റെയില്‍വേ മന്ത്രാലയം
ദീപാവലി, ഛഠ് ഉത്സവങ്ങളോടനുബന്ധിച്ച് 12,000-ത്തിലധികം പ്രത്യേക ട്രെയിനുകൾ
ഒക്ടോബർ 13 മുതൽ 26 വരെയുള്ള യാത്രകൾക്കും നവംബർ 17 മുതൽ ഡിസംബർ 1 വരെയുള്ള മടക്കയാത്രകൾക്കും റിട്ടേൺ ടിക്കറ്റുകളിൽ 20% ഇളവ് : ശ്രീ അശ്വിനി വൈഷ്ണവ്
Posted On:
21 AUG 2025 2:09PM by PIB Thiruvananthpuram
ദീപാവലി, ഛഠ് ഉത്സവങ്ങളോടനുബന്ധിച്ച് യാത്രക്കാരുടെ സൗകര്യാർത്ഥം 12,000-ത്തിലധികം പ്രത്യേക ട്രെയിൻ സർവിസുകൾ നടത്തതാൻ ഇന്ത്യൻ റെയിൽവേ തീരുമാനിച്ചു. ബീഹാർ ഉപമുഖ്യമന്ത്രി സമ്രാട്ട് ചൗധരി, എം.പി ഡോ. സഞ്ജയ് ജയ്‌സ്വാൾ, കേന്ദ്രമന്ത്രി ലാലൻ സിംഗ്, എം.പി സഞ്ജയ് കുമാർ ഝാ എന്നിവരുമായി നടത്തിയ ചർച്ചകൾക്ക് ഒടുവിൽ വരാനിരിക്കുന്ന ദീപാവലി, ഛഠ്ഉ ത്സവങ്ങളോടനുബന്ധിച്ച് പ്രത്യേക ക്രമീകരണങ്ങൾ ഏർപ്പെടുത്താൻ തീരുമാനിച്ചതായി റെയിൽവേ മന്ത്രി അശ്വിനി വൈഷ്ണവ് റെയിൽ ഭവനിൽ മാധ്യമങ്ങളോട് പറഞ്ഞു. യാത്രക്കാർക്ക് അവരുടെ മടക്കയാത്രയിലും സൗകര്യമൊരുക്കുമെന്ന് അദ്ദേഹം ഊന്നിപ്പറഞ്ഞു.
ദീപാവലിക്കും ഛഠ്നും 12,000-ത്തിലധികം പ്രത്യേക ട്രെയിൻ സർവിസുകൾ നടത്താൻ, മുതിർന്ന ജനപ്രതിനിധികളുമായി കൂടിയാലോചിച്ച ശേഷം തീരുമാനമായതായി മന്ത്രി പറഞ്ഞു. അതേസമയം, യാത്രികർക്ക് മടക്കയാത്രയിൽ യാതൊരു ബുദ്ധിമുട്ടും ഉണ്ടാകാതിരിക്കാൻ വേണ്ടത്ര ശ്രദ്ധ ചെലുത്തുമെന്നും അദ്ദേഹം വ്യക്തമാക്കി .
ഒക്ടോബർ 13 മുതൽ 26 വരെ യാത്ര ചെയ്യുന്നവർക്കും നവംബർ 17 മുതൽ ഡിസംബർ 1 വരെ മടക്കയാത്ര നടത്തുന്നവർക്കും റിട്ടേൺ ടിക്കറ്റുകളിൽ 20% ഇളവ് അനുവദിക്കുമെന്ന് മന്ത്രി പ്രഖ്യാപിച്ചു . ഉത്സവ കാലത്ത് നടപ്പിലാക്കുന്ന ഈ സംരംഭം ധാരാളം ആളുകൾക്ക് പ്രയോജനപ്രദമാകുമെന്നും അദ്ദേഹം പറഞ്ഞു.
ഇതിനു പുറമെ, ഗയയിൽ നിന്ന് ഡൽഹിയിലേക്കും, സഹർസയിൽ നിന്ന് അമൃത്സറിലേക്കും, ഛപ്രയിൽ നിന്ന് ഡൽഹിയിലേക്കും, മുസാഫർപൂരിൽ നിന്ന് ഹൈദരാബാദിലേക്കുമായി നാല് പുതിയ അമൃത് ഭാരത് എക്സ്പ്രസ് ട്രെയിനുകൾ കൂടി ആരംഭിക്കും. ശ്രീബുദ്ധനുമായി ബന്ധപ്പെട്ട പ്രധാന സ്ഥലങ്ങളായ വൈശാലി, ഹാജിപൂർ, സോനിപൂർ, പാട്ന, രാജ്ഗിർ, ഗയ, കൊദെർമ എന്നിവ ഉൾപ്പെടുത്തി, മധ്യവർഗ കുടുംബങ്ങളെ പരിഗണിച്ചുകൊണ്ട് ഒരു പുതിയ സർക്യൂട്ട് ട്രെയിൻ ആരംഭിക്കുമെന്നും മന്ത്രി പ്രഖ്യാപിച്ചു.
കൂടുതൽ ട്രെയിൻ പ്രവർത്തനങ്ങൾ സാധ്യമാക്കും വിധം ബക്‌സർ-ലഖിസരായ് റെയിൽ സെക്ഷൻ നാല് വരി ഇടനാഴിയായി വികസിപ്പിക്കും. സുൽത്താൻഗഞ്ചും ദേവ്ഘറും റെയിൽ മാർഗം ബന്ധിപ്പിക്കും. പാട്നയ്ക്ക് ചുറ്റും ഒരു റിംഗ് റെയിൽവേ സംവിധാനം വികസിപ്പിക്കും. പാട്നയ്ക്കും അയോധ്യയ്ക്കും ഇടയിൽ ഒരു പുതിയ ട്രെയിൻ സർവീസ് പ്രവർത്തനം ആരംഭിക്കും. ബീഹാറിൽ പുതുതായി അംഗീകരിച്ച നിരവധി റോഡ് മേൽപ്പാലങ്ങളുടെ ജോലി ആരംഭിക്കുമെന്നും ശ്രീ അശ്വിനി വൈഷ്ണവ് കൂട്ടിച്ചേർത്തു.
(Release ID: 2159144)