মধ্য প্রদেশকী রাজ্যপাল, শ্রী মঙ্গুভাই পতেল, মুখ্য মন্ত্রী শ্রী মোহন য়াদবজী, অতোপ্পা দিগ্নিতরীশিং, নুপীশিং অমসুং নুপাশিং!

অহানবদা, ঐহাক্না মফম অসিদা য়ৌরকপদা থেংখিবা অসিগীদমক ঙাকপিনবা হায়জরি। ঙরাং ঐহাক মফম অসিদা লাকপদা, ঙসি ক্লাস ১০ অমসুং ১২গী মহৈরোয়শিংনা মখোয়গী একজামশিং পাংথোক্কদৌরি হায়বসি ঐহাক্না ঙলকপদগী থেংখিবনি। মখোয়গী একজামগী মতম অসি ঐহাক্না রাজ ভবন থাদোকপগা মান্নৈ। করিগুম্বা সেক্যুরিতীনা মরম ওইদুনা লম্বীশিং থিংলবদি মহৈরোয়শিংনা মখোয়গী একজামিনেসন সেন্তরশিংদা চৎপদা খুদোংচাদবা মায়োক্নবগী ওইথোকপা য়াবা লৈ। মহৈরোইশিংগীদমক খুদোংচাদবা অমত্তা লৈহন্দনবা, মহৈরোই পুম্নমক মখোয়গী একজামিনেসন সেন্তরশিংদা য়ৌরে হায়বা খঙদোক্লবা মতুংদা ঐহাক্না রাজ ভবন থাদোক্নবা ৱারেপ লৌখি। মরম অদুনা, ঐহাক্না ঐহাক্কী খোঙচৎকী মতম অদু মিনিত ১৫-২০ থেংথহনখি। মসিনা ময়াম পুম্নমক্তা খুদোংচাদবা খরা থোকহনখি। ঐহাক্না অমুক্কা হন্না ময়াম পুম্নমকপু থম্মোয় শেংনা ঙাকপিনবা হায়জরি।

মরুপশিং,

রাজা ভোজকী শেংলবা শহর অসিদা ময়াম পুম্নমক্না তরাম্না ওকপিবা অসি ঐহাক্কীদমক্তা চাউথোকচনীংঙাই ওইবা অমনি। তোঙান তোঙানবা ইন্দস্ত্রীশিং অমসুং সেক্তরশিংদগী ইচিল-ইনাও কয়া অমা ঙসি মফম অসিদা পুনখ্রে। ঙসিগী থৌরম অসি 'ভিক্সিৎ মধ্য প্রদেশ' (চাউখৎলবা মধ্য প্রদেশ) দগী 'ভিক্সিৎ ভারত' (চাউখৎলবা ভারত) ফাওবগী খোঙচৎ অসিদা য়াম্না মরু ওই। মোহন জী অমসুং মহাক্কী তীম পুম্নমকপু মসিগী অচৌবা থৌরম অসি শীনবগীদমক ঐহাক্না থম্মোয় শেংনা থাগৎপা ফোংদোকচরি।

মরুপশিং,

ভারতকী পুৱারীদা ইহান হানবা ওইনা, মালেম পুম্বনা ভারতকীদমক অফবা ৱাখল্লোন ফোংদোক্লি। মীচম প্রজা, শেন্মিৎলোনগী এক্সপর্ত, তোঙান তোঙানবা লৈবাকশিং নৎত্রগা মালেমগী ইন্সতিত্যুসনশিং ওইরো, ভারত অসিদগী মীপুম খুদিংমক্না অৱাংবা থাক্কী আশা তৌরি। হৌখিবা চয়োল খরা অসিদা ফোংদোকখিবা ৱাফমশিং অসিনা ভারত্তা ইনভেস্তর খুদিংমক্কী মীৎয়েং চংলক্লি। নুমিৎ খরনিগী মমাংদা, ৱার্ল্দ বেঙ্কনা হায়খি মদুদি ভারত অসি লাক্কদৌরিবা চহিশিংদা মালেমগী খ্বাইদগী খোঙজেল য়াংনা চাউখৎলক্লিবা ইকোনোমী অমা ওইদুনা লৈগনি। ও.ই.সি.দি.গী মরুওইবা মীহুৎ অমনা হায়খি মদুদি মালেমগী তুংলমচৎ অসি ভারত্তা লৈরি। হন্দক্তা ক্লাইমেৎ চেঞ্জগী মতাংদা য়ু.এন. ওর্গানাইজেসন্না ভারতপু সোলার ইনর্জীদা সুপর পৱার অমা ওইনা শকখঙখি। লৈবাক কয়ানা শুপ্নগী ঙাংবা খক্তা ওইনা তৌরবসু, ভারতনা ফলশিং উবা ফংহল্লি হায়নসু ইন্সতিত্যুসন অসিনা পনখি। মালেমগী এয়রোস্পেস ফার্মশিংগীদমক ভারতনা মতৌ করম্না অফবা সপ্লাই চেন হব অমা ওইরক্লি হায়বদু হন্দক্কী রিপোর্ত অমনা তাক্লি। মালেমগী সপ্লাই চেনগী শিংনবশিং অসি কোকহন্নবা ভারতনা পাম্বৈ অমনি হায়না মীওই কয়ানা উরি। মালেমনা ভারতকীদমক থাজবা হেনগৎলক্লিবা অসি উৎলিবা অসিগুম্বা খুদম কয়া ঐহাক্না থমজগে। হায়রিবা থাজবা অসিনা ভারতকী রাজ্য খুদিংমক্কী থাজববুসু মপাঙ্গল কনখৎহল্লি। ঙসি, ঐখোয়না গ্লোবেল সম্মিৎ অসিদা, মধ্য প্রদেশতা, ওপতিমিজম অসি উবা অমসুং ফাওবা ফংলি।

মরুপশিং,

মীশিং য়াম্বগী মতুং ইন্না মধ্য প্রদেশ অসি ভারতকী মঙাশুবা খ্বাইদগী চাউবা রাজ্যনি। মসি লৌউ-শিংউদা খ্বাইদগী মকোক থোংবা রাজ্যশিংগী মনুংদা অমনি অমসুং মিনরেল রিসোর্সতা খ্বাইদগী মকোক থোংবা রাজ্য মঙাগী মনুংদা লৈ। এম.পি. অসি পুন্সি পীবা মা নর্মদাগী মঙাল ফংলি। রাজ্য অসিদা জি.দি.পি.গী লমদা লৈবাক অসিগী খ্বাইদগী ফবা রাজ্য মঙাগী মনুংদা অমা ওইনবগী পোতেন্সিএল অমসুং ওইথোকপা য়াবা পুম্নমক লৈ।

মরুপশিং,

হৌখিবা চহি তরাগী খুজিং অনি অসিদা, মধ্য প্রদেশনা অহোংবা লাকপগী অনৌবা য়ুগ অমা উবা ফংলে। রাজ্য অসিনা মৈ অমসুং ঈশিং সপ্লাইগা মরী লৈনবা অচৌবা শিংনবশিং থেংনখিবা মতম অমা লৈখি। লো এন্দ ওর্দরগী ফিভম অসি হেন্না ফৎখিদে, মসিনা ইন্দস্ত্রীএল দিবেলপমেন্তবু য়াম্না অৱাবা ওইহল্লি। অদুম ওইনমক, হৌখিবা চহি ২০ অসিদা, মীয়ামগী মতেংগা লোয়ননা, এম.পি.দা লৈরিবা বিজেপি সরকারনা অফবা লৈঙাক্লোনদা মীৎয়েং থম্লি। চহি তরাগী খুজিং অনিগী মমাংদা, ইনভেস্তরশিংনা এম.পি.দা ইনভেস্ত তৌনিংলমদে। অদুবু ঙসিদি, এম.পি.না লৈবাক অসিগী শিংথানিংঙাই ওইরবা ইনভেস্তমেন্তকী মফমশিংগী মরক্তা য়াওরে। লম্বীগী ফীভম ফত্তবনা মরম ওইদুনা এম.পি.দা বস ত্রান্সপোর্ত ফাওবা অৱাবা ওইরকখিবা মতম অমা লৈখি। অদুবু ঙসিদি, এম.পি.না ভারতকী ই.ভি. রিভোলুসনদা মকোক থোংবা রাজ্যশিংগী মনুংদা অমা ওইরে। জনুৱারী ২০২৫ ফাওবদা, ইলেক্ত্রিক ভেহিকল লাখ ২ রোম রাজ্য অসিদা রেজিস্তর তৌখ্রে। মসিনা চাউরাক্না চাদা ৯০গী গ্রোথ অমা উৎলি। মসিনা তাক্লি মদুদি এম.পি.না অনৌবা মেন্যুফেকচরিং সেক্তরশিংগীদমক্তা য়াম্না থুনা অফবা দেস্তিনেসন অমা ওইরক্লি। চহি অসি ইন্দস্ত্রী অমসুং এমপ্লোইমেন্তকী চহি ওইনা লাউথোকখিবগীদমক মোহন জী অমসুং মহাক্কী তীমবু ঐনা থাগৎপা ফোংদোকচরি।

মরুপশিং,

হৌখিবা চহি তরা অসিদা ভারতনা ইনফ্রাস্ত্রকচর দিবেলপমেন্তকী লমদা চাউখৎপা অমা উবা ফংলে। ঐহাক্না থাজবগা লোয়ননা হায়জবা য়াই মদুদি মধ্য প্রদেশনা মসিগী কান্নবা য়াম্না ফংলে। লৈবাক অসিগী খ্বাইদগী চাউবা শহর অনি শম্নহল্লিবা দিল্লী-মুম্বাই এক্সপ্রেসৱেনা এম.পি.দা চাউনা ফাওদুনা চৎলি মসিনা তাকপদি, অমরোমদা, এম.পি.না মুম্বাইগী পোর্তশিংদা য়াম্না থুনা কনেক্তিবিতী ফংহল্লি, অমসুং অতোপ্পা অমরোমদা, মসিনা অৱাং ভারতকী কৈথেলশিংসু শম্নহল্লি। ঙসিদি, মধ্য প্রদেশতা কিলোমীতর লাখ ৫ হেনবগী লম্বী নেৎৱার্ক লৈরে। রাজ্য অসিগী ইন্দস্ত্রীএল কোরিদোরশিং অসি মোদর্ন এক্সপ্রেসৱেশিংগা পুনশিন্নবা হোৎনরি। মসিনা এম.পি.দা লোজিস্তিক্স সেক্তরদা খোঙজেল য়াংনা চাউখৎপা ঙমহল্লি।

মরুপশিং,

এয়র কনেক্তিবিতীগী মতাংদা, গৱালিয়র অমসুং জবলপুর এয়রপোর্তকী তর্মিনেলশিং পাকথোক চাউথোকহনখ্রে। অদুবু ঐখোয়না মসিদা লেপখিদে, পাক চাউবা রেলৱেজ নেৎৱার্কসু মোদর্নাইজ তৌরি। রাজ্য অসিনা রেলৱেজ ১০০% ইলেক্ত্রিফিকেসন তৌখ্রে। ভোপালদা লৈবা রানী কমলাপতি রেলৱে স্তেসন অসিনা মালেমগী থাক্কী দিজাইনগা লোয়ননা মীপুম খুদিংমকপু অঙকপা পোকহল্লি। মোদেল অসিবু মখা চত্থদুনা অমৃত ভারত স্তেসন স্কিমগী মখাদা এম.পি.দা রেলৱে স্তেসন ৮০ মোদর্নাইজ তৌরি।

মরুপশিং,

দিকেদ অসি ভারতকী ইনর্জী সেক্তরদা মমাংদা অমুক্তা ওইখিদ্রিবা মওংদা চাউখৎলকপগী মতম অমা ওইখি। মরুওইনা গ্রীন ইনর্জীদা, ভারতনা থাজবা ঙমদবা অদু ফংলে। হৌখিবা চহি ১০ অসিদা, দোল্লর বিল্লিয়ন ৭০ হেনবা হায়বদি লুপা ত্রিল্লিয়ন ৫, রিন্যুএবল ইনর্জী সেক্তরদা খক্তদা ইনভেস্ত তৌখ্রে। মসিনা হৌখিবা চহি খক্তদা ক্লিন ইনর্জীগী লমদা থবক লাখ ১০ হেন্না ফংহনখ্রে। মসিগী ইনর্জী চাউখৎপা অসিদগী মধ্য প্রদেশসু চাউনা কান্নবা ফংলি। ঙসিদি, এম.পি. অসি ইলেক্ত্রিসিতী জেনরেসন কেপাসিতী মেগাৱাৎ ৩১,০০০ রোম লৈবা ওইরে, মদুনা চাদা ৩০দি ক্লিন ইনর্জী সোর্সশিংদগী লাকপনি। রীৱা সোলার পার্ক অসি লৈবাক অসিগী খ্বাইদগী চাউবা সোলার পার্কশিংগী মনুংদা অমনি। হন্দক্তা ওমকারেশ্বরদা ফ্লোতিং সোলর প্লান্ত অমা শঙ্গাখি।  মসিগী মথক্তা, সরকারনা বিনা রিফাইনরী পেত্রোকেমিকেল কমপ্লেক্সতা লুপা করোর ৫০,০০০ ইনভেস্ত তৌখ্রে। মসিনা মধ্য প্রদেশপু পেত্রোকেমিকেলশিংগী হব অমা ওইহনবদা মতেং পাংগনি। ইনফ্রাস্ত্রকচর অসিবু মতেং পাংনবা, এম.পি. সরকারনা অনৌবা পোলিসীশিং অমসুং অখন্নবা ইন্দস্ত্রীএল ইনফ্রাস্ত্রকচরগা লোয়ননা মতেং পাংলি। রাজ্য অসিদা ইন্দস্ত্রীএল জোন ৩০০ হেন্না লৈরে অমসুং পীথমপুর, রতলাম অমসুং দেৱাসতা একর লিশিং কয়া কোনশিনবা অচৌবা ইনভেস্তমেন্ত জোনশিং শেমগৎলি। মসিনা তাক্লিবদি ইনভেস্তর পুম্নমক্কী ওইনা, মধ্য প্রদেশনা অৱাংবা রিতর্নগীদমক অচৌবা খুদোংচাবা কয়া অমা পীরি।

মরুপশিং,

ইন্দস্ত্রিএল দিবেলপমেন্তকীদমক ৱাতর সেক্যুরিতী অসি কয়া মরুওইবগে হায়বসি ঐখোয় পুম্নমক্না খঙই। মসি ফংনবগীদমক ঐখোয়না নাকল অমরোমদা ঈশিং কঞ্জার্বেসনদা মীৎয়েং থম্লি অমসুং অতোপ্পা নাকল অমরোমদা তুরেলশিং শম্নহন্নবগী অচৌবা মিসন অমা পায়খৎলি। মধ্য প্রদেশকী লৌউ-শিংউ অমসুং ইন্দস্ত্রীশিং অসি মসিগী খোংথাং অসিগী মরুওইবা কান্নবা ফংলগনি। হন্দক্তা, লুপা করোর ৪৫,০০০গী শেনফমগা লোয়ননা কেন-বেৎৱা রিভর ইন্তরলিঙ্কিং প্রোজেক্তকী থবক হৌখ্রে। প্রোজেক্ত অসিনা লৌউ-শিংউগী লম হেক্তর লাখ ১০ রোমগী পোত্থোক হেনগৎহনগনি। মসিনা মধ্য প্রদেশতা ঈশিংগী মেনেজমেন্তসু য়াম্না মপাঙ্গল কনখৎহল্লগনি। অসিগুম্বা ইনিসিএতিবশিংনা ফুদ প্রোসেসিং, এগ্রো-ইন্দস্ত্রী অমসুং তেক্সতাইল সেক্তরশিংদা অচৌবা পোতেন্সিএল অমা ফংহল্লগনি।

মরুপশিং,

মধ্য প্রদেশতা দবল ইঞ্জিন লৈঙাক অমা শেম্লবা মতুংদা, চাউখৎপগী খোঙজেলসু শরুক অনি হেনগৎলে। কেন্দ্র সরকারনা রাজ্য অমসুং লৈবাক অসিগী চাউখৎ থৌরাংগীদমক এম.পি.গা খুৎশম্নদুনা থবক তৌরি। ইলেক্সনগী মতমদা, ঐহাক্না হায়খি মদুদি ঐখোয়না ঐখোয়গী অহুমশুবা তর্মদা শরুক অহুম হেন্না য়াংনা থবক তৌগনি। ঐখোয়না অসিগুম্বা খোঙজেল অসি ২০২৫গী অহানবা নুমিৎ ৫০দা উবা ফংলে। থা অসিদা, ঐখোয়গী বজেৎ অদু পুথোকখি। মসিগী বজেৎ অসিদা, ঐখোয়না ভারতকী চাউখৎপগীদমক কেতালাইজর খুদিংমক পুক্নিং থৌগৎলি। ঐখোয়গী মিদ্দল ক্লাস অসি খ্বাইদগী চাউবা তেক্সপেয়রনি অমসুং সর্ভিসশিং অমসুং মেন্যুফেকচরিংগী দিমান্দসু শেম্মি। মিদ্দল ক্লাসকী শক্তি হেনগৎহন্নবা মসিগী বজেৎ অসিদা খোংথাং কয়া অমা লৌখৎখ্রে। ঐখোয়না লুপা লাখ ১২ ফাওবগী ইনকম অসি তেক্স ফ্রী ওইহল্লে অমসুং তেক্স স্লেবশিং শেমদোক্লে। আর.বি.আই.নসু বজেৎকী মতুংদা শেন্দোইগী চাং হন্থহনখ্রে।

মরুপশিং,

বজেৎ অসিদা লোকেল সপ্লাই চেন অমা শেমগৎপদা মরুওইবা পীরি। মসিনা ঐখোয় মেনুফেকচরিংদা মপুং ফানা মশা-মরোমদোম লেপচবা ঙমহনগনি। মমাংগী সরকারশিংনা এম.এস.এম.ই.শিংগী ওইথোকপা য়াবশিং অদু অথিংবা থমখিবা মতম অমা লৈখি। মসিনা ভারত্তা লোকেল সপ্লাই চেন অসি মপুং ফানা চাউখৎহনবদা অথিংবা থমখি। ঙসিদি, ঐখোয়না এম.এস.এম.ই.না লুচিংবা লোকেল সপ্লাই চেন অমা শেমগৎপদা অখন্নবা মীৎয়েং থম্লি। এম.এস.এম.ই.শিংগী ৱাহন্থোক অসি মখা তানা ফগৎহনখ্রে, ক্রেদিৎ লিঙ্ক তৌরবা ইন্সেন্তিবশিং ফংহল্লে, ক্রেদিৎ ফংহনবদা হেন্না লায়থোকহল্লে, অমসুং ভেল্যু এদিসন অমসুং এক্সপোর্তশিংদা মতেং পীবা হেনগৎহল্লে।

মরুপশিং,

হৌখিবা চহি তরা অসিদা, ঐখোয়না নেস্নেল লেবেলদা অচৌবা রিফোর্মশিং অথুবা মতমদা পাংথোক্লি। হৌজিক্তি, রিফোর্মশিং অসি স্তেত অমসুং লোকেল লেভেলদসু পুক্নিং থৌগৎলি। ঐহাক্না স্তেত দি-রেগুলেসন কম্মিসনবু মরুওইনা পননিংই, মসি বজেত্তা পনখি। ঐখোয়না রাজ্যশিংগা লেপ্পা লৈতনা ৱারী শানদুনা লাক্লি। হৌখিবা চহি খরা অসিদা, রাজ্য সরকারশিংগা খুৎশম্নদুনা ঐখোয়না কমপ্লাইএন্স ৪০,০০০ হেন্না হন্থহনখ্রে। হৌখিবা চহিশিংদা, মখোয়গী কান্নফম খঙদ্রবা মতমগা চুনদ্রবা আইন চাউরাক্না ১৫০০ লৌথোকখ্রে। ঐখোয়গী পান্দমদি ললোন-ইতিক তৌবদা লায়থোকহল্লিবা কাংলোনশিং মশক খঙদোকপনি। দি-রেগুলেসন কম্মিসন অসিনা রাজ্যশিংদা ইনভেস্তমেন্ত-ফ্রেন্দলী রেগুলেতরী ইকোসিস্তেম অমা শেমগৎপদা মতেং পাংগনি।

মরুপশিং,

হায়রিবা বজেৎ অসিদা, ঐখোয়না বেসিক কস্তম দ্যুতী স্ত্রকচরসু লাইথোক্লে। মরুওইবা ইন্দস্ত্রী ইনপুত কয়াগী রেৎশিং হন্থখ্রে। কাস্তমগী কেসশিং য়েংশিন্নবগীদমক মতমগী অকক্নবা মতমসু লেপকনি। মসিগী মথক্তা, প্রাইবেৎ ওন্তপ্রিনরশিপ অমসুং ইনভেস্তমেন্তকীদমক অনৌবা সেক্তরশিং লেপ্তনা হাংদোক্লি। ন্যুক্লিয়র ইনর্জী, বাইও-মেনুফেকচরিং, ক্রিতিকেল মিনরেল প্রোসেসিং অমসুং লিথিয়ম বেতরী মেন্যুফেকচরিং য়াওনা চহি অসিদা, ঐখোয়না ইনভেস্তমেন্তকী অনৌবা লম্বী কয়া অমা হাংদোক্লে। মসিনা সরকারগী অপাম্বা অমসুং ফিরেপ উৎলি।

মরুপশিং,

সেক্তর অহুম্না ভারতকী চাউখৎলবা তুংলমচৎ শেমগৎপদা মরু ওইবা থৌদাং অমা লৌগনি। সেক্তর অহুম অসিনা অনৌবা থবক মিলিয়ন কয়া অমা শেমগনি। মখোয় অসি তেক্সতাইল, তুরিজম অমসুং তেক্নোলোজীনি। ঐখোয়না তেক্সতাইল সেক্তরদা য়েংলবদি, ভারত অসি কতন, সিল্ক, পলিস্তর অমসুং ভিস্কোজ পুথোকপা অনিশুবা খ্বাইদগী চাউবা লৈবাক ওইরি। তেক্সতাইল ইন্দস্ত্রীনা মীওই মিলিয়ন কয়াদা থবক পীরি। ভারতনা তেক্সতাইলদা মপাঙ্গল কনবা চৎনবী, হৈ-শিংলবা শিন্মীশিং অমসুং ওন্তপ্রিনরশিপ স্পিরিৎ লৈরি। মরু ওইনা, মধ্য প্রদেশ অসি ভারতকী কতন কেপিতেলনি হায়না লৌনৈ। ভারতকী ওর্গানিক কতন সপ্লাইগী চাউরাক্না চাদা ২৫দি মধ্য প্রদেশতগী লাক্লি। রাজ্য অসি লৈবাক অসিদা মলবেরী সিল্ক খ্বাইদগী য়াম্না পুথোকপা মফম অমসুনি। মফমসিগী মমিং চৎলবা চান্দরী অমসুং মহেশ্বরী সারিশিং অসি য়াম্না পাম্নৈ অমসুং জি.আই. তেগ ফংখ্রে। সেক্তর অসিদা অদোমগী ইনভেস্তমেন্তনা মধ্য প্রদেশকী তেক্সতাইলশিংনা মালেমগী থাক্তা ইথিল পীবদা চাউনা মতেং পাংগনি।

মরুপশিং,

ত্রেদিস্নেল তেক্সতাইলগী মথক্তা, ভারতনা অনৌবা লম্বীশিংসু থিরি। ঐখোয়না এগ্রো তেক্সতাইল, মেদিকেল তেক্সতাইল, অমসুং জিওতেক্সতাইলশিং প্রমোৎ তৌরি, মখোয়শিং অসি তেক্নিকেল তেক্সতাইলগী কাংলুপকী মনুং চল্লি। মসিগীদমক্তা নেস্নেল মিসন অমা হৌদোক্লে, অমসুং ঐখোয়না মসিগীদমক বজেত্তা ইন্সেন্তিবশিং পীরি। পি.এম. মিত্র স্কিমগী মখাদা লৈবাক শিনবা থুংনা অচৌবা তেক্সতাইল পার্ক তরেৎ শেমগৎলিবা অসিসু খঙজিনবীয়ু। অসিগুম্বা পার্ক অমা মধ্য প্রদেশতা লিংখৎলি, মসিনা তেক্সতাইল সেক্তরদা মখা তানা খুমাং চাউশিলহল্লগনি। তেক্সতাইল ইন্দস্ত্রীগীদমক লাওথোকখিবা পি.এল.আই. স্কিমগী মপুং ফানা কান্নবা লৌনবা ঐনা ময়াম পুম্নমকপু হায়জরি।

মরুপশিং,

তেক্সতাইলদা তৌবগুম্না, ভারতনা তুরিজম সেক্তরদা অনৌবা দাইমেন্সনশিংসু হাপচিল্লি। এম.পি. তুরিজমগীদমক্তা কেম্পেন অমা লৈরম্মি মদুদা হায়রম্মি, ‘এম.পি. অজাব ভী হাই, সবসে গজব ভী হাই; (এম.পি. অসি তোপ তোপ্পা অমসুং খ্বাইদগী থোইদোকপা অমনি) । মধ্য প্রদেশতা, নর্মদা তুরেলগী অকোইবদা অমসুং ত্রাইবেলগী মফমশিংদা তুরিজম ইনফ্রাস্ত্রকচরদা চাউনা চাউখৎপা উবা ফংলে। রাজ্য অসিদা নেস্নেল পার্ক কয়া লৈরি অমসুং হেল্থ অমসুং ৱেলনেস তুরিজমগী অচৌবা খুদোংচাবা কয়া অমা লৈরি। "হিল ইন ইন্দিয়া"গী মন্ত্র অসি মালেমগী ওইনা শকখঙনরক্লি। হেল্থ অমসুং ৱেলনেস সেক্তরদা ইনভেস্তমেন্তগী খুদোংচাবশিং লেপ্তনা হেনগৎলক্লি। অমসুং মরম অসিনা ঐখোয়গী সরকার অসিনা হিরম অসিদা পব্লিক-প্রাইবেৎ পার্তনরশিপশিং পুক্নিং থৌগৎলি। ভারতনা মসিগী ত্রেদিস্নেল ত্রিৎমেন্তশিং অমসুং আয়ুশপু পাক-শন্না প্রমোৎ তৌরি। ঐখোয়না অখন্নবা অয়ুশ ভিজা ফাওবা পীরি। মসিগী খোঙথাং পুম্নমক অসিনা মধ্য প্রদেশতা চাউনা কান্নবা ফংহনগনি।

মরুপশিং,

অদোম মফমসিদা লৈরিঙৈদগী, ঐহাক্না অদোমবু উজেনগী মহাকল মহোলোক চৎনবা পুক্নিং থৌগৎলি। অদোম্না মহাকলগী য়াইফ পাউজেল ফংগনি অমসুং লৈবাক অসিনা তুরিজম অমসুং হোস্পিতেলিতী সেক্তর পাকথোক চাউথোকহনবদসু অদোম্না শরুক য়াবিয়ু।

মরুপশিং,

রেদ ফোর্ৎতগী ঐহাক্না হায়খি: "হৌজিক অসি মতমনি, অচুম্বা মতমনি।" মসি অদোমগীদমক মধ্য প্রদেশতা শেল থাদবা অমসুং শেল থাদবা হেনগৎহনবগী অচুম্বা মতমসু ওইরি। অমুক্কা হন্না, ঐহাক্না ময়াম পুম্নমকপু য়াইফ-পাউজেল পীজরি।

ময়ামবু হন্না-হন্না থাগৎচরি।

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***