ಗೋವಾದ 56ನೇ ಭಾರತದ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ (ಐ ಎಫ್‌ ಎಫ್‌ ಐ) ದ ಚಾಲನಾ ಸಮಿತಿಯ ಮೊದಲ ಸಭೆ ಇಂದು ಮುಂಬೈನಲ್ಲಿರುವ ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮದ (ಎನ್‌ ಎಫ್‌ ಡಿ ಸಿ) ಪ್ರಧಾನ ಕಚೇರಿಯಲ್ಲಿ ನಡೆಯಿತು. ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಸಂಜಯ್ ಜಾಜು, ಉತ್ಸವದ ನಿರ್ದೇಶಕ ಶ್ರೀ ಶೇಖರ್ ಕಪೂರ್, ಎನ್‌ ಎಫ್‌ ಡಿ ಸಿ ವ್ಯವಸ್ಥಾಪಕ ನಿರ್ದೇಶಕ ಶ್ರೀ ಪ್ರಕಾಶ್ ಮಗ್ದುಮ್ ಹಾಗೂ ಗೋವಾ ಸರ್ಕಾರ, ವಾರ್ತಾ ಮತ್ತು ಪ್ರಸಾರ ಸಚಿವಾಲಯ ಮತ್ತು ಎನ್‌ ಎಫ್‌ ಡಿ ಸಿ ಯ ಹಿರಿಯ ಅಧಿಕಾರಿಗಳು ಮತ್ತು ಭಾರತೀಯ ಮತ್ತು ಜಾಗತಿಕ ಚಲನಚಿತ್ರೋದ್ಯಮಗಳ ಚಾಲನಾ ಸಮಿತಿ ಸದಸ್ಯರು ಭಾಗವಹಿಸಿದ್ದರು.

ಈ ಸಭೆಯು ಐ ಎಫ್‌ ಎಫ್‌ ಐ 2025 ರ ಕಾರ್ಯತಂತ್ರದ ಯೋಜನೆಯ ಮೇಲೆ ಕೇಂದ್ರೀಕರಿಸಿತು, ಕಾರ್ಯಕ್ರಮಗಳು, ಜನಸಂಪರ್ಕ, ಪ್ರತಿಭೆಗಳ ತೊಡಗಿಸಿಕೊಳ್ಳುವಿಕೆ ಮತ್ತು ಉತ್ಸವದ ಒಳಗೊಳ್ಳುವಿಕೆ, ಜಾಗತಿಕ ಸ್ಥಾನೀಕರಣ ಮತ್ತು ಸಾರ್ವಜನಿಕ ತೊಡಗಿಸಿಕೊಳ್ಳುವಿಕೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿರುವ ನವೀನ ಉಪಕ್ರಮಗಳನ್ನು ಕುರಿತು ವಿವರವಾದ ಚರ್ಚೆಗಳು ನಡೆದವು. ಐ ಎಫ್‌ ಎಫ್‌ ಐ ನ 56ನೇ ಆವೃತ್ತಿಯು 2025ರ ನವೆಂಬರ್ 20 ರಿಂದ 28 ರವರೆಗೆ ಗೋವಾದಲ್ಲಿ ನಡೆಯಲಿದೆ. ಯುವಜನರ ಮೇಲೆ ಗಮನವನ್ನು ಕೇಂದ್ರೀಕರಿಸಿ, ಉತ್ಸವವು ವಿದ್ಯಾರ್ಥಿ ಚಲನಚಿತ್ರ ನಿರ್ಮಾಪಕರು ಮತ್ತು ಯುವ ಕಂಟೆಂಟ್ ರಚನೆಕಾರರಿಗೆ ಕ್ಯುರೇಟೆಡ್ ಮಾಸ್ಟರ್‌‌ ಕ್ಲಾಸ್‌, ಉದ್ಯಮ ಕಾರ್ಯಾಗಾರಗಳು ಮತ್ತು ಹೊಸ ಧ್ವನಿಗಳನ್ನು ಜಾಗತಿಕ ಮಾರ್ಗದರ್ಶಕರೊಂದಿಗೆ ಸಂಪರ್ಕಿಸುವ ನೆಟ್‌ವರ್ಕಿಂಗ್ ವೇದಿಕೆಗಳ ಮೂಲಕ ಹೊಸ ಹಾದಿಯನ್ನು ತೆರೆಯುತ್ತದೆ.

ಭಾರತದ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ (ಐ ಎಫ್‌ ಎಫ್‌ ಐ) ಜೊತೆಗೆ ಹೊಸದಾಗಿ ಮರು ಬ್ರ್ಯಾಂಡ್‌ ಮಾಡಲಾದ ವೇವ್ಸ್‌ ಫಿಲ್ಮ್ ಬಜಾರ್ ಸಹ ನಡೆಯುತ್ತದೆ - ಇದು ದಕ್ಷಿಣ ಏಷ್ಯಾದ ಅತಿದೊಡ್ಡ ಚಲನಚಿತ್ರ ಮಾರುಕಟ್ಟೆ ಮತ್ತು ಭಾರತದ ಅಂತಾರಾಷ್ಟ್ರೀಯ ಚಲನಚಿತ್ರ ಸಂಪರ್ಕದ ಪ್ರಮುಖ ಅಂಶವಾಗಿದೆ. ಕಂಟೆಂಟ್, ಸೃಜನಶೀಲತೆ ಮತ್ತು ಸಹ-ನಿರ್ಮಾಣಗಳಿಗೆ ಭಾರತವನ್ನು ಜಾಗತಿಕ ಕೇಂದ್ರವಾಗಿಸುವ ವಿಶಾಲ ಕಾರ್ಯತಂತ್ರದ ದೃಷ್ಟಿಕೋನದ ಭಾಗವಾಗಿ ಫಿಲ್ಮ್ ಬಜಾರ್ ಅನ್ನು ವೇವ್ಸ್‌  ಫಿಲ್ಮ್ ಬಜಾರ್ ಆಗಿ ಮರು ಬ್ರ್ಯಾಂಡಿಂಗ್‌ ಮಾಡುವ ಬಗ್ಗೆ ಚಾಲನಾ ಸಮಿತಿಯು ಚರ್ಚಿಸಿ ಅನುಮೋದಿಸಿತು.

ಉತ್ಸವದ ವಿನ್ಯಾಸದಲ್ಲಿ ಹೆಚ್ಚಿನ ಒಳಗೊಳ್ಳುವಿಕೆ ಮತ್ತು ಸೃಜನಶೀಲ ಒಳನೋಟಗಳನ್ನು ಉತ್ತೇಜಿಸಲು, ಚಾಲನಾ ಸಮಿತಿಯನ್ನು 16 ರಿಂದ 31 ಸದಸ್ಯರಿಗೆ ಗಮನಾರ್ಹವಾಗಿ ವಿಸ್ತರಿಸಲಾಗಿದೆ. ಇದು ಹೆಚ್ಚು ವೈವಿಧ್ಯಮಯ ಮತ್ತು ಉದ್ಯಮ-ಪ್ರಾತಿನಿಧಿಕ ಸಂಸ್ಥೆಯಾಗಿದೆ. ಸಮಿತಿಯು ಸಿನಿಮಾ, ನಿರ್ಮಾಣ, ಮಾಧ್ಯಮ ಮತ್ತು ಸಾಂಸ್ಕೃತಿಕ ಕ್ಷೇತ್ರಗಳ ಪರಿಣಿತರಾದ ಅನುಪಮ್ ಖೇರ್, ಗುಣೀತ್ ಮೋಂಗಾ ಕಪೂರ್, ಸುಹಾಸಿನಿ ಮಣಿರತ್ನಂ, ಖುಷ್ಬು ಸುಂದರ್, ಪಂಕಜ್ ಪರಾಶರ್ ಮತ್ತು ಪ್ರಸೂನ್ ಜೋಶಿ ಅವರಂತಹ ಗಮನಾರ್ಹ ಹೆಸರುಗಳನ್ನು ಒಳಗೊಂಡಿದೆ.

ಐ ಎಫ್‌ ಎಫ್‌ ಐ 2025, ಸೃಜನಶೀಲ ಆರ್ಥಿಕತೆಯನ್ನು ಬಲಪಡಿಸುವುದು, ಮಾಧ್ಯಮ ಮತ್ತು ಮನರಂಜನಾ ವಲಯದಲ್ಲಿ ನವೋದ್ಯಮಗಳನ್ನು ಬೆಂಬಲಿಸುವುದು ಮತ್ತು ಏಕ-ಗವಾಕ್ಷಿ ಸೌಲಭ್ಯ ಮತ್ತು ಪ್ರೋತ್ಸಾಹ ಆಧಾರಿತ ನೀತಿಗಳ ಮೂಲಕ ಭಾರತದಲ್ಲಿ ಚಿತ್ರೀಕರಣಕ್ಕೆ ಜಾಗತಿಕ ನಿರ್ಮಾಣಗಳನ್ನು ಪ್ರೋತ್ಸಾಹಿಸುವ ಭಾರತದ ವಿಶಾಲ ದೃಷ್ಟಿಕೋನಕ್ಕೆ ಅನುಗುಣವಾಗಿದೆ. ಅದರ ಮಹತ್ವಾಕಾಂಕ್ಷೆಯ ಕಾರ್ಯಕ್ರಮಗಳು, ಸಮಗ್ರ ವಿಧಾನ ಮತ್ತು ಸಿನಿಮೀಯ ಶ್ರೇಷ್ಠತೆಗೆ ಬದ್ಧತೆಯೊಂದಿಗೆ, ಐ ಎಫ್‌ ಎಫ್‌ ಐ ನ 56ನೇ ಆವೃತ್ತಿಯು ಒಂದು ಮೈಲಿಗಲ್ಲು ಉತ್ಸವವಾಗಲು ಸಜ್ಜಾಗಿದೆ - ಇದು ಸಂಪರ್ಕಿತ, ಸೃಜನಶೀಲ ಮತ್ತು ಸಹಯೋಗದ ಜಗತ್ತಿನಲ್ಲಿ ವಿಕಸನಗೊಳ್ಳುತ್ತಿರುವ ಸಿನೆಮಾದ ಅರ್ಥವನ್ನು ಪ್ರತಿಬಿಂಬಿಸುತ್ತದೆ.

*****