2025 ഓഗസ്റ്റ് 29-ന് ടോക്കിയോയിൽ കോൺഫെഡറേഷൻ ഓഫ് ഇന്ത്യൻ ഇൻഡസ്ട്രി ആൻഡ് കെയ്ഡൻറെൻ [ജപ്പാൻ ബിസിനസ് ഫെഡറേഷൻ] സംഘടിപ്പിച്ച ഇന്ത്യ-ജപ്പാൻ സാമ്പത്തിക ഫോറത്തിൽ പ്രധാനമന്ത്രി ശ്രീ നരേന്ദ്ര മോദിയും ജപ്പാൻ പ്രധാനമന്ത്രി ശ്രീ ഷിഗെരു ഇഷിബയും പങ്കെടുത്തു. ഇന്ത്യ-ജപ്പാൻ ബിസിനസ് ലീഡേഴ്‌സ് ഫോറത്തിന്റെ സിഇഒമാർ ഉൾപ്പെടെ ഇന്ത്യയിലെയും ജപ്പാനിലെയും പ്രമുഖ വ്യവസായ പ്രമുഖർ യോഗത്തിൽ പങ്കെടുത്തു. 

തന്റെ പ്രസംഗത്തിൽ, ഇന്ത്യ-ജപ്പാൻ പ്രത്യേക തന്ത്രപരവും ആഗോളവുമായ പങ്കാളിത്തത്തിന്റെ വിജയം, പ്രത്യേകിച്ച് നിക്ഷേപം, ഉൽപ്പാദനം, സാങ്കേതികവിദ്യ എന്നീ മേഖലകളിലെ ഉഭയകക്ഷി സഹകരണം എന്നിവ പ്രധാനമന്ത്രി എടുത്തുപറഞ്ഞു. ഇന്ത്യയിൽ തങ്ങളുടെ സാന്നിധ്യം കൂടുതൽ മെച്ചപ്പെടുത്താൻ ജാപ്പനീസ് കമ്പനികളെ ക്ഷണിച്ചുകൊണ്ട്, ഇന്ത്യയുടെ വളർച്ചയുടെ കഥ അവർക്ക് ആവേശകരമായ അവസരങ്ങൾ നൽകുന്നുവെന്ന് അദ്ദേഹം ചൂണ്ടിക്കാട്ടി. നിലവിലെ പ്രക്ഷുബ്ധമായ ആഗോള സാമ്പത്തിക സാഹചര്യത്തിന്റെ പശ്ചാത്തലത്തിൽ, വിശ്വസ്തരായ സുഹൃത്തുക്കൾ തമ്മിലുള്ള സാമ്പത്തിക പങ്കാളിത്തം ആഴത്തിലാക്കുന്നത് പ്രത്യേകിച്ചും പ്രസക്തമാണെന്ന് അദ്ദേഹം പറഞ്ഞു. രാഷ്ട്രീയ സ്ഥിരത, നയപരമായ പ്രവചനക്ഷമത, പരിഷ്കാരങ്ങളോടുള്ള പ്രതിബദ്ധത, സു​ഗമമായി ബിസിനസ്സ് ചെയ്യുന്നതിനുള്ള ശ്രമങ്ങൾ എന്നിവ ഇന്ത്യൻ വിപണിയിലെ നിക്ഷേപകർക്ക് പുതിയ ആത്മവിശ്വാസം നൽകിയെന്ന് പ്രധാനമന്ത്രി ഊന്നിപ്പറഞ്ഞു. ആഗോള ഏജൻസികൾ പുറത്തുവിട്ട ഇന്ത്യയുടെ ഏറ്റവും പുതിയ ക്രെഡിറ്റ് റേറ്റിംഗ് അപ്‌ഗ്രേഡിൽ ഇത് പ്രതിഫലിക്കുന്നു.

ഇന്ത്യയും ജപ്പാനും തമ്മിൽ നൂതന സാങ്കേതികവിദ്യകൾ, ഉൽപ്പാദനം, നിക്ഷേപങ്ങൾ, മാനവ വിഭവശേഷി കൈമാറ്റം എന്നിവയിലെ സഹകരണത്തിനുള്ള ഗണ്യമായ സാധ്യതകൾക്ക് അടിവരയിട്ട പ്രധാനമന്ത്രി, ആഗോള വളർച്ചയിൽ ഇന്ത്യ ഏകദേശം 18% സംഭാവന ചെയ്യുന്നുണ്ടെന്നും ഏതാനും വർഷങ്ങൾക്കുള്ളിൽ രാജ്യം ലോകത്തിലെ മൂന്നാമത്തെ വലിയ സമ്പദ്‌വ്യവസ്ഥയായി മാറുമെന്നും പറഞ്ഞു. രണ്ട് സമ്പദ്‌വ്യവസ്ഥകളുടെയും പരസ്പരപൂരകതകൾ കണക്കിലെടുത്തുകൊണ്ട്, മേക്ക് ഇൻ ഇന്ത്യയിലേക്കും മറ്റ് സംരംഭങ്ങളിലേക്കും ജപ്പാനും ഇന്ത്യയും തമ്മിൽ കൂടുതൽ ബിസിനസ്സ് സഹകരണത്തിനുള്ള അഞ്ച് പ്രധാന മേഖലകൾ അദ്ദേഹം എടുത്തുകാട്ടി. അവ ഇനി പറയുന്നവയാണ്: i] ബാറ്ററികൾ, റോബോട്ടിക്സ്, സെമികണ്ടക്ടറുകൾ, കപ്പൽ നിർമ്മാണം, ആണവോർജം എന്നീ മേഖലകളിലെ ഉൽപ്പാദനം; ii] AI, ക്വാണ്ടം കമ്പ്യൂട്ടിംഗ്, സ്പേസ്, ബയോടെക് എന്നിവയുൾപ്പെടെ സാങ്കേതികവിദ്യയിലും നവീകരണത്തിലുമുള്ള സഹകരണം; iii] ഹരിത ഊർജ്ജ പരിവർത്തനം; iv] മൊബിലിറ്റി, ഹൈ സ്പീഡ് റെയിൽ, ലോജിസ്റ്റിക്സ് എന്നിവയുൾപ്പെടെയുള്ള അടുത്ത തലമുറ അടിസ്ഥാന സൗകര്യങ്ങൾ; iv] നൈപുണ്യ വികസനവും ആളുകൾ തമ്മിലുള്ള ബന്ധവും. പ്രധാനമന്ത്രിയുടെ പൂർണ്ണ പ്രസ്താവനകൾ ഇവിടെ കാണാം [ലിങ്ക്].

പ്രധാനമന്ത്രി ഇഷിബ തന്റെ പ്രസംഗത്തിൽ, ഇന്ത്യൻ പ്രതിഭകളും ജാപ്പനീസ് സാങ്കേതികവിദ്യയും തമ്മിൽ പങ്കാളിത്തം രൂപീകരിക്കുന്നതിൽ ജാപ്പനീസ് കമ്പനികൾക്കുള്ള താൽപ്പര്യം ചൂണ്ടിക്കാട്ടി. ഇന്ത്യയും ജപ്പാനും തമ്മിലുള്ള മൂന്ന് മുൻഗണനകൾ അദ്ദേഹം അടിവരയിട്ടു: പി 2 പി പങ്കാളിത്തങ്ങൾ ശക്തിപ്പെടുത്തൽ, സാങ്കേതികവിദ്യയുടെ സംയോജനം, ഹരിത സംരംഭങ്ങളും വിപണിയും, ഉന്നതവും ഉയർന്നുവരുന്നതുമായ സാങ്കേതികവിദ്യകളുടെ നിർണായക മേഖലകളിലെ സഹകരണം, പ്രത്യേകിച്ച് സെമികണ്ടക്ടർ.

12-ാമത് ഇന്ത്യ ജപ്പാൻ ബിസിനസ് ലീഡേഴ്‌സ് ഫോറത്തിന്റെ (ഐജെബിഎൽഎഫ്) റിപ്പോർട്ട് ഐജെബിഎൽഎഫിന്റെ സഹ-അധ്യക്ഷന്മാർ ഇരു നേതാക്കൾക്കും മുന്നിൽ അവതരിപ്പിച്ചു. ഇന്ത്യയും ജാപ്പനീസ് വ്യവസായവും തമ്മിലുള്ള വളർന്നുവരുന്ന പങ്കാളിത്തത്തെ എടുത്തുകാണിച്ചുകൊണ്ട്, ജപ്പാൻ എക്സ്റ്റേണൽ ട്രേഡ് ഓർഗനൈസേഷന്റെ (ജെട്രോ) ചെയർമാനും സിഇഒയുമായ ശ്രീ. നോറിഹിക്കോ ഇഷിഗുറോ, സ്റ്റീൽ, എഐ, ബഹിരാകാശം, വിദ്യാഭ്യാസം, കഴിവുകൾ, ശുദ്ധമായ ഊർജ്ജം, മാനവ വിഭവശേഷി വിനിമയങ്ങൾ തുടങ്ങിയ വിവിധ മേഖലകളിൽ ഇന്ത്യയും ജാപ്പനീസ് കമ്പനികളും തമ്മിൽ ഒപ്പുവച്ച വിവിധ ബി 2 ബി ധാരണാപത്രങ്ങൾ പ്രഖ്യാപിച്ചു.

***

SK