কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে আজি লক্ষ্ণৌ, তিৰুৱনন্তপুৰম, ত্ৰিচি, কোঝিকোড়ে আৰু অমৃতসৰ বিমানবন্দৰত ভিডিঅ' কনফাৰেন্সিঙৰ জৰিয়তে ফাষ্টট্ৰেক ইমিগ্ৰেচন-ট্ৰাষ্টেড পৰ্যটক প্ৰগ্ৰেম (এফটিআই-টিটিপি) উদ্বোধন কৰে। এই উপলক্ষে কেন্দ্ৰীয় গৃহ সচিব আৰু চোৰাংচোৱা ব্যুৰোৰ সঞ্চালককে ধৰি কেইবাজনো বিশিষ্ট ব্যক্তি উপস্থিত থাকে।

অনুষ্ঠানত আগবঢ়োৱা ভাষণত কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে কয় যে এই পদক্ষেপে যাত্ৰীসকলৰ সুবিধা বৃদ্ধি কৰাই নহয়, দেশত ঘটি থকা পৰিৱৰ্তনৰ বিষয়েও তেওঁলোকক পৰিচয় কৰাই দিয়াৰ সুযোগ প্ৰদান কৰিব। তেওঁ কয় যে প্ৰধানমন্ত্ৰী শ্ৰী নৰেন্দ্ৰ মোদীৰ গতি, মাত্ৰা আৰু পৰিসৰৰ দৃষ্টিভংগীৰ সৈতে সংগতি ৰাখি পৰ্যটকৰ সুবিধা বৃদ্ধিৰ পৰৱৰ্তী পৰ্যায় আজিৰে পৰা এই কাৰ্যসূচীৰে আৰম্ভ কৰা হৈছে। শ্ৰী শ্বাহে লগতে কয় যে প্ৰধানমন্ত্ৰী মোদীয়ে সদায় এই কথাত গুৰুত্ব দি আহিছে যে প্ৰযুক্তিগত সঁজুলিৰ লগতে আমি আস্থা বহুগুণক হিচাপেও কাম কৰিব লাগিব আৰু আজিৰ কাৰ্যসূচী সেই দিশত এক উল্লেখযোগ্য পদক্ষেপ।

শ্ৰী অমিত শ্বাহে কয় যে ফাষ্ট ট্ৰেক ইমিগ্ৰেচন-ট্ৰাষ্টেড পৰ্যটক প্ৰগ্ৰেম (এফটিআই-টিটিপি)ৰ জৰিয়তে আজিৰে পৰা বিমানবন্দৰসমূহত পৰ্যটকৰ নিৰৱচ্ছিন্ন প্ৰৱেশৰ সুবিধা উপলব্ধ হ’ব। তেওঁ দৃঢ়তাৰে কয় যে কেৱল সুবিধা প্ৰদান কৰাটোৱেই যথেষ্ট নহয়; আমি নিশ্চিত কৰিব লাগিব যে ইয়াৰ পৰা সৰ্বাধিক সংখ্যক পৰ্যটক উপকৃত হয়। ইয়াৰ বাবে পাছপ’ৰ্ট আৰু অ’চিআই কাৰ্ড প্ৰদানৰ সময়ত পঞ্জীয়ন সম্ভৱপৰ কৰি তোলাৰ প্ৰচেষ্টা হাতত ল’ব লাগে। তেওঁ কয় যে যদি এইটো কাৰ্যকৰী কৰিব পৰা যায় তেন্তে পৰ্যটকসকলে আঙুলিৰ ছাপ বা নথিপত্ৰৰ বাবে ঘূৰি অহাৰ প্ৰয়োজন নহ’ব আৰু তেওঁলোকে যেতিয়াই ইচ্ছা তেতিয়াই পাছপ’ৰ্ট ব্যৱহাৰ কৰি যাত্ৰা কৰিব পাৰিব। কেন্দ্ৰীয় গৃহমন্ত্ৰীয়ে কয় যে এই কাৰ্যসূচীৰ দ্বাৰা সৰ্বাধিক সংখ্যক লোক যাতে উপকৃত হয় তাৰ বাবে সকলো কাৰিকৰী সম্ভাৱনা অন্বেষণ কৰিব লাগে। তেওঁ লগতে কয় যে ভাৰতীয় নাগৰিকসকল নিশ্চিতভাৱে লাভৱান হ’ব যদিও অ’চিআই কাৰ্ডধাৰীয়ে সৰ্বাধিক লাভৱান হ’ব।

কেন্দ্ৰীয় গৃহমন্ত্ৰীয়ে কয় যে ফাষ্ট ট্ৰেক ইমিগ্ৰেচন-ট্ৰাষ্টেড পৰ্যটক প্ৰগ্ৰেম (এফটিআই-টিটিপি) এনে এক কাৰ্যসূচী যিয়ে সুবিধা আৰু ৰাষ্ট্ৰীয় নিৰাপত্তা দুয়োটাকে বৃদ্ধি কৰে। তেওঁ কয় যে ২০২৪ চনত দিল্লীৰ পৰা এই কাৰ্যসূচী আৰম্ভ কৰা হৈছিল, তাৰ পিছত মুম্বাই, চেন্নাই, কলকাতা, বেংগালুৰু, কোচি, আহমেদাবাদ বিমানবন্দৰত কাৰ্যকৰী কৰা হৈছিল আৰু আজি পাঁচটা নতুন বিমানবন্দৰ সংযোজন কৰা হৈছে। শ্ৰী শ্বাহে উল্লেখ কৰে যে এই প্ৰক্ৰিয়া এতিয়া একেলগে মুঠ ১৩টা বিমানবন্দৰত কাৰ্যক্ষম হৈ উঠিছে। তেওঁ লগতে কয় যে গৃহ পৰিক্ৰমা মন্ত্ৰালয়ে এই কাৰ্যসূচীক আগন্তুক নৱী মুম্বাই আৰু জেৱাৰ বিমানবন্দৰৰ সৈতে একত্ৰিত কৰাৰ পৰিকল্পনা কৰিছে। শ্ৰী শ্বাহে উল্লেখ কৰে যে এতিয়ালৈকে এই সুবিধা ব্যৱহাৰ কৰা সকলোৱে ইয়াৰ প্ৰশংসা কৰিছে। পৰ্যটকসকলে এতিয়া কোনো দীঘলীয়া শাৰী পাতিব নালাগে বা তেওঁলোকক মানুহৰ দ্বাৰা পৰীক্ষা কৰিব নালাগে, মাত্ৰ ৩০ ছেকেণ্ডতে পলম নকৰাকৈ প্ৰৱেশৰ অনুমতি লাভ কৰে। তেওঁ কয় যে এই পৰ্টেলত প্ৰায় ৩ লাখ পৰ্যটকে পঞ্জীয়ন কৰিছে, ইয়াৰে ২.৬৫ লাখ পৰ্যটক ভ্ৰমণৰ সময়ত ইয়াক ব্যৱহাৰ কৰিছে আৰু এই সংখ্যা নিৰন্তৰ বৃদ্ধিৰ বাবে প্ৰচেষ্টা চলোৱা উচিত।

শ্ৰী অমিত শ্বাহে কয় যে শ্ৰী নৰেন্দ্ৰ মোদীৰ নেতৃত্বত বিগত ১১ বছৰত আন্তঃৰাষ্ট্ৰীয় যাত্ৰী যাতায়ত যথেষ্ট বৃদ্ধি পাইছে। তেওঁ কয় যে ২০১৪ চনত বিদেশলৈ যোৱা পৰ্যটকৰ সংখ্যা আছিল ৩.৫৪ কোটি, যিটো ২০২৪ চনত প্ৰায় ৭৩ শতাংশ বৃদ্ধি পাই ৬.১২ কোটি হৈছিল। একেদৰে ২০১৪ চনত ভাৰত ভ্ৰমণ কৰা বিদেশী পৰ্যটকে সংখ্যা আছিল ১.৫৩ কোটি, যিটো ২০২৪ চনত প্ৰায় ৩১ শতাংশ বৃদ্ধি পাই প্ৰায় ২ কোটি হৈছিল পৰিসংখ্যা অনুসৰি ২০১৪ চনত মুঠ যাত্ৰীৰ সংখ্যা আছিল ৫.০৭ কোটি, যিটো ২০২৪ চনত ৮.১২ কোটি আছিল, যিয়ে হয় বিদেশৰ পৰা অহা বা বিদেশ ভ্ৰমণ কৰা যাত্ৰীসকলক প্ৰতিনিধিত্ব কৰে, যিয়ে সামগ্ৰিকভাৱে ৬০ শতাংশ বৃদ্ধিৰ ইংগিত দিয়ে। শ্ৰী শ্বাহে জোৰ দি কয় যে আমাৰ লক্ষ্য হ’ব লাগে যাতে সকলো ভাৰতীয় নাগৰিক আৰু অ’চিআই কাৰ্ডধাৰীয়ে এই সুবিধাৰ দ্বাৰা উপকৃত হয়।

https://ftittp.mha.gov.in নামৰ অনলাইন পৰ্টেলৰ জৰিয়তে এফটিআই-টিটিপি ৰূপায়ণ কৰা হৈছে। এই কাৰ্যসূচীত নামভৰ্তি কৰিবলৈ আবেদনকাৰীয়ে তেওঁলোকৰ সবিশেষ পূৰণ কৰি আৰু প্ৰয়োজনীয় নথি-পত্ৰ আপলোড কৰি পৰ্টেলত অনলাইন পঞ্জীয়ন কৰিব লাগিব। পঞ্জীয়নভুক্ত আবেদনকাৰীৰ বায়’মেট্ৰিক্স বিদেশী আঞ্চলিক পঞ্জীয়ন কাৰ্যালয়ত বা বিমানবন্দৰৰ মাজেৰে পাৰ হৈ যোৱাৰ সময়ত সংগ্ৰহ কৰা হয়। পঞ্জীয়নভুক্ত পৰ্যটকসকলে ই-গেটত বিমান সংস্থাটোৱে প্ৰদান কৰা বৰ্ডিং পাছ স্কেন কৰিব লাগিব আৰু তাৰ পিছত পাছপ’ৰ্ট স্কেন কৰিব লাগিব। আগমন আৰু প্ৰস্থান স্থানত স্থাপন কৰা ই-গেটত পৰ্যটকৰ বায়’মেট্ৰিক পৰীক্ষা কৰা হয়। সফল পৰীক্ষণৰ পিছত ই-গেট স্বয়ংক্ৰিয়ভাৱে খোল খায় আৰু প্ৰৱেশৰ অনুমতি প্ৰদান কৰা হয়।

****

RK/VV/PS/PR/DB