মীয়াম্না চাউথোকচনা মখা তানা মচু অহুমগী ফিরাল হাইগদবনি।

ভারত মাতা কি জয়,

ভারত মাতা কি জয়,

ভারত মাতা কি জয়,

ভারত মাতা কি জয়।

গুজরাতকী চীফ মিনিষ্টর শ্রী ভুপেন্দ্র ভাই, রেলৱেজ মিনিষ্টর শ্রী অশ্বিনি বৈষ্ণব, গুজরাতকী মন্ত্রীমন্দলগী ঐগী মরুপশিং, এম.পিশিং, এম.এ.এলশিং, অতোপ্পা শক্নাইরবশিং অমসুং দাহোদকী ঐগী নুংশিরবা ইনাওশিং অমসুং ইচলশিং।

ময়াম কমদৌরি? কন্না পাউখুম পীবীয়ু-হৌজিক দাহোদকী ইথিল হেনগৎলক্লে!

ঙসি মেগী ২৬ নি। ২০১৪ গী নুমিৎ অসিদা ঐনা অহানবা ওইনা প্রধান মন্ত্রী ওইনা ৱাশক লৌখি। চাউথোকচবগা লোয়নান মচু অহুমগী ফিরাল মখা তানা হাইবা ঐ পাম্মী। গুজরাতকী মীয়াম্না ঐঙোন্দা থৌজাল য়াম্না পীখি, তুংদা, লৈবাক অসিগী মীওই করোর কয়ানা ঐঙোন্দা মখোয়গী থৌজালশিং পীখি। অদোমগী থৌজালশিংদগী, অহিং অমসুং নুংথিল, ঐগী  ইরৈচাশিংগী সেবা তৌনবা ঐ ইশামক কৎথোক্লে।

চহি খর অসিদা, মতম অমদা ৱাখলদা খল্লমদবা ৱারেপশিং লৈবাক অসিনা লৌরে। হৌখিবা চহি কয়াগী খুরৌশিং ঐখোয়না লৌথোক্লে অমসুং হিরম খুদিংমক্ত চাউখৎলে। ঙসিদি, লৈবাক অসি নিংবা কাইবদগী ফরক্লে অমসুং হৌজিক অনৌবা থাজবগা লোয়ননা মচু অহুমগী ফিরাল পাইহল্লে।

মরুপশিং,

ঙসি, ঐখোয় ভারতমচা করোর ১৪০ না বিকসিত ভারত অমা শেমগৎনবা অচেৎপা ফিরেপকা লোয়ননা থবক শুরি। লৈবাক অসি চাউখৎনবা দরকার ওইবা খুদিংমক লৈবাক মনুংদা পুথোকপা অসি তঙাইফদে। মেনুফেকচরিংগী লমদা ভারত য়াংনা চাউখৎলক্লি। লৈবাক মনুংগী শীজিন্ননবা তঙাইফদবা পোৎলমশিং পুথোকপা নত্ত্রগা মালেমগী লৈবাকশিংদা ভারতনা শাবা পোৎথোকশিং য়োন্নবা ওইরবসু, মখা তানা চাউখৎলকপা ঐখোয়না উরে। ঙসিদি ভারতনা স্মার্দফোনশিংদগী হৌরগা কারশিং, শান্নপোৎশিং অমসুং লালগী খুৎলায়শিং অমসুং হিদাক-লাংথকশিং লৈবাক কয়াদা থাদোক্লে। মসিগী মথক্ত, ভারতনা হৌজিক রেলৱেশিং, মেত্রো সিষ্টেমশিং শারে অমসুং মখোয়গী দরকার ওইবা অৱাংবা তেক্নোলোজিসু মপান্দা থাদোক্লে। চাউখৎপা অসিগী অহিংবা খুদম অমা দাহোদনা ওইরি।

ঙাইহাক্কী মমাঙদা, ঐখোয়না মফম অসিদা লুপা করোর লিশিং কয়াগী প্রোজেকশিং উরেপ-উয়ুং তমখ্রে অমসুং শঙ্গাখ্রে। মখোয়গী মনুংদা খ্বাইদগী মরুওইবদি দাহোদকী ইলেক্ত্রিক লোকোমোতিপ ফেক্তরিনি। মসিগী উরেপ-উয়ুং তম্নবা ঐ মফম অসিদা চহি অহুমগী মমাঙদা লাকখ্রে। মীওই খরনা হায়খি মদুদি মীখলগী খুদোংচাবা ফংনবা মোদীনা উরেপ-উয়ুং তমখিবনি অমসুং মসি থবক ওইনা পাংথোক্লোই। অদুবু, চহি অহুমগী মতুংদা, ফেক্তরি অসিদগী মাইপাক্না অহানবা ইলেক্ত্রিক লোকোমোতিপ শাবা ঐখোয়না উরে। ঙাইহাক্কী মমাংদা ঐনা মসি লমথাখ্রে। চাউথোকচনিঙাই ওইবা তাঞ্জা অসি গুজরাত খক্তগী নত্তে লৈবাক শীনবা থুংবগীনি।

ঙসি, গুজরাত অতোপ্পা মাইপাকপা অমা লৈরে-রাজ্য অসিগী রেল নেতৱার্ক মপুংফানা মৈ ফংহল্লে। মাইপাকপা অসিগীদমক গুজরাতকী ঐগী ইনাওশিং অমসুং ইচলশিংদা ঐনা হরাওবা ফোঙদোকচরি।

মরুপশিং,

অহানবদা, থৌরম অসি শীল্লিবা মীওইশিং, ময়ামগী মরক্ত অমুক হন্না ঐ শরুক য়াবা ফংহনবগীদমক ঐনা থাগৎপা ফোঙদোকচরি। অহল কয়া, শক খঙনবা মীওই কয়া উনবা অমসুং মশিং থিঙমদ্রবা থৌদোক কয়া নিংশিংবগী খুদোংচাবা ঐনা ফংলে। ঐনা রাজনিতি য়াওবদগী ঐগা দাহোদকা লোয়নবা হৌরকপা নত্তে। চহি ৭০ গী মমাঙদগী লোয়নরক্লবনি। মফম অসিগী মীরোল অনি অমসুং অহুমগা থবক তৌমিন্নবগী খুদোংচাবা ঐ ফংখি। ঙসিদি, চহি ২০ গী মতুংদা ঐ পারেলদা লাক্লে। মফম অসি হোংলম্লে। মমাংঙৈদা, ঐনা নুমিৎ তারকপদা সাইকল অমা থৌদুনা চৎখি। করিগুম্বা নোং চুরবদি অকোয়বশিং অশং-অমান্না থনখি, অখুবা লম্বীশিংদা সাইকল থৌবা নুংঙাইখি। অদুগুম্বা নুমিদাংৱাইরমশিং অসিনা ঐ অসুক্কী মতিক হরাওহনখি। ঙসি পারেলগী ফজবশিং উবদা ঐ য়াম্না হরাওই। 

মরুপশিং,

মফম অসিগী খুদোংচাদবশিং কোকহন্নবা ঐখোয়না থবক পায়খৎলে। ঐনা মতম অমদা দাহোদকীদমক মঙখিবা মঙলানশিং ঐগী মীৎমাংদা থবক ওইনা পাংথোক্লে হায়না ঐনা চাউথোকচনা হায়রি।  ঐনা হায়রি মদুদি কনাগুম্বা অমনা কমদৌনা ভারত্ত ত্রাইবেলনা মশিং য়াম্না তাবা জিলা অমা শেমগৎপগী নমুনা অমা উবা পাম্লবদি, মখোয় দাহোদতা চৎকদবন। ত্রাইবেলগী জিলা অমদা স্মার্দ সিতি অমা শেমগৎনবগী অনৌবা ৱাখল মতম অমদা মীওই কয়া থবাক য়ৈনখি। অদুম ওইনমক, হৌখিবা চহি ১০-১১ দা, কমদৌনা ঐখোয়গী রেলৱেজশিং য়াংনা অওনবা পুরকখিবগে হায়বা ঐখোয়না উবা ফংলে। রেলৱে চাউখৎপগী মাইকৈ হোংলে, মসিগী খোঙজেল হেনগৎলে অমসুং মেত্রো সর্বিস য়াংনা পাকথোক-চাউথোক্লে। মমাংঙৈদা, সেমি-হয়-স্পিৎ রেলৱেশিং ফাওবা ভারতকী লোনগৈদা য়াওরমদে। ঙসিদি, মসি থবক ওইনা য়াংনা পায়খৎলে। হৌজিক, লৈবাক শীনবা থুংবগী লম্বী ৭০ রোমদা বন্দে ভারত ত্রেনশিং চেল্লে। ঙসিদি দাহোদতগী, অহমেদবাদ অমসুং বেরাবালগী মরক্ত বন্দে ভারত এক্সপ্রেস হৌদোক্লে। মমাংঙৈদা, দাহোদকী ঐখোয়গী ইনাওশিং উজয়েন্দা চৎনিংখি, মসি হৌজিক নকশিল্লে। হৌজিক অদোমগীদমক সোমনাথকী থোঙশিং হাংদোক্লে।

মরুপশিং,

ঙসিদি, ভারত শীনবা থুংনা মশিং থিঙমদ্রবা অনৌবা ত্রেনশিং চেল্লে, মসিগী অহোংবা অসিগী মরুওইবা মরম অমদি- ভারত মনুংদা অৱাংবা থাক্কী তেক্নোলোজি পুথোক্লিবা ঐখোয়গী লৈবাক্কী নহারোলশিং-ঐখোয়গী অনৌবা মীরোলননি। ভারত্ত কোচশিং অমসুং লোকোমোতিপশিং শারে; মমাংঙৈদা, ঐখোয়না মখোয় মপান লৈবাকশিংদগী পুশিল্লকখি। হৌজিক শেন ঐখোয়গীনি, থবকশিং ঐখোয়গীনি অমসুং মাইপাকপশিংসু ঐখোয়গীনি। ভারত য়াম্না য়াংনা রেলৱেগা মরী লৈনবা খুৎলায়শিং মপান্দা থাদোকপা অচৌবা লৈবাক অমা ওইরক্লে। করিগুম্বা অদোম অষ্ট্রেলিয়াদা চৎলবদি, মখোয়গী মেত্রোশিংদা শীজিন্নরিবা কোচশিং গুজরাত্ত শাবনি। ইংলেন্দ, সাউদি অরাবিয়া নত্ত্রগা ফ্রান্সতা চৎপা মতমদা, লৈবাক অদুগী অনৌবা ত্রেনশিংদা শীজিন্নরিবা কোচশিং অদু ভারত্ত শাবনি। মেক্সিকো, স্পেন, জর্মনি অমসুং ইতালিদা তোঙান তোঙানবা অপীকপা অমসুং অচৌবা রেলৱেগী মচাকশিং ভারতনা শাবনি। এম.এস.এম.ইশিং অমসুং য়ুমগী উদ্যোগশিং লিংখৎলিবা ঐখোয়গী অপীকপা উদ্যোগপতিশিং অসিনা অখন্নবা থবকশিং পাংথোক্লি। মখোয়না অরুবা পার্তশিং শারে অমসুং মখোয় মালেমগী কৈথেলশিংদা থাদোক্লে। ভারতনা শাবা পেসেঞ্জর কোচশিং মোজাম্বীক অমসুং শ্রীলঙ্গাদা শীজিন্নরে। ভারতনা মেদ ইন ইন্দিয়া লোকোমোতিপশিং অমসুং ইঞ্জিনশিং লৈবাক কয়াদা থাদোক্লে। মসিগী মেদ ইন ইন্দিয়া ব্রান্দ অসি পাকথোক-চাউথোক্লক্লি অমসুং মসিনা মরম ওইদুনা, মালেমগী মমাঙদা ভারতনা চাউথোকচরি।

হৌজিক, দাহোদকী ঐগী ইনাওশিং অমসুং ইচলশিং, ঐঙোন্দা হায়য়ু-হৌজিক ভারতনা শাবা পোৎ-চৈশিং মালেম্না মশক খঙলে- ঐখোয় মখা তানা মপান লৈবাক্কী পোৎ-চৈশিং শীজিন্নগদরা? হৌনা পাউখুম পীয়ু- ঐখোয় শীজিন্নগদরা নত্ত্রগা শীজিন্নরোইদরা? মচু অহুমগী ফিরাল হাইদুনা হায়বীয়ু- ঐখোয়না ভারতকী পোৎথোকশিং শৌগৎকনি নত্ত্রগা শৌগৎলোই? অদোম নশামক্ত য়েংবীয়ু-অদোম মচু অহুমগী মখাদা ফম্লি অমসুং ঐখোয়গী লৈবাক্ত শাবা পোৎথোকশিং করিগীদমক শীজিন্নরোইদৌরিবনো। গনেস চর্তুথি লাকপদা, ঐখোয়না মপানগী শক্তমশিং অমসুং অপীকপা মমিৎশিং পানবা গনতি মীতমশিং লৈগদরা? করিগীদমক ভারত্ত শাবা মীতমশিং লৈরোইদৌরিবনো? য়াওঙশঙ অমসুং দিৱালি মনুংদা, ঐখোয়না মপান লৈবাক্কী বোম্বুলাশিং অমসুং পেচকারিশিং শীজিন্নগদরা? করিগুম্বা ভারত চাউখৎত্রবদি, ভারতমচা খুদিংমক্না মসিগী লনাই ৱারেপ অসি লৌরোইদরা?

মরুপশিং,

রেলৱে সেক্তর চাউখৎলকপা মতমদা, উদ্যোগশিং, লৌউ-শিংউ, মহৈরোয়শিং অমসুং ঐখোয়গী ইচলশিংদা কান্নবশিং ফংহল্লে। হৌখিবা চহি ১০ দা, রেলৱেনা অহানবা ওইনা লমদম কয়া য়ৌবা ঙম্লে। গুজরাত মনুংদা ফাওবা অপীকপা ত্রেনশিং খক্ত চেনবা মফম কয়া লৈরি অমসুং মদু ফাওবা য়াম্না তপখি। হৌজিক নেরো-গেজ লম্বীশিং ব্রোদ-গেজদা ওন্থোক্লে। দাহোদকী নেরো-গেজ রেলৱে হৌজিক ফগৎহল্লে।

ঙসি, তোঙান তোঙানবা রেলৱে লম্বীশিং শঙ্গারে। দাহোদ অমসুং বালসাদকী মরক্ত এক্সপ্রেস ত্রেন অমা চেনবা হৌরে। দাহোদকী ঐগী ইনাওশিং গুজরাতকী মফম খুদিংমক্ত লৈরি। রাজ্য অসিগী অপীকপা সহর অমদা চৎপদা, অদোম্না দাহোদতগী মীওই অমা হেক্ত উনগনি। হৌজিক অনৌবা রেলৱে নেতৱার্কঅসি শেমগৎপদগী, কিমি ১০০ গী নেতৱার্ক অমনা দাহোদ শম্নরগনি। চাউখৎপা অসিগী কান্নবশিং ঐখোয়গী ত্রাইবেল অঙাংশিংনা খ্বাইদগী য়াম্না ফংলগনি।

মরুপশিং,

ফেক্তর অমা লিংখৎপা মফম খুদিংমক, মদুগী অকোয়বদা নুংঙাইবা হৌরকই। এন্সিলিয়ারি ফেক্তরশিং অপীকপা মচাকশিং শানবা লিংখৎলকই অমসুং মসিনা থবক ফংহল্লি। ঐখোয়গী নহারোলশিং থবক মরাংকাইনা ফংনবা ঐনা থবক পায়খৎলি।  দাহোদকী রেল ফেক্তরি অসি ভারত খক্তগী নত্তনা মালেমদা মাঙজিল থাবা মেনুফেকচরিং য়ুনিত অমা ওইরগনি- মসি ভারতকী মশক থোকপা অমনি। মসি অচম্বা ফেক্তরি অমা নত্তে। মতম অমদা শিথরুরবা মফম অসি অমুক হিঙ্গৎলক্লে। হৌজিক এনা মসি অমুক হিঙ্গৎলকপা উরে। মসিগী অওনবা অসি অদোমগী নুংশিবা অমসুং থৌজালনা ওইহনবনি। ঙসি, করিগুম্বা অদোম্না কনাগুম্বা অমদা ভারতকী হোর্সপৱার ৯০০০ গী লোকোমোতিপ কদাইদা শাবগে হায়না হংবদা, পাউখুম অদু দাহোদ ওইরগনি। মফম অসিদা শারিবা লোকোমোতিপশিংনা মেদ ইন ইন্দিয়া চাউথোকচহল্লে। মসিনা ঐখোয়গী রেলৱেশিং ফগৎহনবগা নত্তনা মফম অসিদা শারিবা তয়ারশিং মালেম শীনবা থুংনা মমিং চৎলগনি অমসুং মালেমদা দাহোদকী ঙাল্লগনি। তুংদা, মফম অসিদা লোকোমোতিপ চা কয়া পুথোক্কনি। অথুবা মতমদা, নুমিৎ নিনি খুদিংগী অনৌবা লোকোমোতিপ অমা শাবা লোইবগী মতম অমা লাক্লগনি। নুমিৎ নিনি খুদিংগী লোকোমোতিপ অমা শাবা লোইবগী মাইপাকপা অসি খন্দুনা য়েংউ। অসিগীগুম্বা অচৌবা থবকশিং অসিনা ঐখোয়গী লমদম অসিগী ইনাওশিং, ইচলশিং অমসুং নহারোলশিংদা য়াম্না থবক ফংহনগনি। ফেক্তরি অসিনা মশিং য়াম্লবা স্পয়ার পার্তশিং শাবা য়ুনিতশিং অমসুং অপীকপা উদ্যোগশিং অকোয়বশিংদা লিংখৎহনগনি।

ফেক্তরি অসিদা হকথেংননা থবক পীবগা লোয়ননা, মসি শৌগৎলিবা ফেক্তরিশিংনসু মশিং থিঙমদ্রবা অনৌবা থবক কয়া পীগনি। ঐখোয়গী লৌমী ইনাওশিং, ইচলশিং, ঐখোয়গী শা-ষন লোইরিবশিং, অপীকপা দুকান ফম্লিবশিং, শিন্মীশিং ওইবা য়াই, চাউখৎপা অসিগী কান্নবা খুন্নাইগী কাংলুপ খুদিংম ফংগনি।

মরুপশিং,

ঙসিদি গুজরাত লাইরিক-লাইশু, ইনফোর্মেসন তেক্নোলোজি, সেমিকন্দক্তরশিং অমসুং তুরিজমগুম্বা হিরমশিংদা শিংথাবা য়ানা চাউখৎলে। হিরম অমদা হেক্ত মমিং পল্লু, গুজরাতকী মচু অহুম ৱাংনা পাইবা অদোম উগনি। লুপা করোর লিশিং কয়া থাদুনা গুজরাত্ত সেমিকন্দক্তর প্লান্তশিং শারে অমসুং থবকশিং অসিগী ফল অমা ওইনা, রাজ্য শীনবা থুংবগী নহারোলশিংগী অনৌবা থবক লাখ কয়া লৈরগনি।

মরুপশিং,

বদোদারাদা অপীকপা অমসুং অচৌবা প্রোজেক কয়া পায়খৎপা মতম অমা লৈরমখি। ঐনা পঞ্চমহল জিলা অনি থোক্না খায়দোক্তুনা দাহোদ অনৌবা জিলা অমা ওইনা শেমখিবা অদু ঐ নিংশিংলি। ঐগী ৱারেপ অসিনা পঞ্চমহল অমসুং দাহোদ অনিমক চাউখৎকনি হায়না ঐনা খনখি। ঙসিদি, হায়রিবা চাউখৎপা অদু ঐগী মীৎনা উবা ফংলে। অকোয়বদা য়েংউ, ঙসিদি, ঐখোয়না অপীকপা উদ্যোগশিংগী নেতৱার্ক অমা উবা ফংলে, মখোয় ইচম চম্বা পোৎথোকশিং পুথোকপা নত্তে, অৱাংবা তেক্নোলোজিগী পোৎথোকশিং পুথোক্লি। মসিগী অপুনবা চাউখৎপা অসি ঐগী ত্রাইবেল ইনাওশিং অমসুং ইচলশিংনা ওইহনবনি।

করিগুম্বা অদোমনা বাদোদারাদগী দাহোদ ফাওবা, অমসুং মধ্য প্রদেস ফাওবা চৎপদা, বাদোদারাদা য়াম্না য়াংনা এয়রক্রাফ শানবা মফম চাউখৎলক্লিবা অদু অদোম উগনি। থা খরগী মমাঙদা মফম অদুদা এয়রবস এশেমব্লি লাইন শঙ্গাখ্রে। লৈবাক অসিগী অহানবা গাতি শক্তি য়ুনিভর্সিতিসু বাদোদারাদা লিংখৎলে। সাভলিদা রেলৱে কোচশিং অমসুং কারশিং শানবা অচৌবা ফেক্তরি অমা লিংখৎলে। ভারতকী খ্বাইদগী মপাঙ্গল কনবা হোর্সপৱার ৯০০০ গী লোকোমোতিপ দাহোদতা শারে। দোধারা, কালোল অমসুং হালোলদা উদ্যোগশিং অমসুং মেনুফেকচরিং য়ুনিতিশিং লিংখৎলকপা অসিনা উদ্যোগ চাউখৎনবগী অচৌবা মরম অমা ওইরে। গুজরাত শীনবা থুংনা চাউখৎপগী অনৌবা ইথক অমা লাক্লে।

মরুপশিং,

গুজরাতকী লৈহাওদা, গুজরাতকী নহারোলশিংনা বাইসাইকলদগী হৌরগা মোতরসাইকল ফাওবা, রেলৱে ইঞ্জিন্দগী হৌরগা এরোপ্লেনশিং ফাওবা শাগদবা মতম অদু ঐনা খৌরাংনা ঙাইরি। অসিগুম্বা অৱাংবা তেক্নোলোজিগী ইঞ্জিনিয়ারিং অমসুং মেনুফেকচরিং কোরিদোর অসি মালেমদা অতাংবা অমনি। বাদোদারাদগী হৌরগা দাহোদ, হালোল অমসুং গোধারা ফাওবদা অখন্নবা উদ্যোগকী নেতৱার্ক অমা লিংখৎলে।

মরুপশিং,

বিকসিত ভারত অমা শেমগৎনবা ত্রাইবেলগী লমদমশিং চপ মান্ননা চাউখৎহনবা দরকার ওই। ঐনা গুজরাতকী চীফ মিনিষ্টর ওইরিঙৈদা, রাজ্য অসিগী নোংপোক থংবা শরুক্কী ত্রাইবেল ইনাওশিং অমসুং ইচলশিংগী থবক তৌনবগী খুদোংচাবা ঐনা ফংখি, মখোয়গী য়াইফনবা ইশামক কৎথোকখি। তুংদা কেন্দ্র সরকারগী থবক তৌখিবদগী, ঐনা থবকশিং অসি মখা চৎথখি। হৌখিবা চহি ১১ দা, ত্রাইবেল ফুরুপশিং মমাঙদা অমুক্ত ওইখিদ্রিবা মওংদা চাউখৎনবা ঐ ইশামক কৎথোক্লে।

মতম শাংনা গুজরাতকী ত্রাইবেল লমদমশিংদা থবক তৌনবগী খুদোংচাবা ফংখ্রে- চহি ৭০ হেন্না ঐনা ত্রাইবেল ইনাওশিং অমসুং ইচলশিংগী মশিং থিঙমদ্রবা ৱারিশিং তারে। উমারগামদগী হৌরগা অম্বাজি ফাওবা অপুনবা ত্রাইবেলগী লমদম শীনবা থুংনা ক্লাস ১২ ফাওবা তম্নবা সাইন্স স্কুল অমা ফাওবা লৈরমদে। ঙসিদি উমারগামদগী হৌরগা অম্বাজি ফাওবা অপুনবা ত্রাইবেলগী লমদম শীনবা থুংনা কোলেজশিং, আই.তি.আইশিং, মেদিকেল কোলেজশিং লৈরে অমসুং ত্রাইবেলশিংগী লমদমদা ত্রাইবেল য়ুনিভর্সিতি অনি লৈরে। হৌখিবা চহি ১১ দা, এক্লব্যা মোদেল রেসিদেন্সিএল স্কুলশিং পাকথোক-চাউথোক্লে। দাহোদতসু অসিগুম্বা স্কুলশিং লিংখৎলে।

মরুপশিং,

ঙসিদি, ত্রাইবেল ফুরুপশিং য়াইফনবা লৈবাক শীনবা থুংনা থবক কয়া পায়খৎলে। নিংতম্লবা ভারতকী পুৱারিদা অহানবা ওইনা, ত্রাইবেল খুঙ্গংশিং য়াংনা চাউখৎনবা অনৌবা স্কিম কয়া হৌদোক্লে। ত্রাইবেলগী খুঙ্গং চাউখৎনবা হন্দক বজেত্ত ঐখোয়না ‘ধারতি আবা’ হৌদোক্লে- বিরসা মুন্দা ঐখোয়না ধারতি আবা হায়না খঙনরে।

থৌরাং অসিগী মখাদা, লুপা করোর ৮০,০০০ থাদদুনা কেন্দ্র সরকারনা জনজাতি উতকার্স অভিয়ান হৌদোক্লে। মসিনা গুজরাতকী য়াওনা লৈবাক শীনবা থুংবগী খুঙ্গং ৬০০০০ হেন্না চাউখৎ-থৌরাংগী থবকশিং পায়খৎকনি। ঐগী ত্রাইবেল ইনাওশিং অমসুং ইচলশিংদা মৈ, অফবা থক্নবা ঈশিং, লম্বী, স্কুলশিং, হোস্পিতালশিং, পাক্কাগী য়ুমশিং ফংহন্নবা থবকশিং পায়খৎলে।

মরুপশিং,

মালেম্না মীরাইরবা মীওইশিং মোদীনা লাৎলি। ত্রাইবেলশিংগী মরক্ত কাংলুপ কয়া মীরাইদুনা থমখি-অদুবু ঐখোয়না মখোয় কাউথোক্তে। মখোয়গীদমক সরকারনা পি.এম জনমন য়োজনা হৌদোক্লে। স্কিম অসিগী মখাদা, য়ুম, লাইরিক-লাইশু অমসুং থবক ফংনবা ঐখোয়না থবক পায়খৎলি।

মরুপশিং,

ঐখোয় গুজরাত্ত লৈরিবশিংনা মতম কয়াগী মমাঙদগী সিক্কল সেল লায়নাগী খুদোংচাদবশিং খঙদুনা লাক্লে। ঐনা গুজরাত্ত লৈরিঙৈ মতমদগী হৌনা অনাবা অসি লাকশিন্নবা ঐনা থবক কয়া পায়খৎখ্রে অমসুং ঙসিদি মসি ঐখোয়না লৈবাক শীনবা থুংনা থবক পায়খৎলে। ঐখোয়গী ত্রাইবেল ইনাওশিং অমসুং ইচলশিং সিক্কল সেল লায়নাদগী কন্নবা ঐখোয়না মিসনগী মওংদা থবক পায়খৎলে। মিসন অসিগী শরুক অমা ওইনা, ত্রাইবেল মীওই লাখ কয়া হৌজিক স্কৃন্নিং তৌখ্রে।

পুৱারিদগী হৌনা শোৎথদুনা লাক্লবা ত্রাইবেলগী লমদমশিংগী চাউখৎপা য়াংখৎনবা ঐখোয়গী সরকারনা থবক পায়খৎলে। লাইবক থিবদি, লৈবাক অসিদা খ্বাইদগী শোৎথরবা জিলা ১০০ মখোয় মশা মথন্থ থাদোকখি। হায়রিবা মফমশিং অসি মীরাইদুনা থমখি-অফবা ওফিসারশিং মতম অদুদা থবক তৌনিংখিদে, স্কুলশিংদা ওজাশিং কাখিদে, য়ুমশিং লৈতে অমসুং লম্বীশিং লৈতে। হৌজিক ফিবম অসি হোংলে। মতম অমদা দাহোদ জিলাসু মখোয়গী মরক্ত য়াওখি। হৌজিক্তি, দাহোদ জিলা অমসুং দাহোদ সহর স্মার্দ সিতিগী শরুক অমা ওইনা শেমগৎলি। তুংগী পান্দম অমগা লোয়ননা দাহোদ মাঙলোমদা চঙশিল্লি। জিলা অসি এস্পিরেসনেল দিষ্ট্রিকশিংগী তাইবংদসু মমিং চৎলে। দাহোদ সহর অমুক হন্না শেমগৎলে অমসুং মফম অসিদা অনৌবা খুদোংচাবশিং শেমগৎলে।

মরুপশিং,

দাহোদ য়াওনা গুজরাতকী খা থংবা শরুকশিং মীরোল কয়া ঈশিং ফংদবগী অৱাবা থেংনৈ। ঙসিদি, ঈশিং পীনবা কিমি চা কয়াগী পাইপলাইনশিং তিংলে। য়ুমথোং খুদিংদা নরমাদা তুরেল য়ৌহন্নবা থবকশিং পায়খৎলে। হৌখিবা চহি খক্তদা ঐখোয়না উমারগামদগী অম্বাজি ফাওবদা লম একর লাখ ১১ ইথৈ ফংহনখ্রে। মসিনা লৌমীশিংনা চহি অমদা মহৈ-মরোং অহুমলক থাবা ঙমহল্লে।

মরুপশিং,

মফম অসিদা দাহোদকী ইমাশিং অমসুং ইচলশিংনা মখোয়গী মখুত্ত মচু অহুমগী ফিরালশিং পায়দুনা ওপরেসন সিন্দুরগীদমক অদোমগী থৌজালশিং উৎখ্রে। দাহোদ লমদম অসি অৱাবা খাংবা অমসুং কৎথোকপগী লমদম অমনি। দুধিমাতি তুরেলগী মপান্দা মহর্ষি দাধিচিনা মালেম অসি ঙাক-শেন্নবগীদমক মহাক্কী হকচাং কৎথোকখি হায়বগী ৱারি লৈরি। লমদম অসি মক্তদা চিরবা তাঞ্জাদা য়াওল্লোয় তাত্য তোপেনা লেপখি। মফম অসিদগী ইরাপ লাপতনা গোবিন্দ গুরুনা লুচিংবা ত্রাইবেল লান্মী চা কয়াগী থৌনা অমসুং কৎথোকপগী শেংলবা মফম অমা লৈরি। মসিদা ভারত মাতা অমসুং মীওইবা খুন্নাইগীদমক মশাগী ওইজবা থিদনা থবক তৌখিবগী চহি কয়া শুরবা চৎনবীগী মমি তারি। অসিগুম্বগ গুনশিং ভারতমচাশিংগী থম্মোয়শিংদা লৈরি, তেরোরিষ্টশিংনা পাহালগাম, জম্মু অমসুং কাস্মিরদা চৎথখিবা থবকশিং অদু ভারতনা তুমিন্না লৈথোকপা ঙমগদরা? মোদী তুমিন্না লৈথোকপা ঙমগদরা?

ঐখোয়গী ইচলশিংগী লাইবক্কী সিন্দুর মুৎথৎনবা কনাগুম্বা অমগী থৌনা লৈরবদি, মদু মখোয় মশানা মশা মাঙহঞ্জবনি। মরম অদুনা, ওপরেসন সিন্দুর অসি অচম্বা মিলিতিরগী থবক অমা নত্তে, মসিদা ভারতকী গুনশিং অমসুং থম্মোয়গী ইহুলশিংগী মমি তারি। মোদী থেংনবা কয়া য়াম্না ৱাই হায়বা, মখোয়গী মঙদা ফাওবা তেরোরিষ্টশিংনা কৈদৌঙৈদা খল্লম্লোই। মচু অহুমগী ফিরাল ৱাংনা পাইহনসি অমসুং মসিনা ফোঙদোক্লিবশিং ইকায়খুম্নবা উৎসি। মহাক্কী মচাশিংগী মমাঙদা মপা অমা কাপতুনা হাৎখি, ঐনা ঙসি শক্তমশিং অদু উখি, ঐ ঈ কাখি। তেরোরিষ্টশিংনা ভারতমচা করোর ১৪০ শিংনরে। প্রধান সেবক অমা ওইনা, অদোম্না ঐঙোন্দা ওফিস অমা শীন্নরে- ঐনা ঐগী থৌদাং পাংথোক্কনি। ঐনা ঐখোয়গী আর্মদ ফোর্স অহুম মনিং তমহল্লে। মালেমনা চহি কয়া উখিদ্রবা মাইপাকপশিং ঐখোয়গী থৌনা ফরবা লান্মীশিংনা ফংলে। ঐখোয়না ঙমখৈগী ৱাংমদা তেরোরিষ্টশিংগী অচৌবা লোৎফম ৯ মশক খঙদোকখি, মখোয়গী চপ চাবা মফমশিং খঙখি অমসুং তাং ৬ গী অহিংদা, শুপ্নগী মিনিত ২২ গী মনুংদা, মখোয়না তাং ২২ দা পাংথোকখিবা অদুগী লমন শীংদুনা ঐখোয়না মখোয় উৎ ওনহলখি। ভারতকী পাউখুমদা থক থক নিক্লবা পাকিস্তান লান্মীনা অশাওবা ফুদোক্নবা হোৎনবদা ঐখোয়গী ফোর্সশিংনা মখোয় পুম্নমক মাঙহনখি। মফম অসিদা মশিং য়াম্লবা ঐখোয়গী থবক্তগী পোথারা লান্মীশিং শরুক য়ারি হায়বা ঐ খঙলে। ঐনা মখোয় ইকায়খুম্নবা উৎচরি। দাহোদকী শেংলবা লমদম অসিদগী, ঐনা অমুক হন্না ঐখোয়গী লৈবাক্কী আর্মদ ফোর্সশিংগী থৌনাদা অমুক হন্না ইকায়খুম্নবা উৎচরি।

মরুপশিং,

পার্তিসনগী মতুংদা শেমখিবা লৈবাক অদুগী পান্দম অমা খক লৈরি- ভারতকী মায়োক্ত লাল তৌবা, ভারত তুগৎচবা অমসুং ভারত মাঙহন্নবা চোকথবা লৈতবা অনিংবা অমা। অমরোমদা, ভারতকী পান্দমদি লায়রবা কোকহনবা, লৈবাক অসিগী শেন-থুমগী ফিবম ফগৎহনবা অমসুং লৈবাক অসি চাউখৎলবা লৈবাক অমা ওইহনবনি। ঐখোয়গী আর্মদ ফোর্সশিং মপাঙ্গল কল্লবা অমসুং ঐখোয়গী শেন্মিৎলোন ফগৎলবা মতমদা বিকসিত ভারত অমা ওইবা ঙমগনি। মাইকৈ অসিদা অচেৎপা ফিরেপ অমগা লোয়ননা ঐখোয় লেপতনা থবক তৌরি।

মরুপশিং,

দাহোদকী খুদোংচাবা কয়া মরাংকাইনা লৈরি। ঙসিগী থৌরম অসি মাঙদা তারিবশিংগী অচম্বা শক্তম অমনি। লৈবাক অসিগী থবক কন্নবা শুবা মীয়াম অমসুং মরুপশিংদা ঐনা থাজবা থম্লি। অনৌবা খুদোংচাবশিং মপুংফানা শীজিন্ননবা অমসুং দাহোদ লৈবাক অসিদা খ্বাইদগী চাউখৎলবা জিলাশিংগী মনুংদা অমা ওইহন্নবা ঐনা অদোমগী মফমদা তকশিল্লি। থাজবা অসিগা লোয়ননা, ঐনা অমুক হন্না মীয়ামগী মফমদা হরাওবা ফোঙদোকচরি। হৌজিক, ওপরেসন সিন্দুর ইকায়খুম্নবা উৎনবা মীওই খুদিংমক লেপখৎনবা অমসুং মচু অহুমগী ফিরাল থাঙ্গৎনবা ঐনা হায়জরি। ঐখোয় পুন্না লেপখৎমিন্নসি অমসুং মচু অহুমগী ফিরাল থাঙ্গৎসি অমসুং ঐগা লোয়ননা হায়মিন্নসি:

ভারত মাতা কি জয়!

ভারত মাতা কি জয়!

ভারত মাতা কি জয়!

‘ভারত মাতা কি জয়’ মখা তানা খোন্থাং য়ৈনবা হৌনা লাউগদবনি।

দিসক্লেমর: হন্দোক্লবা প্রধান মন্ত্রীগী ৱারোলগী অয়াম্বা শরুক গুজরাতিদা পীখি। 

***