୍କଟ ପ୍ରତିଷ୍ଠାନ ପ୍ରତିଷ୍ଠିତ ହୋଇଛି । ଗତ ପାଞ୍ଚ ବର୍ଷ ମଧ୍ୟରେ ଏଠାରେ ସାତଟି ନୂତନ ମେଡିକାଲ କଲେଜ ଆରମ୍ଭ ହୋଇଛି । ଆପଣମାନେ ଏହା ମଧ୍ୟ ଜାଣନ୍ତି ଯେ ଯେତେବେଳେ ଏକ ମେଡିକାଲ କଲେଜ ଖୋଲିଥାଏ, ଏହା କେବଳ ରୋଗୀମାନଙ୍କୁ ନୁହେଁ ବରଂ ସେହି ଅଞ୍ଚଳର ଯୁବକମାନଙ୍କୁ ମଧ୍ୟ ସବୁଠାରୁ ଅଧିକ ଲାଭ ଦେଇଥାଏ । ବର୍ତ୍ତମାନ ଜମ୍ମୁ ଏବଂ କଶ୍ମୀରରେ MBBS ସିଟ୍ ସଂଖ୍ୟା ୫୦୦ ରୁ ବୃଦ୍ଧି ପାଇ ୧୩୦୦ ହୋଇଛି । ମୁଁ ଖୁସି ଅନୁଭବ କରୁଛି ଯେ ଏବେ ରିଆସି ଜିଲ୍ଲାରେ ମଧ୍ୟ ଏକ ନୂତନ ମେଡିକାଲ କଲେଜ ଖୋଲିବାକୁ ଯାଉଛି । ଶ୍ରୀ ମାତା ବୈଷ୍ଣୋ ଦେବୀ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ଏକ୍ସଲେନ୍ସ, ଏହା ଏକ ଆଧୁନିକ ହସ୍ପିଟାଲ ହେବା ସହିତ ଆମ ଦାନପୂଣ୍ୟର ଯେଉଁ ପରମ୍ପରା ରହିଛି ତା’ର ସଂସ୍କୃତିର ଏକ ଉଦାହରଣ ମଧ୍ୟ । ଏହି ମେଡିକାଲ କଲେଜ ନିର୍ମାଣରେ ଖର୍ଚ୍ଚ ହୋଇଥିବା ରାଶି ଭାରତର ପ୍ରତ୍ୟେକ କୋଣ-ଅନୁକୋଣରୁ ମାତା ବୈଷ୍ଣୋ ଦେବୀଙ୍କୁ ଦର୍ଶନ ପାଇଁ ଆସୁଥିବା ଲୋକଙ୍କ ଦ୍ୱାରା ଦିଆଯାଇଥିବା ଦାନରୁ କରାଯାଇଛି । ମୁଁ ଶ୍ରୀ ମାତା ବୈଷ୍ଣୋ ଦେବୀ ମନ୍ଦିର ବୋର୍ଡ ଏବଂ ଏହାର ଅଧ୍ୟକ୍ଷ ମନୋଜଙ୍କୁ ଏହି ପବିତ୍ର କାର୍ଯ୍ୟ ପାଇଁ ଶୁଭକାମନା ଜଣାଉଛି । ଏହି ହସ୍ପିଟାଲର କ୍ଷମତା ମଧ୍ୟ ୩୦୦ ଶଯ୍ୟାରୁ ୫୦୦ ଶଯ୍ୟାକୁ ବୃଦ୍ଧି କରାଯାଉଛି । ଏହା କଟରାରେ ମାତା ବୈଷ୍ଣୋ ଦେବୀଙ୍କ ଦର୍ଶନ ପାଇଁ ଆସୁଥିବା ଲୋକଙ୍କ ପାଇଁ ବହୁତ ସୁବିଧାଜନକ ହେବ ।

ବନ୍ଧୁଗଣ,

କେନ୍ଦ୍ରରେ ବିଜେପି-ଏନଡିଏ ସରକାର ୧୧ ବର୍ଷ ପୂରଣ କରୁଛି । ଏହି ୧୧ ବର୍ଷ ଗରିବଙ୍କ କଲ୍ୟାଣ ପାଇଁ ଉତ୍ସର୍ଗୀକୃତ ହୋଇଛି । ପ୍ରଧାନମନ୍ତ୍ରୀ ଆବାସ ଯୋଜନା ଦ୍ୱାରା ୪ କୋଟି ଗରିବ ଲୋକଙ୍କର ପକ୍କା ଘର ପାଇବାର ସ୍ୱପ୍ନ ପୂରଣ ହୋଇଛି । ଉଜ୍ଜ୍ୱଳା ଯୋଜନା ୧୦ କୋଟି ରୋଷେଇ ଘରରୁ ଧୂଆଁକୁ ଶେଷ କରିଛି, ଆମର ଭଉଣୀ ଏବଂ ଝିଅମାନଙ୍କୁ ସୁରକ୍ଷା ଦିଆଯାଇଛି । ଆୟୁଷ୍ମାନ ଭାରତ ଯୋଜନା ୫୦ କୋଟି ଗରିବ ଲୋକଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ଯୋଗାଇ ଦେଇଛି । ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା ପ୍ରତ୍ୟେକ ଥାଳିରେ ପୂର୍ଣ୍ଣ ଭୋଜନ ସୁନିଶ୍ଚିତ କରିଛି । ଜନ ଧନ ଯୋଜନା ପ୍ରଥମ ଥର ପାଇଁ ୫୦ କୋଟିରୁ ଅଧିକ ଗରିବ ଲୋକଙ୍କ ପାଇଁ ବ୍ୟାଙ୍କର ଦ୍ୱାର ଉନ୍ମୁକ୍ତ କରିଛି । ସୌଭାଗ୍ୟ ଯୋଜନା ଅନ୍ଧାରରେ ରହୁଥିବା ୨.୫ କୋଟି ପରିବାରକୁ ବିଦ୍ୟୁତ୍ ଯୋଗାଇ ଦେଇଛି । ସ୍ୱଚ୍ଛ ଭାରତ ମିଶନ ଅଧୀନରେ ନିର୍ମିତ ୧୨ କୋଟି ଶୌଚାଳୟ ଲୋକମାନଙ୍କୁ ଖୋଲା ମଳତ୍ୟାଗର ବାଧ୍ୟବାଧକତାରୁ ମୁକ୍ତ କରିଛି । ଜଳ ଜୀବନ ମିଶନ ୧୨ କୋଟି ନୂତନ ଘରକୁ ନଳକୂପ ପାଣି ଯୋଗାଇବା ଆରମ୍ଭ କରିଛି, ଯାହା ମହିଳାଙ୍କ ଜୀବନକୁ ସହଜ କରିଛି। ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ୧୦ କୋଟି କ୍ଷୁଦ୍ର ଚାଷୀଙ୍କୁ ସିଧାସଳଖ ଆର୍ଥିକ ସହାୟତା ପ୍ରଦାନ କରିଛି ।

ବନ୍ଧୁଗଣ,

ସରକାରଙ୍କ ଏପରି ଅନେକ ପ୍ରୟାସ ଯୋଗୁଁ, ଗତ ୧୧ ବର୍ଷ ମଧ୍ୟରେ, ୨୫ କୋଟିରୁ ଅଧିକ ଗରିବ ଲୋକ, ଆମର ନିଜ ଗରିବ ଭାଇ ଭଉଣୀମାନେ, ଦାରିଦ୍ର୍ୟ ବିରୁଦ୍ଧରେ ଲଢ଼ିଛନ୍ତି ଏବଂ ୨୫ କୋଟି ଗରିବ ଲୋକ ଦାରିଦ୍ର୍ୟକୁ ପରାସ୍ତ କରିଛନ୍ତି, ଜିତିଛନ୍ତି ଏବଂ ଦାରିଦ୍ର୍ୟରୁ ବାହାରି ଆସିଛନ୍ତି । ଏବେ ସେମାନେ ନୂତନ ମଧ୍ୟବିତ୍ତ ବର୍ଗର ଅଂଶ ହୋଇଯାଇଛନ୍ତି । ଯେଉଁମାନେ ନିଜକୁ ସାମାଜିକ ବ୍ୟବସ୍ଥାର ବିଶେଷଜ୍ଞ ବୋଲି ମନେକରନ୍ତି, ନିଜକୁ ବଡ଼ ବିଶେଷଜ୍ଞ ବୋଲି ଭାବନ୍ତି, ଯେଉଁମାନେ ଅତୀତ ଏବଂ ଭବିଷ୍ୟତର ରାଜନୀତିରେ ବୁଡ଼ି ରହିଛନ୍ତି, ଯେଉଁମାନେ ଦଳିତଙ୍କ ନାମରେ ରାଜନୈତିକ ଲାଭ ଉଠାଇ ଆସୁଛନ୍ତି, ସେମାନେ କେବଳ ମୁଁ ଯେଉଁ ଯୋଜନାଗୁଡ଼ିକର କଥା କହିଲି ତାହା ଉପରେ ନଜର ପକାନ୍ତୁ । ଏହି ସୁବିଧା କେଉଁମାନେ ପାଇଛନ୍ତି, ସ୍ୱାଧୀନତା ପରେ ୭-୭ ଦଶନ୍ଧି ପର୍ଯ୍ୟନ୍ତ ଏହି ମୌଳିକ ସୁବିଧାରୁ ବଞ୍ଚିତ ଥିବା ଲୋକମାନେ କିଏ । ଏମାନେ ମୋର ଦଳିତ ଭାଇ ଭଉଣୀ, ଏମାନେ ମୋର ଆଦିବାସୀ ଭାଇ ଭଉଣୀ, ଏମାନେ ମୋର ପଛୁଆବର୍ଗ ଭାଇ ଭଉଣୀ, ଏମାନେ ପାହାଡ଼ରେ ବାସ କରନ୍ତି, ଏମାନେ ଜଙ୍ଗଲରେ ବାସ କରନ୍ତି, ଏମାନେ ବସ୍ତିରେ ନିଜର ସମଗ୍ର ଜୀବନ ବିତାଇ ଦିଅନ୍ତି, ଏମାନେ ସେହି ପରିବାର ଯାହାଙ୍କ ପାଇଁ ମୋଦର ତାଙ୍କର ୧୧ ବର୍ଷ ବିତାଇଛନ୍ତି । କେନ୍ଦ୍ର ସରକାର ଗରିବ ଏବଂ ନୂତନ ମଧ୍ୟବିତ୍ତ ବର୍ଗକୁ ସର୍ବାଧିକ ଶକ୍ତି ଦେବାକୁ ଚେଷ୍ଟା କରୁଛନ୍ତି । ୱାନ୍ ରାଙ୍କ୍ ୱାନ୍ ପେନସନ୍ ହେଉ, ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଦରମାକୁ ଟିକସମୁକ୍ତ କରିବା, ଘର କିଣିବା ପାଇଁ ଆର୍ଥିକ ସହାୟତା ପ୍ରଦାନ କରିବା, ଶସ୍ତା ବିମାନ ଯାତ୍ରାରେ ସାହାଯ୍ୟ କରିବା ଆଦି ପ୍ରତ୍ୟେକ କ୍ଷେତ୍ରରେ ସରକାର ଗରିବ ଏବଂ ମଧ୍ୟବିତ୍ତ ବର୍ଗଙ୍କ ସହିତ କାନ୍ଧକୁ କାନ୍ଧ ମିଶାଇ ଚାଲିଛନ୍ତି ।

ବନ୍ଧୁଗଣ,

ଗରିବଙ୍କୁ ଦାରିଦ୍ର୍ୟରୁ ମୁକ୍ତ କରିବାରେ ସାହାଯ୍ୟ କରିବା ପାଇଁ, ମଧ୍ୟବିତ୍ତ ବର୍ଗର ଶକ୍ତି ବୃଦ୍ଧି କରିବା ପାଇଁ ଏବଂ ଏଥିପାଇଁ ମଧ୍ୟ ଯେଉଁମାନେ ସଚ୍ଚୋଟ ଭାବରେ ଜୀବନଯାପନ କରନ୍ତି ଏବଂ ସମୟ ସମୟରେ ଦେଶ ପାଇଁ ଟିକସ ଦିଅନ୍ତି, ସ୍ୱାଧୀନତା ପରେ ପ୍ରଥମ ଥର ପାଇଁ ଏତେ କାମ କରାଯାଇଛି, ଯାହା ଆମେ କରି ଦେଖାଇଛୁ ।

ବନ୍ଧୁଗଣ,

ଆମେ ଆମର ଯୁବପିଢ଼ିଙ୍କ ପାଇଁ ନିରନ୍ତର ନୂତନ ନିଯୁକ୍ତି ସୁଯୋଗ ବୃଦ୍ଧି କରୁଛୁ । ଏହାର ଏକ ଗୁରୁତ୍ୱପୂର୍ଣ୍ଣ ମାଧ୍ୟମ ହେଉଛି ପର୍ଯ୍ୟଟନ । ପର୍ଯ୍ୟଟନ ନିଯୁକ୍ତି ପ୍ରଦାନ କରେ, ପର୍ଯ୍ୟଟନ ଲୋକଙ୍କୁ ସଂଯୋଗ କରେ । କିନ୍ତୁ ଦୁର୍ଭାଗ୍ୟବଶତଃ, ଆମର ପଡ଼ୋଶୀ ଦେଶ ମାନବତା ବିରୋଧୀ, ସମନ୍ୱୟ ବିରୋଧୀ, ପର୍ଯ୍ୟଟନ ବିରୋଧୀ, କେବଳ ଏହା ନୁହେଁ, ଏହା ଗରିବଙ୍କ ଜୀବିକାର ବିରୋଧୀ ମଧ୍ୟ । ୨୨ ଏପ୍ରିଲରେ ପହଲଗାମରେ ଯାହା ଘଟିଥିଲା ​​ତାହା ଏହାର ଏକ ଉଦାହରଣ । ପାକିସ୍ତାନ ପହଲଗାମରେ ମାନବତା ଏବଂ କାଶ୍ମୀରୀ ଉଭୟ ଉପରେ ଆକ୍ରମଣ କରିଥିଲା । ଏହାର ଉଦ୍ଦେଶ୍ୟ ଥିଲା ଭାରତରେ ଦଙ୍ଗା ସୃଷ୍ଟି କରିବା । ଏହାର ଉଦ୍ଦେଶ୍ୟ ଥିଲା କଶ୍ମୀରର ପରିଶ୍ରମୀ ଲୋକଙ୍କ ରୋଜଗାର ବନ୍ଦ କରିବା । ସେଥିପାଇଁ ପାକିସ୍ତାନ ପର୍ଯ୍ୟଟକମାନଙ୍କ ଉପରେ ଆକ୍ରମଣ କରିଥିଲା । ଗତ ୪-୫ ବର୍ଷ ମଧ୍ୟରେ ନିରନ୍ତର ବୃଦ୍ଧି ପାଉଥିବା ପର୍ଯ୍ୟଟନ, ପ୍ରତିବର୍ଷ ଏଠାକୁ ରେକର୍ଡ ସଂଖ୍ୟକ ପର୍ଯ୍ୟଟକ ଆସୁଥିଲେ । ପାକିସ୍ତାନ ସେହି ପର୍ଯ୍ୟଟନକୁ ଟାର୍ଗେଟ କରିଥିଲା ​​ଯାହା ଜମ୍ମୁ-କଶ୍ମୀରର ଗରିବମାନଙ୍କୁ ସେମାନଙ୍କ ଘର ଚଳାଇବାରେ ସହଯୋଗ କରିଥାଏ । କିଛି ଘୋଡା ଆରୋହୀ, କିଛି କୁଲି, କିଛି ଗାଇଡ୍, କିଛି ଅତିଥି ଗୃହ ମାଲିକ, କିଛି ଦୋକାନ-ଢାବା ମାଲିକ, ଏମିତି କିଛିଙ୍କୁ ଧ୍ୱଂସ କରିବା ପାକିସ୍ତାନର ଷଡ଼ଯନ୍ତ୍ର ଥିଲା । ଆତଙ୍କବାଦୀଙ୍କୁ ଚ୍ୟାଲେଞ୍ଜ କରୁଥିବା ଯୁବକ ଆଦିଲ, ସେ ମଧ୍ୟ ସେଠାକୁ ଶ୍ରମିକ ଭାବରେ କାମ କରିବାକୁ ଯାଇଥିଲା, ସେ କାମ କରୁଥିଲା ଯେପରି ସେ ନିଜ ପରିବାରର ଯତ୍ନ ନେଇପାରିବ । ଆତଙ୍କବାଦୀମାନେ ସେହି ଆଦିଲକୁ ମଧ୍ୟ ହତ୍ୟା କରିଥିଲେ ।

ବନ୍ଧୁଗଣ,

ପାକିସ୍ତାନର ଏହି ଷଡ଼ଯନ୍ତ୍ର ବିରୋଧରେ ଜମ୍ମୁ-କଶ୍ମୀରର ଲୋକମାନେ ଯେପରି ଠିଆ ହୋଇଛନ୍ତି, ଜମ୍ମୁ-କଶ୍ମୀରର ଲୋକମାନେ ଏଥର ଯେଉଁ ଶକ୍ତି ଦେଖାଇଛନ୍ତି, ତାହା କେବଳ ପାକିସ୍ତାନକୁ ନୁହେଁ ବରଂ ସମଗ୍ର ବିଶ୍ୱର ଆତଙ୍କବାଦୀ ମାନସିକତାକୁ ଏକ କଡ଼ା ଜବାବ ଦେଇଛି । ଜମ୍ମୁ-କଶ୍ମୀରର ଯୁବକମାନେ ଏବେ ଆତଙ୍କବାଦକୁ ଉଚିତ ଜବାବ ଦେବାକୁ ମନ ସ୍ଥିର କରିଛନ୍ତି । ଏହି ଆତଙ୍କବାଦ ଉପତ୍ୟକାର ସ୍କୁଲଗୁଡ଼ିକୁ ଜାଳି ଦେଇଥିଲା, କେବଳ ସ୍କୁଲ କିମ୍ବା କୋଠା ନୁହେଁ, ଏହା ଦୁଇ ପିଢ଼ିର ଭବିଷ୍ୟତକୁ ଜାଳି ଦେଇଥିଲା । ହସ୍ପିଟାଲଗୁଡ଼ିକ ନଷ୍ଟ ହୋଇଯାଇଥିଲା । ଏହା ଅନେକ ପିଢ଼ିକୁ ନଷ୍ଟ କରିଦେଇଥିଲା । ଏଠାକାର ଲୋକମାନେ ନିଜ ପସନ୍ଦର ପ୍ରତିନିଧି ବାଛିପାରିବେ, ଏଠାରେ ନିର୍ବାଚନ ହୋଇପାରିବ, ଏହା ମଧ୍ୟ ଆତଙ୍କବାଦ ଯୋଗୁଁ ଏକ ବଡ଼ ଚ୍ୟାଲେଞ୍ଜ ହୋଇଯାଇଥିଲା ।

ବନ୍ଧୁଗଣ,

ବର୍ଷ ବର୍ଷ ଧରି ଆତଙ୍କବାଦ ସହିବା ପରେ, ଜମ୍ମୁ-କଶ୍ମୀର ଏତେ ଧ୍ୱଂସ ଦେଖିଥିଲା ​​ଯେ ଜମ୍ମୁ-କଶ୍ମୀରର ଲୋକମାନେ ସ୍ୱପ୍ନ ଦେଖିବା ବନ୍ଦ କରିଦେଇଥିଲେ, ଆତଙ୍କବାଦକୁ ନିଜର ଭାଗ୍ୟ ଭାବରେ ଗ୍ରହଣ କରିନେଇଥିଲେ । ଜମ୍ମୁ-କଶ୍ମୀରକୁ ଏହି ପରିସ୍ଥିତିରୁ ବାହାର କରିବା ଆବଶ୍ୟକ ଥିଲା, ଏବଂ ଆମେ ଏହା କରିପାରିଛୁ । ଆଜି ଜମ୍ମୁ-କଶ୍ମୀରର ଯୁବକମାନେ ନୂତନ ସ୍ୱପ୍ନ ଦେଖୁଛନ୍ତି ଏବଂ ସେଗୁଡ଼ିକୁ ପୂରଣ ମଧ୍ୟ କରୁଛନ୍ତି । ଏବେ କଶ୍ମୀରର ଯୁବକମାନେ ବଜାର, ସପିଂ ମଲ୍, ସିନେମା ହଲ୍ ଗୁଞ୍ଜରଣ ଦେଖି ଖୁସି ହେଉଛନ୍ତି। ଏଠାକାର ଲୋକମାନେ ଜମ୍ମୁ-କଶ୍ମୀରକୁ ପୁଣି ଥରେ ଫିଲ୍ମ ସୁଟିଂର ମୁଖ୍ୟ କେନ୍ଦ୍ର ହେବାକୁ ଦେଖିବାକୁ ଚାହାନ୍ତି, ଏହି ଅଞ୍ଚଳକୁ କ୍ରୀଡାର କେନ୍ଦ୍ର ହେବାକୁ ଚାହାନ୍ତି । ଆମେ ମାତା ଖୀର ଭବାନୀଙ୍କ ମେଳାରେ ମଧ୍ୟ ସମାନ ଭାବନା ଦେଖିଛୁ । ହଜାର ହଜାର ଲୋକ ମାତାଙ୍କ ମନ୍ଦିରରେ ପହଞ୍ଚିବା ଦ୍ୱାରା ନୂତନ ଜମ୍ମୁ-କଶ୍ମୀରର ଚିତ୍ର ଦୃଶ୍ୟମାନ ହେଉଛି । ଏବେ ଅମରନାଥ ଯାତ୍ରା ମଧ୍ୟ 3 ତାରିଖରୁ ଆରମ୍ଭ ହେବାକୁ ଯାଉଛି । ଆମେ ଚାରିଆଡ଼େ ଇଦର ଉତ୍ସାହ ମଧ୍ୟ ଦେଖୁଛୁ । ପହଲଗାମ ଆକ୍ରମଣ ଦ୍ୱାରା ଜମ୍ମୁ-କଶ୍ମୀରରେ ସୃଷ୍ଟି ହୋଇଥିବା ବିକାଶର ପରିବେଶ ଦୋହଲିଯିବ ନାହିଁ । ଜମ୍ମୁ-କଶ୍ମୀରର ସମସ୍ତ ଲୋକଙ୍କୁ ଏବଂ ଆପଣ ସମସ୍ତଙ୍କୁ ନରେନ୍ଦ୍ର ମୋଦୀଙ୍କ ପ୍ରତିଶ୍ରୁତି ହେଉଛି ଯେ ସେ ଏଠାରେ ବିକାଶକୁ ଅଟକିବାକୁ ଦିଆଯିବ ନାହିଁ । ଯଦି ଜମ୍ମୁ-କଶ୍ମୀରର ଯୁବକମାନଙ୍କ ସ୍ୱପ୍ନ ପୂରଣ କରିବାରେ କୌଣସି ପ୍ରତିବନ୍ଧକ ଆସେ, ତେବେ ମୋଦୀ ହିଁ ପ୍ରଥମେ ସେହି ପ୍ରତିବନ୍ଧକର ସମ୍ମୁଖୀନ ହେବେ ।

ବନ୍ଧୁଗଣ,

ଆଜି ଜୁନ୍ ୬, ମନେରଖନ୍ତୁ ଗୋଟିଏ ମାସ ପୂର୍ବେ, ଠିକ୍ ଗୋଟିଏ ମାସ ପୂର୍ବେ, ୬ ମଇ ରାତିରେ, ପାକିସ୍ତାନର ଆତଙ୍କବାଦୀମାନେ ନିପାତ ହୋଇଥିଲେ । ଏବେ ଯେତେବେଳେ ପାକିସ୍ତାନ ଅପରେସନ୍ ସିନ୍ଦୂରର ନାମ ଶୁଣିବ, ସେ ତା’ର ଲଜ୍ଜାଜନକ ପରାଜୟ ମନେ ପକାଇବ । ପାକିସ୍ତାନୀ ସେନା ଏବଂ ଆତଙ୍କବାଦୀମାନେ କେବେ କଳ୍ପନା କରିନଥିଲେ ଯେ ଭାରତ ପାକିସ୍ତାନ ଭିତରେ ଶହ ଶହ କିଲୋମିଟର ଯାଇ ଆତଙ୍କବାଦୀଙ୍କ ଉପରେ ଏପରି ଆକ୍ରମଣ କରିବ । ବର୍ଷ ବର୍ଷର କଠିନ ପରିଶ୍ରମରେ ସେମାନେ ଯେଉଁ ଆତଙ୍କର କୋଠା ନିର୍ମାଣ କରିଥିଲେ ତାହା କିଛି ମିନିଟ୍ ମଧ୍ୟରେ ଧ୍ୱଂସବିଧ୍ୱସ୍ତ ହୋଇଗଲା । ଏହା ଦେଖି ପାକିସ୍ତାନ ବହୁତ କ୍ରୋଧିତ ହେଲା, ଏବଂ ସେ ଜମ୍ମୁ, ପୁଞ୍ଚ ଏବଂ ଅନ୍ୟାନ୍ୟ ଜିଲ୍ଲାର ଲୋକଙ୍କ ଉପରେ ମଧ୍ୟ ନିଜର କ୍ରୋଧ ପ୍ରକଟ କଲା । ସାରା ବିଶ୍ୱ ଦେଖିଲା ଯେ ପାକିସ୍ତାନ କିପରି ଏଠାରେ ଘର ନଷ୍ଟ କଲା, ପିଲାମାନଙ୍କ ଉପରେ ଗୁଳିମାଡ଼ କଲା, ସ୍କୁଲ ଏବଂ ହସ୍ପିଟାଲକୁ ନଷ୍ଟ କଲା, ମନ୍ଦିର, ମସଜିଦ ଏବଂ ଗୁରୁଦ୍ୱାର ଉପରେ ଗୁଳିମାଡ଼ କଲା । ଦେଶର ପ୍ରତ୍ୟେକ ନାଗରିକ ଦେଖିଛି ଯେ ତୁମେ ପାକିସ୍ତାନର ଆକ୍ରମଣର ମୁକାବିଲା କିପରି କରିଛ । ସେଥିପାଇଁ ଦେଶର ପ୍ରତ୍ୟେକ ନାଗରିକ ପୂର୍ଣ୍ଣ ଶକ୍ତି ସହିତ ଆପଣଙ୍କ ପରିବାର ସହିତ ଠିଆ ହୋଇଛି ।

ବନ୍ଧୁଗଣ,

କିଛି ଦିନ ପୂର୍ବରୁ ସୀମାପାର ଗୁଳିମାଡ଼ରେ ମୃତ୍ୟୁବରଣ କରିଥିବା ଲୋକଙ୍କ ପରିବାର ସଦସ୍ୟଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଛି । ଗୁଳିମାଡ଼ରେ ପ୍ରଭାବିତ ୨ ହଜାରରୁ ଅଧିକ ପରିବାରର ଦୁଃଖ ମଧ୍ୟ ଆମର ନିଜ ଦୁଃଖ । ଗୁଳିମାଡ଼ ପରେ ଏହି ପରିବାରଗୁଡ଼ିକୁ ସେମାନଙ୍କ ଘର ମରାମତି ପାଇଁ ଆର୍ଥିକ ସହାୟତା ଦିଆଯାଇଥିଲା । ଏବେ କେନ୍ଦ୍ର ସରକାର ଏହି ସାହାଯ୍ୟକୁ ଆହୁରି ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି । ଆଜିର କାର୍ଯ୍ୟକ୍ରମରେ, ମୁଁ ଆପଣଙ୍କୁ ଏହି ବିଷୟରେ ସୂଚନା ଦେବାକୁ ଚାହୁଛି ।

ବନ୍ଧୁଗଣ,

ଯେଉଁ ଘରଗୁଡ଼ିକ ବହୁତ କ୍ଷତି ସହିଛନ୍ତି ସେମାନଙ୍କୁ ଏବେ ୨ ଲକ୍ଷ ଟଙ୍କା ଏବଂ ଯେଉଁ ଘରଗୁଡ଼ିକ ଆଂଶିକ କ୍ଷତିଗ୍ରସ୍ତ ହୋଇଛି ସେମାନଙ୍କୁ ପୃଥକ ଭାବରେ ୧ ଲକ୍ଷ ଟଙ୍କା ଦିଆଯିବ, ଏହା ଅତିରିକ୍ତ ଭାବରେ ଦିଆଯିବ । ଅର୍ଥାତ୍, ପ୍ରଥମ ଥର ସାହାଯ୍ୟ ପରେ ଏବେ ସେମାନେ ଏହି ଅତିରିକ୍ତ ରାଶି ପାଇବେ ।

ବନ୍ଧୁଗଣ,

ଆମର ସରକାର ସୀମାନ୍ତରେ ରହୁଥିବା ଲୋକମାନଙ୍କୁ ଦେଶର ପ୍ରଥମ ପ୍ରହରୀ ଭାବରେ ବିବେଚନା କରେ । ଗତ ଦଶନ୍ଧୀରେ, ସରକାର ସୀମାନ୍ତ ଜିଲ୍ଲାଗୁଡ଼ିକରେ ବିକାଶ ଏବଂ ସୁରକ୍ଷା ପାଇଁ ଅଭୂତପୂର୍ବ କାର୍ଯ୍ୟ କରିଛନ୍ତି, ଯେଉଁ ସମୟରେ ପ୍ରାୟ ଦଶ ହଜାର ନୂତନ ବଙ୍କର ନିର୍ମାଣ କରାଯାଇଛି । ଏହି ବଙ୍କରଗୁଡ଼ିକ ଅପରେସନ ସିନ୍ଦୁର ପରେ ସୃଷ୍ଟି ହୋଇଥିବା ପରିସ୍ଥିତିରେ ଜୀବନ ରକ୍ଷା କରିବାରେ ବହୁତ ସାହାଯ୍ୟ କରିଛି । ମୁଁ ଆପଣଙ୍କୁ କହି ଖୁସି ଅନୁଭବ କରୁଛି ଯେ ଜମ୍ମୁ ଏବଂ କଶ୍ମୀର ଡିଭିଜନ ପାଇଁ ଦୁଇଟି ସୀମାନ୍ତ ବାଟାଲିଅନ ଗଠନ କରାଯାଇଛି । ଦୁଇଟି ମହିଳା ବାଟାଲିଅନ ଗଠନର କାର୍ଯ୍ୟ ମଧ୍ୟ ସମାପ୍ତ ହୋଇଛି ।

ବନ୍ଧୁଗଣ,

ଆମର ଅନ୍ତର୍ଜାତୀୟ ସୀମା ନିକଟସ୍ଥ ଅତ୍ୟନ୍ତ ଦୁର୍ଗମ ଅଞ୍ଚଳରେ, ଶହ ଶହ କୋଟି ଟଙ୍କା ଖର୍ଚ୍ଚ କରି ନୂତନ ଭିତ୍ତିଭୂମି ନିର୍ମାଣ କରାଯାଉଛି। କଠୁଆରୁ ଜମ୍ମୁ ରାଜପଥକୁ ଛଅ ଲେନ ବିଶିଷ୍ଟ ଏକ୍ସପ୍ରେସୱେ କରାଯାଉଛି, ଅଖନୁରରୁ ପୁଞ୍ଚ ରାଜପଥକୁ ମଧ୍ୟ ପ୍ରଶସ୍ତ କରାଯାଉଛି । ଭାଇବ୍ରାଣ୍ଟ ଗ୍ରାମ କାର୍ଯ୍ୟକ୍ରମ ଅଧୀନରେ, ସୀମାନ୍ତ ଗ୍ରାମଗୁଡ଼ିକରେ ବିକାଶ କାର୍ଯ୍ୟ ମଧ୍ୟ ତ୍ୱରାନ୍ୱିତ କରାଯାଉଛି । ଜମ୍ମୁ ଏବଂ କଶ୍ମୀରର ୪୦୦ ଗ୍ରାମ, ଯେଉଁଠାରେ ସବୁଦିନିଆ ସଂଯୋଗ ନଥିଲା, ୧୮୦୦ କିଲୋମିଟର ନୂତନ ରାସ୍ତା ନିର୍ମାଣ ଓ ସଂଯୋଗ କରାଯାଉଛି । ସରକାର ଏଥିପାଇଁ ୪୨୦୦ କୋଟି ଟଙ୍କାରୁ ଅଧିକ ଖର୍ଚ୍ଚ କରିବାକୁ ଯାଉଛନ୍ତି ।

ବନ୍ଧୁଗଣ,

ଆଜି ମୁଁ ଜମ୍ମୁ-କଶ୍ମୀରର ଲୋକମାନଙ୍କୁ, ବିଶେଷକରି ଏଠାକାର ଯୁବକମାନଙ୍କୁ ଏବଂ ଜମ୍ମୁ-କଶ୍ମୀର ଭୂମିରୁ, ମୁଁ ଦେଶକୁ ମଧ୍ୟ ଅନୁରୋଧ କରିବାକୁ ଚାହୁଛି । ଆପଣମାନେ ଦେଖିଛନ୍ତି ଯେ ଅପରେସନ୍ ସିନ୍ଦୁର କିପରି ଆତ୍ମନିର୍ଭରଶୀଳ ଭାରତର ଶକ୍ତି ଦେଖାଇଛି । ଆଜି ବିଶ୍ୱ ଭାରତର ପ୍ରତିରକ୍ଷା ଇକୋସିଷ୍ଟମ ବିଷୟରେ ଆଲୋଚନା କରୁଛି । ଏହା ପଛରେ କେବଳ ଗୋଟିଏ କାରଣ ଅଛି, 'ମେକ୍ ଇନ୍ ଇଣ୍ଡିଆ' ଉପରେ ଆମର ସେନାର ବିଶ୍ୱାସ । ସେନା ଯାହା କରିଛି, ଏବେ ପ୍ରତ୍ୟେକ ଭାରତୀୟଙ୍କୁ ତାହାକୁ ପୁନରାବୃତ୍ତି କରିବାକୁ ପଡିବ । ଏହି ବର୍ଷର ବଜେଟରେ, ଆମେ ମିଶନ୍ ମ୍ୟାନୁଫ୍ୟାକଚରିଂ ଘୋଷଣା କରିଛୁ । ଏହି ମିଶନ୍ ଅଧୀନରେ, ସରକାର ଉତ୍ପାଦନକୁ ଏକ ନୂତନ ଦିଗ ଦେବା ପାଇଁ କାମ କରୁଛି । ମୁଁ ଜମ୍ମୁ-କଶ୍ମୀରର ଯୁବକମାନଙ୍କୁ କହିବାକୁ ଚାହୁଛି, ଆସନ୍ତୁ, ଏହି ମିଶନ ର ଅଂଶ ହୁଅନ୍ତୁ । ଦେଶକୁ ଆପଣଙ୍କର ଆଧୁନିକ ଚିନ୍ତାଧାରାର ଆବଶ୍ୟକତା ରହିଛି, ଦେଶକୁ ଆପଣଙ୍କର ନବସୃଜନର ଆବଶ୍ୟକତା ରହିଛି । ଆପଣଙ୍କର ଚିନ୍ତାଧାରା, ଆପଣଙ୍କର ଦକ୍ଷତା ଭାରତର ସୁରକ୍ଷା, ଭାରତର ଅର୍ଥନୀତିକୁ ନୂତନ ଶିଖର ଦେବ । ଗତ ଦଶ ବର୍ଷ ମଧ୍ୟରେ, ଭାରତ ଏକ ବଡ଼ ପ୍ରତିରକ୍ଷା ରପ୍ତାନୀକାରୀ ପାଲଟିଛି । ଏବେ ଆମର ଲକ୍ଷ୍ୟ ହେଉଛି ବିଶ୍ୱର ଶୀର୍ଷ ପ୍ରତିରକ୍ଷା ରପ୍ତାନୀକାରୀଙ୍କ ମଧ୍ୟରେ ଭାରତର ନାମ ଅନ୍ତର୍ଭୁକ୍ତ କରିବା । ଆମେ ଏହି ଲକ୍ଷ୍ୟ ଆଡ଼କୁ ଯେତେ ଦ୍ରୁତ ଗତିରେ ଆଗକୁ ଅଗ୍ରସର ହେବା, ଭାରତରେ ସେତେ ଦ୍ରୁତ ଗତିରେ ଲକ୍ଷ ଲକ୍ଷ ନୂତନ ନିଯୁକ୍ତି ସୁଯୋଗ ସୃଷ୍ଟି ହୋଇ ପାରିବ ।

ବନ୍ଧୁଗଣ,

ଆମକୁ ଆଉ ଏକ ସଂକଳ୍ପ ନେବାକୁ ପଡିବ ଯେ ଆମକୁ ପ୍ରଥମେ ସେହି ସାମଗ୍ରୀ କିଣିବା ଉଚିତ ଯାହା ଭାରତରେ ତିଆରି ହୋଇଥିବ, ଯେଉଁଥିରେ ଆମ ଦେଶବାସୀଙ୍କ ଝାଳ ବୋହିଥିବ ଏବଂ ଏହା ହିଁ ଦେଶପ୍ରେମ, ଏହା ହିଁ ରାଷ୍ଟ୍ର ସେବା । ଆମକୁ ସୀମାରେ ଆମର ସେନାର ସମ୍ମାନ ବୃଦ୍ଧି କରିବାକୁ ପଡିବ ଏବଂ ଆମକୁ ବଜାରରେ ମେଡ୍ ଇନ୍ ଇଣ୍ଡିଆର ଗର୍ବ ବୃଦ୍ଧି କରିବାକୁ ପଡିବ ।

ବନ୍ଧୁଗଣ,

ଜମ୍ମୁ-କଶ୍ମୀରର ଏକ ସୁବର୍ଣ୍ଣ ଏବଂ ଉଜ୍ଜ୍ୱଳ ଭବିଷ୍ୟତ ଅପେକ୍ଷା କରିଛି । କେନ୍ଦ୍ର ସରକାର ଏବଂ ଏଠାକାର ସରକାର ପରସ୍ପରକୁ ସମର୍ଥନ କରି ମିଳିତ ଭାବରେ ବିକାଶ କାର୍ଯ୍ୟରେ ନିୟୋଜିତ ଅଛନ୍ତି । ଆମକୁ ଶାନ୍ତି ଏବଂ ସମୃଦ୍ଧିର ପଥକୁ ନିରନ୍ତର ମଜବୁତ କରିବାକୁ ପଡିବ ଯାହା ଉପରେ ଆମେ ଆଗକୁ ଅଗ୍ରସର ହେଉଛୁ। ମା ବୈଷ୍ଣୋ ଦେବୀଙ୍କ ଆଶୀର୍ବାଦରେ, ବିକଶିତ ଭାରତ, ବିକଶିତ ଜମ୍ମୁ-କଶ୍ମୀରର ଏହି ସଂକଳ୍ପ ସଫଳତାର ଶୀର୍ଷରେ ପହଞ୍ଚିବା ଉଚିତ, ଏହି କାମନା ସହିତ ମୁଁ ପୁଣିଥରେ ଆପଣମାନଙ୍କୁ ଏହି ଅନେକ ବିକାଶ ପ୍ରକଳ୍ପ ଏବଂ ଗୋଟିଏ ପରେ ଗୋଟିଏ ଅନେକ ଚମତ୍କାର ପ୍ରକଳ୍ପ ପାଇଁ ଅଭିନନ୍ଦନ ଜଣାଉଛି । ଆପଣଙ୍କ ଦୁଇ ହାତ ଯୋଡନ୍ତୁ ଏବଂ ପୂର୍ଣ୍ଣ ସାମର୍ଥ୍ୟର ସହିତ ମୋ ସହ କୁହନ୍ତୁ -

ଭାରତ ମାତା କୀ ଜୟ ! ଭାରତର ପ୍ରତ୍ୟେକ କୋଣରେ ସ୍ୱର ଗୁଞ୍ଜରିତ ହେବା ଉଚିତ ।

ଭାରତ ମାତା କୀ ଜୟ !

ଭାରତ ମାତା କୀ ଜୟ !

ଭାରତ ମାତା କୀ ଜୟ !

ଭାରତ ମାତା କୀ ଜୟ !

ବହୁତ ବହୁତ ଧନ୍ୟବାଦ!

*****

MT