ঐগী নুশিরবা ইরৈবাকচাশিং, খুরুমজরি।

'মন কী বাত' অসিদা, ঐখোয়না অমুক্কা হন্না লৈবাক অসিগী মাইপাকপশিং, লৈবাক মীয়ামগী মাইপাকপশিং অদুগী মতাংদা ৱারী শাগনি। হৌখিবা চয়োল খরা অসিদা, শান্ন-খোৎনবা, সাইন্স নৎত্রগা কলচর ওইগেরা, ভারত মচা খুদিংমক্না চাউথোকচবা পোক্কদবা কয়া অমা থোকখ্রে। হন্দক্তা লৈবাক অসিদা শুভান্সু শুক্লাগী স্পেসতগী হল্লকপগী মতাংদা য়াম্না ঙাংনখি। শুভান্সুনা মালেমদা শাফনা য়ৌরকপা মতমদা, মীয়াম্না নুংঙাইবা পোকহনখি; থমোয় খুদিংমক্তা হরাও-তয়াম্বগী ইথিল অমা পোকখি। লৈবাক শীনবা থুংনা চাউথোকচবা ফাওখি। ঐহাক্না নীংশিংলি মদুদি 2023গী ওগস্ততা চন্দ্রয়ান-3 মাইপাক্না লেন্দ তৌরকপা মতমদা লৈবাক অসিদা অনৌবা ফিভম অমা লাকখি। অঙাংশিংগী মরক্তা সাইন্স, স্পেসকী মতাংদা অনৌবা মওংদা খঙনীংবা পোকপা হৌরকখি। হৌজিক্তি অপীকপা অঙাংশিংনা হায়রি, ঐখোয়না স্পেসতা চৎকনি; থাদা লেন্দ তৌরগনি - ঐখোয়না স্পেস সাইন্তিস্ত ওইগনি।

মরুপশিং,

INSPIRE-MANAK অভিয়ানগী মমিং অসি অদোম্না তারম্লগনি। মসি অঙাংশিংগী মরক্তা ইন্নোবেসন প্রমোৎ তৌনবা কেম্পেন অমনি। মসিদা স্কুল অমমমদগী অঙাং মঙা খনগনি। অঙাং খুদিংমক্না অনৌবা ৱাখল্লোন অমা পুথোকই। হৌজিক ফাওবদা, অঙাং লাখ কয়ানা মসিদা য়াওখ্রে অমসুং চন্দ্রয়ান-3গী মতুংদা মখোয়গী মশিং অসি শরুক অনি হেনগৎখ্রে। লৈবাক অসিদা স্পেস স্তার্ত-অপশিংসু য়াম্না থুনা হেনগৎলক্লি। চহি মঙাগী মমাংদা, স্তার্ত-অপ 50দগী হন্থনা লৈরম্মি। ঙসিদি, স্পেস সেক্তর খক্তদা 200দগী হেন্না লৈরে।

মরুপশিং,

মথং থা, ওগস্ত 23 অসি নেস্নেল স্পেস দেনি। অদোম্না মসি করম্না পাংথোক্কদগে..., অদোমদা অনৌবা ৱাখল্লোন লৈব্রা? ঐঙোন্দা নমো এপ্পতা মেসেজ অমা থাবিরকউ।

মরুপশিং,

21শুবা চহি চাগী ভারত্তা, সাইন্সনা অনৌবা ইনর্জীগা লোয়ননা খুমাং চাউশিল্লি। নুমিৎ খরনিগী মমাংদা ঐখোয়গী মহৈরোয়শিংনা ইন্তর্নেস্নেল কেমেস্ত্রী ওলিম্পিয়াদতা মেদল ফংখি। দেভেশ পঙ্কজ, সন্দীপ কুচি, দেবদুত্ত প্রিয়াদর্শী অমসুং উজ্জ্বল কেসারি, মখোয় মরিমক্না ভারতকী মিংচৎ পুরকখি। ভারতনা মেথমেতিক্সকী লমদসু মসিগী ইমেজ অসি মপাঙ্গল কনখৎহল্লে। ওস্ত্রেলিয়াদা পাংথোকপা ইন্তর্নেস্নেল মেথমেতিকেল ওলিম্পিয়াদতা ঐখোয়গী মহৈরোয়শিংনা গোল্দ 3, সিলভর 2 অমসুং ব্রোঞ্জ মেদল 1 ফংখি। মরুপশিং, মথং থাদা মুম্বাইদা এস্ত্রোনোমী অমসুং এস্ত্রোফিজিক্স ওলিম্পিয়াদ পাংথোক্কনি। লৈবাক 60 হেনবগী মহৈরোয়শিংনা মসিদা শরুক য়াগনি। সাইন্তিস্তশিংসু মফম অদুদা লাক্কনি। মসি ঙসি ফাওবদা খ্বাইদগী চাউবা ওলিম্পিয়াদ ওইগনি। ভারতনা ওলিম্পিক্স অমসুং ওলিম্পিয়াদ অনিমক্তা মাংলোমদা চংশিল্লি।

ঐগী নুংশিরবা ইরৈবাকচাশিং,

ঐখোয় পুম্নমকপু চাউথোকহনগদবা অতোপ্পা পাউ অমা UNESCOদগী লাক্লে। UNESCOনা মরাথাগী লানবন 12বু মালেমগী হেরিতেজ সাইতশিং ওইনা শকখঙখ্রে। মহারাস্ত্রদা লানবন তরামাথোই; তামিল নাদুদা অমা। লানবন খুদিংমক্কী পুৱারীগী ওইবা পন্দুপ অমা লৈজৈ। নুঙ খুদিংমক পুৱারীগী ওইবা থৌদোক অমগী খুদম্নি। সলহর ফোর্ত, মফম অসিদা মুগলশিংবু মাইথিবা পীখি, শিভনেরী, মফম অসিদা ছত্রপতি শিবাজী মহারাজ পোকখি। য়েক্নবশিংনা থুগাইবা ঙমদ্রবা লানবন অমা। খান্দেরি ফোর্ত, সমুদ্রগী ময়াইদা শাখিবা অঙকপা লানবন অমনি।

য়েক্নবশিংনা মহাকপু থিংনবা হোৎনখি অদুবু শিবাজী মহারাজনা ওইথোক্তবা অদু ওইথোকহনখি। অফজাল খানবু মাইথিবা পীখিবা, প্রতাপগর ফোর্ত, লানবন অদুগী ফক্লাংশিংদা হৌজিক ফাওবা মতম অদুগী কোন্থাংনা নীল্লি। চত্রপতি শিবাজী মহারাজকী মীৎয়েং শানবা মতৌগী খুদম অমা ওইরিবা বিজয়দুর্গ অসিদা অরোনবা তনেলশিং লৈরম্মি। চহি খরগী মমাংদা ঐহাক রাইগরতা চৎখি... অমসুং ছত্রপতি শিবাজী মহারাজকী মীতমগী মমাংদা ইকোক নোন্না খুরুমখি। মসিগী এক্সপরিয়েন্স অসি ঐহাক্কী পুন্সি চুপ্পা কাউঙমদনা লৈহৌরগনি।

মরুপশিং,

লৈবাক অসিগী অতৈ মফমশিংদা অসিগুম্বা অঙকপা লানবনশিং লৈরি, লান্দারকপশিং থেংনখিবা, নোংজু নুংশাগী চৈথেংশিং থেংনখিবা, অদুবু মখোয়গী মশাগী ইকাই খুম্নবা অদুদি কাইহনখিদে। চিতোরগর ফোর্ত, কুম্ভলগর ফোর্ত, রানথম্বোর ফোর্ত, অমের ফোর্ৎ, রাজস্থানগী জয়সালমর ফোর্ত অসি মালেমদা মমিং চৎলি। কর্নাতকাগী গুলবর্গা ফোর্ত অসিসু য়াম্না চাউই। চিত্রাদুর্গ ফোর্তগী পাক চাউবা অসিনা মতম অদুদা লানবন অসি করম্না শাখিবগে হায়বগী মতাংদা নহাক্না খঙনীংবা পোক্কনি!

মরুপশিং,

কালিঞ্জর ফোর্ত অসি উত্তর প্রদেশকী বান্দাদা লৈ। মাহমুদ গজনবীনা লানবন অসি কয়ারক হন্না লান্দাখি অমসুং হোৎনরিবা খুদিং মাইপাকখিদে। বুন্দেলখন্দদা অসিগুম্বা লানবন কয়া লৈ - গ্বালিয়র, ঝান্সি, দাতিয়া, অজয়গর, গরহকুন্দর, চান্দেরি। হায়রিবা লানবনশিং অসি শুপ্নগী চেক অমদি নুঙ খক্তা নত্তে, মখোয় অসি ঐখোয়গী হেরিতেজকী খুদমশিংনি। লানবনশিং অদুগী অৱাংবা ফক্লাংশিং অদুদগী হৌজিক ফাওবা সংস্কর অমসুং ইশাগী ইকাই খুম্নবা অদু উবা ফংই। ঐহাক্না লৈবাক মীয়াম পুম্নমকপু মসিগী লানবনশিং অসিদা চৎনবা, মখোয়গী পুৱারী খঙনবা, চাউথোকচবা ফাওনবা হায়জরি।

ঐগী নুংশিরবা ইরৈবাকচাশিং,

ভাবনা শাগৎলু, অয়ুক অঙনবদা, বিহারগী মুজফ্ফরপুর সহরদা - 1908গী ওগস্ত 1গী অদুদা... লম্বী খুদিংমক, স্ক্বার খুদিংমক, খোঙচৎ খুদিংমক মতম অদুদা লেপখিবগুম তৌখি। মীশিং অদুগী মীৎতা মপি তাখি, অদুবু মখোয়গী থম্মোয়দা মৈচাকনা থনখি। চহি 18 শুরবা নহা অমনা ব্রিতিশকী মায়োক্তা মহাক্কী লৈবাক নীংবগী ৱাখল্লোন ফোঙদোকখিবগীদমক চৈরাক ফংলিবা জেল অদুদা মীশিংনা কোইশিনখি। জেল অদুগী মনুংদা, ব্রিতিশ ওফিসরশিংনা নহা ওইরিবা নুপা অমা থৌরি য়ান্নবা শেম-শারি। নহা ওইরিবা নুপাদুগী মাইথোংদা করিগুম্বা অমত্তগী চিংনবগী মমি অমত্তা উবা ফংদে; মদুগী মহুৎ চাউথোকচবা ওইনা ফাওই। মখোয়গী লৈবাক্কীদমক শিবা মীওইশিংনা ফাওরিবা চাউথোকচবা অদুনি। থৌনা ফবা, লিংজেল খাবা নহা অদু খুদিরাম বোসনি। চহি 18 খক্তা ঙাইরিঙৈদা মহাক্না লৈবাক পুম্বদা অওনবা পুরকপা অসিগুম্লবা থৌনা উৎখি। “খুদিরাম বোসনা থৌরি য়ানফম অদুগী মায়কৈদা চংশিল্লকপা মতমদা মহাক্কী মাইথোংদা মোমোন মীনোক তমখি”,হায়না মতমদুগী পাউচেশিংনসু পাউদমখি। অসিগুম্বা মশীং থীঙমদ্রবা কত্থোকপা কয়াগী মতুংদা, চহি চা কয়াগী তপস্যা তৌরবা মতুংদা, ঐখোয়না নীংতম্বা ফংখি। লৈবাক অসিগী থৌনা ফরবা লৈবাকনীংবা মীওইশিংনা মখোয়গী ঈশিংগা লোয়ননা নীংতম ইহৌবু মথোই হাপখি।

মরুপশিং,

মরম অদুনা ওগস্ত থা অসি রিভোলুসনগী থানি। ওগস্ত 1 অসি লোকমান্য বাল গঙ্গাধর তিলককী মপোক কুমওননি। থা অসিমক্তদা, ওগস্তকী তাং 8দা, গান্ধীজীগী লুচিং মখাদা 'ভারত থাদোক্নবা খোংজং' হৌখি। মতুংদা, ওগস্তকী 15, ঐখোয়গী নীংতম্বা নুমিৎ লাকখি। ঐখোয়না ঐখোয়গী নীংতম লান্মীশিংবু নীংশিংলি, মখোয়না ইথিল পীরি… অদুবু মরুপশিং, লৈবাক অসি খায়দোকপগী অৱাবা অসি ঐখোয়গী নীংতম্বগা মরী লৈনৈ। মরম অদুনা ঐখোয়না ওগস্তকী 14বু 'পার্তিশন হোররস রিমেমোরেন্স দে' ওইনা পাংথোকই।

ঐগী নুংশিরবা ইরৈবাকচাশিং,

অতোপ্পা রিভোলুসন অমা ওগস্ত 7, 1905দা হৌখি। স্বদেশী মুভমেন্তনা লোকেল প্রদক্তশিংদা অনৌবা ইনর্জী পীখি... মরু ওইনা হেন্দলুমগী পোৎলমশিংদা। মদু নীংশিংনবগীদমক, লৈবাক অসিনা চহি খুদিংগী ওগস্তকী তাং 7দা 'নেস্নেল হেন্দলুম দে' পাংথোকই। চহি অসিগী ওগস্তকী তাং 7 অসি 'নেস্নেল হেন্দলুম দে'গী চহি 10 মপুং ফারকপা নুমিৎনি। ঐখোয়গী খাদিনা নীংতম লানগী মতমদা নীংতম ইহৌদা অনৌবা পাঙ্গল পীরম্বা অদুগুম্না, ঙসিদি লৈবাক অসিনা চাউখৎলবা ভারত অমা ওইবগী মায়কৈদা চংশিল্লিবা অসিদা তেক্সতাইল সেক্তর অসি লৈবাক অসিগী পাঙ্গল ওইরক্লি। চহি 10 অসিদা, লৈবাক অসিগী তোঙান তোঙানবা মফমশিংদা সেক্তর অসিগা মরী লৈনবা মীওই লাখ কয়ানা মাইপাকপগী ৱারী কয়া ইখ্রে। মহারাস্ত্রাগী পৈথান খুঙ্গংগী কবিতা ধাৱালেনা মমাংদা অপীকপা কা অমদা থবক তৌরম্মি - মফম অমদি মফম অমদি খুদোংচাবা অমত্তা লৈরমদে। মহাক্না লৈঙাক্কী মতেং ফংখি; হৌজিক্তি মহাক্কী স্কিল অসি য়াম্না হেনগৎলক্লি। মহাক্না শেল শরুক অহুম হেন্না তাল্লি। মহাক্না মশাগী শেমজবা পাইথানি সারিশিং য়োল্লি। ওরিশাগী মায়োরভঞ্জতা অসিগুম্বা মাইপাকপগী ৱারী অমা লৈরি। মফম অসিদা, ত্রাইবেলগী নুপী 650  হেনবনা শান্তালী সারি অমুক হন্না পুথোকখ্রে। হৌজিক হায়রিবা নুপীশিং অসিনা থা খুদিংগী লুপা লিশিং কয়া ফংলি। মখোয়না ফী শাবতা নত্তনা মখোয় মশেলগী মশক মওং-মতৌসু শেম্মি। বিহারগী নালন্দাগী নবীন কুমারগী এচিবমেন্ত অসিসু পুক্নিং থৌগৎনিংঙাইনি। মহাক্কী ইমুং-মনুংনা মসিগী থবক অসিগা চহি কয়াদগী মরী লৈনদুনা লাক্লি।

অদুবু খ্বাইদগী ফবা ৱাফমদি মহাক্কী ইমুং মনুংনা হৌজিক্তি লম অসিদা মোদর্নিতী য়াওহনখ্রে। হৌজিক মহাক্কী অঙাংশিংনা হেন্দলুম তেক্নোলোজী তম্মি। মখোয়না অচৌবা ব্রান্দশিংগা থবক তৌমিন্নরি। অহোংবা অসি ইমুং অমখক্তদা থোকপা নত্তে; মসিনা অকোয়বদা লৈবা ইমুং কয়া অমা মাংলোমদা চংশিলহল্লি।

মরুপশিং,

তেক্সতাইল অসি ভারতকী সেক্তর খক্তমক নত্তে। মসি ঐখোয়গী কলচরেল দাইভর্সিতীগী খুদম অমনি। ঙসি, তেক্সতাইল অমসুং ফি-রোলগী কৈথেল অসি য়াম্না থুনা চাউখৎলক্লি, অমসুং চাউখৎলকপগী খ্বাইদগী ফবা ৱাফমদি খুঙ্গংগী নুপীশিং, সহরগী দিজাইনরশিং, চহি য়াম্লবা ফী শাবশিং অমসুং স্তার্ত-অপ হৌখ্রবা ঐখোয়গী নহাশিংনা পুন্না চাউখৎলক্লি। ঙসি ভারত্তা তেক্সতাইল স্তার্ত-অপ 3000 হেন্না এক্তিব ওইরে। স্তার্ত-অপ কয়া অমনা ভারতকী হেন্দলুম আইদেন্তিতীদা মালেমগী থাক্তা মগুন লৈহনখ্রে। মরুপশিং, 2047দা চাউখৎলবা ভারত অমা ওইনবগী লম্বী অসি মশা-মরোমদোম লেপচবনি অমসুং 'আত্মানির্ভর ভারত'কী খ্বাইদগী চাউবা য়ুম্ফমদি 'লোকল ফোর লোকেল'নি। ভারত মচা অমগী হুমাং মমল য়াওবা ভারত্তা শাবা পিৎশিং খক্তা লৈবীয়ু অমসুং য়োনবীয়ু। মসি ঐখোয়গী ৱারেপ ওইগদবনি।

ঐগী নুংশিরবা ইরৈবাকচাশিং,

ভারতকী দাইভর্সিতীগী খ্বাইদগী ফজবা মমি অসি ঐখোয়গী নাৎকী ওইবা ঈশৈশিং অমসুং চৎনবীশিংদা উবা ফংই অমসুং ঐখোয়গী ভজন অমসুং কির্তনশিং অসি মসিগী শরুক অমনি। অদোম্না কির্তনগী খুত্থাংদা ফোরস্ত ফায়রগী মতাংদা মীয়ামদা খঙহনবগী থৌওং অসি উখ্রবরা? অদোম্না থাজদবা য়াই, অদুবু ওরিশাগী কেওনঝার দিস্ত্রিক্ততা শিংথানিংঙাই ওইবা থবকশিং পাংথোক্লি। মফম অসিদা রাধাকৃষ্ণ সংকির্তন মন্দলী কৌবা লুপ অমা লৈ।

ভক্তিগা লোয়ননা, ঙসি, হায়রিবা লুপ অসিনা অকোইবগী ফিভম ঙাক্নবা মন্ত্রসু থিরি। মসিগী থৌরাং অসিগী ইথিল অসি - প্রমিলা প্রধানজীনি। উমং অমসুং অকোইবগী ফিভম ঙাক্নবা, মহাক্না ত্রেদিস্নেল ঈশৈশিংদা অনৌবা ময়েক অমসুং অনৌবা পাউজেলশিং হাপখি। মহাক্কী লুপ অসি খুঙ্গং অমদগী খুঙ্গং অমদা চৎখি। ঈশৈগী খুত্থাংদা মীয়াম্না উমংদা মৈ থাবনা মরম ওইদুনা কয়া য়াম্না মাঙ-তাকহনবগে হায়বদু খঙহনখি। মসিগী খুদম অসিনা ঐখোয়দা নিংশিংহল্লি মদুদি ঐখোয়গী নাৎকী চৎনবীশিং অসি মমাংঙৈ মতম খক্তগী নত্তে; মখোয়দা খুন্নাইবু লমজিং-লমতাকপগী শক্তি অদু চেল্লি।

ঐগী নুংশিরবা ইরৈবাকচাশিং,

ঐখোয়গী কুহ্মৈশিং অমসুং চৎনবীশিং অসি ভারতকী চৎনবীগী মরুওইবা য়ুম্ফম্নি, অদুবু ঐখোয়গী চৎনবীগী অহিংবা মওং-মতৌগী অতোপ্পা মশক অমসু লৈরি। মসিগী মশক অসি ঐখোয়গী হৌজিক্কী অমসুং ঐখোয়গী মমাংগী মতমগী পাউতাকশিং অসিনি। ঐখোয়গী অশেংবা পাঙ্গল অসি চহি চা কয়াগী মমাংদগী মেনুস্ক্রিপকী মওংদা ঙাকপীদুনা লাক্লবা লৌশিং অদুনি। হায়রিবা মেনুস্ক্রিপশিং অসিদা সাইন্স, মেদিকেল প্রোসিদ্যুওরশিং, ম্যুজিক, ফিলোসোফি, অমসুং খ্বাইদগী মরুওইনা, মীওইবা খুন্নাইগী তুংলমচৎপু হেন্না মঙাল ওইহনবা ঙম্বা ৱাখল্লোনশিং য়াওরি। মরুপশিং, অসিগুম্বা অখন্নবা লৌশিং, হেরিতেজ অসিবু ঙাক শেন্নবা অসি ঐখোয় পুম্নমক্কী থৌদাংনি। ঐখোয়গী লৈবাক অসিদা চহিচা খুদিং, মীওই খরনা মসিবু মখোয়গী সাধনা ওইহল্লি। অসিগুম্বা পুক্নিং থৌগৎপীবা মীওইশিংগী মরক্তা অমা হায়রগদি তামিল নাদুগী থঞ্জাবুরদগী মনি মারনজীনি। মহাক্না খল্লি মদুদি করিগুম্বা ঙসিগী মীরোল অসিনা তামিলগী মেনুস্ক্রিপশিং ইবা তমদ্রবদি, মসিগী মমল য়াম্লবা হেরিতেজ অসি তুংলমচৎতা মাংখিগনি। মদুগীদমক্তা মহাক্না নুমিদাংগী ক্লাসশিং হৌদোকখি, মদুদা মহৈরোইশিং, থবক শুরিবা নহাশিং, রিসর্চ তৌরিবশিং, মীপুম খুদিংমক্না তম্নবা লাকপা হৌখি।

মনি মারনজীনা মীয়ামদা "তামিল সুভাদিয়িয়ল" হায়বদি, পম লিফ মেনুস্ক্রিপশিং অসি ইবা অমসুং খঙনবগী পাম্বৈ তাকপীখি। ঙসিদি, কন্না হোৎনরকপদগী, মহৈরোয় কয়া অমা হায়রিবা কলা অসি হৈরে। মহৈরোয় খরনা হায়রিবা মেনুস্ক্রিপশিং অসিদা য়ুম্ফম ওইবা ত্রেদিস্নেল মেদিসিন সিস্তেমগী মতাংদা রিসর্চ তৌবা হৌরকখি। মরুপশিং, খল্লু... লৈবাক শিনবা থুংনা অসিগুম্বা থবকশিং অসি পাংথোক্লবদি, ঐখোয়গী অরিবা মতমগী লৌশিং অসি ফক্লাংশিংগী মনুংদা লৈরোই, মসি অনৌবা মীরোলগী ৱাখল্লোনগী শরুক অমা ওইরগনি। ৱাখল্লোন অসিদগী পুক্নিং থৌগৎলদুনা, ভারত সরকারনা চহি অসিগী বজেৎতা পুৱারী ওইরবা খোংথাং অমা - 'জ্ঞান ভারতম মিসন' লাউথোকখ্রে। মিসন অসিগী মখাদা, অরিবা মেনুস্ক্রিপশিং অসি দিজিতেল ওইহনগনি। মদুগী মতুংদা নেস্নেল দিজিতেল রিপোজিতরী অমা শেম্লগনি, মদুদা মালেম পুম্বগী মহৈরোইশিং অমসুং রিসর্চরশিংনা ভারতকী লৌশিং ত্রেদিসনগা শম্নবা ঙমগনি। ঐহাক্না অদোম পুম্নমক্তা হায়জরি মদুদি করিগুম্বা অদোম অসিগুম্বা থৌওং অসিগা মরী লৈনরবদি, নত্ত্রগা মরী লৈনবা পাম্লবদি, মাইগোভ নত্ত্রগা কলচর মন্ত্রালয়গা পাউ ফাওনবিয়ু। মরমদি মসি শুপ্নগী মেনুস্ক্রিপশিং খক্তা নত্তে, মসি ভারতকী থমোয়গী চেপ্তরশিংনি, মসি ঐখোয়না লাক্কদৌরিবা মীরোলশিংদা পীগদবনি।

ঐগী নুংশিরবা ইরৈবাকচাশিং,

অদোমগী অকোইবদা উচেক মখল কয়া লৈবগে হায়না হংলক্লবদি - অদোম্না করি হায়গনি? নোংমদা ঐহাক্না উবা ঙম্বা উচেক 5-6 লৈরম্বা য়াই - খরদি ঐহাক্না খঙই, খরদি খঙদে। অদুবু ঐখোয়গী অকোইবদা করি মখলগী উচেকশিং লৈবগে হায়বসি খঙবদা য়াম্না নুংঙাইবা ফাওই। হন্দক্তা অসিগুম্বা অচৌবা থৌওং অমা পাংথোকখ্রে... মফম অসি আসামগী কাজিরঙ্গা নেস্নেল পার্কনি।

হায়রিবা মফম অসি শমুগন্ধাশিংগীদমক্তা মমিং চৎলবসু - হায়রিবা মতম অসিদা খন্ন-নৈনবগী হীরমদি মাগী গ্রাসলেন্দশিং অমসুং মখোয়দা চাক্তারিবা উচেকশিংনি। ইহান হানবা ওইনা, গ্রাসলেন্দ বার্দ সেন্সস অমা মফম অসিদা পাংথোকখ্রে। সেন্সস অসিনা মরম ওইদুনা, উচেকশিংগী স্পেসিস 40 হেন্না মশক খঙদোক্লে হায়বসি খঙবদা অদোম নুংঙাইবা ফাওগনি। মসিগী মনুংদা য়াম্না তাঙনা উবা উচেক কয়া য়াওরি। অদোম্না করম্না মশিং য়াম্লবা উচেকশিং অসি মশক খঙদোকপা ঙমখিবগে হায়না খঙনীংলমগনি! তেক্নোলোজীনা মসিদা অঙকপা কয়া অমা তৌখি। সেন্সসকী কাঙবু অদুনা সাউন্দ রেকোর্দিং দাইভাইসশিং ইনস্তোল তৌখি। মতুংদা হায়রিবা মখোলশিং অসি কম্প্যুতরদা নৈনখি; AI শীজিন্নখি। উচেকশিং অসি মখোয়গী মখোলদগী মশক খঙবা ঙম্মি – মদুসু মখোয়দা অকাইবা পীবা তৌদনা। খল্লু! তেক্নোলোজী অমসুং সেন্সিতিবিতীনা পুন্না চৎমিন্নরকপা মতমদা, মহৌশাগী মরমদা খঙবা অসি য়াম্না লায়বা অমসুং অঙকপা ওইরকই। ঐখোয়না অসিগুম্বা হোৎনরিবশিং অসি পুক্নিং থৌগৎকদবনি। মসিনা ঐখোয়গী বাইওদাইভর্সিতীবু মশক খঙহল্লগনি অমসুং মথংগী মীরোনশিংবু মসিগা শম্নহল্লগনি।

ঐগী নুংশিরবা ইরৈবাকচাশিং,

করিগুম্বা মতমদা খ্বাইদগী ঙানবা মঙাল অসি অমম্বা মফমদগী লাকই। অসিগুম্বা খুদমশিংগী মনুংদা ঝারখন্দগী গুমলা দিস্ত্রিক্তসু অমনি। মতম অমদা হায়রিবা মফম অসি মাওইস্তশিংগী হিংসাগী মফম অমা ওইরম্মি। বেসিয়া ব্লোক্কী খুঙ্গংশিং অসি মী লৈতবা মফম ওইরকখি। মীশিং অসি অকিবগী ইরোল নুংদা লৈরম্মি। থবক ফংনবগী ওইথোকপা লৈতে, লমশিং অসি হাংদুনা লৈরমখি অমসুং নহাশিং অসি য়ুম থাদোক্নদুনা চৎনখি... অদুবু তুংদা, অহোংবা অমা তুমিন্না অমসুং তপ্না হৌরকখি। ওম প্রকাস সাহুজী কৌবা নহা ওইরিবা নুপা অমনা হিংসাগী লম্বী থাদোকখি। মহাক্না ঙা ফার্ম তৌবা হৌখি। মতুংদা মহাক্না মহাক্কা মান্নবা মহাক্কী মরুপ কয়াবুসু অসিগুম্না তৌনবা পুক্নিং থৌগৎখি।

মহাক্কী হোৎনজবশিং অদুনা কান্নবা অমা পীখি। মমাংদা খুৎলাই পায়রম্বা মীওইশিংনা হৌজিক ঙা ফাবগী লাংশিং পায়রে।

মরুপশিং,

ওম প্রকাস সাহুজীগী হৌরকফম অসি অরায়বা ওইখিদে। য়ানিংদবা ফোঙদোক্নরকখি; থিংজিনবা লাকখি, অদুবু থৌনা অদু হন্থখিদে। প্রধান মন্ত্রী মৎস্য সামপাদা য়োজনা হৌদোকপা মতমদা, মহাক্না অনৌবা শক্তি ফংখি। মহাক্না সরকারদগী ত্রেনিং ফংখি...অমসুং পুখ্রিশিং শাবদা মতেং পাংখি... মতম খরগী মনুংদা, গুমলাদা ফিসরিজ রিভোলুসন হৌখি। ঙসিদি, বসিয়া ব্লোক্কী ইমুং 150দগী হেন্না ঙা য়োকপদা শরুক য়াখ্রে। মতম অমদা নক্সালাইৎ ওর্গনাইজেসনদা য়াওরম্বা মীওই কয়া অমা লৈরি। হৌজিক মখোয়না খুঙ্গং অদুদা ইকায় খুম্নবা পুন্সি অমা হিংলি অমসুং অতোপ্পশিংদা থবক পীরি। গুমলাগী খোঙচৎ অসিনা ঐখোয়দা তাকপীরি মদুদি করিগুম্বা লম্বী অসি অচুম্বা ওইরবদি অমসুং ৱাখলদা থাজবা লৈরবদি, খ্বাইদগী অরুবা ফিভমদা ওইরবসু চাউখৎপগী মঙাল অদু চুখৎপা ঙম্মী।

ঐগী নুংশিরবা ইরৈবাকচাশিং,

ওলিম্পিক্স নত্তনা খ্বাইদগী চাউবা শান্ন-খোৎনবগী থৌরম অমা লৈ হায়বসি অদোম্না খঙব্রা? পাউখুমদি – ‘ৱার্ল্দ পুলিস এন্দ ফায়র গেমস’ ... মালেম পুম্বগী পুলিস, ফায়র ফাইতর, সেক্যুরিতী পর্সনেলশিংগী মরক্তা শান্নগদবা শান্ন-খোৎনবগী তোর্নামেন্তনি। হায়রিবা মতম অসিদা তোর্নামেন্ত অসি অমেরিকাদা পাংথোকখি অমসুং ভারতনা মসিদা পুৱারী শেমখি। ভারতনা মেদল 600 রোম ফংখি। লৈবাক 71গী মনুংদা ঐখোয়না অহুমশুবা মফমদা লৈরে। লৈবাক অসিগীদমক অয়ুক নুমিদাং চুপ্পা লেপ্লিবা য়ুনিফোর্ম শেৎপা মীওইশিংনা কন্না হোৎনবগী কান্নবা ফংলে। ঐখোয়গী মরুপশিং অসিনা হৌজিক শান্ন-খোৎনবগী লমদসু ফিরাল ৱাংনা পাইহল্লি। ঐনা শান্নরোই পুম্নমক অমসুং কোচিং তীমদা নুংঙাইবা ফোংদোকচরি।

ৱাফম অমা হায়রবদা, 2029দা গেমস অসি ভারত্তা পাংথোক্কনি হায়বসি খঙবদা অদোম্না নুংঙাইবা পোক্লমগনি। মালেম পুম্বগী শান্নরোয়শিংনা ঐখোয়গী লৈবাক অসিদা লাক্কনি। ঐখোয়না মখোয়দা ভারতকী মীয়োক মীচান ফবা মতৌ অদু উৎকনি অমসুং ঐখোয়গী শান্ন-খোৎনবগী চৎনবীগা মখোয়গা খঙহল্লগনি।

মরুপশিং,

হৌখিবা নুমিৎ খরনি অসিদা, ঐহাক্না নহা ওইরিবা শান্নরোয় কয়া অমসুং মখোয়গী মমা-মপাশিংদগী মেসেসশিং ফংখি। মসিগী মনুংদা, 'খেলো ভারত নীতি 2025' অসি য়াম্না থাগৎপা ফোংদোকখি। মসিগী পোলিসী অসিগী পান্দম অসি ময়েক শেংই - ভারতপু স্পোর্তিং সুপরপাৱর অমা ওইহন্নবা। খুঙ্গংশিং, লায়রবশিং অমসুং মচানুপীশিং অসি পোলিসী অসিগী প্রাইওরিতী ওই। স্কুলশিং অমসুং কোলেজশিংনা হৌজিক্তি স্পোর্তসপু নুমিৎ খুদিংগী পুন্সিগী শরুক অমা ওইহল্লগনি। স্পোর্তসকা মরী লৈনবা স্তার্ত-অপশিং, মখোয় অসি স্পোর্তস মেনেজমেন্ত ওইগেরা নত্ত্রগা মেন্যুফেকচরিং ওইগেরা, মওং পুম্নমক্তা মতেং পাংগনি। লৈবাক অসিগী নহারোলশিংনা মশা-মশানা শাবা রেকেৎ, বেৎ অমসুং বোলগা লোয়ননা শান্নরবদি মশা-মশানা মশা-মরোমদোম লেপচবগী মিসন অসি কয়া য়াম্না মপাঙ্গল কনখৎলক্কদগে হায়বদু খল্লু। মরুপশিং, শান্ন-খোৎনবনা তীম স্পিরিত অমা শেম্মী। মসি ফিৎনেস, মশাদা থাজবা অমসুং মপাঙ্গল কনবা ভারত অমা শেমগৎপগী লম্বীনি। মরম অদুনা হেন্না শান্নবীয়ু, হেন্না মাইপাকপীয়ু।

ঐগী নুংশিরবা ইরৈবাকচাশিং,

করিগুম্বা মতমদা মী খরনা থবক অমা তৌবা ঙম্লোই হায়না খনবা য়াই। মখোয়না খল্লি, মসি ওইথোকপা ঙমগদ্রা? অদুবু, লৈবাক অসিনা ৱাখল্লোন অমখক্তদা পুনশিল্লকপা মতমদা, ওইথোক্লোইদবা অদুসু ওইথোকপা ঙমহল্লি। স্বচ্ছ ভারত মিসন অসি মসিগী খ্বাইদগী চাউবা খুদম অমনি। অথুবা মতমদা মিসন অসিনা চহি 11 মপুং ফারগনি। অদুবু, মসিগী পাঙ্গল অমসুং মসিগী মথৌ তাবা অসি অদুমক চপ মান্নৈ।

চহি 11 অসিদা স্বচ্ছ ভারত মিসন অসি মীয়ামগী খোংজং অমা ওইরক্লি। মীয়াম্না মসি মখোয়গী থৌদাংনি হায়না লৌই অমসুং মসি মীয়াম্না তশেংনা শরুক য়াবা অমনি।

মরুপশিং,

চহি খুদিংগী পাংথোকপা স্বচ্ছ সর্ভে অসিনা মসিগী ৱাখল্লোন অসি হেন্না মপাঙ্গল কনখৎহল্লি। চহি অসিদা লৈবাক অসিগী সহর অমসুং সহর মচা 4500 হেনবনা মসিদা শরুক য়াখ্রে। মসিদা মীওই করোর 15 হেন্না শরুক য়াখি। মসি অচম্বা মশীং নত্তে। মসি স্বচ্ছ ভারতকী ভোইসনি।

মরুপশিং,

ক্লিনলিনেসকী মতাংদদি, ঐখোয়গী সহরশিং অমসুং সহর মচাশিংনা মখোয়গী মথৌ তাবশিং অমসুং অকোয়বগী ফিভমগী মতুং ইন্না তোঙান তোঙানবা মওংদা থবক তৌরি। অমসুং মখোয়গী শাফু অসি হায়রিবা সহরশিং অসিখক্তদা অকক্নবা ওইদে; লৈবাক পুম্নমক্না হায়রিবা পাম্বৈশিং অসি শিজিন্নরি। উত্তরাখন্দগী কৃর্তিনগরগী মীয়াম্না চীংগী মফমশিংদা ৱেস্ত মেনেজমেন্তকী অনৌবা খুদম অমা থম্মি। মতৌ অসুম্না, মেঙ্গালুরুদসু ওর্গানিক ৱেস্ত মেনেজমেন্ত অসি তেক্নোলোজীগী মতেংগা লোয়ননা পাংথোক্লি। অরুনাচলদা রোইং কৌবা অপিকপা সহর অমা লৈ। মতম অমদা ৱেস্ত মেনেজমেন্ত অসি মফম অদুগী মীয়ামগী হকশেলগীদমক অচৌবা শিংনবনি। মফম অদুদা লৈরিবা মীওইশিংনা মসিগী থৌদাং লৌখি। গ্রীন রোইং ইনিসিএতিব হৌদোকখি অমসুং রিসাইকল তৌরবা ৱেস্তশিংদগী পার্ক অমা শেমখি। মসিগা মান্ননা, কারাদ, বিজয়ৱাদতা ঈশিং মেনেজমেন্তকী অনৌবা খুদম কয়া অমা থম্লে। অহমাদাবাদকী রিভর ফ্রন্তকী লুনানবা অসিনা মীপুম খুদিংমক্কী পুক্নিং চিংশিনখি।

মরুপশিং,

ভোপালদা লৈবা তীম অমবু ‘সাকরাত্মক সোচ’ হায়না কৌই। মসিদা নুপী 200 য়াওরি। মখোয়না শেংদোকপতা নত্তনা ৱাখল্লোনশিংসু হোংহল্লি। পুন্না সহর অসিগী পার্ক 17 শেংদোকপগা লোয়ননা ফিগী খাউশিং য়েন্থোক্লি, মখোয়গী খোঙথাং খুদিংমক পাউজেল পীরি। অসিগুম্বা হোৎনবা কয়া অসিনা মরম ওইদুনা, ভোপালনা হৌজিক স্বচ্ছ সর্ভেদা য়াম্না চাউনা খুমাং চাউশিল্লে। লখনগী গোমতী রিভর তীমসু পনবদা মরু ওই। হৌখিবা চহি 10 অসিদা নোংমাইজিং নুমিৎ খুদিংগী, লেপ্পা লৈতনা, চোকথবা লৈতনা, তীম অসিগী মীহুৎশিংনা শেংদোকপগী থবক তৌরি। ছত্তিসগরগী বিলহাগী খুদম অসিসু য়াম্না ফৈ। মফম অসিদা, নুপীশিংদা ৱেস্ত মেনেজমেন্তকী মতাংদা ত্রেনিং পীখি, অমসুং মখোয়না পুন্না, সহর অসিগী মশক হোংহনখি। গোৱাগী পানাজী সহরগী খুদম অসিসু পুক্নিং থৌগৎনিংঙাইনি। মফম অদুদা, ৱেস্ত অসি কাংলুপ 16 থোক্না খায়দোকই অমসুং মসিদসু নুপীশিংনা লুচিংলি। পানাজীনা প্রসিদেন্স এৱার্দ ফাওবা ফংখ্রে। মরুপশিং, লুনানবা হায়বসি মতম অমখক্তদা, নোংমখক্তদা তৌবা থবক নত্তে। ঐখোয়না নুমিৎ খুদিংগী, চহিগী মীকুপ খুদিংগী, স্বচ্ছতাদা মরুওইবা পীবা খক্তনা, লৈবাক অসি লুনান্না থম্বা ঙমগনি।

মরুপশিং,

সাৱানগী নোং মরক্তা, লৈবাক অসি অমুক্কা হন্না হরাও কুহ্মৈগী নুংঙাইবনা থল্লি। ঙসি হরিয়ালি তিজনি, মতুংদা নাগ পঞ্চমী অমসুং রক্ষাবন্ধন লাক্কনি, মতুংদা জনমাস্তমী, ঐখোয়গী ঙাউশিন্নবা অপীকপা কনাগী পোকপগী থৌরম লাক্কনি। হায়রিবা কুহ্মৈ পুম্নমক অসি মফম অসিদা ঐখোয়গী ইমোসনগা মরী লৈনৈ, মখোয়না ঐখোয়দা মহৌশাগা মরী লৈনবা অমসুং তংদু লৈতাবা পাউজেলসু পীরি। নখোয় পুম্নমক্তা মসিগী শেংলবা কুহ্মৈশিং অসিগী য়াইফ-পাউজেল পীজরি।

ঐগী নুংশিরবা মরুপশিং,

অদোমগী ৱাখল্লোন অমসুং এক্সপরিয়েন্স মখা তানা শেয়র তৌবীরকউ। ঐখোয়গী লৈবাক মীয়ামগী অনৌবা মাইপাকপশিং অমসুং ইথিলশিংগা লোয়ননা ঐখোয়না মথং থাদা অমুক্কা হন্না উন্নগনি। অদোম চেকশিন্না লৈবীয়ু।

হন্না-হন্না থাগৎচরি।

*****