ঙসি প্রধান মন্ত্রী শ্রী নরেন্দ্র মোদীনা ন্যু দিল্লিগী ভারত মন্দপামদা ৱার্ল্দ ফুদ ইন্দিয়া ২০২৫ দা ৱা ঙাংখ্রে। থৌরম অদুদা মীয়ামদা ৱা ঙাংবদা প্রধান মন্ত্রীনা হায়খি থৌরম অসিদা লৌমীশিং, ওন্ত্রেপ্রেন্যুরশিং, ইনভেষ্টরশিং, ইন্নোবেতরশিং অমসুং কঞ্জুমরশিং শরুক য়াদুনা ৱার্ল্দ ফুদ ইন্দিয়া অনৌবা উনবা, অনৌবা খঙনবা অমসুং অনৌবা থবক্কী মফম অমা ওইরে। মহাক একজিবিসন য়েংলুরে অমসুং মচি ওইবা চীঞ্জাক, থাউ চাবা হন্থহনবা অমসুং য়োম্লবা পোৎথোকশিং হকচাং ফবা হেনগৎহন্নবা মীৎয়েং চঙবদা অপেনবা ফাওই। থৌরম অসিদা শরুক য়াখিবা মীওইশিংদা প্রধান মন্ত্রীনা মহাক্কী য়াইফ পাউজেল পীখি অমসুং থাগৎপা ফোঙদোকখি।

প্রধান মন্ত্রীনা হায়খি শেন থাদবা মীওই খুদিংমক্না শেন থাদদ্রিঙৈদা মফম অমগী মহৌশাগী ওইবা খুদোংচাবশিং য়েংই। ঙসিদি মালেমগী ইনভেষ্টরশিং- মরুওইনা চীঞ্জাক্কী লমদা থবক তৌরিবশিংনা অচৌবা থাজবগা লোয়ননা ভারতকী মাইকৈদা য়েঙলি। খেন্নবা, পোৎ-চৈ লৈবা অমসুং পাক-চাউবগী মপাঙ্গল অহুম ভারতকী লৈরি। ভারতনা মখল খুদিংমক্কী মহৈ-মরোং, উহৈ অমসুং মনা-মশিং পুথোক্লি অমসুং মখল কয়াগী পোৎথোকশিং অসিনা মালেমগী ওইনা লৈবাক অসি তোপ-তোপ্পা মফম অমা কল্লে। কিলোমিতর ১০০ খুদিংগী, ইন্সাং মথেল অমসুং মসিগী মহাও হোংই, ভারতকী ইনাকখুল্লবা মথেল-লুকোইবগী মমি তারি। লৈবাক মনুংগী ওইনা পোৎ-চৈ য়াম্না শীজিন্নবা অসিনা ভারতকী খুদোংচাবা অমা ওইরি অমসু মসিনা ইনভেষ্টরশিংনা য়াম্না পাম্নবা মফম অমা ওইহল্লে। ভারতনা য়াম্না পাক-চাউনা থবক তৌরি। হৌখিবা চহি ১০ দা, মীওই করোর ২৫ লায়রবা কোক্লে অমসুং হৌজিক ভারতকী খ্বাইদগী মপাঙ্গল কনবা কাংবু-নিও মিদল ক্লাসকী শরুক ওইরে। কাংলুপ অসিগী অপাম্বশিংনা চীঞ্জাক্কী চৎনবীশিং অমসুং শীজিন্নবা হেনগৎলে। ভারতকী হৈথোই-শিংথোইরবা নহারোলশিংনা হিরম কয়াদা অনৌবা থবকশিং পায়খৎলি অমসুং চীঞ্জাক্কী হিরম অসিসু অমনি।

প্রধান মন্ত্রীনা হায়খি ঙসিদি, চীঞ্জাক অমসুং লৌউ-শিংউগী হিরমশিংদা ষ্টার্দ-অপ কয়া থবক তৌদুনা, ষ্টার্দ-অপ ইকোসিষ্টেম খ্বাইদগী য়াম্না লৈবা মালেমগী অহুমসুবা লৈবাক ভারতনা ওইরে। হিরম অসিদা এ.আই, ই-কম্মর্স, দ্রোনশিং অমসুং এপ্পশিংগুম্বা তেক্নোলোজিশিং শীজিন্নরে, সপ্লাই চেনশিং, রিতেল অমসুং শেম-শাবগী থবকশিংদা অওনবা পুরক্লে। হিরম অসিদা শেন য়াম্না থাদনবা ভারতনা মখল কয়া, পোৎ-চৈ য়াম্না লৈবা অমসুং অনৌবা থবকশিংগী খুদোংচাবা ফংহল্লে। ভারত্ত শেন থাদনবা অমসুং থবক পাকথোক-চাউথোক্নবা মতম চপ চারে হায়না মহাক্না লাল কিলাদগী লাউথোকখ্রে।

প্রধান মন্ত্রীনা হায়খি ২১ শুবা চহিচাগী খুদোংচাদবশিং মীয়াম্না খঙনরে অমসুং মালেমগী অৱাবা তারকপদা মরুওইবা থৌদাং অমা লৌনবা ভারতনা মাঙলোমদা চোংথোরক্লি। মালেমগী চীঞ্জাক ৱাৎহন্দনবা ভারতনা মখা তানা মতেং পাংগনি। লৌমীশিং, শা-ষন লোইরিবশিং অমসুং ঙামীশিংনা থবক কন্না শুবদগী অমসুং সরকারগী থৌশিলশিংনা মতেং পাংবদগী ভারতকী লৌউ-শিংউগী থবক চাউখৎলকপনি। হৌখিবা চহি ১০ দা মহৈ-মরোং পুথোকপা শিংথাবা য়ানা হেনগৎলে। ভারত শঙ্গোম খ্বাইদগী য়াম্না পুথোকপা লৈবাক্নি, মালেমগী শঙ্গোম ফংহনবগী চাদা ২৫ মতেং পাংলি অমসুং মিল্লেতশিং পুথোকপা মাঙজিল থারি। চেঙ অমসুং গেহু পুথোকপদা ভারতনা মালেমগী ওইনা অনিশুবদা লৈরি অমসুং উহৈশিং, মনা-মশিং অমসুং ঙা মশক থোক্না পুথোক্লি। মালেমগী মহৈ-মরোংগী অৱাবা নত্ত্রগা ফংহনবগী থবকশিংদা অপনবা লাকপা মতমদা, ভারতনা লেংদনা লৈরি অমসুং লৈবাক অসিগী থৌদাং পাংথোক্কনি।

প্রধান মন্ত্রীনা হায়খি মরী লৈনবা খুদিংমক্কা থবক তৌমিন্নদুনা চীঞ্জাক অমসুং মচি ওইবা পোৎলমশিংগী থবকশিং সরকারনা ফগৎহল্লি। এফ.দি.আই চাদা ১০০ অয়াবা পীদুনা চীঞ্জাক শেম-শাবগী হিরম মপুংফানা য়োকখৎলে। হিরম অসি পি.এল.আই স্কিম অমসুং অচৌবা ফুদ পার্কশিংগী কান্নবা ফংলে। মালেমগী খ্বাইদগী চাউবা ষ্টোরেজ ইনফ্রাষ্ট্রকচর স্কিম হৌজিক ভারত্ত পায়খৎলি। সরকারগী থবকশিং অসিগী মহৈ ফংলে, হৌখিবা চহি ১০ দা ভারতকী শেম-শাবগী থবক শরুক ২০ হেনগৎলে অমসুং শেম-শারবা চীঞ্জাক মপান্দা থাদোকপা শরুক অনি হেল্লে।

ভারতকী চীঞ্জাক ফংহনবা অমসুং ভেলু চেন্দা লৌমীশিং, শা-ষন লোইরিবশিং, ঙামীশিং অমসুং অপীকপা প্রোসেসিং য়ুনিতশিংনা মরুওইবা থৌদাং লৌরি। হৌখিবা চহি ১০ দা সরকারনা মরী লৈনবা খুদিংমক মপাঙ্গল কনখৎহল্লে। ভারত্ত লৌমীশিংগী চাদা ৮৫ লায়রবা লৌমীশিংনি অমসুং মরম অদুনা মখোয়গী ফিবম ফগৎনবা থৌশিলশিং শেম্লে অমসুং মতেং পাংনবা থবকশিং পায়খৎলে। ঙসিদি, কৈথেলদা অপীকপা লৌমীশিংনা অচৌবা শাফু অমা ওইরক্লে।

প্রধান মন্ত্রীনা হায়খি ভারত শীনবা থুংবগী খুঞ্জাশিং য়াওনা সেল্ফ-হেল্প গ্রুপশিংনা অপীকপা চীঞ্জাক শেম-শাবগী য়ুনিতশিং থবক তৌরি। ক্রেদিদ-লিঙ্ক সবসিদিশিংগী খুৎথাংদা কাংবু অসি সরকারনা মতেং পাংলি অমসুং হৌজিক ফাওবদা লুপা করোর ৮০০ ফংহনখ্রে। ২০১৪ দগী ফার্মর প্রদুসর ওর্গনাইজেসন ১০,০০০ লিংখৎখ্রে অমসুং লৌমী লাখ কয়া শম্নহল্লে। মখোয়গী পোৎথোকশিং অচৌবা কৈথেলশিংদা য়োনবদা ফার্মর প্রদুসর ওর্গনাইজেসনশিংনা লৌমীশিংগী মতেং পাংলি অমসুং মমিং চৎখৎলক্লিবা ব্রান্দশিংনা চীঞ্জাক শেম-শাবদা মরুওইবা থৌদাং অমা লৌরি। ভারতকী ফার্মর প্রদুসর ওর্গনাইজেসনশিংগী মপাঙ্গল অঙকপনি, হৌজিক পোৎথোক ১৫,০০০ হেন্না ওনলাইন প্লেতফোর্মশিংদা ফংলে। খুদম ওইনা, বাসমতি চেঙ, সেফ্রোন অমসুং কাস্মিরগী ৱালনতশিং; হিমাচলগী জাম অমসুং এপল মহি; রাজস্থানগী মিল্লেত; মধ্য প্রদেসকী সোয়া নগ্গেতশিং; বিহারগী থাংজিং; মহারাষ্ট্রাগী পিনত থাউ অমসুং চিনি অঙাংবা; কেরলাগী লফোগী চিপশিং অমসুং য়ুবী থাউ য়াওরি। কাস্মিরদগী কন্যাকুমারি ফাওবা ফার্মর প্রদুসর ওর্গনাইজেসনশিংনা ভারতকী লৌউ-শিংউগী পোৎথোকশিং য়ুমথোং খুদিংদা ফংহল্লে। চহি অমদা লুপা করোর ১ হেনবগী ললোন-ইতিক পাংথোক্তুনা ফার্মর প্রদুসর ওর্গনাইজেসন ১,১০০ হেন্না মিল্লিয়ন্নরিশিং ওইরে অমসুং লৌমীশিংগী শেন্থোক হেনগৎহনবা অমসুং নহারোলশিংদা থবক ফংহন্নবা মরুওইবা থৌদাং অমা লৌরি।

প্রধান মন্ত্রীনা হায়খি ফার্মর প্রদুসর ওর্গনাইজেসনশিংগী মথক্ত, ভারত্ত কোওপরেতিপশিংগী অকনবা মপাঙ্গল লৈরি। চহি অসিদা মালেমগী কোওপরেতিপ চহি থোক্লে অমসুং ভারত মনুংদা কোওপরেতিপশিংনা দাইরি সেক্তর অমসুং খুঙ্গংগী শেন-থুমগী ফিবম ফগৎহল্লি। কোওপরেতিপশিংগী দরকার ওইবশিংগী মতুংইন্না থৌশিল শেম্নবা কৎথোক্লবা মিনিষ্ট্রি অমা লিংখৎলে। সেক্তর অসিদা তেক্স অমসুং অরোন-অথুপ লৈতনবগী অওনবশিং পুরক্লে। মসিগী ফল অমা ওইনা, কোওপরেতিপ সেক্তর ফগৎলে।

সমুদ্র অমসুং ঙা ফাবগী হিরমদা ভারত চাউখৎলে। হৌখিবা চহি ১০ দা সরকারনা ঙা য়োকপগা মরী লৈনবা ইনফ্রাষ্ট্রকচর শেমগৎলে অমসুং সমুদ্রগী অরুবা ইরোন্নুংদা ঙা ফানবা হিশিংগী মতেং পাংবা য়াওনা ঙামীশিংআদ শেন্থং পীরে। মসিগী ফল ওইনা সমুদ্রগী পোৎথোকশিং অমসুং মপান্দা থাদোকপা হেনগৎলে। সেক্তর অসিনা হৌজিক মীওই করোর ৩ রোম থবক ফংহল্লে। অনৌবা প্রোসেসিং প্লান্তশিং, কোল্দ চেন ইনফ্রাষ্ট্রকচর অমসুং স্মার্দ হর্বরশিং শেমগৎতুনা সমুদ্রগী পোৎথোকশিং শেম-শাবগী থবক ফগৎনবা থবকশিং পায়খৎলি। মহৈ-মরোশিং ঙাক-শেন্নবা লৌমীশিং ফুদ ইরাদিএসন তেক্নিকশিং শীজিন্নরে, মসিনা লৌউ-শিংউগী পোৎথোকশিংগী মপুন্সি শাংদোক্লে অমসুং চীঞ্জাক ৱাৎহন্দবা হেনগৎহল্লে। থবক অসি পায়খৎলিবা য়ুনিতশিং সরকারনা মতেং পাংলে।

প্রধান মন্ত্রীনা হায়খি তুংগী মীরোলশিংগী জি.এস.তিগী অওনবশিং য়াওনা ইন্নোবেসন অমসুং অওনবশিংগী অনৌবা লম্বী অমদা ভারত মাঙলোমদা চঙশিল্লি। হায়রিবা অওনবশিং অসিনা লৌমীশিংগী শেন চঙবা হন্থহন্নবা অমসুং শেন্দোং য়াম্না ফংহন্নবা থাজবা পীরি। হৌজিক বত্তর অমসুং ঘীদা জি.এস.তি চাদা ৫ খক লৌরে, কৌতাগী শঙ্গোমদা চাদা ৫ লৌরে, মসিনা লৌমীশিং অমসুং প্রদুসরশিংদা হেন্না ফবা মমল ফংহল্লে। মসিনা লায়রবা অমসুং মিদল ক্লাসগীদমক অহোংবা মমলদা মচি ওইবা চীঞ্জাক হেন্না ফংহল্লগনি। অওনবশিং অসি লাকপদগী খুদক্ত চাবা য়ারবা অমসুং লিদুনা থম্বা উহৈশিং, মনা-মশিং অমসুং নতশিংদা হৌজিক জি.এস.তি চাদা ৫ লৌরে। শেম-শারবা চীঞ্জাকশিংগী চাদা ৯০ হেন্না জিরো নত্ত্রগা চাদা ৫ গী তেক্স লৌরে। বাইও-পেষ্টিসাইদশিং অমসু মাইক্রো-ন্যুত্রিয়েন্তশিংদা জি.এস.তি হন্থরে।

প্রধান মন্ত্রীনা হায়খি পোৎথোকশিং তেক তেক লাউনা অমসুং মগুন লৈনা থম্নবা তঙাইফদবা অমা ওইরিবা মশা মরোমদোম তুম্বা ঙমজবা পেকেজিংগী পোৎলমশিং য়াম্না পাম্নরে, মসি মহৌশাগী অকোয়বা ফিবমগীদমক ঐখোয়গী থৌদাংগীদমকসু য়াম্না মরুওই। বাইওদিগ্রেদেবল পেকেজিংগা মরী লৈনবা অনৌবা থবকশিংদা মরী লৈনবা উদ্যোগশিংনা শেন থাগদবনি। ভারতনা পুকচেল তিংনা মসিগী থোঙ মালেমগীদমক হাংদোক্লে অমসুং ফুদ চেন শীনবা থুংবগী ইনভেষ্টরশিং তরাম্না ওক্কনি। পুন্না থবক তৌমিন্ননবা ভারতনা থৌরাং তৌদুনা লৈরে অমসুং থৌরম অসিদা শরুক য়ারিবা খুদিমক অমুক হন্না থাগৎপা ফোঙদোকচরি।

থৌরম অদুদা শরুক য়াখিবা অতোপ্পা শক্নাইরবশিংগী মনুংদা রুসিয়াগী দিপুতি প্রাইম মিনিষ্টর দিমিত্রি পাত্রুসেভ, য়ুনিয়ন মিনিষ্টরশিং শ্রী চিরাগ পাসৱান, শ্রী রবনিত সিংহ, শ্রী প্রাতাপ্রাউ যদব য়াওখি।

নুঙগীৱারোল

ন্যু দিল্লিগী ভারত মন্দপামদা সেপ্তেম্বর ২৫ দগী সেপ্তেম্বর ২৮ ফাওবা ৱার্ল্দ ফুদ ইন্দিয়া ২০২৫ পাংথোক্লি। মসিদা ফুদ প্রোসেসিং সেক্তর, ফুদ ষ্টেনেবিলিতি অমসুং মচি ওইবা চীঞ্জাক পুথোকপা অমসুং ওর্গনিক ফুদকী লমদা ভারতকী মপাঙ্গল উৎকনি।

ৱার্ল্দ ফুদ ইন্দিয়াদা, প্রধান মন্ত্রী ফোর্মেলাইজেসন ওফ মাইক্রো ফুদ প্রোসেসিং এন্তরপ্রাইজেস (পি এম এফ এম ই) স্কিমগী মখাদা লুপা করোর ২,৫১০ হেনবগী ফুদ প্রোসেসিং সেক্তরদা মাইক্রো প্রোজেক্তশিংগীদমক বেনিফিসরি ২৬,০০ রোমদা লুপা করোর ৭৭০ হেনবগী শেন্থং পীগনি।

ৱার্ল্দ ফুদ ইন্দিয়াদা সি.ই.ও রাউন্দ তেবলশিং, তেক্নিকেল সেসনশিং, একজিবিসনশিং অমসুং বি২বি (বিজিনেস-তু-বিজিনেস), বি২জি (বিজিনেস-তু-গবর্নমেন্ত), অমসুং জি২জি (গবর্নমেন্ত-তু-গবর্নমেন্ত) মীফমশিং য়াওনা ললোন-ইতিক মখল কয়াগী খন্ন-নৈনবা য়াওগনি। মসিদা ফ্রান্স, জর্মনি, ইরান, ওস্ত্রেলিয়া, খা কোরিয়া, দেনমার্ক, ইতালি, থাইলেন্দ, ইন্দোনেসিয়া, তাইৱান, বেলজিয়ম, তঞ্জানিয়া, ইরিত্রেয়া, সাইপ্রাস, অফগানিস্তান, চাইনা, অমসুং য়ু.এস.এ য়াওনা লৈবাক ২১ না শরুক য়াগনি অমসুং মালেমগী লৈবাকশিংদগী মীওই ১৫০ সু শরুক য়াগনি।

ৱার্ল্দ ফুদ ইন্দিয়ানা ভারত অসি গ্লোবেল ফুদ প্রোসেসিং মফম অমা ওইনা, চীঞ্জাক শেম-শাবদা সস্তেনেবিলিতী অমসুং নেৎ জিরো, চীঞ্জাক শেম-শাবদা লৈরিবা হিরমশিং, ভারতকী পেৎ ফুদ ইন্দস্ত্রি, ন্যুত্রিসন অমসুং হকশেলগীদমক শেম-শারবা চীঞ্জাক, প্লান্ত-বেজ ফুদ, ন্যুত্রাস্যুতিকেল্স, স্পেসিএলিতী ফুদ, অমসুং অতোপ্পা হিরম কয়াগী মতাংদা থিমেতিক সেসন কয়া পাংথোক্কনি। মসিদা পেভিলিয়ন 14 য়াওগনি, মখোয় অমমমনা অখন্নবা থিমশিংদা উৎকনি অমসুং মসিদা য়েংবা লাকপা মীওই ১০০,০০০ রোমগী পুক্নিং চীংশিনগনি।

Addressing the World Food India 2025 programme. https://t.co/x7wR33oiKX

— Narendra Modi (@narendramodi) September 25, 2025

India has the triple strength of diversity, demand and scale. pic.twitter.com/C0XgWdyP6Y

— PMO India (@PMOIndia) September 25, 2025

In the last 10 years, 25 crore people in India have overcome poverty. pic.twitter.com/kBKTaiZcT5

— PMO India (@PMOIndia) September 25, 2025

Today, India is the world's third-largest start-up ecosystem, with many start-ups working in the food and agriculture sectors. pic.twitter.com/0PvhS8QVS4

— PMO India (@PMOIndia) September 25, 2025

India is continuously contributing to global food security. pic.twitter.com/7PJ9YLESMy

— PMO India (@PMOIndia) September 25, 2025

Today, small farmers are becoming a major force in the market. pic.twitter.com/TdqffjLyWj

— PMO India (@PMOIndia) September 25, 2025

In India, cooperatives are giving our dairy sector and our rural economy a new strength. pic.twitter.com/wg6AJHzoeR

— PMO India (@PMOIndia) September 25, 2025

***