হরিয়ানাগী মীয়াম্না পাম্নরবা মুখ্য মন্ত্রী শ্রী নয়াব সিংহ সাইনি জী, কেন্দ্রগী মন্ত্রীমন্দলদা ঐহাক্কী মরুপ মনোহর লাল জী, রাও ইন্দ্রজিৎ সিংহজী অমসুং কৃষ্ণ পালজী, হরিয়ানা সরকারগী মন্ত্রীশিং, পার্লিয়ামেন্ত অমসুং লেজিস্লেতিব এসেমব্লীগী মীহুৎশিং অমসুং ঐহাক্কী নুংশিরবা ইচিল-ইনাওশিং। হরিয়ানাগী ঐহাক্কী ইচিল-ইনাওশিংদা মোদীনা খুরুমজরি।

মরুপশিং,

ঙসি, ঐহাক্না সরস্বতী মমাগী হৌরকফম ওইরিবা, দেবী মন্ত্র লৈফম ওইরিবা, মকোক মঙাগী লোর্দ হনুমান লৈফম ওইরিবা, কপালমোচন সাহিবকী য়াইফ পাউজেল ফংফম ওইরিবা, অমসুং কলচর, থাজবা অমসুং ভক্তিগী অপুনবা মফম অসিদা ইকায় খুম্নবা উৎচরি। ঙসি অসি বাবাসাহেব অম্বেদকরজীগী ১৩৫শুবা মপোক কুমওনসুনি। অম্বেদকর জয়েন্তীদা লৈবাক অসিগী নাগরিক পুম্নমক্তা ঐহাক্না নুংঙাইবা ফোংদোকচরি। বাবাসাহেবকী মীৎয়েং অমসুং ইথিলনা ঐখোয়বু 'বিক্সিত ভারত' (চাউখৎলবা ভারত) অমগী খোঙচৎতা লমজিংদুনা চৎলি।

মরুপশিং,

য়ামুনানগর অসি শহর অমা খক্তা নত্তে, মসি ভারতকী ইন্দস্ত্রীএল মেপকী মরুওইবা শরুক অমসু ওইরি। প্লাইউদতগী হৌরগা ব্রাস অমসুং স্তীল ফাওবদা, লমদম অসিনা ভারতকী শেন্মিৎলোনবু মপাঙ্গল কনখৎহল্লি। তশেংনমক, মসিদা কাপাল মোচান মেলা, ঋষি বেদ ভ্যাসকী তপস্যা তৌফম, অমসুং গুরু গোবিন্দ সিংহজীগী খুৎলাইশিংগী লমসু লৈ।

মরুপশিং,

মসি মশামক চাউথোকচনিংঙাই ওইবা ৱাফম অমনি। অমসুং মনোহর লালজী অমসুং সাইনিজীনা হায়খিবা অদুগুম্না, য়ামুনানগরগা মরী লৈনবা ঐহাক্কী অরিবা মেমোরী কয়া লৈ। ঐহাক্না হরিয়ানাগী থৌদাং লৌরিঙৈদা, ঐহাক্না পঞ্চকুলা অমসুং মফমসিগী মরক্তা তোইনা চৎখি। ঐহাক্না মফম অসিদা অরিবা মতমগী পার্তীগী থৌনা ফরবা মীওই কয়াগা লোয়ননা থবক তৌমিন্নবগী খুদোংচাবা ফংখি। থবক কন্না তৌবগী চৎনবী অসি ঙসি ফাওবা চৎনরি।

মরুপশিং,

মথং-মথং অহুমশুবা ওইনা, হরিয়ানাদা দবল ইঞ্জিন সরকারগী মখাদা চাউখৎ-থৌরাংগী অওনবা পুরকপগী চাং শরুক অনি হেনগৎলক্লি। অমসুং হৌজিক, সাইনি জীনা হায়খিবগুম্না, মসি ত্রিপল গবর্নমেন্তগুম্না ওইরে। বিক্সিত ভারতকীদমক বিক্সিত হরিয়ানা, মসি ঐখোয়গী ৱারেপ্নি। ৱারেপ অসি মপুং ফাহন্নবা, হরিয়ানাগী মীয়ামগী সেবা তৌনবা অমসুং মসিগী নহাশিংগী মঙলানশিং মংফাওহন্নবা ঐখোয়না হেন্না থুনা অমসুং পাক-শন্না থবক তৌরি। ঙসি হৌদোকখিবা চাউখৎ-থৌরাংগী প্রোজেক্তশিং অসি মসিগী অশেংবা খুদম্নি। চাউখৎ-থৌরাংগী থৌরাংশিং অসিগীদমক ঐহাক্না হরিয়ানাগী মীয়ামদা থাগৎপা ফোংদোকচরি।

মরুপশিং,

ঐখোয়গী সরকার অসিনা বাবাসাহেবকী ৱাখল্লোনশিং পুদুনা মাংলোমদা চংশিল্লিবা অসিদা ঐহাক চাউথোকচৈ। বাবাসাহেব অম্বেদকরনা ইন্দস্ত্রীএল দিবেলপমেন্তবু সোসিএল জস্তিসকী লম্বী অমা ওইনা উখি। বাবাসাহেবনা ভারত্তা অপীকপা লম লৈবগী ইসু অদু খঙখি। বাবাসাহেবনা হায়খি মদুদি দলিতশিংদা লৌউ-শিংউগীদমক মতীক চাবা লম লৈতে, মরম অদুনা ইন্দস্ত্রীশিংনা মখোয়দা খ্বাইদগী কান্নবা পীগনি। বাবাসাহেবকী ভিজনদি ইন্দস্ত্রীশিংনা দলিতশিংগীদমক থবক হেন্না ফংহল্লগনি অমসুং মখোয়গী পুন্সি মহিং ফগৎহল্লগনি হায়বসিনি। বাবাসাহেবনা লৈবাক অসিগী অহানবা ইন্দস্ত্রী মন্ত্রী, দা. শায়মা প্রসাদ মুকরজীনা ভারত্তা ইন্দস্ত্রিএলাইজেসনগী মাইকৈদা পুন্না থবক তৌখি।

মরুপশিং,

দীনবন্ধু চৌধরী ছোতো রামজীনা ইন্দস্ত্রীলাইজেসন অমসুং মেন্যুফেকচরিংগী মরক্তা লৈরিবা হার্মোনি অসি খুঙ্গংগী চাউখৎপগী য়ুম্ফমনি হায়না লৌখি। মহাক্না হায়রম্মি মদুদি লৌউ-শিংউবদা নত্তনা অপীকপা ইন্দস্ত্রীশিংগী খুত্থাংদা লৌমীশিংনা মখোয়গী শেন্থোক হেনগৎলকপা মতমদা খুঙ্গংশিংদা অশেংবা চাউখৎপা লাক্কনি। খুঙ্গংশিং অমসুং লৌমীশিংগী য়াইফনবা মহাক্কী পুন্সি কৎথোকখিবা চৌধরী চরন সিংহজীগী ৱাখল্লোন অসিসু মসিগা খেন্নবা ওইদে। চৌধরী সাহেবনা হায়খি মদুদি ইন্দস্ত্রীএল দিবেলপমেন্তনা লৌউ-শিংউগী থবকশিংবু মপুং ফাহনগদবনি। অনিমক অসি ঐখোয়গী শেন্মিৎলোনগী য়ুম্বীনি।

মরুপশিং,

হায়রিবা ৱাখল্লোন অসি, ৱাখল্লোন অসিমক, থৌনা অসি 'মেক ইন ইন্দিয়া' অমসুং 'আত্মনির্ভর ভারত' (মীপাল তাংদবা ভারত) গী মপুং ওইবা ৱাখল্লোননি। মরম অসিনা ঐখোয়গী সরকারনা ভারত্তা মেনুফেকচরিংদা অকনবা মীৎয়েং থম্লি। চহি অসিগী বজেৎতা, ঐখোয়না মিসন মেনুফেকচরিং লাউথোকখি। মসিগী পান্দমদি দলিত, শোত্থরবা, তুহৎপরিরবা অমসুং খুদোংচাবা ফংদ্রবা কাংলুপশিংগী নহারোলশিংদা থবক পীবা, নহারোলশিংদা ত্রেনিং পীবা, ললোন-ইতিক্কী মমল হন্থহনবা, এম.এস.এম.ই. সেক্তরবু মপাঙ্গল কনখৎহনবা, ইন্দস্ত্রীশিংবু তেক্নোলোজীদগী কান্নবা ফংহন্নবা অমসুং ঐখোয়গী পোত্থোকশিংবু মালেমদা খ্বাইদগী ফবা ওইহন্নবা হোৎনবনি। হায়রিবা পান্দমশিং অসি ফংনবগীদমক, লৈবাক অসিনা মৈগী অৱাৎপা অমত্তা থেংনরোইদবনি হায়বসি য়াম্না মরু ওই। ঐখোয়না ইনর্জীগী লমদসু মরোমদোম লেপচবা ঙম্বা ওইগদবনি। মরম অসিনা ঙসিগী থৌরম অসি য়াম্না মরু ওই। ঙসিদি, দীনবন্ধু চৌধরী ছোতো রাম থর্মেল পাৱর প্লান্তকী অহুমশুবা য়ুনিৎকী থবক হৌখ্রে। মসিনা য়ামুনানগর অমসুং মসিগী ইন্দস্ত্রীশিংদা কান্নবা ফংহল্লগনি। ভারতকী প্লাইউদ পুথোকপগী শরুক অমা য়ামুনানগরদা থোকই। অলুমিনিয়ম, কোপর, অমসুং ব্রাসকী খুৎলাইশিং অসি মফম অসিদা পাক-শন্না শাবগী থবক পায়খৎলি। পেত্রোকেমিকেল প্লান্তশিংগীদমক মফম অসিদা শাবা ইক্বিপমেন্ত অসি মালেমগী লৈবাক কয়াদা এক্সপোর্ত তৌরি। ইলেক্ত্রিসিতী পুথোকপা হেনগৎলকপনা সেক্তরশিং অসিদা কান্নবা ফংহল্লগনি, অমসুং মসিনা মফম অসিদা মিসন মেন্যুফেকচরিংদা পুক্নিং থৌগৎলগনি।

মরুপশিং,

ইলেক্ত্রিসিতীনা 'বিক্সিৎ ভারত' অমা শেমগৎপদা অচৌবা থৌদাং অমা লৌগনি। ঐখোয়গী সরকারনা ইলেক্ত্রিসিতী ফংহন্নবা মায়কৈ পুম্নমক্তা থবক পায়খৎলি। ৱান নেসন-ৱান গ্রিদ ইনিসিএতিব ওইগেরা, অনৌবা কোল পৱার প্লান্ত ওইগেরা, সোলার ইনর্জী ওইগেরা, নত্রগা ন্যুক্লিয়র সেক্তর পাকথোক চাউথোকহনগেরা, ঐখোয়গী খোঙথাং অসি মৈ পুথোকপা হেনগৎহন্নবা হোৎনবনি। মসিনা মরম ওইদুনা মৈ ফংদবনা লৈবাক শেমগৎপদা অৱাবা ওইহল্লোইদবনি।

অদুবু মরুপশিং,

ঐখোয়না কংগ্রেসনা লৈঙাক পায়রম্বা মতমশিং অসি কনাগুম্বা অমত্তনা কাউরোইদবনি। ২০১৪গী মমাংদা, কংগ্রেসনা লৈঙাক পায়রিঙৈদা, লৈবাক শিনবা থুংনা নুমিৎ কয়ামরুম মৈ ফংদ্রিঙৈ ঐখোয়না উখি। করিগুম্বা কংগ্রেস সরকার অসিনা মখা চত্থরম্লবদি, লৈবাক অসিনা ঙসিসু অসিগুম্বা ব্লেক আউত থেংনরমগনি। ফেক্টরিশিং মথৌ তৌরোই, ত্রেনশিং মথৌ তৌরোই, অমসুং লমশিংদা ঈশিং য়ৌরোই। অতোপ্পা ৱাহৈদা হায়রবদা, করিগুম্বা কংগ্রেসনা হৌজিকসু লৈঙাক পায়রবদি, অসিগুম্বা অৱাবা অসি মখা তানা লৈরমগনি, অমসুং লৈবাক অসি তোখাই-তোখাইনা লৈরমগনি। অদুবু চহি কয়াগী খোঙথাং অসিগী মতুংদা, ফীভম অসি ঙসিদি হোংলক্লি। হৌখিবা চহি তরা অসিদা ভারতনা মৈ পুথোকপগী কেপাসিতী অসি শরুক অনি হেনগৎহনখ্রে। ঙসি ভারতনা মশাগী মথৌ তাবশিং ফংবতা নত্তনা য়ুম্লোন্নরিবা লৈবাকশিংদা মৈসু এক্সপোর্ত তৌরি। বি.জে.পি. সরকারনা পাৱর জেনরেসনদা মীৎয়েং চংবা অসিনা হরিয়ানাদসু কান্নবা ফংহল্লে। ঙসিদি, হরিয়ানাদা ইলেক্ত্রিসিতী মেগাৱাত ১৬,০০০ পুথোক্লি। ঐখোয়না মসিগী কেপাসিতী অসি অথুবা মতমদা মেগাৱাৎ ২৪,০০০দা হেনগৎহন্নবা পান্দমগা লোয়ননা থবক তৌরি।

মরুপশিং,

নাকল অমরোমদা, ঐখোয়না থর্মেল পৱার প্লান্তশিংদা শেল থাদরি। অদুগা নাকল অমরোমদা, ঐখোয়না লৈবাক অসিগী মীয়াম্বু মশা মশাগী পৱার জেনরেতর ওইহল্লি। ঐখোয়না পি.এম. সুর্য়গর মুফ্ত বিজলী য়োজনা হৌদোক্লে। মখোয়গী য়ুমথকশিংদা সোলার পেনেলশিং ইনস্তোল তৌদুনা, মীয়াম্না মখোয়গী ইলেক্ত্রিসিতীগী বিল অসি শুপ্নগী জিরো ওইহন্দুনা হন্থহনবা ঙম্মি। মসি খক নত্তনা, অহেনবা ইলেক্ত্রিসিতী অমবু অহেনবা শেন্দোং ফংনবগীদমক্তা য়োনবা য়াই। হৌজিক ফাওবদা, লৈবাক শিনবা থুংনা মীওই করোর ১.২৫ হেন্না স্কিম অসিগী মখাদা রেজিস্তর তৌখ্রে। ঐহাক্না হরিয়ানাগী মীওই লাখ কয়ানা মসিগী খোঙথাং অসিদা শরুক য়ানবা এপ্লাই তৌরকপদা নুংঙাইবা ফাওই। অমসুং মসিগী স্কিম অসি পাকথোক চাউথোকপা হেনগৎলকপগা লোয়ননা মসিগী অকোইবদা লৈরিবা সর্ভিস ইকোসিস্তেম অসিসু চাউখৎলক্লি। সোলর সেক্তরদা অনৌবা স্কিলশিং শেমগৎলি। এম.এস.এম.ই.শিংগীদমক অনৌবা খুদোংচাবশিং হাংলি, অমসুং নহারোলশিংগীদমক মশিং য়াম্লবা ওইথোকপা য়াবশিং শেমগৎলি।

মরুপশিং,

ঐখোয়গী অপীকপা শহরশিংদা অপীকপা ইন্দস্ত্রীশিংদা মতিক চাবা মৈ ফংহনবগা লোয়ননা, সরকারনা মখোয়দা মতিক চাবা শেন-থুমগী রিসোর্সশিং লৈহন্নবা হোৎনরি। কোবিদকী মতম অসিদা, সরকারনা এম.এস.এম.ই.শিং অসি কনবা ঙম্নবা লুপা করোর লাখ কয়াগী শেন-থুমগী তেংবাং পীখি। এম.এস.এম.ই.শিংগী ৱাহন্থোকসু ঐখোয়না হোংদোক্লে। মসিনা অপীকপা বিজিনেসশিং অসি শিংনবা লৈতনা পাকথোক চাউথোকপা ঙম্লগনি। হৌজিক অপীকপা ইন্দস্ত্রীশিং অসি মখোয়না চাউখৎলকপা মতমদা সরকারগী মতেং অসি ফংলরোই হায়বগী অকিবা লৈত্রে। হৌজিক, সরকারনা অপীকপা ইন্দস্ত্রীশিংগীদমক অখন্নবা ক্রেদিৎ কার্দশিং হৌদোক্লে। ক্রেদিৎ গেরেন্তীগী কোভরেজসু পাকথোক চাউথোকহল্লি। নুমিৎ খরনিগী মমাংদা মুদ্রা য়োজনা অসিনা চহি ১০ মপুং ফারকখ্রে। হৌখিবা চহি ১০দা, ইহান হানবা ওইনা ললোন-ইতিক অমসুং ইন্দস্ত্রীদা চংশিল্লিবা মীচম প্রজাশিংদা মসিগী স্কিম অসিগী মখাদা কোলেতরেল অমত্তা য়াওদনা লুপা করোর লাখ ৩৩গী লোন পীখ্রে হায়বসি খঙবদা অদোম্না নুংঙাইবা ফাওগনি অমসুং করিগুম্বা মতমদা নুংঙাইবা ফাওগনি। গেরেন্তী য়াওদনা লুপা করোর লাখ ৩৩গী শেনফম অদু খল্লু! স্কিম অসিগী বেনিফিসরীশিংগী চাদা ৫০ হেনবনা এস.সি./এস.তি./ও.বি.সি. কাংলুপশিংদগী ওইরি। পান্দমদি ঐখোয়গী নহারোলশিংগী অচৌবা মঙলানশিং মপুং ফাহন্নবগীদমক অপীকপা ইন্তর্প্রাইজশিং অসিবু মপাঙ্গল কনখৎহনবা হায়বসিনি।

মরুপশিং,

হরিয়ানাগী ঐখোয়গী লৌমীগী ইচিল-ইনাওশিংনা হোৎনরিবা অদু ভারত মচা খুদিংগী পুখমদা উবা ফংই। ঐখোয়গী লৌমীশিংগী নুংঙাইবা অমসুং অৱাবা অনিমক্তা বিজেপিগী দবল ইঞ্জিন সরকার অসিনা খ্বাইদগী চাউবা মরুপ ওইরি। ঐখোয়গী হোৎনবা অসি হরিয়ানাগী লৌমীশিংগী শক্তি অমসুং কেপাসিতী হেনগৎহনবনি। ঙসিদি, হরিয়ানাগী বিজেপি সরকারনা মহৈ-মরোং ২৪দি মিনিমম সপোর্ত প্রাইস (এম.এস.পি.) দা ফংহল্লে। হরিয়ানাগী লৌমী লাখ কয়ানা পি.এম. ফাসল বিমা য়োজনাগী কান্নবা ফংখ্রে। স্কিম অসিগী মখাদা লুপা করোর ৯,০০০ হেনবগী ক্লেমশিং পীথোকখ্রে। মতৌ অসুম্না, পি.এম.-কিসান সম্মান নিধিগী খুত্থাংদা লুপা করোর ৬,৫০০ হরিয়ানাগী লৌমীশিংগী পোকেৎতা হকথেংননা চংখ্রে।

মরুপশিং,

হরিয়ানা সরকারনা বৃতিশকী মতমদগী চৎনদুনা লাক্লবা এবিয়ানা (কেনেল ৱাতর তেক্স) অসিসু লৌথোকখ্রে। হৌজিক্তি, নহাক্না কেনেলগী ঈশিংদা তেক্স পীবা মথৌ তাদ্রে, অমসুং অভিয়ানগী মখাদা লুপা করোর ১৩০গী শেনফমসু ৱেব তৌখ্রে।

মরুপশিং,

দবল ইঞ্জিন লৈঙাক্না হোৎনরিবশিং অসিগীদমক থাগৎচরি। লৌমীশিং অমসুং শা-ষন য়োক্লিবশিংগীদমক্তা শেন্থোক্কী অনৌবা সোর্সশিং শেমগৎলি। গোবর্ধন য়োজনা অসিনা লৌমীশিংদা ৱেস্ত মেনেজমেন্তদা মতেং পাংলি অমসুং ইনকমগী খুদোংচাবসু পীরি। বাইওগ্যাস অসি শন্থী, ক্রোপ রেসিদ্যুশিং অমসুং অতোপ্পা ওর্গানিক ৱেস্তশিংদগী পুথোক্লি। চহি অসিগী বজেৎতা লৈবাক শিনবা থুংনা গোবর্ধন প্লান্ত ৫০০ লিংখৎনবা থৌরাং অমা লাউথোকখি। ঙসি, য়ামুনানগরদা অনৌবা গোবর্ধন প্লান্ত অমা শঙ্গাখ্রে। মসিনা ম্যুনিসিপাল কোর্পোরেসনদা চহি খুদিংগী লুপা করোর ৩ কনবা ঙমগনি। গোবর্ধন য়োজনা অসিনা স্বচ্ছ ভারত মিসনদসু মতেং পাংলি।

মরুপশিং,

হৌজিক হরিয়ানা চাউখৎপগী লম্বীদা খোঙজেল য়াংনা চংশিল্লি। ঐহাক মফম অসিদা লাকদ্রিঙৈ মমাংদা ঐহাক্না হিসারদা লৈবা মীওইশিংগা উনবগী খুদোংচাবা ফংখি। অয়োধ্যা ধামদা হকথেংননা এয়র সর্বিস অমা হৌখ্রে। ঙসি, রেৱারীগী মীয়ামদা অনৌবা বাইপাসকী খুদোংচাবা ফংলে। মসিনা কৈথেলশিং, লম্বী থোং অমসুং রেলৱেগী ক্রোসিংশিংদা লৈরিবা ত্রাফিক জামশিংদগী মখোয়বু কনবা ঙমগনি। লেন মরিগী বাইপাস অসিনা শহর অসিদগী গারীশিংনা বাইপাস তৌবা য়াহল্লগনি। দিল্লীদগী নারনৌল ফাওবগী খোঙচৎকী মতম অসি পুং অমা হন্থহনগনি। ঐনা ময়াম পুম্নমকপু মসিগী চাউখৎ-থৌরাং অসিগীদমক থাগৎচরি।

মরুপশিং,

ঐখোয়গীদমক্তদি, রাজনিতী অসি শক্তি ফংনবগীদমক্তা নত্তে, অদুবু মীয়ামগী সেবা অমসুং লৈবাক অসিগী সেবাগীদমক্তা ওইরি। মরম অসিনা বিজেপিনা হায়রিবশিং অদু শোইদনা পাংথোকই। হরিয়ানাদা অহুমশুবা ওইনা সরকার শেম্লবা মতুংদা, ঐখোয়না অদোমদা পীখিবা ৱাশকশিং অদু লেপ্পা লৈতনা মপুং ফাহল্লি। অদুবু কংগ্রেসনা লুচিংবা রাজ্যশিংদা করি থোক্লি? মীয়াম্না থাজবা অদু মপুং ফানা মাংলকখি। ঐখোয়গী য়ুম্লোন্নরিবা রাজ্য, হিমাচলদা য়েংবিয়ু, মীয়ামনা য়াম্না অৱাবা কয়া মায়োক্নরি। চাউখৎ-থৌরাং অমসুং য়াইফ-থৌরাংগী থবক পুম্নমক লেপখ্রে। কর্নাতকাদা, ইলেক্ত্রিসিতীদগী হৌরগা মিল্ক ফাওবা, বসকী ভরাদগী হৌরগা মরু্ ফাওবা পুম্নমক মমল হেনগৎলক্লি। কর্নাতকাগী কংগ্রেস সরকারনা করম্না মখল কয়াগী তেক্সশিং হাপ্পা অমসুং মমল হেনগৎহনবগে হায়বদু ঐহাক্না সোসিএল মীদিয়াদা উখি। সোসিএল মীদিয়াদা লৈরিবা মীওইশিংনা মসি এ দগী জেদ ফাওবগী লিস্তকী খুত্থাংদা ক্রীএতিব ওইনা ফোঙদোকখ্রে। মসিদা অখন্নবা মখলগী তেক্স হেনগৎলকপগা লোয়ননা অখন্নবা মখলগী লেত্র অমমম য়াওরি। মসিনা কংগ্রেস সরকারগী থবক থৌরমশিংগী তশেং তশেংনা উৎলি। চীফ মিনিস্তরগী নক্নবশিংনসু কংগ্রেসনা কর্নাতাকপু করপ্সনদা নম্বর ৱান ওইহনখ্রে হায়না য়াজরি।

মরুপশিং,

তেলঙ্গনাদা লৈরিবা কংগ্রেস সরকারনসু মীয়ামদা পীখিবা ৱাশকশিং অদু মাংহনখ্রে। মফম অদুদা, কংগ্রেসনা উমংশিংবু বুলদোজ তৌবদা থৱায় য়াওরি। মহৌশাগী ফিভমদা অমাং অতা থোকহনবা, লম্লক্কী শা-ইচেকশিংবু খুদোংথীবা থোকহনবা অসি কংগ্রেসকী থবক তৌবগী মওংনি! গোবর্ধন স্কিমগী খুত্থাংদা ঐখোয়না মফম অসিদা ৱেস্ততগী ৱেল্থতা ওন্থোক্নবা কন্না হোৎনরিঙৈদা, মখোয়না হান্ননা লৈরম্বা উমংশিং মাংহল্লি। মসিনা ময়ামগী মমাংদা লৈঙাক্কী মওং মতৌগী ময়েক শেংবা মোদেল অনি পুথোক্লি। নাকল অমরোমদা কংগ্রেসকী মোদেল অসি - মপুং ফানা অরানবা ওইরে হায়না প্রমান তৌরবা – শক্তি অমসুং পোজিসনদা মীৎয়েং চংলি। অমরোমদা, অচুম্বা ৱাফমদা য়ুম্ফম ওইবা, বাবাসাহেব অম্বেদকরনা তাকপা লম্বীদা লমজিংদুনা চৎপা, অমসুং সম্বিধানপু মপুং ফানা ইকায় খুম্নবা বিজেপিগী মোদেল লৈরি। ঐখোয়গী পান্দমদি 'বিক্সিৎ ভারত' অমা শেমগৎপনি। অমসুং ঙসি য়মুনানগরদা, ঐখোয়না খোঙথাশিং অসি মাংলোমদা চংশিল্লকপা উবা ফংই।

মরুপশিং,

ঐহাক্না নহাক্কা অতোপ্পা মরুওইবা হীরমগী মতাংদা ৱারী শানবা পাম্মি। ঙরাং লৈবাক অসিনা বৈশাখীগী কুমহৈ পাংথোকখি। ঙরাং জালিয়ানৱালা বাঘ মীয়ামবু তমথিনা হাৎখিবা চহি ১০৬শুবা নুমিৎসু ওইখি। মীহাৎ অদুদা মখোয়গী পুন্সি মাংখ্রবশিংগী নিংশিংবা অদু ঙসি ফাওবা ঐখোয়গী মরক্তা লৈরি। বৃতিশকী নিংতম্বা অমসুং জালিয়ানৱালা বাঘকী মীহাৎ অদুদা শহিদ ওইখিবা লৈবাকনীংবশিংগী কত্থোকপা অদুগী মথক্তা, মতম কুইনা অমম্বদা থমখিবা অতোপ্পা মশক অমসু লৈরি। মসিগী মওং অসিনা মীওইবা খুন্নাই অমসুং লৈবাক অসিগী মায়কৈদা লেপ্পগী ৱাখল্লোন অদু উৎলি। অমসুং মসিগী স্পিরিৎ অসিগা মরী লৈনবা মমিং অসি শঙ্করন নায়রনি। অদোমগী মরক্তগী অয়াম্বনা মসিগী মমিং অসি তাবা ফংদ্রি, অদুবু ঙসিদি, মহাক্কী মরমদা য়াম্না ৱারী শানরে। শঙ্করন নায়রজী অসি মমিং লৈরবা উকিল অমা ওইরম্মি অমসুং চহি ১০০গী মমাংদা মহাক্না বৃতিশ সরকারদা অৱাংবা থাক্কী থবক তৌরম্মি। মহাক্না লৈঙাক্কী মনাক নক্না লৈদুনা নুংঙাইবা, লুহেনবা পুন্সি অমা হিংবা ঙমগনি। অদুবু মপানগী লৈঙাক্কী নিংতম্বা অমসুং জালিয়ানৱালা বাগকী থৌদোক্না থম্মোয় শোকহনবদগী মহাক্না বৃতিশকী মায়োক্তা ৱা ঙাংনবা খোঙথাং লৌখৎখি। মহাক্না মহাক্কী ইকাই খুম্নরবা ফম অদু থাদোকখি অমসুং লৈবাক অসিগীদমক লেপখি। মহাক্না কেরলাদগী ওইজরবসু অমসুং থৌদোক অদু পঞ্জাবতা থোক্লবসু, মহাক্না জালিয়ানৱালা বাঘ মীহাৎকী কেস অদু মশামক্না লৌখৎনবা ৱারেপ লৌখি। মহাক মশামক্না লান্থেংদুনা বৃতিশ এম্পায়রগী য়ুম্ফম থুগাইখি। ‘দি সন নেভর সেৎ' - হায়রিবা বৃতিশ এম্পায়র অসি শঙ্করন নায়রজীনা মখোয়বু জলিয়ানৱালা বাঘকী মীহাৎ অদুগী মতাংদা কোর্ত্তা পুখৎখি অমসুং মখোয়বু মরাল লৈরে হায়না উৎখি।

মরুপশিং,

মসি মীওইবা খুন্নাইগীদমক লেপচবা খক্তা নত্তে। মসি 'এক ভারত, শ্রেস্থ ভারত'গী ময়েক শেংবা খুদম অমসু ওইখি। পঞ্জাবতা থোকখিবা মীহাৎ অদুগীদমক অরাপ্পা কেরলাগী মীওই অমনা মতৌ করম্না বৃতিশ লৈঙাক্কী মায়োক্তা লেপখিবা হায়বসিনা ঐখোয়গী নীংতম লানগী ইথিল পীখিবা অশেংবা ৱাখল্লোন অদুনি। ঙসিসু, হায়রিবা ৱাখল্লোন অসিমক "বিক্সিৎ ভারত"কী মায়কৈদা ঐখোয়না চংশিল্লিবা খোঙচৎ অসিদা অচৌবা শক্তি অমা ওইরি। ঐখোয়না কেরলাগী শঙ্করন নায়রজীগী থৌদাং অদু খঙগদবনি, অমসুং পঞ্জাব, হরিয়ানা অমসুং হিমাচলগী অঙাং খুদিংমক্না মহাক্কী মরমদা খঙগদবনি।

মরুপশিং,

মরুওইবা য়ুম্বী মরি - লায়রবশিং, লৌমীশিং, নহারোলশিং অমসুং নুপীশিংবু মপাঙ্গল কনখৎহন্নবা দবল ইঞ্জিন লৈঙাক অসিনা লেপ্পা লৈতনা থবক তৌরি। ঐখোয় পুম্নমক্কী হোৎনবশিংগা লোয়ননা, হরিয়ানা চাউখৎলগনি। ঐহাক্না হরিয়ানা চাউখৎলগনি, অমসুং লৈবাক অসিদা মগুন লৈহল্লগনি। চাউখৎ-থৌরাংগী প্রোজেক্ত ময়াম অসিগীদমক ময়াম পুম্নমকপু থাগৎচরি। খুৎ অনিমক থাংগৎলু অমসুং ঐগা লোয়ননা মপুং ফাবা ইনর্জীগা লোয়ননা হায়বিয়ু:

ভারত মাতা কী জয়!

ভারত মাতা কী জয়!

ভারত মাতা কী জয়!

হন্না-হন্না থাগৎচরি!

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***