କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ନୂଆଦିଲ୍ଲୀରେ ରାଜଭାଷା ବିଭାଗର 'ସୁବର୍ଣ୍ଣ ଜୟନ୍ତୀ ସମାରୋହ' କୁ ମୁଖ୍ୟ ଅତିଥି ଭାବେ ସମ୍ବୋଧିତ କରିଛନ୍ତି। ଏହି ଅବସରରେ ଦିଲ୍ଲୀ ମୁଖ୍ୟମନ୍ତ୍ରୀ ଶ୍ରୀମତୀ ରେଖା ଗୁପ୍ତାଙ୍କ ସମେତ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଶ୍ରୀ ବନ୍ଦୀ ସଞ୍ଜୟ କୁମାର, ରାଜଭାଷା ଉପରେ ଗଠିତ ସଂସଦୀୟ କମିଟିର ଉପାଧ୍ୟକ୍ଷ ଶ୍ରୀ ଭର୍ତୃହରି ମହତାବ, ରାଜ୍ୟସଭା ସାଂସଦ ଶ୍ରୀ ସୁଧାଂଶୁ ତ୍ରିବେଦୀ ଏବଂ ରାଜଭାଷା ବିଭାଗର ସଚିବ ଶ୍ରୀମତୀ ଅଂଶୁଲି ଆର୍ଯ୍ୟଙ୍କ ସମେତ ଅନେକ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।

କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଅମିତ ଶାହ ତାଙ୍କ ଅଭିଭାଷଣରେ କହିଥିଲେ ଯେ ଭାରତର ସ୍ୱାଧୀନତାର ଶତବାର୍ଷିକୀ ଅବସରରେ ରାଷ୍ଟ୍ରର ଆତ୍ମସମ୍ମାନର ପୁନରୁଦ୍ଧାର ପାଇଁ ସମସ୍ତ ପ୍ରୟାସ ମଧ୍ୟରେ ରାଜଭାଷା ବିଭାଗର ୧୯୭୫ରୁ ୨୦୨୫ ପର୍ଯ୍ୟନ୍ତ ୫୦ ବର୍ଷର ଯାତ୍ରା ସ୍ୱର୍ଣ୍ଣିମ ଅକ୍ଷରରେ ଲିପିବଦ୍ଧ ହେବ। ସେ କହିଥିଲେ ଯେ ରାଜଭାଷା ବିଭାଗ ପ୍ରତିଷ୍ଠା କରିବାର ଉଦ୍ଦେଶ୍ୟ ହେଉଛି ଏହା ସୁନିଶ୍ଚିତ କରିବା ଯେ ଦେଶର ଶାସନ ନାଗରିକମାନଙ୍କ ଭାଷାରେ ପରିଚାଳିତ ହେଉ ଏବଂ ପ୍ରଶାସନରେ ଭାରତୀୟ ଭାଷାର ବ୍ୟବହାର ଦ୍ୱାରା ରାଷ୍ଟ୍ରର ଆତ୍ମସମ୍ମାନ ଜାଗ୍ରତ ହେଉ। ଶ୍ରୀ ଶାହ କହିଥିଲେ ଯେ କୌଣସି ଦେଶ ନିଜର ଭାଷା ବିନା ନିଜର ସଂସ୍କୃତି, ସାହିତ୍ୟ, ଇତିହାସ ଏବଂ ସାମାଜିକ ମୂଲ୍ୟବୋଧକୁ ସଂରକ୍ଷିତ କରିପାରିବ ନାହିଁ। ଦେଶ ନିଜ ସଂସ୍କୃତି ଆଧାରରେ ଆତ୍ମସମ୍ମାନର ସହ ଆଗକୁ ବଢ଼ିବା ପାଇଁ, ଏହାର ଶାସନ ନିଜ ଭାଷାରେ ପରିଚାଳିତ ହେବା ଆବଶ୍ୟକ। ଏହି ମହାନ ଉଦ୍ଦେଶ୍ୟ ସହିତ ରାଜଭାଷା ବିଭାଗର ଆରମ୍ଭ ହୋଇଥିଲା ଏବଂ ଏହି ୫୦ ବର୍ଷର ଯାତ୍ରା ଆଜି ଏପରି ଏକ ମୋଡ଼ରେ ଛିଡ଼ା ହୋଇଛି ଯେଉଁଠାରେ ଆମକୁ ଏହାକୁ ଆଗକୁ ନେବା ଏବଂ ଅବଶିଷ୍ଟ ପଥକୁ ସମ୍ପୂର୍ଣ୍ଣ କରିବା ପାଇଁ ପ୍ରୟାସ କରିବାକୁ ପଡିବ। ସେ କହିଥିଲେ ଯେ ଏହି ୫୦ ବର୍ଷର ଯାତ୍ରା ଆମ ସମସ୍ତଙ୍କ ଦ୍ୱାରା ସଂଘର୍ଷ, ସମର୍ପଣ ଏବଂ ସଂକଳ୍ପର ମୂଳଦୁଆ ଉପରେ ମିଳିତ ଭାବେ ସମାପ୍ତ ହୋଇଛି।

ଶ୍ରୀ ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଦିଆଯାଇଥିବା ପାଞ୍ଚଟି ସଂକଳ୍ପ (ପଞ୍ଚ ପ୍ରାଣ) ମଧ୍ୟରୁ ନିଜକୁ ଦାସତ୍ୱ ମାନସିକତାରୁ ମୁକ୍ତ କରିବାର ସଂକଳ୍ପ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଯେ ପର୍ଯ୍ୟନ୍ତ ଜଣେ ବ୍ୟକ୍ତି ନିଜ ଭାଷାକୁ ନେଇ ଗର୍ବ କରେ ନାହିଁ, ଏବଂ ନିଜ ଭାଷାରେ ବ୍ୟକ୍ତ କରିବା, ଚିନ୍ତା କରିବା, ବିଶ୍ଳେଷଣ କରିବା ଏବଂ ନିଷ୍ପତ୍ତି ନେବାର କ୍ଷମତା ବିକଶିତ କରେ ନାହିଁ, ସେ ପର୍ଯ୍ୟନ୍ତ ଆମେ ଦାସତ୍ୱ ମାନସିକତାରୁ ମୁକ୍ତ ହୋଇପାରିବୁ ନାହିଁ। ସେ କହିଥିଲେ ଯେ ଭାଷା କେବଳ ଯୋଗାଯୋଗର ମାଧ୍ୟମ ନୁହେଁ, ବରଂ ରାଷ୍ଟ୍ରର ଆତ୍ମା। ଆମର ମୂଳ, ପରମ୍ପରା, ଇତିହାସ, ପରିଚୟ ଏବଂ ସାଂସ୍କୃତିକ ଜୀବନଶୈଳୀ ଯଦି ଭାଷାରୁ ବିଚ୍ଛିନ୍ନ ହୁଏ ତେବେ ପ୍ରଗତି କରିପାରିବ ନାହିଁ, ତେଣୁ ଭାଷାଗୁଡ଼ିକୁ ଜୀବନ୍ତ ରଖିବା ଏବଂ ସେଗୁଡ଼ିକୁ ସମୃଦ୍ଧ କରିବା ଜରୁରୀ। ସେ କହିଥିଲେ ଯେ ଆଗାମୀ ଦିନରେ ଆମକୁ ସମସ୍ତ ଭାରତୀୟ ଭାଷା, ବିଶେଷ କରି ରାଜଭାଷା ପାଇଁ ଏଭଳି ପ୍ରୟାସ କରିବାକୁ ପଡ଼ିବ।

କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଛନ୍ତି ଯେ ଗତ ୧୧ ବର୍ଷ ମଧ୍ୟରେ ପ୍ରଧାନମନ୍ତ୍ରୀ ମୋଦୀ "ଏକ ଭାରତ, ଶ୍ରେଷ୍ଠ ଭାରତ" କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି ଏବଂ ଏହି ପଦକ୍ଷେପ ଅଧୀନରେ କାଶୀ-ତାମିଲ ସଙ୍ଗମ, କାଶୀ-ତେଲୁଗୁ ସଙ୍ଗମ, ସୌରାଷ୍ଟ୍ର-ତାମିଲ ସଙ୍ଗମ, ଶାଶ୍ୱତ ମିଥିଲା ମହୋତ୍ସବ ଏବଂ ଭାଷା ସଙ୍ଗମ ଭଳି କାର୍ଯ୍ୟକ୍ରମ ଦେଶର ଏକତାକୁ ମଜବୁତ କରିବା ପାଇଁ ଏକ ପ୍ରଭାବଶାଳୀ ମଞ୍ଚ ପ୍ରଦାନ କରିଛି। ସେ କହିଥିଲେ ଯେ ଆଜି ଭାଷା ସଙ୍ଗମ ପଦକ୍ଷେପର ଅଂଶବିଶେଷ ସ୍ୱରୂପ ପ୍ରତ୍ୟେକ ବିଦ୍ୟାଳୟରେ ସମ୍ବିଧାନ ଦ୍ୱାରା ସ୍ୱୀକୃତିପ୍ରାପ୍ତ ୨୨ଟି ଭାଷାରେ ସାଧାରଣତଃ ବ୍ୟବହୃତ ୧୦୦ଟି ବାକ୍ୟ ଛାତ୍ରଛାତ୍ରୀଙ୍କୁ ପଢ଼ାଇବା ପାଇଁ ଏକ କାର୍ଯ୍ୟକ୍ରମ ପରିଚାଳିତ କରାଯାଉଛି। ଶ୍ରୀ ଶାହ କହିଥିଲେ ଯେ ଭାଷା ସଙ୍ଗମ ଜରିଆରେ ଆରମ୍ଭ ହୋଇଥିବା ଏହି ପଦକ୍ଷେପ ଆଗାମୀ ଦିନରେ ଭାରତୀୟ ଭାଷାଗୁଡ଼ିକ ପାଇଁ ଏକ ଜୀବନଦାନକାରୀ ଶକ୍ତିରେ ପରିଣତ ହେବ ଏବଂ ଏକ ବିଶାଳ ବଟବୃକ୍ଷ ଭଳି ବୃଦ୍ଧି ପାଇବ। ଶ୍ରୀ ଅମିତ ଶାହ କହିଥିଲେ ଯେ ରାଜଭାଷା ବିଭାଗ "ହିନ୍ଦୀ ଶବ୍ଦସିନ୍ଧୁ" ସୃଷ୍ଟି କରିଛି, ଯାହା ରାଜଭାଷାକୁ ଗ୍ରହଣଯୋଗ୍ୟ, ନମନୀୟ ଏବଂ ବ୍ୟାପକ କରିବା ପାଇଁ ଏକ ପ୍ରମୁଖ ପ୍ରୟାସ। ସେ କହିଥିଲେ ଯେ କୌଣସି ଭାଷାକୁ ସମୃଦ୍ଧ କରିବାରେ କୌଣସି ଦ୍ୱିଧା ରହିବା ଉଚିତ ନୁହେଁ, ଏବଂ ସାଧାରଣତଃ କୁହାଯାଉଥିବା ଶବ୍ଦଗୁଡ଼ିକ-ସେଗୁଡ଼ିକର ଉତ୍ପତ୍ତି ଯାହା ହେଉନା କାହିଁକି-ଥରେ ହିନ୍ଦୀ ଶବ୍ଦସିନ୍ଧୁରେ ସାମିଲ ହୋଇଗଲେ, ଭବିଷ୍ୟତରେ ସେଗୁଡ଼ିକୁ ହିନ୍ଦୀ ଶବ୍ଦ ଭାବେ ସ୍ୱୀକୃତି ଦିଆଯିବ। ସେ ବିଶ୍ୱାସ ବ୍ୟକ୍ତ କରିଥିଲେ ଯେ ହିନ୍ଦୀ ଶବ୍ଦସିନ୍ଧୁ କେବଳ ହିନ୍ଦୀକୁ ଅଧିକ ନମନୀୟ ଏବଂ ସମୃଦ୍ଧ କରିବ ନାହିଁ, ବରଂ ଏହାକୁ ଅନ୍ୟ ଭାରତୀୟ ଭାଷା ସହିତ ମଧ୍ୟ ଯୋଡ଼ିବ।

କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ କହିଛନ୍ତି ଯେ ଚଳିତ ବର୍ଷ ଭାରତୀୟ ଭାଷା ଅନୁଭାଗ ମଧ୍ୟ ପ୍ରତିଷ୍ଠା କରାଯାଇଛି। ସେ କହିଥିଲେ ଯେ ହିନ୍ଦୀ କୌଣସି ଭାରତୀୟ ଭାଷାର ବିରୋଧୀ ହୋଇପାରିବ ନାହିଁ। ସେ କହିଥିଲେ ଯେ ହିନ୍ଦୀ ସମସ୍ତ ଭାରତୀୟ ଭାଷାର ବନ୍ଧୁ ଏବଂ ହିନ୍ଦୀ ଏବଂ ଅନ୍ୟ ଭାରତୀୟ ଭାଷାଗୁଡ଼ିକ ମିଳିତ ଭାବେ ଆମର ଆତ୍ମସମ୍ମାନ ବୃଦ୍ଧି କାର୍ଯ୍ୟକ୍ରମକୁ ଏହାର ଅନ୍ତିମ ଲକ୍ଷ୍ୟ ପର୍ଯ୍ୟନ୍ତ ନେଇପାରିବେ। ସେ କହିଥିଲେ ଯେ ରାଜ୍ୟ ଏବଂ ଭାରତ ସରକାରଙ୍କ ପ୍ରଶାସନ ଯେପରି ଭାରତୀୟ ଭାଷାରେ ପରିଚାଳିତ ହୁଏ ତାହା ସୁନିଶ୍ଚିତ କରିବା ଲାଗି ଭାରତୀୟ ଭାଷା ଅନୁଭାଗ ପ୍ରତ୍ୟେକ ରାଜ୍ୟକୁ ସହାୟତା କରିବ। ଶ୍ରୀ ଶାହ ଉଲ୍ଲେଖ କରିଥିଲେ ଯେ ଆମ ଦେଶରେ ୧୨ଟି ଭାରତୀୟ ଭାଷାରେ ବୈଷୟିକ ଶିକ୍ଷା ଆରମ୍ଭ କରାଯାଇଛି। ସେ ଆହୁରି ମଧ୍ୟ କହିଛନ୍ତି ଯେ ମଧ୍ୟପ୍ରଦେଶ ସମ୍ପୂର୍ଣ୍ଣ ପାଠ୍ୟକ୍ରମ ପ୍ରସ୍ତୁତ କରି ହିନ୍ଦୀରେ ଡାକ୍ତରୀ ଶିକ୍ଷା ଆରମ୍ଭ କରିଛି ଏବଂ ଆଗାମୀ ଦିନରେ ଅନ୍ୟ ରାଜ୍ୟଗୁଡ଼ିକ ମଧ୍ୟ ପିଲାମାନଙ୍କ ପାଇଁ ସୁବିଧା ଯୋଗାଇବା ପାଇଁ ନିଜ ନିଜ ଭାଷାରେ ସମ୍ପୂର୍ଣ୍ଣ ଡାକ୍ତରୀ ଶିକ୍ଷା ପାଠ୍ୟକ୍ରମ ପ୍ରସ୍ତୁତ କରିବେ। ସେ ସମସ୍ତ ରାଜ୍ୟକୁ ସେମାନଙ୍କ ରାଜ୍ୟ ଭାଷାରେ ଇଞ୍ଜିନିୟରିଂ ଏବଂ ଡାକ୍ତରୀ ଶିକ୍ଷା ପ୍ରଦାନ କରିବା ପାଇଁ ବ୍ୟବସ୍ଥା କରିବାକୁ ଅନୁରୋଧ କରିଥିଲେ।

ଶ୍ରୀ ଅମିତ ଶାହ କହିଥିଲେ ଯେ କୌଣସି ରାଜ୍ୟ ନିଜ ମାତୃଭାଷାକୁ ଅଣଦେଖା କରି କେବେ ବି ମହାନ ହୋଇପାରିବ ନାହିଁ ଏବଂ ମୋଦୀ ସରକାର ନିଜ ଭାଷାଗୁଡ଼ିକୁ ସମ୍ମାନ ଓ ମର୍ଯ୍ୟାଦା ଦେବା ପାଇଁ ଅନେକ ପ୍ରୟାସ କରିଛନ୍ତି। ପ୍ରଧାନମନ୍ତ୍ରୀ ମୋଦୀଙ୍କ କାର୍ଯ୍ୟକାଳରେ ମରାଠୀ, ପାଲି, ପ୍ରକୃତି, ଆସାମୀ ଏବଂ ବଙ୍ଗଳା ଭାଷାକୁ ଶାସ୍ତ୍ରୀୟ ଭାଷା ଭାବେ ସ୍ୱୀକୃତି ମିଳିଛି। ସେ କହିଥିଲେ ଯେ ଆଜି ଭାରତରେ ସଂସ୍କୃତ, ତାମିଲ, ତେଲୁଗୁ, କନ୍ନଡ, ମାଲାୟାଲମ୍, ଓଡ଼ିଆ, ମରାଠୀ, ପାଲି, ପ୍ରାକୃତ, ଆସାମୀ ଏବଂ ବଙ୍ଗଳା ଭଳି ୧୧ଟି ଶାସ୍ତ୍ରୀୟ ଭାଷା ଉପଲବ୍ଧ। ସମଗ୍ର ବିଶ୍ୱରେ ଏପରି କୌଣସି ଦେଶ ନାହିଁ ଯେଉଁଥିରେ ୧୧ଟି ଶାସ୍ତ୍ରୀୟ ଭାଷା ରହିଛି। ସେ କହିଥିଲେ ଯେ ୨୦୨୦ ମସିହାରେ ସଂସ୍କୃତ ପାଇଁ ତିନୋଟି କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା କରାଯାଇଥିଲା ଏବଂ କେନ୍ଦ୍ରୀୟ ଶାସ୍ତ୍ରୀୟ ତାମିଲ ଗବେଷଣା ଏବଂ ଅନୁବାଦ ପ୍ରତିଷ୍ଠାନ ପ୍ରତିଷ୍ଠା କରାଯାଇଥିଲା। ଶ୍ରୀ ଶାହ କହିଥିଲେ ଯେ ରାଜଭାଷା ଉପରେ ଗଠିତ ସଂସଦୀୟ କମିଟି ଗତ ୪ ବର୍ଷ ମଧ୍ୟରେ ୩ଟି ଖଣ୍ଡ ପ୍ରକାଶ କରିଛି। ସେ କହିଥିଲେ ଯେ କୋଭିଡ ସତ୍ତ୍ୱେ ୩ଟି ଖଣ୍ଡ ପ୍ରକାଶିତ ହୋଇଛି। ଶ୍ରୀ ଶାହ କହିଥିଲେ ଯେ ୨୦୧୪ ମସିହା ପର୍ଯ୍ୟନ୍ତ ମୋଟ ୯ଟି ଖଣ୍ଡ ପ୍ରକାଶିତ ହୋଇଥିଲା ଏବଂ ୨୦୧୯ ମସିହା ପରେ ଏବେ ୩ଟି ଖଣ୍ଡ ପ୍ରକାଶିତ ହୋଇଛି, ଯାହା ଏକ ବଡ଼ ସଫଳତା। କୋଭିଡ-୧୯ ସମୟରେ କେନ୍ଦ୍ରୀୟ ହିନ୍ଦୀ ତାଲିମ ପ୍ରତିଷ୍ଠାନ ଏବଂ କେନ୍ଦ୍ରୀୟ ଅନୁବାଦ ବ୍ୟୁରୋର ଇ-ପ୍ରଶିକ୍ଷଣ ଜରିଆରେ ହିନ୍ଦୀ ଭାଷା, ହିନ୍ଦୀ ଟାଇପିଙ୍ଗ, ହିନ୍ଦୀ ଷ୍ଟେନୋଗ୍ରାଫି ଏବଂ ହିନ୍ଦୀ ଅନୁବାଦରେ ତାଲିମ ଆରମ୍ଭ କରାଯାଇଥିଲା, ଯାହାକୁ ଏବେ ନିୟମିତ କରିବା ଲାଗି ନିଷ୍ପତ୍ତି ନିଆଯାଇଛି।

କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀ ୨୦୨୦ରେ ନୂତନ ଶିକ୍ଷା ନୀତି (ଏନଇପି) ଆଣିଥିଲେ। ସେ କହିଥିଲେ ଯେ ଯେକୌଣସି ଦେଶ ପାଇଁ ଶିକ୍ଷା ନୀତି ହେଉଛି ଆଗାମୀ ୫୦ ବର୍ଷ ମଧ୍ୟରେ ଦେଶ କେଉଁ ଦିଗରେ ଗତି କରିବ ତାହାର ପ୍ରତିଫଳନ। ଏନଇପି-୨୦୨୦ରେ ପଞ୍ଚମ ଏବଂ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ମାତୃଭାଷା ଏବଂ ସ୍ଥାନୀୟ ଭାଷା ଶିକ୍ଷା ଉପରେ ଗୁରୁତ୍ୱ ଦିଆଯାଇଛି। ସେ କହିଥିଲେ ଯେ ଆମ ଭାଷାଗୁଡ଼ିକର ବିକାଶକୁ ନୀତିଗତ ଭାବେ ସମର୍ଥନ କରାଯାଇଛି ଏବଂ ୨୨ଟି ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରେ ପ୍ରାଥମିକ ଶ୍ରେଣୀର ୧୦୪ଟି ପୁସ୍ତକ ମଧ୍ୟ ଆରମ୍ଭ କରାଯାଇଛି। ଶ୍ରୀ ଶାହ କହିଛନ୍ତି ଯେ ଭାରତୀୟ ସାଙ୍କେତିକ ଭାଷା ପାଇଁ ପ୍ରଥମରୁ ଦ୍ୱାଦଶ ଶ୍ରେଣୀ ପାଇଁ ଅନୁବାଦିତ ଶିକ୍ଷାଦାନ ସାମଗ୍ରୀ ଏବଂ ପୁସ୍ତକ ଉପଲବ୍ଧ କରାଯାଇଛି। ୨୦୦ରୁ ଅଧିକ ଟିଭି ଚ୍ୟାନେଲ ୨୯ ଟି ଭାଷାରେ ଶିକ୍ଷାଗତ ବିଷୟବସ୍ତୁ ପ୍ରଦାନ କରନ୍ତି ଏବଂ ଦୀକ୍ଷା ପ୍ଲାଟଫର୍ମରେ ୭ ଟି ବିଦେଶୀ ଭାଷା ସମେତ ୧୩୩ ଟି ଉପଭାଷାରେ ୩,୬୬,୦୦୦ ରୁ ଅଧିକ ଇ-ବିଷୟବସ୍ତୁ ଉପଲବ୍ଧ କରାଯାଇଛି। ସେ କହିଥିଲେ ଯେ ନୂତନ ଶିକ୍ଷା ନୀତିର ଏହି ପଦକ୍ଷେପ ରାଜଭାଷା ଏବଂ ଭାରତୀୟ ଭାଷାଗୁଡ଼ିକୁ ସୁଦୃଢ଼ କରିବାରେ ବହୁତ ସହାୟକ ହେବ। ସ୍ୱରାଷ୍ଟ୍ର ମନ୍ତ୍ରୀ ଏହା ମଧ୍ୟ କହିଛନ୍ତି ଯେ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ (ସିଏପିଏଫ) ରେ କନଷ୍ଟେବଳ ପଦବୀ ପାଇଁ ପରୀକ୍ଷା ବର୍ତ୍ତମାନ ଭାରତୀୟ ଭାଷାରେ ପରିଚାଳିତ ହେଉଛି ଏବଂ ୯୫ ପ୍ରତିଶତ ଆବେଦନକାରୀ ସେମାନଙ୍କ ମାତୃଭାଷାରେ ପରୀକ୍ଷା ଦେଉଛନ୍ତି। ଏହା ଦର୍ଶାଉଛି ଯେ ଆଗାମୀ ଦିନରେ ଭାରତୀୟ ଭାଷାଗୁଡ଼ିକର ଭବିଷ୍ୟତ ଅତ୍ୟନ୍ତ ଉଜ୍ଜ୍ୱଳ।

ଶ୍ରୀ ଅମିତ ଶାହ କହିଥିଲେ ଯେ ରାଜଭାଷା ବିଭାଗ ନିଷ୍ପତ୍ତି ନେଇଛି ଯେ ଆଗାମୀ ଦିନରେ ଆମେ ଭାରତୀୟ ଭାଷା ଅନୁଭାଗ ମାଧ୍ୟମରେ ଭାରତୀୟ ଭାଷାକୁ କିଶୋର ଏବଂ ଯୁବକମାନଙ୍କ ଭାଷାରେ ପରିଣତ କରିବୁ। ସେ କହିଥିଲେ ଯେ ଗତ କିଛି ଦଶନ୍ଧି ମଧ୍ୟରେ ଭାଷାକୁ ଭାରତକୁ ଭାଙ୍ଗିବାର ଏକ ଉପକରଣ କରାଯାଇଥିଲା, କିନ୍ତୁ ଏହି ପ୍ରୟାସ ସଫଳ ହୋଇନଥିଲା। ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ଆମକୁ ଏହା ସୁନିଶ୍ଚିତ କରିବାକୁ ହେବ ଯେ ଆମ ଭାଷାଗୁଡ଼ିକ ଭାରତକୁ ଯୋଡ଼ିବା ପାଇଁ ଏକ ଶକ୍ତିଶାଳୀ ମାଧ୍ୟମ ହେଉ, ଏହାକୁ ଭାଙ୍ଗିବା ପାଇଁ ନୁହେଁ। ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଆଜି ଯେଉଁ ଭିତ୍ତିପ୍ରସ୍ତର ସ୍ଥାପନ କରାଯାଉଛି, ତାହା ୨୦୪୭ ମସିହାରେ ଏକ ବିକଶିତ ଏବଂ ମହାନ ଭାରତ ଗଠନ କରିବ। ଏହା ଅଧୀନରେ ଭାରତୀୟ ଭାଷାଗୁଡ଼ିକର ବିକାଶ ଏବଂ ସମୃଦ୍ଧି ହେବା ସହିତ ସେଗୁଡ଼ିକର ଉପଯୋଗିତା ମଧ୍ୟ ବୃଦ୍ଧି ପାଇବ।

HS