ଭାରତ ମାତା କି - ଜୟ!

ଭାରତ ମାତା କି - ଜୟ!

ଆସାମର ରାଜ୍ୟପାଳ ଶ୍ରୀ ଲକ୍ଷ୍ମଣ ପ୍ରସାଦ ଆଚାର୍ଯ୍ୟ ଜୀ, ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଜୀ, କେନ୍ଦ୍ର ସରକାରଙ୍କ ମୋର ସହକର୍ମୀ ଡକ୍ଟର ଏସ. ଜୟଶଙ୍କର ଏବଂ ସର୍ବାନନ୍ଦ ସୋନୋୱାଲ, ତ୍ରିପୁରାର ମୁଖ୍ୟମନ୍ତ୍ରୀ ମାଣିକ ସାହା ଜୀ, ଅନ୍ୟ ମନ୍ତ୍ରୀ, ସାଂସଦ, ବିଧାୟକ, ଆସାମର ସମସ୍ତ ଭାଇ ଏବଂ ଭଉଣୀ ମାନଙ୍କୁ ମୋର ଶୁଭେଛା ।

ଭାଇ ଏବଂ ଭଉଣୀମାନେ ଆପଣମାନେ ସମସ୍ତେ କିପରି ଅଛ? ମୁଁ ସମସ୍ତଙ୍କୁ ମୋର ଆନ୍ତରିକ ଶୁଭେଚ୍ଛା ଜଣାଉଛି। ଆଜି ଏଠାରେ ଉପସ୍ଥିତ ରହି ମୁଁ ଅତ୍ୟନ୍ତ ଆନନ୍ଦିତ।

ଭାଇ ଓ ଭଉଣୀମାନେ,

ଆଜି ଆସାମରେ ଏକ ସୁନ୍ଦର ପରିବେଶ ରହିଛି। ପରିବେଶ ଉର୍ଜ୍ଜାରେ ପରିପୂର୍ଣ୍ଣ। ଏହି ସମ୍ପୂର୍ଣ୍ଣ ଷ୍ଟାଡିୟମ ଉତ୍ସାହ ଏବଂ ଆନନ୍ଦରେ ଗୁଞ୍ଜରିତ ହେଉଛି। ଝୁମର ନୃତ୍ୟ ପରିବେଷଣ କରୁଥିବା ସମସ୍ତ କଳାକାରଙ୍କ ପ୍ରସ୍ତୁତି ସବୁଠି ଦୃଶ୍ୟମାନ ହେଉଛି। ଏହି ପ୍ରସ୍ତୁତିରେ ଚା ବଗିଚାର ସୁଗନ୍ଧ ଏବଂ ଏହାର ସୌନ୍ଦର୍ଯ୍ୟ ମଧ୍ୟ ରହିଛି। ଆଉ ଆପଣ ଜାଣନ୍ତି, ଚା ବିକ୍ରେତାଙ୍କ ଅପେକ୍ଷା ଚା'ର ସୁଗନ୍ଧ ଏବଂ ରଙ୍ଗ କିଏ ଭଲ ଜାଣିପାରିବ? ତେଣୁ, ଯେପରି ଝୁମର ଏବଂ ଉଦ୍ୟାନ ସଂସ୍କୃତି ସହିତ ଆପଣଙ୍କର ଏକ ବିଶେଷ ସମ୍ପର୍କ ଅଛି, ସେହିପରି ମୋର ମଧ୍ୟ ଏହା ସହିତ ଏକ ସମ୍ପର୍କ ଅଛି।

ବନ୍ଧୁଗଣ, ଯେତେବେଳେ ତୁମେ ସମସ୍ତ କଳାକାର ଏତେ ସଂଖ୍ୟାରେ ଝୁମର ନୃତ୍ୟ ପ୍ରଦର୍ଶନ କରିବ, ଏହା ନିଜ ଭିତରେ ଏକ ରେକର୍ଡ ସୃଷ୍ଟି କରିବ। ପୂର୍ବରୁ, ଯେତେବେଳେ ମୁଁ ୨୦୨୩ ରେ ଆସାମ ଆସିଥିଲି, ୧୧ ହଜାରରୁ ଅଧିକ ଲୋକ ଏକାଠି ବିହୁ ନୃତ୍ୟ ପ୍ରଦର୍ଶନ କରି ଏକ ରେକର୍ଡ ସୃଷ୍ଟି କରିଥିଲେ। ମୁଁ ସେହି ଦୃଶ୍ୟକୁ କେବେ ଭୁଲିପାରିବି ନାହିଁ, କିନ୍ତୁ ଯେଉଁମାନେ ଏହାକୁ ଟିଭିରେ ଦେଖିଛନ୍ତି, ସେମାନେ ମୋତେ ବାରମ୍ବାର ମନେ ପକାଇ ଦେଉଛନ୍ତି। ଆଜି ପୁଣି ଥରେ ଏପରି ଆଉ ଏକ ଚମତ୍କାର ପ୍ରଦର୍ଶନ ପାଇଁ ଉତ୍ସାହର ସହିତ ଅପେକ୍ଷା କରିଛି। ଏହି ସାଂସ୍କୃତିକ କାର୍ଯ୍ୟକ୍ରମ ପାଇଁ ଆସାମ ସରକାର ଏବଂ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଜିଙ୍କୁ ଅଭିନନ୍ଦନ ଜଣାଉଛି। ଆଜି ଆସାମର ଚା ସମ୍ପ୍ରଦାୟ ଏବଂ ଆଦିବାସୀ ଲୋକଙ୍କ ପାଇଁ ଏକ ଗର୍ବର ଦିନ। ଏହି ଅବସରରେ ମୁଁ ସମସ୍ତଙ୍କୁ ମୋର ଶୁଭେଚ୍ଛା ଜଣାଉଛି।

ବନ୍ଧୁଗଣ, ଏପରି ମହାନ କାର୍ଯ୍ୟକ୍ରମ କେବଳ ଆସାମକୁ ଗର୍ବିତ କରେ ନାହିଁ ବରଂ ଭାରତର ମହାନ ବିବିଧତାକୁ ମଧ୍ୟ ପ୍ରତିଫଳିତ କରେ। ମୋତେ ସୂଚନା ମିଳିଛି ଯେ ବିଶ୍ୱର ବିଭିନ୍ନ ଦେଶରୁ ୬୦ରୁ ଅଧିକ ଦେଶର ରାଷ୍ଟ୍ରଦୂତ ଆସାମକୁ ଉପଭୋଗ କରିବା ପାଇଁ ଏଠାରେ ଉପସ୍ଥିତ ଅଛନ୍ତି। ଗୋଟିଏ ସମୟ ଥିଲା ଯେତେବେଳେ ଆସାମ ଏବଂ ଉତ୍ତର-ପୂର୍ବାଞ୍ଚଳ ବିକାଶ ଦୃଷ୍ଟିରୁ ଅବହେଳିତ ଥିଲା, ଏବଂ ସେମାନଙ୍କର ସମୃଦ୍ଧ ସଂସ୍କୃତିକୁ ଅଣଦେଖା କରାଯାଉଥିଲା। କିନ୍ତୁ ଆଜି, ଉତ୍ତର-ପୂର୍ବାଞ୍ଚଳର ସଂସ୍କୃତିର ନିଜର ବ୍ରାଣ୍ଡ ଆମ୍ବାସାଡର ଅଛନ୍ତି - ନିଜେ ମୋଦି। ମୁଁ ପ୍ରଥମ ପ୍ରଧାନମନ୍ତ୍ରୀ ଯିଏ ଆସାମର କାଜିରଙ୍ଗାରେ ରହି ବିଶ୍ୱକୁ ଏହାର ଜୈବ ବିବିଧତା ସହିତ ପରିଚିତ କରାଇଛି। ଏବେ ହିମନ୍ତ ଦା ଏହା ବର୍ଣ୍ଣନା କରିଛନ୍ତି ଏବଂ ଆପଣମାନେ ସମସ୍ତେ କୃତଜ୍ଞତା ପ୍ରକାଶ କରିବାକୁ ଠିଆ ହୋଇଛନ୍ତି। କିଛି ମାସ ପୂର୍ବରୁ, ଆମେ ଆସାମକୁ ଶାସ୍ତ୍ରୀୟ ଭାଷାର ମାନ୍ୟତା ମଧ୍ୟ ଦେଇଛୁ। ଆସାମର ଲୋକମାନେ ଦଶନ୍ଧି ଧରି ନିଜ ଭାଷା ପାଇଁ ଏହି ସମ୍ମାନ ପାଇଁ ଅପେକ୍ଷା କରିଥିଲେ। ସେହିପରି, ଚରାଇଦେଓ ମୋଇଦାମକୁ ୟୁନେସ୍କୋ ବିଶ୍ୱ ଐତିହ୍ୟ ତାଲିକାରେ ସାମିଲ କରାଯାଇଛି। ଏଥିରେ ମଧ୍ୟ ବିଜେପି ସରକାରଙ୍କ ପ୍ରୟାସ ଏକ ବଡ଼ ଭୂମିକା ଗ୍ରହଣ କରିଛି।

ବନ୍ଧୁଗଣ, ଆସାମର ଗର୍ବ ଏବଂ ସାହସୀ ପୁଅ ଲସିତ୍ ବୋରଫୁକନ୍, ଯିଏ ମୋଗଲମାନଙ୍କ ବିରୁଦ୍ଧରେ ଲଢ଼ିଥିଲେ ଏବଂ ଆସାମର ସଂସ୍କୃତି ଏବଂ ପରିଚୟକୁ ରକ୍ଷା କରିଥିଲେ। ଆମେ ତାଙ୍କର ୪୦୦ ତମ ଜନ୍ମବାର୍ଷିକୀକୁ ଏକ ମହାନ ସ୍ତରରେ ପାଳନ କରିଥିଲୁ। ଲସିତ୍ ବୋରଫୁକନ୍‌ଙ୍କ ସାରଣୀକୁ ମଧ୍ୟ ଗଣତନ୍ତ୍ର ଦିବସରେ ସାମିଲ କରାଯାଇଥିଲା ଏବଂ ସାରା ଦେଶରୁ ଲୋକମାନେ ତାଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ। ଏଠାରେ ଆସାମରେ ତାଙ୍କର ୧୨୫ ଫୁଟର ବ୍ରୋଞ୍ଜ ପ୍ରତିମୂର୍ତ୍ତି ମଧ୍ୟ ତିଆରି କରାଯାଇଛି। ସେହିପରି, ଆଦିବାସୀ ସମ୍ପ୍ରଦାୟର ଐତିହ୍ୟକୁ ସମ୍ମାନ ଜଣାଇବା ପାଇଁ, ଆମେ ଜନଜାତି ଗୌରବ ଦିବସ (ଆଦିବାସୀ ଗୌରବ ଦିବସ) ପାଳନ କରିବା ଆରମ୍ଭ କରିଛୁ। ଆସାମର ରାଜ୍ୟପାଳ ଲକ୍ଷ୍ମଣ ପ୍ରସାଦ ଜୀ ନିଜେ ଏକ ଆଦିବାସୀ ପୃଷ୍ଠଭୂମିରୁ ଆସିଛନ୍ତି ଏବଂ ତାଙ୍କ ସମର୍ପଣ ଏବଂ କଠିନ ପରିଶ୍ରମ ମାଧ୍ୟମରେ ଏହି ସ୍ଥାନରେ ପହଞ୍ଚିଛନ୍ତି। ସାରା ଦେଶରେ ଆଦିବାସୀ ନାୟକ ଏବଂ ନାୟିକାଙ୍କ ଅବଦାନକୁ ଅମର କରିବା ପାଇଁ, ଆଦିବାସୀ ସଂଗ୍ରହାଳୟ ମଧ୍ୟ ପ୍ରତିଷ୍ଠା କରାଯାଉଛି।

ବନ୍ଧୁଗଣ, ବିଜେପି ସରକାର କେବଳ ଆସାମର ବିକାଶକୁ ଆଗେଇ ନେଉନାହିଁ ବରଂ ଚା ଜନଜାତି ସମ୍ପ୍ରଦାୟର ସେବା ମଧ୍ୟ କରୁଛି। ଚା ଉଦ୍ୟାନ ଶ୍ରମିକଙ୍କ ଆୟ ବୃଦ୍ଧି କରିବା ପାଇଁ, ଆସାମ ଚା ନିଗମ କର୍ମଚାରୀଙ୍କ ପାଇଁ ଏକ ବୋନସ ଘୋଷଣା କରାଯାଇଛି। ଚା ବଗିଚାରେ କାମ କରୁଥିବା ଆମର ଭଉଣୀ ଏବଂ ଝିଅମାନେ ଏକ ପ୍ରମୁଖ ସମସ୍ୟାର ସମ୍ମୁଖୀନ ହେଉଥିଲେ ଯାହା ଥିଲା ଗର୍ଭାବସ୍ଥାରେ ଆର୍ଥିକ ଅସୁରକ୍ଷା। ଆଜି ପ୍ରାୟ ୧ .୫  ଲକ୍ଷ ମହିଳା ଗର୍ଭାବସ୍ଥାରେ ୧୫ ,୦୦୦ ଟଙ୍କା ଆର୍ଥିକ ସହାୟତା ପାଉଛନ୍ତି ଯାହା ଦ୍ୱାରା ସେମାନଙ୍କୁ ଖର୍ଚ୍ଚ ବିଷୟରେ ଚିନ୍ତା କରିବାକୁ ପଡିବ ନାହିଁ। ଏହି ପରିବାରଗୁଡ଼ିକର ସ୍ୱାସ୍ଥ୍ୟ ପାଇଁ, ଆସାମ ସରକାର ଚା ଉଦ୍ୟାନରେ ୩୫୦ରୁ ଅଧିକ ଆୟୁଷ୍ମାନ ଆରୋଗ୍ୟ ମନ୍ଦିର ପ୍ରତିଷ୍ଠା କରୁଛି। ଏହା ସହିତ, ସେମାନଙ୍କ ପିଲାମାନଙ୍କ ପାଇଁ ଗୁଣାତ୍ମକ ଶିକ୍ଷା ସୁନିଶ୍ଚିତ କରିବା ପାଇଁ ୧୦୦ରୁ ଅଧିକ ମଡେଲ ଚା ଉଦ୍ୟାନ ସ୍କୁଲ ଖୋଲାଯାଇଛି, ପ୍ରାୟ ୧୦୦ଟି ପାଇପଲାଇନରେ ଅଛି। ଆମେ ଚା ଜନଜାତିର ଯୁବକମାନଙ୍କ ପାଇଁ ଓବିସି କୋଟା ଅଧୀନରେ ୩% ସଂରକ୍ଷଣ ମଧ୍ୟ ପ୍ରଚଳନ କରିଛୁ। ଆସାମ ସରକାର ଏହି ଯୁବକମାନଙ୍କୁ ଆତ୍ମନିଯୁକ୍ତି ପାଇଁ ୨୫ ,୦୦୦ ଟଙ୍କାର  ଆର୍ଥିକ ସହାୟତା ମଧ୍ୟ ପ୍ରଦାନ କରୁଛି।

ଚା ଶିଳ୍ପ ଏବଂ ଏହାର ଶ୍ରମିକଙ୍କ ଅଭିବୃଦ୍ଧି ସମଗ୍ର ଆସାମର ବିକାଶକୁ ତ୍ୱରାନ୍ୱିତ କରିବ। ଆମର ଉତ୍ତର-ପୂର୍ବାଞ୍ଚଳ ବିକାଶର ନୂତନ ଶିଖର ଛୁଇଁବ। ଏବେ ଆପଣମାନେ ସମସ୍ତେ ଆପଣଙ୍କର ଚମତ୍କାର ପ୍ରଦର୍ଶନ ଆରମ୍ଭ କରିବାକୁ ଯାଉଛନ୍ତି, ମୁଁ ହୃଦୟର ସହିତ କୃତଜ୍ଞତା ଜଣାଉଛି। ମୁଁ ନିଶ୍ଚିତ ଯେ ଆଜି ଆପଣ ଏବଂ ଆପଣଙ୍କ ନୃତ୍ୟ ସାରା ଭାରତରେ ପ୍ରଶଂସା ପାଇବ। ସମସ୍ତ ଟିଭି ଚ୍ୟାନେଲ ଉତ୍ସାହର ସହିତ ଅପେକ୍ଷା କରିଛନ୍ତି ଯେ ଏହା କେବେ ଆରମ୍ଭ ହେବ। ଆଜି ସମଗ୍ର ଦେଶ ଏବଂ ବିଶ୍ୱ ଏହି ମହାନ ଝୁମର ନୃତ୍ୟ ଦେଖିବାକୁ ଯାଉଛି। ସମଗ୍ର ଦେଶ ଏବଂ ବିଶ୍ୱ ଏହି ମହାନ ପ୍ରଦର୍ଶନର ସାକ୍ଷୀ ହେବ।

ଏହି ସୁନ୍ଦର ଝୁମର ପ୍ରଦର୍ଶନ ପାଇଁ ଆମେ ଆପଣଙ୍କୁ ବହୁତ ବହୁତ ଧନ୍ୟବାଦ ଦେଉଛୁ। ଆପଣଙ୍କ ସମର୍ଥନ ପାଇଁ ମୁଁ ଆପଣଙ୍କୁ ବହୁତ ବହୁତ ଧନ୍ୟବାଦ ଜଣାଉଛି।

ଭାରତ ମାତା କି ଜୟ!

sws