ঐহাক্কী ৱারোল হৌদ্রিঙৈ মমাংদা, ঐহাক্না পুম্নমক্কী মফমদা করিগুম্বা অমখক হায়জরি মদুদি অদোম্না মফম অমহেক্তদা লৈজরবসু, ফমদুনা লৈরবসু হৌগৎপীগনু, ঐখোয়না  ২২দা লৈখিদ্রবা ইমুং মনুংগী মীওইশিংগী মফমদা মফম অদুদা অদুমক ফমদুনা, মীকুপ অমতং তুমিন্না লৈবগা লোইননা ঐখোয়গী ইশ্বর নিংশিংমিন্নসি অমসুং পুম্নমক্কী মফমদা ইকায় খুম্নবা উৎচরবা মতুংদ্দা ঐহাক্কী ঙসিগী ৱারোল অসি হৌদোকচগে।

ওম শান্তি-শান্তি-শান্তি।

বিহারগী রাজ্যপাল আরিফ মোহমদ খানজী, মফমসিগী মীয়াম্না পাম্নরবা মুখ্য মন্ত্রী, ঐহাক্কী মরুপ শ্রী নিতিশ কুমারজী, মফম অসিদা লৈরিবা মকোক থোংবা মীহুৎ পুম্নমক অমসুং বিহারগী ঐহাক্কী নুংশিরবা ইচিল-ইনাওশিং।

ঙসি পঞ্চায়তী রাজ নুমিৎকী থৌরম অসিদা লৈবাক পুম্বনা মিথিলাগা শম্নরে, বিহারগা শম্নরে। ঙসি, লৈবাক অসিগী অমসুং বিহারগী চাউখৎ-থৌরাংগা মরী লৈনবা লুপা করোর লিশিং কয়াগী প্রোজেক্তশিংগী উরেপ-উয়ুং তমখ্রে অমসুং উরেপ-উয়ুং তমখ্রে। ইলেক্ত্রিসিতী, রেলৱেজ, ইনফ্রাস্ত্রকচরগী তোঙান-তোঙানবা থবকশিং অসিনা বিহারদা অনৌবা থবক পীবগী খুদোংচাবা লৈহল্লগনি। ঙসি অসি লৈবাক্কী কবি রামধারী সিংহ দিনকরজীগী মপোক কুমওনসুনি। ঐহাক্না মহাকপু ইকায়খুম্নবা উৎচরি।

মরুপশিং,

বিহার অসি পুজিয়া (ইকাইখুম্নজরবা) বাপুনা সত্যগ্রহগী মন্ত্র শন্দোকখিবা লমদমনি। পুজিয়া বাপুনা থাজখি মদুদি ভারতকী খুঙ্গংশিং অসি মপাঙ্গল কনখৎহন্দ্রবদি, ভারতনা খোঙজেল য়াংনা চাউখৎপা ঙম্লোই। মসি লৈবাক অসিদা পঞ্চায়তী রাজকী ৱাখল্লোনগী মখাদা লৈরিবা ৱাখল্লোন অদুনি। হৌখিবা চহী তরারোম অসিদা পঞ্চায়ৎশিংবু মপাঙ্গল কনখৎহন্নবা খোঙথাং কয়া অমা লৌখৎখি। তেক্নোলোজীগী খুত্থাংদা পঞ্চায়ৎশিংসু শক্তি লৈহল্লে। হৌখিবা চহি তরারোম অসিদা, গ্রাম পঞ্চায়ৎ লাখ ২ হেন্না ইন্তরনেতকা শম্নহনখ্রে। খুঙ্গংশিংদা কম্মন সর্বিস সেন্তর লাখ ৫.৫ হেন্না শাখ্রে। পঞ্চায়ৎশিং দিজিতেল ওইরকপদগী অতোপ্পা কান্নবা অমসু লৈরি। লাইফ-দেথ সর্টিফিকেট, লমগী মপু ওইবগী সর্টিফিকেট, অমসুং অসিগুম্বা দোক্যুমেন্ট কয়া অমা লায়না ফংবা য়াই। নীংতম্লবা মতুং দিকেদ কয়াগী মতুংদা, লৈবাক অসিনা অনৌবা পার্লিয়ামেন্ত বিল্দিং অমা ফংলবা মতমদা, লৈবাক অসিদা অনৌবা পঞ্চায়ৎ বিল্দিং লিশিং ৩০সু শাখি।  পঞ্চায়ৎশিংদা মতিক চাবা শেনফম ফংহন্নবা সরকারনা অখন্নবা মীৎয়েং থম্লি। হৌখিবা চহি ১০ অসিদা পঞ্চায়ৎশিংনা লুপা করোর লাখ ২ হেন্না ফংখ্রে। হায়রিবা শেনফম পুম্নমক অসি খুঙ্গংগী চাউখৎ থৌরাংদা থাদোকখ্রে।

মরুপশিং,

গ্রাম পঞ্চায়ৎশিংগী অতোপ্পা অচৌবা সমস্যা অমনা লমগী ৱাথোকশিংগা মরী লৈনৈ। করম্বা লমদা মীই লৈনবগে, করম্বদনা লৌউ-শিংউগী লম ওইবগে, করম্বনা পঞ্চায়ৎকী লমনো, করম্বনা সরকারগী লমনো হায়বগী মতাংদা তোইনা য়ানদবা কয়া লৈরম্মি। মসিগী ৱারোইশিন পুরক্নবা, লম অসি দিজিতেলাইজ তৌরি। লমগী রেকোর্দশিং দিজিতেলাইজ তৌবনা দরকার লৈতবা ৱাথোকশিং লোইশিন্নবা হোৎনবদা মতেং পাংলি।

মরুপশিং,

পঞ্চায়তশিংনা মতৌ করম্না খুন্নাইগী শরুক য়াবা হেনগৎহনবগে হায়বদু ঐখোয়না উখ্রে। বিহার অসি নুপীশিংদা ৫০% রিজার্বেসন পীবা লৈবাক অসিগী অহানবা রাজ্যনি। মসিগীদমক্তা ঐহাক্না নিতিশজীবু থাগৎপা ফোংদোকচরি। ঙসিদি বিহারদা লাইরবশিং, দলিতশিং, মহাদলিতশিং, শোত্থরবা অমসুং কা হেন্না শোত্থরবা কাংলুপকী ইচে ইচলশিং অমসুং ইচানুপী কয়ানা মীয়ামগী মীহুৎ ওইনা থবক তৌরি। মসি অশেংবা সোসিএল জস্তিসনি, মসি অশেংবা সোসিএল পার্তিসিপেসননি। দেমোক্রেসী অসি খ্বাইদগী য়াম্না শরুক য়ারবা মতমদা খক্তদা চাউখৎলি অমসুং মপাঙ্গল কনখৎলি। মসিগী ৱাখল্লোন অসিগা লোইননা, লোক সভা অমসুং লেজিসলেতিব এসেমব্লীদা নুপীশিংগীদমক চাদা ৩৩গী রিজার্বেসনগী আইন অমসু শেমখ্রে। লৈবাক অসিগী রাজ্য খুদিংমক্কী নুপীশিংনা মসিগী কান্নবা ফংগনি, ঐখোয়গী ইচে ইচলশিং অমসুং ইচানুপীশিংনা হেন্না রিপ্রজেন্তেসন ফংলগনি।

মরুপশিং,

সরকার অসিনা লৈবাক অসিদা নুপীশিংগী শেন্থোক হেনগৎহন্নবা অমসুং থবক ফংহন্নবা অমসুং মশানা থবক পীজরবা মীওইশিং ওইহন্নবা অনৌবা খুদোংচাবা কয়া ফংহন্নবা মিসন মোদতা থবক তৌরি। বিহারদা চৎথরিবা জীবিকা দিদী প্রোগ্রামনা ইচিল-ইনাও কয়াগী পুন্সিদা অহোংবা পুরক্লে। ঙসিদি বিহারগী ইচিল-ইনাওশিংগী সেল্ফ হেল্প গ্রুপশিংদা লুপা করোর লিশিং অমরোমগী তেংবাং পীখ্রে। মসিনা নুপীমচাশিংগী শেন্মিৎলোনদা হেন্না শক্তি পীরগনি। মসিনা লৈবাক অসিদা লাখপতি দিদি কোতি অহুম শেমগৎনবা পান্দম ফংবদা মতেং পাংগনি।

মরুপশিং,

হৌখিবা চহী তরা অসিদা, খুঙ্গংগী শেন্মিৎলোন অসি অনৌবা মওংদা খোঙজেল য়াংখৎলক্লি। খুঙ্গংশিংদা লায়রবশিংগীদমক য়ুমশিং শাখ্রে, লম্বীশিং শেমখ্রে, কংক্রিৎকী লম্বীশিং শেমখ্রে। খুঙ্গংশিংদা গ্যাস কনেক্সনশিং ফংহল্লে, ঈশিং কনেক্সনশিং ফংহল্লে, তোইলেতশিং শাগৎলে। অসিগুম্বা থবক খুদিংমক্কী খুত্থাংদা লুপা লাখ কয়া অমদি করোর কয়া খুঙ্গংশিংদা য়ৌখ্রে। অনৌবা থবক্কী খুদোংচাবা কয়া অমসু শেমখ্রে। শিন্মীদগীনা লৌমী ফাওবা অমসুং কার্ত দ্রাইভরদগীনা দুকান মপু ফাওবা, মীপুম খুদিংমক্না শেন্থোক ফংনবগী অনৌবা খুদোংচাবা ফংলি। মখোয় অসি খুন্নাইদা খ্বাইদগী কান্নবা ফংহল্লি, মখোয় অসি চহি কয়াগী মমাংদগী খুদোংচাবা ফংলক্ত্রি। ঐহাক্না ময়ামদা পি.এম. অৱাস য়োজনাগী খুদম পীজগে। স্কিম অসিগী পান্দমদি লৈবাক অসিদা লায়রবা ইমুং অমত্তা য়ুম লৈতবা ওইহন্দবা, মীপুম খুদিংমক্কী মথক্তা কংক্রিৎকী য়ুম লৈহন্দবা ওইগদবনি। হৌজিক, ঐহাক্না য়ুমগী মরুওইবশিং অসি মমাশিং অমসুং ইচিল-ইনাওশিং অসিদা পীরকপা মতমদা, মখোয়গী মমিৎতা উবা ফংলিবা নুংঙাইবা অদু, মখোয়গী মশক্তা উবা ফংলিবা অনৌবা থাজবা অদু, অসিগুম্বা লাইরবশিংগীদমক থবক তৌবগী ইথিল পীনবগী মরম অমা ওইখি। অমসুং মসিগী পান্দম অসিগা লোইননা হৌখিবা চহী তরা অসিদা কংক্রিৎকী য়ুম কোতি ৪ হেন্না শাখ্রে। বিহারদসু হৌজিক ফাওবদা লায়রবা ইমুং লাখ য়াংখৈ তরেৎনা কংক্রিৎকী য়ুম ফংখ্রে। অসিগুম্বা য়ুমশিং অসি লায়রবা, দলিত, শোত্থরবা অমসুং কা হেন্না শোত্থরবা, পসমান্দা ইমুংশিং অমসুং অসিগুম্বা খুন্নাইগী শোত্থরবা ইমুংশিংদা পীরম্মি। লাক্কদৌরিবা চহীশিংদা, লায়রবশিংদা কংক্রিৎকী য়ুম কোতি অহুম হেন্না পীরগনি। ঙসি অয়ুক বিহারগী ইমুং লাখ ১.৫ রোম্না মখোয়গী অনৌবা পক্কা য়ুমদা চঙশিল্লগনি। লৈবাক শিনবা থুংনা লৈরিবা লায়রবা ইমুং লাখ ১৫দা অনৌবা য়ুমশিং শাবগী অয়াবা পীরকখ্রে। মসিগী মনুংদা বেনিফিসরী লাখ অহুম তংখাইনা ঐখোয়গী বিহার খক্তদগীনি। ঙসি অয়ুক্কী ওইনা, ইমুং লাখ ১০ রোমদা মখোয়গী কংক্রিৎ ওইবা য়ুমগীদমক শেলগী তেংবাং পীখ্রে। মসিগী মনুংদা বিহারগী খুঙ্গংগী ইমুং ৮০,০০০ অমসুং সহরগী ইমুং লাখ অমা য়াওরি।

মরুপশিং,

হৌখিবা দিকেদ অসি ভারতকী ইনফ্রাস্ত্রকচরগী দিকেদনি। মোদর্ন ইনফ্রাস্ত্রকচর অসিনা চাউখৎলবা ভারতকী য়ুম্ফম অসি মপাঙ্গল কনখৎহল্লি। অহানবা ওইনা, লৈবাক অসিগী খুঙ্গংগী ইমুং কোতি ১২ হেনবগী য়ুমদা থক্নবা ঈশিং ফংহনখ্রে। ইলেক্ত্রিসিতী কনেক্সন অসি ইমুং কোতি ২.৫ হেনবদা য়ৌখ্রে। গ্যাস স্তোভেন্দা চিঞ্জাক শেম্বগী ৱাখল্লোন অমত্তা লৈতবশিংনা গ্যাস সিলিন্দরশিং ফংলে। অদোম্না হন্দক্তা পাউশিং অসি ইবা ফংলগনি। লদাখ অমসুং সিয়াচেনদা, য়ুম্ফম ওইবা খুদোংচাবশিং ফংহনবদা অৱাবা ওইরিবা মফমশিংদা, ৪জি অমসুং ৫জি মোবাইল কনেক্তিবিতী হৌজিক য়ৌরে। মসিনা ঙসি লৈবাক অসিগী মরুওইবশিং অদু করিনো হায়বদু উৎলি। হকশেলগুম্বা সেক্তর অমগী খুদমসু ঐখোয়না লৈ। মমাংদা, এইম্সকুম্বা হোস্পিতালশিং অসি দিল্লীগুম্বা অচৌবা শহরশিংদা লৈরম্মি। ঙসিদি, এ.আই.আই.এম.এস. অসি দরভঙ্গাদা শাগৎলি। হৌখিবা চহি ১০দা লৈবাক অসিদা মেদিকেল কোলেজ মশিং শরুক অনি হেনগৎলে। ঝঞ্জারপুরদা অনৌবা মেদিকেল কোলেজ অমা শাগৎলি।

মরুপশিং,

খুঙ্গংশিংদা অফবা হোস্পিতালশিং শেমগৎনবা, লৈবাক শিনবা থুংনা আয়ুশ্মান আরোগ্য মন্দির লাখ ১.৫ হেন্না শাখ্রে। বিহারদা আয়ুশ্মান আরোগ্য মন্দির লিশিং ১০ হেন্না শাখ্রে। মতৌ অসুম্না, জন ঔশধী কেন্দ্রশিং অসি লায়রবশিং অমসুং মিদল ক্লাসকী মীওইশিংগীদমক অচৌবা মতেং অমা ওইরক্লি। মফম অসিদা মমল হোংবা হিদাকশিং অসি চাদা ৮০গী চাংদা ফংই। বিহারদা জন ঔশধী কেন্দ্র ৮০০ হেন্না লিংখৎখ্রে। মসিনা বিহারগী মীয়ামদা হিদাক-লাংথকশিংগীদমক লুপা করোর ২০০০ কনবা ঙমহনখ্রে। আয়ুশ্মান ভারত য়োজনাগী মখাদা বিহারদা ইমুং লাখ কয়ানা লেম্না লায়েংলি। মসিনা ইমুংশিং অসিদা লুপা করোর লিশিং কয়া কনবা ঙমহল্লে।

মরুপশিং,

ঙসিদি, ভারত অসি রেলৱেজ, লম্বী-থোং, এয়রপোর্তকুম্বা ইনফ্রাস্ত্রকচরগা য়াম্না থুনা শম্নরক্লি। মেত্রোগী থবক পাৎনাদা চত্থরি। লৈবাক অসিগী শহর তরানিপালদগী হেন্না মেত্রোগী খুদোংচাবগা শম্নরে। ঙসি পাৎনা অমসুং জয় নগরগী মরক্তা নমো ভারত রেপিদ রেলসু হৌখ্রে। মসিগী মতেংনা পাৎনা অমসুং জয় নগরগী মরক্তা লৈরিবা খোঙচৎ অসি য়াম্না অতেনবা মতমদা লোইশিনবা ঙম্লগনি। নমো ভারত রেপিদ রেলনা সমস্তিপুর, দরভঙ্গা, মধুবানী অমসুং বেগুসরাইগী মীওই লাখ কয়াদা মতেং পাংগনি।

মরুপশিং,

ঙসিদি, অনৌবা রেলৱে লাইন কয়া অমা মফম অসিদা শঙ্গাখ্রে অমসুং কৎথোকখ্রে। সহরসাদগী মুম্বাই ফাওবগী মোদর্ন অমৃত ভারত ত্রেন হৌদোকপা অসিনা ঐখোয়গী শিন্মী ইমুংশিংদা অচৌবা খুদোংচাবশিং ফংহল্লগনি। ঐখোয়গী সরকারনা মধুবানী অমসুং ঝঞ্জারপুর য়াওনা বিহারদা রেলৱে স্তেসন কয়া মোদর্নাইজ তৌরি। মিতিলা অমসুং বিহারগী এয়র কনেক্তিবিতী অসি দরভঙ্গা এয়রপোর্তনা ফগৎহনখ্রে। পাৎনাগী এয়রপোর্তসু পাকথোক চাউথোকহল্লগনি। চাউখৎ-থৌরাংগী থবকশিং অসিনা মরম ওইদুনা বিহারদা অনৌবা থবক ফংবগী খুদোংচাবশিং লৈরক্লি।

মরুপশিং,

ঐখোয়গী লৌমীশিং অসি খুঙ্গংগী শেন্মিৎলোনগী মপাঙ্গলনি। মসিগী মপুং ওইবা শক্তম অসি হেন্না মপাঙ্গল কনখৎলক্লিবমখৈ খুঙ্গংশিং অদু হেন্না মপাঙ্গল কনখৎলগনি অমসুং লৈবাক অসিনা হেন্না শক্তি লৈগনি। ঐখোয় পুম্নমক্না খঙই মদুদি মিতিলা, কোসীগী লমদম অসি ঈশিং-ঈচাউনা অৱাবা কয়া মায়োক্নহল্লি। বিহারদা ঈশিং-ঈচাউগী শাফু হন্থহন্নবা সরকারনা লুপা করোর ১১,০০০ চাদিং তৌগদৌরি। মসিগা লোয়ননা বাগমতি, ধার, বুর্হি গন্দক অমসুং কোসীদা দামশিং শাবা হৌরগনি। মসিগী খুত্থাংদা, খোংশিং শেমগৎকনি অমসুং তুরেলগী ঈশিংগা লোইননা ঈথৈ লৌখোঙ ফংহনগনি। অমসুং লৌমী খুদিংমক্কী লমশিংদা ঈশিং য়ৌহন্নবা থৌরাংসু লৈগনি। মসিনা হায়রিবদি হৌজিক ঈশিং-ঈচাউগী প্রোব্লেম হন্থরক্কনি অমসুং লৌফমশিংদা মতিক চাবা ঈশিং য়ৌরক্কনি।

মরুপশিং,

ঙসি লৈবাক অসিগী অমসুং মালেমগী ওইনা মখনানা সুপরফুদ অমা ওইরি, অদুবু মসি মিতিলাগী চৎনবীগী শরুক অমনি। ঐখোয়না মসিগী কলচর অসিবু মফমসিগী চাউখৎপগী হৌরকফম ওইহল্লসি। ঐখোয়না মখানাদা জি.আই. তেগ পীখ্রে। মসিনা তাক্লিবদি মখানা অসি হায়রিবা লৈহাও অসিগী পোত্থোক অমনি, মসি হৌজিক ওফিসিএল ওইনা সর্তিফাই তৌখ্রে। মখানা রিসর্স সেন্তরবুসু নেস্নেল স্তেতস পীখ্রে। বজেত্তা লাওথোকখিবা মখানা বোর্দ শেম্বা অসিনা মখনানা লৌমীশিংগী পুন্সিদা অহোংবা পুরক্লগনি। বিহারগী মখানা অসি সুপরফুদ অমা ওইনা মালেমগী কৈথেলশিংদা য়ৌরগনি। বিহারদা নেস্নেল ইন্সতিত্যুৎ ওফ ফুদ তেক্নোলোজী এন্দ মেনেজমেন্তসু শেমগৎকনি। মসিনা মফম অসিগী নহাশিংদা ফুদ প্রোসেসিংগা মরী লৈনবা অপীকপা ইন্তর্প্রাইজশিং লিংখৎপদা মতেং পাংগনি।

মরুপশিং,

লৌউ-শিংউগা লোয়ননা বিহারনা ঙা পুথোকপদসু লেপতনা খুমাং চাউশিল্লি। হৌজিক ঐখোয়গী ঙামীশিংনা কিসান ক্রেদিৎ কার্দকী খুদোংচাবা লৌবা ঙম্লে। মসিনা ঙা ফাবদা শরুক য়াবা ইমুং কয়াদা কান্নবা পীরি। পি.এম. মৎস্য সামপাদা য়োজনাগী মখাদা বিহারদা লুপা করোর চাম্মাগী থবকশিং পায়খৎলে।

মরুপশিং,

এপ্রিল ২২দা জম্মু অমসুং কাশ্মীরগী পহলগামদা তেরোরিস্তশিংনা তমথিবা মওংদা মী কয়া হাৎখিবা অদুগীদমক লৈবাক পুম্বদা পুক্নিংদা কপনরি। লৈবাক অসিগী মীওই মিলিয়ন কয়ানা অৱাবা ফোংদোক্লি। লৈবাক পুম্বনা ভিক্তিম পুম্নমক্কী ইমুং মনুংগা লোয়ননা মখোয়গী অৱাবদা শরুক য়ারি। হৌজিক লায়েংলিবা ইমুংগী মীওইশিং অথুবা মতমদা ফগৎহন্নবা সরকারনা হোৎনরি।

মরুপশিং,

কনাগুম্বা অমনা মহাক্কী মচানুপা, কনাগুম্বা অমনা মহাক্কী মচানুপা, কনাগুম্বা অমনা মহাক্কী পুন্সিগী লোয়নবী অসি তেরোরিস্ত এতেক্তা মাংখ্রবনি। মখোয়গী মনুংদা খরনা বেঙ্গালী, খরনা কন্নড়, খরনা মরাথি, খরনা ওদিয়া, খরনা গুজরাতি, খরনা বিহারদগীনি। ঙসি, কারগিলদগী কন্যাকুমারী ফাওবদা, মখোয় পুম্নমক্কী লৈখিদবদা ঐখোযদা অৱাবা অসি মান্ননা ফাওই। হায়রিবা লান অসি খুৎলায় পায়দবা তুরিস্তশিংদা চত্থবা নত্তে, লৈবাক অসিগী য়েক্নবশিংনা ভারতকী থম্মোয়দা লান্দারকপসু য়াওই। ঐহাক্না য়াম্না ময়েক শেংনা হায়জনীংবদি, হায়রিবা এটেক অসি পাংথোকখিবা তেরোরিস্তশিং অমসুং মসিগী এটেক অসিগীদমক থৌরাং তৌখিবা মীওইশিং অসিনা মখোয়না খল্লম্বদগী হেন্না শাথিবা চৈরাক ফংলগনি। হৌজিক্তি তেরোরিস্তশিংগী লেমহৌরিবা মফমশিং অদু মাংহনবগী মতম ওইরে। ভারত মচা কোতি ১৪০গী ৱিল পাৱরনা তেররগী মাস্তরশিংগী য়াংলেন থুদেকপা ঙমগনি।

মরুপশিং,

ঙসি, বিহারগী লৈহাওদগী, ঐনা মালেম পুম্বদা হায়জরি মদুদি ভারতনা তেরোরিস্ত খুদিংমক অমসুং মখোয়গী শৌগৎপশিং মশক খঙদোক্কনি, ত্রেক তৌগনি অমসুং চৈরাক পীরগনি। ঐখোয়না মালেমগী অরোইবা ফাওবা মখোয়গী মতুংদা চৎকনি। তেরোরিজম্না ভারতকী স্পিরিত অসি কৈদৌঙৈদা কাইহল্লোই। তেরোরিজম অসি চৈরাক পীদনা লৈরোই। অচুম্বা ৱায়েল ফংহন্নবা হোৎনগনি। লৈবাক পুম্বনা মসিগী ৱারেপ অসিদা চেৎনা লেপ্লি। মীওইবা খুন্নাইদা থাজবা থম্লিবা মীওই খুদিংমক ঐখোয়গা লোয়ননা লৈরি। অসিগুম্বা মতম অসিদা ঐখোয়গা লোইননা লেপখিবা লৈবাক কয়াগী মীয়াম অমসুং মখোয়গী লুচিংবশিংদা ঐনা থাগৎপা ফোংদোকচরি।

মরুপশিং,

শান্তি অমসুং সেক্যুরিতী হায়বসি খোঙজেল য়াঙনা চাউখৎনবা খ্বাইদগী মরুওইবা কন্দিসনশিংনি। চাউখৎলবা ভারত অমগীদমক চাউখৎলবা বিহার অমা মথৌ তাই। বিহারদা চাউখৎ-থৌরাং লৈহনগদবনি অমসুং চাউখৎ-থৌরাংগী কান্নবা অসি মফম অসিগী শরুক খুদিংমক্তা ফংহনগদবনি হায়বসি ঐখোয় পুম্নমক্কী হোৎনবনি। পঞ্চায়তী রাজ নুমিৎকী থৌরম অসিদা শরুক য়াবীবগীদমক ঐনা অমুক্কা হন্না ময়াম পুম্নমকপু থাগৎচরি।

অদোমবু য়াম্না থাগৎচরি। ঐগা ৱারী শানবিয়ু-

ভারত মাতা কী জয়। (ভারত ইমানা য়াইফরে!)

ভারত মাতা কী জয়।

ভারত মাতা কী জয়।

খঙহঞ্জবাঃ মসি প্রধান মন্ত্রীগী পীখিবা ৱারোলগী চাউরাকপা হন্দোকপনি। অশেংবা ৱারোলদি হিন্দীদা পীখি।

***