സമുദ്രമേഖലയുടെ തന്ത്രപരവും സാമ്പത്തികവുമായ പ്രാധാന്യം തിരിച്ചറിഞ്ഞുകൊണ്ട്, ഇന്ത്യയുടെ കപ്പൽനിർമ്മാണ, സമുദ്ര ആവാസവ്യവസ്ഥയെ പുനരുജ്ജീവിപ്പിക്കുന്നതിനായി 69,725 കോടി രൂപയുടെ സമഗ്ര പാക്കേജിന് പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗം ഇന്ന് അംഗീകാരം നൽകി. ആഭ്യന്തര ശേഷി ശക്തിപ്പെടുത്തുന്നതിനും, ദീർഘകാല ധനസഹായം മെച്ചപ്പെടുത്തുന്നതിനും, ഗ്രീൻഫീൽഡ്, ബ്രൗൺഫീൽഡ് കപ്പൽശാല വികസനം പ്രോത്സാഹിപ്പിക്കുന്നതിനും, സാങ്കേതിക കഴിവുകളും വൈദഗ്ധ്യവും വർദ്ധിപ്പിക്കുന്നതിനും, ശക്തമായ സമുദ്ര അടിസ്ഥാന സൗകര്യങ്ങൾ സൃഷ്ടിക്കുന്നതിനായി നിയമ, നികുതി, നയ പരിഷ്കാരങ്ങൾ നടപ്പിലാക്കുന്നതിനുമായി രൂപകൽപ്പന ചെയ്ത നാല് സ്തംഭ സമീപനമാണ് പാക്കേജ് അവതരിപ്പിക്കുന്നത്.

ഈ പാക്കേജിന് കീഴിൽ, 24,736 കോടി രൂപയുടെ മൊത്തം നിക്ഷേപം ഉൾക്കൊള്ളുന്ന കപ്പൽ നിർമ്മാണ സാമ്പത്തിക സഹായ പദ്ധതി (SBFAS) 2036 മാർച്ച് 31 വരെ നീട്ടും. ഇന്ത്യയിൽ കപ്പൽ നിർമ്മാണത്തെ പ്രോത്സാഹിപ്പിക്കുന്നതിനാണ് ഈ പദ്ധതി ലക്ഷ്യമിടുന്നത്, കൂടാതെ 4,001 കോടി രൂപ വകയിരുത്തുന്ന ഒരു ഷിപ്പ് ബ്രേക്കിംഗ് ക്രെഡിറ്റ് നോട്ടും ഇതിൽ ഉൾപ്പെടുന്നു. എല്ലാ സംരംഭങ്ങളുടെയും നടത്തിപ്പിന് മേൽനോട്ടം വഹിക്കുന്നതിനായി ഒരു ദേശീയ കപ്പൽ നിർമ്മാണ ദൗത്യവും സ്ഥാപിക്കും.

ഇതിനുപുറമെ, ഈ മേഖലയ്ക്ക് ദീർഘകാല ധനസഹായം നൽകുന്നതിനായി 25,000 കോടി രൂപയുടെ കോർപ്പസ് സഹിതം മാരിടൈം വികസന ഫണ്ട് (എംഡിഎഫ്) അംഗീകരിച്ചു. ഇതിൽ ഇന്ത്യാ ഗവൺമെന്റിന്റെ 49% പങ്കാളിത്തത്തോടെ 20,000 കോടി രൂപയുടെ മാരിടൈം നിക്ഷേപ ഫണ്ടും കടത്തിന്റെ ഫലപ്രദമായ ചെലവ് കുറയ്ക്കുന്നതിനും പ്രോജക്റ്റ് ബാങ്കബിലിറ്റി മെച്ചപ്പെടുത്തുന്നതിനുമായി 5,000 കോടി രൂപയുടെ പലിശ പ്രോത്സാഹന ഫണ്ടും ഉൾപ്പെടുന്നു. കൂടാതെ, 19,989 കോടി രൂപയുടെ ബജറ്റ് വിഹിതമുള്ള കപ്പൽ നിർമ്മാണ വികസന പദ്ധതി (എസ്ബിഡിഎസ്) ആഭ്യന്തര കപ്പൽ നിർമ്മാണ ശേഷി പ്രതിവർഷം മൊത്തം 4.5 ദശലക്ഷം ടണ്ണായി വികസിപ്പിക്കുക, മെഗാ കപ്പൽ നിർമ്മാണ ക്ലസ്റ്ററുകളെ പിന്തുണയ്ക്കുക, അടിസ്ഥാന സൗകര്യ വികസനം നടത്തുക, ഇന്ത്യൻ മാരിടൈം സർവ്വകലാശാലയ്ക്ക് കീഴിൽ ഇന്ത്യ ഷിപ്പ് ടെക്നോളജി സെന്റർ സ്ഥാപിക്കുക, കപ്പൽ നിർമ്മാണ പദ്ധതികൾക്ക് ഇൻഷുറൻസ് പിന്തുണ ഉൾപ്പെടെയുള്ള റിസ്ക് കവറേജ് നൽകുക എന്നിവയാണ് ലക്ഷ്യമിടുന്നത്.

മൊത്തത്തിലുള്ള പാക്കേജ് 4.5 ദശലക്ഷം ഗ്രോസ് ടൺ കപ്പൽ നിർമ്മാണ ശേഷി സൃഷ്ടിക്കുകയും ഏകദേശം 30 ലക്ഷം തൊഴിലവസരങ്ങൾ സൃഷ്ടിക്കുകയും ഇന്ത്യയുടെ സമുദ്ര മേഖലയിലേക്ക് ഏകദേശം 4.5 ലക്ഷം കോടി രൂപയുടെ നിക്ഷേപം ആകർഷിക്കുകയും ചെയ്യുമെന്ന് പ്രതീക്ഷിക്കുന്നു. സാമ്പത്തിക നേട്ടങ്ങൾക്കപ്പുറം, നിർണായക വിതരണ ശൃംഖലകളിലും സമുദ്ര പാതകളിലും പ്രതിരോധശേഷി സൃഷ്ടിക്കുന്നതിലൂടെ ഈ സംരംഭം ദേശീയ, ഊർജ്ജ, ഭക്ഷ്യസുരക്ഷ എന്നിവയെ ശക്തിപ്പെടുത്തും. ഇത് ഇന്ത്യയുടെ ഭൗമരാഷ്ട്രീയ പ്രതിരോധശേഷിയും തന്ത്രപരമായ സ്വാശ്രയത്വവും ശക്തിപ്പെടുത്തുകയും ആത്മനിർഭർ ഭാരത് എന്ന ദർശനം മുന്നോട്ട് കൊണ്ടുപോകുകയും ആഗോള ഷിപ്പിംഗിലും കപ്പൽ നിർമ്മാണത്തിലും ഇന്ത്യയെ ഒരു മത്സര ശക്തിയായി സ്ഥാപിക്കുകയും ചെയ്യും.

ഉപഭൂഖണ്ഡത്തെ ലോകവുമായി ബന്ധിപ്പിച്ച, വ്യാപാരവും സമുദ്രയാത്രയും ഉൾചേർന്ന നൂറ്റാണ്ടുകളുടെ ദീർഘവും പ്രശസ്തവുമായ ഒരു സമുദ്ര ചരിത്രം ഇന്ത്യയ്ക്കുണ്ട്. ഇന്ന്, സമുദ്ര മേഖല ഇന്ത്യൻ സമ്പദ്‌വ്യവസ്ഥയുടെ നട്ടെല്ലായി തുടരുന്നു, രാജ്യത്തിന്റെ വ്യാപാരത്തിന്റെ ഏകദേശം 95% വ്യാപ്തിയിലും 70% മൂല്യത്തിലും പിന്തുണ നൽകുന്നു. "ഹെവി എഞ്ചിനീയറിംഗിന്റെ മാതാവ്" എന്ന് പലപ്പോഴും വിശേഷിപ്പിക്കപ്പെടുന്ന കപ്പൽ നിർമ്മാണമാണ് അതിന്റെ കാതൽ, ഇത് തൊഴിലവസരങ്ങൾക്കും നിക്ഷേപത്തിനും ഗണ്യമായ സംഭാവന നൽകുക മാത്രമല്ല, ദേശീയ സുരക്ഷ, തന്ത്രപരമായ സ്വാതന്ത്ര്യം, വ്യാപാര, ഊർജ്ജ വിതരണ ശൃംഖലകളുടെ പ്രതിരോധശേഷി എന്നിവ വർദ്ധിപ്പിക്കുകയും ചെയ്യുന്നു.

***