প্রধান মন্ত্রী শ্রী নরেন্দ্র মোদী সেপ্তেম্বর ১১ দা উত্তর প্রদেস অমসুং উত্তরখন্দদা চৎকনি।

অয়ুক পুং ১১:৩০ রোম তাবদা বারানসীদা, সেপ্তেম্বর ৯-১৬,২০২৫ ফাওবা ভারতকী খোঙচৎ অমদা লৈরিবা মাউরিসসকী প্রধান মন্ত্রী দোক্তর নবিনচন্দ্র রামগুলাম প্রধান মন্ত্রীনা তরাম্না ওক্কনি।

তুংদা, প্রধান মন্ত্রী দেহরাদুন্দা চৎকনি অমসুং নুংথিল পুং ৪:১৫ রোম তাবদা মহাক্না উত্তরখন্দদা ঈশিং ইচাউনা শোকহল্লবা মফমশিং মথক্তগী য়েংগনি। নুংথিলগী পুং ৫ রোম তাবদা, প্রধান মন্ত্রীনা লুচিংদুনা ওফিসিএলশিংগা লোয়ননা অৱাংবা থাক্কী হন্না য়েংশিনবা মীফম অমা পাংথোক্কনি।

পুৱারি ওইরবা বারানসী সহরদা লুচিংবা অনি উনবা অসিনা মতম কুইরবা সভেত্যগী মরী, অধ্যাতিক্কী মরীশিং অমসুং মীগা-মীগা লৈনবা মরীশিংদা য়ুম্ফম ওইদুনা ভারত অমসুং মাউরিসসকী মরক্ত লৈনরিবা অখন্নবা অমসুং তোপ-তোপ্পা মরী শেম্লে।

লৈবাক অনিগী খন্ন-নৈনবা মনুংদা, চাউখৎ-থৌরাংগী মরী অমসুং কেপাসিতি বিল্দিংদা অখন্নবা মীৎয়েং থমদুনা লুচিংবা অনিমক্না লৈবাক অনি মতেং পাংনরিবা অসিগী হিরম খুদিংমক হন্না য়েংশিনগনি। হকশেল, লাইরিক-লাইশু, সাইন্স অমসুং তেক্নোলোজি, ইনর্জি ইনফ্রাষ্ট্রকচর, রিন্যুএবল ইনর্জি, দিজিতেল পব্লিক ইনফ্রাষ্ট্রকচর অমসুং ব্লু ইকোনোমিদা পুন্না থবক তৌমিন্নবা হেনগৎহন্নবা খুদোংচাবশিংসু মখোয়না খন্নগনি। 

হৌখিবা মার্চ ২০২৫ দা পাংথোকখিবা প্রধান মন্ত্রী মোদীগী মাউরিসস খোঙচৎকী অফবা ফলদা য়ুম্ফম ওইদুনা খোঙচৎ অসি পাংথোকপনি অমসুং খোঙচৎ মনুংদা লুচিংবশিংনা লৈবাক অনিগী মরী অসি ‘ইনহান্স ষ্ট্রাতেজিক পার্তনরশিপ’ অমগী থাক্ত পুখৎখি।

ভারত মহাসাগর লমদমদা মরুওইবা মরুপ অমা অমসুং সমুদ্রগী নক্নবা য়ুম্লোন্নবা ওইনা, ভারতকী মহাসাগর ( ম্যুচুয়েল এন্দ হোলিষ্টিক এদভান্সমেন্ত ফোর সেকুরিতি এন্দ গ্রোথ এক্রোস রিজন) ভিজন অমসুং ‘য়ুম্লোন্নবনা হান্না’ থৌশিলদা মাউরিসস য়াম্না মরুওই। লৈবাক অনিগী মরক্ত মতেং পাংনবা হেনগৎহনবা অসিনা লৈবাক অনিমক্কী মীয়াম নুংঙাইহনবা খক নত্তনা গ্লোবেল সাউথকী অপুনবা অনিংবশিং থুংহন্নবা য়াম্না মরুওই।

 নুংঙাই য়াইফবা অমসুং তুংকোইনা চৎনবা য়াগদবা চাউখৎ-থৌরাংগী থবকশিং অমসুং অশোই-অঙাম থোক্তবা অমসুং অপুনবা তুংলমচৎ অমগী মাইকৈদা ভারত অমসুং মাউরিসস পুন্না চৎমিন্নরিবা খোঙচৎ অসিদা বারারনসী সম্মিৎ অচৌবা মাইপাকপা অমা ওইরগনি।

***