কেন্দ্রগী মন্ত্রীমন্দলগী ঐহাক্কী মরুপশিং, গুজরাত সরকারগী মন্ত্রী পুম্নমক, মফম অসিদা লৈরিবা ঐহাক্কী মরুপ এম.পি.শিং, এম.এল.এ. পুম্নমক, সরদারধামগী মকোক থোংবা ইয়াম্বা শ্রী গাগজী ভাই, ত্রস্তী ভি.কে. পতেল, দিলিপ ভাই, অতৈ মীহুৎ পুম্নমক, অমসুং ঐহাক্কী নুংশিরবা ইচিল-ইনাওশিং, মরু ওইনা ঐহাক্কী নুংশিরবা ইচানুপীশিং।

সরদারধামগী মমিং অসি মাগী থবকশিং অসিগুম্না শেংই। ঙসি নুপীমচাশিংগী সেবা, মখোয়গী মহৈ-মশিং তম্বগীদমক হোস্তেল অমা শঙ্গাখ্রে। হোস্তেল অসিদা লৈগদবা নুপীমচাশিংনা মখোয়গী এস্পিরেসনশিং অমসুং মঙলানশিং ফংলগনি, অমসুং মখোয়শিং অদু মপুং ফাহন্নবা মখোয়দা খুদোংচাবা কয়া ফংলগনি। অমসুং মসিতা নত্তনা, করিগুম্বা নুপীমচাশিং অসিনা মরোমদোম লেপ্লবদি, মতিক চাবা ওইরকপা মতমদা, মখোয়না মহৌশানা লৈবাক শেমগৎপদা মরুওইবা থৌদাং অমা লৌগনি অমসুং মখোয়গী ইমুং-মনুংদসু মতিক ময়াই লৈরক্কনি। মরম অদুনা, অহানবদা, ঐহাক্না হোস্তেল অসিদা লৈবগী খুদোংচাবা ফংগদবা ইচানুপী খুদিংমক্তা মখোয়গী অফবা তুংলমচৎকীদমক য়াইফ-পাউজেল পীজরি। মখোয়গী ইমুং-মনুংদসু য়াইফ-পাউজেল পীজরি।

মরুপশিং,

নুপীমচাশিংগী হোস্তেল ফেজ ২গী য়ুম্ফম থোনবগী খুদোংচাবা অসি অদোম্না ঐঙোন্দা পীবা অসি ঐহাক্কী লাইবক ফবা অমনি। ঙসিদি, খুন্নাই অসিগী অচৌবা খোংথাংশিংনা মরম ওইদুনা, নুপীমচা ৩০০০দা অফবা খুদোংচাবশিংগা লোয়ননা অচৌবা বিলদিং অমা ফংহল্লে। বরোদাদা মহৈরোই ২০০০ লৈনবা হোস্তেল অমা শাবগী থবক চত্থরি অমসুং লোইশিনগদৌরিবনি হায়না ঐনা খঙলে । সুরত, রাজকোৎ অমসুং মেহসানাদা, এজুকেসন, লর্নিং অমসুং ত্রেনিংগী সেন্তর কয়া অমসু মফম অসিদা শেমগৎলি। হোৎনরিবশিং অসিদা থৌদাং লৌরিবা মীওই খুদিংমকপু থাগৎপা ফোংদোকচরি মরমদি ঐখোয়গী লৈবাক অসি খুন্নাইগী মপাঙ্গলগা লোয়ননা খোংজেল য়াংনা চংশিল্লি। ঙসি, মসিগী থৌরম অসিদা, ঐহাক্না সরদার সাহেবকী খুয়া খাদা খুরুমজরি। ঐহাক্না মুখ্য মন্ত্রী ওইরিঙৈদা, ভারতকী চাউখৎ-থৌরাংগীদমক গুজরাতকী চাউখৎ-থৌরাং অসি তঙাইফদে হায়না ঐহাক্না মতম পুম্নমক্তা হায়নরম্মি। ঙসিদি, ঐহাক্না গুজরাত্তগী তম্বীরম্বা অদু অমসুং ঐহাক্না গুজরাত্তগী তমখিবশিং অদু লৈবাক অসিগী চাউখৎ-থৌরাংগীদমক শীজিন্নরকপা অসি য়াম্না লাইবক থিবনি। চহি ২৫-৩০গী মমাংদা গুজরাত্তা পেরামিতর কয়াদা অৱাবা কয়া লৈরম্বা অদু অদোম্না খংলি। চাউখৎ-থৌরাংগা লোয়ননা, গুজরাতনা খুদোংচাদবা কয়া থেংনবদা অমসুং খুন্নাইগী লমদা থেংনরিবা শিংনবশিং থেংনবদা মসিগী মপাঙ্গল অসি শীজিন্নবা মথৌ তাই। অমসুং ঐহাক্না মুখ্য মন্ত্রী ওইরবা মতুংদা, অহানবা ওইনা ইচানুপীশিংনা মহৈ তম্বগী লমদা শোত্থনা লৈ হায়না ঐহাক্কী ৱাখলদা লাকখি, অমসুং মসিনা ঐহাকপু ৱাখলদা অৱাবা ওইহনখি। ইমুং কয়ানা মখোয়গী মচানুপীশিংবু স্কুল চৎহনখিদে। স্কুলদা মিং চনবা ফংলবশিং, মখোয়সু স্কুল থুনা তোকখি, দ্রোপ আউৎ তৌখি। চহি ২৫গী মমাংদা, ময়াম পুম্নমক্না ঐবু শৌগৎখি অমসুং ফীভম অসি হোংখি। ঐখোয় কন্যা শিক্ষাগী রথযাত্রা পাঙথোকপদা অদু ময়াম পুম্নমক্না নীংশিংলমখিগনি। ঐহাক্না নীংশিংলি মদুদি জুন ১৩, ১৪, ১৫দা তেম্পরেচর অসি দিগ্রী ৪০-৪২ ওইরম্মি, খুঙ্গংদা চৎপা হায়বদি য়ুম অমদগী য়ুম অমদা চৎপা, ইচানুপীশিংবু স্কুলদা মখোয়গী মখুৎ শমদুনা পুরকই। ঐখোয়না স্কুলগী প্রভেশোৎসবকীদমক চাউরবা প্রোগ্রাম কয়া অমা পাংথোকখি। অমসুং মসিগী থবক অসিনা ঐখোয়দা চাউনা কান্নবা ফংহনখিবা অসিদা ঐহাক নুংঙাইবা ফাওই। মদুগী মতুং ইন্না, ঙসিদি স্কুলশিংগী ইনফ্রাস্ত্রকচর শেমগৎলে, স্কুলশিংদা মোদর্ন ফেসিলিতীশিং ফংলে, মখল খুদিংমক্কী সিস্তেমশিং শেমগৎলে, ওজাশিং লৌশিল্লে। অমসুং খুন্নাই অসিনা মসিগী থৌদাং অসি মপুং ফানা লৌদুনা য়াম্না কন্না শরুক য়াখি। অমসুং মসিগী মহৈদি ঙসি ঐখোয়না স্কুলদা এদমিসন পীখিবা ইচানুপা অমসুং ইচানুপীশিং অদু দোক্তর, ইঞ্জিনীয়র ওইরে, স্কুল তোকপগী চাং হন্থরে অমসুং মসি খক্তা নত্তে, গুজরাতকী মফম খুদিংমক্তা মহৈ তম্বগী অপাম্বা পোকহল্লে।

অনিশুবা অচৌবা খন্ননিংঙাই ওইবা ৱাফমদি পুকনুংদা লৈরিবা অঙাং হাৎপগী পাপ অসিনি। মসি ঐখোয়দা য়াম্না চাউবা স্তিগমা অমা ওইখি মদুদি ঐখোয়গী খুন্নাই অসিনা মসিগী মতাংদা খনবা হৌরকখি, অদুবু খুন্নাই অসিনা ঐবু শৌগৎখি অমসুং খোঙজং অমা হৌদোকখি। ঐখোয়না সুরত্তগী খোঙচৎ অমা হৌদুনা উমিয়া মাতাদা চৎখি। ইচানুপা অমসুং ইচানুপী অসি চপ মান্নৈ - মসিগী ৱাখল্লোন অসি মপাঙ্গল কনখৎহল্লি। ঐখোয়গী গুজরাত অসি শক্তীবু ইকাই খুম্নরিবা গুজরাত অমনি। মফম অসিদা উমিয়া মাতা, মা খোদাল, মা কালি, মা অম্বা, মা বহুচার অমসুং মখোয়গী য়াইফ-মঙ্গোল লৈরি। অসিগুম্বা খুন্নাই অমদা অঙাং হাৎপা অসি স্তিগমা অমনি। অসিগুম্বা ৱাখল্লোন অসি লৈরকপা মতমদা অমসুং মীপুম খুদিংমক্না মসিদা মতেং পাংলকপা মতমদা, ঙসি ঐখোয়না গুজরাত্তা ইমচানুপা অমসুং ইচানুপীগী মশীংদা লৈরিবা অচৌবা খেন্নবা অসি তপ্না তপ্না হন্থহনবদা মায়পাক্লে।

মরুপশিং,

খুন্নাই অসিবু হেন্না ফগৎহন্নবগীদমক অচৌবা পান্দমগা লোয়ননা অমসুং অশেংবা মওংদা হোৎনবা মতমদা, ঈশ্বরসু মতেং পাংই, অমসুং ঈশ্বরগী মওংদা খুন্নাইসু মতেং পাংই। অমসুং ফলশিংসু ফংলি। ঙসিদি, খুন্নাই অসিদা অনৌবা ৱাখল্লোন অমা লাক্লে। ঐখোয়না ঐখোয়গী ইচানুপীশিংবু মহৈ তম্বদা, মখোয়গী ইকায় খুম্নবা হেনগৎহনবদা, মখোয়গীদমক খুদোংচাবশিং শেমগৎলি, অচৌবা হোস্তেলশিং শাগৎলি। গুজরাত্তা ঐখোয়না থারম্বা মরু অদু ঙসিদি লৈবাক শীনবা থুংনা মীয়ামগী খোংজং অমা ওইরক্লি - বেতি-বচাও, বেতি পরাও। লৈবাক অসিদা নুপীশিংগী সেফতী, নুপীশিংগী এম্পাৱরমেন্তকীদমক পুৱারী ওইরবা থবকশিং পায়খৎলি। ঐখোয়না ঐখোয়গী ইচানুপীশিং, ওপরেসন সিন্দুরগী মতাংদা ৱারী শারবদি, ঐখোয়না ইচানুপীশিংগী খোঞ্জেলগী তাবা ফংলি, মখোয়গী মপাঙ্গলগী মতাংদা তারি, খুঙ্গংশিংদা লাখপতি দিদী, পান্দম অসি করোর ৩ ওই, ঐখোয়না করোর ২ য়ৌরে, দ্রোন দিদী অসিনচিংবা অসিনা খুঙ্গং পুম্বদা ইচানুপীশিংগী ৱাখল্লোন হোংলে। বেঙ্ক সাখি, ইন্সুরেন্স সাখি, অসিগুম্বা স্কিম কয়া অসি ঐখোয়গী নুপীশিংনা খুঙ্গংগী শেন্মিৎলোনদা পুক্নিং থৌগৎনবা পায়খৎলি।

মরুপশিং,

এজুকেসনগী খ্বাইদগী চাউবা পান্দমদি খুন্নাইদা অফবা থৌদাং লৌবা মীওইশিং শেমগৎপা, অসিগুম্বা মীওইশিংগী তৌবা ঙম্বশিং হেনগৎহনবা অসিনি। ঙসিদি, ঐখোয়না মসিগী মরমদা ঙাংনবা য়াম্না হেনগৎলক্লি, মসি মরু ওইরক্লি। হৌজিক ঐখোয়গী মরক্তা স্কিলগী কম্পিতিসন লৈগদবনি, তেলেন্তগী কম্পিতিসন লৈগদবনি। অমরোমদা হায়রবদা, খুন্নাই অসিগী মপাঙ্গল অসি তেলেন্ত অদুনি। ঙসিদি মালেম পুম্বদা ভারতকী হৈ-শিংলবা মীওইশিংগী দিমান্দ হেনগৎলক্লি। মমাংগী দিকেদশিংদা, সরকারনা এজুকেসন সিস্তেমগী মায়কৈদা ৱারেপ লৌনীংদবগী ৱাখল্লোন লৈরম্মি, ঐখোয়না মসিদা অচৌবা অহোংবা অমা পুরক্লে, হান্নগী সিস্তেম অসিদগী হোংদোক্তুনা, ঐখোয়না ফীভম অসি হোংহল্লে। অমসুং ঐখোয়না পায়খৎলিবা অনৌবা নেস্নেল এজুকেসন পোলিসী অসিদা, মসিগী নেস্নেল এজুকেসন পোলিসী অসিদা, স্কিলদা, তেলেন্তদা খ্বাইদগী চাউনা মীৎয়েং থম্লি। ঐখোয়না স্কিল ইন্দিয়া মিসন হৌদোক্লে। মসিগী মখাদা ঐখোয়না তোঙান তোঙানবা লমশিংদা নহারোল করোর কয়াগীদমক হৈ-শিংলবা মেন পৱার শেমগৎনবা থবক পায়খৎলি। মালেম অসিদা অচৌবা দিমান্দ অমা লৈরি। ঙসিদি মালেমগী খ্বাইদগী চাউবা শরুক অমা চহি য়াম্লবা মীওইশিংগী প্রোব্লেমনা কোইশিল্লি। মসিদা নহাশিং মথৌ তাই। অমসুং ভারতনা মালেমদা পীবা ঙম্বগী মপাঙ্গল লৈ। ঐখোয়গী নহাশিংনা হৈ-শিংলবদি মখোয়গীদমক থবক ফংনবগী খুদোংচাবা কয়া লৈ। মখোয়গী থাজবা, মশা-মরোমদোম লেপচবা, অমসুং মসিগীদমক তৌবা ঙম্বা অসি মদুদগী লাকপনি। সরকার অসিনা নহারোলশিংগীদমক্তা থবক ফংহন্নবগী খুদোংচাবশিং, থবক ফংহন্নবগী খ্বাইদগী ফবা খুদোংচাবশিং শেমগৎপদা মীৎয়েং থম্লি। চহি ১১গী মমাংদা, ঐখোয়গী লৈবাক অসিদা স্তার্ত অপ খরা খক্তমক লৈরম্মি, ঙসিদি ভারত্তা স্তার্ত অপ মশিং লাখ ২ য়ৌরক্লে। মসিদসু, স্তার্ত-অপশিং অসি তায়র অনি, তায়র অহুমগী অপীকপা শহরশিংদা থোরকপা হৌরে। ঐখোয়না মুদ্রা য়োজনা অমা হৌদোকখি, বেঙ্কশিংদগী লোন পীখি, গেরেন্তী য়াওদনা লোন পীখি, মসিনা মরম ওইদুনা লুপা করোর লাখ ৩৩, খল্লু, লুপা করোর লাখ ৩৩ অসি নহারোলশিংদা সেল্ফ-এমপ্লোয়মেন্তকীদমক পীখি। মসিগী মহৈ ওইনা ঙসি নহারোল লাখ কয়ানা মশা-মরোমদোম লেপচবা ঙমখ্রে অমসুং মখোয় মশাগী মথক্তা অতোপ্পা মীওই অমা নত্রগা অনি থবক ফংহল্লে। অমসুং অদোম্না খঙলে, হন্দক ওগস্ত ১৫দা ঐহাক্না স্কিম অমা হায়খি অমসুং লাউথোকখি, অমসুং ওগস্ত ১৫দা মসি ইমপ্লিমেন্ত তৌখি। প্রধান মন্ত্রী বিকাসিত ভারত রোজগার য়োজনা অসি লুপা করোর লাখ অমগী স্কিম অমনি। মসিগী মখাদা, করিগুম্বা নহাক্না প্রাইবেৎ সেক্তরদা কনাগুম্বা অমবু থবক পীরবদি, অহানবা তোলোপ ওইনা সরকারনা লুপা লিশিং ১৫ পীগনি।

মরুপশিং,

ঙসিদি, লৈবাক অসিদা ইনফ্রাস্ত্রকচর দিবেলপমেন্তকী থবকশিং রেকোর্দকী খোঙজেলদা চংশিল্লি। পি.এম. সুর্য় ঘর মুফ বিজলি য়োজনাগী মখাদা সোলর সিস্তেমশিং ইনস্তোল তৌবগী থবক পাক-শন্না পায়খৎলি। দ্রোন অমসুং দিফেন্স ইন্দস্ত্রীশিং ভারত্তা লেপ্তনা হেনগৎলক্লি। সরকারনা মিসন মেনুফেকচরিংদা খ্বাইদগী হেন্না মীৎয়েং চংলি। মসিগী কেম্পেন পুম্নমক অসিনা গুজরাত্তা থবক ফংবগী অনৌবা খুদোংচাবা কয়া অমসু পীরি।

মরুপশিং,

ঙসিদি মালেম অসিনা ভারতকী শিন্মীশিংবু ইকাই খুম্নরি অমসুং ভারতকী তেলেন্তশিংবুসু ইকাই খুম্নরি অমসুং মখোয়গী মরুওইবা অদু খঙলি। মসিনা মরম ওইদুনা মালেমগী তোঙান তোঙানবা লৈবাকশিংদা খুদোংচাবা কয়া অমা লৈরি। ঐখোয়গী নহারোলশিংনা হেল্থকেয়র, এজুকেসন, স্পেস অসিনচিংবা সেক্তর কয়াদা মখোয়গী পর্ফোমেন্সনা মালেম অসিবু থাগৎলি।

মরুপশিং,

হন্দক্কী নীংতম্বা নুমিৎ অসিদা, ঐহাক্না লাল কিল্লাদগী স্বদেশীদা য়াম্না মরুওইবা পীখি। ঐহাক্না ভারতপু মশা-মরোমদোম লেপচবা ওইহনগদবনি হায়না য়াম্না কন্না তকশিনখি। অমসুং ঙসি খুন্নাইগী মীপুম খুদিংমক ঐগী মমাংদা লৈরি। মমাংদা ঐহাক্না অদোমদা থবক পুম্নমক শন্দোক্না তাকপগী থৌনা ফংলম্বা য়াই, অদুবু ঙসিদি অদোম্না থবক পুম্নমক পাংথোকখ্রে অমসুং থবকশিং অদু মপুং ফাহনখ্রে হায়না ঐহাক্না হায়জনীংই। অমসুং ঐহাক্কী চহি ২৫গী এক্সপরিয়েন্সনা তাক্লি মদুদি ঐহাক্কী অপাম্বশিং অমত্তবু ময়ামনা মপুং ফাহনখিদবা লৈতে, অদুনা ঐহাক্কী অপাম্বা অসিসু হেনগৎলকই। থবক খরা পীনবগী অপাম্বা অসি মতম চুপ্পদা হেনগৎলকই। ঙসি ঐহাক্না অখন্ননা করিগুম্বা অমা হায়জনীংই, ঙসিগী মালেমগী চয়েৎনবগী মতম অসিদা, ভারতকী খ্বাইদগী ফবা লম্বীদি মশা-মরোমদোম লেপচবনি। মশা-মরোমদোম লেপচবা হায়বসিনা হায়রিবদি ঐখোয়না লমদমসিগী পোৎলমশিংদা পুক্নিং থৌগৎকদবনি। মেক ইন ইন্দিয়াগীদমক ঐখোয়গী ইথিল অসি হেনগৎহনগদবনি।

স্বদেশীগী খোংজং অসি চহি ১০০গী খোংজং নত্তে, মসি ঐখোয়গী তুংলমচৎপু মপাঙ্গল কনখৎহনগদবা খোংজং অমনি। অমসুং অদোম্না মসিবু লুচিংগদবনি। ঐখোয়গী খুন্নাইগী নহারোল, ইচানুপা অমসুং ইচানুপীশিংনা মসিবু লুচিংগদবনি। ঐখোয়গী ইমুং-মনুং, য়ুমদা মপানগী পোৎশক অমত্তা চঙহল্লোইদবনি। ঐহাক্না ৱেদ ইন ইন্দিয়া হায়খি, অদুগা মীওই কয়ানা মপান লমদা মখোয়গী লুহোংবশিং কেন্সেল তৌদুনা ভারত্তা লাকখি, হোলশিং বুক তৌখি অমসুং মফম অসিদা লুহোংখি। করিগুম্বা অদোম্না মদুগী মতাংদা খল্লবদি, লৈবাক অসিগীদমক্তা নুংশিবা পোকপা অসি মশা মথন্তা লাকচরকই। মেক ইন ইন্দিয়া, আত্মনির্ভর ভারত অসি ঐখোয়গী মায়পাকপা, ঐখোয়গী পাঙ্গলনি। মসিদা ঐখোয়গী লাক্কদৌরিবা চারোন-শুরোনগী তুংলমচৎ অসি য়াওরি। মরম অদুনা, মরুপশিং, ভারতকী পোত্থোকশিং মতম পুম্নমক্তা য়োনবা হৌগদবনি, মদুগী মতুংদা মগুন অসি মশানা ফগৎলগনি। মরমদি কৈথেলদা হিংনবগীদমক্তা, মীপুম খুদিংমক্না অফবা পোৎ-চৈ পুথোক্কনি, অফবা পোৎ-চৈ পেকেজ তৌগনি, অমসুং মমল হন্থনা য়োল্লগনি। মরম অদুনা, ঐখোয়গী শেল অসি মপান লমদা থাদোকপা অসি ঐখোয়গীদমক অফবা নত্তে। অমসুং ঐহাক্না থাজবা থম্লি মদুদি ঐহাক্না অদোমদা থাজবা পীরিবা থবক অসি, ময়াম্না খুন্নাই অসিদা এৱারনেস পুরক্তুনা মপুং ফাহনগনি অমসুং লৈবাক অসিদা অনৌবা শক্তি পীরগনি।

ঐহাক্না ললোন-ইতিক তৌরিবশিংদা হায়জরি মদুদি হৌজিক ঐখোয়গী খুন্নাই অসি লৌমীশিং খক্তগী ওইদ্রে, মসি ললোন-ইতিক তৌরিবশিংগী খুন্নাই অমসু ওইরে। ললোন-ইতিক তৌরিবা অমা ওইনা ঐহাক্না হায়জরি মদুদি ঐহাক্কী দুকানদা লৈবাক অসিগী পোত্থোক খক্তমক লৈ, লৈবাক অসিগী পোত্থোকশিং লৈনবা মীওই অমা হেক্তনা ঐখোয়দা লাকপীবা য়াগনি হায়না বোর্দ অমা থেৎকদবনি অমসুং ঐখোয়না লৈবাক অসিগী পোত্থোক খক্তমক য়োনগদবনি। মসিসু পেত্রিওতিজমনি। ওপরেসন সিন্দুর খক্তনা লৈবাক নুংশিবা নত্তে, মসিসু লৈবাক নুংশিবা অমনি। ঐহাক্না ঐহাক্কী ৱাখল্লোন অসি ময়ামদা ফোংদোকচরি। ময়াম্না ৱাশকপীয়ু, ময়াম্না মসিদা শরুক য়াদুনা মপুং ফাহনগনি। ঐহাক্না ময়াম পুম্নমক্কী মরক্তা লাকপগী খুদোংচাবা ফংজরে। ঐহাক য়াম্না নুংঙাইবা পোকচৈ। ঐহাক্না ময়াম পুম্নমকপু য়াইফ-পাউজেল পীজরি। অমসুং ইচানুপীশিংদা য়াইফ-মঙ্গোল পীজরি। খুরুমজরি।

খঙহঞ্জবা – প্রধান মন্ত্রীগী ৱারোল অসি গুজরাতী লোলদা পীখি, মসি মহাক্কী ৱারোলগী চাউরাকপা ৱাহন্থোক অদুনি।

***