পি.এম.না হিমাচল প্রদেশকী ঈশিং-ঈচাউ অমসুং নোংনা শোকহল্লবা মফমশিং এরিএল সর্ভে তৌখ্রে

প্রধান মন্ত্রী, শ্রী নরেন্দ্র মোদীনা হিমাচল প্রদেশকী ঈশিং-ঈচাউগী ফিভম অমসুং হিমাচল প্রদেশকী শোকহল্লবা মফমশিংদা ক্লাউদবর্সত, নোং অমসুং লেন্দস্লাইদনা মরম ওইদুনা থোকহনখিবা অমাং-অতাশিং অদুবু য়েংশিন্নবা ২০২৫, সেপ্তেম্বর ৯দা হিমাচল প্রদেশতা চৎখ্রে।

প্রধান মন্ত্রীনা অহানবদা হিমাচল প্রদেশকী চম্বা, ভারমুর, কাঙ্গরা অমসুং অতোপ্পা মফমশিংদা লৈরিবা শোকহল্লবা মফমশিংগী এরিএল সর্ভে অমা পাংথোকখি। মদুগী মতুংদা, পি.এম. মোদীনা হিমাচল প্রদেশতা থোকখিবা মাং-তাকপগী চাং য়েংশিন্নবা অমসুং লৌখৎলিবা রিলীফ অমসুং রিহেবিলিতেসনগী খোঙথাংশিং য়েংশিন্নবা কাঙ্গরাদা ওফিসিএল ওইবা মীফম অমা পাংথোকখি। পি.এম. মোদীনা হিমাচল প্রদেশকীদমক লুপা কোতি ১৫০০গী শেন-থুমগী তেংবাং পীরগনি হায়না লাউথোকখি। এস.দি.আর.এফ. অমসুং পি.এম. কিসান সম্মান নিধিগী অনিশুবা ইন্সতোলমেন্ত অদু মাংজৌননা থাদোক্লগনি। পি.এম. অৱাস য়োজনাগী মখাদা তৌবা সেঙ্কসন, নেস্নেল হায়ৱেশিং নৌনা হন্না শেমজিনবা, পি.এম.এন.আর.এফ.কী মখাদা রিলীফ পীবগা লোইন-লোইননা শা-শনগীদমক মিনি কিৎশিং থাদোক্লগনি।

লৌউ-শিংউগী লমদা মতেং পীবগী তঙাই ফদবা অদু খঙলদুনা, হৌজিক্তি মৈ ফংদ্রিবা লৌমীশিংগীদমক্তা অখন্ননা অহেনবা মতেং পীরগনি।

পি.এম. আৱাস য়োজনাগী মখাদা, শোকহল্লবা য়ুমশিংগী জিওতেগিং তৌরগনি। মসিনা শোকহল্লবা মীওইশিংদা মখোয়গী অমাং-অতাশিং অদুবু চপ চানা খঙবদা অমসুং মখোয়গী মতেং পাংবদা হেন্না য়াংনা পাংথোকপা ঙমহল্লগনি।

তঙাইফদনা মহৈ-মশিং তম্বদা অথিংবা-অপনবা লৈতনা ফংহন্নবগীদমক, স্কুলশিংনা থোক্লিবা অমাং-অতাশিং রিপোর্ত তৌবা অমসুং জিওতেগ তৌবা ঙম্লগনি। মসিনা সমগ্র শিক্ষা অভিয়ানগী মখাদা মতম চানা তেংবাং পীবা ঙহল্লগনি।

ঈশিং খোমজিনবা অমসুং ঈশিং তুংশিনবদা মতেং পাংনবা ঈশিং খোমজিনবগীদমক রিচার্জ স্ত্রকচরশিং শাবগী থবক পায়খৎলগনি। হায়রিবা হোৎনরিবা থবকশিং অসিনা গ্রাউন্দ ৱাতরগী থাক হেনগৎহল্লগনি অমসুং ঈশিংবু হেন্না ফবা মওংদা মেনেজ তৌবদা মতেং পাংলগনি।

কেন্দ্র সরকারনা থোক্লিবা অমাং-অতাশিং অদুগী চাং য়েংশিন্নবা হিমাচল প্রদেশতা চৎনবা মাংজৌননা ইন্তর-মিনিস্ত্রীয়েল সেন্ত্রেল তীমশিং থাখ্রে, অমসুং মখোয়গী পীরকপা অকুপ্পা মরোলগী মতুং ইন্না মখা তানা মতেং পীনবা খন্নগনি।

প্রধান মন্ত্রীনা মহৌশাগী ওইবা অমাং-অতা অসিনা শোকহল্লবা ইমুং মনুংশিংগসু উনখি। মহাক্না লৈখিদ্রবশিংগী ইমুং-মনুংগী মীওইশিংদা মহাক্কী অৱাবা ফোংদোকখি। মহাক্না হায়খি মদুদি কেন্দ্র সরকারনা অরুবা মতম অসিদা রাজ্য সরকারগা লোইননা থবক তৌমিন্নগনি অমসুং অঙম্বা মতেং পাংগনি হায়খি।

পি.এম. মোদীনা ঈশিং-ঈচাউ অমসুং মহৌশাগী ওইবা অৱা-অনা অসিনা মরম ওইরগা লৈখিদ্রবশিংগী নক্নবা ইমুং-মনুংশিংদা লুপা লাখ ২ অমসুং শাথীনা শোকহল্লবশিংদা লুপা ৫০,০০০গী এক্স-গ্রেসিয়া পীরগনি হায়নসু লাউথোকখ্রে।

প্রধান মন্ত্রীনা হন্দক্কী ঈশিং-ঈচাউ অমসুং লেন্দস্লাইদ থোকখিবা অদুনা মরম ওইরগা পু-পাং শুদ্রবা অঙাংশিংবু  পি.এম. কেয়র্স ফোর চিলদ্রেন স্কীমগী মখাদা মপুং ফানা মতেং পাংগনি হায়না লাউথোকখ্রে। মসিনা মখোয়গী তুংগী য়াইফ-থৌরাংগী থবক পাইখৎপদা মতেং পাংলগনি।

প্রধান মন্ত্রীনা হায়খি মদুদি দিজাস্তর মেনেজমেন্তকী কাংলোনশিংগী মখাদা রাজ্যশিংদা এদভান্স দিসবর্সমেন্তশিং য়াওনা তেংবাং পুম্নমক পীরি। মহাক্না এন.দি.আর.এফ., এস.দি.আর.এফ., আর্মী, স্তেত এদমিনিস্ত্রেসন অমসুং অতোপ্পা সর্বিস ওরিয়েন্তেদ ওর্গনাইজেসনশিংগী পর্সোনেলশিংনা খুদক্তা তেংবাং পীনবা হোৎনবগীদমক থাগৎপা ফোংদোকখি। কেন্দ্র সরকারনা রাজ্যগী মেমোরেন্দম অমসুং কেন্দ্রগী তীমশিংগী রিপোর্তকী মতুং ইন্না এসেসমেন্ত অদু মখা তানা য়েংশিল্লগনি।

প্রধান মন্ত্রীনা ফিভম অসিগী মরুওইবা অদু খঙলদুনা ফিভম অসিবু কোকহন্নবা কেন্দ্র সরকারনা অঙমন্বা হোৎনগনি হায়না থাজবা পীখি।

***