ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಮುಂಬೈನಲ್ಲಿ ನಡೆದ ಫೈನಾನ್ಷಿಯಲ್ ಎಕ್ಸ್‌ಪ್ರೆಸ್‌ನ ಭಾರತದ ಅತ್ಯುತ್ತಮ ಬ್ಯಾಂಕ್‌ಗಳ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಭಾಷಣ ಮಾಡಿದರು. ಈ ಕಾರ್ಯಕ್ರಮದಲ್ಲಿ ಮಹಾರಾಷ್ಟ್ರದ ಮುಖ್ಯಮಂತ್ರಿ ಶ್ರೀ ದೇವೇಂದ್ರ ಫಡ್ನವೀಸ್ ಮತ್ತು ಉಪ ಮುಖ್ಯಮಂತ್ರಿ ಶ್ರೀ ಏಕನಾಥ್ ಶಿಂಧೆ ಸೇರಿದಂತೆ ಹಲವಾರು ಗಣ್ಯರು ಭಾಗವಹಿಸಿದ್ದರು.

ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ತಮ್ಮ ಭಾಷಣದಲ್ಲಿ, ಶ್ರೀ ರಾಮನಾಥ್ ಗೋಯೆಂಕಾ ಅವರಿಂದ ಹಿಡಿದು ಶ್ರೀ ವಿವೇಕ್ ಗೋಯೆಂಕಾ ಅವರವರೆಗೆ ಎಕ್ಸ್‌ಪ್ರೆಸ್ ಗ್ರೂಪ್ ದೇಶದ ಸಾರ್ವಜನಿಕ ಜೀವನದ ಸಮಗ್ರತೆಯನ್ನು ಕಾಪಾಡಿಕೊಳ್ಳುವಲ್ಲಿ ಮಾಡಿದ ಕಾರ್ಯವನ್ನು ಇಡೀ ರಾಷ್ಟ್ರವು ಸ್ಮರಿಸಬೇಕು ಎಂದು ಹೇಳಿದರು.

2047ರ ವೇಳೆಗೆ ಭಾರತ, ವಿಶೇಷವಾಗಿ ಸಂಪೂರ್ಣ ಅಭಿವೃದ್ಧಿ ಹೊಂದಿದ ರಾಷ್ಟ್ರವಾಗುವುದು ಮತ್ತು ಜಾಗತಿಕವಾಗಿ ಪ್ರತಿಯೊಂದು ಕ್ಷೇತ್ರದಲ್ಲಿಯೂ ಮುನ್ನಡೆಸುವುದು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಗುರಿಯಾಗಿದೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಹೇಳಿದರು. ಈ ಗುರಿ ಪ್ರತಿಯೊಬ್ಬ ನಾಗರಿಕರ, ವಿಶೇಷವಾಗಿ ಯುವಕರ ಸಂಕಲ್ಪವಾಗಿದೆ. ದೇಶದ ಯುವ ಪೀಳಿಗೆಯ ಮೇಲೆ ನಮಗೆ ಸಂಪೂರ್ಣ ನಂಬಿಕೆ ಇರುವುದರಿಂದ 2047ರ ಮೊದಲು ಪ್ರಧಾನಿ ಮೋದಿಯವರ ದೃಷ್ಟಿಕೋನವನ್ನು ಸಾಧಿಸಲಾಗುವುದು ಎಂದು ಶ್ರೀ ಅಮಿತ್‌ ಶಾ ಹೇಳಿದರು.

ವಿವಿಧ ಜಾಗತಿಕ ಬಿಕ್ಕಟ್ಟುಗಳ ನಡುವೆ, ಭಾರತೀಯ ಆರ್ಥಿಕತೆಯು ಉಜ್ವಲ ತಾಣವಾಗಿ ಹೊರಹೊಮ್ಮುವುದು ನಮಗೆಲ್ಲರಿಗೂ ಬಹಳ ಹೆಮ್ಮೆಯ ವಿಷಯವಾಗಿದೆ. ಭಾರತವು ರಾಜಕೀಯ ಸ್ಥಿರತೆ, ವಿಶ್ವಾಸಾರ್ಹ ನಾಯಕತ್ವ, ದೃಢವಾದ ಆರ್ಥಿಕ ಕಾರ್ಯಕ್ಷಮತೆ ಮತ್ತು ಪ್ರಜಾಪ್ರಭುತ್ವದ ಬಲವಾದ ಅಡಿಪಾಯವನ್ನು ಸ್ಥಾಪಿಸಿದೆ. ಈ ನಾಲ್ಕು ಸ್ತಂಭಗಳ ಆಧಾರದ ಮೇಲೆ ದೀರ್ಘಕಾಲೀನ ನೀತಿಗಳನ್ನು ಬಳಸಿಕೊಂಡು, ನಮ್ಮ ಆರ್ಥಿಕತೆಯು ಕಳೆದ 11 ವರ್ಷಗಳಲ್ಲಿ ಗಮನಾರ್ಹ ಕಾರ್ಯಕ್ಷಮತೆಯನ್ನು ನೀಡಿದೆ. ಈ ನಾಲ್ಕು ಸ್ತಂಭಗಳು ಭಾರತದ ನಿಜವಾದ ಶಕ್ತಿ ಎಂದು ಶ್ರೀ ಅಮಿತ್‌ ಶಾ ಹೇಳಿದರು.

ಅನೇಕ ಅಭಿವೃದ್ಧಿ ಹೊಂದಿದ ದೇಶಗಳು ಶೇಕಡಾ 1 ರಿಂದ 2ರ ಬೆಳವಣಿಗೆಯ ದರದಲ್ಲಿ ಪ್ರಗತಿ ಸಾಧಿಸುತ್ತಿದ್ದರೆ, ಭಾರತ ಶೇಕಡಾ 7 ರಿಂದ 8ರ ಬೆಳವಣಿಗೆಯ ದರವನ್ನು ಉಳಿಸಿಕೊಂಡಿದೆ. ವಿದೇಶಿ ನೇರ ಹೂಡಿಕೆಯಲ್ಲಿ (ಎಫ್‌ಡಿಐ) ಭಾರತವು ಶೇಕಡಾ 14ರ ಬೆಳವಣಿಗೆಯ ದರವನ್ನು ಕಾಯ್ದುಕೊಂಡಿದೆ. ರಚನಾತ್ಮಕ ಸುಧಾರಣೆಗಳು, ಪ್ರಕ್ರಿಯೆಯ ಸರಳೀಕರಣ, ಡಿಜಿಟಲ್ ಆಡಳಿತ ಮತ್ತು ಕಲ್ಯಾಣ ಯೋಜನೆಗಳ 100% ಅನುಷ್ಠಾನದ ಮೂಲಕ ತನ್ನ ಬೆಳವಣಿಗೆಗಾಥೆಯನ್ನು ಉಳಿಸಿಕೊಂಡಿರುವ ಏಕೈಕ ದೇಶ ಭಾರತ ಎಂದು ಅವರು ಹೇಳಿದರು. ಜಾಗತಿಕ ಆರ್ಥಿಕ ವಿಶ್ಲೇಷಕರು ಭಾರತದ ಬೆಳವಣಿಗೆಯ ಕಥೆಯನ್ನು ಒಪ್ಪಿಕೊಳ್ಳುವಂತೆ ಒತ್ತಾಯಿಸಲಾಗಿದೆ. ಇಂದು, ಭಾರತದ ಆರ್ಥಿಕತೆಯಲ್ಲಿ ಹೂಡಿಕೆದಾರರ ಅಚಲ ವಿಶ್ವಾಸ, ಗ್ರಾಹಕರಲ್ಲಿ ಶಕ್ತಿ ಮತ್ತು ಸಮಗ್ರ ಅಭಿವೃದ್ಧಿಯ ಸ್ಪಷ್ಟ ಪ್ರತಿಬಿಂಬವಿದೆ. ಇಂದು ದೇಶದ ಪ್ರತಿಯೊಂದು ಮೂಲೆಯಲ್ಲೂ ನಂಬಿಕೆ ಮತ್ತು ವಿಶ್ವಾಸದ ಈ ವಾತಾವರಣ ಗೋಚರಿಸುತ್ತಿದೆ ಎಂದು ಶ್ರೀ ಅಮಿತ್‌ ಶಾ ಒತ್ತಿ ಹೇಳಿದರು.

2014ರಲ್ಲಿ ನಮ್ಮ ದೇಶದ ಬ್ಯಾಂಕಿಂಗ್ ಕ್ಷೇತ್ರದ ಸ್ಥಿತಿ ಕಳಪೆಯಾಗಿತ್ತು. 2008 ಮತ್ತು 2014ರ ನಡುವೆ, ಒಟ್ಟು ₹ 52 ಲಕ್ಷ ಕೋಟಿ ಮೌಲ್ಯದ ಸಾಲಗಳನ್ನು ವಿತರಿಸಲಾಯಿತು, ಕೆಟ್ಟ ಸಾಲಗಳು ಪ್ರಮುಖ ಸಮಸ್ಯೆಗೆ ಕಾರಣವಾಯಿತು. ಭಾರತದ ಬ್ಯಾಂಕಿಂಗ್ ವಲಯವು ದಾಖಲೆಗಳ ನಿರ್ವಹಣೆಯಲ್ಲಿ ನಿರ್ಲಕ್ಷ್ಯ, ಪಾರದರ್ಶಕತೆಯ ಕೊರತೆ ಮತ್ತು ಭ್ರಷ್ಟಾಚಾರದಿಂದ ಬಳಲುತ್ತಿದೆ ಎಂದು ಹೇಳಿದರು. 2014ರಲ್ಲಿ, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಸುಧಾರಣೆಗಳನ್ನು ಪ್ರಾರಂಭಿಸಿದರು. ನಮ್ಮ ಸಂವಿಧಾನದ ಅಡಿಪಾಯಕ್ಕೆ ಆರ್ಥಿಕತೆಯೂ ಸೇರ್ಪಡೆಯಾಗಿದೆ, ಆದರೆ ದೇಶದಲ್ಲಿ ಒಂದೇ ಒಂದು ಬ್ಯಾಂಕ್ ಖಾತೆ ಇಲ್ಲದ ಕುಟುಂಬಗಳ ಸಂಖ್ಯೆ 60 ಕೋಟಿ ಇತ್ತು. ಕಳೆದ 10 ವರ್ಷಗಳಲ್ಲಿ, ನಮ್ಮ ಸರ್ಕಾರವು 53 ಕೋಟಿ ಬ್ಯಾಂಕ್ ಖಾತೆಗಳನ್ನು ತೆರೆದಿದೆ, ಇದರಿಂದಾಗಿ ಬಡ ವ್ಯಕ್ತಿಗಳನ್ನು ಸಹ ಬ್ಯಾಂಕಿಂಗ್ ವ್ಯವಸ್ಥೆಗೆ ಸಂಪರ್ಕಿಸಲಾಗಿದೆ ಎಂದರು.

1999ರಲ್ಲಿ ದೇಶದ ಒಟ್ಟು ಅನುತ್ಪಾದಕ ಆಸ್ತಿಗಳು (NPA) ಶೇಕಡಾ 16 ರಷ್ಟಿತ್ತು. 2004ರಲ್ಲಿ, ಅಟಲ್ ಜಿ ಅವರ ಸರ್ಕಾರದ ಅವಧಿಯಲ್ಲಿ, ಅದು ಶೇಕಡಾ 7.8 ಕ್ಕೆ ಇಳಿಯಿತು, ಆದರೆ ನಂತರದ ಹತ್ತು ವರ್ಷಗಳ ಕಾಂಗ್ರೆಸ್‌ ಆಳ್ವಿಕೆಯಲ್ಲಿ, ಅದು ಶೇಕಡಾ 19ಕ್ಕೆ ಏರಿತು. ಪ್ರಧಾನಮಂತ್ರಿ ಮೋದಿಯವರ 10 ವರ್ಷಗಳ ಆಡಳಿತದಲ್ಲಿ, ಕೆಟ್ಟ ಸಾಲಗಳು ಶೇಕಡಾ 19 ರಿಂದ 2.5ಕ್ಕೆ ಇಳಿದಿವೆ. ಪಾರದರ್ಶಕ ಆಡಳಿತವು ಹೇಗೆ ಬದಲಾವಣೆಯನ್ನು ತರುತ್ತದೆ ಎಂಬುದಕ್ಕೆ ಇದು ಒಂದು ಉದಾಹರಣೆಯಾಗಿದೆ. ನಾವು ಬ್ಯಾಂಕಿಂಗ್ ವಲಯಕ್ಕೆ 4-ಆರ್ ನೀತಿಯನ್ನು ರೂಪಿಸಿದ್ದೇವೆ. ಅವುಗಳೆಂದರೆ ಗುರುತಿಸಿ, ಮರುಪಡೆಯಿರಿ, ಮರುಬಂಡವಾಳೀಕರಣ ಮತ್ತು ಸುಧಾರಣೆಗಳು. ಮತ್ತು ಇದರ ಆಧಾರದ ಮೇಲೆ, ದೇಶದ ಆರ್ಥಿಕತೆಯು ಒಂದು ಪ್ರಮುಖ ಪರಿವರ್ತನೆಗೆ ಒಳಗಾಯಿತು ಎಂದು ಶ್ರೀ ಅಮಿತ್‌ ಶಾ ಹೇಳಿದರು. ಮಿಷನ್ ಇಂದ್ರಧನುಷ್ ಮೂಲಕ, ನಮ್ಮ ಸರ್ಕಾರವು ಸುಮಾರು ₹3.10 ಲಕ್ಷ ಕೋಟಿ ಬಂಡವಾಳವನ್ನು ಬ್ಯಾಂಕುಗಳಿಗೆ ತುಂಬಿದೆ. ಕಳೆದ 10 ವರ್ಷಗಳಲ್ಲಿ, ಮೋದಿ ಸರ್ಕಾರವು ಬ್ಯಾಂಕಿಂಗ್ ವಲಯದಲ್ಲಿ ಮಾತ್ರ 86 ಪ್ರಮುಖ ಸುಧಾರಣೆಗಳನ್ನು ಮಾಡಿದೆ ಎಂದು ಅಮಿತ್‌ ಶಾ ಶಾ ಹೇಳಿದರು.

ಮೇಕ್ ಇನ್ ಇಂಡಿಯಾ ಮೂಲಕ ಪ್ರಧಾನಮಂತ್ರಿ ಮೋದಿ ನೀತಿ ಬದಲಾವಣೆಗಳನ್ನು ತಂದಿದ್ದಾರೆ ಮತ್ತು ಭಾರತವನ್ನು ಜಾಗತಿಕ ಉತ್ಪಾದನಾ ಕೇಂದ್ರವನ್ನಾಗಿ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ನಮ್ಮ ರಫ್ತು ಪ್ರಮಾಣ ಹೆಚ್ಚುತ್ತಿದೆ, ಮತ್ತು ಮೇಕ್ ಇನ್ ಇಂಡಿಯಾ 2.0 ಅಡಿಯಲ್ಲಿ, ನಾವು ಉದಯೋನ್ಮುಖ ವಲಯಗಳ ಮೇಲೆ ಕೇಂದ್ರೀಕರಿಸುತ್ತಿದ್ದೇವೆ. ಪಿಎಲ್ಐ ಪ್ರೋತ್ಸಾಹಕಗಳು, ಕೈಗಾರಿಕಾ ಕಾರಿಡಾರ್‌ಗಳು, ಲಾಜಿಸ್ಟಿಕ್ಸ್ ಪಾರ್ಕ್‌ಗಳು ಮತ್ತು ಸ್ಟಾರ್ಟ್ಅಪ್ ಇಂಡಿಯಾ ಮೂಲಕ ನಾವು ಮುಂದುವರಿಯುತ್ತಿದ್ದೇವೆ. ಈ ಉದಯೋನ್ಮುಖ ವಲಯಗಳು ಮುಂಬರುವ ದಿನಗಳಲ್ಲಿ ಭಾರತದ ಬೆಳವಣಿಗೆಯ ಕಥೆಯನ್ನು ಬಲಪಡಿಸುತ್ತವೆ. ಇದು ಬ್ಯಾಂಕಿಂಗ್ ವಲಯ ಮಾತ್ರವಲ್ಲ, ಮೋದಿ ಸರ್ಕಾರವು ಪ್ರತಿಯೊಂದು ವಲಯದಲ್ಲಿ ಹಲವಾರು ಸುಧಾರಣೆಗಳನ್ನು ಜಾರಿಗೆ ತಂದಿದೆ. ಹಿಂದಿನ ಸರ್ಕಾರದಲ್ಲಿ ನೀತಿ ಕಳಪೆಯಾಗಿತ್ತು. ಆದರೆ ನಾವು ಅದನ್ನು ಬದಲಾಯಿಸಿದ್ದೇವೆ ಮತ್ತು ಭಾರತವನ್ನು ನೀತಿ-ಚಾಲಿತ ರಾಜ್ಯವಾಗಿ ಪರಿವರ್ತಿಸಿದ್ದೇವೆ ಎಂದು ಸಚಿವರು ಹೇಳಿದರು.

ನಂತರ, ಫೈನಾನ್ಷಿಯಲ್ ಎಕ್ಸ್‌ಪ್ರೆಸ್‌ಗೆ ನೀಡಿದ ಸಂದರ್ಶನದಲ್ಲಿ, ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಹಲವಾರು ವಿಷಯಗಳನ್ನು ಹಂಚಿಕೊಂಡಿದ್ದಾರೆ. 

ಪ್ರತಿಪಕ್ಷಗಳು ಜಿಎಸ್‌ಟಿ ತಮ್ಮ ಉಪಕ್ರಮ ಎಂದು ಹೇಳಿಕೊಳ್ಳುತ್ತವೆ, ಆದರೆ ಅದನ್ನು ಎಂದಿಗೂ ಏಕೆ ಜಾರಿಗೆ ತರಲಿಲ್ಲ. ಪ್ರಧಾನಮಂತ್ರಿ ಮೋದಿ ರಾಜ್ಯ ಸರ್ಕಾರಗಳಿಗೆ ಶೇಕಡಾ 14 ರಷ್ಟು ಬೆಳವಣಿಗೆಯ ಭರವಸೆ ನೀಡಿದಾಗ ಮಾತ್ರ ಜಿಎಸ್‌ಟಿ ಜಾರಿಗೆ ತರಲಾಯಿತು. ಜಿಎಸ್‌ಟಿ ಸಂಗ್ರಹವು ₹2 ಲಕ್ಷ ಕೋಟಿ ದಾಟಿದ ನಂತರ, ಜಿಎಸ್‌ಟಿ ಮೂಲಕ ಜನರಿಗೆ ಪರಿಹಾರ ನೀಡಬೇಕೆಂದು ಸರ್ಕಾರ ನಿರ್ಧರಿಸಿದೆ. ಸ್ವಾತಂತ್ರ್ಯದ ನಂತರ, ಪ್ರಧಾನಮಂತ್ರಿ ಮೋದಿ ಮಾಡಿದಂತೆ ದೊಡ್ಡ ತೆರಿಗೆ ಕಡಿತವನ್ನು ಯಾರೂ ಮಾಡಿಲ್ಲ ಎಂದು ಅವರು ಹೇಳಿದರು.

ರಾಷ್ಟ್ರೀಯ ಶಿಕ್ಷಣ ನೀತಿ 2020ರಲ್ಲಿ, ಮೋದಿ ಸರ್ಕಾರವು ಕೌಶಲ್ಯ ಅಭಿವೃದ್ಧಿಯನ್ನು ವಿಜ್ಞಾನ ಮತ್ತು ಎಂಜಿನಿಯರಿಂಗ್ ಅಧ್ಯಯನಕ್ಕೆ ಸಂಯೋಜಿಸಿದ್ದಲ್ಲದೇ, ಪ್ರತಿಯೊಂದು ಅಧ್ಯಯನ ಕ್ಷೇತ್ರದಲ್ಲೂ ಕೌಶಲ್ಯಕ್ಕೆ ಅವಕಾಶವನ್ನು ಸೃಷ್ಟಿಸಿದೆ. ಭಾರತದಲ್ಲಿ ಪ್ರತಿಭೆ ಅಥವಾ ಶ್ರಮಶೀಲ ಜನರ ಕೊರತೆಯಿಲ್ಲ. ಕೌಶಲ್ಯ ಅಂತರವನ್ನು ಕಡಿಮೆ ಮಾಡಲು, ಭಾರತ ಸರ್ಕಾರವು ಅತ್ಯಂತ ಪರಿಣಾಮಕಾರಿ ನೀತಿಗಳನ್ನು ಪರಿಚಯಿಸಿದೆ. ಕೌಶಲ್ಯ, ಸಂಶೋಧನೆ ಮತ್ತು ನಾವೀನ್ಯತೆ ಕ್ಷೇತ್ರಗಳಲ್ಲಿ ಶೀಘ್ರದಲ್ಲೇ ಭಾರತವು ಜಾಗತಿಕ ವೇದಿಕೆಯಲ್ಲಿ ತನ್ನ ಸ್ಥಾನವನ್ನು ಭದ್ರಪಡಿಸಿಕೊಳ್ಳುತ್ತದೆ ಎಂದು ಸಚಿವರಾದ ಶ್ರೀ ಅಮಿತ್‌ ಶಾ ಹೇಳಿದರು.

*****