প্রধান মন্ত্রী শ্রী নরেন্দ্র মোদী সেপ্তেম্বর ২২ দা অরুনাচল প্রদেস অমসুং ত্রিপুরাদা চৎকনি। মহাক্না ইতানগরদা লুপা করোর ৫,১০০ হেনবগী তোঙান তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি। মহাক্না মীয়ামগী থৌরম অমদসু ৱা ঙাংগনি।

তুংদা, মহাক ত্রিপুরাদা চৎকনি অমসুং পুজা অমসুং দরশন পাংথোক্কনি অমসুং মতাবারিদা মাতা ত্রিপুরা সুন্দরি তেম্পল কমপ্লেক্স শেমগৎ-শাগৎপগী থবক শঙ্গাগনি।

অরুনাচল প্রদেসতা প্রধান মন্ত্রী

লমদম অসিগী হায়দ্রোইলেক্ত্রিক্কী কান্নবা লৌনবা অমসুং তুংকোইনা চৎনবা য়াবা ইনর্জি পুথোকপা য়োকখৎনবা, প্রধান মন্ত্রীনা ইতানগরদা লুপা করোর ৩,৭০০ হেনবগী অচৌবা হায়দ্রো পৱার প্রোজেক অনি উরেপ-উয়ুং তমগনি। অরুনাচল প্রদেসকী সিয়োম সব-বেসিন্দা হিও হায়দ্রো ইলেক্ত্রিক প্রোজেক (মেগাৱাত ২৪০) অমসুং তাতো-১ ইলেক্ত্রিক প্রোজেক (মেগাৱাত ১৮৬) পায়খৎকনি।

প্রধান মন্ত্রীনা তৱাংদা অনৌবা কনভেন্সন সেন্তর অমগী উরেপ-উয়ুংসু তমগনি। তৱাংদগী ফ্রন্তিয়র দিষ্ট্রিক্ত ফিত ৯.৮২০ হেন্না ৱাংবা মফমদা শাগদৌরিবা সেন্তর অসিনা লৈবাক অসিগী অমসুং মালেমগী মীফমশিং, নাৎকী কুহ্মৈশিং অমসুং একজিবিসনশিং পাংথোক্নবা খুদোংচাবা লৈগনি। মীওই ১,৫০০ হেন্না চনগদবা সেন্তর অসি মালেমগী থাকশিং য়ৌনবা শেমগৎকনি অমসুং লমদম অসিগী তুরিজম অমসুং নাৎকী খুদোংচাবশিং শৌগৎকনি।

লম্বী-থোঙ, হকশেল, মৈ কনবা, থবক তৌবী নুপীশিংগী হোষ্টেলশিং য়াওনা তোঙান তোঙানবা হিরমশিংগী লুপা করোর ১,২৯০ হেনবগী মরুওইবা ইনফ্রষ্ট্রকচর প্রোজেকশিং প্রধান মন্ত্রীনা হৌদোক্কনি। হায়রিবা থবকশিং অসিনা লমদম অসিগী শেন-থুমগী থবকশিং ফগৎহনগনি, হিংবগী থাক ৱাংখৎহনগনি অমসুং লম্বী-থোঙ ফগৎহনগনি।

ললোন-ইতিক পাংথোকপা লাইহন্নবা অমসুং অফবা ওন্ত্রেপ্রেন্যুরসিপকী থবকশিং লৈহন্নবা মহাক্কী পান্দমগী পরিংদা, প্রধান মন্ত্রীনা মফম অদুগী তেক্স থিরিবা মীওইশিং, ললোনবশিং অমসুং উদ্যোগকী মীহুৎশিংগা হন্দক জি.এস.তিগী অহোংবা পুরকপনা পীবা কান্নবগী মতাংদা ৱারি শানগনি।

ত্রিপুরাদা প্রধান মন্ত্রী

ভারতকী অধ্যতিক অমসুং নাৎকী পুক্কৈ য়োকখৎনবা অমসুং ঙাক-শেন্নবা মহাক্কী পান্দম মতুংইন্না, পিলগ্রিমেজ রিজুবিনেসন এন্দ স্পিরিচুয়েল হেরিতেচ ওগমেন্তেসন দ্রাইভ (প্রসাদ) স্কিমগী মখাদা প্রধান মন্ত্রীনা মতাবারিদা মাতা ত্রিপুরা সুন্দরি তেম্পল কমপ্লেক্স শেমগৎ-শাগৎপগী থবক শঙ্গাগনি। মসি ত্রিপুরাগী গোমতি জিলাগী উদয়পুর সহরদা লৈবা অরিবা শক্তি পীথাস ৫১ গী মনুংদা অমনি।

প্রোজেক অসিদা, মথক্তগী য়েংথরকপদা থেঙ্গুগী মওং মানদুনা, লাইশঙগী মফমশিং শেমদোকপা, অনৌবা লম্বীশিং, নৌনা শেমদোক্লবা চঙফমশিং অমসুং ফক্লাংশিং, খোঙবালশিং, ষ্টোলশিং য়াওবা অনৌবা মথোল অহুমগী কমপ্লেক্স, ধ্যান তৌনবা হোল, অতিথিশিংগী লৈফম, ওফিসকী কাশিং য়াওরি। মসিনা তুরিজম চাউখৎহনবা, থবক ফংহনবা অমসুং ললোন-ইতিক্কী খুদোংচাবা কয়া পীগনি অমসুং লমদম অসিগী শেন-থুম অমসুং খুন্নাইগী ফিবম ফগৎহনগনি।

***