ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್.ಇ.ಪಿ) 2020ರ ಐದನೇ ವಾರ್ಷಿಕೋತ್ಸವದ ಅಂಗವಾಗಿ ಅಖಿಲ ಭಾರತೀಯ ಶಿಕ್ಷಾ ಸಮಾಗಮ (ಎ.ಬಿ.ಎಸ್.ಎಸ್) 2025 ಅನ್ನು ಕೇಂದ್ರ ಶಿಕ್ಷಣ ಸಚಿವರಾದ ಶ್ರೀ ಧರ್ಮೇಂದ್ರ ಪ್ರಧಾನ್ ಅವರು ಇಂದು ನವದೆಹಲಿಯಲ್ಲಿ ಉದ್ಘಾಟಿಸಿದರು. ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್.ಇ.ಪಿ) 2020ರ ಐದನೇ ವಾರ್ಷಿಕೋತ್ಸವವನ್ನು ಗುರುತಿಸುವ ಅಖಿಲ ಭಾರತೀಯ ಶಿಕ್ಷಾ ಸಮಾಗಮ (ಎ.ಬಿ.ಎಸ್.ಎಸ್) 2025, ಎನ್.ಇ.ಪಿ 2020ರ ಅಡಿಯಲ್ಲಿ ಸಾಧಿಸಲಾದ ಗಮನಾರ್ಹ ಪ್ರಗತಿಯನ್ನು ಪರಿಶೀಲಿಸಲು ಮತ್ತು ಮುಂದಿನ ಮಾರ್ಗವನ್ನು ರೂಪಿಸಲು ಶಿಕ್ಷಣ ತಜ್ಞರು, ನೀತಿ ನಿರೂಪಕರು, ಉದ್ಯಮ ಮುಖಂಡರು ಮತ್ತು ಸರ್ಕಾರಿ ಪ್ರತಿನಿಧಿಗಳಿಗೆ ವೇದಿಕೆಯಾಯಿತು.

ಕೇಂದ್ರ ಶಿಕ್ಷಣ ರಾಜ್ಯ ಸಚಿವರು (ಸ್ವತಂತ್ರ ನಿರ್ವಹಣೆ) ಮತ್ತು ಉದ್ಯಮಶೀಲತೆ ಮತ್ತು ಕೌಶಲ್ಯ ಅಭಿವೃದ್ಧಿ ರಾಜ್ಯ ಸಚಿವರಾದ ಶ್ರೀ ಜಯಂತ್ ಚೌಧರಿ; ಈಶಾನ್ಯ ಪ್ರದೇಶದ ಅಭಿವೃದ್ಧಿ ಮತ್ತು ಶಿಕ್ಷಣ ರಾಜ್ಯ ಸಚಿವ ಡಾ. ಸುಕಾಂತ ಮಜುಂದಾರ್; ಮತ್ತು 13 ರಾಜ್ಯ/ಕೇಂದ್ರಾಡಳಿತ ಪ್ರದೇಶಗಳ ಶಿಕ್ಷಣ ಸಚಿವರು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು. ಉನ್ನತ ಶಿಕ್ಷಣ ಇಲಾಖೆಯ ಕಾರ್ಯದರ್ಶಿ ಡಾ. ವಿನೀತ್ ಜೋಶಿ; ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯ ಕಾರ್ಯದರ್ಶಿ ಶ್ರೀ ಸಂಜಯ್ ಕುಮಾರ್; ಖ್ಯಾತ ಶಿಕ್ಷಣ ತಜ್ಞರು; ಅಧ್ಯಕ್ಷರು; ಶಿಕ್ಷಣ ಸಚಿವಾಲಯದ ಅಡಿಯಲ್ಲಿರುವ ಸ್ವಾಯತ್ತ ಸಂಸ್ಥೆಗಳ ಮುಖ್ಯಸ್ಥರು; ಸಿ.ಬಿ.ಎಸ್.ಇ, ಕೆ.ವಿ.ಎಸ್, ಎನ್.ವಿ.ಎಸ್ನ ಪ್ರಾದೇಶಿಕ ಅಧಿಕಾರಿಗಳು; ಉನ್ನತ ಶಿಕ್ಷಣ ಸಂಸ್ಥೆಗಳ ಉಪಕುಲಪತಿಗಳು/ನಿರ್ದೇಶಕರು/ಮುಖ್ಯಸ್ಥರು, ಇತರ ಸಚಿವಾಲಯಗಳ ಹಿರಿಯ ಅಧಿಕಾರಿಗಳು, ರಾಜ್ಯ ಶಿಕ್ಷಣ ಕಾರ್ಯದರ್ಶಿಗಳು, ಸಮಗ್ರ ಶಿಕ್ಷಾದ ರಾಜ್ಯ ಯೋಜನಾ ನಿರ್ದೇಶಕರು, ಎಸ್.ಸಿ.ಇ.ಆರ್.ಟಿ ಗಳ ನಿರ್ದೇಶಕರು, ನವೋದ್ಯಮ ಸಂಸ್ಥಾಪಕರು; ಶಾಲಾ ವಿದ್ಯಾರ್ಥಿಗಳು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.

ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್.ಇ.ಪಿ) 2020 ರ ಕರಡು ರಚನಾ ಸಮಿತಿಯ ಅಧ್ಯಕ್ಷರಾದ ಪದ್ಮವಿಭೂಷಣ ಡಾ. ಕೆ. ಕಸ್ತೂರಿರಂಗನ್ ಅವರ ದೂರದೃಷ್ಟಿಯ ನಾಯಕತ್ವ ಮತ್ತು ಭಾರತದ ಶಿಕ್ಷಣ ಮತ್ತು ಬಾಹ್ಯಾಕಾಶ ಕ್ಷೇತ್ರಕ್ಕೆ ನೀಡಿದ ಪ್ರವರ್ತಕ ಕೊಡುಗೆಯನ್ನು ಗುರುತಿಸಿ ಅವರಿಗೆ ಪುಷ್ಪ ನಮನ ಸಲ್ಲಿಸುವ ಮೂಲಕ ಕಾರ್ಯಕ್ರಮ ಪ್ರಾರಂಭವಾಯಿತು. ಇದರ ನಂತರ ಕೇಂದ್ರೀಯ ವಿದ್ಯಾಲಯಗಳ ವಿದ್ಯಾರ್ಥಿಗಳು ಸ್ವಾಗತ ಗೀತೆ ಹಾಡಿದರು, ಇದು ಸಂದರ್ಭವನ್ನು ಇನ್ನಷ್ಟು ರೋಮಾಂಚಕಗೊಳಿಸಿತು. ಎನ್.ಇ.ಪಿ 2020 ರ ಐದನೇ ವಾರ್ಷಿಕೋತ್ಸವದಂದು ಗೌರವಾನ್ವಿತ ಪ್ರಧಾನ ಮಂತ್ರಿಯವರ ಸಂದೇಶವನ್ನು ರಾಜ್ಯ ಸಚಿವ ಶ್ರೀ ಜಯಂತ್ ಚೌಧರಿ ಅವರು ಓದಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಶ್ರೀ ಧರ್ಮೇಂದ್ರ ಪ್ರಧಾನ್, ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್.ಇ.ಪಿ) 2020 ಐದು ವರ್ಷಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಕ್ಕಾಗಿ ತಮ್ಮ ಹೃತ್ಪೂರ್ವಕ ಅಭಿನಂದನೆಗಳನ್ನು ತಿಳಿಸಿದರು.

ಭಾರತದ ಬೆಳವಣಿಗೆಯ ಕಥೆಯ ಕೇಂದ್ರದಲ್ಲಿ ಶಿಕ್ಷಣವನ್ನು ಇರಿಸುವ ಪ್ರಧಾನಿ ಶ್ರೀ ನರೇಂದ್ರ ಮೋದಿಯವರ ಪರಿವರ್ತನಾತ್ಮಕ ದೂರದರ್ಶಿತ್ವವನ್ನು ರಾಷ್ಟ್ರೀಯ ಶಿಕ್ಷಣ ನೀತಿ 2020 ಪ್ರತಿಬಿಂಬಿಸುತ್ತದೆ ಎಂದು ಅವರು ಹೇಳಿದರು. ರಾಷ್ಟ್ರವು "ವಿಕಸಿತ ಭಾರತ 2047" ಎಂಬ ದೃಷ್ಟಿಕೋನದತ್ತ ಸಾಗುತ್ತಿರುವಾಗ, ರಾಷ್ಟ್ರೀಯ ಶಿಕ್ಷಣ ನೀತಿಯು ಮುಂದಿನ ಹಾದಿಗೆ ಮಾರ್ಗದರ್ಶನ ಮಾಡುವ ರಾಷ್ಟ್ರೀಯ ಧ್ಯೇಯವಾಗಿ ಕಾರ್ಯನಿರ್ವಹಿಸುತ್ತದೆ ಎಂದು ಅವರು ಹೇಳಿದರು.

ಕಳೆದ ಐದು ವರ್ಷಗಳಲ್ಲಿ, ಸರ್ಕಾರವು ಎನ್.ಇ.ಪಿ 2020 ಅನ್ನು ನೀತಿಯಿಂದ ಆಚರಣೆಗೆ ತರುವಲ್ಲಿ, ಶಿಕ್ಷಣ ವ್ಯವಸ್ಥೆಯಲ್ಲಿ ಒಂದು ಮಾದರಿ ಬದಲಾವಣೆಯನ್ನು ತರುವಲ್ಲಿ ಮತ್ತು ತರಗತಿ ಕೊಠಡಿಗಳು, ಕ್ಯಾಂಪಸ್ ಗಳು ಮತ್ತು ಸಮುದಾಯಗಳನ್ನು ತಲುಪುವಲ್ಲಿ ಯಶಸ್ವಿಯಾಗಿದೆ ಎಂದು ಅವರು ಹೇಳಿದರು.

ಎನ್.ಇ.ಪಿ 2020 ರ ಸಾರದಲ್ಲಿ ಭಾರತೀಯ ಮೌಲ್ಯ ಅಡಗಿದೆ ಎಂದು ಶ್ರೀ ಪ್ರಧಾನ್ ಹೇಳಿದರು. ವೈಜ್ಞಾನಿಕ ಶಿಕ್ಷಣ, ನಾವೀನ್ಯತೆ, ಸಂಶೋಧನೆ, ಭಾರತೀಯ ಜ್ಞಾನ ವ್ಯವಸ್ಥೆಗಳು ಮತ್ತು ಭಾರತೀಯ ಭಾಷೆಗಳ ಮೇಲೆ ಬಲವಾದ ಗಮನವನ್ನು ಹೊಂದಿರುವ ಈ ನೀತಿಯು ಶಿಕ್ಷಣವನ್ನು ರಾಷ್ಟ್ರ ನಿರ್ಮಾಣದ ವಿಶಾಲ ಗುರಿಯೊಂದಿಗೆ ಜೋಡಿಸುತ್ತದೆ ಎಂದು ಅವರು ಹೇಳಿದರು.

'ವಿಕಸಿತ ಭಾರತ' ಕೇವಲ ಒಂದು ದೃಷ್ಟಿಕೋನವಲ್ಲ, ಬದಲಾಗಿ ಪ್ರಧಾನಿ ಮೋದಿಯವರು ನೀಡಿದ ಪ್ರಬಲವಾದ ಕರೆ.  ಅವರ ಪ್ರಕಾರ, ರಾಷ್ಟ್ರೀಯ ಶಿಕ್ಷಣ ನೀತಿ 2020 ಈ ಕನಸನ್ನು ನನಸಾಗಿಸಲು ಅತ್ಯಂತ ಪರಿಣಾಮಕಾರಿ ಸಾಧನವಾಗಿದೆ ಎಂದು ಅವರು ಒತ್ತಿ ಹೇಳಿದರು. ಪ್ರತಿಯೊಂದು ತರಗತಿಯೂ ಅರ್ಥಪೂರ್ಣ ಕಲಿಕೆಯ ಸ್ಥಳವಾಗುವುದನ್ನು ಮತ್ತು ಪ್ರತಿ ಮಗುವಿನ ಸಾಮರ್ಥ್ಯವನ್ನು ಪೋಷಿಸುವ ಬಗ್ಗೆ ಖಚಿತಪಡಿಸಿಕೊಳ್ಳಲು ಎಲ್ಲಾ ಪಾಲುದಾರರು ಗಮನಹರಿಸಬೇಕು ಮತ್ತು ಸಕ್ರಿಯ ಕ್ರಮಗಳನ್ನು ತೆಗೆದುಕೊಳ್ಳಬೇಕೆಂದು ಅವರು ಒತ್ತಾಯಿಸಿದರು.

ಅಖಿಲ ಭಾರತೀಯ ಶಿಕ್ಷಾ ಸಮಾಗಮವು ಕೇವಲ ಒಂದು ಸಮಾವೇಶವಲ್ಲ, ಬದಲಾಗಿ ಅಭಿವೃದ್ಧಿ ಹೊಂದಿದ ಭಾರತವನ್ನು ನಿರ್ಮಿಸುವ ರಾಷ್ಟ್ರೀಯ ಸಂಕಲ್ಪದ ಸಾಮೂಹಿಕ ಅಭಿವ್ಯಕ್ತಿಯಾಗಿದೆ. ತರಗತಿ ಕೊಠಡಿಗಳಿಂದ ಸೃಜನಶೀಲತೆಯವರೆಗೆ ಮತ್ತು ಕಲಿಕೆಯಿಂದ ರಾಷ್ಟ್ರ ನಿರ್ಮಾಣದತ್ತ ಸಾಗುವ ರಾಷ್ಟ್ರೀಯ ಶಿಕ್ಷಣ ನೀತಿ 2020ರ ಪರಿಣಾಮಕಾರಿ ಅನುಷ್ಠಾನಕ್ಕೆ ಎಲ್ಲರೂ ಸಂಪೂರ್ಣ ಮನಸ್ಸಿನಿಂದ ಬದ್ಧರಾಗಬೇಕೆಂದು ಅವರು ಕರೆ ನೀಡಿದರು.

ಶ್ರೀ ಧರ್ಮೇಂದ್ರ ಪ್ರಧಾನ್ ಅವರು ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ (DoSEL) ಮತ್ತು ಉನ್ನತ ಶಿಕ್ಷಣ ಇಲಾಖೆ (DoHE) ಯ ಈ ಕೆಳಗಿನ ಉಪಕ್ರಮಗಳಿಗೆ ಚಾಲನೆ ನೀಡಿದರು:

ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ (DoSEL) ಉಪಕ್ರಮಗಳು

ಶಿಲಾನ್ಯಾಸ/ ಉದ್ಘಾಟನೆ:

1. ಸಿ.ಬಿ.ಎಸ್.ಇ: ಪಾಟ್ನಾದ ದಿಘಾದಲ್ಲಿ ಹೊಸದಾಗಿ ನಿರ್ಮಿಸಲಾದ ಸಿ.ಬಿ.ಎಸ್.ಇ ಪ್ರಾದೇಶಿಕ ಕಚೇರಿ ಕಟ್ಟಡ

2. ಎನ್.ವಿ.ಎಸ್: ಎನ್.ವಿ.ಎಸ್ ನ ಕೆಳಗಿನ ಕ್ಯಾಂಪಸ್ ಗಳು ಮತ್ತು ಸೌಲಭ್ಯಗಳನ್ನು ಉದ್ಘಾಟಿಸಲಾಯಿತು.

i.        ಜೆ.ಎನ್.ವಿ ಜುನಾಗಢ್ (ಗುಜರಾತ್) ನಲ್ಲಿ ಶಾಶ್ವತ ಕ್ಯಾಂಪಸ್

ii.       ಜೆ.ಎನ್.ವಿ ದೇವಭೂಮಿ ದ್ವಾರಕ (ಗುಜರಾತ್) ನಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

iii.      ಜೆ.ಎನ್.ವಿ ಮಹಿಸಾಗರ್ (ಗುಜರಾತ್) ನಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

iv.      ಜೆ.ಎನ್.ವಿ ಮೊರ್ಬಿ (ಗುಜರಾತ್) ನಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

v.       ಜೆ.ಎನ್.ವಿ ಶಹದೋಲ್ (ಮಧ್ಯಪ್ರದೇಶ) ನಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

vi.      ಜೆ.ಎನ್.ವಿ ಉಮಾರಿಯಾ (ಮಧ್ಯಪ್ರದೇಶ) ದಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

vii.     ಜೆ.ಎನ್.ವಿ ಜಶ್ಪುರ (ಛತ್ತೀಸ್ಗಢ) ದಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

viii.    ಜೆ.ಎನ್.ವಿ ಲಹೌಲ್ ಮತ್ತು ಸ್ಪಿತಿ (ಹಿಮಾಚಲ ಪ್ರದೇಶ) ಯಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

ix.      ಜೆ.ಎನ್.ವಿ ಶೋಪಿಯಾನ್ (ಜಮ್ಮು ಮತ್ತು ಕಾಶ್ಮೀರ) ನಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

x.       ಜೆ.ಎನ್.ವಿ ಫಜಿಲ್ಕಾ (ಪಂಜಾಬ್) ನಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

xi.      ಜೆ.ಎನ್.ವಿ ಗುರುದಾಸಪುರ (ಪಂಜಾಬ್) ನಲ್ಲಿ ವಸತಿ ನಿಲಯಗಳು ಮತ್ತು ಸಿಬ್ಬಂದಿ ವಸತಿ ನಿಲಯಗಳು

3. ಕೆ.ವಿ.ಎಸ್: ಕೆ.ವಿ ಐಟಿಬಿಪಿ ಶಿವಗಂಗೈ (ತಮಿಳುನಾಡು); ಕೆ.ವಿ ಸಂಧೋಲೆ (ಹಿಮಾಚಲ ಪ್ರದೇಶ): ಕೆ.ವಿ ಉದಲ್ಗುರಿ (ಅಸ್ಸಾಂ); ಕೆ.ವಿ ಬಿ ಎಸ್ ಎಫ್ ಟೇಕನ್ಪುರ್ (ಮಧ್ಯಪ್ರದೇಶ); ಕೆ.ವಿ ಜೂರಿಯನ್ (ಜಮ್ಮು ಮತ್ತು ಕಾಶ್ಮೀರ); ಕೆ.ವಿ ಐಟಿಬಿಪಿ ಶಿವಗಂಗೈ (ತಮಿಳುನಾಡು); ಮತ್ತು ಕೆ.ವಿ.ಭೀಮತಳ್ (ಉತ್ತರಾಖಂಡ) ಉದ್ಘಾಟಿಸಲಾಯಿತು:

4. ಎನ್.ಸಿ.ಇ.ಆರ್.ಟಿ

i.        ನೆಲ್ಲೂರಿನ ಪ್ರಾದೇಶಿಕ ಶಿಕ್ಷಣ ಸಂಸ್ಥೆಗೆ ಭೂಮಿ ಪೂಜೆ

ii.       ನವದೆಹಲಿಯ ಎನ್.ಸಿ.ಇ.ಆರ್.ಟಿ ಪ್ರಧಾನ ಕಚೇರಿಯ ಕೇಂದ್ರ ಆಡಳಿತ ಕಟ್ಟಡಕ್ಕೆ ಶಿಲಾನ್ಯಾಸ.

5. (i) ಪಿ.ಎಂ  ಜನಮನ್:

2023-24 ರಿಂದ 2025-26 ರವರೆಗೆ ಶಿಕ್ಷಣ ಮತ್ತು ಅಗತ್ಯ ಮೂಲಸೌಕರ್ಯದಲ್ಲಿನ ಅಂತರವನ್ನು ನಿವಾರಿಸುವ ಮೂಲಕ ವಿಶೇಷವಾಗಿ ದುರ್ಬಲ ಬುಡಕಟ್ಟು ಗುಂಪುಗಳ (ಪಿ.ವಿ.ಟಿ.ಜಿ) ಉನ್ನತಿಯ ಗುರಿಯನ್ನು ಹೊಂದಿರುವ ಪರಿವರ್ತನಾ ಉಪಕ್ರಮವಾದ ಪ್ರಧಾನ ಮಂತ್ರಿ ಜನಜಾತಿ ಆದಿವಾಸಿ ನ್ಯಾಯ ಮಹಾ ಅಭಿಯಾನ (ಪಿ.ಎಂ-ಜನಮನ್) ಅನ್ನು 2023 ರ ನವೆಂಬರ್ 15 ರಂದು ಪ್ರಧಾನ ಮಂತ್ರಿಯವರು ಪ್ರಾರಂಭಿಸಿದರು. ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯು ಸಮಗ್ರ ಶಿಕ್ಷಾ ಯೋಜನೆಯೊಂದಿಗೆ ತನ್ನ ಪ್ರಯತ್ನಗಳನ್ನು ಜೋಡಿಸುವಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುತ್ತದೆ, ಅಲ್ಲದೆ, ಬುಡಕಟ್ಟು ವ್ಯವಹಾರಗಳ ಸಚಿವಾಲಯ ತಡೆರಹಿತ ಸಮನ್ವಯಕ್ಕಾಗಿ ನೋಡಲ್ ಸಚಿವಾಲಯವಾಗಿ ಕಾರ್ಯನಿರ್ವಹಿಸುತ್ತದೆ. ಅಭಿಯಾನದ ಪ್ರಮುಖ ಗಮನವೆಂದರೆ ಪಿ.ವಿ.ಟಿ.ಜಿ ವಿದ್ಯಾರ್ಥಿಗಳಿಗೆ ಸುರಕ್ಷಿತ ಮತ್ತು ಬೆಂಬಲಿತ ಕಲಿಕಾ ವಾತಾವರಣವನ್ನು ಒದಗಿಸಲು ಮಿಷನ್ ಅವಧಿಯಲ್ಲಿ 500 ಹಾಸ್ಟೆಲ್ ಗಳ ನಿರ್ಮಾಣ. ಇಲ್ಲಿಯವರೆಗೆ, 38250 ವಿದ್ಯಾರ್ಥಿಗಳ ಸಾಮರ್ಥ್ಯವಿರುವ 492 ಹಾಸ್ಟೆಲ್ ಗಳನ್ನು ಮಂಜೂರು ಮಾಡಲಾಗಿದೆ, ಇದು 5668 ಹಿಂದುಳಿದ ಪಿ.ವಿ.ಟಿ.ಜಿ ಜನವಸತಿ ಮತ್ತು 788349 ಪಿ.ವಿ.ಟಿ.ಜಿ ಜನಸಂಖ್ಯೆಯನ್ನು ಒಳಗೊಂಡಿದೆ, ಈ ಪ್ರಯತ್ನವನ್ನು ಬೆಂಬಲಿಸಲು ₹1234.58 ಕೋಟಿ (772.01 ಕೋಟಿ ಕೇಂದ್ರ ಪಾಲು) ಆರ್ಥಿಕ ವೆಚ್ಚವನ್ನು ಮಂಜೂರು ಮಾಡಲಾಗಿದೆ. ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್.ಇ.ಪಿ) 2020 ರ ವಾರ್ಷಿಕೋತ್ಸವವನ್ನು ಗುರುತಿಸಲು ಜುಲೈ 29, 2025 ರಂದು, 8 ರಾಜ್ಯಗಳಲ್ಲಿ ₹187.35 ಕೋಟಿ ವೆಚ್ಚದ 75 ಹಾಸ್ಟೆಲ್ ಗಳಿಗೆ ಅಡಿಪಾಯ ಹಾಕಲಾಯಿತು.

(ii) ಡಿ.ಎ-ಜೆ.ಜಿ.ಯು.ಎ:

ಡಿ.ಎ-ಜೆ.ಜಿ.ಯು.ಎ ('ಧರ್ತಿ ಆಬಾ ಜನಜಾತೀಯ ಗ್ರಾಮ ಉತ್ಕರ್ಷ್ ಅಭಿಯಾನ') ಕ್ಕೆ ಮಾನ್ಯ ಪ್ರಧಾನ ಮಂತ್ರಿಯವರು 02.10.2024 ರಂದು ಚಾಲನೆ ನೀಡಿದರು, ಇದು ಮಹತ್ವಾಕಾಂಕ್ಷೆಯ ಜಿಲ್ಲೆಗಳಲ್ಲಿನ 63,000 ಕ್ಕೂ ಹೆಚ್ಚು ಬುಡಕಟ್ಟು ಬಹುಸಂಖ್ಯಾತ ಗ್ರಾಮಗಳು ಮತ್ತು ಬುಡಕಟ್ಟು ಗ್ರಾಮಗಳಲ್ಲಿ ನಿರ್ದಿಷ್ಟ ಕ್ರಮಗಳೊಂದಿಗೆ ಪರಿಪೂರ್ಣತೆಯನ್ನು ಸಾಧಿಸುವ ಗುರಿಯನ್ನು ಹೊಂದಿದೆ. ಡಿ.ಎ-ಜೆ.ಜಿ.ಯು.ಎ ಯೋಜನೆಯು ಅವಧಿ 2024-25 ರಿಂದ 2028-29 ರವರೆಗೆ ಆಗಿದ್ದು, ಈ ಅವಧಿಯಲ್ಲಿ ಸಮಗ್ರ ಶಿಕ್ಷಾ ಅಡಿಯಲ್ಲಿ 1000 ಹಾಸ್ಟೆಲ್ ಗಳನ್ನು ನಿರ್ಮಿಸುವ ಗುರಿಯನ್ನು ಹೊಂದಲಾಗಿದೆ. ಶಿಕ್ಷಣ ಸಚಿವಾಲಯದ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯು ಅಭಿಯಾನದಲ್ಲಿ ಭಾಗವಹಿಸುವ ಸಚಿವಾಲಯಗಳಲ್ಲಿ ಒಂದಾಗಿದೆ. ರಾಷ್ಟ್ರೀಯ ಶಿಕ್ಷಣ ನೀತಿ 2020 ರ ಆಶಯಕ್ಕೆ ಅನುಗುಣವಾಗಿ ಈ ಇಲಾಖೆಯ ಸಮಗ್ರ ಶಿಕ್ಷಾ ಯೋಜನೆಯ ಜೊತೆಯಲ್ಲಿ ಇದನ್ನು ಜಾರಿಗೊಳಿಸಲಾಗುತ್ತಿದೆ. ಗುಣಾತ್ಮಕ ಮತ್ತು ಸಮಗ್ರ ಶಿಕ್ಷಣ ಮತ್ತು ಕೌಶಲ್ಯಗಳಿಗೆ ಕಾರಣವಾಗುವ ಗುಣಮಟ್ಟದ ಶಿಕ್ಷಣಕ್ಕೆ ಉತ್ತಮ ಪ್ರವೇಶವನ್ನು ಒದಗಿಸುವ ಮೂಲಕ ಈ ಯೋಜನೆ ಬುಡಕಟ್ಟು ಸಮುದಾಯಗಳನ್ನು ಸಬಲೀಕರಣ ಮಾಡುತ್ತದೆ. ಇಲ್ಲಿಯವರೆಗೆ, ಡಿ.ಎ-ಜೆ.ಜಿ.ಯು.ಎ ನಲ್ಲಿ ₹2512.03 ಕೋಟಿ (ಕೇಂದ್ರ ಪಾಲು 1933.60 ಕೋಟಿ) ವೆಚ್ಚದ ಒಟ್ಟು 692 ಹಾಸ್ಟೆಲ್ ಗಳನ್ನು ಮಂಜೂರು ಮಾಡಲಾಗಿದೆ. ರಾಷ್ಟ್ರೀಯ ಶಿಕ್ಷಣ ನೀತಿ 2020 ರ ವಾರ್ಷಿಕೋತ್ಸವದ ನೆನಪಿಗಾಗಿ, ಜುಲೈ 29, 2025 ರಂದು, 12 ರಾಜ್ಯಗಳಲ್ಲಿ ₹1190.34 ಕೋಟಿ ವೆಚ್ಚದ 309 ಹಾಸ್ಟೆಲ್ ಗಳಿಗೆ ಅಡಿಪಾಯ ಹಾಕಲಾಯಿತು.

ರಾಷ್ಟ್ರಕ್ಕೆ ಸಮರ್ಪಣೆ:

1. ರಾಷ್ಟ್ರ ಸಮರ್ಪಣೆಗಾಗಿ 22 ಕೆ.ವಿ.ಎಸ್ ಯೋಜನೆಗಳನ್ನು ಗುರುತಿಸಲಾಗಿದೆ

2. ಪಿ.ಎಂ ಶ್ರೀ: 613 ಪಿ.ಎಂ ಶ್ರೀ ಅತ್ಯುತ್ತಮ ಪ್ರದರ್ಶನ ನೀಡುವ ಶಾಲೆಗಳು ಪ್ರತಿ ಜಿಲ್ಲೆಯಿಂದ ಒಂದು, ಪ್ರತಿ ಪ್ರದೇಶದಿಂದ 24 ಅತ್ಯುತ್ತಮ ಕೆ.ವಿ.ಎಸ್ ಒಂದು ಮತ್ತು ಪ್ರತಿ ಪ್ರದೇಶದಿಂದ 7 ಅತ್ಯುತ್ತಮ ಎನ್.ವಿ.ಎಸ್ ಒಂದು ಶಾಲೆಗಳನ್ನು ರಾಷ್ಟ್ರಕ್ಕೆ ಸಮರ್ಪಣೆಗಾಗಿ ಗುರುತಿಸಲಾಗಿದೆ, ಇವು ಎಲ್ಲಾ ಪರಿಪೂರ್ಣತೆ ಘಟಕಗಳನ್ನು ಪ್ರದರ್ಶಿಸುತ್ತವೆ.

ಡಿಜಿಟಲ್ ಉದ್ಘಾಟನೆ:

ತಾರಾ (TARA) ಅಪ್ಲಿಕೇಶನ್:

TARA ಅಪ್ಲಿಕೇಶನ್ ಪೋರ್ಟಲ್, 3–8 ನೇ ತರಗತಿಯ ವಿದ್ಯಾರ್ಥಿಗಳಲ್ಲಿ ಓದುವ ನಿರರ್ಗಳತೆಯನ್ನು ಮೌಲ್ಯಮಾಪನ ಮಾಡಲು ಮತ್ತು ಸುಧಾರಿಸಲು ದೃಢವಾದ ವೇದಿಕೆಯನ್ನು ಒದಗಿಸುವ ಮೂಲಕ ಶಿಕ್ಷಣ ಆಡಳಿತದಲ್ಲಿ ದತ್ತಾಂಶ ಆಧಾರಿತ ನಿರ್ಧಾರ ತೆಗೆದುಕೊಳ್ಳುವಿಕೆಯನ್ನು ಸಕ್ರಿಯಗೊಳಿಸುವ ಗುರಿಯನ್ನು ಹೊಂದಿದೆ. ಇದು ರಚನಾತ್ಮಕ ಬೋಧನೆ, ಉದ್ದೇಶಿತ ಪರಿಹಾರ ಮತ್ತು ಕಲಿಕೆಯ ಫಲಿತಾಂಶಗಳ ನಿರಂತರ ಮೇಲ್ವಿಚಾರಣೆಯನ್ನು ಬೆಂಬಲಿಸುತ್ತದೆ. ಪ್ರಮುಖ ಲಕ್ಷಣಗಳು:

i.  ಸ್ವಯಂಚಾಲಿತ ಒ.ಆರ್.ಎಫ್ ಮೌಲ್ಯಮಾಪನ: ಧ್ವನಿ ಮುದ್ರಣಗಳಿಂದ ಓದುವ ನಿರರ್ಗಳತೆಯನ್ನು ಮೌಲ್ಯಮಾಪನ ಮಾಡಲು ಭಾಷಣ ಸಂಸ್ಕರಣೆ ಮತ್ತು ಯಂತ್ರ ಕಲಿಕೆಯನ್ನು ಬಳಸುತ್ತದೆ.

ii.  ಬಹುಭಾಷಾ ಬೆಂಬಲ: ಪ್ರಸ್ತುತ ಇಂಗ್ಲಿಷ್ ಮತ್ತು ಹಿಂದಿಯನ್ನು ಬೆಂಬಲಿಸುತ್ತದೆ ಮತ್ತು ವಿಸ್ತರಿಸುವ ಸಾಧ್ಯತೆಯಿದೆ.

iii. ಸಮಗ್ರ ಸ್ಕೋರಿಂಗ್: ಓದುವ ಅಭಿವ್ಯಕ್ತಿ ಮತ್ತು ಗ್ರಹಿಕೆಯನ್ನು ನಿರ್ಣಯಿಸಲು WCPM (ನಿಮಿಷಕ್ಕೆ ಸರಿಯಾದ ಪದಗಳು), ಪದಗುಚ್ಛ, ಸ್ವರ ಮತ್ತು ಒತ್ತಡವನ್ನು ಅಳೆಯುತ್ತದೆ.

iv. ಪ್ರಮಾಣ: 1200 ಕೇಂದ್ರೀಯ ವಿದ್ಯಾಲಯಗಳಲ್ಲಿ ಯಶಸ್ವಿಯಾಗಿ ಅಳವಡಿಸಲಾಗಿದೆ, 7 ಲಕ್ಷಕ್ಕೂ ಹೆಚ್ಚು ವಿದ್ಯಾರ್ಥಿಗಳನ್ನು ಮೌಲ್ಯಮಾಪನ ಮಾಡಲಾಗಿದೆ.

v. ಡೇಟಾ ಒಳನೋಟಗಳು: ಬೋಧನಾ ತಂತ್ರಗಳು ಮತ್ತು ಪರಿಹಾರ ಮಧ್ಯಸ್ಥಿಕೆಗಳಿಗೆ ಮಾರ್ಗದರ್ಶನ ನೀಡಲು ಕಾರ್ಯಸಾಧ್ಯ ಡೇಟಾವನ್ನು ಉತ್ಪಾದಿಸುತ್ತದೆ.

ಪರಿಣಾಮ:

•  ಸಾಮರ್ಥ್ಯ ಆಧಾರಿತ ಶಿಕ್ಷಣ ಮತ್ತು ಕಲಿಕೆಯ ಫಲಿತಾಂಶ ಮಾಪನಗಳನ್ನು ಸುಗಮಗೊಳಿಸುತ್ತದೆ.

• ವಸ್ತುನಿಷ್ಠ ಪ್ರತಿಕ್ರಿಯೆ ಮತ್ತು ವೈಯಕ್ತಿಕಗೊಳಿಸಿದ ಬೋಧನಾ ಯೋಜನೆಗಳೊಂದಿಗೆ ಶಿಕ್ಷಕರಿಗೆ ಬೆಂಬಲ ನೀಡುತ್ತದೆ.

• ಪುರಾವೆ ಆಧಾರಿತ ನೀತಿ ಸೂತ್ರೀಕರಣದ ಮೂಲಕ ಶಿಕ್ಷಣ ಆಡಳಿತವನ್ನು ಬಲಪಡಿಸುತ್ತದೆ.

ಮೈ ಕೆರಿಯರ್ ಅಡ್ವೈಸರ್ ಅಪ್ಲಿಕೇಶನ್:

ವಿದ್ಯಾರ್ಥಿಗಳು ತಿಳುವಳಿಕೆಯುಳ್ಳ ವೃತ್ತಿ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಅನುವು ಮಾಡಿಕೊಡಲು, ಭಾರತ ಸರ್ಕಾರದ ಶಿಕ್ಷಣ ಸಚಿವಾಲಯದ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯು "ಮೈ ಕೆರಿಯರ್ ಅಡ್ವೈಸರ್ ಅಪ್ಲಿಕೇಶನ್" ಅನ್ನು ಪ್ರಾರಂಭಿಸಿದೆ, ಇದು ಸಮಗ್ರ, ವಿದ್ಯಾರ್ಥಿ ಕೇಂದ್ರಿತ ಡಿಜಿಟಲ್ ವೇದಿಕೆಯಾಗಿದೆ. ವಾಧ್ವಾನಿ ಫೌಂಡೇಶನ್ ಮತ್ತು PSSCIVE (ಎನ್.ಸಿ.ಇ.ಆರ್.ಟಿ ಯ ಘಟಕ) ಸಹಯೋಗದೊಂದಿಗೆ ಅಭಿವೃದ್ಧಿಪಡಿಸಲಾದ ಈ ಅಪ್ಲಿಕೇಶನ್, ದೇಶಾದ್ಯಂತ ಶಾಲಾ ವಿದ್ಯಾರ್ಥಿಗಳಿಗೆ ವೈಯಕ್ತಿಕಗೊಳಿಸಿದ ವೃತ್ತಿ ಮಾರ್ಗದರ್ಶನವನ್ನು ಒದಗಿಸುವ ಗುರಿಯನ್ನು ಹೊಂದಿದೆ. ಈ ಅಪ್ಲಿಕೇಶನ್ ಉದ್ಯೋಗ ಪಾತ್ರಗಳು, ಶೈಕ್ಷಣಿಕ ಅವಶ್ಯಕತೆಗಳು, ಅಗತ್ಯವಿರುವ ಕೌಶಲ್ಯಗಳು ಮತ್ತು ಭವಿಷ್ಯದ ನಿರೀಕ್ಷೆಗಳ ಕುರಿತು ವಿವರವಾದ ಮಾಹಿತಿಯನ್ನು ಒಳಗೊಂಡಂತೆ 1000 ಕ್ಕೂ ಹೆಚ್ಚು ವೃತ್ತಿ ಆಯ್ಕೆಗಳಿಗೆ ಪ್ರವೇಶವನ್ನು ಒದಗಿಸುತ್ತದೆ. ಇದು ವಿದ್ಯಾರ್ಥಿಗಳ ಆಸಕ್ತಿಗಳು, ಸಾಮರ್ಥ್ಯಗಳು ಮತ್ತು ಮೌಲ್ಯಗಳ ಆಧಾರದ ಮೇಲೆ ವೃತ್ತಿ ಆಯ್ಕೆಗಳನ್ನು ಸೂಚಿಸುವ ಬುದ್ಧಿವಂತ ಶಿಫಾರಸು ಎಂಜಿನ್ ಅನ್ನು ಹೊಂದಿದ್ದು, ಪ್ರತಿಯೊಬ್ಬ ಬಳಕೆದಾರರಿಗೆ ಮಾರ್ಗದರ್ಶನವನ್ನು ಸಂಪೂರ್ಣವಾಗಿ ಕಸ್ಟಮೈಸ್ ಮಾಡುತ್ತದೆ. ಯಾವುದೇ ಸಮಯದಲ್ಲಿ, ಎಲ್ಲಿಯಾದರೂ ಬಳಸಲು ಸುಲಭ ಮತ್ತು ಪ್ರವೇಶಿಸಬಹುದಾದಂತೆ ವಿನ್ಯಾಸಗೊಳಿಸಲಾದ ಈ ಅಪ್ಲಿಕೇಶನ್ ಶಿಕ್ಷಕರು, ಶಾಲಾ ಸಲಹೆಗಾರರು ಮತ್ತು ವೃತ್ತಿ ಸಲಹೆಗಾರರು ತಮ್ಮ ವಿದ್ಯಾರ್ಥಿಗಳನ್ನು ಪರಿಣಾಮಕಾರಿಯಾಗಿ ಬೆಂಬಲಿಸಲು ಅಮೂಲ್ಯವಾದ ಸಂಪನ್ಮೂಲವಾಗಿಯೂ ಕಾರ್ಯನಿರ್ವಹಿಸುತ್ತದೆ. ಆಕಾಂಕ್ಷೆಗಳು ಮತ್ತು ಅವಕಾಶಗಳ ನಡುವಿನ ಅಂತರವನ್ನು ಕಡಿಮೆ ಮಾಡುವ ಮೂಲಕ, ಈ ಉಪಕ್ರಮವು ಸಮಗ್ರ, ಸಂಯೋಜಿತ ಮತ್ತು ಭವಿಷ್ಯಕ್ಕೆ ಸಿದ್ಧವಾದ ಶಿಕ್ಷಣವನ್ನು ಒದಗಿಸುವ ರಾಷ್ಟ್ರೀಯ ಶಿಕ್ಷಣ ನೀತಿ 2020 ರ ದೃಷ್ಟಿಕೋನವನ್ನು ಬೆಂಬಲಿಸುತ್ತದೆ.

ಸ್ವಚ್ಛ ಮತ್ತು ಹಸಿರು ಶಾಲಾ ರೇಟಿಂಗ್ (ಎಸ್.ಎಚ್.ವಿ.ಆರ್) – 2025-26

ಎಸ್.ಎಚ್.ವಿ.ಆರ್ ಆರು ವಿಭಾಗಗಳಲ್ಲಿ 60 ಸೂಚಕಗಳನ್ನು ಮೌಲ್ಯಮಾಪನ ಮಾಡುವ 5-ಸ್ಟಾರ್ ರೇಟಿಂಗ್ ವ್ಯವಸ್ಥೆಯನ್ನು ಪರಿಚಯಿಸಿದೆ: ನೀರು, ಶೌಚಾಲಯಗಳು, ಸಾಬೂನಿನಿಂದ ಕೈ ತೊಳೆಯುವುದು, ಕಾರ್ಯಾಚರಣೆ ಮತ್ತು ನಿರ್ವಹಣೆ, ನಡವಳಿಕೆ ಬದಲಾವಣೆ ಮತ್ತು ಸಾಮರ್ಥ್ಯ ವೃದ್ಧಿ, ಮತ್ತು ಪರಿಸರ ಜವಾಬ್ದಾರಿಗಾಗಿ ಹೊಸ ಮಿಷನ್ ಲೈಫ್ ಚಟುವಟಿಕೆಗಳು.

ಎಸ್ ಎಚ್ ವಿ ಆರ್ ಸುಧಾರಿತ ಮೌಲ್ಯಮಾಪನ ಪರಿಕರಗಳು, ಸರಳೀಕೃತ ಪ್ರಶ್ನಾವಳಿಗಳು ಮತ್ತು ಅಭಿವೃದ್ಧಿಪಡಿಸಿದ ದೃಢವಾದ ಐಟಿ ವೇದಿಕೆಯನ್ನು ಎನ್.ಸಿ.ಇ.ಆರ್.ಟಿ, ಎನ್ ಐ ಸಿ ಮತ್ತು ಯುನಿಸೆಫ್ ನೊಂದಿಗೆ ನಿರ್ಮಿಸುತ್ತದೆ. ಪರಿಷ್ಕೃತ ಮಾರ್ಗಸೂಚಿಗಳ ಪ್ರಕಾರ, ಶಾಲೆಯ ಸ್ಟಾರ್ ರೇಟಿಂಗ್ ಪ್ರತಿ ಶಾಲೆಗೆ ಅನ್ವಯಿಸುತ್ತದೆ. ಮಾನ್ಯತೆಗಾಗಿ 4 ವರ್ಗಗಳ ಶಾಲೆಗಳು (ಮೆರಿಟ್ ಪ್ರಮಾಣಪತ್ರ) ಇರುತ್ತವೆ, ಅವುಗಳಲ್ಲಿ 3 ಗ್ರಾಮೀಣ ವರ್ಗ-I, 3 ಗ್ರಾಮೀಣ ವರ್ಗ-II, 1 ನಗರ ವರ್ಗ- I, ಮತ್ತು 1 ನಗರ ವರ್ಗ-II, ಜಿಲ್ಲಾ ಮಟ್ಟದಲ್ಲಿ ಒಟ್ಟು 8 ಶಾಲೆಗಳನ್ನು ಒಳಗೊಂಡಿದ್ದು, ರಾಜ್ಯ ಮಟ್ಟದ ಮಾನ್ಯತೆಗಾಗಿ (ಮೆರಿಟ್ ಪ್ರಮಾಣಪತ್ರ) ನಾಮನಿರ್ದೇಶನಕ್ಕಾಗಿ ಪರಿಗಣಿಸಲಾಗುತ್ತದೆ.

ರಾಜ್ಯ ಮಟ್ಟದಲ್ಲಿ, ಒಟ್ಟಾರೆ ಅಂಕಗಳ ಆಧಾರದ ಮೇಲೆ ಮಾನ್ಯತೆ (ಮೆರಿಟ್ ಪ್ರಮಾಣಪತ್ರ) ನೀಡಲಾಗುತ್ತದೆ. ಪ್ರತಿ ರಾಜ್ಯ/ಕೇಂದ್ರಾಡಳಿತ ಪ್ರದೇಶದಿಂದ ಐದು ಸ್ಟಾರ್ ರೇಟಿಂಗ್ ಹೊಂದಿರುವ ಗರಿಷ್ಠ 20 ಶಾಲೆಗಳು, 7 ಗ್ರಾಮೀಣ ವರ್ಗ-I, 7 ಗ್ರಾಮೀಣ ವರ್ಗ-II, 3 ನಗರ ವರ್ಗ-I ಮತ್ತು 3 ನಗರ ವರ್ಗ-II, ರಾಷ್ಟ್ರೀಯ ಮಟ್ಟದ ಆಯ್ಕೆ ಮಾನದಂಡಗಳಿಗೆ ಅನುಗುಣವಾಗಿರುವ ಶಾಲೆಗಳನ್ನು ರಾಷ್ಟ್ರೀಯ ಮಟ್ಟದ ಮಾನ್ಯತೆ (ಮೆರಿಟ್ ಪ್ರಮಾಣಪತ್ರ) ನಾಮನಿರ್ದೇಶನಕ್ಕಾಗಿ ಪರಿಗಣಿಸಲಾಗುತ್ತದೆ.

ರಾಷ್ಟ್ರಮಟ್ಟದಲ್ಲಿ, 200 ಅಗ್ರ ಶಾಲೆಗಳನ್ನು ಅರ್ಹತೆಯ ಪ್ರಮಾಣಪತ್ರದೊಂದಿಗೆ ಗುರುತಿಸಲಾಗುತ್ತದೆ, 70 ಗ್ರಾಮೀಣ ವರ್ಗ-I, 30 ನಗರ ವರ್ಗ-I, 70 ಗ್ರಾಮೀಣ ವರ್ಗ-II ಮತ್ತು 30 ನಗರ ವರ್ಗ-II ಎಂದು ಗುರುತಿಸಲು ವರ್ಗವಾರು ಶಾಲೆಗಳನ್ನು ಪರಿಗಣಿಸಲಾಗುತ್ತದೆ.

ಉನ್ನತ ಶಿಕ್ಷಣ ಇಲಾಖೆಯ(DoHE) ಉಪಕ್ರಮಗಳು

1.       ವೆಬ್ ಆಧಾರಿತ ಸ್ಥಳೀಯ ಭಾಷಾ ಪ್ರಾವೀಣ್ಯತೆ ಪರೀಕ್ಷಾ ಪೋರ್ಟಲ್

ರಾಷ್ಟ್ರೀಯ ಪರೀಕ್ಷಾ -ಭಾರತ (ಎನ್ ಟಿ ಎಸ್-ಐ) ಪರೀಕ್ಷೆ ಮತ್ತು ಮೌಲ್ಯಮಾಪನದ ಕುರಿತು ಸಂಶೋಧನೆ ನಡೆಸುತ್ತದೆ ಮತ್ತು 22 ಭಾರತೀಯ ಭಾಷೆಗಳಲ್ಲಿ ಆಲಿಸುವುದು, ಮಾತನಾಡುವುದು, ಓದುವುದು ಮತ್ತು ಬರೆಯುವುದು (ಎಲ್ ಎಸ್ ಆರ್ ಡಬ್ಲ್ಯು) ಕೌಶಲ್ಯಗಳನ್ನು ನಿರ್ಣಯಿಸುವ ಆನ್ಲೈನ್ ಪರೀಕ್ಷೆಗಳನ್ನು ನಿರ್ವಹಿಸುವ ವೆಬ್ ಆಧಾರಿತ ಸ್ಥಳೀಯ ಭಾಷಾ ಪ್ರಾವೀಣ್ಯತೆಯ ಪರೀಕ್ಷಾ ಪೋರ್ಟಲ್ ಅನ್ನು ಅಭಿವೃದ್ಧಿಪಡಿಸಿದೆ, ಇದು 1,825 ಪರೀಕ್ಷೆಗಳನ್ನು ಒಳಗೊಂಡ 182,480 ಎಲ್ ಎಸ್ ಆರ್ ಡಬ್ಲ್ಯು ವಿಷಯಗಳ ಡೇಟಾಬೇಸ್ ಅನ್ನು ಒಳಗೊಂಡಿದೆ. ವಿಷಯ ಅಭಿವೃದ್ಧಿಯ ಭಾಗವಾಗಿ, ಇದು ಭಾರತೀಯ ಭಾಷೆಯಲ್ಲಿ ಪರೀಕ್ಷೆ ಮತ್ತು ಮೌಲ್ಯಮಾಪನದ ಕುರಿತು ಸಂಶೋಧನಾ ಕಾರ್ಯವನ್ನು ಸಹ ಮಾಡುತ್ತಿದೆ.

2.       ರಾಷ್ಟ್ರೀಯ ಶಿಷ್ಯವೃತ್ತಿ ತರಬೇತಿ ಯೋಜನೆ (ಎನ್.ಎ.ಟಿ.ಎಸ್) ಅಡಿಯಲ್ಲಿ ಎ.ಐ. ಶಿಷ್ಯವೃತ್ತಿಗಳು

ರಾಷ್ಟ್ರೀಯ ಶಿಷ್ಯವೃತ್ತಿ ತರಬೇತಿ ಯೋಜನೆ (ಎನ್.ಎ.ಟಿ.ಎಸ್) ಅಡಿಯಲ್ಲಿ ಕೃತಕ ಬುದ್ಧಿಮತ್ತೆಯಲ್ಲಿ ಶಿಷ್ಯವೃತ್ತಿ (ಎಐ)ಯನ್ನು ಶಿಕ್ಷಣ ಸಚಿವಾಲಯ ಕಲ್ಪಿಸಿದೆ. ಆರೋಗ್ಯ ರಕ್ಷಣೆ, ಉತ್ಪಾದನೆ ಮತ್ತು ನಿರ್ಮಾಣ, ಶಿಕ್ಷಣ, ಬಿ ಎಫ್ ಎಸ್ ಐ (ಬ್ಯಾಂಕಿಂಗ್, ಹಣಕಾಸು ಸೇವೆಗಳು ಮತ್ತು ವಿಮೆ), ಎಲೆಕ್ಟ್ರಾನಿಕ್ಸ್ ಮತ್ತು ಐಟಿ/ಐಟಿಇಎಸ್ ನಂತಹ ಕ್ಷೇತ್ರಗಳಲ್ಲಿ ಬೆಳೆಯುತ್ತಿರುವ ಉದ್ಯಮ ಬೇಡಿಕೆಗಳನ್ನು ಪೂರೈಸಲು ವಿದ್ಯಾರ್ಥಿಗಳ ಎಐ ಜ್ಞಾನ ಮತ್ತು ಕೌಶಲ್ಯಗಳನ್ನು ಹೆಚ್ಚಿಸುವ ಗುರಿಯನ್ನು ಈ ಉಪಕ್ರಮ ಹೊಂದಿದೆ. ಈ ಕಾರ್ಯಕ್ರಮವು ಸುಮಾರು 1 ಲಕ್ಷ ವಿದ್ಯಾರ್ಥಿಗಳಿಗೆ ಪ್ರಯೋಜನವನ್ನು ನೀಡುವ ನಿರೀಕ್ಷೆಯಿದೆ, ಪದವೀಧರರಿಗೆ ಕನಿಷ್ಠ ಮಾಸಿಕ ₹9,000 ಮತ್ತು ಡಿಪ್ಲೊಮಾ ಹೊಂದಿರುವವರಿಗೆ ₹8,000 ಸ್ಟೈಫಂಡ್ ನೀಡಲಾಗುತ್ತದೆ. ಈ ಉಪಕ್ರಮದ ಅಡಿಯಲ್ಲಿ ಒಟ್ಟು ಅಂದಾಜು ಸ್ಟೈಫಂಡ್ ಬೆಂಬಲ ಸುಮಾರು ₹500 ಕೋಟಿಗಳಾಗಿದ್ದು, ಸರ್ಕಾರ ಮತ್ತು ಭಾಗವಹಿಸುವ ಕಂಪನಿಗಳು ಜಂಟಿಯಾಗಿ ಹಣಕಾಸು ಒದಗಿಸುತ್ತವೆ.

3.       ಐ.ಐ.ಟಿ-ಬಿ.ಎಚ್.ಯು ಮತ್ತು ಐ.ಐ.ಟಿ-ದೆಹಲಿಯಲ್ಲಿ ಹೊಸ ಯುಗದ ಪಠ್ಯಕ್ರಮ

ಬಿ.ಟೆಕ್ ವಿದ್ಯಾರ್ಥಿಗಳಿಗೆ ಬಹುಶಿಸ್ತೀಯ ಶಿಕ್ಷಣವನ್ನು ಉತ್ತೇಜಿಸಲು ಮತ್ತು ನಮ್ಯತೆಯನ್ನು ಒದಗಿಸಲು ಐಐಟಿ ಬಿಎಚ್ಯು ಹೊಸ ಯುಗದ ಪಠ್ಯಕ್ರಮವನ್ನು ಪರಿಚಯಿಸಿದೆ. ಈ ಪಠ್ಯಕ್ರಮದ ಅಡಿಯಲ್ಲಿ, ವಿದ್ಯಾರ್ಥಿಗಳು ಐದು ಶೈಕ್ಷಣಿಕ ಆಯ್ಕೆಗಳನ್ನು ಮಾಡಬಹುದು: (ಎ) ಬಿ.ಟೆಕ್., (ಬಿ) ಬಿ.ಟೆಕ್. (ಆನರ್ಸ್.), (ಸಿ) ಮೈನರ್ ನೊಂದಿಗೆ ಬಿ.ಟೆಕ್., (ಡಿ) ಎರಡನೇ ಮೇಜರ್ ನೊಂದಿಗೆ ಬಿ.ಟೆಕ್., ಮತ್ತು (ಇ) ಎಂ.ಟೆಕ್ ಗೆ ವಿಸ್ತರಿಸಲಾದ ಬಿ.ಟೆಕ್. ಈ ಕಾರ್ಯಕ್ರಮವು ಎರಡನೇ ಮೇಜರ್ ಮತ್ತು ಮೈನರ್ ನಡುವೆ ಹೊಂದಿಕೊಳ್ಳುವ ಚಲನೆಯನ್ನು ಅನುಮತಿಸುತ್ತದೆ ಮತ್ತು ಪ್ರಾಯೋಗಿಕ ಅನುಭವವನ್ನು ಒದಗಿಸಲು ಉದ್ಯಮ, ಸಂಶೋಧನೆ ಅಥವಾ ನವೋದ್ಯಮದಲ್ಲಿ ಸೆಮಿಸ್ಟರ್-ಅವಧಿಯ ಇಂಟರ್ನ್ಶಿಪ್ ಅನ್ನು ಒಳಗೊಂಡಿದೆ. ಇದು ರಾಷ್ಟ್ರೀಯ ಶಿಕ್ಷಣ ನೀತಿಗೆ ಅನುಗುಣವಾಗಿ ಹೊಂದಿಕೊಳ್ಳುವ ಪ್ರವೇಶ, ನಿರ್ಗಮನ ಮತ್ತು ಮರು-ಪ್ರವೇಶ ನೀತಿಯನ್ನು ಸಹ ಒಳಗೊಂಡಿದೆ. ಹೆಚ್ಚುವರಿಯಾಗಿ, ಪಾಲುದಾರ ಸಂಸ್ಥೆಗಳೊಂದಿಗೆ ತಿಳುವಳಿಕೆ ಒಪ್ಪಂದಗಳ ಮೂಲಕ ಸೀಮಿತ ಸೆಮಿಸ್ಟರ್-ಅವಧಿಯ ವಿದ್ಯಾರ್ಥಿಗಳ ಚಲನಶೀಲತೆ ಸಾಧ್ಯವಿರುತ್ತದೆ.

ಒಂದು ದಶಕಕ್ಕೂ ಹೆಚ್ಚು ಕಾಲದ ನಂತರ, ಐಐಟಿ ದೆಹಲಿ ತನ್ನ ಪದವಿ, ಸ್ನಾತಕೋತ್ತರ ಮತ್ತು ಪಿ.ಎಚ್.ಡಿ ಪಠ್ಯಕ್ರಮವನ್ನು ಪರಿಷ್ಕರಿಸಿದೆ, ಇದು 2025–26 ಶೈಕ್ಷಣಿಕ ವರ್ಷದಿಂದ ಜಾರಿಗೆ ಬರುತ್ತದೆ. ಪರಿಷ್ಕೃತ ವ್ಯವಸ್ಥೆಯು ನಮ್ಯತೆ, ಪ್ರಾಯೋಗಿಕ ಕಲಿಕೆ, ಪರಿಸರ ಸುಸ್ಥಿರತೆ ಮತ್ತು ಎ.ಐ. ಮತ್ತು ಎಂ.ಎಲ್ ನಂತಹ ಉದಯೋನ್ಮುಖ ತಂತ್ರಜ್ಞಾನಗಳಿಗೆ ಒತ್ತು ನೀಡುತ್ತದೆ.

ಪದವಿ ಪಠ್ಯಕ್ರಮವು ಫಲಿತಾಂಶ ಆಧಾರಿತವಾಗಿದ್ದು, ಸಾಮಾನ್ಯ ಎಂಜಿನಿಯರಿಂಗ್, ವಿಜ್ಞಾನ ಮತ್ತು ಮಾನವಿಕ ವಿಷಯಗಳಲ್ಲಿ ನಮ್ಯತೆಯನ್ನು ನೀಡುತ್ತದೆ. ವಿದ್ಯಾರ್ಥಿಗಳು ತಮ್ಮ ಬಿ.ಟೆಕ್ ಜೊತೆಗೆ ಮೈನರ್, ಸ್ಪೆಷಲೈಜೇಷನ್ ಅಥವಾ ಆನರ್ ಕಾರ್ಯಕ್ರಮವನ್ನು ಮುಂದುವರಿಸಬಹುದು. ಲಭ್ಯವಿರುವ ಯಾವುದೇ ಪ್ರೋಗ್ರಾಂನಲ್ಲಿ ಎಂ.ಟೆಕ್.ಗಾಗಿ ಅರ್ಜಿ ಸಲ್ಲಿಸುವ ಮೂಲಕ ಅವರು ಐದು ವರ್ಷಗಳ ಡ್ಯುಯಲ್ ಪದವಿ (ಬಿ.ಟೆಕ್. + ಎಂ.ಟೆಕ್.) ಅನ್ನು ಸಹ ಆಯ್ಕೆ ಮಾಡಬಹುದು. ಅರ್ಹತೆಯ ಆಧಾರದ ಮೇಲೆ ಮೊದಲ ವರ್ಷದ ನಂತರವೂ ಪ್ರೋಗ್ರಾಂ ಬದಲಾವಣೆಗಳು ಸಾಧ್ಯವಿರುತ್ತದೆ.

ನವೀಕರಿಸಿದ ಎಂ.ಟೆಕ್./ಎಂ.ಎಸ್. (ಸಂಶೋಧನೆ) ಪಠ್ಯಕ್ರಮವು ಉದ್ಯಮದ ಮೇಲೆ ವಿಶೇಷ ಗಮನವನ್ನು ಹೊಂದಿರುವ ತರ್ಕಬದ್ಧ, ಫಲಿತಾಂಶ ಆಧಾರಿತ ರಚನೆಯನ್ನು ಒಳಗೊಂಡಿದೆ. ಇದರ ಪ್ರಮುಖ ಅಂಶಗಳಲ್ಲಿ ತಂಡದ ಕೆಲಸ ಮತ್ತು ಸಮಸ್ಯೆ-ಪರಿಹರಿಸುವ ಕೌಶಲ್ಯಗಳನ್ನು ಅಭಿವೃದ್ಧಿಪಡಿಸಲು ಒಂದು ಅಡಿಪಾಯ ಯೋಜನೆ ಮತ್ತು ಬಾಹ್ಯ ತೊಡಗಿಸಿಕೊಳ್ಳುವಿಕೆಯನ್ನು ಹೆಚ್ಚಿಸಲು ಬೇಸಿಗೆ ಇಂಟರ್ನ್ಶಿಪ್ ಸೇರಿವೆ. ಉದ್ಯಮದ ಸಹಯೋಗದೊಂದಿಗೆ ಮಾಸ್ಟರ್ಸ್ ಥೀಸಿಸ್ ಆಯ್ಕೆಗಳು ಸಹ ಲಭ್ಯವಿದೆ.

ಔಪಚಾರಿಕ ಪಿ ಎಚ್ ಡಿ ಪಠ್ಯಕ್ರಮವು ನೈತಿಕ ಮತ್ತು ವರ್ಗಾಯಿಸಬಹುದಾದ ಕೌಶಲ್ಯಗಳೊಂದಿಗೆ ಸ್ವತಂತ್ರ ಸಂಶೋಧಕರನ್ನು ಅಭಿವೃದ್ಧಿಪಡಿಸುವುದರ ಮೇಲೆ ಕೇಂದ್ರೀಕರಿಸುತ್ತದೆ, ಅದೇ ಸಮಯದಲ್ಲಿ ವೃತ್ತಿಪರ ಮತ್ತು ಸಂಶೋಧನಾ ಶ್ರೇಷ್ಠತೆಯನ್ನು ಹೆಚ್ಚಿಸಲು ಸಹಯೋಗ, ವಲಯ ಪ್ರಗತಿ ಮತ್ತು ಬಾಹ್ಯ/ಉದ್ಯಮ ಸಂಪರ್ಕವನ್ನು ಉತ್ತೇಜಿಸುತ್ತದೆ.

4.       ViBe: ತೊಡಗಿಸಿಕೊಳ್ಳಿ. ಆನಂದಿಸಿ. ಜ್ಞಾನ ಗಳಿಸಿ. – ಐ.ಐ.ಟಿ ರೋಪರ್ ನಿಂದ

ViBe ಎಂಬುದು ಐ.ಐ.ಟಿ ರೋಪರ್ ನ ಶಿಕ್ಷಣ ವಿನ್ಯಾಸ ಪ್ರಯೋಗಾಲಯವು ಅಭಿವೃದ್ಧಿಪಡಿಸಿದ ಎಐ-ಚಾಲಿತ ನಿರಂತರ ಸಕ್ರಿಯ ಕಲಿಕಾ ವೇದಿಕೆಯಾಗಿದೆ. ಇದು ಸ್ಮಾರ್ಟ್ ಪರಿಶೀಲನೆಗಳು, ಹೊಂದಾಣಿಕೆಯ ಸವಾಲುಗಳು ಮತ್ತು ನೈಜ-ಸಮಯದ ಪ್ರತಿಕ್ರಿಯೆಯ ಮೂಲಕ ಕಲಿಯುವವರನ್ನು ಸಕ್ರಿಯವಾಗಿ ತೊಡಗಿಸಿಕೊಳ್ಳುವ ಮೂಲಕ ನಿಜವಾದ ಪಾಂಡಿತ್ಯವನ್ನು ಖಚಿತಪಡಿಸುತ್ತದೆ.

ViBe ಬುದ್ಧಿವಂತಿಕೆಯಿಂದ ಪಾಠಗಳನ್ನು ಸಣ್ಣ, ಆಕರ್ಷಕ ಭಾಗಗಳಾಗಿ ವಿಭಜಿಸುತ್ತದೆ ಮತ್ತು ಆಳವಾದ ತಿಳುವಳಿಕೆ ಮತ್ತು ನಿರಂತರ ಕುತೂಹಲವನ್ನು ಬೆಳೆಸುವ ಚಿಂತನೆಗೆ ಹಚ್ಚುವ ಪ್ರಶ್ನೆಗಳನ್ನು ಸೃಷ್ಟಿಸಲು ಪ್ರಬಲ ಎಐ ಎಂಜಿನ್ ಅನ್ನು ಬಳಸುತ್ತದೆ.

ದೊಡ್ಡ ಪ್ರಮಾಣದ ಜಾಗತಿಕ ಪ್ರಭಾವಕ್ಕಾಗಿ ನಿರ್ಮಿಸಲಾದ ViBe, ಪ್ರಾಮಾಣಿಕ, ಪರಿಣಾಮಕಾರಿ ಮತ್ತು ಆನಂದದಾಯಕವಾದ ಶೈಕ್ಷಣಿಕ ಅನುಭವವನ್ನು ಉತ್ತೇಜಿಸುತ್ತದೆ. ಅದರ ಮುಕ್ತ-ಪ್ರವೇಶ ಮಾದರಿ ಮತ್ತು ರಚನೆಯೊಂದಿಗೆ, ViBe ಜಗತ್ತು ಕಲಿಯುವ ವಿಧಾನವನ್ನು ಬದಲಾಯಿಸಲು ಸಜ್ಜಾಗಿದೆ.

ಮುಖ್ಯವಾಗಿ, ViBe ನಿಯಮಿತ ಕಲಿಕಾ ಪರಿಶೀಲನೆಗಳನ್ನು ಸ್ವಯಂಚಾಲಿತಗೊಳಿಸುವ ಮೂಲಕ ಶಿಕ್ಷಕರನ್ನು ಸಶಕ್ತರನ್ನಾಗಿಸುತ್ತದೆ, ಅನುಭವದ ಮತ್ತು ಮೇಲ್ವಿಚಾರಣೆಯ ತರಗತಿ ಬೋಧನೆಯ ಮೇಲೆ ಗಮನಹರಿಸಲು ಅವರಿಗೆ ಹೆಚ್ಚಿನ ಸಮಯ ಮತ್ತು ಸ್ಥಳವನ್ನು ನೀಡುತ್ತದೆ. ಈ ಬದಲಾವಣೆಯು ಶಿಕ್ಷಕರ ಪಾತ್ರವನ್ನು ಮರು ವ್ಯಾಖ್ಯಾನಿಸುತ್ತದೆ - ಅವರು ಹೆಚ್ಚು ಸಮೃದ್ಧ ಮತ್ತು ಅರ್ಥಪೂರ್ಣ ಕಲಿಕೆಯ ಅನುಭವಗಳನ್ನು ಸೃಷ್ಟಿಸಲು ಅನುವು ಮಾಡಿಕೊಡುತ್ತದೆ.

5.       ಭಾಷಾ ಸಾಗರ್

ಈ ಅಪ್ಲಿಕೇಶನ್ ಎನ್.ಇ.ಪಿ 2020, ಏಕ್ ಭಾರತ್ ಶ್ರೇಷ್ಠ ಭಾರತ್ (ಇ.ಬಿ.ಎಸ್.ಬಿ ಮಿಷನ್) ರ ಗುರಿಗಳಿಗೆ ಅನುಗುಣವಾಗಿದೆ ಮತ್ತು ಆಜಾದಿ ಕಾ ಅಮೃತ ಮಹೋತ್ಸವ ಆಚರಣೆಯ ಒಂದು ಭಾಗವಾಗಿದೆ. ಇಂಗ್ಲಿಷ್ ಕಲಿಯುವ ಅಗತ್ಯವಿಲ್ಲದೆ ಯಾವುದೇ ಭಾರತೀಯ ಭಾಷೆಯ ಮೂಲಕ ಯಾವುದೇ ಭಾರತೀಯ ಭಾಷೆಯನ್ನು ಕಲಿಯುವುದನ್ನು ಉತ್ತೇಜಿಸುತ್ತದೆ.

ಪ್ರಸ್ತುತ, ಅಪ್ಲಿಕೇಶನ್ 22 ಭಾರತೀಯ ಭಾಷೆಗಳಲ್ಲಿ ಒಟ್ಟು 18 ಸಂಭಾಷಣೆ ಕೋರ್ಸ್ಗಳನ್ನು (ಸಾಮಾನ್ಯ ಡೊಮೇನ್ಗಳ ಪ್ರಕಾರ 485 ವಾಕ್ಯಗಳು) ಮತ್ತು ಎಲ್ಲಾ ಬೆಂಬಲಿತ ಭಾಷೆಗಳಲ್ಲಿ 24 ಶಬ್ದಕೋಶ ನಿರ್ಮಾಣ ಕೋರ್ಸ್ಗಳನ್ನು (1600+ ಪದಗಳು) ಒಳಗೊಂಡಿದೆ.

ಮೌಲ್ಯಮಾಪನಕ್ಕಾಗಿ ಹೆಚ್ಚುವರಿ ವೈಶಿಷ್ಟ್ಯಗಳನ್ನು ಕಾಲಕಾಲಕ್ಕೆ ಸೇರಿಸಲಾಗುತ್ತದೆ ಮತ್ತು ಅಪ್ಲಿಕೇಶನ್ ಆಧಾರಿತ ಮೌಲ್ಯಮಾಪನ ವ್ಯವಸ್ಥೆಗಳ ಆಧಾರದ ಮೇಲೆ ಸ್ವಯಂ-ರಚಿತ/ಸ್ವಯಂಚಾಲಿತ ಪ್ರಮಾಣಪತ್ರಗಳನ್ನು ಸಹ ಸೇರಿಸಲಾಗುತ್ತದೆ.

ಇದು ಎ.ಐ ಆಧಾರಿತ ಸಂವಾದ ಸುಗಮಕಾರಕವನ್ನು ಸಹ ಹೊಂದಿದ್ದು, ಇದನ್ನು ಬಳಸಿಕೊಂಡು ಬಳಕೆದಾರರು ಇತರ ಭಾಷೆ ಮಾತನಾಡುವವರೊಂದಿಗೆ ನೈಜ ಸಮಯದಲ್ಲಿ ಸಂವಹನ ನಡೆಸಲು ಸಾಧ್ಯವಾಗುತ್ತದೆ.

6.       ಭಾರತೀಯ ಜ್ಞಾನ ವ್ಯವಸ್ಥೆಗಳ ಕೇಂದ್ರ ಮತ್ತು ಸಂಸ್ಕೃತ ವಿಶ್ವಕೋಶ ನಿಘಂಟು (ಐ.ಕೆ.ಎಸ್-ಇ.ಡಿ.)

ಕೇಂದ್ರ ಸಂಸ್ಕೃತ ವಿಶ್ವವಿದ್ಯಾಲಯದ ಭಾರತೀಯ ಜ್ಞಾನ ವ್ಯವಸ್ಥೆಗಳು ಮತ್ತು ಸಂಸ್ಕೃತ ವಿಶ್ವಕೋಶ ನಿಘಂಟು (ಐ.ಕೆ.ಎಸ್ – ಇ.ಡಿ.) ಅನ್ನು ಡೆಕ್ಕನ್ ಕಾಲೇಜಿನಲ್ಲಿ (ಡಿ.ಯು.) ಕೇಂದ್ರ ಸಂಸ್ಕೃತ ವಿಶ್ವವಿದ್ಯಾಲಯ ಮತ್ತು ಪುಣೆಯ ಡೆಕ್ಕನ್ ಕಾಲೇಜಿನ ಸಂಸ್ಕೃತ ನಿಘಂಟು ಯೋಜನೆಯ ಜಂಟಿ ಪ್ರಯತ್ನಗಳ ಮೂಲಕ ಸ್ಥಾಪಿಸಲಾಯಿತು. ಸಂಸ್ಕೃತ ನಿಘಂಟು ಯೋಜನೆ ಮತ್ತು ಐ.ಕೆ.ಎಸ್ ವಿಶ್ವಕೋಶ ಮತ್ತು ಕ್ರೆಡಿಟ್ ಆಧಾರಿತ ಐ.ಕೆ.ಎಸ್-ಸ್ವಯಂ ಕೋರ್ಸ್ ಗಳ ಅಭಿವೃದ್ಧಿಯನ್ನು ಮೇಲ್ವಿಚಾರಣೆ ಮಾಡಲು ಭಾರತ ಸರ್ಕಾರದ ಶಿಕ್ಷಣ ಸಚಿವಾಲಯದ ಅನುಮೋದನೆಯೊಂದಿಗೆ ಇದನ್ನು ಸ್ಥಾಪಿಸಲಾಯಿತು. ಈ ನಿಘಂಟು ಭಾರತೀಯ ಜ್ಞಾನ ವ್ಯವಸ್ಥೆಗಳ ಕ್ಷೇತ್ರದಲ್ಲಿ ಒಂದು ಸಾಂದ್ರೀಕೃತ ವಿಶ್ವಕೋಶವಾಗಿದ್ದು, ಇದು ಸಂಸ್ಕೃತ ಸಾಹಿತ್ಯದಲ್ಲಿ ಎಲ್ಲಾ ವಿಷಯಗಳು ಮತ್ತು ಕಾಲಮಾನದಲ್ಲಿ ಲಭ್ಯವಿರುವ ಪ್ರತಿಯೊಂದು ಪದ, ಪರಿಕಲ್ಪನೆ, ಕಲ್ಪನೆಯ ಸಾಹಿತ್ಯಿಕ ಉಲ್ಲೇಖಗಳ ಸಂಗ್ರಹವನ್ನು ಹೊಂದಿದೆ. ಸಂಸ್ಕೃತ ವಿಶ್ವಕೋಶ ನಿಘಂಟು ಐತಿಹಾಸಿಕ ತತ್ವಗಳ ಕುರಿತು ಋಗ್ವೇದದಿಂದ (ಕ್ರಿ.ಪೂ. ಸುಮಾರು 14 ನೇ ಶತಮಾನ) ಇತ್ತೀಚಿನ ಹಾಸ್ಯಾರ್ಣವ ಗ್ರಂಥದವರೆಗೆ (ಕ್ರಿ.ಶ. 1850) 1500 ಪ್ರಾಚೀನ ಗ್ರಂಥಗಳಿಂದ ಸಂಸ್ಕೃತ ಪದಗಳ ಭಾಷಾ ವಿಕಾಸವನ್ನು ಗುರುತಿಸುತ್ತದೆ, ಇದು 62 ವಿಷಯಗಳನ್ನು ಒಳಗೊಂಡಿದೆ. ಇದು ವಿವಿಧ ಪದಗಳಲ್ಲಿ ಸಂಭವಿಸಿದ ವಿವರವಾದ ಭಾಷಾ ಬದಲಾವಣೆಗಳು ಮತ್ತು ಅವುಗಳ ವ್ಯುತ್ಪನ್ನಗಳು ಮತ್ತು ವಿವಿಧ ಪದಗಳ ಶಬ್ದಾರ್ಥದ ವಿಕಾಸವನ್ನು ಪತ್ತೆಹಚ್ಚುತ್ತದೆ. ಇದು ವೇದಗಳು ಮತ್ತು ಇತರ ಪಠ್ಯಗಳಲ್ಲಿ ಪ್ರಚಲಿತದಲ್ಲಿರುವ ಅರ್ಥಗಳ ಸಂಪೂರ್ಣ ಶ್ರೇಣಿಯನ್ನು ಒದಗಿಸುತ್ತದೆ, ಇವುಗಳನ್ನು ತಾರ್ಕಿಕವಾಗಿ ವಿಶ್ಲೇಷಿಸಲಾಗಿದೆ. ಒಟ್ಟು ಅರ್ಥಗಳ ಸಂಖ್ಯೆ 15 ಲಕ್ಷಕ್ಕೂ ಹೆಚ್ಚು ಮತ್ತು ಸುಮಾರು 1 ಕೋಟಿ ಉಲ್ಲೇಖಗಳಿವೆ.

7.       ಕೋಶಶ್ರೀ ಪೋರ್ಟಲ್

ಶ್ರೀ ಯೋಜನೆಯಡಿಯಲ್ಲಿ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯಿಂದ ಧನಸಹಾಯ ಪಡೆದ ಮತ್ತು ಪುಣೆಯ ಸಿ-ಡಿ.ಎ.ಸಿ ಸಹಯೋಗದೊಂದಿಗೆ ನಡೆಸಲ್ಪಡುವ ಕೋಶಶ್ರೀ ಯೋಜನೆಯು ವಿಶ್ವಕೋಶ ಸಂಸ್ಕೃತ ನಿಘಂಟಿನ ಎಲ್ಲಾ 35 ಸಂಪುಟಗಳನ್ನು ಡಿಜಿಟಲೀಕರಣಗೊಳಿಸಿದೆ. ಇದು 62 ವಿಷಯಗಳ ಕುರಿತು 1500 ಪ್ರಾಚೀನ ಗ್ರಂಥಗಳಿಂದ 15 ಲಕ್ಷಕ್ಕೂ ಹೆಚ್ಚು ಪದಗಳನ್ನು ಮತ್ತು 1 ಕೋಟಿ ಉಲ್ಲೇಖಗಳನ್ನು ಒಳಗೊಂಡಿದೆ.

ಕೋಶಶ್ರೀ ಆನ್ಲೈನ್ ಪೋರ್ಟಲ್ ಈಗ ಸಾರ್ವಜನಿಕ ಬಿಡುಗಡೆಗೆ ಸಿದ್ಧವಾಗಿದ್ದು, ಸುಧಾರಿತ ಹುಡುಕಾಟ, ಲೇಖನ ರಚನೆ ಮತ್ತು ಸಂಸ್ಕೃತ ಫಾಂಟ್ ಪರಿಕರಗಳೊಂದಿಗೆ ಸಹಯೋಗದ ನಿಘಂಟು ಅಭಿವೃದ್ಧಿ ಮತ್ತು ಸಂಶೋಧನೆಗೆ ಅನುವು ಮಾಡಿಕೊಡುತ್ತದೆ. ಐ.ಕೆ.ಎಸ್-ಇ.ಡಿ. ಕೇಂದ್ರ ಮತ್ತು ಕೋಶಶ್ರೀ ಪೋರ್ಟಲ್ ಎರಡನ್ನೂ ಜುಲೈ 2025 ರಲ್ಲಿ ನವದೆಹಲಿಯ ಭಾರತ ಮಂಟಪದಲ್ಲಿ ನಡೆಯುವ ಅಖಿಲ ಭಾರತೀಯ ಶಿಕ್ಷಾ ಸಮಾಗಮದ ಸಂದರ್ಭದಲ್ಲಿ ಉದ್ಘಾಟಿಸಲು ಉದ್ದೇಶಿಸಲಾಗಿದೆ.

ಕಟ್ಟಡ / ಕ್ಯಾಂಪಸ್ ಗಳ ಉದ್ಘಾಟನೆ ಅಥವಾ ಶಿಲಾನ್ಯಾಸ

1.       ಐ.ಐ.ಟಿ ಬಾಂಬೆಯಲ್ಲಿ ವಿದ್ಯಾರ್ಥಿಗಳ ಹಾಸ್ಟೆಲ್ ಮತ್ತು ದೇಸಾಯಿ ಸೇಠಿ ಉದ್ಯಮಶೀಲತಾ ಶಾಲೆ (ಡಿ.ಎಸ್.ಎಸ್.ಇ) ಕಟ್ಟಡ.

2.       ಆಂಧ್ರಪ್ರದೇಶದ ಕೇಂದ್ರೀಯ ವಿಶ್ವವಿದ್ಯಾಲಯ ರಾಷ್ಟ್ರಕ್ಕೆ ಸಮರ್ಪಣೆ

3.       ಜಮ್ಮು ವಿಶ್ವವಿದ್ಯಾಲಯದ ಕಟ್ಟಡ ಉದ್ಘಾಟನೆ

4.       ಪಂಜಾಬ್ ವಿಶ್ವವಿದ್ಯಾಲಯದ ಕಟ್ಟಡ ಉದ್ಘಾಟನೆ

5.       ಭೋಪಾಲದ ಮೌಲಾನಾ ಆಜಾದ್ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ (ಎಮ್.ಏ.ಎನ್.ಐ.ಟಿ)ಯಲ್ಲಿ ಉಪನ್ಯಾಸ ಸಭಾಂಗಣ ಸಂಕೀರ್ಣ ಉದ್ಘಾಟನೆ

6.       ಜೈಪುರದ ಮಾಳವೀಯ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ (ಎಮ್.ಎನ್.ಐ.ಟಿ )ಯಲ್ಲಿ ಚಂದ್ರಶೇಖರ್ ಹಾಸ್ಟೆಲ್ ಉದ್ಘಾಟನೆ

7.       ಜಲಂಧರ್ ನ ಡಾ. ಬಿ.ಆರ್. ಅಂಬೇಡ್ಕರ್ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ (ಎನ್.ಐ.ಟಿ)ಯಲ್ಲಿ ಹೊಸ ಆಜಾದಿ ಕಾ ಅಮೃತ ಮಹೋತ್ಸವ ಉಪನ್ಯಾಸ ರಂಗಮಂದಿರ ಸಂಕೀರ್ಣದ ಉದ್ಘಾಟನೆ

8.       ಸುರತ್ಕಲ್ ನ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ (ಎನ್.ಐ.ಟಿ.ಕೆ)ಯಲ್ಲಿ ಉಪನ್ಯಾಸ ಸಭಾಂಗಣ ಸಂಕೀರ್ಣ (ಬ್ಲಾಕ್-ಡಿ) ಉದ್ಘಾಟನೆ

9.       ತಿರುಚಿರಾಪಳ್ಳಿಯ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ (ಎನ್.ಐ.ಟಿ)ಯಲ್ಲಿ ಉತ್ಪಾದನೆ, ಮೆಕ್ಯಾನಿಕಲ್ ಮತ್ತು ಮೆಟಲರ್ಜಿಕಲ್ ಮತ್ತು ಮೆಟೀರಿಯಲ್ಸ್ ಎಂಜಿನಿಯರಿಂಗ್ ವಿಭಾಗಕ್ಕಾಗಿ ಅನೆಕ್ಸ್ ಕಟ್ಟಡಗಳ ಉದ್ಘಾಟನೆ

10.     ದೆಹಲಿಯ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ (ಎನ್.ಐ.ಟಿ)ಯಲ್ಲಿ ವಸತಿ ಕಟ್ಟಡದ (B+G+14) ಉದ್ಘಾಟನೆ

11.     1ರಾಯಪುವಿನ ಎನ್.ಐ.ಟಿ ಯಲ್ಲಿ ನಾವೀನ್ಯತೆ ಮತ್ತು ಉದ್ಯಮಶೀಲತೆಗಾಗಿ ಎಂಜಿನಿಯರಿಂಗ್ ಮತ್ತು ತಂತ್ರಜ್ಞಾನ ಕೇಂದ್ರ (CoE-IEET)ದ ಶಿಲಾನ್ಯಾಸ

ಈ ಸಂದರ್ಭದಲ್ಲಿ, ರಾಷ್ಟ್ರೀಯ ಶಿಕ್ಷಣ ನೀತಿ 2020ರ ಪ್ರಮುಖ ಸಾಧನೆಗಳು ಮತ್ತು ಪರಿವರ್ತನಾತ್ಮಕ ಪರಿಣಾಮವನ್ನು ಪ್ರದರ್ಶಿಸುವ ಕಿರುಚಿತ್ರವನ್ನು ಪ್ರದರ್ಶಿಸಲಾಯಿತು, ನಂತರ ಶಾಲಾ ಮತ್ತು ಉನ್ನತ ಶಿಕ್ಷಣದಲ್ಲಿನ ನವೀನ ಉಪಕ್ರಮಗಳು ಮತ್ತು ಉತ್ತಮ ಅಭ್ಯಾಸಗಳನ್ನು ಒಳಗೊಂಡ ಪ್ರದರ್ಶನ ನಡೆಯಿತು. ಅನುಭವದ ಕಲಿಕೆ, ಎ.ಐ.-ಚಾಲಿತ ಪರಿಹಾರಗಳು, ಒಳಗೊಳ್ಳುವಿಕೆಯ ಮೂಲಸೌಕರ್ಯ, ಡಿಜಿಟಲ್ ರೂಪಾಂತರ, ಸುಸ್ಥಿರತೆ ಮತ್ತು ಸಮುದಾಯ ತೊಡಗಿಸಿಕೊಳ್ಳುವಿಕೆ ಮುಂತಾದ ವಿಷಯಗಳ ಮೂಲಕ ಎನ್.ಇ.ಪಿ ಯ ದೃಷ್ಟಿಕೋನವನ್ನು ಪ್ರದರ್ಶನವು ಪ್ರತಿಬಿಂಬಿಸಿತು. ಪ್ರೇರಣಾ - ಅನುಭವದ ಕಲಿಕಾ ಕಾರ್ಯಕ್ರಮ, ಅಟಲ್ ಟಿಂಕರಿಂಗ್ ಲ್ಯಾಬ್ಸ್ – ಎ.ಐ. ಇನ್ನೋವೇಶನ್ಸ್ ಮತ್ತು ವಿದ್ಯಾಂಜಲಿ ಮತ್ತು ಉಲ್ಲಾಸ್ - ಸಮುದಾಯ ತೊಡಗಿಸಿಕೊಳ್ಳುವಿಕೆಯಂತಹ ಮಳಿಗೆಗಳು ದೇಶಾದ್ಯಂತದ ಪ್ರಭಾವಶಾಲಿ ಮಾದರಿಗಳನ್ನು ಎತ್ತಿ ತೋರಿಸಿದವು.

ಈ ಸಂದರ್ಭದಲ್ಲಿ, ಶ್ರೀ ಧರ್ಮೇಂದ್ರ ಪ್ರಧಾನ್ ಅವರ ಸಮ್ಮುಖದಲ್ಲಿ, ಪ್ರಮುಖ ವಿದೇಶಿ ವಿಶ್ವವಿದ್ಯಾಲಯಗಳು ಭಾರತದಲ್ಲಿ ತಮ್ಮ ಕ್ಯಾಂಪಸ್ ಗಳನ್ನು ಸ್ಥಾಪಿಸಲು ಈ ಕೆಳಗಿನ ಆಶಯ ಪತ್ರಗಳನ್ನು (ಎಲ್.ಒ.ಐ) ಪ್ರದಾನ ಮಾಡಲಾಯಿತು, ಇದು ಎನ್.ಇ.ಪಿ 2020 ರ ಅಡಿಯಲ್ಲಿ ಭಾರತೀಯ ಉನ್ನತ ಶಿಕ್ಷಣದ ಅಂತರರಾಷ್ಟ್ರೀಕರಣದತ್ತ ಪ್ರಮುಖ ಹೆಜ್ಜೆಯಾಗಿದೆ:

1. ವೆಸ್ಟರ್ನ್ ಸಿಡ್ನಿ ವಿಶ್ವವಿದ್ಯಾಲಯ (ಡಬ್ಲ್ಯು.ಎಸ್.ಯು), ಆಸ್ಟ್ರೇಲಿಯಾ - ಗ್ರೇಟರ್ ನೋಯ್ಡಾ

1989 ರಲ್ಲಿ ಸ್ಥಾಪನೆಯಾದ ಡಬ್ಲ್ಯು ಎಸ್ ಯು, ಸಿಡ್ನಿಯಾದ್ಯಂತ 13 ಕ್ಯಾಂಪಸ್ ಗಳು ಮತ್ತು 49,000 ಕ್ಕೂ ಹೆಚ್ಚು ವಿದ್ಯಾರ್ಥಿಗಳನ್ನು ಹೊಂದಿರುವ ಪ್ರಮುಖ ಸಾರ್ವಜನಿಕ ಸಂಶೋಧನಾ ವಿಶ್ವವಿದ್ಯಾಲಯವಾಗಿದೆ. ಸುಸ್ಥಿರತೆ ಮತ್ತು ಸಾಮಾಜಿಕ ಪ್ರಭಾವದ ಬದ್ಧತೆಗೆ ಹೆಸರುವಾಸಿಯಾದ ಡಬ್ಲ್ಯು ಎಸ್ ಯು, ಗ್ರೇಟರ್ ನೋಯ್ಡಾದಲ್ಲಿ ಒಂದು ಶಾಖೆಯನ್ನು ಸ್ಥಾಪಿಸಲು ಯೋಜಿಸಿದೆ:

•        ಪದವಿ: ಬಿ.ಎ. ವ್ಯವಹಾರ ವಿಶ್ಲೇಷಣೆ, ಬಿ.ಎ. ವ್ಯವಹಾರ ಮಾರ್ಕೆಟಿಂಗ್

•      ಸ್ನಾತಕೋತ್ತರ ಪದವಿ: ನಾವೀನ್ಯತೆ ಮತ್ತು ಉದ್ಯಮಶೀಲತೆಯಲ್ಲಿ ಮತ್ತು ಲಾಜಿಸ್ಟಿಕ್ಸ್ ಮತ್ತು ಸರಬರಾಜು ಸರಪಳಿ ನಿರ್ವಹಣೆಯಲ್ಲಿ ಎಂಬಿಎ.

ಡಬ್ಲ್ಯು ಎಸ್ ಯು ನ ಭಾರತೀಯ ಸಹಯೋಗಗಳಲ್ಲಿ ಆಯುರ್ವೇದ-ಆಧುನಿಕ ಔಷಧ ಸಂಶೋಧನೆಗಾಗಿ ಎಐಐಎ, ಅಂತರ್ಜಲ ನಿರ್ವಹಣೆಯ ಕುರಿತು ಜಲಶಕ್ತಿ ಸಚಿವಾಲಯ, ಆಹಾರ ಭದ್ರತೆಯ ಕುರಿತು ಐ.ಸಿ.ಎ.ಆರ್ ಮತ್ತು ನ್ಯೂರೋಮಾರ್ಫಿಕ್ ಎಂಜಿನಿಯರಿಂಗ್ನ ಕುರಿತು ಐ.ಐ.ಎಸ್.ಸಿ ಜೊತೆಗಿನ ಪಾಲುದಾರಿಕೆಗಳು ಸೇರಿವೆ.

2. ವಿಕ್ಟೋರಿಯಾ ವಿಶ್ವವಿದ್ಯಾಲಯ (ವಿ.ಯು.), ಆಸ್ಟ್ರೇಲಿಯಾ – ನೋಯ್ಡಾ

1916 ರಲ್ಲಿ ಸ್ಥಾಪನೆಯಾದ ವಿಯು, ಆಸ್ಟ್ರೇಲಿಯಾದ ಕೆಲವೇ ದ್ವಿ-ವಲಯ ಸಂಸ್ಥೆಗಳಲ್ಲಿ ಒಂದಾಗಿದೆ, ಇದು ಉನ್ನತ ಶಿಕ್ಷಣ ಮತ್ತು ವೃತ್ತಿಪರ (ಟಿ.ಎ.ಎಫ್.ಇ) ಕೋರ್ಸ್ ಗನ್ನು ನೀಡುತ್ತದೆ. ಇದು ಚೀನಾ, ಮಲೇಷ್ಯಾ ಮತ್ತು ಶ್ರೀಲಂಕಾದಲ್ಲಿ ಬಲವಾದ ಕಡಲಾಚೆಯ ಉಪಸ್ಥಿತಿಯನ್ನು ಹೊಂದಿದೆ ಮತ್ತು ಕ್ರೀಡಾ ವಿಜ್ಞಾನ, ವ್ಯವಹಾರ ಮತ್ತು ಐ.ಟಿಯಲ್ಲಿ ಅನ್ವಯಿಕ ಸಂಶೋಧನೆಗೆ ಹೆಸರುವಾಸಿಯಾಗಿದೆ.

ವಿಯುನ ನೋಯ್ಡಾ ಕ್ಯಾಂಪಸ್ ನಲ್ಲಿ ಈ ಕೋರ್ಸ್ ಗಳನ್ನು ನೀಡಲು ಪ್ರಸ್ತಾಪಿಸಲಾಗಿದೆ:

•        ಪದವಿ: ವ್ಯವಹಾರ, ಡೇಟಾ ಸೈನ್ಸ್, ಸೈಬರ್ ಭದ್ರತೆ

•        ಸ್ನಾತಕೋತ್ತರ: ಎಂ.ಬಿ.ಎ, ಐಟಿಯಲ್ಲಿ ಸ್ನಾತಕೋತ್ತರ ಪದವಿ

2017 ರಲ್ಲಿ ಸಚಿನ್ ತೆಂಡೂಲ್ಕರ್ ಅವರೊಂದಿಗೆ ಪ್ರಾರಂಭವಾದ ಭಾರತ-ಆಸ್ಟ್ರೇಲಿಯಾ ಕ್ರೀಡಾ ಪಾಲುದಾರಿಕೆಯಲ್ಲಿ ವಿಯು ಸಕ್ರಿಯವಾಗಿ ಭಾಗವಹಿಸುತ್ತಿದೆ ಮತ್ತು ಭಾರತೀಯ ಕಲಿಯುವವರಿಗೆ ವೃತ್ತಿಪರ ಡಿಪ್ಲೊಮಾ ಮಾರ್ಗಗಳಲ್ಲಿ ಅವೆನು ಲರ್ನಿಂಗ್ ನೊಂದಿಗೆ ಸಹಕರಿಸುತ್ತಿದೆ.

3. ಲಾ ಟ್ರೋಬ್ ವಿಶ್ವವಿದ್ಯಾಲಯ, ಆಸ್ಟ್ರೇಲಿಯಾ – ಬೆಂಗಳೂರು

1964 ರಲ್ಲಿ ಸ್ಥಾಪನೆಯಾದ ಲಾ ಟ್ರೋಬ್ ವಿಶ್ವವಿದ್ಯಾಲಯವು ಅನ್ವಯಿಕ ಸಂಶೋಧನೆಯಲ್ಲಿ, ವಿಶೇಷವಾಗಿ ಸ್ಮಾರ್ಟ್ ಸಿಟಿಗಳು, ಆಣ್ವಿಕ ವಿಜ್ಞಾನಗಳು ಮತ್ತು ಜೈವಿಕ ತಂತ್ರಜ್ಞಾನದಲ್ಲಿ ಶ್ರೇಷ್ಠತೆಗಾಗಿ ಗುರುತಿಸಲ್ಪಟ್ಟಿದೆ. ಬೆಂಗಳೂರಿನಲ್ಲಿರುವ ಇದರ ಭಾರತೀಯ ಕ್ಯಾಂಪಸ್ ಈ ಕೆಳಗಿನ ಕೋರ್ಸ್ ಗಳನ್ನು ನೀಡುತ್ತದೆ:

ಪದವಿ: ವ್ಯಾಪಾರ (ಹಣಕಾಸು, ಮಾರ್ಕೆಟಿಂಗ್, ನಿರ್ವಹಣೆ), ಕಂಪ್ಯೂಟರ್ ವಿಜ್ಞಾನ (ಎಐ, ಸಾಫ್ಟ್ವೇರ್ ಎಂಜಿನಿಯರಿಂಗ್), ಮತ್ತು ಸಾರ್ವಜನಿಕ ಆರೋಗ್ಯ

ಲಾ ಟ್ರೋಬ್ ಈ ಕೆಳಗಿನವುಗಳ ಮೂಲಕ ಭಾರತದಲ್ಲಿ ಬಲವಾದ ಶೈಕ್ಷಣಿಕ ಪಾಲುದಾರನಾಗಿದೆ:

•        ಐ.ಐ.ಟಿ ಕಾನ್ಪುರ್ (ಆರೋಗ್ಯ, ನೀರು, ನಗರ ಯೋಜನೆ) ಜೊತೆ ಜಂಟಿ ಪಿ.ಎಚ್.ಡಿ ಅಕಾಡೆಮಿ

•        ಸ್ಮಾರ್ಟ್ ಸಿಟಿಗಳಲ್ಲಿ ಐ.ಐ.ಟಿ-ಕಾನ್ಪುರ್, ಬಿ.ಐ.ಟಿ.ಎಸ್ ಪಿಲಾನಿ ಮತ್ತು ಟಿ.ಐ.ಎಸ್.ಎಸ್ ಜೊತೆಗಿನ ASCRIN ನೆಟ್ವರ್ಕ್

•        ಬಯೋಟೆಕ್ ನವೋದ್ಯಮಗಳನ್ನು ಬೆಂಬಲಿಸುವ ಬಿ.ಬಿ.ಸಿಯೊಂದಿಗೆ ಬಯೋ ಇನ್ನೋವೇಶನ್ ಕಾರಿಡಾರ್

4. ಬ್ರಿಸ್ಟಲ್ ವಿಶ್ವವಿದ್ಯಾಲಯ, ಯುನೈಟೆಡ್ ಕಿಂಗ್ಡಮ್ – ಮುಂಬೈ

1909 ರಲ್ಲಿ ಸ್ಥಾಪನೆಯಾದ ಮತ್ತು 2026 ರ ಕ್ಯುಎಸ್ ವಿಶ್ವ ವಿಶ್ವವಿದ್ಯಾಲಯ ಶ್ರೇಯಾಂಕಗಳಲ್ಲಿ 51 ನೇ ಸ್ಥಾನದಲ್ಲಿದ್ದ ಬ್ರಿಸ್ಟಲ್ ವಿಶ್ವವಿದ್ಯಾಲಯವು ಯುಕೆಯ ಪ್ರಮುಖ ಸಂಶೋಧನಾ ವಿಶ್ವವಿದ್ಯಾಲಯವಾಗಿದೆ ಮತ್ತು ರಸೆಲ್ ಗ್ರೂಪ್ ನ ಸದಸ್ಯನಾಗಿದೆ. ಇದು ಮುಂಬೈನಲ್ಲಿ ತನ್ನ ಕ್ಯಾಂಪಸ್ ಸ್ಥಾಪಿಸಲಿದೆ.

ಪ್ರಮುಖ ಭಾರತೀಯ ಸಹಯೋಗಗಳು ಇವುಗಳನ್ನು ಒಳಗೊಂಡಿವೆ:

•        ಜಂಟಿ ಪದವಿ-ಸ್ನಾತಕೋತ್ತರ ಕೋರ್ಸ್ ಗಳು, ವಿದ್ಯಾರ್ಥಿ ವಿನಿಮಯ ಮತ್ತು ಎಐ, ವಿನ್ಯಾಸ ಮತ್ತು ಡಿಜಿಟಲ್ ತಂತ್ರಜ್ಞಾನಗಳಲ್ಲಿ ಸಹಯೋಗದ ಸಂಶೋಧನೆಗಾಗಿ ATLAS ಸ್ಕಿಲ್ಟೆಕ್ ವಿಶ್ವವಿದ್ಯಾಲಯ (ಮುಂಬೈ) ದೊಂದಿಗೆ 2022 ರ ಒಪ್ಪಂದ

•        ಕ್ರಿಯಾ (Krea) ವಿಶ್ವವಿದ್ಯಾಲಯ (ಶ್ರೀ ಸಿಟಿ) ದೊಂದಿಗೆ "3+1" ಪದವಿ, ಇದು ಭಾರತೀಯ ವಿದ್ಯಾರ್ಥಿಗಳು ಭಾರತದಲ್ಲಿ ಪದವಿ ಅಧ್ಯಯನವನ್ನು ಪೂರ್ಣಗೊಳಿಸಲು ಮತ್ತು ನಾವೀನ್ಯತೆ, ನೀತಿ ಮತ್ತು ವಿಶ್ಲೇಷಣೆಯಲ್ಲಿ ಬ್ರಿಸ್ಟಲ್ ನಲ್ಲಿ ಸ್ನಾತಕೋತ್ತರ ಪದವಿಗಳನ್ನು ಪಡೆಯಲು ಅನುವು ಮಾಡಿಕೊಡುತ್ತದೆ.

ಈ ಕಾರ್ಯತಂತ್ರದ ಪಾಲುದಾರಿಕೆಗಳು ಜಾಗತಿಕವಾಗಿ ಸಂಪರ್ಕಿತ, ಎಲ್ಲರನ್ನೂ ಒಳಗೊಳ್ಳುವ ಮತ್ತು ನಾವೀನ್ಯತೆ-ಚಾಲಿತ ಉನ್ನತ ಶಿಕ್ಷಣ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ಭಾರತದ ಬದ್ಧತೆಯನ್ನು ಪ್ರತಿಬಿಂಬಿಸುತ್ತವೆ. ಈ ಕ್ಯಾಂಪಸ್ ಗಳು ಅಸ್ತಿತ್ವಕ್ಕೆ ಬರುವುದರೊಂದಿಗೆ, ವಿದೇಶಕ್ಕೆ ಹೋಗದೆಯೇ ಭಾರತೀಯ ವಿದ್ಯಾರ್ಥಿಗಳಿಗೆ ವಿಶ್ವ ದರ್ಜೆಯ ಪಠ್ಯಕ್ರಮ, ಬೋಧನಾವರ್ಗ ಮತ್ತು ಸಂಶೋಧನೆಗೆ ಪ್ರವೇಶವನ್ನು ಒದಗಿಸುವ ನಿರೀಕ್ಷೆಯಿದೆ.

ಎ.ಬಿ.ಎಸ್.ಎಸ್ 2025 ಪ್ರಮುಖ ಆದ್ಯತೆಯ ಕ್ಷೇತ್ರಗಳ ಮೇಲೆ ಕೇಂದ್ರೀಕರಿಸಿದ ನಾಲ್ಕು ವಿಷಯಾಧಾರಿತ ಗೋಷ್ಠಿಗಳನ್ನು ಆಯೋಜಿಸಿತ್ತು, ಅವುಗಳೆಂದರೆ: ಬೋಧನೆ ಮತ್ತು ಕಲಿಕೆಯಲ್ಲಿ ಭಾರತೀಯ ಭಾಷೆಗಳ ಬಳಕೆ; ಭಾರತದ ಮುಂದಿನ ಪೀಳಿಗೆಯ ಶೈಕ್ಷಣಿಕ ಮತ್ತು ಉದ್ಯಮ ನಾಯಕರನ್ನು ಪೋಷಿಸಲು ಸಂಶೋಧನೆ ಮತ್ತು ಪ್ರಧಾನ ಮಂತ್ರಿಗಳ ಸಂಶೋಧನಾ ಫೆಲೋಶಿಪ್ ಗಳು (ಪಿ.ಎಂ.ಆರ್.ಎಫ್); 2030 ರ ವೇಳೆಗೆ ಶೇ.100 ಒಟ್ಟು ದಾಖಲಾತಿ ಅನುಪಾತ (ಜಿ.ಇ.ಆರ್) ಸಾಧಿಸಲು ಪ್ರೌಢ ಶಿಕ್ಷಣವನ್ನು ಮರುರೂಪಿಸುವುದು; ಮತ್ತು ಬೋಧನೆ ಮತ್ತು ಕಲಿಕೆಯಲ್ಲಿ ಕೃತಕ ಬುದ್ಧಿಮತ್ತೆಯ ಪರಿವರ್ತನಾ ಪಾತ್ರ.

*****