ಸಹಕಾರಿ ಚುನಾವಣಾ ಪ್ರಾಧಿಕಾರವು ಇಂದು ನವದೆಹಲಿಯಲ್ಲಿ ರಾಜ್ಯ ಸಹಕಾರಿ ಚುನಾವಣಾ ಪ್ರಾಧಿಕಾರಗಳೊಂದಿಗೆ ತನ್ನ ಮೊದಲ ಸಮಾಲೋಚನಾ ಸಭೆಯನ್ನು ನಡೆಸಿತು. ಸಹಕಾರಿ ಸಂಸ್ಥೆಗಳಲ್ಲಿ ಚುನಾವಣೆಗಳನ್ನು ಮುಕ್ತ ಮತ್ತು ನ್ಯಾಯಯುತ ರೀತಿಯಲ್ಲಿ ನಡೆಸಲು ಮತ್ತು ಪ್ರಕ್ರಿಯೆಯು ಹೆಚ್ಚು ಪಾರದರ್ಶಕವಾಗಿರಲು ರಾಜ್ಯ ಸಹಕಾರಿ ಚುನಾವಣಾ ಪ್ರಾಧಿಕಾರಗಳೊಂದಿಗೆ ಸಂವಾದದ ಕಾರ್ಯವಿಧಾನವನ್ನು ಅಭಿವೃದ್ಧಿಪಡಿಸುವುದು ಈ ಸಭೆಯ ಉದ್ದೇಶವಾಗಿತ್ತು. ಸಭೆಯ ಅಧ್ಯಕ್ಷತೆಯನ್ನು ಸಹಕಾರಿ ಚುನಾವಣಾ ಪ್ರಾಧಿಕಾರದ ಅಧ್ಯಕ್ಷ ಶ್ರೀ ದೇವೇಂದ್ರ ಕುಮಾರ್ ಸಿಂಗ್ ವಹಿಸಿದ್ದರು, ಇದರಲ್ಲಿ ಒಡಿಶಾ, ಬಿಹಾರ, ತಮಿಳುನಾಡು, ತೆಲಂಗಾಣ ಮತ್ತು ಮಹಾರಾಷ್ಟ್ರದ ರಾಜ್ಯ ಚುನಾವಣಾ ಆಯುಕ್ತರು ಭಾಗವಹಿಸಿದ್ದರು. ಉಪಾಧ್ಯಕ್ಷ ಶ್ರೀ ಆರ್. ಕೆ. ಗುಪ್ತಾ ಮತ್ತು ಸಹಕಾರಿ ಓಂಬುಡ್ಸ್ಮನ್ ಶ್ರೀ ಅಲೋಕ್ ಅಗರ್ವಾಲ್ ಸಹ ಭಾಗವಹಿಸಿದ್ದರು. ಸಹಕಾರ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಶ್ರೀ ಆನಂದ್ ಕುಮಾರ್ ಝಾ ಅವರು ಚರ್ಚೆಯಲ್ಲಿ ಪಾಲ್ಗೊಂಡರು.

ಈ ಸಂದರ್ಭದಲ್ಲಿ ಮಾತನಾಡಿದ ಸಹಕಾರಿ ಚುನಾವಣಾ ಪ್ರಾಧಿಕಾರದ ಅಧ್ಯಕ್ಷರಾದ ಶ್ರೀ ದೇವೇಂದ್ರ ಕುಮಾರ್ ಸಿಂಗ್, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಮತ್ತು ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರ ಮಾರ್ಗದರ್ಶನದಲ್ಲಿ ಸರ್ಕಾರವು ಸಹಕಾರಿ ಚುನಾವಣಾ ಪ್ರಾಧಿಕಾರದ ಸ್ಥಾಪನೆ ಸೇರಿದಂತೆ ಸಹಕಾರಿ ಕ್ಷೇತ್ರದಲ್ಲಿ ವಿವಿಧ ಸುಧಾರಣೆಗಳನ್ನು ತಂದಿದೆ ಎಂದು ಹೇಳಿದರು. ಸಹಕಾರಿ ಚುನಾವಣಾ ಪ್ರಾಧಿಕಾರವು ಮಾರ್ಚ್ 2024 ರಿಂದ ಇಲ್ಲಿಯವರೆಗೆ 159 ಚುನಾವಣೆಗಳನ್ನು ನಡೆಸಿದೆ ಮತ್ತು ಇನ್ನೂ 69 ಸಹಕಾರಿ ಚುನಾವಣೆಗಳನ್ನು ನಡೆಸುವ ಪ್ರಕ್ರಿಯೆಯಲ್ಲಿದೆ. 2002ರ ಬಹು-ರಾಜ್ಯ ಸಹಕಾರಿ ಸಂಘಗಳ ಕಾಯ್ದೆಯ ಸೆಕ್ಷನ್ 45 ಮತ್ತು 2023ರಲ್ಲಿ ಅದರ ತಿದ್ದುಪಡಿಯಿಂದ ನೀಡಲಾದ ಕೇಂದ್ರದ ಅಧಿಕಾರವನ್ನು ಚಲಾಯಿಸಿ ಸಹಕಾರಿ ಚುನಾವಣಾ ಪ್ರಾಧಿಕಾರಕ್ಕೆ ಮಾರ್ಚ್ 11, 2024 ರಂದು ಅಧಿಸೂಚನೆ ಹೊರಡಿಸಲಾಗಿದೆ ಎಂದು ಅವರು ಹೇಳಿದರು.

2025ಅನ್ನು ಅಂತಾರಾಷ್ಟ್ರೀಯ ಸಹಕಾರಿ ವರ್ಷವೆಂದು ಆಚರಿಸಲಾಗುತ್ತಿದೆ ಮತ್ತು ಸಹಕಾರಿ ಕ್ಷೇತ್ರದ ಬೆಳವಣಿಗೆಗೆ ಸರ್ಕಾರವು ತನ್ನ ಬದ್ಧತೆಯನ್ನು ಪ್ರದರ್ಶಿಸುವ ಮೂಲಕ ಹಲವಾರು ಸುಧಾರಣೆಗಳನ್ನು ತಂದಿದೆ ಎಂದು ಶ್ರೀ ದೇವೇಂದ್ರ ಕುಮಾರ್ ಸಿಂಗ್ ಹೇಳಿದರು. ಸಹಕಾರಿ ಸಂಘಗಳಲ್ಲಿ ಚುನಾವಣೆಗಳನ್ನು ಮುಕ್ತ ಮತ್ತು ನ್ಯಾಯಯುತವಾಗಿಸಲು ಪಾರದರ್ಶಕತೆಯನ್ನು ಹೆಚ್ಚಿಸಲು ಸಹಕಾರಿ ಸಂಘಗಳಲ್ಲಿನ ಚುನಾವಣಾ ಪ್ರಕ್ರಿಯೆಯನ್ನು ಸುಗಮಗೊಳಿಸಬೇಕಾಗಿದೆ ಎಂದು ಅವರು ಹೇಳಿದರು.

ಸಹಕಾರಿ ಚುನಾವಣೆಗಳಿಗೆ ಪ್ರಮಾಣಿತ ಕೈಪಿಡಿಗಳು ಮತ್ತು ನೀತಿ ಸಂಹಿತೆಗಳ ಅವಶ್ಯಕತೆಯಿದೆ ಎಂದು ಸಹಕಾರಿ ಚುನಾವಣಾ ಪ್ರಾಧಿಕಾರದ ಅಧ್ಯಕ್ಷರು ಹೇಳಿದರು. ಸ್ಪರ್ಧಿಸುವ ಅಭ್ಯರ್ಥಿಗಳು ಮತ್ತು ಬಹು-ರಾಜ್ಯ ಸಹಕಾರಿ ಸಂಘ (ಎಂ ಎಸ್ ಸಿ) ಗಳಿಗೆ ನೀತಿ ಸಂಹಿತೆಯನ್ನು ರೂಪಿಸುವುದು, ಸ್ಪರ್ಧಿಸುವ ಅಭ್ಯರ್ಥಿಗಳ ವೆಚ್ಚದ ಗರಿಷ್ಠ ಮಿತಿಯನ್ನು ನಿಗದಿಪಡಿಸುವುದು, ಚುನಾವಣಾ ಅಧಿಕಾರಿಗಳಿಗೆ ಕೈಪಿಡಿಯ ಪ್ರಕಟಣೆ, ರಾಷ್ಟ್ರೀಯ ಸಹಕಾರಿ ಸಂಘಗಳಲ್ಲಿ ಸದಸ್ಯರಾಗಿರುವ ಸದಸ್ಯ ಸಹಕಾರಿ ಸಂಘಗಳಿಂದ ಪ್ರತಿನಿಧಿಗಳ ಆಯ್ಕೆ ಮತ್ತು ರಾಜ್ಯದಿಂದ ಸ್ವೀಕರಿಸಿದ ಇತರ ಕಾರ್ಯಸೂಚಿಗೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಚರ್ಚೆ ನಡೆಯಿತು. ಭಾಗವಹಿಸುವ ರಾಜ್ಯ ಸಹಕಾರಿ ಚುನಾವಣಾ ಪ್ರಾಧಿಕಾರಗಳು ಪ್ರಸ್ತಾಪಿಸಿದ ಕಾರ್ಯಸೂಚಿಗಳಲ್ಲಿ ಸಹಕಾರಿ ಚುನಾವಣೆಯಲ್ಲಿ ಎಲೆಕ್ಟ್ರಾನಿಕ್ ಮತ ಯಂತ್ರವನ್ನು ಪರಿಚಯಿಸುವುದು ಸೇರಿತ್ತು.

ಸಹಕಾರಿ ಚುನಾವಣೆಗಳಲ್ಲಿ ಸದಸ್ಯರ ಷೇರು ಬಂಡವಾಳ, ಅಭ್ಯರ್ಥಿಗಳಿಗೆ ಚಿಹ್ನೆಗಳ ಬಳಕೆ ಮತ್ತು ಅಳಿಸಲಾಗದ ಶಾಯಿ ಬಳಕೆಗೆ ಸಂಬಂಧಿಸಿದ ವಿಷಯಗಳ ಕುರಿತು ಶ್ರೀ ದೇವೇಂದ್ರ ಕುಮಾರ್ ಸಿಂಗ್ ಪ್ರಸ್ತಾಪಿಸಿದರು ಮತ್ತು ನಂತರ ಚರ್ಚೆ ನಡೆಯಿತು.

ಸಹಕಾರಿ ಚುನಾವಣೆಗಳಲ್ಲಿ ಸುಧಾರಣಾ ಪ್ರಕ್ರಿಯೆಯನ್ನು ಮುಂದಕ್ಕೆ ಕೊಂಡೊಯ್ಯಲು ಸಿಇಎ ಪ್ರತಿ ಮೂರು ತಿಂಗಳಿಗೊಮ್ಮೆ ಸಮಾಲೋಚನಾ ಸಮಿತಿ ಸಭೆಯನ್ನು ನಡೆಸಲು ನಿರ್ಧರಿಸಿತು.

ರಾಜ್ಯಗಳಿಂದ ಭಾಗವಹಿಸಿದವರಲ್ಲಿ ಒಡಿಶಾ (ಶ್ರೀ ಶ್ರೀಕಾಂತ್ ಪ್ರುಸ್ಟಿ, ರಾಜ್ಯ ಸಹಕಾರಿ  ಚುನಾವಣಾ ಆಯೋಗ), ಬಿಹಾರ (ಶ್ರೀ ಗಿರೀಶ್ ಶಂಕರ್, ಬಿಹಾರ ರಾಜ್ಯ ಚುನಾವಣಾ ಪ್ರಾಧಿಕಾರ, ಸಲಹೆಗಾರ ಶ್ರೀ ಕುಮಾರ್ ಶಾಂತ್ ರಕ್ಷಿತ್, ಬಿಹಾರ ರಾಜ್ಯ ಚುನಾವಣಾ ಆಯೋಗ), ತಮಿಳುನಾಡು (ಶ್ರೀ ದಯಾನಂದ ಕಟಾರಿಯಾ, ಆಯುಕ್ತರು, ತಮಿಳುನಾಡು ರಾಜ್ಯ ಸಹಕಾರಿ ಚುನಾವಣಾ ಆಯೋಗ), ಮಹಾರಾಷ್ಟ್ರ (ಶ್ರೀ ಅನಿಲ್ ಮಹಾದೇವ್ ಕವಾಡೆ, ರಾಜ್ಯ ಸಹಕಾರಿ ಚುನಾವಣಾ ಪ್ರಾಧಿಕಾರ, ಮಹಾರಾಷ್ಟ್ರ ಮತ್ತು ಶ್ರೀ ಅಶೋಕ್ ಗಡೆ, ಕಾರ್ಯದರ್ಶಿ, ಮಹಾರಾಷ್ಟ್ರ ರಾಜ್ಯ ಚುನಾವಣಾ ಪ್ರಾಧಿಕಾರ) ಮತ್ತು ತೆಲಂಗಾಣ (ಶ್ರೀ ಜಿ ಶ್ರೀವಿನಾಸ್ ರಾವ್, ಆಯುಕ್ತರು, ತೆಲಂಗಾಣ ಸಹಕಾರಿ ಚುನಾವಣಾ ಪ್ರಾಧಿಕಾರ) ಸೇರಿದ್ದಾರೆ.

*****