ভাৰতৰ দীৰ্ঘম্যাদী সাৰ্বভৌম ক্ৰেডিট ৰেটিং ‘বিবিবি-’ৰ পৰা ‘বিবিবি’লৈ আৰু হ্ৰস্বম্যাদী ৰেটিং ‘এ-৩’ৰ পৰা ‘এ-২’লৈ উন্নীত কৰাৰ সিদ্ধান্তক বিত্ত মন্ত্ৰালয়ে সুস্থিৰ দৃষ্টিভংগীৰে আদৰণি জনাইছে। ৰেটিং উন্নীতকৰণ ভাৰতৰ চলিত অৰ্থনৈতিক যাত্ৰা আৰু বিচক্ষণ বিত্তীয় ব্যৱস্থাপনাৰ এক গুৰুত্বপূৰ্ণ পদক্ষেপ। ১৮বছৰৰ ভিতৰত এছ এণ্ড পিৰ এইটোৱেই হৈছে দেশৰ প্ৰথমটো সাৰ্বভৌম উন্নীতকৰণ। ভাৰতক শেষবাৰৰ বাবে ২০০৭ চনত বিনিয়োগ গ্ৰেড বিবিবি-লৈ উন্নীত কৰা হৈছিল।২০২৪ চনৰ মে’ মাহত সংস্থাটোৱে ভাৰতৰ দৃষ্টিভংগী ‘সুস্থিৰ’ৰ পৰা ‘ধনাত্মক’লৈ উন্নীতকৰণ কৰিছিল।

আজি প্ৰকাশিত এছ এণ্ড পিৰ ইণ্ডিয়া সাৰ্বভৌম ৰেটিং ৰিভিউ অনুসৰি এই উন্নীতকৰণে ভাৰতৰ দ্ৰুত আৰু গতিশীল অৰ্থনৈতিক বিকাশ, বিত্তীয় একত্ৰীকৰণৰ প্ৰতি চৰকাৰৰ অবিৰত দায়বদ্ধতা, বিশেষকৈ মূলধনী ব্যয় আৰু আন্তঃগাঁথনিৰ ক্ষেত্ৰত ৰাজহুৱা ব্যয়ৰ উন্নত মানদণ্ড আৰু শক্তিশালী কৰ্পৰেট, বিত্তীয় আৰু বহিঃ বেলেন্স শ্বীটকে ধৰি কেইবাটাও মূল কাৰক প্ৰতিফলিত কৰিছে। বিশ্বাসযোগ্য মুদ্ৰাস্ফীতি ব্যৱস্থাপনা আৰু নীতিৰ ভৱিষ্যদৰ্শী বিকাশেও ইয়াত মূল ভূমিকা পালন কৰিছে।

এছ এণ্ড পিৰ প্ৰতিবেদনত ভাৰতীয় অৰ্থনীতিৰ মূল শক্তিসমূহৰ বিষয়ে বিতংভাৱে উল্লেখ কৰা হৈছে যিয়ে ভাৰতক বিশ্বজুৰি দ্ৰুতগতিত বৃদ্ধি পোৱা প্ৰধান অৰ্থনীতিসমূহৰ ভিতৰত অন্যতম হ’বলৈ অনুমতি দিছে। ২০২২  বিত্তীয় বৰ্ষৰ পৰা ২০২৪ বিত্তীয় বৰ্ষলৈ গড়ে ৮.৮ শতাংশ প্ৰকৃত জিডিপি বৃদ্ধি হৈছে, যিটো এছিয়া-প্ৰশান্ত মহাসাগৰীয় অঞ্চলৰ ভিতৰতে সৰ্বাধিক। সংস্থাটোৱে কয় যে মুদ্ৰা নীতিৰ সংস্কাৰে বিশেষকৈ মুদ্ৰাস্ফীতিৰ লক্ষ্য নিৰ্ধাৰণত অধিক ফলপ্ৰসূভাৱে কাম কৰিছে। এছ এণ্ড পিয়ে এইটোও স্বীকাৰ কৰে যে বৈশ্বিক মন্দাৱস্থা আৰু মূল্যৰ অস্থিৰতাৰ মাজতো ভাৰতে সামগ্ৰিক মূল্যৰ সুস্থিৰতা বজাই ৰাখি স্থিতিস্থাপকতা প্ৰদৰ্শন কৰিছে। তদুপৰি, মুদ্ৰা সংস্কাৰৰ লগতে ব্যাপক ঘৰুৱা মূলধনী বজাৰৰ চলিত বিকাশে সামগ্ৰিক অৰ্থনৈতিক দৃষ্টিভংগীৰ বাবে অধিক সুস্থিৰ আৰু সহায়ক পৰিৱেশৰ সৃষ্টি কৰিছে। প্ৰতিবেদনত লগতে কোৱা হৈছে যে ভাৰতৰ বাহ্যিক আৰু বিত্তীয় স্থিতি শক্তিশালী হৈ আছে আৰু গণতান্ত্ৰিক প্ৰতিষ্ঠানসমূহেও নীতিৰ ধাৰাবাহিকতা আৰু দীৰ্ঘম্যাদী অৰ্থনৈতিক সুস্থিৰতা নিশ্চিত কৰিছে।

ভৱিষ্যতৰ প্ৰতি লক্ষ্য ৰাখি এছ এণ্ড পিয়ে ২০২৬ বিত্তীয় বৰ্ষত ৬.৫ শতাংশ জিডিপি বিকাশৰ পূৰ্বানুমান কৰিছে আৰু অহা তিনি বছৰত গতি বজাই ৰাখিব বুলি আশা প্ৰকাশ কৰিছে। সংস্থাটোৱে পৰামৰ্শ দিছে যে বিত্তীয় ঘাটি হ্ৰাস পোৱা আৰু ৰাজহুৱা বিনিয়োগ অব্যাহত ৰখাৰ ফলত অধিক ইতিবাচক ৰেটিং ব্যৱস্থা গ্ৰহণ কৰিব পৰা যাব। ভাৰতৰ বৃহৎ আৰু শক্তিশালী ঘৰুৱা ব্যৱহাৰৰ ভিত্তিৰ বাবে শেহতীয়াকৈ আৰোপ কৰা আমেৰিকাৰ শুল্কৰ প্ৰভাৱ সীমিত হোৱাৰ সম্ভাৱনা আছে বুলিও প্ৰতিবেদনত উল্লেখ কৰা হৈছে।

শেহতীয়াকৈ আন এটা ৰেটিং এজেন্সী মৰ্নিংষ্টাৰ ডিবিআৰএছেও ভাৰতৰ ৰেটিং "বিবিবি"লৈ উন্নীত কৰিছে।

****

NB/KMN/DB