নোংচুপ বেঙ্গলগী রাজ্যপাল দা. সি.ভি. অনন্দ বোসজী, কেন্দ্রগী মন্ত্রীমন্দলদা ঐহাক্কী মরূপ হরদীপ সিংহ পুরী, শান্তনু ঠাকুরজী অমসুং সুকান্তা মজুমদারজী, ৱেস্ত বেঙ্গল এসেমব্লীদা ওপোজিসনগী লুচিংবা সুভেন্দু অদিকারিজী, পার্লিয়ামেন্ততা ঐহাক্কী মরূপ সৌমিক ভত্তাচার্যজী অমসুং জ্যোতির্মোই সিংহ মহাতোজী, মীয়ামগী অতোপ্পা মীহুৎশিং, ঐহাক্কী নুংশিরবা ইচিল-ইনাওশিং, নমস্কার!

ঐখোয়গী দুর্গাপুর অসি স্তীল সিতী অমা ওইবতা নত্তনা ভারতকী শিন্মীশিংগী মরুওইবা মফম অমসু ওইরিবনি। ভারতকী চাউখৎ-থৌরাংদা দুর্গাপুরনা অচৌবা থৌদাং অমা লৌখি। ঙসিদি, ঐখোয়না মসিগী থৌদাং অসিবু মখা তানা মপাঙ্গল কনখৎহন্নবা খুদোংচাবা অমা লৈরে। মতম খরগী মমাংদা, লুপা করোর ৫,৪০০গী প্রোজেক্তশিং শঙ্গাখ্রে নৎত্রগা উরেপ উয়ুং তমখ্রে। প্রোজেক্তশিং অসিনা লমদম অসিদা কনেক্তিবিতী হেঙ্গৎহল্লগনি। মখোয়না গ্যাসতা য়ুম্ফম ওইবা ত্রান্সপোর্ত সিস্তেম অমসুং গ্যাসতা য়ুম্ফম ওইবা শেন্মিৎলোনবুসু থৌগৎকনি। ঙসি হৌদোকখিবা প্রোজেক্তশিং অসিনা স্তীল সিতী অসিগী মশক মওং অসি মপাঙ্গল কনখৎহল্লগনি। অতোপ্পা ৱাহৈদা হায়রবদা, থৌরাংশিং অসিনা ৱেস্ত বেঙ্গলবু 'মেক ইন ইন্দিয়া, মেক ফোর ৱার্ল্দ'গী মন্ত্রগী মখাদা মাংলোমদা চংশিনবদা মতেং পাংগনি। মখোয়না মফম অসিগী নহাশিংগীদমক থবক ফংহন্নবা মশিং য়াম্লবা খুদোংচাবশিংসু পুথোক্কনি। প্রোজেক্তশিং অসিগীদমক্তা ঐনা অদোম পুম্নমকপু থম্মোয় শেংনা থাগৎচরি।

মরুপশিং,

ঙসিদি মালেম অসিনা 'বিকসিত ভারত' (চাউখৎলবা ভারত) গী ৱারেপশিং অদুগী মতাংদা ঙাংলি। মসিগী মখাদা ভারত পুম্বদা উবা ফংলিবা অহোংবশিং অসি 'ভিক্সিৎ ভারত'কী য়ুম্ফম ওইরি। অহোংবশিং অসিগী মরুওইবা শরুক অমা হায়রগদি ভারতকী ইনফ্রাস্ত্রকচরনি। ইনফ্রাস্ত্রকচরগী মতাংদা ঐনা হায়রবদা, সোসিএল, ফিজিকেল অমসুং দিজিতেল ইনফ্রাস্ত্রকচর য়াওরি। লাইরবশিংগীদমক পর্মনেন্ত হাউস করোর মরি হেন্না, তোইলেত করোর কয়া, পাইপকী ঈশিং কনেক্সন করোর ১২ হেন্না, কিলোমীতর লিশিং কয়া শাংবা অনৌবা লম্বী, অনৌবা হায়ৱে, অনৌবা রেল লাইন, অপীকপা শহরশিংদা এয়রপোর্তশিং, অমসুং ইমুং খুদিংদা অমসুং খুঙ্গংদা ইন্তরনেত এক্সেস ফংহনবা অসিগুম্বা মোদর্ন ইনফ্রাস্ত্রকচর পুম্নমক অসিনা নোংচুপ বেঙ্গল য়াওনা লৈবাক অসিগী রাজ্য খুদিংমক্তা কান্নবা ফংহল্লে।

মরুপশিং,

নোংচুপ বেঙ্গলদা ত্রেন কনেক্তিবিতীগী মতাংদা মমাংদা অমুক্তা ওইখিদ্রিবা থবকশিং পাংথোকখ্রে। বঙ্গাল অসি লৈবাক অসিগী বন্দে ভারত ত্রেন মশিং য়াম্না চেনবা রাজ্যশিংগী মনুংদা অমনি। কোলকতা মেত্রো অসি য়াম্না থুনা পাকথোক চাউথোক্লি। মফম অসিদা অনৌবা রেলৱে লাইনশিং শেমগৎলি, অমসুং পাকথোক-চাউথোকহনবা অমসুং ইলেক্ত্রিফিকেসনগী থবকশিং খোঙজেল য়াংনা চত্থরি। রেলৱে স্তেসন কয়া অমা মোদর্নাইজ তৌরি। মসিগীসু মথক্তা, রেলৱে ওভরব্রিজ মশিং য়াম্লবা অমা শাগৎলি। ঙসি নোংচুপ বেঙ্গলদা রেলৱে ওভর ব্রিজ অনি হাপখ্রে। হায়রিবা থবকশিং অসিনা বেঙ্গলগী মীয়ামগী পুন্সিদা য়াম্না লাইথোকহল্লগনি।

মরুপশিং,

ঐখোয়না মফমসিদা লৈরিবা এয়রপোর্ত অসিসু উদান (উদে দেশ কা অম নাগরিক) স্কিমগা শম্নহল্লে। হৌখিবা চহি অমখক্তদা, পেসেঞ্জর 500,000 হেনবনা মসিদা চৎখ্রে। অসিগুম্বা ইনফ্রাস্ত্রকচর অসি শেমগৎলকপা মতমদা, মীওইবনা হেন্না ফবা খুদোংচাবশিং ফংহনবতা নত্তনা নহা লিশিং কয়া থবক ফংহনগনি হায়বসি অদোম্না ফজনা খঙই। প্রোজেক্তশিং অসি মপুং ফাহন্নবগীদমক শিজিন্নরিবা মচাক-মথুমশিং অসি মখোয়শিং অসি পুথোকপা মতমদা পাক-শন্না থবক পীরি।

মরুপশিং,

হৌখিবা চহি ১০-১১ অসিদা, লৈবাক অসিদা গ্যাস কনেক্তিবিতীদা পায়খৎলিবা থবকশিং অসি অতৈগা মান্নদবা অমনি। হৌখিবা চহী তরা অসিদা, লৈবাক অসিগী ইমুং খুদিংদা এল.পি.জি. ঐখোয়না ৱান নেসন, ৱান গ্যাস গ্রিদকী মিৎয়েংদা থবক তৌখি অমসুং প্রধান মন্ত্রী উর্জা গঙ্গা য়োজনা হৌদোকখি। স্কিম অসিগী মখাদা, নোংপোক থংবা ভারতকী রাজ্য তরুক, নোংচুপ বেঙ্গল য়াওনা গ্যাস পাইপলাইনশিং শঙ্গাগনি। পান্দমদি রাজ্যশিং অসিগী ইন্দস্ত্রীশিং অমসুং য়ুমথোংশিংদা মমল হোংবা পাইপকী গ্যাস ফংহনবনি। গ্যাস ফংলবা মতমদা, হায়রিবা রাজ্যশিং অসিদা লৈরিবা ভেহিকলশিং অসি সি.এন.জি.দা চৎপা ঙম্লগনি অমসুং ঐখোয়গী ইন্দস্ত্রীশিং অসি গ্যাসতা য়ুম্ফম ওইবা তেক্নোলোজীশিং শিজিন্নবা ঙম্লগনি। দুর্গাপুরগী ইন্দস্ত্রীএল লেন্দ অসি হৌজিক নেস্নেল গ্যাস গ্রিদকী শরুক অমা ওইরকপদা ঐহাক নুংঙাইবা ফাওই। মসিনা লোকেল ইন্দস্ত্রীশিংদা চাউনা কান্নবা পীগনি। প্রোজেক্ত অসিগী খুত্থাংদা, নোংচুপ বেঙ্গলগী চাউরাক্না ইমুং লাখ ২৫দগী ৩০ ফাওবদা পাইপকী খুত্থাংদা মমল হোংবা গ্যাস ফংলগনি। মসিনা হায়রিবদি ইমুংশিং অসিগী অমসুং মরু ওইনা ঐখোয়গী ইমাশিং অমসুং ইচিল-ইনাওশিংগী পুন্সি অসি হেন্না লায়থোকহল্লগনি। মসিনা মরম ওইদুনা থবক ফংহনবগী খুদোংচাবা লিশিং কয়া অমসু লৈহল্লগনি।

মরুপশিং,

ঙসিদি, দুর্গাপুর অমসুং রঘুনাথপুরগী মরুওইবা স্তীল অমসুং পাৱর প্লান্তশিং অসি অনৌবা তেক্নোলোজীগা লোয়ননা খুৎশিন্নখ্রে। মখোয়শিং অসিদা চাউরাক্না লুপা করোর ১৫০০গী ইনভেস্তমেন্ত তৌখ্রে। হায়রিবা প্লান্তশিং অসি হৌজিক হেন্না ইফিসিএন্ত ওইরে অমসুং মালেমগী থাক্তা কম্পিতিতিব ওইনবগীদমক শেম-শারি। প্রোজেক্তশিং অসি মাইপাক্না লোইশিনখিবদা বেঙ্গলগী মীয়ামদা ঐনা অখন্নবা থাগৎপা ফোংদোকচরি।

মরুপশিং,

ভারতকী ফেক্টরীশিং ওইরো নত্রগা ঐখোয়গী লমশিং অমসুং ফার্মশিং ওইরো, ভারত অসি ২০৪৭ ফাওবদা চাউখৎলবা লৈবাক অমা ওইহন্নবা ময়েক শেংবা ৱারেপ অমগা লোয়ননা মফম খুদিংমক্তা থবক পায়খৎলি। ঐখোয়গী লম্বীদি: চাউখৎ-থৌরাংগী খুত্থাংদা শক্তি পীনবা, থবক পীবগী খুত্থাংদা মশা-মরোমদোম লেপচবা অমসুং সেন্সিতিবিতীগী খুত্থাংদা অফবা লৈঙাকপা। হায়রিবা প্রিন্সিপলশিং অসিনা লমজিংদুনা, ভারতকী চাউখৎপগী খোঙচৎ অসিদা ঐখোয়না নোংচুপ বেঙ্গলবু শক্তি লৈরবা ইঞ্জিন অমা ওইহন্নবা ৱাশক লৌরে। ঐহাক্না অমুক্কা হন্না অদোম পুম্নমকপু চাউখৎ-থৌরাংগী প্রোজেক্তশিং অসিগীদমক থাগৎচরি। হৌজিক্কী ওইনা মসিমক্নি। ঐহাক্না হায়গদবা কয়া অমসু লৈরি, অদুবু মসি প্লেতফোর্ম অসিদা হায়বগী মহুত্তা, মফম অসিগী মনাক নকপদা লৈবা অতোপ্পা স্তেজদগী হায়রবদি হেন্না ফগনি। বেঙ্গল পুম্নমক অমসুং লৈবাক পুম্নমক্না মফম অদুদা করি হায়গদগে হায়বদু ঙাইহাক লৈতনা ঙাইরি। মীদিয়া ফাওবা য়াম্না কুপ্না খঙনীংই। মরম অদুনা মরূপশিং, প্রোগ্রাম অসিগীদমক্তা ঐহাক্কী ৱাহৈশিং অসি লোইশিঞ্জরগে। অদুবু মতম খরগী মতুংদা, ঐহাক্না মফম অদুদগী অমুক্কা হন্না ৱা ঙাংগনি। য়াম্না থাগৎচরি।

***