వ్యవసాయం, పాడి పరిశ్రమలలో కొత్త జీఎస్టీ రేట్లు (వస్తు సేవల పన్ను) విప్లవాత్మక మార్పులు తీసుకురానున్నాయి. జీఎస్టీ ధరల తగ్గింపుతో దేశవ్యాప్తంగా ఉన్న రైతులు, వ్యవసాయ, పాడి పరిశ్రమ కార్మికులు పశు పోషకులు ఆనందం వ్యక్తం చేస్తూ.. ప్రధానమంత్రి శ్రీ నరేంద్ర మోదీ, కేంద్ర ఆర్థిక మంత్రి శ్రీమతి నిర్మలా సీతారామన్ లకు కృతజ్ఞతలు తెలిపారు. ఈ కొత్త ధరలను విప్లవాత్మక నిర్ణయంగా అభివర్ణిస్తూ, భవిష్యత్తులో చారిత్రాత్మక మార్పులకు నాంది పలకనున్నాయని కేంద్ర వ్యవసాయశాఖ మంత్రి శ్రీ శివరాజ్ సింగ్ చౌహాన్ అన్నారు.

జీఎస్టీ సంస్కరణల ప్రభావం ముఖ్యంగా చిన్న, మధ్య తరహా రైతులపై స్పష్టంగా కనిపిస్తుంది. వ్యవసాయ యంత్రాలు, సౌరశక్తి పరికరాలపై జీఎస్టీ తగ్గించడం వల్ల సాగు ఖర్చులు తగ్గి, రైతులకు లాభాలు పెరుగుతాయి. జీవాధారిత క్రిమి సంహారకాలు, సూక్ష్మపోషకాలపై జీఎస్టీ తగ్గింపు.. రైతులకు గణనీయమైన లాభాలను అందిస్తాయి. రసాయన ఎరువుల నుంచి బయో ఎరువుల వైపు మొగ్గుచూపేందుకు రైతులను ప్రోత్సహిస్తుంది. పాలు, జున్నుపై ప్రస్తుతం జీఎస్టీని పూర్తిగా తొలగించడంతో సాధారణ ప్రజలతోపాటు రైతులు, పశు సంరక్షకులు, పాల ఉత్పత్తిదారులకు కూడా ప్రయోజనం చేకూరనుంది. జీఎస్టీ సంస్కరణలు సమగ్ర వ్యవసాయాన్ని ప్రోత్సహించడంలో కీలక పాత్ర పోషిస్తున్నాయి. దీని వల్ల వ్యవసాయ అనుబంధ రంగాలైన పశుసంవర్ధకం, తేనెటీగల పెంపకం, మత్స్య సంపద, వ్యవసాయ అటవీ వ్యవస్థ, కోళ్ల పెంపకంలో స్పష్టమైన లాభాలు అందుతాయి. బీడీ ఆకులపై జీఎస్టీ ధరలు తగ్గించడంతో గిరిజనుల జీవనోపాధి మరింత మెరుగవుతుంది. వాణిజ్య సరుకు రవాణా వాహనాలపై పన్ను తగ్గడంతో వ్యవసాయ ఉత్పత్తుల రవాణా ఖర్చు తగ్గి, రైతులకు మరింత లాభం చేకూరుతుంది.

తగ్గిన ధరలు పెరగనున్న లాభాలు

·         ట్రాక్టర్ ధరలు తగ్గనున్నాయి.

·         ట్రాక్టర్ విడిభాగాలు చౌకగా లభిస్తాయి.

·         వ్యవసాయ పరికరాలు మరింత చౌక

·         సౌరశక్తితో నడిచే నీటిపారుదల పరికరాలు చౌకగా లభిస్తాయి.

·         ఎరువుల ధరలు తగ్గనున్నాయి.

·         పురుగుమందుల ధర తగ్గనున్నాయి.

·         పండ్లు, కూరగాయలు చౌకగా లభించనున్నాయి.

·         డ్రై ఫ్రూట్స్ ధరలు తగ్గనున్నాయి.

·         ఆహార ప్రాసెసింగ్‌కు ప్రోత్సాహం.

·         పాలు, చీజ్ లపై జీఎస్టీ తొలగింపు.

·         దేశీయ ఉత్పత్తుల ప్రచారం.

·         నిల్వ/ప్యాకింగ్ చేపలపై జీఎస్టీ తగ్గింపు.

·         తేనె ధర తగ్గనుంది.

·         బీడీ ఆకులపై జీఎస్టీ తగ్గింపు.

వివిధ రంగాలపై జీఎస్టీ తగ్గింపు ప్రభావం

యంత్రాధార వ్యవసాయం

·         1800 సీసీ కంటే తక్కువ సామర్థ్యం కలిగిన ట్రాక్టర్లపై జీఎస్టీ 5 శాతానికి తగ్గింపు.

·         టైర్లు, ట్యూబులు, హైడ్రాలిక్ పంపులు సహా ట్రాక్టర్ విడి భాగాలపై జీఎస్టీ 18 శాతం నుంచి 5 శాతానికి తగ్గింపు.

·         స్ప్రింక్లర్లు, బిందు సేద్యం, పంటకోత యంత్రాలు, ట్రాక్టర్ భాగాలపై జీఎస్టీ 12 శాతం నుంచి 5 శాతానికి తగ్గింపు.

·         15 హెచ్ పీ కంటే ఎక్కువ సామర్థ్యం కలిగిన స్థిర వేగంతో నడిచే డీజిల్ ఇంజిన్లు, వరికోత యంత్రాలు, ఎరువు యంత్రాలపై జీఎస్టీ 12 శాతం నుంచి 5 శాతానికి తగ్గింపు.

·         ట్రాక్టర్ ధరలు తగ్గడం వల్ల చిన్న, మధ్యతరహా రైతులు కూడా యాంత్రీకరణను సులభంగా పొందగలుగుతారు. దీని ద్వారా  సమయం ఆదా అవుతుంది. శ్రమ ఖర్చులు తగ్గుతాయి. ఉత్పాదకత పెరుగుతుంది.

***