ভারত ইমানা য়াইফরে!

ভারত ইমানা য়াইফরে!

অসামগী রাজ্যপাল, শ্রী লক্ষ্মন প্রসাদ আচার্য়জী, ইচং থৌরবা মুখ্য মন্ত্রী হিমন্ত বিশ্ব শর্মজী, কেন্দ্র সরকারদা লৈরিবা ঐহাক্কী মরুপ দাক্তর এস. জয়শঙ্কর অমসুং সর্বানন্দ সোনোৱাল, ত্রিপুরাগী মুখ্য মন্ত্রী মনিক সাহাজী, অতোপ্পা মন্ত্রীশিং, পার্লিয়ামেন্তকী মেম্বরশিং, লেজিস্লেতিব এসেমব্লীগী মেম্বরশিং, আর্তিস্তকী মরুপ পুম্নমক অমসুং ঐহাক্কী অসামগী নুংশিজরবা ইচিল ইনাওশিং,

পুম্নমকপু খুরুমজরি! নুংশিজরবা ইচিল ইনাওশিং কমদৌরি?

ঐহাক্না পুম্নমকপু ইকোক নোন্না খুরুমজরি।

ঐহাক্না মফম অসিদা ঙসি শরুক য়াবা ফংবা অসি ঙমখৈ লৈতনা নুংঙাইবা পোই।

নুংশিজরবা ইচিল ইনাওশিং,

ঙসিদি, অসামদা য়াম্না নুংঙাইবা এতমোস্ফিয়র অমা লৈরে, ইনর্জীনা থল্লবা অকোয়বগী ফিভম অমদা লৈরে। স্তেদিয়ম পুম্বা অসি পুক্নিং থৌগৎপা, নুংঙাইবা, অমসুং ইখৌ লাংবা কয়ানা থল্লে। ঝুমোইর জগোয় শাবগীদমক আর্তিস্ত খুদিংমক্না শেম-শাদুনা লৈবগী থৌওং অসি মফম খুদিংমক্তা উবা ফংই। মসিগী অঙকপা শেম-শাবা অসিনা চাগী লৈকোলগী মগুন অমসুং ফজবা অনিমক উৎলি। অমসুং নখোয় পুম্নমক্না খঙই, চাগী মগুন অমসুং মহাওবু চা য়োনবদগী হেন্না কনানা হেন্না খঙবা ঙমগনি? মরম অসিনা, নহাক্না ঝুমোইর অমসুং চাগী বাগানশিংগী কলচরগা অখন্নবা মরী লৈনবগুম্না, ঐহাকসু মসিগা মরী লৈনৈ।

মরুপশিং,

অসিগুম্বা আর্তিস্ত মশিং য়াম্না ঝুমোইর জগোয় অসি পুন্না পাংথোকপা মতমদা, মসিনা অনৌবা রেকোর্দ অমা শেমগনি। মমাংদা, ঐহাক্না ২০২৩দা অসামদা চৎখিবা মতমদা, মীওই ১১,০০০ হেনবনা বিহু জগোয় অসি পুন্না শান্নদুনা রেকোর্দ অমা শেমখি। ঐহাক্না মতম অদু কৈদৌঙৈদসু কাওবা ঙম্লোই! TVদা য়েংখিবা মীওইশিংনসু ঐঙোন্দা হন্না হন্না নিংশিংহল্লি। ঙসিদি, ঐহাক্না অসিগুম্বা মশক থোকপা পার্ফোমেন্স অমগীদমক য়াম্না কন্না ঙাইরি। অসাম সরকার অমসুং ইচং থৌরবা মুখ্য মন্ত্রী হিমন্ত বিশ্ব শর্মজীবু মসিগী চাউরবা কলচরেল থৌরম অসি শীনবগীদমক ঐহাক্না থাগৎপা ফোংদোকচরি।

ঙসি অসি অসামগী চা থরিবা ফুরুপ অমসুং লমদমসিগী মীয়ামগীদমক চাউথোকচনীংঙাই ওইবা নুমিৎ অমনি। থৌরম অসিদা ঐহাক্না ময়াম পুম্নমকপু য়াইফ-পাউজেল পীজরি।

মরুপশিং,

অসিগুম্বা অচৌবা থৌরমশিং অসিনা অসামগী চাউথোকচবা হেনগৎহনবতা নত্তনা ভারতকী চাউরবা দাইভর্সিতী অমা উৎলি। মালেমগী তোঙান তোঙানবা লৈবাকশিংগী এম্বেসেদর ৬০ হেন্না অসমদা লাক্লগনি হায়না ঐঙোন্দা খঙহনখ্রে। অসাম অমসুং অৱাং-নোংপোক লমদম অসি চাউখৎ-থৌরাংগী মায়কৈদা কান্নবা ফংদ্রিবা মতম অমা লৈরম্মি অমসুং মখোয়গী কলচরগী মগুনসু লুম্না লৌবীখিদে। অদুবু ঙসিদি, অৱাং-নোংপোক্কী চৎনবী অসি মোদী মশামক্না মশাগী ব্রান্দ এম্বেসেদর ওইরে। অসামগী কাজিরঙ্গাদা লৈদুনা মালেমদা মসিগী বাইওদাইভর্সিতী অসি খঙহনখিবা অহানবা প্রধান মন্ত্রী ঐনি। হৌজিকমক্কী ওইনা, হিমন্ত দানা মসি শন্দোক্না তাকখি, অমসুং ময়াম পুম্নমক্না অদোমগী থাগৎপা ফোংদোক্নবগীদমক লেপখি। থা খরগী মমাংদা, ঐখোয়না অসামীজবু ক্লাসিকেল লেঙ্গুৱেজগী থাক পীখি। অসামগী মীয়াম্না দিকেদ কয়াগী মমাংদগী ঙাইদুনা লাকখিবা রিকগনিসননি। চেরাইদেও মৈদম অসিসু য়ু.এন.ই.এস.সি.ও.গী ৱার্ল্দ হেরিতেজ লিস্ততা য়াওরে অমসুং মসি ওইথোকহনবদা বি.জে.পি সরকারগী খোঙথাংশিংনা অচৌবা থৌদাং লৌখি।

মরুপশিং,

অসামনা মোগলশিংবু লান্থেংনখিবা অমসুং অসামগী চৎনবী অমসুং আইদেন্তিতীবু ঙাক-শেন্দুনা থমখি মহাক্কী থৌনা ফরবা মচানুপা, বীর লাচিত বোর্ফুকানগীদমক চাউথোকচরি। ঐখোয়না মহাক্কী ৪০০শুবা মপোক কুমওন অসি চাউনা পাংথোকখি। অমসুং রিপব্লিক দেগী পেরেদতা মহাক্কী তেব্লোক্সসু য়াওখি, মফম অদুদা লৈবাক পুম্নমক্না মহাকপু ইকায় খুম্নবা উৎখি। অসামদা, লাচিত বোর্ফুকনগী ফুট ১২৫গী ব্রোঞ্জগী মীতমসু শাখ্রে। অসিগুম্বা মওংদা, ত্রাইবেল কম্ম্যুনিতীশিংগী লিগেসীবু ইকায় খুম্নবা উৎনবা, ঐখোয়না জনজাতি গৌরব দিবস (ত্রাইবেল প্রাইদ দে) পাংথোকপা হৌরে। অসামগী রাজ্যপাল লক্ষ্মন প্রসাদজী মশামক অসি ত্রাইবেল বেকগ্রাউন্দদগীনি অমসুং মহাক্কী থৌনা অমসুং কন্না হোৎনবদগী মসিগী থাক অসি য়ৌরে। ত্রাইবেল হিরোশিং অমসুং হিরোইনশিংগী কন্ত্রিব্যুসনশিং অসি অমর ওইহন্নবা লৈবাক শিনবা থুংনা ত্রাইবেল ম্যুজিয়মশিংসু লিংখৎলি।

মরুপশিং,

বি.জে.পি. সরকারনা অসামগী চাউখৎপা পুরকপতা নত্তনা তী ত্রাইব কম্ম্যুনিতীগীসু মতেং পাংলি। চা ভাগানশিংগী শিন্মীশিংগী শেন্থোক হেনগৎহন্নবা, অসাম তী কোর্পোরেসনগী শিন্মীশিংগীদমক বোনস অমা লাউথোকখ্রে। চাগী লমদা থবক তৌরিবা ঐখোয়গী ইচিল-ইনাওশিংনা থেংনরিবা মরুওইবা শিংনবসি মীরোল্লিঙৈ মতমদা শেল থুমগী অকিবা লৈবসিনি। ঙসিদি, নুপী লাখ ১.৫রোমনা মীরোনবা মতমদা শেলগী মতেং ওইনা লুপা ১৫,০০০ ফংলি। মসিনা মরম ওইদুনা মখোয়না শেল মরমদা ৱাখল ৱাদ্রে। ইমুংশিং অসিগী হকশেলগীদমক, অসাম সরকারনা চাগী বাগানশিংদা আয়ুশ্মান আরোগ্য মন্দির ৩৫০ হেন্না লিংখৎলি। মসিগী মথক্তা, মখোয়গী অঙাংশিংগীদমক ক্বালিতী লৈবা এজুকেসন ফংহন্নবা মোদেল তি গার্দেন স্কুল ১০০ হেন্না হাংদোকখ্রে, অমসুং অতোপ্পা ১০০ রোম পাইপলাইন্দা লৈরি। ঐখোয়না তী ত্রাইবকী নহাশিংগীদমক ও.বি.সি. কোতাগী মখাদা ৩% রিজার্বেসনসু হৌদোক্লে। অসাম সরকারনা মখোয়বু মখা তানা মতেং পাংলি। মখোয়না মশাগী থবক পায়খৎনবগীদমক শেলগী তেংবাং ওইনা লুপা ২৫,০০০ পীরি। চাগী ইন্দস্ত্রী অমসুং মসিগী শিন্মীশিং চাউখৎলকপনা অসাম পুম্নমক্কী চাউখৎপা ঙমহল্লগনি অমসুং ঐখোয়গী অৱাং নোংপোক লমদম অসি চাউখৎপগী অনৌবা থাক্তা য়ৌহল্লগনি।

হৌজিক, অদোম্না অদোমগী ফজরবা পার্ফোমেন্স অদু হৌগদৌরিবা অসিদা, ঐহাক্না অদোমবু মাংজৌননা থাগৎপা ফোংদোকচরি। ভারত পুম্বনা ঙসি অদোমগী জগোয় অসি য়েংনবা ঙাইরি হায়না ঐহাক্না থাজবা থম্লি! তেলিভিজন চেন্নেলশিংনা মসি হৌনবা খৌরাংনা ঙাইরি, অমসুং লৈবাক পুম্বনা অমসুং মালেমনা মসিগী অচৌবা পর্ফোমেন্স অসিবু উবা ফংলগনি। ঝুমোইরগী অফবা শক্তম উৎপীবগীদমক্তা ময়াম পুম্নমকপু য়াম্না থাগৎচরি। নীংথিনা লৈবীয়ু, অমসুং ঐহাক্না ময়ামগা অমুক্কা হন্না উননবা ঙাইজরি। হন্না-হন্না থাগৎচরি!

ভারত ইমানা য়াইফরে!

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***