मुंबई , 18 जुलै, 2025

गोव्यातील 56 व्या भारतीय आंतरराष्ट्रीय चित्रपट महोत्सवासाठी  सुकाणू समितीच्या पहिल्या बैठकीचे आज मुंबईतील राष्ट्रीय चित्रपट विकास महामंडळाच्या (एनएफडीसी) मुख्यालयात आयोजन करण्यात आले. माहिती आणि प्रसारणमंत्री अश्विनी वैष्णव यांनी या बैठकीचे अध्यक्षपद भूषवले. यावेळी माहिती आणि प्रसारण मंत्रालयाचे सचिव संजय जाजू, महोत्सवाचे संचालक शेखर कपूर, एनएफडीसीचे व्यवस्थापकीय संचालक प्रकाश मगदूम गोवा सरकार, माहिती आणि प्रसारण मंत्रालय आणि एनएफडीसीचे वरिष्ठ अधिकारी आणि भारत आणि जागतिक चित्रपट उद्योगातील सुकाणू समितीच्या सदस्यांचे पॅनेल उपस्थित होते.

या बैठकीत  इफ्फी  2025 साठी धोरणात्मक नियोजनावर विशेष भर देण्यात आला. महोत्सवाची समावेशकता, जागतिक स्थान आणि सार्वजनिक सहभाग वाढवण्याच्या उद्देशाने कार्यक्रमाची आखणी, संपर्काची व्याप्ती, प्रतिभावंताचा सहभाग  आणि नाविन्यपूर्ण उपक्रमांवर सविस्तर चर्चा झाली. 56वा इफ्फी महोत्सव गोव्यामध्ये 20 ते 28 नोव्हेंबर  2025 या  कालावधीत  आयोजित होणार आहे. तरुणांवर नव्याने लक्ष केंद्रित करत, हा महोत्सव विद्यार्थी चित्रपट निर्माते आणि तरुण आशय निर्मात्यांसाठी  नवीन संधी उपलब्ध करून देईल. विशेष प्रकारे रचना केलेले मास्टरक्लासेस, उद्योग कार्यशाळा आणि नवीन कलाकारांना जागतिक मार्गदर्शकांशी जोडणारे नेटवर्किंग प्लॅटफॉर्म यांचा यात समावेश आहे.

इफ्फीसोबतच नव्याने रिब्रँडिंग करण्यात आलेल्या दक्षिण आशियातील सर्वात मोठ्या चित्रपट बाजाराचे आणि भारताच्या आंतरराष्ट्रीय चित्रपट व्याप्तीचा एक महत्त्वाचा घटक असलेल्या वेव्ह्ज फिल्म बाजाराचे आयोजन करण्यात येईल. फिल्म बाजारचे वेव्हज फिल्म बाजार असे पुनर्ब्रँडिंग करण्यावर सुकाणू समितीने चर्चा केली आणि त्याला मान्यता दिली.भारताला आशय, सर्जनशीलता आणि सह-निर्मितीसाठी जागतिक केंद्र बनवण्याच्या व्यापक धोरणात्मक दृष्टिकोनाचा हा एक भाग आहे.

महोत्सवाच्या डिझाइनमध्ये अधिक समावेशकता  आणि सर्जनशील अंतर्दृष्टी  वाढवण्यासाठी, सुकाणू समितीचा लक्षणीय विस्तार करण्यात आला असून  सदस्यांची संख्या 16 वरून 31 करण्यात आली आहे, ज्यामधून  एक अधिक वैविध्यपूर्ण आणि उद्योग-प्रतिनिधी मंडळ प्रतिबिंबित होत आहे. समितीमध्ये अनुपम खेर, गुनीत मोंगा कपूर, सुहासिनी मणिरत्नम, खुशबू सुंदर, पंकज पराशर आणि प्रसून जोशी यांसारख्या नामांकित  आणि सिनेमा, निर्मिती, माध्यम आणि सांस्कृतिक नेतृत्वातील समृद्ध कौशल्ये असलेल्या व्यक्तींचा समावेश आहे.

इफ्फी  2025 भारताच्या सर्जनशील अर्थव्यवस्थेला बळकटी देण्याच्या, माध्यम आणि मनोरंजनातील स्टार्ट-अप्सना  समर्थन देण्याच्या, आणि एक खिडकी सुविधा आणि प्रोत्साहन-आधारित धोरणांद्वारे  जागतिक चित्रपट निर्मितीसाठी भारतात चित्रिकरण करण्यास प्रोत्साहित करण्याच्या व्यापक दृष्टिकोनाशी देखील संलग्न आहे.आपल्या महत्त्वाकांक्षी प्रोग्रामिंग, समावेशक दृष्टिकोन आणि चित्रपट उत्कृष्टतेच्या वचनबद्धतेसह, इफ्फीची 56 वी आवृत्ती एक ऐतिहासिक उत्सव बनण्यासाठी सज्ज आहे—जी परस्परांशी जोडलेल्या, सर्जनशील आणि सहयोगी जगात सिनेमाच्या विकसित होत असलेल्या अर्थाचे प्रतिबिंब दर्शवणार आहे.

निलीमा चितळे/शैलेश पाटील/प्रिती मालंडकर

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai