மத்திய உள்துறை மற்றும் கூட்டுறவுத் துறை அமைச்சர்  திரு  அமித் ஷா இன்று புதுதில்லியில் அனைத்து மாநிலங்கள் மற்றும் யூனியன் பிரதேசங்களின் கூட்டுறவு அமைச்சர்களுடன் "சிந்தனை அமர்வுக் கூட்டத்திற்குத்" தலைமை தாங்கினார். இந்த நிகழ்வு சர்வதேச கூட்டுறவு ஆண்டு 2025-ஐ கொண்டாடுவதைக் குறிக்கிறது. இந்தக் கூட்டத்தை இந்திய அரசின் கூட்டுறவு அமைச்சகம் ஏற்பாடு செய்தது. "சிந்தனை அமர்வுக் கூட்டத்தை" வெற்றிகரமாக ஏற்பாடு செய்வது கூட்டுறவுத் துறையை வலுப்படுத்துவதற்கான ஒரு குறிப்பிடத்தக்க முயற்சியாகும். நாடு முழுவதும் உள்ள கூட்டுறவு அமைச்சர்கள், கூடுதல் தலைமைச் செயலாளர்கள், முதன்மைச் செயலாளர்கள் மற்றும் கூட்டுறவுத் துறைகளின் செயலாளர்கள் இந்தக் கூட்டத்தில் பங்கேற்றனர். இந்தியாவில் கூட்டுறவு இயக்கத்தை வலுப்படுத்துவதற்கான தற்போதைய திட்டங்களை ஆய்வு செய்வது, சாதனைகளை மதிப்பிடுவது மற்றும் ஒத்துழைப்பை மேம்படுத்துவதற்கான ஒரு துடிப்பான தளத்தை வழங்குவதே இந்தக் கூட்டத்தின்  நோக்கமாகும்.

கூட்டத்தில் பேசிய திரு. அமித் ஷா, பிரதமர் திரு. நரேந்திர மோடி, நாட்டில் நீண்டகால ஒத்துழைப்பு மரபை மீண்டும் உயிர்ப்பிக்கும் நோக்கத்துடன் கூட்டுறவு அமைச்சகத்தை நிறுவியதாகவும், அதே நேரத்தில் தற்போதைய கண்ணோட்டங்களையும் மனதில் கொண்டதாகவும் கூறினார். இந்தியாவில் சுமார் 60 முதல் 70 கோடி மக்கள் அடிப்படை வசதிகள் கூட இல்லாமல், தலைமுறை தலைமுறையாக பற்றாக்குறையில் வாழ்ந்து வருவதாகவும் அவர் குறிப்பிட்டார். 2014 முதல் 2024 வரையிலான 10 ஆண்டு காலத்திற்குள், திரு மோடி அரசு இந்த கோடிக்கணக்கான மக்களுக்கு வீடு, கழிப்பறைகள், குடிநீர், உணவு தானியங்கள், சுகாதாரம், எரிவாயு சிலிண்டர்கள் மற்றும் பிற வசதிகளை வழங்குவதன் மூலம் அவர்களின் கனவுகளை நிறைவேற்றியது என்று அவர் கூறினார். 140 கோடி மக்கள்தொகை கொண்ட இந்தியா போன்ற ஒரு நாட்டிற்கு, இரண்டு விஷயங்கள் மிக முக்கியமானவை - மொத்த உள்நாட்டு உற்பத்தி மற்றும் மொத்த உள்நாட்டு உற்பத்தியின் வளர்ச்சி, அத்துடன் 140 கோடி மக்களுக்கும் வேலைவாய்ப்புகளை உருவாக்குதல் என்று அவர் வலியுறுத்தினார். நாட்டில் உள்ள ஒவ்வொரு தனிநபருக்கும் வேலைவாய்ப்பை உருவாக்குவதற்கு கூட்டுறவு மட்டுமே ஒரே வழி என்றும், அதனால்தான் நான்கு ஆண்டுகளுக்கு முன்பு கூட்டுறவு அமைச்சகம் மிகுந்த தொலைநோக்கு பார்வையுடன் நிறுவப்பட்டது என்றும் அவர் கூறினார்.

நாட்டின் 140 கோடி மக்களும் வேலைவாய்ப்பு பெற்று கடின உழைப்புடன் தங்கள் வாழ்க்கையை வாழ்ந்தால் மட்டுமே இந்த சிந்தனை அமர்வின் நோக்கம் நிறைவேறும் என்றும், இதை வெற்றிகரமாக்க இந்திய அரசு 60 முயற்சிகளை எடுத்துள்ளது என்றும் திரு. அமித் ஷா கூறினார். இவற்றில் ஒரு முக்கியமான முயற்சி தேசிய கூட்டுறவு தரவுத்தளத்தை உருவாக்குவதாகும், இது இடைவெளிகளை அடையாளம் காண உதவும் என்றும் அவர் கூறினார். தேசிய, மாநில, மாவட்ட மற்றும் தாலுகா மட்டங்களில் உள்ள கூட்டுறவு நிறுவனங்கள் எந்தெந்த கிராமங்களில் ஒரு கூட்டுறவு நிறுவனம் கூட இல்லை என்பதை கூட்டாகக் காணும் வகையில் இந்த தேசிய கூட்டுறவு தரவுத்தளம் உருவாக்கப்பட்டுள்ளது என்று அவர் விளக்கினார். அடுத்த ஐந்து ஆண்டுகளுக்குள், நாட்டில் கூட்டுறவு இல்லாமல் ஒரு கிராமம் கூட இருக்கக்கூடாது என்பதே மத்திய அரசின் குறிக்கோள் என்றும், இந்த இலக்கை அடைய கூட்டுறவு தரவுத்தளத்தைப் பயன்படுத்த வேண்டும் என்றும் திரு. ஷா கூறினார்.

இயற்கை விவசாயத்தை ஊக்குவிப்பதன் அவசியத்தை திரு. அமித் ஷா வலியுறுத்தினார். மேலும், அனைத்து மாநில கூட்டுறவு அமைச்சர்களும் அந்தந்த மாநிலங்களில் உள்ள வேளாண் அமைச்சர்களுடன் ஒருங்கிணைந்து இயற்கை விவசாயத்தை ஊக்குவிக்க வேண்டும் என்றும், இதனால் சாதாரண மக்களின் ஆரோக்கியமும் மேம்படும் என்றும் கூறினார்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்:

https://www.pib.gov.in/PressReleasePage.aspx?PRID=2140937

---

(Release ID: 2140937)

AD/RB/DL