ঐগী নুংশিরবা ইরৈবাকচাশিং,

নীংতম্বা ফংবগী অচৌবা কুহ্মৈ অসি ঐখোয়গী মীওই কোতি ১৪০গী ফিরেপশিংগী কুহ্মৈ অমনি। নীংতম্বা ফংবগী কুহ্মৈ অসি অপুনবা মায়পাকপশিংগী তাঞ্জা অমনি, চাউথোকচবগী তাঞ্জা অমনি, অমসুং ঐখোয়গী থম্মোয় অসিদা নুংঙাইবনা থল্লি। লৈবাক অসিনা অমত্তা ওইবগী ৱাখল্লোন অসিবু লেপ্পা লৈতনা মপাঙ্গল কনখৎহল্লি। ঙসিদি ভারত মচা কোতি ১৪০না তিরঙ্গাগী মচুশিং শেৎলি। মরুভুমিশিং, হিমালয়গী চীংদোনশিং, সমুদ্রগী তোর্বানশিং, নৎত্রগা মী কুংনা তাবা মফমশিংদগী ‘হর ঘর তিরঙ্গা’ পাংথোকপা উবা ফংলি অমসুং মফম খুদিংমক্তা খোন্থাং অমা খক্তা তাবা ফংলি, অমা খক্তগী নুংঙাইবা ফোংদোক্লি: ঐখোয়গী পুন্সিদগী হেন্না মরু ওইরিবা ঐখোয়গী ইমা লৈবাকপু থাগৎপা ফোংদোক্নরি।

ঐগী নুংশিরবা ইরৈবাকচাশিং,

১৯৪৭দা, লোইনাইদ্রবা ওইথোকপা য়াবশিং অমসুং খুৎলায় মিলিয়ন কয়াগী মপাঙ্গলগা লোয়ননা, ঐখোয়গী লৈবাক অসি নীংতম্বা ফংখি। লৈবাক অসিগী অপাম্বশিং অসি মঙফাওনরকখি, অদুবু শিংনবশিং অসিনা হেন্না চাউখি। ইকাই খুম্নরবা বাপুগী ৱাখল্লোনশিং ঙাক্না চৎতুনা, কন্সতিত্যুএন্ত এসেমব্লীগী মেম্বরশিংনা খ্বাইদগী মরু ওইবা থৌদাং অমা পাংথোকখি। চহি ৭৫গী মমাংদগী ভারতকী সংবিধান্না ঐখোয়দা লমজিং মৈরা অমা ওইনা লমজিংদুনা লাক্লি। ঐখোয়গী সংবিধান শেমখিবা মীওইশিং - দোক্তর রাজেন্দ্র প্রসাদ, বাবাসাহেব অম্বেদকর, পন্দিৎ নেহরু, সর্দার বল্লভভাই পতেল, দোক্তর সর্ভেপল্লী রাধাকৃষ্ণগুম্বা লৌশিং লৈরবা অমসুং শক্নাইরবা লুচিংবশিংনা মরু ওইবা থৌদাং অমা লৌখি। ঐখোয়গী নুপীশিংনসু য়াম্না চাউনা কন্ত্রিব্যুসন পীখি। হান্স মেহতা অমসুং দক্ষায়ানি ভেলায়ুধনগুম্বা স্কোলরশিংনা ভারতকী সংবিধানবু মপাঙ্গল কনখৎহনবদা থৌদাং লৌখি। ঙসি, ঐহাক্না লৈবাক অসিবু লমজিং-লমতাকখিবা অমসুং মাইকৈ তাকখিবা সংবিধান শেম্লবশিং অসিদা লাল কিলাগী লানবনদগী ইকায় খুম্নবা উৎচরি।

ঐগী নুংশিরবা ইরৈবাকচাশিং,

ঙসি, ঐখোয়না দোক্তর শ্যামা প্রসাদ মুকর্জীগী ১২৫শুবা মপোক কুমওনসু পাংথোক্লি। ভারতকী সংবিধানগীদমক মহাক্কী পুন্সি কত্থোকখিবা লৈবাক অসিগী অহানবা শক্নাইরবা মীওই অসি দা. শ্যামা প্রসাদ মকর্জীনি। সংবিধানগীদমক মহাক্না কত্থোকখিবা, আর্তিকল ৩৭০গী পল মুত্থৎখিবা অমসুং ‘ৱান নেসন, ৱান কন্সতিত্যুসন'গী মন্ত্র অসি মংফাওনহনখিবা দা. শ্যামা প্রসাদ মুকর্জীবু ঐখোয়গী অশেংবা ইকায় খুম্নবা ওইরি। ঙসি লাল কিলাদা ইকাই খুম্নরবা মীথুংলেন কয়া, অরাপ্পা মফমশিংদগী পঞ্জায়ৎশিংগী মীহুৎশিং, দ্রোন দিদিশিং, লাখপতি দিদিশিং, শান্নরোইশিং অমসুং লৈবাক অসিগী পুন্সিদা থৌদাং লৌখিবা অতোপ্পা শক্নাইরবা মীওই কয়া শরুক য়ারি। মওং অমদা, ঐহাক্না ঐহাক্কী মীৎ মমাংদা মিনি ভারত অমা উবা ফংলি। অমসুং চাউরবা ভারত অসি তেক্নোলোজীগী খুত্থাংদা লাল কিলা শম্নরি। নীংখা তম্বগী থৌরম অসিদা, ঐহাক্না মালেম শিনবা থুংনা লৈরিবা ভারতপু নুংশিজবশিং অমসুং মফম খুদিংমক্তা লৈরিবা ঐখোয়গী মরুপশিংবু থম্মোয় শেংনা য়াইফ-পাউজেল পীজরি।

মরুপশিং,

মহৌশা অসিনা ঐখোয় পুম্নমকপু চাংয়েং তৌরি। হৌখিবা নুমিৎ খরনি অসিদা, ঐখোয়না মহৌশাগী খুদোংথিবা কয়া মায়োক্নখি – চীং নীংখাইবা, ক্লাউদব্রস্ত অমসুং মশিং লাকঙমদ্রবা খুদোংথিবশিং। ঐখোয়না ভিক্তিমশিং অদুগীদমক অৱাবা ফোংদোকচরি। রাজ্য সরকারশিং অমসুং কেন্দ্র সরকারনা পুন্না থবক তৌমিন্নদুনা রেস্ক্যু ওপরেসনশিং, রিলিফকী থবকশিং অমসুং রিহেবিলিতেসনগী থবকশিং পায়খৎলি।

মরুপশিং,

ঙসিগী ওগস্তকী ১৫দা ঐহাক্না অখন্নবা অমা উবা ফংই। ঙসি ঐহাক্না লাল কিল্লাগী লানবনদগী ওপরেসন সিন্দুরগী থৌনা ফরবা লান্মীশিংবু ইকায় খুম্নবা উৎপগী খুদোংচাবা ফংজবা অসিদা ঐহাক চাউথোকচৈ। ঐখোয়গী থৌনা ফরবা লান্মীশিংনা ৱাখলনা লাম্বা ফংদবা মওংদা য়েকনবশিংদা চৈরাক পীখি। এপ্রিল ২২দা, তেরোরিস্তশিংনা ঙমখৈ লানশিল্লকখি অমসুং পহলগামদা মীশি-মীনা থোকহনখি, মখোয়গী ধর্মগী মরমদা হংলবা মতুংদা মীওইশিং হাৎখি, মপুরোইবশিংবু মখোয়গী লোয়নবশিংগী মীৎ মমাংদা হাৎখি, অমসুং মপাশিংবু মখোয়গী মচাশিংগী মমাংদা হাৎখি। লৈবাক শীনবা থুংনা নুংঙাইতবা ফাওখি, অমসুং মালেম শীনবা থুংনা অসিগুম্লবা মীহাৎ অদুগীদমক য়ানীংদবা ফোংদোক্নরকখি।

ঐগী নুংশিরবা ইরৈবাকচাশিং,

ওপরেসন সিন্দুর অসি অৱাবা অদুগী এক্সপ্রেসন ওইখি। ২২শুবা নুমিৎকী থৌদোকশিং অদুগী মতুংদা, ঐখোয়না ঐখোয়গী লান্মীদা মপুং ফানা নীংতম্বা পীখি- মখোয়না স্ত্রেতেজি, পান্দমশিং অমসুং পুংফম-মতম লেপ্পী। অমসুং ঐখোয়গী লান্মীনা চহি তরাগী খুজিং কয়াদগী তৌখিদ্রিবা থবক অমা পাংথোকখি। মখোয়না য়েক্নবশিংগী লমদা কিলোমিতর চাম্মা চংশিন্দুনা, তেরোরিস্তশিংগী হেদক্বার্তরশিংবু উফুল তাহনখি অমসুং তেরোরিস্তশিংগী হেদক্বার্তরশিংবু থুগাইখি। পাকিস্তান অসি হৌজিক ফাওবা তুম্বা য়াদ্রি। পাকিস্তানদা থোকখিবা মাং-তাক্নিংঙাই ওইবা থৌদোকশিং অসি য়াম্না চাউবনা মরম ওইরগা নুমিৎ খুদিংগী অনৌবা পাউশিং ফংলি।

ঐগী নুংশিরবা ইরৈবাকচাশিং,

ঐখোয়গী লৈবাক অসিনা চহি তরাগী খুজিং কয়াদগী তেরোরিজম থেংনদুনা লাক্লি। লৈবাক অসিগী থম্মোয় অসি হঞ্জিন হঞ্জিন থুগাইখ্রে। হৌজিক্তি, ঐখোয়না অনৌবা নোর্মেল অমা শেম্লে: তেরোরিজমবু পুক্নিং থৌগৎপা অমসুং চংজফম পীবা মীওইশিং, অমসুং তেরোরিস্তশিংবু শক্তি পীবা মীওইশিং অসি তোঙানবা ওইনা লৌরোই। মখোয় পুম্নমক মীওইবা খুন্নাইগী য়েক্নবশিংনি, মখোয়গী মরক্তা খেন্নবা লৈতে। ভারতনা হৌজিক ৱারেপ লৌরে মদুদি ঐখোয়না ন্যুক্লিয়র থ্রেতশিং অসিবু মখা তানা খাংদুনা লৈররোই। মতম শাংনা চত্থরক্লবা ন্যুক্লিয়র ব্লেকমেল অসি মখা তানা খাংদুনা লৈররোই। করিগুম্বা ঐখোয়গী য়েক্নবশিংনা তুংলমচৎতা মসি তৌনবা হোৎনবা তারবদি, ঐখোয়গী লান্মীনা মখোয়গী মশাগী তর্মশিংদা, মখোয়না খঞ্জবা মতমদা, মতিক চাবা মওংদা, অমসুং মখোয়না খনগৎলবা পান্দমশিং অদু তার্গেৎ তৌগনি অমসুং ঐখোয়না মদুগী মতুং ইন্না থবক তৌগনি। ঐখোয়না মতিক চাবা অমসুং অকিবা লৈতবা পাউখুম অমা পীরগনি।

ঐগী নুংশিরবা ইরৈবাকচাশিং,

ভারতনা হৌজিক ৱারেপ লৌরে মদুদি ঈ অমসুং ঈশিং পুন্না চেলহল্লোই। ইন্দস ৱাতর্স ত্রিতি অসি কয়া য়াম্না অরানবা অমসুং নাকল অমা খক্তগী ওইবগে হায়বসি লৈবাক অসিগী মীয়াম্না হৌজিক মপুং ফানা খঙলে। ভারত্তগী হৌরকপা তুরেলশিংগী ঈশিং অসিনা ঐখোয়গী য়েক্নবশিংগী লৌবুকশিংদা শীজন্নহল্লি, অদুগা ঐখোয়গী লৌমীশিং অমসুং ঐখোয়গী লৈবাক্কী লৈহাউনা অরাম খৌরাংবা পোকহল্লি। হায়রিবা এগ্রীমেন্ত অসিনা হৌখিবা চহি তরেৎ অসিদা ঐখোয়গী লৌমীশিংদা চাউনা অমাংবা থোকহল্লে। হৌজিক, ভারতকী ওইগদবা ঈশিং অসি ভারত খক্তগী ওইগনি, ভারতকী লৌমীশিংগী ওইগনি। ভারতনা চহি তরাগী খুজিং কয়াগী মমাংদগী চত্থরকখিবা ইন্দস এগ্রীমেন্তকী মওং অসি মখা তানা খাংদুনা লৈথোকলরোই। ঐখোয়গী লৌমীশিংগী অমসুং লৈবাক অসিগী য়েংলগা মসিগী এগ্রীমেন্ত অসি ঐখোয়না য়াবা ঙমলোই।

ঐগী নুংশিরবা ইরৈবাকচাশিং,

মশিং থিঙমদ্রবা মীওই কয়ানা নীংতম্বা ফংনবগীদমক মখোয়গী পুন্সি কত্থোকখি, মখোয়না মখোয়গী নহ ওইরিঙৈ মতম পুম্নমক কত্থোকখি, জেলদা মখোয়গী পুন্সি কত্থোকখি, অমসুং ইমা ভারতীগী ইকায় খুম্নবা ফংনবগীদমক্তা নত্তনা, মীওই করোর কয়াগী নীংতম্বা ফংনবগীদমক্তা, মীখা পোনবগী য়োৎলিং থদৎনবগীদমক্তা অমসুং মখোয়গী থম্মোয়দা ইথিল অমা খক্তগা লোয়ননা মশাগী পুন্সি কত্থোকখি।

মরুপশিং, মীখা পোনবনা ঐখোয়বু লায়রবা ওইহনখি, অমসুং মসিনা ঐখোয়বু মীখা পোলহল্লি। ঐখোয়না অতোপ্পশিংগী মপাল তাংবা হেনগৎলকই। ঐখোয় পুম্নমক্না খঙই মদুদি নীংতম্লবা মতুংদা, মীওই করোর কয়া অমা চানবা ফংহনবা অসি অচৌবা শিংনবনি। অমসুং ঐগী লৈবাক্কী লৌমীশিং খক্তনা কন্না হোৎনদুনা লৈবাক অসিগী চীঞ্জাক মরাং কায়হনখি। মখোয়না লৈবাক অসিবু চান-থক্নবা মহৈ-মরোং পুথোকপদা মশা-মরোমদোম লেপচবা ঙমহনখি। লৈবাক অমগীদমক্তদি, ঙসি ফাওবদা মশাগী ইকাই খুম্নবগী খ্বাইদগী চাউবা মহৈ অসি মশাদা থাজবা থম্বা অসিনি।

অমসুং ঐগী নুংশিরবা ইরৈবাকচাশিং,

বিক্সিত ভারতকী য়ুম্ফম অসিসু আত্মনির্ভর ভারত অমনি। লৈবাক অমনা অতোপ্পদা মখা পোনবগা লোয়ননা, মাগী নীংতম্বগী মতাংদা ৱাহং লাকই। মীপাল তাংবা অসি হৈনবী ওইরকপা মতমদা, মীপাল তাংদবা ওইরম্বা অদু থাদোক্তুনা অতোপ্পগী মখা পোনবা হৌরকপা মতমদা খুদোংথীবা লাকই। মসিগী হৈনবী অসিগী খুদোংথীবা কয়া লৈ, অমসুং মরম অদুনা মীপাল তাংদবা ওইনবগীদমক মীওই অমনা মতম পুম্নমক্তা চেকশিন্না লৈগদবনি।

অমসুং ঐগী নুংশিরবা ইরৈবাকচাশিং,

মীপাল তাংদবা হায়বসি ইম্পোর্ত অমসুং এক্সপোর্ত, নৎত্রগা রুপি, পাউন্দ অমসুং দোল্লর খক্তদা য়ুম্ফম ওইদে। মসিগী ৱাহন্থোক অসি মসিনা অকক্নবা ওইদে। মশা-মরোমদোম লেপচবা ঙম্বা অসি ঐখোয়গী তৌবা ঙম্বগা মরী লৈনৈ, অমসুং করিগুম্বা মশা-মরোমদোম লেপচবা ঙম্বা অসিনা হন্থরকপা হৌরক্লবদি, তৌবা ঙম্বসু লেপ্তনা হন্থরকই। মরম অদুনা, ঐখোয়গী তৌবা ঙম্বশিং ঙাক-শেন্দুনা থম্নবা অমসুং হেন্না ফগৎহন্নবগীদমক, ঐখোয় মশা-মরোমদোম লেপচবা ঙম্বা হায়বসি তঙাইফদে।

মরুপশিং,

ওপরেসন সিন্দুরদা ঐখোয়না 'মেদ ইন ইন্দিয়া'গী অঙকপা অদু উবা ফংখি। ঐখোয়গী খুৎলাইশিং অমসুং তৌবা ঙম্বশিং অদুগী মরমদা য়েক্নবশিংনা করিগুম্বা অমত্তা খঙবা লৈখিদে, করম্বা শক্তিনা মখোয়বু মীৎকুপ অমদা মাংহনবগে হায়বদু খঙদে। করিগুম্বা ঐখোয়না মশা-মশানা লেপচবা ঙম্লমদ্রবদি, ঐখোয়না ওপরেসন সিন্দুর অসি অসিগুম্বা খোঙজেল য়াংনা পাংথোকপা ঙমলমগদ্রা হায়বা অদু খল্লু। ঐখোয়না কনাদগী পোৎলম ফংগদগে, ঐখোয়না মথৌ তাবা খুৎলায়শিং ফংগদ্রা নৎত্রগা ফংলোইদ্রা, অসিনচিংবশিং অসিনা ঐখোয়দা ৱাখল ৱাহল্লমগনি। অদুবু ঐখোয়না 'মেদ ইন ইন্দিয়া'গী মপাঙ্গল অসি ঐখোয়গী খুৎতা, ঐখোয়গী আর্মদ ফোর্সেসকী খুৎতা থম্লম্বা মরম্না, মখোয়না মখোয়গী থৌনা অদু শিংনবা লৈতনা, অপনবা লৈতনা, অমসুং চিংনবা লৈতনা পাংথোকখি। ঙসি ঐখোয়না উরিবা মহৈশিং অসি ঙাকশেলগী লমদা মশা-মরোমদোম লেপচবা ঙম্নবগীদমক হৌখিবা চহি ১০ অসিদা ঐখোয়না হোৎনখিবা অদুগী মহৈনি।

মরুপশিং,

ঐহাক্না অদোমগী পুক্নিং চিংশিনজনীংবা অতোপ্পা হীরম অমগা লৈ। ২১শুবা চহি চা অসি তেক্নোলোজীনা পুরকপা চহি চা অমনি হায়বসি কনাগুম্বা অমত্তনা য়ানিংদবা ফোঙদোকপা ঙম্লোই। অমসুং মসি তেক্নোলোজীনা লমজিংবা ওইরবদি, পুৱারীদা য়েংবদা তেক্নোলোজীদা মাংজিল থাখিবা লৈবাক খুদিংমক চাউখৎপগী অৱাংবা থাক্তা য়ৌরকখি, অমসুং ইকোনোমিক পৱারগী অনৌবা দাইমেন্সনশিং ফংখি। ঐখোয়না তেক্নোলোজীগী তোঙান তোঙানবা মওংশিংগী মতাংদা ৱা ঙাংলিঙৈদা, ঐহাক্না সেমিকন্দক্তরশিংদা অদোমগী পুক্নীং চীংশিনবা পাম্মি। ঐহাক্না মফম অসিদা লাল কিলাগী লানবন অসিদা মীওই অমা হেক্তবু নৎত্রগা সরকার অমা হেক্তবু য়ানীংদবা ফোংদোক্নবা লেপ্পা নত্তে, ঐহাক্না মসি তৌবসু পামদে। অদুবু মসি ঐখোয়গী লৈবাক অসিগী নহাশিংনা খঙবা অসিসু চপ মান্ননা মরু ওই। ঐখোয়গী লৈবাক অসিদা, সেমিকন্দক্তরগা মরী লৈনবা ফাইলশিং অসি চহি ৫০-৬০গী মমাংদগী চৎনবা হৌরকখি। সেমিকন্দক্তর ফেক্তরী অমগী ৱাখল্লোন অসি মতম অদুদগী হৌরকখি। ঙসিদি সেমিকন্দক্তরশিং অসি মালেমগী শক্তি অমা ওইরে হায়বা খঙবদা ঐহাক্কী নহা ওইরিবা মরুপশিং অসিনা অঙকপা পোক্কনি - অদুবু চহি ৫০-৬০গী মমাংদা, ৱাখল্লোন অসি লেপখি, মতম মাংহনখি অমসুং তোকখি। সেমিকন্দক্তরশিংগী ৱাখল্লোন অসি লোইশিনখি। ঐখোয়না চহি ৫০-৬০ মাংখি। মতমদুদা, লৈবাক কয়ানা সেমিকন্দক্তরশিংদা মাস্তর তৌখি অমসুং মালেমদা মখোয়গী শক্তি অদু উৎখি।

মরুপশিং,

ঙসিদি ঐখোয়না পোৎলুম অদু কোকহল্লে অমসুং মিসন মোদতা সেমিকন্দক্তরগী থবকশিং মাংলোমদা চংশিল্লে। সেমিকন্দক্তরগী তোঙান তোঙানবা য়ুনিৎ তরুক লমদম অসিদা শেমগৎলি, অমসুং ঐখোয়না হান্ননা অনৌবা য়ুনিৎ মরিদা গ্রীন সিগনেল পীখ্রে।

অমসুং ঐহাক্কী লৈবাক্কী মীওইশিং, মরু ওইনা নহারোলশিং অমসুং মালেমগী মফম কয়াদা লৈরিবা ভারতকী তেক্নোলোজীগী মপাঙ্গল খঙবশিংদা ঐহাক্না হায়জনীংবদি চহি অসিগী অরোইবা শরুক ফাওবদা ভারত্তা ভারতকী মীয়াম্না পুথোকপা 'মেদ ইন ইন্দিয়া' চিপ অসি কৈথেলদা ফংলগনি। ঐহাক্না অতোপ্পা খুদম অমা পীজগে। ইনর্জী সেক্তরদা, ঐখোয়না পেট্রোল, দিজেল অমসুং গ্যাসকীদমক লৈবাক কয়াগী মখা পোল্লি, ঐখোয়না মখোয়শিং অসি ফংনবা লুপা করোর লাখ কয়া চাদিং তৌরি হায়বসি ঐখোয় পুম্নমক্না খঙই। লৈবাক অসিবু ইনর্জীদা মশা-মরোমদোম লেপচবা ঙমহনবা অসি য়াম্না মরু ওই। ঐখোয়না ৱারেপ অসি লৌখি, অমসুং হৌখিবা চহি ১১দা, সোলর ইনর্জী অসি শরুক ৩০ হেনগৎলে। ঐখোয়না ক্লিন ইনর্জী ফংনবগীদমক্তা ঐখোয়না হায়দ্রোপ্রোৎকী শক্তি পাকথোক চাউথোকহন্নবা অনৌবা দামশিং শাগৎলি। মিসন গ্রীন হাইদ্রোজেনগী খুত্থাংদা, ভারতনা ঙসি লুপা করোর লিশিং কয়া ইনভেস্ত তৌরি। ইনর্জীগী তুংলমচৎপু ৱাখলদা থমদুনা, ভারতনা ন্যুক্লিয়র ইনর্জীগী লমদসু অচৌবা খোঙথাং কয়া পায়খৎলি।  ন্যুক্লিয়র ইনর্জীগী লমদা, অনৌবা রিএক্তর ১০ য়াম্না থুনা শেমগৎলি। ২০৪৭ ফাওবগী মনুংদা, লৈবাক অসিনা নীংতম্বা চহি ১০০ মপুং ফারকপা মতমদা, ঐখোয়না 'ভিক্সিৎ ভারত'কী পান্দম ফংনবা পান্দম থম্লিবা চহি অসিদা, ঐখোয়না ঐখোয়গী ন্যুক্লিয়র ইনর্জী কেপাসিতী অসি শরুক তরা হেনগৎহন্নবা ৱারেপ লৌদুনা মাংলোমদা চংশিল্লি।

ঐগী নুংশিরবা ইরৈবাকচাশিং,

রিফোর্ম অসি লেপ্পা লৈতনা চত্থবা থৌওং অমনি। মতমগী মথৌ তাবশিং অমসুং ওইরিবা ফিভমশিংগী মতুং ইন্না রিফোর্মশিং পাংথোক্কদবনি। ন্যুক্লিয়র ইনর্জীগী লমদা ঐখোয়না অচৌবা রিফোর্মশিং হৌদোক্লে। ঐখোয়না হৌজিক প্রাইবেৎ সেক্তরগীদমকসু ন্যুক্লিয়র ইনর্জীগী থোঙ হাংদোক্লে। ঐখোয়না ঐখোয়গী পাঙ্গল পুনশিন্নবা পাম্মি।

ঐগী নুংশিরবা ইরৈবাকচাশিং,

ঙসি মালেম অসিনা গ্লোবেল ৱার্মিংগী মতাংদা খন্ন-নৈনরকপা মতমদা, ঐনা মালেমদা হায়জনীংবদি ২০৩০ ফাওবদা ভারতনা চাদা ৫০গী চাংদা ক্লিন ইনর্জী ফংহন্নবা ৱারেপ লৌখি। মসি ঐখোয়গী ২০৩০গী পান্দমনি। ঐগী লৈবাক মীয়ামগী তৌবা ঙম্বশিং অদু য়েংবীয়ু, ভারতপু চাউখৎহন্নবা মখোয়গী ৱারেপ অদু মপুং ফাহনবগী মখোয়গী অচেৎপা ফিরেপ অদু য়েংবীয়ু। ঐখোয়না ২০২৫ ফাওবদা চহি মঙাগী মমাংদা ৫০% ক্লিন ইনর্জীগী পান্দম অদু ফংবা ঙম্লে। মসিগী মরমদি ঐখোয়না মহৌশাগী মায়কৈদা ঐখোয়গী থৌদাং লৌদুনা ঐখোয়না মালেম অসিগী মায়কৈদা সেন্সিতিব ওইনা ৱাখল খল্লি।

ঐগী নুংশিরবা ইরৈবাকচাশিং,

বজেৎ অসিগী চাউরবা শরুক অমা পেট্রোল, দিজল, গ্যাস অসিনচিংবা পুরকপদা শিজিন্নখি। লুপা করোর লাখ কয়া মাঙজৌননা থাদোকখি। করিগুম্বা ঐখোয়না ইনর্জীদা মখা পোল্লমদ্রবদি, শেনফম অসি ঐগী লৈবাক্কী নহারোলশিংগী তুংলমচৎকীদমক শিজিন্নরমগনি, শেনফম অসি ঐগী লৈবাক্কী লায়রবশিংদা লায়রবা লান্থেংনবদা মতেং পাংনবা শিজিন্নরমগনি, শেনফম অসি ঐগী লৈবাক্কী লৌমীশিংগী য়াইফনবা শিজিন্নরমগনি, শেনফম অসি ঐগী লৈবাক্কী খুঙ্গংশিংগী ফিভমশিং হোংদোক্নবা শিজিন্নরমগনি, অদুবু ঐখোয়না মসি মপানগী লৈবাকশিংদা চৎহনবা তাখি।

ঐগী নুংশিরবা ইরৈবাকচাশিং,

ঙসিদি মালেম পুম্বনা মরুওইবা মিনরেলশিংগী মতাংদা য়াম্না চেকশিন্না লৈনরি, মীশিংনা মখোয়গী পোতেন্সিএল অদু য়াম্না ফজনা খঙবা হৌরে। ঙরাং ফাওবদা য়াম্না থৌশাখিদবা ৱাফম অমা ঙসিদি মরুওইবা মফম অমদা লাক্লে। মরুওইবা মিনরেলশিংদা মশা-মরোমদোম লেপচবা অসি ঐখোয়গীদমক্তসু য়াম্না মরু ওই। ইনর্জী সেক্তর ওইগেরা, ইন্দস্ত্রী সেক্তর ওইগেরা, দিফেন্স সেক্তর ওইগেরা নৎত্রগা অতোপ্পা তেক্নোলোজী সেক্তর অমা ওইগেরা, ঙসিদি ক্রিতিকেল মিনরেলশিংনা তেক্নোলোজীদা য়াম্না মরু ওইবা থৌদাং অমা লৌরি। মরম অদুনা ঐখোয়না নেস্নেল ক্রিতিকেল মিসন হৌদোক্লে। মফম ১২০০ হেনবদা এক্সপ্লোরেসন কেম্পেন চত্থরি।

ঐগী নুংশিরবা ইরৈবাকচাশিং,

লৈবাক অসিগী মীপুম খুদিংমক্না স্পেস সেক্তরগী অঙকপা অদু উবা ফংলি অমসুং চাউথোকচবা ফাওই। অমসুং ঐখোয়গী গ্রুপ কেপ্তেন শুবংশু শুক্লা স্পেস স্তেসনদগী হল্লকখ্রে। মহাকসু নুমিৎ খরনিগী মনুংদা ভারত্তা লাক্কনি। ঐখোয়না স্পেসতা মশাগী ওইনা আত্মনির্ভর ভারত গগনয়ানগী শেম-শাদুনা লৈরি। ঐখোয়না ঐখোয়গী ইশাগী স্পেস স্তেসন শেমগৎনবা হোৎনরি।  অমসুং ঐহাক্না স্পেসকী লমদা হৌখিবা মতম খরগী মমাংদা পায়খৎখিবা রিফোর্মশিংগীদমক য়াম্না চাউথোকচরি। ঐহাক্কী লৈবাক অসিগী স্তার্তঅপ ৩০০ হেনবনা স্পেস সেক্তরদা থবক তৌরি অমসুং নহা লিশিং কয়া অমা হায়রিবা স্তার্তঅপ ৩০০ অসিদা মপুং ফানা থবক তৌরি। মসি ঐগী লৈবাক্কী নহাশিংগী শক্তিনি অমসুং মসি ঐখোয়গী লৈবাক্কী নহাশিংদা ঐখোয়গী থাজবনি।

ঐগী নুংশিরবা ইরৈবাকচাশিং,

ঐখোয়না নীংতম্বগী চহি ১০০ মপুং ফারকপা ২০৪৭ ফাওবদা চাউখৎলবা ভারত অমগী ৱারেপ অদু মপুং ফাহন্নবগীদমক ভারত মচা করোর ১৪০না মপুং ফানা থবক তৌরি। মসিগী ৱারেপ অসি মপুং ফাহন্নবগীদমক, ভারতনা সেক্তর খুদিংমক্তা মোদর্ন ইকোসিস্তেম অমা শেমগৎলি অমসুং মোদর্ন ইকোসিস্তেম অসিনা লম খুদিংমক্তা ঐখোয়গী লৈবাক অসিবু মশা-মরোমদোম লেপচবা ঙমহনগনি। ঙসি, লাল কিলাগী লানবনদগী ঐহাক্না ঐহাক্কী লৈবাক্কী নহা ওইরিবা সাইন্তিস্তশিং, ঐহাক্কী হৈ-শিংলবা নহাশিং, ঐহাক্কী ইঞ্জিনীয়রশিং অমসুং প্রোফেস্নেলশিং অমসুং সরকারগী দিপার্তমেন্ত খুদিংমক্তা হায়জরি। ঐখোয়গী মেদ ইন ইন্দিয়া ফাইতর জেৎশিংগী জেত ইঞ্জিন অসি ঐখোয়গী ওইগদ্রা নৎত্রগা ওইরোইদ্রা? ঐখোয় মালেমগী ফার্মা হায়না লৌনরি। ঐখোয়না ভেক্সিনগী লমদা অনৌবা রেকোর্দশিং শেমগৎলি, অদুবু মতমগী তঙাইফদবা অসিদি ঐখোয়না রিসর্চ অমসুং দিবেলপমেন্তদা হেন্না ইনর্জী থাদবা, ঐখোয়গী মশাগী পেতেন্ত লৈবা, মীওইবা খুন্নাইগী য়াইফনবা খ্বাইদগী মমল হোংবা অমসুং খ্বাইদগী কান্নবা হিদাক-লাংথকশিংগী মতাংদা থিজিনবা অমসুং খুদোংচাদবা মতমদা, মখোয়শিং অসি সাইদ ইফেক্স অমত্তা য়াওদনা মীওইবগী য়াইফনবগীদমক কান্নবা ওইহনগদবনি হায়বসিনি। ভারত সরকারনা বাইও-ই৩ পোলিসী শেম্লে। ঐহাক্না লৈবাক অসিগী নহাশিংদা হায়জরি মদুদি মখোয়না বাইও-ই৩ পোলিসী অসি নৈননবা অমসুং খোঙথাংশিং লৌখৎনবা লাকপীয়ু। ঐখোয়না লৈবাক অসিগী শক্তম হোংদোক্কদবনি অমসুং ঐখোয়না অদোমগী মতেং মথৌ তাই।

ঐগী নুংশিরবা ইরৈবাকচাশিং,

ঙসিদি আই.তি.গী মতম ওইরে, ঐখোয়না দেতাগী শক্তি লৈরে, মসি মতমগী মথৌ তাবা নত্ত্রা? ওপরেতিং সিস্তেমদগী হৌরগা সাইবর সেক্যুরিতী ফাওবা, অরুবা তেক্নোলোজীদগী হৌরগা আর্তিফিসিএল ইন্তেলিজেন্স ফাওবা, পুম্নমক অসি ঐখোয়গী ওইগদবনি, মসিদা ঐখোয়গী মীয়ামগী পাঙ্গল অসি কনখৎহন্নবা তৌগদবনি, ঐখোয়না মালেমদা মখোয়গী তৌবা ঙম্বগী পাঙ্গল অদু খঙহনগদবনি।

মরুপশিং,

ঙসিদি, সোসিএল মীদিয়া ওইরো নত্রগা অতোপ্পা প্লেতফোর্ম অমা ওইরো, ঐখোয়না মালেমগী প্লেতফোর্মশিংদা থবক তৌরি। ঐখোয়গী য়ু.পি.আই. প্লেতফোর্মনা ঙসিদি মালেমদা অঙকপা পোকহল্লি হায়বসি ঐখোয়না মালেমদা উৎলি। ঐখোয়গী ওইথোকপা য়াবা লৈরে; ভারত খক্তনা য়ু.পি.আই.গী খুত্থাংদা রিএল তাইম ত্রাঞ্জেক্সনগী ৫০% তৌরি। মসিগী ৱাহন্থোক্তি শক্তিনি। ক্রিএতিব ৱার্ল্দ, সোসিএল মীদিয়া নৎত্রগা হায়রিবা প্লেতফোর্মশিং অসিগী মরক্তগী অমা ওইরবসু, ঐহাক্না ঐহাক্কী লৈবাক অসিগী নহাশিংদা শিংনরি, লাকপীয়ু, ঐখোয়গী ইশাগী প্লেতফোর্ম অমা ঐখোয়না করিগীদমক লৈতবা, ঐখোয়না অতোপ্পদা করিগীদমক্তা মখা পোল্লিবনো, ভারতকী শেন-থুম অসি করিগীদমক্তা মপানদা চৎকদগে অমসুং ঐহাক্না অদোমগী তৌবা ঙম্বদা থাজবা থম্লি।

ঐগী নুংশিরবা ইরৈবাকচাশিং,

ঐখোয়না ইনর্জীগীদমক্তা মালেমগী মখা পোল্লি। লৈবাক অসিগী খুদোংচাদবা অমদি ঐখোয়না ফর্তিলাইজরগীদমক্তা মালেমগী মখা পোল্লি। ঐগী লৈবাক অসিগী লৌমীশিংনা ফর্তিলাইজরশিং মতিক চাবা মওংদা শিজিন্নদুনা ইমা পৃথীবিগী সেবা তৌরি। ঐখোয়না ইমা পৃথীবিদা মসি শিজিন্নদুনা মহাক্কী মফমদা অৱাবা কয়া অমা থোকহল্লি। অদুবু মসিগা লোয়ননা, ঐহাক্না লৈবাক অসিগী নহাশিং, লৈবাক অসিগী ইন্দস্ত্রী, লৈবাক অসিগী প্রাইবেৎ সেক্তরদা হায়জনীংবদি, ঐখোয়না ফর্তিলাইজরগী রিজর্ব মপুং ফাহল্লসি, অনৌবা পাম্বৈ পুথোক্লসি অমসুং ভারতকী মথৌ তাবশিংগী মতুং ইন্না ঐখোয়গী ফর্তিলাইজরশিং শেমগৎলসি, অতোপ্পদা মখা পোল্লরোইসি।

মরুপশিং,

লাক্কদৌরিবা মতম অসি ই.ভি.শিং (ইলেক্ত্রিক ভেহিকলশিং) গী মতমনি। হৌজিক ঐখোয়না ই.ভি. বেতরীশিং পুথোক্ত্রবদি, ঐখোয়না মখোয়গী মখা পোল্লক্কনি। সোলর পেনেল ওইগেরা নৎত্রগা ইলেক্ত্রোনিক ভেহিকলশিংদা মথৌ তাবা পোৎলমশিং ওইগেরা, ঐখোয়গী মশাগী লৈগদবনি।

মরুপশিং,

ঐহাক্না মসি হায়বগী থৌনা লৈ মরমদি ঐহাক্না লৈবাক অসিগী নহাশিংগী তৌবা ঙম্বশিংদা থাজবা থম্লি। অমসুং থাজবা অসি মখোয়না ঐহাক্কী লৈবাক অসিগী নহা ওইবা খক্তগী নত্তে, কোবিদকী মতমদা ঐখোয়না হীরম কয়াদা মীগী মীপাল তাংখি। ঐহাক্কী লৈবাক অসিগী নহাশিংদা ঐখোয়না ঐখোয়গী ভেক্সিন অমা মথৌ তাই হায়না হায়রকপা মতমদা, লৈবাক অসিনা মদু পাংথোক্তুনা উৎখি। কো-ৱিন প্লেতফোর্ম অসি ঐখোয়গী ওইগদবনি, লৈবাক অসিনা মসি তৌদুনা উৎলি। ঐখোয়না মীওই করোর কয়াগী পুন্সি কনবগী থবক পায়খৎলি। চপ মান্নবা ৱাখল্লোন, চপ মান্নবা পুক্নিং থৌগৎপা অসিনা ঐখোয় পুন্সিগী হীরম খুদিংদা মশা-মরোমদোম লেপচবা ঙম্নবা, ঐখোয়গী খ্বাইদগী ফবা অদু পীবা ঙম্নবা হোৎনগদবনি।

মরুপশিং,

হৌখিবা চহি ১১ অসিদা, ওন্তপ্রিন্যুওরশিপনা চাউনা পাঙ্গল হাপখি। ঙসিদি তায়র-২ অমসুং তায়র-৩গী শহরশিংদা স্তার্ত-অপ লাখ কয়ানা লৈবাক অসিগী শেন্মিৎলোন অমসুং ইনোবেসনবু মপাঙ্গল কনখৎহল্লি। অসিগুম্বা মওংদা, ঐখোয়গী ইচানুপী কয়া য়াওনা ঐখোয়গী নহারোল কোতি কয়ানা মুদ্রা য়োজনাগী খুত্থাংদা লোন লৌদুনা মখোয়গী ললোন-ইতিক হৌদোকখ্রে। মখোয়না মখোয় মশা মরোমদোম লেপচবতা নত্তনা অতোপ্পশিংনসু চপ মান্ননা লেপচনবা শক্তি পীরি। মসিনা, মওং অমদা, মীওই খুদিংমকপু মশা-মরোমদোম লেপচবগী খুদোংচাবা পীরি।

ঐগী মরুপশিং,

মমাংদা, নুপীশিংগী সেল্ফ-হেল্প গ্রুপশিংদা কনাগুম্বা অমত্তনা পুক্নিং চংখিদে। অদুবু হৌখিবা চহি ১০ অসিদা, নুপীশিংগী সেল্ফ হেল্প গ্রুপশিংনা অঙকপা কয়া অমা তৌখি। ঙসিদি, মখোয়গী পোত্থোকশিং অসি মালেমগী কৈথেলশিংদা য়ৌরে। ঐখোয়গী নুপীগী সেল্ফ হেল্প গ্রুপশিংনা লুপা লাখ কয়া অমসুং করোর কয়াগী ললোন-ইতিক তৌরি। মতম অমদা ঐহাক্না মন কী বাত্তা শান্নপোৎশিংগী মতাংদা ৱা ঙাংখি। ঐখোয়না মমাংঙৈদা মপান্দগী লুপা করোর কয়াগী শান্নপোৎশিং পুশিল্লম্মি। ঐহাক্না 'মন কী বাত'কী থৌরমদা ইচম চম্না হায়জখি, "ঐহাক্কী নহা ওইরিবা মরুপশিং, ঐখোয়না মপান্দগী শান্নপোৎশিং পুরকপা লেপহনবা ঙমগদ্রা?" অমসুং ঙসি ঐহাক্না চাউথোকচবা ফাওই মদুদি ঐহাক্কী লৈবাক অসিনা শান্নপোৎশিং থাদোকপা হৌরে। মসিগী ৱাহন্থোক্তি লৈবাক অসিনা ওইথোকপা য়াবা খুদোংচাবা পুম্নমক ফংলবদি অমসুং খুদোংচাদবশিংদগী লাপথোক্লবদি, মসিনা অচৌবা থবকশিং পাংথোকপা ঙম্মী। মসিনা খ্বাইদগী ফবা তৌবা ঙম্নবা ইথিল পীগদবনি অমসুং লৈবাক অসিনা মসি তৌবা ঙম্মি। ঐহাক্না লৈবাক অসিগী নহাশিংদা হায়জরি: অদোমগী ইন্নোবেতিব আইদিয়াশিং পুথোকপীয়ু, অদোমগী আইদিয়াশিং অদু মাংহনদনা থম্বীয়ু, ঐহাক্কী মরুপশিং। ঙসিগী ৱাখল্লোন অসিনা লাক্কদৌরিবা চারোন-শুরোনশিংগী তুংলমচৎপু শেম্বা ঙমগনি। ঐহাক ময়ামগা লোয়ননা লেপমিন্নরি। ঐহাক ময়ামগীদমক্তা থবক তৌনবা শেম-শারি। ঐহাক্না মসিগী খোঙচৎ অসিদা অদোমগী পার্তনর ওইনবগীদমক শেম-শারি। মাংলোমদা চংশিল্লু, থৌনা লৈয়ু, থৌরাং তৌ। মেনুফেকচরিংগী মতাংদা খনবা নহা ওইরিবা মীওইশিংদা, লাকপীয়ু অমসুং লমজিংবীয়ু। ঐখোয়না সরকারগী কাংলোনশিং হোংদোকপা মথৌ তারবদি ঐঙোন্দা পাউদম্বীয়ু। লৈবাক অসিনা হৌজিক লেপ্পরোই। ২০৪৭ অসি অরাপ্পা নত্তে। মীকুপ খুদিংমক মমল য়াম্মি, অমসুং মরুপশিং, ঐখোয়না মতম অমত্তা মাংহনবা পামদে।

মরুপশিং,

মসি মাংলোমদা চংশিনবগী খুদোংচাবা অমনি, চাউনা ৱাখল খনবগী খুদোংচাবা অমনি, ঐখোয়গী ৱারেপশিংদা ঐখোয় মশামকপু কত্থোক্নবগী খুদোংচাবা অমনি। সরকারনা ময়ামগা লোয়ননা লৈরবা মতমদা অমসুং ঐহাকসু অদোমগা লোয়ননা লৈরবা মতমদা, ঐখোয়না অনৌবা পুৱারী অমা শেম্বা ঙমগনি।

মরুপশিং,

ঙসিদি, নেস্নেল মেনুফেকচরিং মিসন অসি য়াম্না থুনা খুমাং চাউশিল্লি। ঐখোয়গী এম.এস.এম.ই.শিং অসি মালেম্না মশক খঙই অমসুং ইকাই খুম্নৈ। মালেমগী খ্বাইদগী চাউবা পোত্থোকশিং পুথোকপদা ঐখোয়গী লৈবাক অসিগী এম.এস.এম.ই.শিংদগী লাকপা খুৎলাই নৎত্রগা কম্পোনেন্ত খরদি মতম পুম্নমক্তা লৈ। মখোয়শিং অসি চাউথোকচনীংঙাই ওইবা মওংদা এক্সপোর্ত তৌই। অদুবু ঐখোয়না অপুনবা অমসুং ইন্তিগ্রেতেদ দিবেলপমেন্তকী লম্বীদা চংশিনবা পাম্মি। মরম অসিনা ঐখোয়না মখোয়গী কেপাসিতীশিংবু মপাঙ্গল কনখৎহনগদবনি। লাল কিলাদগী ঐহাক্না মতম অমদা হায়রম্মি মদুদি জিরো দিফেক্ত, জিরো ইফেক্ত। ঙসি ঐহাক্না অমুক্কা হন্না হায়জনীংবদি, মালেমগী কৈথেলদা ঐখোয়গী পাঙ্গল অদু মালেমনা খঙবা পাম্লবদি, ঐখোয়না ক্বালিতীদা লেপ্পা লৈতনা অনৌবা অৱাংবা থাকশিং য়ৌহনগদবনি। মালেম অসিনা ক্বালিতীবু য়ানিংই। ঐখোয়গী ক্বালিতী অসি খ্বাইদগী ফবা ওইগদবনি, অমসুং সরকারনা রো মেতচরিএল ফংহন্নবা অমসুং ঐখোয়গী পোৎথোক পুথোকপগী মমল হন্থহন্নবা পাম্বৈশিং পুথোক্নবা হোৎনগনি।

অমসুং মরুপশিং,

মেন্যুফেকচরিংগী লমদা থবক তৌরিবা ঐখোয় পুম্নমক্কীদমক ঐখোয়গী মন্ত্র অসি: "অতাবা মমল, অদুবু হেন্না ৱাংবা ভেল্যু" ওইগদবনি। ঐখোয়গী পোত্থোক খুদিংমক্কী ভেল্যু লৈগদবনি, অদুবু মমল হন্থগদবনি। অসিগুম্বা ৱাখল্লোন অসিগা লোয়ননা ঐখোয়না মাংলোমদা চংশিনগদবনি।

ঐগী নুংশিরবা ইরৈবাকচাশিং,

লৈবাক অসিগী নীংতম্বা ফংনবগীদমক মশিং থিঙমদ্রবা মীওইশিংনা মখোয়গী পুন্সি কত্থোকখি। ঐহাক্না মমাংদা হায়খি মদুদি মখোয়না মখোয়গী নহা ওইরিঙৈগী মতম কত্থোকখি; মখোয়না করিগীদমক্তা ফংশি তৌফমদা চৎখি? নীংতম্লবা ভারত অমগীদমক। চহি ৭৫-১০০গী মমাংদা লৈবাক পুম্বনা নীংতম ভারতকী মন্ত্রগা লোয়ননা হিংলিবা মতম অদু অমুক হন্না খল্লু। ঙসি, মতম অসিগী দিমান্দদি: নীংতম ভারতকী মন্ত্রনা হিংলম্বা মীওইশিংনা ঐখোয়দা নীংতম্বা পীখি। হৌজিক্তি ভারত মচা কোতি ১৪০গী মন্ত্র অসি চাউখৎপা ভারত অমা ওইগদবনি।  মীওই লাখ কয়াগী থৱায় কৎপদগী ঐখোয়না নীংতম্বা ফংলবদি, ঐখোয়না ৱারেপ লৌদুনা, কন্না হোৎনদুনা, মশাদা থাজবা থম্বা, 'ভোকেল ফোর লোকেল'বু শৌগৎপা অমসুং মীওই লাখ কয়ানা স্বদেশীগী মন্ত্র শোন্দুনা, ঐখোয়না চাউখৎপা ভারত অমা শেম্বা ঙমগনি। হায়রিবা জেনরেসন অসিনা মনিংতম্বা ভারত অমগীদমক মশাবু কত্থোকখি। মসিগী জেনরেসন অসিনা চাউখৎপা ভারত অমগীদমক থৌনা ফরবা অনৌবা খোংথাংশিং লৌখৎকদবনি। মসি মতমগী মতুং ইন্না মথৌ তাবনি।  মসিনা মরম ওইদুনা ঐহাক্না হন্না হন্না হায়জরি, লৈবাক অসিগী ইথিল পীবা মীওই পুম্নমকপু ঐহাক্না হায়জরি মদুদি মসিগী মন্ত্র অসি শন্দোকপদা ঐহাকপু মতেং পাংবীয়ু। ঐনা পোলিতিকেল পার্তী, পোলিতিসিয়ন, মীপুম খুদিংমক্তা হায়জরি: লাক্লো, মসি পোলিতিকেল পার্তী অমখক্তগী এজেন্দা নত্তে। ভারত অসি ঐখোয় পুম্নমক্কীনি। ঐখোয় পুন্না 'ভোকেল ফোর লোকেল' অসি নাগরিক খুদিংমক্কী পুন্সিগী মন্ত্র ওইহল্লসি।

ঐখোয়না ভারত্তা পুথোকপা, ভারতকী নাগরিকশিংগী হুমাং মমলনা পুথোকপা, ঐখোয়গী লৈহাওগী মগুন চেনবা অমসুং মশা-মরোমদোম লেপচবা ঙম্নবগী ঐখোয়গী ৱারেপ অদু মপাঙ্গল কনখৎহনবা পোত্থোকশিং খক্তমক ঐখোয়না য়োনবা অমসুং শিজিন্নগদবনি। মসি ঐখোয়গী অপুনবা ৱাশক অমা ওইরসনু, অমসুং মতম খরগী মনুংদা, মরুপশিং, ঐখোয়না মালেম অসি হোংদোক্লগনি। ঙসি ঐহাক্না অপীকপা ত্রেদর অমসুং দুকান মপু খুদিংমক্তা হায়জরি মদুদি, অদোমগীসু থৌদাং লৈ। ঐখোয়না অঙাং ওইরিঙৈ মতমদা, ঐখোয়না দুকানশিংবু ‘ঘী দুকান’ হায়না লেবেল তৌদুনা উরম্মি, অদুবু মতমগী মতুং ইন্না মীয়াম্না ‘প্যুয়োর ঘী দুকান’ হায়না ইবা হৌরকখি। অসিগুম্বা মওংদা, লৈবাক শীনবা থুংনা লৈরিবা ত্রেদরশিং অমসুং দুকান মপুশিংনা 'মসিদা স্বদেশীগী পোৎলমশিং য়োল্লি' হায়বা বোর্দশিং হাপ্নবা ঐহাক্না হায়জরি। ঐখোয় স্বদেশীদা চাউথোকচরি। ঐখোয়না মসিবু কমপলজন ওইহল্লোইদবনি, অদুবু ঐখোয়গী ইশাগী শক্তিগীদমক্তা অমসুং করিগুম্বা মথৌ তারবদি, অতোপ্পদা মসি শিজিন্ননবা পুক্নিং থৌগৎকদবনি। মসি ঐখোয়গী শক্তি ওইগদবনি। মসি ঐখোয়গী লমজিং-লমতাকপা মন্ত্র ওইগদবনি।

ঐগী নুংশিরবা ইরৈবাকচাশিং,

মতম শাংনা, ঐহাক্না সরকারদা থবক তৌবগী খুদোংচাবা ফংখি। ঐহাক্না অৱা-নুংঙাই কয়া থেংনখি। লৈঙাকশিংনা থেংনরিবা শিংনবশিং অদুগা লোয়ননা এদমিনিস্ত্রেতিব সিস্তেমশিংগী লিমিতেসনশিং অদুগা ঐহাক্না খঙি। অদুম ওইনমক, মসি পুম্নমক অসি লৈজরবসু, অতোপ্পগী এচিবমেন্তশিংবু হন্থহনবদা ঐখোয়গী ইনর্জী মাংহন্দনবা ঐখোয়গী থৌদাং ওইরি। ঐহাক্কী পাক চাউবা এক্সপরিয়েন্সকী মতুং ইন্না, ঐহাক্না হায়জরি মদুদি ঐখোয়না অতোপ্পশিংবু মাং-তাকহনবদা ঐখোয়গী ইনর্জী শিজিন্নরোইদবনি। মদুগী মহুত্তা, ঐখোয়না ঐখোয়গী ইনর্জী পুম্নমকপু ঐখোয়গী ইশাগী তৌবা ঙম্বশিং অমসুং মায় পাকপশিংবু হেন্না ফগৎহনবদা শিজিন্নগদবনি। ঐখোয়না চাউখৎলকপা অমসুং মগুন লৈরকপা মতমদা, মালেম অসিনা ঐখোয়গী মগুন অদু খঙলগনি। ঐখোয়না ঐখোয়গী মপাঙ্গল অমসুং থাক হেনগৎহন্নবা থৌনা লৈনা হোৎনগদবনি। অমসুং ঐহাক্কী চহি ২৫গী এদমিনিস্ত্রেতিব এক্সপরিয়েন্সকী মতুং ইন্না, ঐহাক্না মসি হায়জবা য়াই মদুদি ঐখোয়না লম্বী অসিবু খল্লবদি, অমসুং মীপুম খুদিংমক্না মসিবু খল্লবদি, করিগুম্বা ইশাগী ওইবা ইন্তরেস্ত অমত্তনা ঐখোয়বু ফাজিনবা ঙম্লোই।

ঐগী নুংশিরবা ইরৈবাকচাশিং,

হৌখিবা চহি তরা অসিদা রিফোর্ম, পর্ফোর্ম, অমসুং ত্রান্সফোর্ম তৌখি। অদুবু হৌজিক্তি, ঐখোয়না ঐখোয়গী হোৎনবা অসিদা অনৌবা পাঙ্গল হাপকদবনি। হৌখিবা মতম খরা অসিদা ঐখোয়না এফ.দি.আই.গী লমদা, ইন্সুরেন্স সেক্তরদা, মালেমগী য়ুনিভর্সিতীশিংদা ভারত্তা কেম্পস লিংখৎপগী অয়াবা পীবদা রিফোর্ম কয়া অমা পায়খৎলে। ঐখোয়না দরকার লৈতবা কমপ্লাইএন্সী ৪০,০০০ হেন্না মুত্থৎখ্রে। মসি খক্তা নত্তনা ঐখোয়না মতমগা চুনদ্রবা আইন ১৫০০ হেন্না মুত্থৎখ্রে। ঐখোয়না পার্লিয়ামেন্তদা মীয়ামগী কান্নবশিংবু অহানবদা থমদুনা মখোয়বু লায়থোকহন্নবগীদমক আইন কয়া শেমদোক্নবা চৎলি। হায়রিবা মতম অসিদসু, ইনকম তেক্স এক্ততা য়াম্না মরু ওইবা রিফোর্ম অমা পাংথোকখিবা অদুগী পাউ অসি মীয়ামদা য়ৌহৌদ্রি। সেক্সন ২৮০ হেন্না মুত্থৎনবা ঐখোয়না ৱারেপ লৌরে। অমসুং মরুপশিং, ঐখোয়গী রিফোর্মশিং অসি শেন্মিৎলোনগী মায়কৈ খক্তদা অকক্নবা ওইদ্রে। ঐখোয়না নাগরিকশিংগী পুন্সিদা লাইথোকহন্নবগীদমক রিফোর্মশিং পায়খৎলি। ইনকম তেক্স রিফন্দশিং অসি রিফোর্মশিংগী মহৈনি। কেশলেস ভেল্যুশিং অসি রিফোর্মশিংগী মহৈনি। লুপা লাখ ১২ ফাওবগী ইনকম অদু ইনকম তেক্সতগী লৌথোকপা অসিনা ঐগী মিদল ক্লাসকী ইমুংশিংদা চাউনা নুংঙাইবা পোকহল্লে। মখোয় অসি লৈবাক শেমগৎপদা শরুক য়ানবা কন্না হোৎনরি। মমাংদা কনাগুম্বা অমত্তনা লুপা লাখ ১২ ফাওবগী ইনকম মপুং ফানা তেক্স ফ্রী ওইগনি হায়না খল্লমদে, অদুবু ঙসিদি ঐখোয়না মসি তশেং তশেং ওইহল্লে।

লৈবাক্কী শক্তি হেনগৎলকপা মতমদা, মসিগী কান্নবা অসি নাগরিকশিংনা ফংই। বৃতিশকী লৈঙাক্কী মতমদগী হৌনা ঐখোয়না পেনেল কোদকী মখাদা চৈরাক পীদুনা লৈখি, মতম পুম্নমক্তা চৈরাক ফংবগী অকিবা লৈখি। নীংতম্বগী চহি ৭৫ অসি অসিগুম্বা মওংদা চত্থখি। ঐখোয়না পেনেল কোদ মুত্থৎখ্রে অমসুং ভারতীয় ন্যায়া সনহিতাবু পুরকখ্রে। মসিনা ভারতকী প্রজাশিংদা থাজবা থম্লি, লমদম অসিগী মরী লৈনবগী ৱাখল্লোন অমা উৎলি, অমসুং মসি সেন্সিতিবিতীনা মপুং ফাহল্লি। ঐখোয়না রিফোর্মগী খোঙচৎ অসি খোংজেল য়াংশিনবা হায়না ৱারেপ লৌরে, অমসুং ঐখোয়না খোংজেল য়াংশিনবা পাম্মি। ঐহাক্না ঐহাক্কী লৈবাক মীয়ামদা হায়জনীংই মদুদি ঐহাক্না তৌরিবা পুম্নমক অসি লৈবাক অসিগীদমক্তনি, ঐহাক্কীদমক্তা নত্তে, কনাগুম্বা অমত্তবু শোকহন্নবা নত্তে। ঐহাক্না রাজনিতী দলশিং, ঐহাক্কী কম্পিতিতরশিং, অমসুং ইচিল-ইনাও লুচিংবশিং পুম্নমকপু লৈবাক অসিগী মঙাল লৈবা তুংলমচৎকীদমক মাংলোমদা চংশিন্নবা অমসুং ঐখোয়গা পুন্না চৎমিন্ননবা কৌজরি। স্ত্রকচরেল রিফোর্মশিং, রেগুলেতরী রিফোর্মশিং, পোলিসী রিফোর্মশিং, প্রোসেস রিফোর্মশিং, নৎত্রগা কন্সতিত্যুস্নরি রিফোর্মশিংগী তঙাইফদবা ওইগেরা, ঐখোয়না ঙসিদি মখল খুদিংমক্কী রিফোর্মশিং অসি ঐখোয়গী মিসন ওইহল্লে।

অমসুং ঐগী নুংশিরবা ইরৈবাকচাশিং,

মথংগী জেনরেসনগী রিফোর্মশিংগীদমক্তা ঐখোয়না তাস্ক ফোর্স অমা শেম্নবা ৱারেপ লৌরে। হায়রিবা তাস্ক ফোর্স অসিনা লেপখ্রবা মতমগী মনুংদা থবক লোইশিনগনি। হৌজিক লৈরিবা কাংলোনশিং, আইনশিং, পোলিসীশিং অমসুং থৌওংশিং অসি ২১শুবা চহিচাগী মতুং ইন্না, মালেমগী অকোয়বগী ফিভমগা চুনবা অমসুং ২০৪৭ ফাওবদা ভারতপু চাউখৎলবা লৈবাক অমা ওইহন্নবগী মঙলান অদুগা চুন্না শেমদোকপা মথৌ তাই। হায়রিবা থবক অসি অকক্নবা মতমগী মনুংদা পাংথোক্নবা তাস্ক ফোর্স অমা শেমখ্রে।

মরুপশিং,

রিফোর্মশিং অসিনা মখোয়গী তুংলমচৎ শেম্বা পাম্বা মীওই পুম্নমকপু থৌনা পীগনি। ঐখোয়গী স্তার্ত-অপ ওইগেরা, ঐখোয়গী অপীকপা ইন্দস্ত্রী ওইগেরা, নৎত্রগা ঐখোয়গী কোতেজ ইন্দস্ত্রী ওইগেরা, ওন্তপ্রিন্যুওরশিংনা মখোয়গী কমপ্লাইএন্সকী শেনফমদা মশক থোক্না হন্থরকপা উগনি, মসিনা মখোয়দা অনৌবা পাঙ্গল পীরগনি। এক্সপোর্তকী লমদসু, লোজিতিক্স অমসুং সিস্তেমশিংদা অহোংবা পুরকপনা মখোয়দা অচৌবা খুদোংচাবা অমা পীগনি।

মরুপশিং,

ঐখোয়গী লৈবাক অসিদা লোশিং লৈরি, অপীকপা ৱাথোকশিংগীদমক জেলদা থম্বা য়াহল্লি, অমসুং কনাগুম্বা অমত্তনা মখোয়দা পুক্নিং চংখিদে। ভারতকী নাগরিকশিংবু জেলশিংগী মনুংদা থম্লিবা অসিগুম্লবা দরকার লৈতবা আইনশিং অসি লৌথোক্নবা ঐহাক্না থৌরাং তৌরি। ঐখোয়না মমাংদা পার্লিয়ামেন্ততা বিল অমা পুখৎখি; ঐখোয়না মসি অমুক্কা হন্না পুখৎলি।

মরুপশিং,

হন্দক্কী দিৱালী অসিদা, ঐহাক্না অদোমগীদমক্তা মসি দবল দিৱালী অমা ওইহল্লগনি। দিৱালী অসিদা, অদোম ইচিল-ইনাওশিং, অদোমদা য়াম্না চাউবা খুদোল অমা পীরগনি। হৌখিবা চহি ৮ অসিদা ঐখোয়না জি.এস.তি.গী অচৌবা রিফোর্ম অমা পাংথোকখ্রে, লৈবাক শীনবা থুংনা তেক্সকী পোৎলুম হন্থহনখ্রে, তেক্সকী থৌওংবু লায়থোকহনখ্রে অমসুং চহি ৮গী মতুংদা, মতম অসিগী তঙাই ফদবা অসি ঐখোয়না অমুক হন্না য়েংশিনবা তাই। ঐখোয়না অৱাংবা থাক্কী কমিতী অমা শেমদুনা রিভিয়ু অসি হৌদোকখি অমসুং রাজ্যশিংগা লোয়ননা খন্ন-নৈনখি।

ঐগী নুংশিরবা ইরৈবাকচাশিং,

ঐখোয়না জি.এস.তি.গী অনৌবা জেনরেসন অমা পুরক্কদৌরি। মসি দিৱালী অসিদা অদোমগীদমক্তা খুদোল অমা ওইরগনি। মীচম প্রজাগী দরকার ওইবা তেক্স অসি য়াম্না হন্থরগনি, খুদোংচাবা কয়া হেনগৎলগনি। ঐখোয়গী এম.এস.এম.ই.শিং, ঐখোয়গী অপীকপা ওন্তপ্রিন্যুওরশিংনা চাউনা কান্নবা ফংগনি। নুমিৎ খুদিংগী পোৎলমশিং অসি য়াম্না মমল হোংলগনি অমসুং মসিনা শেন্মিৎলোনদা অনৌবা থৌনা অমা পীরগনি।

ঐগী নুংশিরবা ইরৈবাকচাশিং,

ঙসিদি লৈবাক অসি খ্বাইদগী চাউবা অহুমশুবা ইকোনোমী ওইবগী মায়কৈদা খোঙজেল য়াংনা চংশিল্লি। ঐখোয়না নকশিল্লি অমসুং ঐখোয়না মদু য়াম্না থুনা ফংলগনি অমসুং নুমীৎ অদু লাক্কনি মদুদা ঐহাক্না ময়ামদা লাল কিলাগী লানবনদগী পাউ অসি পাউদমজগনি। ঙসিদি মালেম পুম্নমক্না ভারতকী শেন্মিৎলোন অমসুং শেন্মিৎলোনগী ফিভমদা থাজবা থম্লি। অসিগুম্বা অৱাবা কয়া অসিগী মরক্তা, ভারতকী শেল-থুমগী দিসিপ্লিন, ভারতকী শেন-থুমগী ইনর্জী অসি, আশাগী মঙাল অমা ওইরি। শেন্মিৎলোন অসি অৱাবা কয়া মায়োক্নরিঙৈদা, মালেম অসিদা ভারত খক্তনা মসিগী অৱাবা অসিদগী ঙাকথোকপা ঙমগনি হায়বা থাজবা অসি হেনগৎলক্লি। ঙসিদি শেঞ্জা-থুমজা লাকশিনবা ঙম্লে, ঐখোয়গী ফোরেক্স রিজর্বশিং অসি য়াম্না মপাঙ্গল কনখৎলে, ঐখোয়গী মেক্রোইকোনোমিক ইন্দিকেতরশিং অসি য়াম্না মপাঙ্গল কনখৎলে, মালেমগী রেতিং এজেন্সীশিংনা ভারতকী শেন্মিৎলোনদা থাজবা হেনগৎহন্দুনা ভারতপু লেপ্পা লৈতনা থাগৎলি। চাউখৎলক্লিবা শেন্মিৎলোন অসিগী কান্নবা অসি ঐহাক্কী লৈবাক্কী লায়রবশিং, ঐহাক্কী লৈবাক্কী লৌমীশিং, ঐহাক্কী লৈবাক্কী নুপীশিংগী শক্তি, ঐহাক্কী লৈবাক্কী মিদল ক্লাসতা য়ৌহন্নবা অমসুং মসিনা ঐহাক্কী লৈবাক্কী চাউখৎপগী মপাঙ্গল ওইহন্নবা ঐখোয়না মাইকৈ অসিদা অনৌবা থৌনা হাপ্লি।

ঙসি ঐখোয়গী নহারোলশিংগীদমক অনৌবা সেক্তরশিংদা খুদোংচাবা কয়া শেমগৎলি। স্কিল দিবেলপমেন্ত, সেল্ফ এমপ্লোয়মেন্ত, অচৌবা কম্পনীশিংদা ইন্তর্নশিপ অমসুং লৈবাক অসিগী নহারোলশিংগীদমক অচৌবা কেম্পেন অমা চত্থরি। ঙসি ঐহাক্না অদোমগীদমক্তা, ঐহাক্কী লৈবাক্কী নহাশিংগীদমক্তা য়াইফ-পাউজেল অমা পীজরি। ঙসি ওগস্তকী ১৫নি। ঙসি, ওগস্ত ১৫দা, ঐখোয়না লৈবাক অসিগী নহারোলশিংগীদমক লুপা করোর লাখ ১গী স্কিম অমা হৌদোক্লি অমসুং পায়খৎলি। প্রধান মন্ত্রী বিক্সিত ভারত রোজগার য়োজনা ঙসি ওগস্ত ১৫দা ইমপ্লিমেন্ত তৌরি। মসি অদোমগীদমক য়াম্না নুংঙাইবা পাউ অমনি। স্কিম অসিগী মখাদা সরকারনা নহারোলশিংদা, প্রাইবেৎ সেক্তরদা থবক ফংলবা মচানুপা নত্ত্রগা মচানুপী খুদিংদা লুপা ১৫,০০০ পীগনি। অনৌবা থবক পীবগী খুদোংচাবা হেন্না পীরিবা কম্পনীশিংদা ইন্সেন্তিবশিংসু পীরগনি। প্রধান মন্ত্রী বিকাস ভারত রোজগার য়োজনানা চাউরাক্না নহারোল কোতি ৩.৫গীদমক অনৌবা থবক ফংহল্লগনি। মসিগীদমক ঐনা নহাশিং পুম্নমক্তা নুংঙাইবা ফোংদোকচরি।

ঐগী নুংশিরবা ইরৈবাকচাশিং,

ঙসি ভারতকী নুপীশিংগী শক্তিবু মীপুম খুদিংমক্না খঙবা হৌরে। ঐখোয়গী নুপীশিং অসি চাউখৎলক্লিবা শেন্মিৎলোন অসিগী কান্নবা ফংলবশিংনি, অদুবু ঐখোয়গী নুপীশিংনা চাউখৎলক্লিবা শেন্মিৎলোন অসিবু খুমাং চাউশিলহনবদা য়াম্না চাউনা মতেং পাংলি, ঐখোয়গী মমা ওইবগী শক্তিনা মতেং পাংলি, ঐখোয়গী নুপীগী শক্তিনা মতেং পাংলি। ঐখোয়গী ইচানুপীশিংনা স্তার্ত-অপশিংদগী হৌরগা স্পেস সেক্তর ফাওবদা লমজিংলি। মখোয়না শান্ন-খোৎনবগী লমদা মকোক থোংলি, লান্মীদা মঙাল ফংলি, ঙসিদি মখোয়না লৈবাক অসিগী চাউখৎপগী খোঙচৎতা শিংথানীংঙাই ওইনা শরুক য়াদুনা নাকল অমগা নাকল অমগগী মরক্তা লেপ্লি। এন.দি.এ.গী অহানবা নুপী কেন্দিদেৎশিংনা মীরেপ ওইবদা লৈবাক অসি চাউথোকচবা পোকখি। লৈবাক শীনবা থুংনা চাউথোকচবা পোকখি, তি.ভি. চেনেল পুম্নমক্না মহাক্কা উনখি। মসি য়াম্না চাউথোকচনীংঙাই ওইবা তাঞ্জা অমনি। সেল্ফ হেল্প গ্রুপ, সেল্ফ হেল্প গ্রুপ করোর ১০গী ইচানুপীশিংনা, অসিগুম্বা অঙকপা থবক কয়া পাংথোক্লি। নমো দ্রোন দিদি নারী শক্তি অসি অনৌবা মশক অমা ওইখি। খুঙ্গংদা ঐহাক্না ইচানুপী অমা থেংনখি, মহাক্না হায়খি মদুদি খুঙ্গংগী মীওইশিংনা মহাকপু পাইলোৎ হায়না কৌনৈ। মহাক্না চাউথোকচবা পোক্নদুনা হায়খি মদুদি মহাক লাইরিক য়াম্না তম্বা নত্তে অদুবু মহাক্না থাক অদু ফংবা ঙমখ্রে।

মরুপশিং,

ঐখোয়না নুপী কোতি অহুম লাখপতি দিদী ওইহন্নবা ৱাশক লৌখি অমসুং ঐখোয়না খোঙজেল য়াংনা থবক তৌরি হায়বসিদা ঐহাক্না নুংঙাইবা ফাওই। ঐখোয়না মতম চানা লুপা করোর অহুমগী পান্দম অদু ফংলগনি অমসুং ঙসি ঐহাক্না লৈবাক অসিদা য়াম্না নুংঙাইবা ফাওদুনা হায়জনীংই, ঐহাক্কী নারী শক্তিগী শক্তি অদু য়েংবীয়ু, মতম খরগী মনুংদা নুপী করোর অনি লাখপতি দিদি ওইখ্রে। ঙসি ঐখোয়গী মমাংদা লাখপতি দিদি খরা ফম্মি। মসি ঐহাক্কী শক্তিনি, অমসুং ঐহাক্না থাজৈ মদুদি মরুপশিং, মসিনা ভারতকী চাউখৎপগী খোঙচৎতা মখোয়গী শরুক য়াবা হেনগৎহল্লগনি।

ঐগী নুংশিরবা ইরৈবাকচাশিং,

ঐগী লৈবাক অসিগী লৌমীশিংনা ভারতকী শেন্মিৎলোনদা অচৌবা থৌদাং লৌরি। ভারতকী লৌমীশিংগী কন্না হোৎনবগী মহৈ ফংলি। হৌখিবা চহিদা ঐহাক্কী লৈবাক অসিগী লৌমীশিংনা হৱাই-চেংৱাই পুথোকপদা মমাংগী রেকোর্দ পুম্নমক থুগাইখি। মসি ঐহাক্কী লৈবাক অসিগী ওইথোকপা য়াবা অমনি। লম অসি মান্নরি, অদুবু সিস্তেম অসি হোংখ্রে, ঈশিং য়ৌরকপা হৌরে, অফবা মহৈ-মরোংশিং ফংলকপা হৌরে, লৌমীশিংনা হেন্না ফবা খুদোংচাবশিং ফংলকপা হৌরে, মরম অদুনা লৈবাক অসিগীদমক মখোয়গী শক্তি হেনগৎলক্লি। ঙসিদি ভারত অসি শঙ্গোম, হৱাই অমসুং জুত পুথোকপদা মালেমদা মকোক ওইরে। ঙসিদি ঐখোয়না মালেমগী অনিশুবা খ্বাইদগী চাউবা ঙা পুথোকপা লৈবাক ওইরে। ঐগী ঙামীগী ইচিল-ইনাওশিংগী শক্তি অদু য়েংবিয়ু। ঐখোয়না ঙা পুথোকপদা মালেমগী অনিশুবা মফমদা লৈরে। ঙসি ভারতনা চেং, গেহু, মহৈ-মরোং অমসুং মনা-মশিং পুথোকপদা মালেমদা অনিশুবা মফমদা লৈরে।

মরুপশিং,

লৈবাক অসিগী লৌমীশিংগী পোত্থোকশিং ঙসি মালেমগী কৈথেলশিংদা য়ৌরক্লিবা অসিদা অদোম নুংঙাইবা ফাওগনি। লুপা করোর লাখ ৪গী এগ্রো প্রদক্তশিং এক্সপোর্ত তৌখ্রে। ঐগী লৈবাক্কী লৌমীশিংনা মখোয়গী শক্তি অদু ঐখোয়দা উৎখ্রে। মখোয় অসি অপীকপা লৌমী ওইগেরা, শা-ষন য়োকপা মীওই ওইগেরা, ঙামী ওইগেরা, ঐখোয়না মখোয়দা লৈবাক অসিগী চাউখৎ-থৌরাংগী স্কিমশিংগী কান্নবা ফংহল্লি। পি.এম. কিসান সম্মান নিধি, নোংগী ঈশিং য়োকশিনবা, ইরিগেসন স্কিমশিং, ক্বালিতী লৈয়া মরু, মহৈ-মরোং থাবগী মথৌ তাবশিং, সেক্তর খুদিংমক্তা ঙসি লৌমীশিংনা মহৈ-মরোংগী ইন্সুরেন্সতা থাজবা থম্লে। মহাক্না থৌনা হাপ্লি, লৈবাক অসিনা মসিগী মহৈসু ফংলি। মমাংদদি মসি ৱাখলদা খঞ্জবা আশা অমা ওইরম্মি, ঙসিদি মসি তশেং-তশেংনা ওইরক্লি।

ইরৈবাকচাশিং,

ঐখোয়গী লৈবাক অসিগী শা-ষনশিংবু কন্নবগীদমক, ঐখোয়না নিংশিংলি মদুদি ঐখোয়না কোবিদ ভেক্সিন অমা লেম্না ফংখি, অদুবু হৌজিক ফাওবদা শা-ষনশিংদা দোজ ১২৫ লেম্না কাপখ্রে। অৱাং ভারতকী মফম অসিদা খুরপাকা হায়না খঙনবা ফুৎ এন্দ মাউথ দিজিজদগী কোকহন্নবা ঐখোয়না দোজ করোর ১২৫ পীরি অমসুং মসিসু লেম্না পীরি। লৌউ-শিংউগী লমদা, লৈবাক অসিগী জিলাশিং অসিদা মরম অমা নৎত্রগা অমগী মরম্না লৌমীশিংনা অতোপ্পশিংদগী শোত্থনা লৈরম্মি, অসিগুম্বা জিলা ১০০দি লৌউ-শিংউগী লমদা য়াম্না নেম্না লৈরি। মরম অদুনা ঐখোয়না লৈবাক অসিগী জিলা ১০০ মশক খঙদোক্লে অমসুং মফম অদুদা লৈরিবা লৌমীশিংবু মপাঙ্গল কনখৎহন্নবা, লৌমীশিংবু মতেং পাংনবা কেম্পেন অমা হৌদোক্লে। মসিগীদমক ঐখোয়না পি.এম. ধন-ধান্য কৃষি য়োজনা হৌদোক্লে। পি.এম. ধন-ধান্য কৃষি য়োজনা অসিনা লৈবাক অসিগী জিলা ১০০ অসিদা মতেং খরা পীরগনি। মদুদগী মফম অদুগী লৌমীশিংনা ভারতকী অতোপ্পা লৌমীশিংগা চাংদম্ননবা ঙমগনি।

ঐগী নুংশিরবা ইরৈবাকচাশিং,

ভারতকী লৌমীশিং, ভারতকী শা-ষন য়োক্লিবশিং, ভারতকী ঙামীশিং, মখোয়শিং অসি ঐখোয়গী খ্বাইদগী চাউবা মরুওইবশিংনি। মোদীনা ভারতকী লৌমীশিং, ভারতকী ঙামীশিং অমসুং ভারতকী শা-ষন য়োক্লিবশিংগা মরী লৈনবা খুদোংথীবা পীরকপা পোলিসী অমা হেক্তগী মায়োক্তা ফক্লাংগুম্না লেপ্লি। ভারতনা মখোয়গী লৌমীশিং, মখোয়গী শা-ষন য়োক্লিবশিং, মখোয়গী ঙামীশিংগা মরী লৈনবা করিগুম্বা কমপ্রোমাইজ তৌনবা কনাগুম্বা অমত্তদা অয়াবা পীররোই।

নুংশিরবা ইরৈবাকচাশিং,

লাইরিকশিংদগী ঐনা লায়রবা হায়বসি করিনো হায়বদু তমখিবা  নত্তে। ঐহাক্না মসি খঙই, ঐহাকসু সরকারদা লৈরম্মি অমসুং মরম অদুনা সরকার অসি ফাইলদা য়ুম্ফম ওইদুনা লৈহন্দনবা ঐহাক্না হোৎনখি। সরকার অসি লৈবাক অসিগী নাগরিকশিংগী পুন্সিগা শাগোন্নদুনা লৈগদবনি।

মখোয় অসি দলিত ওইরবসু, শোত্থবা ওইরবসু, তুহৎপিরবা ওইরবসু, লৈঙাক্না মখোয়গীদমক প্রো-এক্তিব ওইগদবনি, লৈঙাক্না প্রো-পিপল ওইগদবনি। ঐখোয়না মসিগী মাইকৈ অসিদা লেপ্পা লৈতনা হোৎনরি। খুন্নাইগী মথৌ তাবা মীওই খুদিংগীদমক, মীওই খরনা সরকারগী স্কিমশিং অসি মমাংদা লৈরম্মি হায়না খল্লি । ঐখোয়না সেচ্যুরেসনদা মরুওইবা পীরি, মরমদি করিগুম্বা সোসিএল জস্তিসকী অশেংবা থবক অমা পাংথোকপা তারবদি, মসি সেচ্যুরেসনদা ওইগনি মদুদা ইলিজিবল ওইবা মীওই অমত্তা চিথবা তৌরোইদবনি, মদুদা সরকারনা ইলিজিবল ওইবা মীওই অদুগী য়ুমদা চৎলি, অমসুং মখোয়না হকথেংননা কান্নবা অদু ফংহনগনি। ঐখোয়না মদুগী মায়কৈদা থবক তৌরি।

জন ধন একাউন্তশিং হাংদোকপা মতমদা, মসি বেঙ্ক একাউন্ত হাংদোকপা খক্তা নত্তে। মসিনা মীয়ামদা মশাগী ইকাই খুম্নবা, বেঙ্ককী থোঙশিং ঐগীদমকসু হাংদোক্লে, ঐহাকসু বেঙ্ক অদুদা চঙবা, তেবলদা ঐগী খুৎ থম্বা অমসুং ৱারী শানবা ঙম্বগী ৱাখল্লোন অদু ফংহল্লি। অসিগুম্বা থাজবা অসি ঐখোয়না পোকহল্লি। আয়ুশ্মান ভারতনা মীয়াম্বু তুমিন্না অনাবা খাংজিনবগী হৈনবী কোকহনবা, মখোয়বু অফবা হকশেলগী সেবা ফংহনবদা মতেং পাংখি। ঐখোয়না চহি য়াম্লবা নাগরিকশিংগী হকশেলগীদমক লুপা ৫০০,০০০ হেন্না মতেং পাংলিবা মতমদা, মসিনা মখোয়গী য়াইফ-থৌরাংগীদমক ঐখোয়না মীৎয়েং চংলিবা অদু উৎলি। ঙসি, পি.এম. আৱাসকা লোয়ননা, লায়রবা মীওই করোর ৪না য়ুম ফংখ্রে। মসিনা হায়রিবদি মখোয়গী পুন্সিদা অনৌবা মঙলানশিং হৌরক্লি। মরুপশিং, মখোয় অসি ফক্লাং মরি খক্তা নত্তে। লম্বীদা পোৎচৈ য়োল্লিবশিংগীদমক্তা, পি.এম. স্বানিধি স্কিম লৈরি। মতম অমদা শেন্দোই চাউনা পীবগী অৱাবা অসিদা পন্দুনা লৈরম্বা মীওইশিংগীদমক্তা, স্কিম অসিনা হৌজিক্তি মখোয়বু ললোন-ইতিক তৌবা য়াহল্লগনি। ঙসিদি লম্বীদা পোৎচৈ য়োল্লিবশিংসু য়ু.পি.আই.গী খুত্থাংদা শেল লৌবা অমসুং শেল থাবা উবা ফংলে। অহোংবা অসিনা তাক্লি মদুদি লৈঙাক্না খুন্নাইগী অরোইবা মীওই ফাওবগী পুন্সিগা শাগোন্নগদবনি। মসিনা মরম ওইদুনা হায়রিবা গ্রাসরুৎ স্কিমশিং অসি দিজাইন তৌই, ইমপ্লিমেন্ত তৌই, অমসুং মখোয় অসি তুং কোইনা চৎপা মতমদা, মখোয় অসি মীয়ামগী পুন্সিদা অহোংবা পুরক্নবা শক্তি লৈবা মেদিয়ম অমা ওইরকই। মতম অমদা লায়রবশিং, অৱাবা তারবশিং, ত্রাইবেল কম্ম্যুনিতীশিং, শোত্থরবা মীওইশিং, হকচাং শোকপা মীওইশিং, অমসুং ঐখোয়গী মপুরোইবা লৈখিদ্রবী ইমাশিং অমসুং ইচিল-ইনাওশিংনা মখোয়গী হকশিংগীদমক মফম অমদগী মফম অমদা চৎথোক-চৎশিন তৌদুনা, মখোয়গী পুন্সি চুপ্পা সরকারগী ওফিস অমদগী অমদা চৎথোক-চৎশিন তৌদুনা লৈরম্মি। ঙসিদি, সরকারনা নহাক্কী য়ুমদা সেচুরেসন এপ্রোচ অমগা লোয়ননা লাক্লি। কান্নবা ফংলবা মীওই করোর কয়া সরকারগী স্কিমশিংগী কান্নবা ফংলি, অমসুং দাইরেক্ত বেনিফিৎ ত্রান্সফর অসি তশেংনা রিভোলুস্নরী ওইবা খোংথাং অমনি।

মরুপশিং,

লৈবাক অসিনা লাল কিলাদগী ফাওবা 'গারিবি হাতাও' (লায়রবা মুত্থৎপা) হায়বা স্লোগান অসি কয়ারক তাদুনা লাক্লি। লায়রবশিং অসি মুত্থৎপা ঙম্লোই হায়না মীয়াম্না য়াখি। অদুবু ঐখোয়না স্কিমশিং অসি লায়রবশিংগী ময়ুম য়ৌহনবগা লোয়ননা মখোয়গী থম্মোয়দা থাজবা পোকহনবগা লোয়ননা ঐগী লৈবাক অসিগী লায়রব কোতি ২৫না লায়রবা অসি মাইথিবা পীবা ঙমখি, লায়রবা অসিদগী থোরকপা ঙমখি অমসুং অনৌবা পুৱারী অমা শেখি। ঙসিদি, হৌখিবা চহি ১০দা লায়রবা মীওই কোতি ২৫ হেনবনা লায়রবা অসিদগী থোরকপা ঙমখ্রে অমসুং অনৌবা নিও মিদ্দল ক্লাস অমা শেমখ্রে।

ঐগী মরুপশিং,

নিও মিদ্দল ক্লাস অমসুং হৌজিক লৈরিবা মিদ্দল ক্লাস অসিনা এস্পিরেসন অমসুং ইন্সতিত্যুসন অনিমক্তা মরী অমা শেম্মি, অমসুং মসিনা লৈবাক অসিবু মাংলোমদা পুখৎপদা অচৌবা পাঙ্গল অমা ওইরগনি।

ঐগী নুংশিরবা ইরৈবাকচাশিং,

তুংদা লাক্কদৌরিবা মতম অসিদা, ঐখোয়না শক্নাইরবা সোসিএল রিফোর্মর মহাত্মা জ্যোতিবা ফুলেগী ২০০শুবা মপোক কুমওন পাংথোক্লগনি। ঐখোয়না চহি চুপ্পগী ওইবা থৌরমশিং অসি হৌরগনি। মহাত্মা জ্যোতিবা ফুলেগী প্রিন্সিপলশিং অমসুং মহাক্না ঐখোয়দা পীখিবা মন্ত্রশিং অসিনা ঐখোয়দা ইথিল পীরি । শোত্থরবা মীওইদা মরুওইবা পীদুনা, ঐখোয়না অহোংবা পুরকপগী অৱাংবা থাক্তা য়ৌনবা পাম্মি। মসিগীদমক্তা ঐখোয়না ঐখোয়গী খ্বাইদগী অফবা খোংথাংশিং অদু লৌখৎপা পাম্মি। ত্রান্সপরেন্ত পোলিসীশিংগী খুত্থাংদা, ঐখোয়না "শোত্থরবা মীওইশিংদা মরুওইনা পীবা" অসি লমদম অসিদা তশেং তশেংনা ওইহন্নবা পাম্মি, মসিনা শোত্থরবা মীওই খুদিংগী পুন্সিদা মঙাল পীবা পাম্মি।

মরুপশিং,

লম্বীদা পোৎ য়োল্লিবশিংগীদমক পি.এম. স্বানিধি স্কিম ওইগেরা, ঐখোয়গী হৈশিংবা আর্তিসানশিংগীদমক বিশ্বকর্মা স্কিম ওইগেরা, ত্রাইবেল কম্ম্যুনিতীশিংগী মরক্তসু খুদোংচাদবা মায়োক্নরিবা মীওইশিংগীদমক পি.এম. জনমান স্কিম ওইগেরা, নৎত্রগা নোংপোক থংবা ভারতপু চাউখৎপগী লমদা লৈবাক অসিগী অতৈ শরুকশিংগা মান্নহন্নবা অমসুং লুচিংবগী খুদোংচাবা পীনবা ঐখোয়না হোৎনরিবশিং ওইগেরা, ঐখোয়না খুন্নাইগী ওইনা শোত্থরবা কাঙলুপশিং মীৎয়েং চংবা, ঐখোয়না শোত্থরবা লমদমশিংদসু মরুওইবা পীবা পাম্মি। ঐখোয়না শোত্থরবা দিস্ত্রিক্তশিংবু মরুওইনা লৌবা পাম্মি। ঐখোয়না শোত্থহৌরবা ব্লোকশিং অসিবুসু মরুওইবা পীবা পাম্মি। ঐখোয়না এস্পিরেস্নেল দিস্ত্রিক্ত ১০০ অমসুং এস্পিরেস্নেল ব্লোক ৫০০গীদমক চপ মান্নবা মিসনগা লোয়ননা থবক তৌরি। ঐখোয়না নোংপোক থংবা ভারতকী চাউখৎ-থৌরাংগীদমক লুপা করোর লিশিং কয়াগী ইনফ্রাস্ত্রকচর প্রোজেক্তশিংদা মীৎয়েং থম্লি। মসিগী পান্দমদি মফম অদুদা পুন্সি মহিং ফগৎহনবা অমসুং লমদম অসিবু লৈবাক অসিগী চাউখৎ-থৌরাংগী খোঙচৎতা এক্তিব পার্তিসিপেন্ত অমা ওইহনবনি।

ঐগী নুংশিরবা ইরৈবাকচাশিং,

পুন্সিগী লম খুদিংমক্তা চাউখৎপা অমা লৈগদবনি। শান্ন-খোৎনবনা চাউখৎপদা মরু ওইবা থৌদাং অমা লৌই। মমা-মপাশিংনা অঙাংশিংবু শান্নবদা মতম কাইথোকপদা শাওবা মতম অমা লৈরম্মি; ঙসিদি, ফীভম অসি মপুং ফানা হোংখ্রে। করিগুম্বা অঙাংশিংনা শান্ন-খোৎনবদা থৱায় য়াওরবদি, মখোয়দা থৱায় য়াওরবদি, মমা-মপাশিংনা চাউথোকচবা পোকই। মসি ঐহাক্না অফবা খুদম অমনি হায়না লৌই। ঐগী লৈবাক্কী ইমুংশিংগী মরক্তা শান্ন-খোৎনবদা পুক্নিং থৌগৎপগী ফিভম অমা উবদা ঐগী থম্মোয়দা চাউথোকচৈ। ঐহাক্না মসি লৈবাক অসিগী তুংলমচৎকীদমক্তা খ্বাইদগী অফবা খুদম অমনি হায়না লৌই।

অমসুং মরুপশিং,

স্পোর্তসপু চাউখৎহন্নবা ঐখোয়না নেস্নেল স্পোর্তস পোলিসী পুথোক্লে। চহি তরাগী খুজিং কয়াগী মতুংদা, ঐখোয়না 'খেলো ইন্দিয়া পোলিসী' অসি লৈবাক অসিদা হৌদোক্লে। মসিনা স্পোর্তস সেক্তর চাউখৎহন্নবা খোংথাং অমা ওইহল্লগনি। স্কুলদগী হৌরগা ওলিম্পিক্স ফাওবদা, ঐখোয়না কোচিংদা, ফিৎনেসকী মতাংদা, স্পোর্তসকী লমদা, স্পোর্তসকীদমক ফেসিলিতীশিংদা, শান্ন-খোৎনবগীদমক দরকার ওইবা খুৎলায়শিং পীবদা, নৎত্রগা অপীকপা ইন্দস্ত্রীশিংদা স্পোর্তসকী পোত্থোকশিং পুথোকপদা মতেং পাংবদা অপুনবা ইকোসিস্তেম অমা শেমগৎপা পাম্মি। অতোপ্পা ৱাহৈ অমদা হায়রবদা, ঐখোয়না মসিগী ইকোসিস্তেম অসি খ্বাইদগী অরাপ্পা মফমশিংদা লৈবা অঙাংশিংদা য়ৌহন্নবা হোৎনরি।

অদুবু মরুপশিং,

ফিৎনেসকী মতাংদা ঐহাক্না হায়নীংবদি, শান্ন-খোৎনবগী মতাংদা ঐহাক্না হায়নীংবদি, ঐহাক্না ময়ামদা অরুবা ৱাফম অমা থমজগে। ঐখোয়গী লৈবাক অসিদা লৈরিবা ইমুং মনুং খুদিংমক্না মসি মরুওইনা লৌগদবনি। ওবেসিতী অসি ঐখোয়গী লৈবাক অসিগী ওইনা য়াম্না শাথীবা ক্রাইসিস অমা ওইরক্লি। এক্সপর্তশিংনা হায়রি মদুদি লাক্কদৌরিবা চহিশিংদা, মীওই অহুমগী মনুংদা অমা লায়না অসিনা নারক্কনি। ঐখোয়না ঐখোয় ইশাবু লায়না অসিদগী ঙাকথোক্কদবনি। অমসুং মরম অসিনা, খোংথাং কয়া অমা লৌখৎপা মথৌ তারবসু, ইমুং খুদিংমক্না য়ুমদা অচাবা থাও মসি মহৌশানা শিজিন্নবা অদুদগী ১০% হন্থগদবনি অমসুং মদুগী শিজিন্নবগী চাংসু ১০% হন্থগদবনি হায়না ঐহাক্না ৱাফম অমা থমজখি। অসুম্না তৌরগা, ঐখোয়না ওবেসিতীগী মায়োক্তা লান্থেংনবদা মাইপাকপদা ঐখোয়না শরুক তমগনি।

ঐগী নুংশিরবা ইরৈবাকচাশিং,

ঐখোয়গী লৈবাক অসি য়াম্না লাইবক ফৈ। ঐখোয়না চহি লিশিং কয়াগী মমাংদগী লৈরক্লবা হেরিতেজ অমগী ইথিল ফংলি। মসিদগী ঐখোয়না লেপ্পা লৈতনা ইনর্জী, ইন্সপিরেশন অমসুং কত্থোকপা অমসুং তপস্যাগী লম্বী অমা ফংলি। চহি অসিদা গুরু তেগ বাহাদুরজীগী থৱায়না পোন্থা পীখিবগী ৩৫০শুবা মপোক কুমওন পাংথোক্লি। মহাক্না ঐখোয়গী চৎনবী অমসুং মগুনশিং ঙাক শেন্নবা পুম্নমকপু কত্থোকখি। ঙসি, ঐহাক্না মহাকপু ইকায় খুম্নবা উৎচরি।

মরুপশিং,

ঐখোয়গী কলচরগী মপাঙ্গল অসি ঐখোয়গী দাইভর্সিতীদা লৈ। ঐখোয়না মখল-মখা কয়াগী থৌরম পাংথোকপা পাম্মি, মখল-মখা কয়াগী থৌরম পাংথোকপগী মহৌশাদগী চৎনবী অমা শেমগৎপা পাম্মি। ভারত ইমা অসি অৱাংবা থাক্কী লৈকোলগুম্না মখল কয়াগী লৈকোলশিংনা মরাং কায়না লৈরি, মখল খুদিংমক্না মসিগী অঙকপা মখল কয়াগী মগুন হেনগৎহল্লি হায়বসি ঐখোয়গী চাউথোকচবনি। মসিগী মখল-মখা কয়া অসি ঐখোয়গী চাউরবা হেরিতেজ অমসুং ঐখোয়গী চাউথোকচনীংঙাই ওই। ঐখোয়না প্রয়াগরাজকী 'মহা কুম্ভ'তা ভারতকী দাইভর্সিতী অসি করম্না হিংলি হায়বদু উখি। মীওই কোতি কয়া অমা, ইমোসন অমা, স্পিরিৎ অমা, থৌনা অমা অমত্তা ওইনা পুনশিনখি। 'মহা কুম্ভ'গী মাইপাকপা অসি ভারতকী অপুনবা অমসুং শক্তিগী ময়েক লারবা খুদম অমনি।

মরুপশিং,

ঐখোয়গী লৈবাক অসি লোলগী ওইবা মখল-মখা কয়া মরাং কায়না লৈ। মরম অসিনা ঐখোয়না মরাথী, অসামীজ, বঙ্গলা, পালী অমসুং প্রাকৃতপু ক্লাসিকেল লোলগী থাক পীরি। ঐহাক্কী ৱাখল্লোনগী মতুং ইন্না, ঐখোয়গী লোলশিং অসি হেন্না চাউখৎলকপা, হেন্না মরাং কায়না লৈরকপা, ঐখোয়গী লৌশিংগী পথাপ অসি হেন্না মপাঙ্গল কনখৎলকপা মসিনা ঐখোয়গী পাঙ্গলনি। অমসুং ঙসিগী দেতাগী মতম অসিদা, মসি মালেমগীদমকসু অচৌবা পাঙ্গল অমা ওইরকপা য়াই, মরমদি মসি ঐখোয়গী লোলশিংগী পাঙ্গলনি। ঐখোয়না ঐখোয়গী লোল খুদিংমক্কীদমক চাউথোকচগদবনি, অমসুং মীপুম খুদিংমক্না মখোয়গী চাউখৎপদা শরুক য়াগদবনি।

মরুপশিং,

ঐখোয়গী মেনুস্ক্রিপ্তশিংদা লৌশিংগী অচৌবা পুকৈ য়াওই, অদুম ওইনমক মখোয়শিং অসিদা মান্নদবা মীৎয়েং অমনা য়েংলি। জ্ঞান ভারতম মিসনগী মখাদা ঐখোয়না হৌজিক লৈবাক শীনবা থুংনা খুৎনা ইবা লাইরিকশিং, মেনুস্ক্রিপ্তশিং অমসুং চহি চা কয়াগী মমাংগী দোক্যুমেন্তশিং থিদোক্নবা অমসুং তুংগী চারোন-শুরোনগীদমক মখোয়গী লৌশিংগী লন অসি ঙাক-শেন্নবা ঙসিগী তেক্নোলোজী শিজিন্ননবা থবক পায়খৎলি।

ঐগী নুংশিরবা ইরৈবাকচাশিং,

ঐখোয়গী ময়েক শেংবা থাজবদি লৈবাক অসি লৈঙাকশিংনা খক্তনা শেমদে। মসি রাজ্যগী শক্তি পায়রিবা মীওইশিংনা খক্তনা শেমদে। মসি লৈঙাক পায়রিবা মীওইশিংনা খক্তনা শেমদে। লৈবাক অসিবু মীওই করোর কয়াগী কন্না হোৎনদুনা শেমগৎলি। মুনি-ঋষি, সাইন্তিস্তশিং, ওজাশিং, লৌমীশিং, লান্মীশিং, শিন্মীশিং, মীপুম খুদিংমক্কী কন্না হোৎনবনা লৈবাক অসি শেমগৎপদা মতেং পাংলি। কন্ত্রিব্যুসনশিং অসি ইন্দিভিজুএলশিং অমসুং ইন্সতিত্যুসনশিংদগী লাকই। ঙসি, ঐহাক্না চাউথোকচবা পোকচরি মদুদি অসিগুম্বা ইন্সতিত্যুসন অমা ঐহাক্না পনজবা পাম্মি। চহি ১০০গী মমাংদা, রাস্ত্রিয় স্বয়মসেবক সংঘ লিংখৎখি। লৈবাক অসিগীদমক চহি ১০০গী সেবা অসি চাউথোকচনীংঙাই ওইবা অমসুং মগুন লৈরবা থৌরম অমনি। মগুন শেমগৎতুনা লৈবাক শেমগৎনবা ৱারেপ লৌদুনা, ইমা ভারতীগী সেবা তৌনবা পান্দমগা লোয়ননা, স্বয়মসেবকশিংনা চহি চা অমা মমা লৈবাক অসিগী য়াইফনবা মখোয়গী পুন্সি কত্থোকখি। সর্ভিস, দেদিকেতেসন, ওর্গনাইজেসন অমসুং অতৈগা মান্নদবা দিসিপ্লিন অসিনা মসিগী মগুনশিং ওইরি। ৱাখল্লোন অমদা, রাস্ত্রিয় স্বয়মসেবক সংঘ অসি মালেমগী খ্বাইদগী চাউবা এন.জি.ও.নি, মসিগী পুৱারী অসি চহি চা হেল্লে। ঙসি, লাল কিল্লাগী লানবনদগী, লৈবাক অসিগী চহি চাম্মা চুপ্না সর্ভিসকী খোঙচৎ অসিদা থৌদাং লৌখিবা স্বয়মসেবক পুম্নমকপু ঐনা ইকায় খুম্নবা উৎচরি। অমসুং জাতি অসিনা রাস্ত্রিয় স্বয়মসেবক সংঘকী চাউথোকচনীংঙাই ওইবা অমসুং পুক্নিং থৌগৎনীংঙাই ওইবা খোঙচৎ অসিগীদমক চাউথোকচরি।

ঐগী নুংশিরবা ইরৈবাকচাশিং,

ঐখোয়না চাউখৎপগী মায়কৈদা চংশিল্লি, অদুবু চাউখৎপগী লম্বী অসি সেক্যুরিতীগী খুত্থাংদা চংশিল্লি। হৌখিবা চহি ১১ অসিদা, ঐখোয়না নেস্নেল সেক্যুরিতী, লৈবাক ঙাকশেল অমসুং মসিগী নাগরিকশিংগী সেক্যুরিতীগীদমক মপুং ফানা থৱায় য়াওনা থবক তৌরি। ঐখোয়না অহোংবা পুরকপা ঙম্লে। লৈবাক অসিনা খঙই মদুদি ঐখোয়গী লৈবাক অসিগী অচৌবা ত্রাইবেলগী মফমশিং অসি দিকেদ কয়াগী মমাংদগী নাক্সালিজম অমসুং মাওইজমগী খুদোংথীবা কয়া মায়োক্নদুনা লাক্লি। খ্বাইদগী চাউবা অৱা-অনা অসি ঐগী ত্রাইবেলগী ইমুং-মনুংশিংনা মায়োক্নখি। ত্রাইবেলগী ইমাশিং অমসুং ইচিল-ইনাওশিংনা মখোয়গী মঙাল লৈবা, থাজবা পীবা মচাশিং মাংখি। চহি নৌরিবা অঙাংশিংবু অরানবা লম্বীদা পুরকখি, লান্না লমজিংখি, অমসুং মখোয়গী পুন্সি মাংখি। ঐখোয়না অচেৎপা অমসুং অফবা খোঙথাং অমা লৌখৎখি। মতম অমদা, জিলা ১২৫ হেনবদা নক্সেলিজমগী ইথিল লৈরম্মি। ঐখোয়গী ত্রাইবেল এরিয়াশিং অমসুং নহাশিং অসি মাওইজমগী খুৎতা লৈখি। ঙসিদি, ঐখোয়না দিস্ত্রিক্ত ১২৫দগী ২০দা হন্থহল্লে। মসি ঐখোয়গী ত্রাইবেল কম্ম্যুনিতীশিংদা ঐখোয়না তৌখিবা খ্বাইদগী চাউবা সেবা অমনি। বস্তারগী মমিং অসি তাবদা মাওইস্ত অমসুং নক্সালিৎ বোমশিং অমসুং নোংমৈগী খুৎলাইশিংগী মখোল ওইনা তাবা মতম অমা লৈরম্মি। ঙসি, মাওইজম অমসুং নক্সেলিজমদগী নীংতম্লবা মতুংদা, বাস্তরগী নহারোলশিংনা ওলিম্পিক্সতা শরুক য়াখ্রে। নহারোল লিশিং কয়ানা 'ভারত মাতা কী জয়' হায়দুনা শান্ন-খোৎনবগী লমদা চংশিল্লি। লৈবাক অসিনা অহোংবা অসি উবা ফংলি। হান্ননা 'রেদ কোরিদোর' হায়না খঙনরম্বা লমদমশিং অসি হৌজিক গ্রীন দিবেলপমেন্তকী কোরিদোর ওইরক্লি। মসি ঐখোয়গী চাউথোকচনীংঙাই ওইবা ৱাফম অমনি। ভারতকী মেপকী মফমশিং অদুদা মতম অমদা ঈগী মচুনা চুদুনা লৈরম্মি, অদুগা হৌজিক্তি ঐখোয়না সংবিধান, আইনগী কাংলোন অমসুং চাউখৎপগী মচু অহুমগী ফিরালগী মচুনা থলহল্লি।

ঐগী নুংশিরবা ইরৈবাকচাশিং,

ঙসি অসি ভগবান বীরসা মুন্দাগী ১৫০শুবা মপোক কুমওননি। ত্রাইবেলগী মফমশিং অসিবু নক্সেলিজমদগী কোকহন্দুনা অমসুং ঐগী ত্রাইবেলগী ইমুংশিংগী নহাশিংগী পুন্সি কন্দুনা, ঐখোয়না মহাকপু অশেংবা ইকায়খুম্নবা উৎলি।

ঐগী নুংশিরবা ইরৈবাকচাশিং,

ঙসি, ঐহাক্না লৈবাক অসিবু অৱাবা অমসুং অচৌবা শিংনবশিংদগী চেকশিন্নবা হায়জরি। লৈবাক অসিগী দেমোগ্রাফী অসি হোংদোকহল্লক্লি। অনৌবা ক্রাইসিস অমগী মরুশিং অদু হুল্লি। হায়রিবা ইনফিলত্রতরশিংনা ঐখোয়গী নহারোলশিংগী হিংননবগী লম্বী লৌথোক্লি। মখোয়না ঐখোয়গী ইচে-ইচল অমসুং ইচানুপীশিংবু তার্গেৎ তৌরি। মসি থাজবা য়াবা নত্তে। হায়রিবা ইনফিলত্রেতরশিং অসিনা চমজরবা ত্রাইবেলশিংবু লান্না লমজিংদুনা মখোয়গী লম লৌশিল্লি। লৈবাক অসিনা মসিবু য়ানীংদ্রে। দেমোগ্রাফীগী অহোংবা লাকপা মতমদা, মরুওইনা ঙমখৈগী মফমশিংদা, মসিনা নেস্নেল সেক্যুরিতীগীদমক অৱাবা অমা থোকহল্লি। মসিনা লৈবাক অসিগী অপুনবা, নীংখা তম্বা অমসুং খুমাং চাউশিল্লকপদা খুদোংচাদবা থোকহল্লি। মসিনা খুন্নাইদা অৱাবা পীরি। লৈবাক অমত্তনা মশাবু ইনফিলত্রেতেশিংদা শীন্নবা পামদে। মালেমগী লৈবাক অমত্তনা মসি তৌদে। মতৌ করম্না ঐখোয়না ভারতপু মসি তৌহনগনি? ঐখোয়গী ইমা-ইপাশিংনা কত্থোকপগা লোয়ননা নীংতম্বা ফংখি। মখোয়না ঐখোয়দা নীংতম ভারত অমা পীখি। অসিগুম্বা থৌওংশিং অসি ঐখোয়গী লৈবাক্কী মনুংদা চত্থবা য়াহন্দবা অসি মীওইশিং অদুগী অমসুং ঐখোয়গী থৌদাং অমনি। মসিনা মখোয়দা উৎপা অশেংবা ইকায় খুম্নবা ওইগনি। মরম অদুনা, ঙসি লাল কিল্লাগী লানবনদগী ঐহাক্না হায়-পাৱর দেমোগ্রাফী মিসন অমা হৌদোক্নবা ঐখোয়না ৱারেপ লৌরে হায়না লাউথোকচরি। মিসন অসিগী খুত্থাংদা, ভারত্তা হৌজিক ওইরক্লিবা অচৌবা অৱাবা অসি খঙনা অমসুং মতম চানা থেংনগনি। ঐখোয়না মসিগী মাইকৈ অসিদা মাংলোমদা চংশিল্লি।

ঐগী নুংশিরবা ইরৈবাকচাশিং,

হয়েং অসি জনমাষ্টমীগী য়াইফরবা কুহ্মৈনি, মসি লৈবাক শীনবা থুংনা ভগৱান শ্রী কৃষ্ণগী মপোক কুমওন ওইনা পাংথোক্লি।

মরুপশিং,

ঐহাক্না ভগবান শ্রী কৃষ্ণবু নীংশিংলকপা মতমদা, ঙসিদি মালেম পুম্বদা লানগী পাম্বৈশিং অসি হোংলক্লি হায়বসি ঐখোয়না উবা ফংলি। ঐখোয়না উখ্রে মদুদি ভারতনা লানগী অনৌবা পাম্বৈ খুদিংমক শিজিন্নবা ঙম্মী। ঐখোয়না ওপরেসন সিন্দুরদা তেক্নোলোজীগী লমদা ঐখোয়গী হৈশিংবশিং উৎলি। পাকিস্তাননা ঐখোয়গী মিলিতরী বেজশিং, ঐখোয়গী এয়রবেজশিং, ঐখোয়গী সেনসিতেতিব ওইবা মফমশিং, ঐখোয়গী লাইনিং লাইশোনগী মফমশিং, ঐখোয়গী নাগরিকশিংদা মিসাইল অমসুং দ্রোনশিং মশিং থিঙমদনা লান্দারক্লি। লৈবাক অসিনা মসিবু উখ্রে, অদুবু লৈবাক অসিবু ঙাক-শেনবগীদমক হৌখিবা চহি ১০ অসিদা হোৎনখিবা অদুগী মহৈদি মখোয়গী লান্দারকপা খুদিংমক ঐখোয়গী থৌনা ফরবা লান্মীশিং অমসুং ঐখোয়গী তেক্নোলোজীনা চরুগুম্না তুমহনখি।  মখোয়না করিগুম্বা অশোয়বা অমত্তা থোকহনবা ঙম্লোই অমসুং মরম অদুনা, লানফম অসিদা তেক্নোলোজীনা পাকথোক চাউথোকপা মতমদা, তেক্নোলোজীনা মাংজিল থারিঙৈ মতমদা, লৈবাক অসিগী ঙাক-শেনবগীদমক, লৈবাক অসিগী নাগরিকশিংগী ঙাক-শেন্নবগীদমক, ঙসি ঐখোয়না ফংলিবা এক্সপর্তিস অসি ঐখোয়না মখা তানা পাকথোক চাউথোকহনগদবনি। ঙসি ঐখোয়না ফংলিবা মাস্তরী অসি লেপ্পা লৈতনা অপগ্রেদ তৌবগী মথৌ তাই। মরম অদুনা, মরুপশিং, ঐহাক্না ৱারেপ অমা লৌজরে। ঐহাক্না অদোমগী য়াইফ-মঙ্গোলশিং মথৌ তাই। ঐহাক্না লৈবাক অসিগী মীওই কোতি কয়াগী য়াইফ-মঙ্গোলশিং মথৌ তাই। মরমদি চাউখৎপা কয়া লৈরবসু, করিগুম্বা সেক্যুরিতীগী মায়কৈদা মীৎয়েং চংদ্রবদি, চাউখৎপা অসিসু কান্নবা লৈরোই অমসুং মরম অদুনা সেক্যুরিতীগী মরুওইবা অসি য়াম্না চাউই।

অমসুং মসিনা মরম ওইদুনা ঐহাক্না ঙসি লাল কিল্লাগী লানবনদগী হায়রি মদুদি লাক্কদৌরিবা চহি ১০দা, ২০৩৫ ফাওবদা, লৈবাক অসিগী মরুওইবা মফম পুম্নমক, মসিদা স্ত্রেতেজিক ওইবা অমসুং সিবিলিয়নগী মফমশিং, হায়বদি হোস্পিতালশিং, রেলৱেজশিং, লাইফম অমা হেক্তাবু অনৌবা তেক্নোলোজীগী প্লেতফোর্মশিংগী খুত্থাংদা মপুং ফানা সেক্যুরিতী কভর পীরগনি। মসিগী সেক্যুরিতী শিল্দ অসি মখা তানা পাকথোক চাউথোক্কদবনি, লৈবাক অসিগী নাগরিক খুদিংমক্না সেক্যুরিতী পাকথোক চাউথোকহনগদবনি, তেক্নোলোজীনা ঐখোয়দা লান্দারকপা মতমদা, ঐখোয়গী তেক্নোলোজী অসি মদুদগী হেন্না ফবা ওইগদবনি অমসুং মসিনা মরম ওইদুনা লাক্কদৌরিবা চহি ১০দা, ২০৩৫ ফাওবদা, ঐহাক্না মসিগী নেস্নেল সেক্যুরিতী শিল্দ অসি পাকথোক চাউথোকহন্নবা, মসিবু মপাঙ্গল কনখৎহন্নবা, মসিবু মোদর্নাইজ তৌবা পাম্মি অমসুং মরম অসিনা, শ্রী শ্রী কৃষ্ণগী ইন্সপিরেশন লৌদুনা, ঐখোয়না শ্রী কৃষ্ণগী সুদর্শন চক্রগী লম্বী অসি খল্লে। অদোমগী মরক্তগী কয়া অমনা নিংশিংবা য়াই মদুদি মহাভারতকী লান অসি চত্থরিঙৈ মতমদা শ্রী কৃষ্ণনা মহাক্কী সুদর্শন চক্রগা লোয়ননা নুমিৎকী মঙাল থিংখি অমসুং নুংথিলগী মতমবু নুমিদাং ওইহনখি। সুদর্শন চক্রনা নুমিৎকী মঙালবু থিংখি অমসুং অর্জুননা জয়দ্রথা হাৎনবা মহাক্কী অচেৎপা ৱারেপ অদু মপুং ফাহনখি। মসি সুদর্শন চক্রগী শক্তি অমসুং থৌরাংগী মহৈনি। হৌজিক লৈবাক অসিনা সুদর্শন চক্র মিসন হৌদোক্লগনি। মসিগী মিসন সুদর্শন চক্র, শক্তি লৈরবা খুৎলায়গী পথাপ অসিনা, য়েক্নবশিংগী লান্দাবশিংবু থিংবতা নত্তনা য়েক্নবশিংদা তমথিনা খুৎহনবা ঙম্লগনি।

ভারতকী সুদর্শন চক্র মিসন অসিগীদমক ঐখোয়না মরুওইবা ৱাফম খরসু লেপ্লে। লাক্কদৌরিবা চহি ১০ অসিদা ঐখোয়না মসিবু চাউনা মাংলোমদা চংশিনবা পাম্মি। অহানবদা, অনৌবা সিস্তেম পুম্নমক, মাগী রিসর্চ, দিবেলপমেন্ত, মাগী মেনুফেকচরিং অসি ঐখোয়গী লৈবাক অসিদা পাংথোক্কদবনি, মসি ঐখোয়গী লৈবাক অসিগী নহারোলশিংগী তেলেন্তগা লোয়ননা পাংথোক্কদবনি, মসি ঐখোয়গী লৈবাক অসিগী মীয়াম্না শেমগদবনি। অনিশুবদা, লানগী হীরমদা তুংগী ওইথোকপা য়াবশিং থিদোক্নবা অমসুং প্লস ৱানগী স্ত্রেতেজী শেম্নবা সিস্তেম অমা লৈগদবনি। অমসুং অহুমশুবদা, সুদর্শন চক্রগী শক্তি, মসি য়াম্না চুম্মি, মসি চৎকদবা মফমদা চৎলি অমসুং শ্রী কৃষ্ণদা হল্লকই। ঐখোয়না মসিগী সুদর্শন চক্রগী খুত্থাংদা পান্দম থমদুনা অচুম্বা থবক পায়খৎনবা পথাপ অমা শেমগৎপগী মায়কৈদা চংশিল্লগনি। মরম অদুনা, লৈবাক অসিগী ঙাকশেল অমসুং নাগরিকশিংগী ঙাকশেলগীদমক অহোংবা লাক্লিবা লানগী মওং অসিদা ঐহাক্না মসিগী থবক অসিবু অচেৎপা থৌনাগা লোয়ননা মাংলোমদা পুখৎনবা ৱাশক লৌজরি।

ঐগী নুংশিরবা ইরৈবাকচাশিং,

ঐখোয়না দেমোক্রেসী, নীংতম ভারতকী মতাংদা ৱারী শারবদি, ঐখোয়গী সংবিধান অসি ঐখোয়গী খ্বাইদগী ফবা লমজিং মৈরা ওইহনগদবনি, ঐখোয়গী ইথিলগী মফমনি, অদুবু চহি ৫০গী মমাংদা, ভারতকী সংবিধানদা লান্দাখি। ভারতকী সংবিধানবু নমথখি, লৈবাক অসি জেলদা ওন্থোকখি, ইমর্জেন্সী অমা থমখি, ইমর্জেন্সীগী ফিভম অমা লাকহনখি। ইমর্জেন্সী থমখিবা চহি ৫০ মপুং ফারক্লে, লৈবাক অসিগী মীরোল অমত্তনা সংবিধানবু হাৎপগী পাপ অসিবু কৈদৌঙৈদা কাউরোইদবনি। কনস্তিত্যুসনবু হাৎখিবা পাপীশিং অসি ঐখোয়না কাউথোক্লোইদবনি অমসুং ভারতকী কনস্তিত্যুসনগী মায়কৈদা ঐখোয়গী ইথিল অসি মপাঙ্গল কনখৎহন্দুনা ঐখোয়না মাংলোমদা চংশিনগদবনি, মসি ঐখোয়গী ইথিলনি।

ঐগী নুংশিরবা ইরৈবাকচাশিং,

ঐহাক্না হায়রিবা লাল কিলা অসিদগী পঞ্চ প্রানগী মরমদা ঙাংখি। ঙসি, ঐহাক্না লাল কিলাদগী ঐহাক্কী ইরৈবাকচাশিংদা অমুক্কা হন্না নিংশিংহনবা পাম্মি। চাউখৎলবা ভারত অমা শেমগৎনবা, ঐখোয়না লেপকদবনি, ঐখোয়না কন্না হোৎনগনি অমসুং ২০৪৭দা ঐখোয়গী মীৎ মমাংদা চাউখৎলবা ভারত অমা শেমগৎকনি।

ঐগী নুংশিরবা ইরৈবাকচাশিং,

ঐখোয়গী অনীশুবা ৱাশক অসিদি ঐখোয়গী পুন্সিদা, ঐখোয়গী সিস্তেমশিংদা, ঐখোয়গী কাংলোনশিং, আইনশিং অমসুং চৎনবীশিংদা মীখা পোনবগী পোৎলম অমা ফাওবা য়াওহনবা অসি ঐখোয়না য়াহল্লোই। ঐখোয়না মখল খুদিংমক্কী মীখা পোনবগী ৱাখল্লোন অসিদগী মনীংতম্নবা ঐখোয়না চপ চানা লেপকদবনি।

ঐগী নুংশিরবা ইরৈবাকচাশিং,

ঐখোয়না ঐখোয়গী হেরিতেজ অসিদা চাউথোকচবা পোক্কনি। ঐখোয়গী মশক মওং-মতৌগী খ্বাইদগী চাউবা লৈতেং, খ্বাইদগী চাউবা লিককোল, খ্বাইদগী চাউবা লুহুপ অসি ঐখোয়গী হেরিতেজনি, ঐখোয়না ঐখোয়গী হেরিতেজ অসিদা চাউথোকচবা পোক্কনি।

ঐগী নুংশিরবা ইরৈবাকচাশিং,

অমত্তা ওইবসি পুম্নমক্কী মরক্তা খ্বাইদগী শক্তি লৈরবা মন্ত্রনি অমসুং মরম অদুনা অমত্তা ওইবগী লংলা অসি কনাগুম্বা অমত্তনা থদৎপা তৌরোই হায়বসি ঐখোয়গী অপুনবা ৱারেপ ওইগনি।

ঐগী নুংশিরবা ইরৈবাকচাশিং,

ইমা ভারতীগীদমক ঐখোয়গী থৌদাং অসি পাংথোকপা অসি তপস্যাদগী তাবা, ইকাই খুম্নবা উৎপদগী হন্থবা নত্তে, অমসুং চপ মান্নবা ৱাখল্লোনগা লোয়ননা, ইমা লৈবাক অসিগী য়াইফনবগীদমক্তা, ঐখোয়না হোৎনরিবা পুম্নমক্তা, ২০৪৭ ফাওবদা চাউখৎলবা ভারতকী পান্দম অদু ফংনবা হোৎনগনি, ঐখোয়না খুদোংচাবা অমত্তা থাদোক্লোই, মসি খক্তা নত্তে, ঐখোয়না অনৌবা খুদোংচাবা কয়া অমা শেম্লগনি অমসুং মখোয়শিং অসি শেম্লবা মতুংদা, ঐখোয়না লৈবাক অসিগী মীওই কোতি ১৪০গী মপাঙ্গলগা লোয়ননা মাংলোমদা চংশিল্লগনি, মাংলোমদা চংশিল্লগনি, মাংলোমদা চংশিল্লগনি।

ঐগী নুংশিরবা ইরৈবাকচাশিং,

ঐখোয়না নীংশিংগদবনি, লৈবাক অসিগী মীওই করোর ১৪০না নীংশিংগদবনি, কন্না হোৎনখিবা অদুনা পুৱারী শেম্বা ঙমগনি। কন্না হোৎনখিবা অদুনা পুৱারী শেম্বা ঙমগনি। নুংজাওশিং থুগাইখিবা মীওই অদু, মতমদুবু নমথবা ঙম্বা মীওই অদুনি। নুংজাওশিং থুগাইখিবা মীওই অদু, মতমদুবু নমথবা ঙম্বা মীওই অদুনি। অমসুং মসি মতমবু মাইথিবা পীনবা অচুম্বা পুংফম অদুনি।

ঐগী নুংশিরবা ইরৈবাকচাশিং,

অমুক্কা হন্না, ঐহাক্না পুম্নমকপু নীংতম্বগী থৌরম অসিদা য়াইফ-পাউজেল পীজরি। ঐহাক্না ময়ামদা থম্মোয় শেংনা নুংঙাইবা ফোংদোকচরি। ময়ামনা ঐহাক্কা লোয়ননা হায়বীয়ু,

জয় হিন্দ! জয় হিন্দ! জয় হিন্দ!

ভারত মাতা কী জয়! ভারত মাতা কী জয়! ভারত মাতা কী জয়!

ভন্দে মাতরম! ভন্দে মাতরম! ভন্দে মাতরম!

হন্না-হন্না থাগৎচরি!

****