ঙসি প্রধান মন্ত্রী শ্রী নরেন্দ্র মোদীনা ভিদিও কনফরেন্সকী খুৎথাংদা ইন্তরনেসনেল স্পেস স্তেসন্দা চৎপা অহানবা ভারতকী এষ্ট্রোনোত গ্রুপ কেপ্তেন সুভান্সু সুক্লাগা ৱারি শানখ্রে। প্রধান মন্ত্রীনা হায়খি মদুদি সুভান্সু সুক্লানা ইমা লৈবাক ভারত্তগী য়াম্না লাপ্না হৌজিক লৈরবসু, ভারতমচা খুদিংমক্কী থম্মোয়দা মহাক্না য়াম্না নক্না লৈরি। সুভান্সুগী মিং অসিমক অশেংবা হায়বনি অমসুং মহাক্কী খোঙচৎ অসিনা অনৌবা যুগ অমা হৌদোক্লে। মসি লনাই মীওই অনিগী মরক্ত ৱারি শানবা ওইরবসু, মসিদা ভারতমচা করোর ১৪০ গী ইহুল অমসুং হরাওবা য়াওরি। সুভান্সুদা ঙাংলিবা খোঞ্জেল অসিদা লৈবাক শীনবা থুংবগী হরাওবা অমসুং চাউথোকচবা য়াওরবনি অমসুং মহাক্না থাগৎপা ফোঙদোকখি অমসুং স্পেসতা ভারতকী ফিরাল পাইহনবগীদমক সুভান্সুদা য়াইফ পাউজেল পীখি। সুভান্সগী হকচাংগী ফিবম অমসুং স্পেস স্তেন্দা নুংঙাইরিবরা হায়না শ্রী মোদীনা সুভান্সুদা হংখি।

প্রধান মন্ত্রীগী পাউখুম পীরদুনা, ভারতমচা করোর ১৪০ গী মহুৎশীন্দুনা য়াইফ পাউজেল পীরকপগীদমক এষ্ট্রোনোত সুভান্সু সুক্লানা থাগৎপা ফোঙদোকখি অমসুং মহাক হকচাং ফনা লৈরি অমসুং মহাক্না মীয়ামগী মীনুংশি অমসুং থৌজাল ফংবদা অপেনবা পোক্লে হায়না ফোঙদোকখি। মহাক্না হায়খি মদুদি মহাক্না ওর্বিত্ত লৈরিবা মতম অসি য়াম্না নুংঙাইবা অমসুং অনৌবা অমনি, মসিদা মহাক্কী মশাগী খোঙচৎকী মমি তাবদা নত্তনা ভারতনা মাঙলোমদা চঙশিনবগী মাইকৈদা চৎপনি। সুভান্সু সুক্লানা হায়খি মদুদি পৃথিবীদগী ওর্বিত ফাওবগী কিলোমিতর ৪০০ গী মহাক্কী খোঙচৎ অসি মশিং থিঙমদ্রবা ভারতমচাশিং অপাম্বশিংগী খুদম অমনি। মহাক্কী অঙাং ওইরিঙৈগী মতম নিংশিংলদুনা, মহাক্না হায়খি মদুদি মহাক এষ্ট্রোনোত অমা ওইগনি হায়না কৈদৌঙৈদা খনখিদে, অদুবু প্রধান মন্ত্রীগী লমজিং মখাদা, ঙসি ভারতনা অসিগুম্বা মঙলানশিং মঙফাওনবা ঙম্লে। মসি অচৌবা মাইপাকপা অমনি অমসুং স্পেসতা মহাক্কী লৈবাক্কী মহুৎশীনবদা মহাক চাউথোকচবা ফাওহল্লে।

ফাগী তৌরদুনা প্রধান মন্ত্রীনা হায়খি মদুদি গ্রেভিতি লৈতবা স্পেসতা সুভান্সু লৈরবসু, মহাক লেংদনা লৈবা ভারতমচা খুদিংমক্না উরে। ভারত্তগী পুখিবা গজর হলৱা অদু মহাক মরুপ এষ্ট্রোনোতশিং চামিন্নরবরা হায়না প্রধান মন্ত্রীনা সুভান্সুদা হংখি। সুভান্সু সুক্লানা হায়খি গজর হলৱা, মুং দাল হলৱা অমসুং আম রাস য়াওনা ভারতকী মমাংঙৈগী অচা-অথক কয়া মহাক্না স্পেসতা পুখি। ভারতকী ইনাকখুল্লবা মথেলশিং মহাও অমা মহাক্কী মালেমগী লৈবাকশিংগী মরুপশিংদা তংহন্নবা মহাক্না খল্লি। মহাক্না প্রধান মন্ত্রীদা হায়খি মদুদি মখোয় পুন্না ফম্মিন্নরে অমসুং মথেলশিং চামিন্নরে, মখোয় য়াম্না পাম্না চাখি। মহাক্কী মরুপ এষ্ট্রোনোতশিং মহাওশিং য়াম্না পামখি, হায়রিবা মথেলশিং অসি ভারতকী লৈমায়দা চানবা ভারত্ত চৎনিংবগী অপাম্বা মখোয় খরনা ফোঙদোকখি।

পরিক্রমা অসি চহি লিশিং কয়াগী ভারতকী শেংলবা চৎনবী অমনি হায়না ফোঙদোক্লদুনা, প্রধান মন্ত্রীনা হায়খি মালেম ইমা মশাদা পরিক্রমা পাংথোকপগী য়াম্না তাংলবা ইকায়খুম্নবা অমা হৌজিক সুভান্সুনা ফংলে। হৌজিক মালেমগী করম্বা শরুক্ত সুভান্সু কোইনা পাইরিবগে হায়না মহাক্না হংখি। মদুগী পাউখুমদা, সুভান্সুনা হায়খি হৌজিক মহাক চপ চাবা মফম খঙদে, ঙাইহাক্কী মমাঙা মহাক্না থোংনাউদগী উবদা মখোয় হৱাই মথক লানখ্রে।

মহাক্না হায়খি মখোয়না নোংমদা ১৬ রক কোইনা পাইখি-নুমিৎ থোকপা ১৬ রক অমসুং নুমিৎ তাবা ১৬ রক স্পেসতগী উবা ফংখি অমসুং মসি অঙকপা অমনি। হৌজিক মখোয় পুং অমদা কিলোমিতর ২৮,০০০ গী ময়াগী খোঙজেল অমদা পাইরবসু, স্পেক্রাফ মনুংদা খোঙজেল অসি ফাওদে। অদুবু মসিগী অয়াংবা খোঙজেল অসিনা ঙসি ভারতনা চাউখৎলকপগী খোঙজেল অদুগী খুদম ওইরে।

প্রধান মন্ত্রীগী পাউখুম পীরদুনা, সুভান্সু সুক্লানা মহাক্না অহানবা ওর্বিত্ত চংলকপা খনখিবা অমসুং পৃথিবী অসি উখিবা পাক-চাউরবা স্পেস অসিগী মতাংদা ফোঙদোকখি। মহাক্না হায়খি স্পেসতগী কনা অমতনা ঙমখৈশিং উবা ফংলোই-লৈবাকশিংগী মরক্ত ঙমখৈশিং অমতা উবা ফংদে অমসুং উরিবা অসি গ্রহ অসিগী অপুনবা শক্তম অদুনি। ঐখোয়না মেপশিং য়েংবা মতমদা ভারত য়াওনা ঐখোয়না লৈবাকশিংগী পাক-চাউবা চাংদম্নৈ অমসুং দাইমেন্সন অহুম লৈবা মালেম অসি চেদা পাকথোক্না য়েকপদগী ঐখোয়না ফিবম কাইরবা শক্তম অমা তোইনা উখি। স্পেসতগী ভারত তশেংনা য়াম্না চাউই অমসুং ফজৈ। “খেন্নবগী মরক্ত অপুনবা শক্তম’ হায়বা ভারতকী সভেত্যগী পান্দম অদুগা চুনবা শক্তি অমা মহাক্না উবা ফংখি। মথক্তগী উবদা পৃথিবী অসি ঐখোয় খুদিংমক্কী য়ুম অমা খক ওইনা উখি, পুন্না নুংশিন্না হিংমিন্নবা অমসুং মরী লৈনবগী মীওইবা খুন্নাই নিংশিংহল্লি।

সুভান্সু সুক্লা ইন্তরনেসনেল স্পেস স্তেসন্দা চৎপা অহানবা ভারতমচানি হায়না ফোঙদোক্লদুনা, পৃথিবী অসিদা মহাক্না য়াম্না কন্না হোৎনখিবা অমসুং স্পেস স্তেসন অদুদা তশেংনা ওইরম্লিবা ফিবমশিংগী মরক্ত খেন্নবগী মতাংদা প্রধান মন্ত্রীনা মহাক্কী মফমদা হংখি। সুভান্সু সুক্লা পাউখুম পীরদুনা হায়খি মাংজৌননা জিরো গ্রেভিতি অমসুং চাংয়েংশিংগী মরমদা খঙলবসু, ওর্বিত্ত ওইরম্লিবা  ফিবম অদুগা য়াম্না তোঙাল্লি। মীওইবগী হকচাংনা গ্রেভিতিদা চুশিন্নখি অমসুং মাইক্রোগ্রেভিতিদা খ্বাইদগী পীকপা থবকশিং ফাওবা ইথা থাজদনা য়াম্না লুবা ওইখি। ৱারি শানবদা ফাগি ওইনা মহাক্না হায়খি, মহাক্না মহাক্কী খোং মখাদা পুনখি-অদু নত্ত্রবদি মহাক পাইথোকখিবা য়াই। ঈশিং থকপা নত্ত্রগা তুম্বগুম্বা অচম্বা থবকশিং স্পেসদা অচৌবা খুদোংচাদবনি। কনাগুম্বা অমা সিলিংদা, ফক্লাংদা নত্ত্রগা মফম অমদা হেক্ত তুম্বা য়াই- মসি মাইকৈ লৈতবদগী ওইবনি। অহোংবা ফিবম অসিদা চুশিন্ননবা হোৎনবদা নোংমা নত্ত্রগা নুমিৎ নিনি চংই, অদুবু মসি সাইন্স অমসুং অঙকপগী ফজরবা অপুনবা অমনি।

ধ্যান তৌবা অমসুং ৱাখল খনবা অসি কান্নবরা হায়না হংবদা, সুভান্সু সুক্লানা হায়খি মসিগী কান্নবা ফংখি অমসুং সাইন্স অমসুং অধ্যাতিক অসি ভারতকী মপাঙ্গলগী য়ুম্বীশিংনি। ভারত মাঙজৌননা য়াংনা চাউখৎলি অমসুং মহাক্কী খোঙচৎ অসিদি লৈবাক্কী অচৌবা খোঙচৎ অমগী অহানবা খোংথাংনি। ভারতকী মশাগী স্পেস স্তেসন শাবা য়াওনা ভারতমচা মশিং য়াম্না স্পেসতা চৎকনি হায়বগী থাজবা থম্লি। অসিগুম্বা ফিবম অমদা ৱাখল চোইদবা অসি য়াম্না মরুওই। অকনবা ত্রেনিং মনুংদা নত্ত্রগা থাগৎপগী অকনবা প্রেসর মনুংদা ৱাখল ফাদবদা মিকুপ-নাহুম শিংবা অসি কান্নবরা হায়না হংখি। মহাক্না হায়খি স্পেসতা অচুম্বা ৱারেপ লৌবদা ৱাখল চোইদবা অসি য়াম্না মরুওই। কনাগুম্বা চারিঙৈদা চেনবা য়ারোই-  ইংতপ্না থবক তৌবনা হেন্না অফবা ওইগনি। সাইন্স অমসুং ৱাখল চনিং তানা খনবা অসি পুন্না থবক তৌমিন্নবা মতমদা, খুদোংচাদবা ফিবমশিং, হকচাং অমসুং পুক্নিং-ৱাখল চুশিন্নবদা মখোয়না চাউনা মতেং পাংই।

স্পেসতা পাংথোক্কদৌরিবা চাংয়েংশিং অসিনা তুংদা লৌউ-শিংউ নত্ত্রগা হকশেলগী লমদা কান্নবা ফংগদরা হায়না প্রধান মন্ত্রীনা হংখি। মদুগী পাউখুম পীরদুনা সুভান্সু সুক্লানা হায়খি অহানবা ওইনা, স্পেস স্তেসন্দা পাংথোক্নবা অঙকপা চাংয়েং তরেৎ ভারতকী সাইন্তিস্তশিংনা দিজাইন তৌরে। অহানবা চাংয়েং অদু স্তেম সেলশিংদা ওইগনি অমসুং গ্রেভিতি লৈতবা মফমদা হকচাংনা শাদোং মাঙশিল্লকপদা থেংনবা অমসুং শাদোং মাঙশিল্লকপা থিংনবা অকক্নবা চীঞ্জাকশিং চাবগী মতাংদা চাংয়েংশিং পাংথোক্কনি। থিজিনবা অসিনা চহিনা মরম ওইদুনা শাদোং ময়েং তারকপদগী পৃথিবীদা লৈরিবা অহলশিংনা মায়োক্নরিবা অৱাবশিং কোকহনবদা মতেং পাংগনি। অতোপ্পা চাংয়েং অমনা মাইক্রোঅলগি হৌবগী মতাংনি। মাইক্রোঅলগি পীকচরবসু, মখোয় য়াম্না মচি ওইবা ঙাক্তনি। স্পেসতগী ফংলকপা অসিদা য়ুম্ফম ওইরগা করিগুম্বা মখোয় য়াম্না পুথোকপা ঙম্লবদি মসিনা মালেমদা চীঞ্জাক ৱাৎহন্দবদা মতেং পাংগনি। স্পেসতা চাংয়েংশিং পাংথোকপদা অচৌবা খুদোংচাবদি বাইওলোজিগী থবকশিং য়াংশিনবা, থিজিল্লোয়শিংনা পৃথিবীদগী হেন্না য়াংনা ফলশিং ফংবা ঙম্বা অসিনি।

প্রধান মন্ত্রীনা হায়খি চন্দ্রয়ান মিসন মাইপাকপদগী লৈবাক অসিগী অঙাংশিং অমসুং নহারোলশিংগী মরক্ত সাইন্সতা নৌহৌননা থৱায় য়াওরে, স্পেস থিজিন্নবা পামজবা লৈরে, হৌজিক অদোমগী পুৱারি ওইরবা খোঙচৎ অসিনা ৱারেপ অসিদা অহেনবা থৌনা হাপ্লে। ঙসিগী অঙাংশিং মখা তানা শুন্দ্রংদা য়েংদ্রে-হৌজিক মখোয়সু স্পেসতা য়ৌবা ঙম্লগনি হায়বগী থাজবা লৈরে। মসিগী ৱাখল অমসুং অপাম্বা অসি ভারতকী তুংগী স্পেস মিসনশিংঘী অশেংবা য়ুম্ফমনি। মহাক্না ভারতকী নহারোলশিংদা করি পাউজেল পীনিংবগে হায়না প্রধান মন্ত্রীনা সুভান্সু সুক্লাদা হংখি।

প্রধান মন্ত্রীগী পাউখুম পীরদুনা সুভান্সু সুক্লা হায়খি, লৈবাক অসিনা থাজবগা লোয়ন্না চংশিল্লিবা মাইকৈ অসি ভারতকী নহারোলশিংনা খঙলে। হায়রিবা মঙলানশিং মঙফাওনবা ঙম্নবা ভারতকী নহারোল খুদিংমক শরুক য়াবা দরকার ওই। মাইপাক্নবগী লম্বী অমা লৈতে- মীওই অমমমনা তোঙান তোঙানবা লম্বীদা চৎপা য়াই-অদুবু মান্নবা অমদি মফম খুদিংমক্ত লৈরি। নহারোলশিং হোৎনবা লেপ্লোইদবনি, খন্নিংবা লম্বী খল্লবসু, য়াম্না য়াংনা নত্ত্রগা তপ্না মাইপাকপা ফংগনি, কৈদৌঙৈদা হোৎনবা লেপলোইদবনি।

প্রধান মন্ত্রীনা হায়খি সুভান্সু সুক্লাগী ৱাহৈশিংনা ভারতকী নহারোলশিং ইথিল পীগনি হায়না মহাক্না থাজৈ। “হোমৱার্ক” খর পীদনা মহাক্না কৈদৌঙৈদা ৱারি শানবা অমা লোইশিন্দে। ঐখোয়না মিসন গগনয়ান মাঙলোমদা চঙশিনগদবনি, ঐখোয়গী ইশাগী স্পেস স্তেসন শাগদবনি অমসুং থাদা ভারতকী এষ্ট্রোনোতশিংশু তাহনগদবনি। সুভান্সু সুক্লানা স্পেসতা পাংথোক্লিবা চাংয়েংশিং অসিনা হায়রিবা তুংগী পান্দমশিং অসি ফংবদা য়াম্না কানগনি। সুভান্সু সুক্লানা মহাক্না উবশিং অমসুং মিসন মনুংদা  তম্লকপশিং ফজনা রেকোর্দ তৌশিল্লে।

সুভান্সু সুক্লানা হায়খি মদুদি মহাক্কী ত্রেনিং মনুং অমসুং মিসন অসিদা মহাক্না স্পোঞ্জ অমগুম চুপশিনবা য়াবা চুপশিল্লে। চাংয়েং মনুংদা ফংলকপশিং অদু ভারতকী তুংগী স্পেস মিসনশিংদা য়াম্না কানগনি। হল্লকপদা মহাক্না হায়রিবা লৌশিং অসি শীজিন্নদুনা স্পেস মিসন য়াংশিন্নবা হোৎনগনি। মিসন্দা শরুক য়ারিবা মহাক্কী মালেমগী মরুপশিংনা মখোয় গগনয়াদা শরুক য়াবগী খুদোংচাবা ফংগদরা হায়না হংখি, মসিদা মহাক পুক্নিং থৌগৎখি অমসুং য়াগনি হায়না পাউখুম পীখি। তুংদা মহাক্কী মঙলান মঙফাওনবা ঙম্লগনি অমসুং মসি ফংনবা মহাক্না খঙলিবশিং চাদা ১০০ য়াংনা শীজিন্নরগনি।

সুভান্সু সুক্লাগী পাউজেলনা ভারতকী নহারোলশিং ইথিল পীগনি হায়বগী থাজবা ফোঙদোক্লদুনা, প্রধান মন্ত্রীনা হায়খি মিসন মমাঙদা মহাক্না সুভান্সু সুক্লা অমসুং মহাক্কী ইমুংগী মীওইশিংগা উনখ্রে অমসুং মখোয় হরাওবনা থনখি। সুভান্সু সুক্লাগা ৱারি শানবদা মহাক্না হরাওবা অদু প্রধান মন্ত্রীনা পাউদমখি অমসুং পুংদা কিলোমিতর ২৮,০০০ গী খোঙজেল অমদা থবক তৌরিঙৈদা মহাক্না পাংথোক্লিবা থৌদাংশিং অদু থাগৎপা ফোঙদোকখি। মসি ভারতকী গগনয়ান মিসনগী মাইপাকপগী অহানবা পন্দুব অমনি হায়না প্রধান মন্ত্রীনা ফোঙদোকখি। প্রধান মন্ত্রীনা হায়খি পুৱারি ওইরবা সুভান্সু সুক্লাগী খোঙচৎ অসি স্পেস খক্তদা নত্তে, মসিনা বিকসিত ভারতকী ঐখোয়গী খোঙচত্ত অনৌবা খোঙজেল অমসুং অনৌবা থৌনা পীগনি। মালেমগীদমক ভারতনা স্পেসতা অনৌবা মফমশিং হাংদোক্লে অমসুং লৈবাক অসিনা তুংগী ফ্লাইতশিংগীদমক লঞ্চপেদশিংসু শারগনি। ৱাহং অমগী পাউখুম খক পীবা নত্তনা থম্মোয়দগী অপনবা লৈতনা ৱা ঙাংনবা প্রধান মন্ত্রীনা সুভান্সু সুক্লাদা হায়খি, অদুবু মহাক অমসুং লৈবাক শীনবা থুংনা তানবা খৌরাংনা ঙাইরি হায়না মহাক্না ফোঙদোকখি।

মহাক্কী ত্রেনিং অমসুং স্পেস খোঙচৎকী মরমদা ফজনা খঙবগীদমক সুভান্সু সুক্লানা প্রধান মন্ত্রী থাগৎপা ফোঙদোকখি। মহাক্না হায়খি মিসন অসি লৈবাক অসিগী অচৌবা মাইপাকপা অমনি। অঙাং অমসুং নহারোল খুদিংমক য়েংলি, ভারতকী হেন্না ফবা তুংলমচৎ অমা শেমগৎনবা মখোয় মশামক অফবা ওইনবা মহাক্না মখোয়গী পুক্নিং থৌগৎখি।

মহাক্না হায়খি “অতিয়াগী পনখৈ লৈতে” – মসি মহাক্কী নত্তে, মখোয়গী নত্তে, অমসুং ভারতকী নত্তে। নহারোলশিংনা মসিদা থাজবা লৈগদবনি অমসুং ভারতকী তুংগী অমসুং মখোয় মশা ফগৎনবা মসিনা লমজিংগদবনি। প্রধান মন্ত্রীগা ৱারি শানবা অমসুং প্রধান মন্ত্রীগী খুৎথাংদা ভারতমচা করোর ১৪০ গা ৱারি শানবদা সুভান্সু সুক্লানা হরাওবা ফোঙদোকখি। নুংঙাইরবা মিকুপ অমা মহাক্না উহনখি- ইন্তরনেসনেল স্পেস স্তেসন্দা পীদ্রিবা ভারত জাতিগী ফিরাল মহাক্কী তুংদা লৈবা উখি। মহাক্না হায়খি হৌজিক ভারতনা ইন্তরনেসনেল স্পেস স্তেসন্দা য়ৌবা ঙম্বদা মহাক য়াম্না চাউথোকচৈ।

মিসন অসি মাইপাকপগীদমক প্রধান মন্ত্রী মোদীনা সুভান্সু সুক্লা অমসুং মহাক্কী মরুপ এষ্ট্রোনোতশিংদা মহাক্কী য়াইফ পাউজেল পীখি। মহাক্না হায়খি লৈবাক শীনবা থুংনা সুভান্সু সুক্লাগী হল্লকপা ঙাইরি অমসুং মহাক মশা য়াম্না চেকশিনগদবনি। সুভান্সু সুক্লানা মখা তানা ইমা ভারতকী ইকায়খুম্নবা ঙাক্নবা প্রধান মন্ত্রীনা পুক্নিং থৌগৎখি অমসুং ভারতকী মীয়াম করোর ১৪০গী মহুৎশীন্দুনা মশিং থিঙমদ্রবা য়াইফ পাউজেলশিং পীখি। সুভান্সু সুক্লা অসিগুম্বা থাকশিং য়ৌনবা কন্না হোৎনখিবা অমসুং কৎথোকপা অদু তৌবীমল খঙবা উৎতুনা প্রধান মন্ত্রীনা ৱারি শানবা অদু লোইশিনখি।

I had a wonderful conversation with Group Captain Shubhanshu Shukla as he shared his experiences from the International Space Station. Watch the special interaction! https://t.co/MoMR5ozRRA

— Narendra Modi (@narendramodi) June 28, 2025

***