மத்திய உள்துறை மற்றும் கூட்டுறவுத் துறை அமைச்சர் திரு. அமித் ஷா, இன்று புதுதில்லியில் நடைபெற்ற அலுவல் மொழித் துறையின் 'பொன்விழா கொண்டாட்டத்தில்' சிறப்பு விருந்தினராகக் கலந்து கொண்டு உரையாற்றினார். இந்த நிகழ்வில், தில்லி முதல்வர் திருமதி. ரேகா குப்தா, மத்திய உள்துறை இணையமைச்சர் திரு. பண்டி சஞ்சய் குமார், அலுவல் மொழிக்கான நாடாளுமன்றக் குழுவின் துணைத் தலைவர் திரு. பர்த்ருஹரி மஹ்தாப், மாநிலங்களவை உறுப்பினர்  திரு. சுதான்ஷு திரிவேதி, அலுவல் மொழித் துறையின் செயலாளர் திருமதி. அன்ஷுலி ஆர்யா உள்ளிட்ட பல பிரமுகர்கள் கலந்து கொண்டனர்.

நிகழ்ச்சியில் பேசிய மத்திய உள்துறை அமைச்சர் திரு. அமித் ஷா, இந்தியாவின் நூற்றாண்டு சுதந்திர விழாவில், 1975 முதல் 2025 வரையிலான அலுவல் மொழித் துறையின் 50 ஆண்டுகால பயணம், நாட்டின் சுயமரியாதையை மீட்டெடுப்பதற்கான அனைத்து முயற்சிகளிலும் பொன் எழுத்துக்களால் பொறிக்கப்படும் என்று கூறினார். நாடு அதன் கலாச்சாரத்தின் அடிப்படையில் சுயமரியாதையுடன் முன்னேற, அதன் நிர்வாகம் அதன் சொந்த மொழிகளில் நடத்தப்பட வேண்டும். அலுவல் மொழித் துறை இந்த மகத்தான நோக்கத்துடன் தொடங்கப்பட்டது, இன்று இந்த 50 ஆண்டுகால பயணம் அத்தகைய ஒரு கட்டத்தில் நிற்கிறது, அதை முன்னோக்கி எடுத்துச் சென்று மீதமுள்ள பாதையை முடிக்க அனைவரும் பாடுபட வேண்டும், என்று அறிவுறுத்தினார்.

பிரதமர் திரு. நரேந்திர மோடி அளித்த ஐந்து உறுதிமொழிகளில்  அடிமைத்தன மனநிலையிலிருந்து நம்மை விடுவித்துக் கொள்ளும் உறுதிமொழி மிகவும் முக்கியமானது என்று திரு. அமித் ஷா கூறினார். ஒருவர் தனது சொந்த மொழி மீது பெருமை கொள்ளும் வரை, தனது சொந்த மொழியில் கருத்துக்களை வெளிப்படுத்தும், சிந்திக்கும், பகுப்பாய்வு செய்யும் மற்றும் முடிவுகளை எடுக்கும் திறனை வளர்த்துக் கொள்ளும் வரை, நாம் அடிமைத்தன மனநிலையிலிருந்து விடுபட முடியாது. மொழி என்பது வெறும் தொடர்பு ஊடகம் மட்டுமல்ல, தேசத்தின் ஆன்மா என்றும் அவர் கூறினார். நமது வேர்கள், மரபுகள், வரலாறு, அடையாளம் மற்றும் கலாச்சார வாழ்க்கை முறை ஆகியவை மொழியிலிருந்து துண்டிக்கப்பட்டால் முன்னேற முடியாது, மேலும் மொழிகளை உயிருடன் வைத்திருப்பதும் அவற்றை வளப்படுத்துவதும் அவசியம் என்று அவர் கூறினார்.

கடந்த 11 ஆண்டுகளில் பிரதமர் மோடி "ஒரே பாரதம், உன்னத பாரதம்" திட்டத்தைத் தொடங்கியுள்ளார் என்றும், இந்த முயற்சியின் கீழ், காசி-தமிழ் சங்கமம், காசி-தெலுங்கு சங்கமம், சௌராஷ்டிரா-தமிழ் சங்கமம், ஷாஷ்வத் மிதிலா பெருவிழா, பாஷா சங்கம் போன்ற நிகழ்வுகள் நாட்டை வலுப்படுத்த மிகவும் பயனுள்ள தளத்தை வழங்கியுள்ளன என்றும் மத்திய உள்துறை அமைச்சர் கூறினார். இன்று இந்தியாவில் சமஸ்கிருதம், தமிழ், தெலுங்கு, கன்னடம், மலையாளம், ஒடியா, மராத்தி, பாலி, பிராகிருதம், அசாமி மற்றும் பெங்காலி என 11 செம்மொழிகள் உள்ளன என்று அவர் தெரிவித்தார். 2020 ஆம் ஆண்டில், சமஸ்கிருதத்திற்கான மூன்று கேந்திரிய வித்யாலயாக்கள் நிறுவப்பட்டதாகவும், செம்மொழி தமிழ் ஆராய்ச்சி மற்றும் மொழிபெயர்ப்புக்கான மத்திய  நிறுவனம் தொடங்கப்பட்டதாகவும் அவர் கூறினார்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்:

https://www.pib.gov.in/PressReleasePage.aspx?PRID=2139919

----

AD/RB/DL