Ka tnad kam pla tyngka ka pdiang sngewbha ïa ka rai jong ka Standard & Poor’s (S&P) Global Ratings ban kyntiew ïa ka kyrdan ram jong ka India kaba jrong samoi sha ka ‘BBB’ na ka ‘BBB-’ bad ka kyrdan ba lyngkot samoi jong ka sha ka ‘A-2’ na ka ‘A-3’, ryngkat bad ka jingkhmih lynti kaba skhem. Ka jingpynkiew kyrdan ka long ka jingpynskhem kaba kongsan ïa ka jingïaid lynti jong ka ïoh ka kot jong ka India bad ka jingpynïaid pisa kaba stad. Kane ka dei ka jingpynkiew kyrdan kaba nyngkong eh jong ka ri da ka S&P ha ki 18 snem, kaba nyngkong ka dei ha u snem 2007 ha kaba la pynkiew ïa ka India sha ka kyrdan bei tyngka ha ka BBB-. Ha u Jymmang 2024, ka tnad ka la pynkylla ïa ka jingpeit jong ka ïa ka ri India na ka ‘Ka jinglong kaba skhem’ sha ka ‘Ka jinglong kaba bha’.

Katkum ka jingbishar bniah jong ka S&P ia ka ri India kaba la pynmih mynta ka sngi, ka jingpynkiew kyrdan ka pyni ïa ka jingïatylli jong ki bynta kiba kongsan, kynthup ïa ka roi ka par kaba thymmai bad ka jingkiew ka ïoh ka kot jong ka India, ka jingkular ba neh jong ka sorkar ban pynskhem ïa ka pisa tyngka, ka jingkyntiew ïa ka jinglong jingman jong ka jingpynlut pisa ia ki kam paidbah, khamtam eh ha ki jingtei bad ka capex, bad ki jingkhein jingdiah kiba khlain ha kaba iadei bad ki kompani bad ki kam pisa. Ka jingpeit ia ka jingkiew dor kaba shai bad ka jingpynkiew ia ka bor ban tip lypa ia ki polisi ruh ka la don ka bynta kaba kongsan.

Ka S&P ha ka kaiphod jong ka, ka batai bniah ïa ki jingkhlain ba kongsan jong ka ïoh ka kot jong ka ri India, kiba la plié lad ïa ka India ban paw kum kawei na ki ri kiba kiew stet bha ha ka pyrthei, ha kaba ka jingkiew jong ka GDP ba shisha ka long 8.8 percent naduh ka FY22 haduh ka FY24, kaba heh tam ha ka thaiñ Asia-Pacific. Ki jingpynkylla ha ka polisi pisa, khamtam eh ka jingpdiang ïa ka rukom synshar kaba peit ïa ka jingkiew dor, ka la pynskhem ïa ka jingkhmih lynti ha kaba iadei bad ka jingkiew dor, la ong ka tnad. Ka S&P ka la ithuh ruh ba wat hapdeng ki jingeh ha ka pyrthei bad ka jingkiew dor, ka India ka la pyni ia ka bor ban ieng pyrshah da kaba pynneh ia ka jinglong ryntih jong ka dor. Ki jingpynbha ha ka liang ka pisa tyngka, ryngkat bad ka jingkiew kaba dang iaid shakhmat jong ki iew ki hat hapoh ka ri, ka la thaw ia ka jinglong kaba kham skhem bad kaba kyrshan ia ka jinglong jingman jong ka ioh ka kot baroh kawei. Ka kaiphod ka peit bniah shuh shuh ba ka jinglong jingman jong ka India ha kaba iadei bad ka kam pisa shabar bad hapoh ka ri ki long kiba khlain bad ba ki jaka treikam jong ka ri ki bteng ban pynthikna ia ka jingbteng jong ki polisi bad ka jingshngain ha ka ioh ka kot ha ka por ba jrong.

Haba phai sha khmat, ka S&P ka ong ba ka GDP kan kiew haduh 6.5 percent ha u snem mang tyngka 2026 bad ba kan don ka jingkiew kaba bteng ha ki lai snem ban wan. Ka tnad ka la ai jingmut ba ka jingpynhiar ia ka jingduna pisa bad ka jingbteng jong ka jingbei tyngka paidbah ka lah ban kyrshan ia ka jingai kyrdan kaba kham bha shuh shuh. Ka kaiphod ka la kdew ruh ba ka jingktah jong ki khajna ba dang shen jong ka U.S kan long kaba duna, namar ka jinglong jingman jong ka India kaba heh bad kaba lah ban iaineh ha kaba iadei bad ka jingpyndonkam ia ki mar hapoh ka ri.

Dang shen sa kawei pat ka kynhun ai kyrdan, Morning Star DBRS ka la kyntiew kyrdan ia ka India sha ka “BBB”.